الأحد، 10 مايو 2009

وردة مُهانة

قالّى هجيبلك وردة جميلة
فيها منك حاجات كتيرة
رقتها ولونها وعودها
حتى شوكــــــها
قلت وماله عايزة أشوفها
قالى تعالى معايا نجيبها
رُحت معاه واختارها
من وسط الكون نقاها
وقالى شايفة
لونها فى خدودك
ورقتها فى عودك
و..وكلام كتير ساعتها قاله
بس ماسمعتش مجاله
لما وقعت عينيا عليها
مع بطاقته وبيبص فيها
رميت الوردة ودوست عليها
لما لقيت صورتها فيها
قالى استنى ده أنتِ وأنتِ
أنتِ حبيبتى ودايما أنتِ
قلت شبعت كلام مسموم
قالى إذا كانوا فى سمايا نجوم
فأنتِ فى سمايا قمر مرسوم
قلت شوف لك صورة غيرى
تكمل بيها الألبوم
ومشيت وسيبته مع ذكرياته
يمكن يلاقى فيهم حياته
ومش زعلانة ولا ندمانة
لإنى أختارت أكون إنسانة
لا ترضى بذل ولا بإهانة
*******
على الهامش
------------
* ما للخيانة باب للغفران.
* هناك علامات يجب أن نضعها فى الإعتبار حتى لانندم فيما بعد.





هناك 56 تعليقًا:

حمـــــــــــــــــــــة يقول...

الدخول للبيوت من أبوابها الأمامية بعد إستئذان أهلها و يحبذ في النهار لا الليل.

Ahmed يقول...

الخيانه شئ بيجرح
جرحه كله انه بيصيب كبرياء الانسان

الخيانه من الأمراض اللي جرحها ملوش دوا

كلامك جميل جدا

salma mohamed يقول...

بجد بجد احساس الخيانة من اصعب المشاعر اللي ممكن نتعرض لها,
ربنا ما يبلينا ابدا.

موناليزا يقول...

هاما
ــــــــ
اهلا بيك يافندم
صح الكلام
وده طبيعى لان اسلامنا بيقولنا كده
دمت طيبا ولمدونتى زائرا





********************************





احمد ابو العلا
ــــــــــــــ
اهلا بيك استاذ احمد
اشكرك جدا لرايك ولتعليقك
دمت طيبا ولمدونتى زائرا






********************************





سلمى محمد
ــــــــــــ
اختى الحبيبة:اشكرك جدا لتعليقك
نورتينى سلمى الجميلة ودمتِ بخير

صيدلانيه طالعه نازله يقول...

الخيانه بتوجع قوى و خصوصا لو من شخص عزيزعلينا ساعتها بنحس بالجرح اكتر من لو كانت من حد غريب
و اللى يخون مره عمره ما يتآمن ليه تانى

غير معرف يقول...

الخيانة من أصعب الامور
بل واشدها على النفس
وبتعمل شرخ جوه النفس صعب ترميمه
حفظك الله من كل خائن ودمتى بخير

د. ياسر عمر عبد الفتاح يقول...

الخيانة طبعاً فعل خسيس
وبيزجع أوي
خاصةً لما بتجي من حد قريب
ربنا يقينا شر الخيانة

احساس طفلة محبة للرومانسية بس واقعية يقول...

قالى استنى ده أنتِ وأنتِ
أنتِ حبيبتى ودايما أنتِ
قلت شبعت كلام مسموم
قالى إذا كانوا فى سمايا نجوم
فأنتِ فى سمايا قمر مرسوم

لا مش ممكن التعبيرات دى
الصورة مرسومة صح 100 % بالمعانى اللى فيها فعلا فى ناس بالشكل دا فى الحياة
لا يبالوا بمعنى الكلمات فقط يقول ويقول مادام هناك من يسمع ويستطيع ان يتلاعب بمشاعرة والصدمة وكل الالم بيكون فى الطرف الاخر حتى لو بدون ندم تظل الجراح

شكرا ليك
تقبلى مرورى

محمد يقول...

السلام عليكم ورحمة الله وبركاته


أختي موناليزا


أقول ايه بس

بالله عليكي كفاية تراجيديا تاني وخلي بطلة القصة تعيش حياة جديدة

ولها دعواتي من قلبي أن تجد من يحقق لها هذه السعادة

خالص مودتي وصادق دعائي

صمت الحنين يقول...

