الثلاثاء، 13 أكتوبر 2009

جوجو و زمردة (10)

كانا "جوجو" وشقيقته "زمردة " يتناولان طعامهما ودار بينهما هذا الحوار.
- زمردة متسائلة: هو عيب لما أطلب الباقى من البائع لما بكون بشترى حاجة؟.
- لأ طبعا. ليه بتسألى سؤال بديهى زى كده؟.
-لأنى كل ما أذهب أشترى حاجة ويتبقى لى فلوس ألاقى صاحب المحل بيعطينى بالباقى أى حاجة حتى لو ماتلزمنيش.
- عادى يعنى . يمكن مايكونش معاه فكة.
- طب وأنا مالى . المفروض وقتها يتصرف أويبقى عامل حسابه مسبقاً.
- خلاص بعد كده إبقى عرفيه.
- محدش بيدينى فرصة أصلاً.
"ميمى" صاحبتى برضه بتحكيلى على موقف مشابه حصلها" كانت راكبة مع مامتها ميكروباص والمفروض لسه لهم باقى وجت محطتها وطلبت الباقى قالها طيب بس انزلى بسرعة عشان ممنوع الوقوف هنا وبعد مانزلت قالت له فين الباقى قالها خليكى معايا للآخر وأنا اتصرفلك لكن دلؤتى مش معايا فكة وسابها ومشى!!".
- أنتوا مكبرين الموضوع كده ليه؟ حتى ماما برضه كل ما أروح أشترى لها حاجة تقولى فين الباقى.
- وإيه المشكلة مش حقها؟ وبعدين أنت كمان مابتاخدش الباقى ولا إيه؟.
- لأ طبعاًَ باخده بس أنا متوقع أنها هتسيبهولى.
- ليه بقى؟.
- عادى حق ما روحت.
- إيه اللى أنت بتقوله ده! أنت هتستغل ماما عشان بتجيبلها حاجة! أنت مش بتاخد مصروفك ولو طلبت منها حاجة بتشتريهالك يبققى ليه تاخد حاجة مش من حقك.
-هو كل حاجة تكبريها كده.
- المفروض أن الباقى ده أمانة وماينفعش تتصرف فيه . ولازم يرجع لصاحبه مهما كان مبلغ صغير.
- يعنى تفتكرى كده حرام.
- أكيد. بما أن الحاجة اللى بتعملها ماتحبش حد يعملها معاك يبقى أكيد ده مايرضيش ربنا.
- خلاص والله تانى مرة هاخد بالى بعد كده.
- طب يلا ناكل بسرعة قبل ما ماما تيجى وتلاقينا لسه مخلصناش أكل.
- تمت-
************************
دعوة للمناقشة
ـــــــــــــــــــــــــــ
* أذكر موقف مشابه؟. وماذا تفعل وقتها؟.

هناك 32 تعليقًا:

Unknown يقول...

السلام عليكم ورحمة الله وبركاتة
يا حبيبتى دا الطبيعى دلواقتى فى بلادنا

وللاسف اننا بنتكسف ناخد الشلن او العشر قروش الباقية
فبناخد بيها اى حاجة
وساعات الربع جنية
بجد حسبى الله ونعم الوكيل

Hanan Elshafey يقول...

دوما في حفظ الله

ستيتة يقول...

ساعات بحس ان ده استهبال من البائع
وساعات بحس انه غلبان زيه زيي ومعندوش فعلا صرفة

لكن المصيبة في استهبال الحكومة
يعني ميكروباص المعادي كان بجنيه
حلو خالص كل شيء مقنن ومحدش ها يتناقش على الفكة
بالله عليكي لما يعملوه ب 115 قرش
مين فينا معاه شلن او عشرة صاغ
يبقى خلاص سواق الميكروباص ها ياخد جنيه وربع من غير كلام
او لما يلاقي ياعيني ست او راجل عينه ها تطلع على بقية فلوسة
يقوم يدي ربع جنيه لأتنين ويقول لهم اتصرفوا مع بعض
انا مش ها الوم السواق في استهباله
اغلب سواقين التاكسي والميكروباص لو اديتيهم 30 جنيه ها يحطوها في جيبهم عادي
لكن الحكومة الرشيدة اللي بتعمل دوا ونهاية تمنه عشرة صاغ او تعمل تعريفة ونهايتها 15 قرش تبقى عاوزة ايه غير ان الشعب الفقير يطيح في بعضه؟
اذكري اخر مرة شفتي فيها شلن؟ سؤال اجباري

تحياتي للسلسلة الأكثر من رائعة

ذكرى رحيل قلم يقول...

