السبت، 29 مايو 2010

بحبك يا بلدى ولكن


كانوا بيسألونى دايماً عن سر إنتمائى لبلدى ومدافعتى الدائمة عنها وسبب مهاجمتى لمن يحاول تركها ولم أكن أجد إجابة ملائمة غير لأنها بلدى.
وبداخلى أقول قد نشأت فى كنفها وترعرعت على أرضها وتربيت بين أبنائها و ذكرياتى وحياتى على أرضها فكيف بالله عليكم لا أحبها.
أتذكر يوم رحيلى عنها الإضطرارى- فلو كنت بكامل قواى العقلية وقتها ما كنت وافقت- ورغم أنه كان المفروض يكون يوم سعيد بالنسبة لأى واحدة مكانى إلا أن شعورى وقتها كان وكأنى بتزف لقبرى مع إحساس قوى فى عدم رجوعى إليها مجدداً. وكم نزلت دموعى من لوعة فراقها ولم أهتم بأن يراها أحد رغم أن شخصيتى الطبيعية لا تسمح لى بأن يرى دموعى أحد مهما كان- ولكن كما قلت سابقاً لم أكن هى أنا التى أعرفها- وشعرت بأننى سأترك روحى برحيلى عنها.
وحينما أقمت فى البلد الأخرى كنت أتعامل وكأننى فى رحلة طويلة نوعاً ما فأنا أهوى السفر منذ الصغر داخل بلدى.
أردت أن أتأقلم على الوضع الجديد وأتذكر ما سمعته عن خيرات هذه البلد التى أقمت فيها مؤخراً, ولكننى تفاجئت بأول شئ لم أكن أعلمه ولم يتطرق إليه أحد أمامى وأكتشفته بالصدفة بعد سفرى بأيام وهو أن الماء يُشترى!!.
وهذا يعنى ضرورة عدم إستخدام مياه الصنبور إلا فى أضيق الحدود. ولأننى لم أكن أعلم كنت أستخدمها عادى جداً.
يعنى مثلاً حين غسيل وجهى من عادتى أن أشرب من الصنبور.لكن هيهات هذه العادات تطبق فى بلدى فقط, فالماء هناك تأتى فى قوارير ومن ثم يتيح لك إستخدام الماء.. يعنى باختصار كما تكون فى مصر لكن المياه مقطوعة.. مياه الصنبور هناك ساخنة جداً لدرجة تستحيل أن تغسل فيها يديك مثلاً..حتى مياه الشرب المشتراه طعمها ماسخ مثلها كمثل كل شئ كان ينزل جوفى وقتها حتى لو كانت أطيب الثمار..الشقة لم يكن فيها أى منافذ للتهوية ولدخول الشمس بإختصار لم أرى هناك الشمس.. رغم حرارة الجو إلا أنها كانت تمطر سيول وهذا يعنى إنقطاع سلك التلفاز فأصبح منقطعة عن العالم الخارجى..رغم إنى لا أحبذ الخروج عامة ولكن هناك كنت أشعر بأننى فى سجن بالمعنى الحرفى للكلمة وانفرادى كمان.. وغيرها من الأشياء التى قد تكون بسيطة عند البعض ولكنها بالنسبة لى تعنى تغيير عام وشامل فى حياتى.. ولذلك كان من أسعد الأخبار فى حياتى قرار نزولى مصر ورغم أن غربتى لم تستغرق عدة أشهر ولكننى كنت أشعر بأنهم حيناً من الدهر .. ولم أستطع كتمان سعادتى حين تحركت الطيارة وكأننى كنت أخشى حدوث شئ يمنعنى من العودة لبلدى ولذلك أجلت أن أبتسم إلا أن تتحرك الطيارة بالفعل.. وتعرفت على الأطفال اللذين كانوا يجروا حولى, وكان الكرسى بجوارى خالى فهذا أمكنهم من الجلوس بجوارى حين يشعرون بالتعب.