اصعب احساس ممكن يحسه الانسان هو الخيانه من انسان اعطاه قلبه وسلمه مشاعره وكل حياته ويكون المقابل لكل ده الخيانه بجد احساس مؤلم بيعمل جرح صعب انه يداوى بسهوله

تعبيراتك فى البوست جميله موناليزا
تسلمى ودمتى بكل خير

maha zein يقول...

]ا الهي
ربنا ما يعرضنا للخيانة ابدا
الانسان الخائن ده كفيل بانه يدمر حياته وحياة من حوله

آخر العنقود يقول...

كلامك جميل قوى يامنمن
بجد بيعجبنى لمحاتك وكلامك جدا
بحسه قريب قوى مننا ومن جوانا
بس الخيانة ربنا يبعدها عنا

تسلم الايادى على تعبيراتك
ووحشانى بجد

رحلتنا في الحياة يقول...

اللى عجبنى انها قدرت تاخد قرار بسرعة وترجع لنفسها مش زى بنات كتير مش بتعرف ترجع غير بعد فوات الاوان

مسدس صغير يقول...

حتى نأخذ حذرنا قدر الامكان من الخيانة
لابد ان نحكم العقول قبل القلوب والاهواء
احييكى على الكلمات الجميلة التى تحمل معانى اجمل

ومازلتُ أتعلم يقول...

خيانة!
اكتر حاجة صعبة شوفتها فى حياتى
الخيانة وعدم الاخلاص
حتى بعد مالزوجة تموت
شوفت رجالةعجوزة بعديها بكام شهر يتزوجوا
طيب ليه؟
انا عارفة ان كتير هيعارضنى
بس بجد لو ليه معاها كلم ذكرى حلوة مش هينساها ابدا بعد ماتموت
مابلك بقى وهيه لسه عايشة وبيخونها ويتزوج عليها

حاجة تجرح الست مهما كان زوجها مش بيحبها
لازم يكون فيه مراعاة للشعور

القدر و انا يقول...

موناليزا
الخيانة .. مهما كانت وكانت وكانت ...
الا ان انتقام ربنا عليها رهيب ..
دنيا .... واخرة
الجزء الجميل هنا ان الانسان لا يهان .. و لابد ان يحافظ على كبريائه وكرامته حتى يستحق لقب انسان

شمس النهار يقول...

الخيانه
كلمه جارحه
مش عارفه ازاي انسان ممكن يجيله قلب يخدع انسان حتي لو مش بيحبه
ليه الشر
ليه الخاين بيستمتع بشكل الطرف الاخر وهو ماشي في الدنيا فاهم ان اللي قصاده قمت الوفاء

rovy يقول...

مش زعلانه .. ولا ندمانه
لأنى اخترت اكون انسانه
لا ترضى بذل و لا باهانه
الله عليكى يا موناليزا
انتى قلتى الخلاصه حبيبتى
بجد تسلم ايديك .. حقيقى جميله قوى و حسيتها قوى ..
دمتى بكل الود ياغاليه
دمتى عزيزه و دمتى ابيه

خالص ودى و ارق تحيه

و بجد وحشاانى خالص جدااااااا

حاسوباتيه يقول...

ياه حلوه حلوه حلوه تسلم ايدك بجد صورتي الخيانه والغش بصوره رائعه في ورده تسلم ايدك

حارة سد يقول...

وان كنت ما زلت مصرا على تذوقي للغة العربية أكثر من العامية

الا أنه لا انكر ابداعك حين كتبتي تلك السطر

دمتي بخير وتالق
الحارة سد

jonoon 3aqel يقول...

الخيانة...

انا مش بحترم الخاين...
و مش بطلع ليه اعذار..لكن...

هل كونه انه يخفي الخيانة..و يلحق حبيبته عشان يراضيها..
هل دا معناه انه بحق بيحبها و اللي حصل مجرد زله؟؟؟
طبعا هذا مثال خاص في صورة معينه و لنا أن نعممه على الخيانات بأنواعها..

دمتي بخير
تحياتي

ريمان يقول...