السلام عليكم

عادي يا منوليزا فعلا ده هو اللي بيحصل وساعات اعترض واخد لباقي وساعات اقول مش هيخسر سواء في السوق
او اي مكان اخر بس علي فكرة هو هيجيب عشرة قرةش منين دلوقتي الناس مش بتخدها ديه عملة اتلغت يا بنتي من زمان اه والريال كمان
الزمن ده من اول الجنيه ع طول ومش بيجيب حاجة

دمتي

د. ياسر عمر عبد الفتاح يقول...

طيب وليه كل واحد ميبقاش شايل الفكه في جيبه؟
أنا بتحصلي المواقف دي كثير في الصيدلية
ومبيبقاش فيه فكه
لأنه كل الناس بتديني فلوس سليمة
ومش كل شوية هطلع وأسيب الصيدلية علشان أفك

لما حد يحب يشتري حاجة ياخد معاه فكه

Unknown يقول...

تصدقى الكلام دا منتشر جدا
البقال مفيش باقى والسواق
ويمكن الكوافيرة كمان
عارفة دا استحلال لمال الغير بشكل غريب
واللى بيحصل انه بفى فى 5 قروش وعشرة وبعدين بقى فى جنية واتنين وما خفى كان اعظم

تحياتى وحبى

جمهورية شومبونجو العربية يقول...

السلام عليكم

اولاّّ مفبش حاجة اسمها باقى فى حاجة ادينى بل باقى قرملة او بونبونى بس مفيش فلوس

ثانياّّ انتى وماما اية
اكيد انتو الاتنين واحد ف البافى مش هيفرق اذا كان مع ماما او معاكى
وبعدين انتى هتقوليلها انة معاكى

صحيح هما كانو بيكلو اية
على العموم
بل هنا و الشفاه
..................

تحياتى

رئيس الجمهورية

النسر المهاجر يقول...

على فكره التاجر او صاحب المحل دايما بيحاول يستغل الباقى كتجارة وبيعتمد على اته يحرج ازبون بس الحمد لله بطلب الباقى مهما كان قليل مع انى مرة أتدبست فى كفتريا بس مرة واحده......كفاية

سمسم/سما يقول...

السلام عليكم
بجد هي حاجة تغيظ عامة
وخاصة لما هو يطنش
ممكن احنا نسامح
بس هي حاجة مش منتشرة كتير
عندنا
انا لاحظتها من فترة قريبة بدات

(Joudy) يقول...

حقيقة يا موناليزا الأمر ده بقى عادى ان البائع بيستبدل الباقى لو كان قليل بأى حاجة وأحيانا بيقول مش معايا تحب تاخد بيه إيه مش عارفة بيكون ده حقيقى ولا هما بيتربحوا زيادة الله أعلم بس الموقف اللى حصلى إن فى بعض المحلات والمكتبات لما كان ليا باقى بيدونى الورف والفضية لو كانت جنيه خمسين قرش أو ربع جنية لي لو أقل من كده بيكون بنبونى

دمتى بكل الخير والسعادة

♥نبع الغرام♥♪≈ يقول...

حصلت معايا كتير قووووووووووووى
وانا من النوع اللى بتكسف اطلب من حد الباقى
مش عارفه دا مرض ولا استغلال ولا ايه
دمتى بكل خير

KHALED يقول...

على فكرة دة دين ولو صاحب الدين ماسمحش فية بياخد حسنات من المدين ليوم القيامة

الشعب لابد له من حكومه تشكمه يقول...

والله على حسب اللى باقى لو حاجه بسيطه ماااشى بس فعلا اوقات بتكون مفيش فكه.
وبينى وبينك على اساس اللى بشترى منه,فى ناس بحس انهم فعلا بيدورا على الفكه علشان يدوهالك وناس تلاقيهم من الاول مبيتين النيه,هنا باه بغلس زيهم طالما خد حقه ميخدش الباقى بغلاسه كده.

Alaasalim2 يقول...