ومن أطرف المواقف التى حدثت لى فى الطيارة أن جاء لى طفل عمره لا يتعدى العامان وبعد ما لعبت معه أكتشفت أنه مفكرنى مامته وأنه بجد تائه..
قد كانت سعادتى تشع على كل من حولى عكس يوم سفرى لم أكن متحملة كلمة من أى شخص ولو حتى من كابتن الطيارة وهو واقف عند باب الطيارة ليقول للركاب حين مغادرتهم الطيارة فردا فرداً "حمدالله على السلامة".
وأخيراً هبطت الطيارة على أرض وطنى الحبيب. وأخذت نفساً عميقاً ليدخل أكبر كمية من الهواء إلى رئتى وكأنى غير مصدقة وباستنشاقى هواءها سأتأكد بأننى على أرض مصر.. ومن أغرب مواقفى وقتها أنى كنت بسلم على أى سيدة أو فتاة بقابلها سواء اللى كانوا معايا فى الطيارة أو اللى كانوا على رحلة تانية لكن بيخلصوا إجراءات الخروج رغم إن الطبيعى فى شخصيتى لا أبدأ بالتعارف على الآخرين.. كنت أرحب بهم وأنا مبتسمة قائلة : نورتوا مصر.
فردت إحدى السيدات قائلة: أنتِ مش كنتِ معانا فى الطيارة برضه.
قلت لها : أيوة ... قالت: يبقى أكيد كنتِ مسافرة بقى لك كتير.
ابتسمت وقلت لها: بالنسبة لى أنا كتير وكتير أوى كمان.
لكم أن تتخيلوا هذا المشهد فتاة فى أوائل العشرينات وجهها مبتسم دائماً وأحيانا تضحك وهى بمفردها تماماً.. ولذلك حينما كنت أجد مجموعة من البنات مع بعض أو سيدة كبيرة واقفة لوحدها أذهب وأتعرف عليهم حتى تنتهى الإجراءات الروتينية وسبحان الله غالبيتهم لم يكن مصريات وأنا قمت معهم بدور المرشدة السياحية واقترحت عليهم الذهاب إلى أماكن كثيرة وجميلة فى بلدى الغالية.
وأتذكر حين رؤية أهلى ياااه كان من أجمل مواقف حياتى..فاكرة كمان إنى يومها لم أكف عن الكلام والضحك لدرجة إنى مانمتش لمدة يومين متصلين من كتر شوقى لكل حاجة وبقيت خايفة أنام لأحسن أصحى ألاقى نفسى كنت بحلم وإنى لسه هناك..
كنت عايزة أقول لكل شارع مشيت فيه وحشتنى.. كنت عايزة أسلم على كل حد اتعاملت معاه وأقوله وحشتنى.. كل حاجة فى بلدى كانت وحشاانى جدا.
وبغض النظر عن أى حاجة حصلت لى بعدها بس أنا بجد سعيدة جداً إنى رجعت بلدى تانى ومعنديش نية أسيبها تانى وأتغرب عنها مهما كانت الإغراءات وتحت أى مسمى.
-------
أردت أن أذكر نفسى بأيام غربتى لأنى أعانى حالياً بعدم الرغبة فى البقاء فيها كسابق عهدى .
فياريت اللى عنده علاج لحالتى دى يقولى عليه .