ما اصعب الخيانه

:(

الفقيرة إلى الله أم البنات يقول...

ليس للخيانه مبرر حتى نجد لها باب للغفران

ومن يغفل او يتغافل عن مايراه فى البدايه لا يلوم إلا من خانه من نفسه وتآمر عليه ورضى بالتهاون

عقل الانسان نفسه

كفايـة طيبـة يقول...

الخيانة

يمكن مش جربتها بالمعني القاسي ليها بشكل شخصي
بس شوفت ناس جربتها ومقربة منهم وعارفة احساسهم كويس اوى
وعلطول بدعيلهم ربنا يخفف عنهم الاحساس ده كل ما يشوفوا اللى خانهم ادام عينيهم
وردة مهانة فعلا
او
اميرة مهانة

بجد هي اميرة ... بس الطرف التانى مكنش شايف لما خانها ولغاية دلوقتى مش شايف اخلاق الملايكة اللى فيها
ربنا يجازيه

بحبك اوى :)

وردة يقول...

لا يوجد في الدنيا افظع من الخيانة
وان اتت من المحبين
بس المهم تكوني قوية
وقادرة توجهي الحقيقة
ربنا يكرمك
سلام

دعاء يقول...

كل ما يكون الحب أكبر كل ما الخيانة توجع أكتر.
موناليزا .. أسلوبك سهل وراقى
شكرا للمشاركة
دعاء

الربان يقول...

تحياتي

جميلة فعلا الكلمات...و السجع و المشاعر... بين الرقة و العنف...

يوما ما سيكون الالبوم ذكري..و سيتذكر
انه فقد اجمل وردة و ارق زهرة...سيكون
وحيدا او بين زهور جفت و عطرها ذهب..
ينعي حظه ...

ان الله يدافع عن الذين امنوا ان الله لا يحب كل خوان كفور....


تحياتي و تقديري

همس الاحباب يقول...

كلمات تنم عن كبرياء وعزة نفس
ورفض لكل انواع الخيانة
دائما مبدعة فى كلماتك اختى العزيزة
جزاكى الله خيرا
تحياتى وتقديرى

موناليزا يقول...

صيدلانية طالعة نازلة
ــــــــــــــــــــــ
اختى الحبيبة:صح جدا
نورتينى حبيبتى ودمتِ بخير







*******************************







أم مالك
ــــــــــ
اختى الحبيبة:ربنا يكرمك واشكرك جدا لتعليقك
نورتينى حبيبتى ودمتِ بخير







*********************************






د.ياسر عبد الفتاح
ـــــــــــــــــــــ
اهلا بيك يادكتور
ربنا يكرمك واشكرك جدا لتعليقك
دمت طيبا ولمدونتى زائرا






*********************************






احساس طفلة محبة للرومانسية بس واقعية
ـــــــــــــــــــــــــــــــــــ
اختى الحبيبة:اشكرك جدا على تعليقك
نورتينى ياجميلة واسعدتينى بتواجدك:)







********************************






هذه حياتى
ــــــــــــ
وعليكم السلام ورحمة الله وبركاته
اهلا بيك يافندم
يسعدنى تعليقك دائما ففيه من الصراحة مايروقنى
حاضر يافندم:) ان شاء الله هحاول جاهدة مراعاة نصيحتكم الغالية فى موضوعاتى القادمى بإذن الله
ربنا يكرمك واشكرك جدا لتواجدك
دمت طيبا ولمدونتى زائرا






********************************





صمت الحنين
ــــــــــــ
اختى الحبيبة:اشكرك جدا لرأيك وتعليقك
نورتينى حبيبتى ودمتِ بخير





*********************************






مها زين
ــــــــــ
اختى الحبيبة:ده حقيقى
رينا يكرمك واشكرك جدا لتعليقك
نورتينى مها الجميلة ودمتِ بخير








**********************************






اخر العنقود
ـــــــــــــ
اختى الحبيبة:اهلا اهلا بالقمر
ربنا يعزك يارب ويرضى عنك
اشكرك جدا لرايك ولتواجدك
نورتينى ياجميلة ووحشتيينى جدا






**********************************






ايوشة
ـــــــــ
اختى الحبيبة:فعلا القرار السريع فى هذه المواقف هو اللى بيحدد اتجاه التعامل معا فيما بعد
نورتينى ايوشة الجميلة ودمتِ بخير