السلام عليكم

هو للأسف إحنا إتعودنا على الأوضاع الخطأ دي وأصبحت من ثقافتنا العادية

سواء بسبب التسعيرات الغبية زي مثلا تلاقي حاجه سعرها 19.90 دي معروفه إنها عشرين جنية أو حاجه بجنيه وخمستاشر قرش دي معروفه إنها جنيه وربع
ومن دا كتيييير

وفيه سبب تاني وهو عدم توفر العمله

فعلاً إحنا عندنا في مصر أزمة فكه دائمة ودي حاجه ملموسه لأي حد شغال في تجاره فيها تعامل مع الجمهور

وسبب ثالث وهو إننا عندنا ثقافة الإكرامية بمناسبه وبدون مناسبه

موناليزا يقول...

حتى تشرق الشمس
ـــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
البائع هو اللى بيخلينا نتكسف بجد من نظرته وكأن الباقى ده حق مكتسب
بس برضه احنا المفروض مانسكتش لو حسينا انه قاصدها
نورتينى توتا الجميلة ومشكووورة جدا على مشاركتك



********************************


حنان الشافعى
ـــــــــــــ
اختى الحبيبة:اهلا اهلا بالقمر
ماتحرمش منك ابدا حنونة الجميلة
نورتينى واسعدتينى بتواجدك



**********************************



ستيتة حسب الله الحمش
ــــــــــــــــــــ
اختى الحبيبة:اهلا اهلا بنبض الحكمة
دايما بتجيبى الخلاصة وعشان كده بجد بستنى تعليقك
فعلا المسمى الأمثل إستهبال:)
تصدقى فعلا فكرة خطيرة عشان الناس تطيح بعض:)
قال يعنى هما ناقصين:)

اما عن اجابة السؤال الاجبارى
ياااه :) تصدقى له وحشة برضه:)
بعد عصر ذاكرتى وجدتها:)
الشهر اللى فات تقريبا كنت انا وصحباتى رايحين لواحدة صاحبتنا فى بلد بقى لنا كتير ماروحنهاش وطبعا مش عارفين تمن الاجرة
المهم جمعنا من بعض واعطينا الاجرة لواحدة قاعدة قدامنا وبعدها لقيتها بتدينى شلن وتقولى ده الباقى!
طبعا انا ضحكت وقلت لها وده جه منين :)
وفى الاخر طلعت اديتهولى غلط بس المشكلة انى لما خدته منها وضعته فى الشنطة بلا اكتراث فلما جت تطلبه منى قعدت ادور عليه طول الطريق :)

اشكرك جدا لرايك الذى يدعمنى ولزيارتك التى تسعدنى
نورتينى حبيبتى



*********************************


ذكرى رحيل قلم
ــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
مش عارفة بجد ايه حكاية ان العملة الفضة بقى فيه ناس كتير مش بيرضوا يتعاملوا بيها
حتى لو كانت جنية:)
نورتينى ياجميلة ومشكووورة جدا لمشاركتك


***********************************


د.ياسر عبد الفتاح
ـــــــــــــــــــ
اهلا بيك يادكتور
عجبنى جدا نظرتك الاخرى كطبيب صيدلى
اشكرك جدا لمشاركتك
دمت طيبا ولمدونتى زائرا



********************************


نهر الحب
ــــــــــ
أختى الحبيبة:اهلا اهلا بالقمر
فعلا معاكِ حق ماعدتش بتيجى على القروش البسيطة وبس
وده متهيألى لاننا من الاول سكتنا على الباقى القليل
نورتينى ياجميلة واسعدتينى بمشاركتك


*********************************


جمهورية شومبونجو العربية
ـــــــــــــــــــــــ
وعليكم السلام ورحمة الله وبركاته
اهلا بيك يافندم
طيب افرض فى المواصلات مثلا هتاخد بالباقى ايه؟ محطة زيادة مثلا:)

قصدى فى موقف الام وابنها فى موضوع الباقى ان ممكن الابن يستسهل ومايرجعش الباقى ويعتبره حق ما راح المشوار مثلا وطبعا مش هيقول لمامته غير لو الام افتكرت وسألته
وده طبعا ماينفعش لان دى امانة ولازم يرجعها كاملة وبعد كده يبقى ياخد منها اللى هو عايزه وهى ليها مطلق الحرية فى انها تديله او لا

هسألهم وأقولك حاضر:)
أشكرك جدا لمشاركتك
دمت طيبا ولمدونتى زائرا


*********************************



المهاجر
ــــــــ
اهلا بيك يافندم
ده حقيقى بس برضه مانقدرش نعمم
اشكرك جدا لمشاركتك وخد بالك بعد كده:)
دمت طيبا ولمدونتى زائرا