سؤال جانبى:
ــــــــــــــــــ
أذكر موقف قلت فيه من قلبك بحبك يا بلدى؟.


هناك 30 تعليقًا:

الزهرة البرية (Joudy) يقول...

احساسك حلو أوى يا مونى بالانتماء وكونك عايزة تبعدى ده كمان احساس طبيعى كلنا بنحس بيه بس حقيقى بمجرد ما بنخرج خارج اطار بيتنا اللى هو بلدنا بنخاف

أنا هجاوبك على سؤالك بس من منطلق بلدتى الصغيرة تعرفى إنى فى بلدتى بقدر أتحرك بأمان لوحدى من غير ما يكون حد معايا مجرد انى بخرج عن حدودها بحس انى عايزة أرجع لها بسرعة برغم حقيقى إنى أحيانا بحس إنى عايزة أخرج منها إلا إنى حقيقى لما ببقى بعيد عنها ببقى متوتر وبمجرد ما بتوصل المواصلة اللى أنا فيها وأنزل أمشى على رجلى فى شوارعها ببقى مبسوطة بطريقة زى الطفل الصغير اللى بيبقى مبسوط إنه رجع لبيته هو ده احساسى بالنسبة لبلدى

دمتى بكل الخير والحب والسعادة

محمد يقول...

حمدلله علي السلامة

طهر فؤادك يقول...

السلام عليكم ورحمة الله وبركاتة

بارك الله فيكى ياموناليزا

جيتى على الجرح والله

وانتى بتوصفى كل مشهد من مشاهد الحياة هناك فعلا بحس انك بتوصفى حال المتغرب هناك وخصوصا المية والحر وكل دة بس نرجع ونقول الحمد الله على كل شئ والخيرة فيما اختارة الله ...

والعلاج لحالتك انك تخرجى من الحالة دى بالجوء الى الله بالاستخارة ولو فية خير هنا هتقعدى ان شاء الله لو ليكى خير برة هتسافرى ..

د. ياسر عمر عبد الفتاح يقول...

وهوه فيه حد مبيحبهاش
بس هيه المشكلة إنها اتسرقت مننا

حاول تفتكرنى يقول...

نشعر بكل كلمة في المقال ، ولكن كان الوضع معي مختلف نوعا ما لعدم الشعور بهذا السجن الانفرادي ، وكذلك ان المياة دائما في الصنبور ولو كانت ايضا ليس للشرب

دائما انتظر السؤال الجانبي رغم اني لم أجيب عليه في السابق ، ولكن بشكل عام بلدي لها مذاق خاص ، فمصر وطن يسكن كل المصريين وليس العكس

المصريين فقط

دعينا نجيب عن السؤال الجانبي بعد ايام حتى اسمع عبارة حمد لله على السلامة من الطيار

تحياتي

كلمات من نور يقول...

سبحان الله يا موناليزتي الغالية .....أحاسيسك كإنها بتوصف مشاعري أيام الثانوي لما كنت في السعودية ...مافيش شرب من الحنفيات ....اه دي أحلى ميه تروي مياه الحنفيات ...والا احساسي و أنا في الطايرة راجعه لمصر وقتها كتبت كلمات توصف شعوري وكنت حاسه إني عايزة أنزل من الطيارة أبوس تراب مصر و أقولها وحشتينييييييييييييييييي


انتي كمان وحشتيني يا موناليزتي الحبيبة ......

علاج مصر لازم يبدأ من نفسنا كلنا بنتكلم ونتكلم ونتكلم ومحتاجين ننفذ

لجين أبو الدهب يقول...

أذكر موقف قلت فيه من قلبك بحبك يا بلدى؟.

امممممممممممم
سؤال صعب الصراحة يامونزى D:
هو انا دايما اقول ليه كده يابلدى D:

بس قلتها يمكن لما كنت فى موقفك لما سافرت برده ولقيت انك مجرد تمشى فى الشارع لوحدك دى شئ خطر جدا
ومفيش اى امااااان فى البلد كل اللى حواليكى بيفكروا تفكير سئ ..

مافيش عيال بتلعب فى الشارع ..
مافيش افراح وزفة عربيات ..
كل شئ ماسخ وماله طعم ..
وفى نفس الوقت عايزة اسافر تانى ومش معارضة اى فرصة ..
حاسة برده هناك فى مميزات
علشان كده ما اقدرش افيدك فى حكاية العلاج لانى مصابة بنفس المرض D:

***
إيه رأيكم فى ألوان المدونة الجديدة؟ وهل هى مريحة لعيونكم أم أعيدها لسابق عهدها؟

لا ما شاء الله الالوان دى مريحة جدا وعاجبانى ..