**********************************






مسدس صغير
ـــــــــــــ
اهلا بيك يافندم
اشكرك جدا لرايك ولمشاركتك
دمت طيبا ولمدونتى زائرا






*********************************





ومازلت اتعلم
ـــــــــــــ
اختى الحبيبة:مش هعترض على كلامك بس هوضح نقطة وهى ان الرجل العجوز حينما تموت زوجته يريد من يونسه ويخدمه ويلبى له طلباته مش لانه نسى زوجته ولكن لانه يحتاج من يهتم به
دى شوفتها على فكرة رجل محترم جدا وزوجته الله يرحمها كانت اخلاق وانا عن نفسى لا اشك فى حبه لها(مش هقول لانهم جيرانا وبس لكن لان هو كان مدير مدرستى وهى كانت الناظرة يعنى تخيلى بقى زوجين وزملاء فى العمل كمان) رغم انه تزوج بعد وفاتها مباشرة
اما بقى لما يكون شاب ويتزوج سريعا بعد وفاة زوجته ده مش بيبقى خاين ليها على قد مابيبقى معندوش ذوق لانه لم يراعى مشاعر اهل زوجته المتوفاه
وفى كل الاحوال لا نستطيع اللوم على من يلجأ لشرع الله مهما كانت ظروفه
اللوم كله على من ينتهك محارم الله

اشكرك جدا لمشاركتك
نورتينى حبيبتى ودمتِ بخير






**********************************







القدر وانا
ـــــــــــــــ
اختى الحبيبة:ياااه الكل فى انتظار كرم ربنا ونصره
اشكرك جدا لرايك ولتعليقك
نورتينى حبيبتى ودمتِ بخير





********************************





شمس النهار
ـــــــــــــ
اختى الحبيبة:والغريب انه مايقبلش ان حد يخونه وناسى انه كما تدين تدان
نورتينى شموسة الجميلة ودمتِ بخير





***********************************






روفى
ــــــــ
اختى الحبيبة:اهلا اهلا بالغالية
دايما رافعة من روحى المعنوية:)
ماتحرمش منك ابدا ياحبيبتى
اشكرك جدا لرايك ولتعليقك
نورتينى روفى الجميلة ووحشتيينى جدا





*******************************





















حاسوباتية
ــــــــــــــ
اختى الحبيبة:ربنا يكرمك واشكرك جدا لرايك ولتعليقك
نورتيمى حبيبتى ودمتِ بخير






********************************






حارة سد
ــــــــــ
اهلا بيك يافندم
ربنا يكرمك واشكرك جدا لرايك
احترم جدا تذوقك للغة الفصحى وانا ايضا افضلها كثيرا
دمت طيبا ولمدونتى زائرا







*******************************





جنون عاقل
ـــــــــــــ
اهلا بيك يافندم
فيه جراح لاتقبل المداواة من جارحها
اشكرك جدا لتعليقك
دمت طيبا ولمدونتى زائرا





*********************************






ريمان
ـــــــــ
اختى الحبيبة:ده حقيقى:)
نورتينى ريمو الجميلة ودمتِ بخير






********************************







الفقيرة الى الله ام البنات
ــــــــــــــــــــــــ
اختى الحبيبة:صح جدا
نورتينى حبيبتى ودمتِ بخير






*********************************





كفاية طيبة
ــــــــــــ
اختى الحبيبة:حاسة ان كلمة بحبك لوحدها مش كفاية:)
عندك كلمة تانية ممكن اقولهالك غيرها:)
ربنا يسعدك يارب ويفرح قلبك
سعيدة جدا بمعرفتك
نورتينى ياجميلة ودمتِ بخير






**********************************





وردة
ــــــــ
اختى الحبيبة:يكفى ان نعترف لانفسنا بخيانة الطرف الاخر حتى نستطيع المواجهة
اصل فيه ناس ممكن تعمل انها مش واخدة بالها عشان الامور تعدى
نورتينى وردتى الجميلة ودمتِ بخير







*********************************







دعاء
ــــــــــ
اختى الحبيبة:اهلا بيكِ فى زيارتك الاولى
اشكرك جدا لمشاركتك
نورتى مدونتى وفى انتظارك دائما






********************************







الربان
ــــــــــ
اهلا بيك يافندم
اشكرك جدا لرايك ولتعليقك الرقيق
دمت طيبا ولمدونتى زائرا






********************************






همس الاحباب
ـــــــــــــ
اهلا بيك استاذ خالد
ربنا يكرمك واشكرك جدا لرايك ولتعليقك
دمت طيبا ولمدونتى زائرا

ماء تشرين يقول...