*********************************


سمسم
ـــــ
وعليكم السلام ورحمة الله وبركاته
اختى الحبيبة:اهلا اهلا بالقمر
طب خدى بالك لان البداية بتكون قليلة وبعد كده بتنتشر:)
نورتينى سمسمة الجميلة واشكرك جدا لمشاركتك


*********************************


جودى
ـــــــ
اختى الحبيبة:اهلا اهلا بالقمر
احنا اللى جعلناه عادى لاننا خليناهم يستسهلوا
نورتينى ياجميلة ومشكووورة جدا لمشاركتك



**********************************


عاشقة الاحزان
ــــــــــــ
اختى الحبيبة:اهلا اهلا بالقمر
ايوة طبعا استغلال
ماهم بيعرفوا الطيب اللى مش بيحب يعلى صوته وبيستغلوه
نورتينى انوسة الجميلة واشكرك جدا لمشاركتك



*********************************


خالد
ــــــ
اهلا بيك استاذ خالد
الله عليك
بس مين يسمع
دمت طيبا ولمدونتى زائرا



**********************************


الشعب لابد له من حكومة تشكمه
ـــــــــــــــــــــــــــــ
اختى الحبيبة:اهلا اهلا بالقمر
والله شطورة ايوا كده لاحسن الاستغلال زاد جدا وبقى يغيظ بجد
نورتينى حبيبتى واشكرك جدا لمشاركتك


********************************


علاء سالم
ــــــــــ
وعليكم السلام ورحمة الله وبركاته
اهلا بيك استاذ علاء
كلها اسباب مؤسفة الصراحة:)
ولكن ما باليد حيلة انه واقعنا الجميل وعلينا التعايش
اشكرك جدا لمشاركتك
دمت طيبا ولمدونتى زائرا

كلمات من نور يقول...

زمان و أنا صغيرة يا موناليزتي كنت أخصائية الشراء في العائلة سواء في بيت جدتي أو بعد كده لما كبرنا

و أنا صغيرة كان ساعات يتبقى من المبلغ البسيط اللي بنشتري بيه حاجات كتيرة قروش بسيطه و أنا ماشيه لو لقيت قطة صغيرة بتنونو أشتري لها لبن في كوب زبادي فارغ و أشربها أو لو لقيت فقير أديه باقي المبلغ

ماما عدت الموقف مرة واتنين بس اللي بعدها خصمتهم من مصروفي من يومها فهمت إن حتى الصدقة لازم تبقى من مالي وبقيت لو أخدت قرش افهمها و اقولها من مصروف بكرة

مصروفي يا عالم كان 3 صاغ باشتري كولا وشوكولاته يوميا بيهم
ههههههههههههههههههه

MOHAMMED ELBANNA يقول...

موناليزا
بصراحة الموضوع دة منتشر
وكتير بيحصل معانا كلنا ، وحصل معايا قبل كدة ونزلت من الميكروباص والسواق قال لي معييش فكة واضطريت اني امشى من غير ما اخد الباقي .
تقبلي تحياتي
محمد البنا
طريق النجاح

موناليزا يقول...

كلمات من نور
ــــــــــــــ
أختى الحبيبة:اهلا اهلا بالقمر
:) ياعسل
سبحان الله يعنى من يومك طيبة وبتحبى الخير
ربنا يديكِ دايما على قد نيتك
نورتينى غاليتى واسعدتينى بمشاركتك




**********************************



محمد البنا
ـــــــــ
أهلا بيك استاذ محمد
فعلا انتشر بس ياترى ايه السبب
مازلت ابحث عنه:)
اشكرك جدا لمشاركتك
دمت طيبا ولمدونتى زائرا

Dr. Ibrahim يقول...

انا عن نفسى حصلى موضوع العربية كتير
وبيبقى 90 % من السواقين او التباعين بيستعبطوا...

بس يبقى لو دا فعلا يبقى اكل مال حرام...

والحق مهما كان صغيراً يجب ان يرد الى صاحبه وان يتراضا الطرفان...

jonoon 3aqel يقول...

السلام عليكم

الله يرحم والده..و يدخله فسيح جناته و يلهم اهله الصبر و السلوان..

===
اما عن الموضوع..
فهذه حركه منتشرة كثيرا..حتى ف الجمعيات..لكن شويه شويه الناس بدأت تتجرأ وتطلب..
مع ان المبلغ يكون صغبر جدا جدا..بدل ما يديكي الفكه..يديكي علكه و لا مصاص..ف الناس كانت تستحي تطلب المبلغ البسيط بدل العلكه..
لكن لما صار الفعل جدا مزعج...عرفولهم و تجرأو...