جزاكِ الله خير ياحبيبتى
حسيت كأنك بتتكلمى عنى فى البوست ..

عاشــــــ النقاب ـقــــة"نونو" يقول...

السلام عليكم ورحمة الله
على طول بحبها ومواقف كتيرة نزلت دموعي بسبب حتة حب وانتماء بتلح في قلبي
قريت اغلب موضوعات المدونة اللي فاتتني متألقة دوما ربنا يبارك لك
وحشاني ياموني

قلم رصاص يقول...

وطني لو شغلت بالخلد عنه
نازعتني اليه في الخلد نفسي

ربنا يصح لك احوالك

نبضات يقول...

لسه مخلصة امتحانات امبارح امتحانات الدرسات العليا عشان كده بقالى كتير بعيده عن التدوين ..وحشتنىىىىىى

انا كمان بحبك يابلدى ولكن
انا بحب بلدى جدا خصوصا انى جربت الغربة وانا طفلة بس ساعات كتير بيبقى نفسى اسيبها عشان الطفرات اللى حصلت فيها فى كل شىء بقيت احس حتى الهواء اللى بتنفسه ملوث رغم انى ضد الغربة تماما ممكن اسافر رحلة لكن مقدرشى اعيش بعيد عن بلدى وعن الناس اللى بحبهم وبيحبونى
وعن ذكرياتى فى كل مكان

مشاعرك زى مشاعر ناس كتير فى البلد دية لكن ...دائما فى امل فى بكرة

عارفة لما بنظر حولى ..وبشوف انشطة طلاب الجامعات فى جمعية رساله وقد ايه بدات الجمعيه بمجرد فريق فى الجامعه إلى ماوصلت إليه الان من جميع انواع الانشطه بحس أن فى امل وأيضا
الفرق اللى بتكون فى الجامعات كنوع من الأنشطه مثال فريق خطوة فى جامعة حلوان عشان يرتفعوا بمستواهم العلمى بالنسبة للكورسات والندوات وايضا مساعدة الغير

دا اتجاه جديد يدعونى للتفائل ..

عموما ...حمد الله على سلامتك ...نورتى مصر سواء كنت لسه جايه او بتحكى موقف قريب ...وعلى فكرة انتى صغنونه أوى اوائل العشرينات مستواكى الفكرى خلانى أتخيلك اكبر من كده

بجد انتى شخصية بعتز بيها جدا رغم معرفتنا عن طريق العالم الأفتراضى ومثال للفتاه المسلمه عن حق .وبتعلم من مدونتك كتير.

تحياتى لكى

نبضات يقول...

مشاء الله عليكى ربنا يحفظك ويسعد ايامك

داليـ ـ ـ ـ ـ ـ ــــا يقول...

مش عارفه اقلك ايه
اصلى انا عانيت كتير فى بلدنا دى
هتقليلى انى معنديش انتماء هقلك بالعكس
بس منعرف قيمة الشيئ الا لما نبعد عنه وانا عايزه ابعد عنه عشان اعرف قيمتها
وهقلك حاجه بحس ساعات ان مصر ام الدنيا صحيح لكن مش أم لأولادها
يابنتى انا بشوف انى مظلومه هنا
لو ليك سلطه تبقا كل شيئ هنا كل حاجه ماشيه بالفلوس والسلطه والنفوذ
وانا بكرهه كده
ياحببتى انا ببقا فى مكان عملى والأقى واحده شويه ابوها ايده طايله فى البلد دى ويدوبك يحصل اى موقف عادى تلاقيها تهددك [ن ابوها هيعمل وهيعمل وهيعمل
بذمتك دى بلد انا راضيه ذمة اى حد
بس بجد تعبت منها

بس للأسف انا عمرى ما سافرت بره مصر ولا جوه مصر حتى انا تحركاتى محدوده اصلى بعيد عنك فى حصار

بصراحه ده رأى
وع فكره عنوانك بيقولك بحبك يابلدى
ولكن عارفه يعنى ايه ولكن
اهوه انا زيك
بحبها ولكن

تحياتى

حمـــــــــــــــــــــة يقول...