صحيح الخيانه صعبه
بس لو بنحب بجد اكيد هنغفر
يمكن مرة اكيد مش كل مره


تقبلى مرورى

غير معرف يقول...

جميلة جدا جدا

والخاينة فعلا قاسية جدا

الله مايذوقها لاحد

تسلم ايدكي حبيبتي

ELMASRYA - MRS WRITER يقول...

ليه كده يا جميل؟

إيه القسوة دي كلها ؟

فكرتيني بسميرة سعيد في ردود أفعالها ( وش مبتسم )

طبعا اللي تعمل كده من حقها تثور لأنوثتها وإحساسها بنفسها لكن فين الحب؟

وفين التسامح والغفران؟

الحب الحقيقي بيغفر كل شيء

دمتي سالمة حبيبتي المميزة

MOHAMMED ELBANNA يقول...

موناليزا
كيف الحال؟اتمنى تكوني طيبة ان شاء الله.
كلمات جميله ومليءه بالاحساس العالي .
وانا اوفقك فالحب يجب ان يصاحبة الكبرياء الذي يحافظ على كرامة الانسان وليس كما يقول البعض ان الحب يجب ان يقترن به الخضوع والخنوع للحبيب حتى وان اخطأ واهان حبيبة .
ولكن مع وجود الكبرياء يوجد ايضاً التسامح والعفو عن الاساءة حتى يدوم الحب .وفى الاول والاخر العمليه هي عملية توازن بين التسامح مع المحافظه على الكبرياء .
كلماتك هذه ذكرتني بقصيدة كنت قد قرأتها للشاعر الفذ ( فاروق جويدة )
وهي بعنوان ( لا وقت للغفران )
وهذا جزءاً منها :

لا تطلـبي الغــفران في محرابـي
كـل الذي قد كان وهــم سراب
كفنت وجهــك في عيوني فأهدئي
لا تسـأليني الان عـــن اسبابي
احرقت خــلفك ذكـريـات مـرة
ومحوت رسمـك فــوق كـل كتــاب
داري دموعـك واستريحــي لحظــة
انا لا اصدق ادمــع الكــذاب
هذي الدموع الكاذبات تناثرت
مثل السهام تغوص في اعصــابي
هذي الظنون الجارحــات رايتها
بين الضلوع تحــوم بالأســـراب
حزنـي عنيد فأتــركـيه لحالـه
ما اثقل الشكـوي مـن الاحبـاب
......................
.....................

تقبلي تحياتي ومروري .
مع اطيب التمنيات .
محمـد
طـــريق النجاح

رحــــيـل يقول...

موناليزا ازيك

جميله جدا كلماتك اختيارك للصور والمعانى قوى جدا

ونهاية قوية

تحياتى ويارب تكونى فى افضل حال

ammola يقول...

السلام عليكم
كيف حالك ياموناليزا بجد وحشتينى
عارفة احسن علاج للجروح..نسيبها تاخد وقتها والزمن كفيل بالنسيان ويكون عندنا أمل فى بداية جديدة
ربنا يسعدك بكل خير وياريت أقرا لك حاجة فرايحى شوية..بجد صعبان عليا الموود اللى بتكتبى بيه لأنى باتصور انتى حاسة بايه وانتى بتكتبى حتى لو بتكتبى عن حد تانى
ماتزعليش منى..انتى عارفة انى بحبك أوى

Gannah يقول...

ازيك يا موناليزا؟؟
يارب تكونى بخير
وحشتينى جداا
من يخون لا يستحق منا أن نفكر فيه ولكن الحياة تجبرنا أحيانا على التماس الأعذار والى الغفران وخاصة اذا رأينا فيهم ندما صادقا
كلماتك جميلة
تحياتى

أمل حمدي يقول...