الموضوع مش ف المبلغ..الموضوع ف المبدأ :)

دمتي في طاعه

تحياتي

أم أحمد المصرية يقول...

يااااه يا موناليزا
الحكاية دي من كتر ما بتحصل بقيت حاجة عادية و اصبحت كلمةما فيش فكة هي الحل و لو مش عاجبك يقول لك دوري انتي علي فكة

سلمي لي علي جوجو وقولي له صاحبك احمد ابن ام احمد بيعمل زيك ههههه بس للامانة بأذني يعني اقول له اشتري لنا كذاو كذا و الباقي هدية و لو لا يوجد باقي بيشتري يردوا الحقيقة و اقول له حعوضهالك
عشان كده شايفة ان ده شيء عادي و لا ايه

طوبه فضه وطوبه دهب يقول...

ربنا يرحم موتى المسلمين جميعا ومعاكى ان موقف جوجو كان كله استغلال ربنا يبعدنا عن اى استغلال يارب

موناليزا يقول...

د/ابراهيم
ـــــــــــ
اهلا بيك يادكتور
اشكرك جدا لمشاركتك و لتعليقك
دمت طيبا ولمدونتى زائرا



***********************************



جنون عاقل
ــــــــــــ
وعليكم السلام ورحمة الله وبركاته
اهلا بيك يافندم
متفقة معاك فهى مسألة مبدأ
اشكرك جدا لمشاركتك ولتعليقك
دمت طيبا ولمدونتى زائرا




*******************************



أم أحمد المصرية
ـــــــــــــ
أختى الحبيبة:اهلا اهلا بالقمر
:) ببلغ سلامك ليهم دايما
تسلمى يارب من كل شر

بصى ياغاليتى وجهة نظرى البسيطة انه بمرور الوقت هذا الفعل البسيط سيصبح حق مكتسب (ان يأخذ مقابل ما يفعل لأسرته) مع ان المال فى الاصل أمانة يجب ان ترد كاملة لصاحبها
نورتينى حبيبتى واسعدتينى بتواجدك ومشاركتك





*********************************



طوبة ذهب وطوبة فضة
ـــــــــــــــــــــ
اختى الحبيبة:اهلا اهلا بالقمر
مش جوجو لوحده ياجميلة ده واضح انها عادة منتشرة عند الغالبية:)
نورتينى حبيبتى واسعدتينى بتواجدك

alwani يقول...

صراحة ماسبق وصار معايا موفق مشابه لكن أعتقد إنه لو صار معايا موقف زي هذا أكيد راح أصر على أنه يرجع الباقي ليا

Heba Faruq يقول...

مش كفاية انهم بيضحكوا علينا أصلا في اسعار السلع وبيبعوها كل واحد على مزاجه وأغلى من سعرها الحقيقي..
لا كمان إذا تجرأ أحد وسأل مجرد سؤال بريء عن الباقي يحسسوه إنه تطاول وكأنه بيطلب شيء مش من حقه..
المشكلة انهم مش عارفين ان ناس كتير مش مسامحة في الفلوس دي وبالتالي سيحاسبهم الله عليها ...
ربنا يرحمنا جميعا
وتدوينة فعلا جميلة احييكي عليها

موناليزا يقول...

الوانى
ــــــــ
اختى الحبيبة:اهلا اهلا بالقمر
ويارب مايحصل معاكى لانه بجد شئ بايخ
نورتينى ياجميلة واسعدتينى بمشاركتك





*********************************




هبة فاروق
ـــــــــــ
أختى الحبيبة:اهلا بيكِ فى زيارتك الاولى
اه والله عندك حق
وانتى تدفعى على اعتبار ان ده حقه وتكتشفى انه خد ضعق التمن الحقيقى
وممكن برضه يديكِ بالباقى اى حاجة:)
وفعلا ربنا هيسألهم على كل ده
بس انتى بتقولى لمين اصلا لو عارفين ربنا وخايفين منه ماكنوش قبله ولو خمسة قروش حتى مش من حقهم
ولا حول ولا قوة الا بالله
نورتى مدونتى وارجو دوام التواصل

من غير عنـــوان يقول...

بسيطه
معبره
صادقه

بها هدف

أمنياتي

رفقة عمر يقول...