بلادي بلادي و إن جارت عليا
جملة طالما رددناها من باب التندر و عدم التجربة أو التمرس ........... ولكن حين مارست الهجرة و تذوقت معنى الحياة بين أغراب لا يمتون لك بعلاقة بل يعتبرون من ليس من جلدنهم مستوى متدني لا يرتقي الى مستواهم يجب التخلص منه أقلها نظرة إزدراء و غلق جميع الأبواب أمامه في العمل أو حتى الجلوس قربهم
حينها ندرك معنى الأخوة و الوطن و الدين
تدرك مدى فتك المادة بالعقل البشري
.....................

ستيتة يقول...

لألألألألألألألألألألألألألألألأ
انتي كنتي معايا مطرح ما كنت
سبحان الله
لو كتبت لن اكتب الا ما كتبتي

بلدي؟
موقف؟
كوني يا مصر كما تكوني
خليهم يعملوا فيكي كل المفاسد ويغيروا فيكي زي ما يغيروا
بحبك على عيبك
انزل بس من الطيارة اشم هواكي
اشمه بس
روحي ترد
اركب العربية كل اللي حواليا يحسوا اني مجنونة
بضحك لكل اللي راكبين العربيات حواليا
عاوزة انزل احضنهم كلهم
يااااااااااااااااااااه
يارب ما تكتب لي غربة مرة اخرى
اعشق مصر بكل ما فيها
نيلها بحرينها صحرائها زرعها ريحة شجر البرتقال ريحة الياسمين في الإشارات ستاتها رجالتها اطفالها

تحياتي

د/على خميس يقول...

السلام عليكم و رحمة الله و بركاته
ا / موناليزا
الفرق الوحيد اللى خلانى احس انك مش بتتكلمى عنى انك اتغربتى شهور فقط ...
و الله موضوع الشرب من مياه الحنفية كانت ناس كتير مستغرباه منى .. كنت لما اجى أجازة و اشرب من مياه الحنفية اقول للى قاعدين فى مصر .... يا بختكم..
أسأل الله أن يبارك لنا فى مصرنا و أن يفك أسرها من كل ظالم
بارك الله فيك
تحياتى

افروديت يقول...

موناياقمرأكيدكلنابنحب مصرواللي بيبعدعنهابيحس دااكتر..وفعلآ مع اني ساعات بحس أنهاصعبانه عليه ساعات بلعن اليوم اللي خلاني أبقي فيها بس اقولك اناوانت وكل المصريين بيحبوهاومش بنستحمل عليهاكلمه العيب مش فيهاالعيب في اللي خلوهاوحشه وآسيه وعايزين يعلموناازاي نكرها..باي يااحلي موناليزا

ذكرى رحيل قلم يقول...

السلام عليكم
يااااااه يا مونتي شيلة ده كله في قلبك وسكته طيب فضفضي لا احد يعرفك هنا ولا انت تعرفي احد هكذا هي المدونات لرسالة تقدميه ولكن من حقك علينا ان نسمع ما بداخلك ان اردتي يوما تفضفضي
ربنا معاكي احساسك صعب قوي انا كمان اتغربت لكن داخل بلدي ولازلت في الغربة لاني كاره المكان اللي موجودة فيه وعلي الرغم من اني لا استطيع الهرب منه الا بضعة ساعات او يوم او يومان الا انني برجع له تاني انا كمان محبوسة داخل سجن وسجانه موجود لا ني في بلد لا تأتمني فيها احد بس اهو الوحد برده علي قدر المستطاع بيحاول يتأقلم عشان يعيش

ذكرى رحيل قلم يقول...