موناليزا الغالية

لانندم على الخائن ولا يستحق كلمة واحدة

اثبتي حبيبتي فأنت الكسبانة لأنك اخترتي الطريق الصحيح

أماني بتسلم عليك وبتدعي لك

سلام حبيبتي

KHALED يقول...

إللى بيخون مرة بيخون تانى و تالت
شخصية مالهاش أمان

Unknown يقول...

اللهم احفظنا
اذا اهانة الوردة ذبلت وماتت
الورود لا تقبل ابدا بالاهانة
الخيانة بأى شكل لها
امر لا يقبل ولا يغتفر

سلمت اناملك

حاجات جوايا يقول...

جرح قاسى جدا
عندما تنظر فى عين من تحب لترى صورة شخص اخر غيرك

حفظك الله حبيبتى من كل الجراح
----------------
وحشتينى يا مونا
ليكى تاج عندى تعالى استلميه
فى انتظارك يا قمر

سالى

الطائر الحزين يقول...

كلمات رائعة
احساس القهر وفقدان الثقة

salwa يقول...

السلام عليكم اخت موناليزا
ادرااااااااج راااااائع يلامس القلب
وجهة نظري,الخيانة ليس لها غفران,لانها تكون نهج ارتضاه صاحبه لنفسه.
شكرا لكي و تسلم يدك
سلام

بنت أبيها يقول...

ربنا يعفينا

ويجعلنا لشرعه متبعين

منى يقول...

بل الخائن هو المهان فى اعيننا بفعلته
يظن انه يستطيع ان يجمع كل الورود ولا يدرك انه يحرم نفسه من الحير الحقيقى
ومن رفقه صالحه تسعده دنياه واخرته

اما هى يوما ستجد من يستحق الزهره النقيه
كل الحب والتحيه غاليتى

wanna b a physician يقول...

الخيانة بالفعل ذنب لا يغتفر ولكن احيانا مشاعرنا تسمح لنا بالتغاضى عن ما حدث ولكن يظل للخيانة اثر مهما حدث

أم أحمد المصرية يقول...

حبيبتي موناليزا
رقيقة المشاعر في كل ما تكتبين
انا اؤيد بطلتك بشدة
و عجبتني جدا جملة
ومش زعلانة ولا ندمانة
لإنى أختارت أكون إنسانة

موناليزا يقول...

ماء تشرين
ـــــــــــ
اختى الحبيبة:غفران الخيانة مش بالساهل لان فيه حاجات ماينفعش نسامح عليها
نورتينى حبيبتى ودمتِ بخير






******************************





نوارة
ــــــــ
اختى الحبيبة:اشكرك جدا لرايك ولتعليقك
منورانى دايما وسعيدة بتواجدك







********************************






المصرية مسز رايتر
ـــــــــــــــــــ
اختى الحبيبة:هى فين القسوة دى!! ده رد فعل طبيبعى او بمعنى أدق ده أقل واجب ممكن تعمله البطلة:)
تعرفى انى فعلا سميرة سعيد كانت بتعجبنى زمان اوى فى اختياراتها للكلمات:)
بس انا واثقة انك متفقة معايا فى ان فيه حاجات ماينفعش نسامح عليها حتى لو كانت البطلة بتحب البطل
اصل من وجهة نظرى ايه فايدة ان البطلة تحب واحد مايستاهلهاش
نورتينى حبيبتى ودمتِ بخير








********************************






محمد البنا
ـــــــــــــ
اهلا بيك استاذ محمد
انا الحمدلله بخير اشكرك جدا لسؤالك
ربنا يكرمك اشكرك جدا لرايك
كده احنا متفقين وكما يقال أصون كرامتى من قبل حبى
مع احترامى الشديد لرايك يوجد اشياء لايمكن التسامح فيها مهما كانت درجة الحب
الله على اختيارك
كلمات رائعة بحق أول مرة أقرأها وأشكرك جدا على إدراجها
سعيدة جدا بتعليقك وبزيارتك
دمت طيبا ولمدونتى زائرا







*********************************






رحيل
ــــــــ
اختى الحبيبة:اهلا اهلا بالقمر فينك من زمان يارب تكونى بخير
انا الحمدلله بخير ازيك انتِ ياحبيبتى