بصراحه انا كنت زى جوجو باخد الباقى ليا وماما كانت بتسامح احيانا واحيانا لا
:)
لذاذ قوى جوجو وزمرة بدات احس انهم اشخاص حقيقيه

رحم الله والد الاستاذ رحمه واسعه واسكنه الفردوس الاعلى
**********

مونى انتى كمان وحشتينى وانا مش بادخل نت الا قليل جدا والمدونات مش بادخلها خالص شويه انشغال كدة
انا اكيد يسعدنى جدا ان نكون رفقاء دنيا واخره انت انسانه جميله ماشاء الله لا قوة الابالله
اعتقد انك عاشقه الفردوس وسلوى على صله بكى سوف اخذ منهم ايميلك ان شاء الله وساخبرهم يبلغوكى ان اضيفك ان شاء الله
ربنا يكرمك يارب ويرفع قدرك وييسر لك كل امورك
امييين

موناليزا يقول...

من غير عنوان
ــــــــــــ
اهلا بيك يافندم
اشكرك جدا لرايك ولتواجدك
دمت طيبا ولمدونتى زائرا





**********************************



رفقة عمر
ـــــــــــــ
اختى الحبيبة:اهلا اهلا بالقمر
اشكرك جدا لرايك ولمشاركتك

--
ربنا يعزك يارب
شئ يسعدنى طبعا بس ابقى ابعتيلى اوف لاين منك عشان اضيفك على طول:)
نورتينى حبيبتى واسعدنى تواجدك

غير معرف يقول...

سوووري ياحبيتي اتاخرت عليكي

انا رديت عليكي وضفتلك الشرح الي عاوزاها

متخجليش مني واسالي براحتك

http://pro-araby.blogspot.com/2009/10/blog-post_11.html

دمتي بود

المعتصم يقول...

السلام عليكم ورحمة الله وبركاته
اختنا الكريمه
تحياتى
عارفه اول ماقريت الموضوع ده افتكرت موقف حصل معايا قبل كده وضحكت عليه كتير
والدى ادانى 25 جنيه اشترى طلبات للبيت وروحت اشتريت الطلبات كلها وفضل معايا عشرة صاغ
روحت حطيتهاله على الترابيزة ولما شافها قال اكيد هى دى اللى فضلت من مصطفى ولدى
طب يعنى هعمل بيها ايه ؟؟؟
كنت اخدتها وريحتنى منها
ههههههههههههههههههههههههههههههههه
وماخلصتش يومها تريقه من اخواتى وابويا
بس هما عارفين انه الموقف لو اتكرر مليون مرة نفس التصرف هو اللى هيحصل لان دى امانه فعلا واحنا الحمد لله بنعرف او على الاقل بنحاول اننا نؤديها صح
....
اما بخصوص البياعين انا لما مش بلاقى فكه اما انى اخد انا حاجه تكون لازمانى او انى اسيب الباقى بمزاجى او بقى لو حسيت ان البياع ده مش مريحنى كده وشكله مريب هاخد الباقى يعنى هاخده ماليش دعوة يتصرف والا الحاجه بتاعته ترجع واجيب من عند حد تانى
انا دماغى جزمه قديمه
هههههههههههههههههههههه
تقبلى مرورى وتحياتى

موناليزا يقول...

نوارة
ـــــــ
اختى الحبيبة: ماتحرمش منك ابدا ياجميلة
تسلميلى يارب
ده العشم برضه:)
بحبك فى الله



**********************************



المعتصم
ـــــــــــ
وعليكم السلام ورحمة الله وبركاته
اهلا بيك يافندم
:) بموقفك ده بجد فأنت عملة نادرة
وبجد والله فرحت أنى أخيراً ألاقى حد مهتم بالامانة كده
وخصوصا انى قبل حتى ماانشر الموضوع واتكلم فيه مع اللى حواليا يقولولى انتى مكبرة الموضوع زيادة عن اللزوم وبعد النشر ومن خلال عدد التعليقات بدأت أشك فعلا انى مكبرة الموضوع ولكن ربنا بعتلى تعليقك كرسالة بأن دى فعلا امانة وماينفعش نخونها مهما كانت بسيطة
ربنا يديك على قد نيتك دايما ويفرحك يارب

عجبنى موقفك تجاه البياعين وده يمكن لانى مقدرش اعمله لانى بنت ومش هينفع اعمل كده مع البايع وعشان كده لما بحب اشترى حاجة بقول لاخواتى وهما يجيبولى:)

أشكرك جدا لتعليقك الذى يضيف رونق خاص للموضوع
دمت طيبا ولمدونتى زائرا