اشكرك جدا لرايك أسعدنى حقا تعليقك
نورتينى ياجميلة ودمتِ بخير






********************************







امولة
ـــــــ
وعليكم السلام ورحمة الله وبركاته
اختى الحبيبة:ايه النور ده:)
يا اهلا يا اهلا فينك ياجميلة من زمان
يارب تكونى بخير

انا الحمدلله بخير ازيك انتِ ياحبيبتى
وانتِ كمان والله وحشتييييينى جدا من فرع النيل اللى عندنا لغاية البحر المتوسط اللى عندكوا:)

ازعل منك ازاى بس تعالى كل موضوع وعلقى براحتك وبكل صراحة زى ماعاهدتك وانا هكون فى قمة سعادتى بمشاركتك

تعرفى انا فعلا بدأت احس انى مزوداها شوية بس غصب عنى والله اللى بييجى فى دماغى بكتبه
دعواتك
بحبك فى الله
نورتينى امولة الجميلة وفى انتظارك دائما







**********************************






جنة
ـــــــ
اختى الحبيبة:اهلا اهلا بالغالية
وحشتيييينى جدا سبحان الله كنت لسه هروح اسأل عليكِ
انا الحمدلله بخير ازيك انتِ ياجميلة

اشكرك جدا لرايك ومع احترامى الشديد لتعليقك واتفاقى معه فى بعض الوقت ولكن اذا تم زعزعة ثقتك فى شخص ما صعب جدا ان تعود الثقة كسابق عهدها سيظل بداخلك دائما احساس بالشك وعدم الامان
وهنا الفراق يكون اسلم حل
نورتينى جنتى الرقيقة ودمتِ بخير







*********************************






ماما امولة
ـــــــــــــــ
اختى الحبيبة:اهلا اهلا بأم امانى الغالية
ربنا يكرمك يارب على تعليقك
ربنا يطمن قلبنا على امانى يارب
دعواتكم فانا فى امس الحاجة لها
نورتينى حبيبتى ودمتِ بخير






**********************************





خالد
ــــــــــ
اهلا بيك استاذ خالد
صح جدا
دمت طيبا ولمدونتى زائرا






**********************************





نهر الحب
ــــــــــ
اختى الحبيبة:اهلا اهلا ياجميلة
اشكرك جدا لرايك ولتعليقك
نورتينى حبيبتى ودمتِ بخير







**********************************







حاجات جوايا
ــــــــــــ
اختى الحبيبة:فعلا انها حقيقة مؤلمة
ربنا يكرمك يارب
وانتِ كمان وحشتيييينى جدا
وانا فى الطريق:)
نورتينى سالى الجميلة ودمتِ بخير







*********************************






الطائر الحزين
ـــــــــــــــ
اهلا بيك يافندم
اشكرك جدا لرايك ولتعليقك رغم ان مش شايفة ان البطلة مقهورة على قد ماهى مصدومة
دمت طيبا ولمدونتى زائرا





*******************************





سلوى
ــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولتعليقك
يسعدنى تواجدك دائما
نورتينى سلوى الجميلة ودمتِ بخير








*********************************







بنت ابيها
ــــــــــــ
اختى الحبيبة:آمين
نورتينى ياجميلة ودمتِ بخير







******************************






منى
ـــــــ
اختى الحبيبة:اهلا اهلا بالقمر
اشكرك جدا لتعليقك الرقيق
نورتينى منمونة الجميلة وسعيدة بزيارتك








**********************************






ونا بى فيزيائى
ـــــــــــــــــ
اهلا بيك يادكتور
متفقة معاك جدا
دمت طيبا ولمدونتى زائرا





**********************************






أم احمد المصرية
ـــــــــــــــــ
اختى الحبيبة:اشكرك جدا لرايك ولتعليقك الذى اسعدنى
نورتينى حبيبتى وسعيدة جدا بزيارتك

ghoneem يقول...

موناليزا
اهلا بحضرتك يارب تكوني بخير وفي أحسن حال
أعتذر عن انقطاعي واشكرك لسؤالك ربنا يسعدك يارب
كلامك جميل كالعادة ويمس القلوب وواقعي جدا
انا اكتب عن الحب وانني احب أن امتلك من أحب ولكن اوافقك جدا
علي كلماتك وفرض علي ان احافظ علي كرامة من أحب
ربنا يحفظك وكل وردة غالية مصونة من كل سوء ومن كل مهانة
امين امين امين
تحياتي
بالتوفيق.......

z!zOoOo يقول...

السلام عليكم

اعتقد أن الخيانه علي قد ما هي صعبه لكن مفيده اه طبعا مفيده لأنها بتعرفك الي قدامك كويس والاهم بتظهر جوهره بدري

والاهم إن الشخص يعرف كويس شخص الخاين وخلاص يبعد عنه ولا كأنه يعرفه ويرجع لنفسه مايزعلش عليه لكن يزعل علي نفسه لكن الاهم يدور علي الناس الي مكانش قريب منها بالدرجه الكافيه

الدنيا زي ما فيها الخاين فيها الوفي

الكلمات هادثه ثائره برقه تدل علي نفس أبيه ترفض أن تهدر كرامتها او ان تكون بديله

تحياتي

الفراشة الصغيرة يقول...

الخيانه من ابشع الاشياء

وافتكر انها زى الكذب

منقدرش لا نعديها

ولا نسامح فيها

د/عرفه يقول...

أولا انا عجبنى أوى الاسلوب
وطريقة العرض والسرد
فعلا جميل اوى

اه يمكن الخيانة شىء صعب ويمكن بنزعل لما حد يعمل معانا موقف مش ظريف

ولكن يبقى شىء مهم ومفيش حد اتكلم عليه
هل ممكن نسامح ونغفر
اظن انه ممكن ومتاح فى ظروف معينة بس ليه الظروف دى مش متاحةعندك
واظن انه ممكن يكون فيه باب للغفران فى ظروف معينة برضه

موناليزا يقول...

غنيم
ـــــــ
اهلا بيك يادكتور
الحمدلله يافندم انا فى فضل ونعمة من الله
لاشكر على واجب والحمدلله انك بخير ولعل المانع كان خير
ربنا يكرمك واشكرك جدا لرايك ولتعليقك الجميل
دمت طيبا ولمدونتى زائرا






*******************************





زيزو
ـــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك ولتعليقك الجميل
دمت طيبا ولمدونتى زائرا







*******************************







الفراشة الصغيرة
ـــــــــــــــــ
اختى الحبيبة:متفقة معاكِ جدا
نورتينى ياجميلة ودمتِ بخير








********************************






د/عرفة
ــــــــــ
اهلا بيك يادكتور
اشكرك جدا لرايك والحمدلله ان نال قلمى استحسانكم
مع احترامى لرأيك ممكن اعرف ايه هى الظروف اللى ممكن تخلى باب الغفران للخيانة مفتوح؟
دمت طيبا ولمدونتى زائرا

نسيبه يقول...

السلام عليكم ورحمة الله وبركاته
لابد أن يكون لكل منا مباديء لا يتنازل عنها
هذا اللون من النثر أو الكتابة لأني مش عارفة بتوع اللغة العربية (م.ع)هيسموه إيه ظريف بس؟
جزاك الله خيرا

موناليزا يقول...

نسيبة
ـــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
عليكِ غرامة تأخير على فكرة:)
سعيدة جدا بمشاركتك
وانا كمان والله عايزة اعرف(م.ع) هيسموه ايه؟ لانى كتبته كده ومش عارفه اسمه الحرفى ايه:)
بس انتِ عارفة خلاص ماعدتش ينفع:)
على فكرة أنتِ بجد فاجأتينى بتعليقك ده:)
نورتينى ياجميلة ودمتِ بخير

ذكرى رحيل قلم يقول...

السلام عليكم
خير الرد علي الخيانة الصمت
بمعني خير الرد علي السفيه الصمت
بعد الخيانة مفيش عتاب

هناك علامات يجب أن نضعها فى الإعتبار حتى لانندم فيما بعد.
مافيش افضل من الاختيار الصح
وربنا يهدي الجميع
تحياتي

موناليزا يقول...

ذكرى رحيل قلم
ـــــــــــــــ
وعليكم السلام ورحمة الله وبركاته
اختى الحبيبة:صح جدا
نورتينى ياجميلة وسعيدة بمشاركاتك