هوني علي نفسك يا اختاه لعله كل ما تعرضتي له خير ربنا ان شاء الله سيهبك بدلا منه خير وسلام ووئام

تعرفي ان الانسان لما يتعرض لكرب او الم او فقدان شيء او اي هم اوحزن ان الله عز وجل بعووضه عنها خير ربنا يرزقك بالخير
ان الله ما اخذ منكي الا ليعطيكي فانتظري الخير من الله ان شاء الله
دمتي بحب

ليله شتاء يقول...

السلام عليكم

انا حاسة بيكي جدااا واقولك كمان اننا مش بنحس بقيمة الحاجة غير لما نبعد عنها
الموقف لما حد بيشوه صورة بلدى اوى اه انا مش بنكر ان فى عيوب بس دي بلدى

البقاء لله ان لله وان الية راجعون

موناليزا يقول...

الزهرة البرية
ـــــــــــ
أهلا اهلا بالقمر
ده حقيقى انا كنت لأقرب وقت حدودى الشارع اللى فيه بيتنا ولو بعدت عنه بجد بتوه:)

نورتينى جودى الجميلة واسعدنى تواجدك


********************************


محمد
ـــــ
أهلا بيك أستاذ محمد
الله يسلمك
يسعدنا دوام التواصل



*********************************


طهر فؤادك
ـــــــــــ
وعليكم السلام ورحمة الله وبركاته
أهلا بيك يافندم
ربنا يكرمك
وفعلا محدش بيختار غربته بإيديه

بس واضح انى معرفتش اعبر كويس لان مفيش فرصة ليا قريب انى اسافر ومحتاجة اعمل عليها استخارة انا بس بقيت مش عايزة اقعد فى بلدى زى الأول
أشكرك جدا لتعليقك
ويسعدنا دوام التواصل



********************************


د. ياسر عبدالفتاح
ــــــــــــــــــ
أهلا بيك يادكتور
عندك حق جدا
يسعدنا دوام التواصل


*********************************


حاول تفتكرنى
ــــــــــــ
أهلا بيك يافندم بعد طول غياب
هو كده مختلف فى حكاية السجن الانفرادى بس لان المياة كانت برضه موجودة فى الصنبور ولكن لا تصلح للاستخدام نظراً لسخونتها الشديدة ده غير طبعا انها لا تصلح للشرب

:) يسعدنى اهتمامك بسؤالى الجانبى
ده حقيقى
:) توصل بالسلامة ان شاء الله ونسألك الدعاء أثناء السفر
أشكرك جدا لمشاركتك
يسعدنا دوام الواصل




*********************************


كلمات من نور
ـــــــــــــــ
اهلا اهلا بالغالية
:) مش كده برضه.. شعور ممتع وانتى بتشربى من الحنفية مباشرة:)

ربنا يعزك ياحبيبتى وانتى كمان والله وحشتيييينى جدا جدا
ربنا يطمنى عليكى دايما
نورتينى غاليتى واسعدنى تواجدك



*********************************


لجين ابو الدهب
ـــــــــــــــ
أهلا اهلا بالقمر
:)
:) طب وبعدين هنسكت على حالتنا دى

أشكرك جدا لرايك فى الوان المدونة الجديدة
نورتينى لوجى الجميلة واسعدنى تواجدك



**********************************


عاشقة النقاب
ـــــــــــــــ
وعليكم السلام ورحمة الله وبركاته
أهلا اهلا بالقمر بعد طول غياب
ربنا يعزك ياحبيبتى
واسعدتينى حقاً بمتابعتك وتواجدك
نورتينى يا نونو ووحشتينى كمان:)



*********************************


قلم رصاص
ــــــــــ
أهلا بيك يافندم
مشاركة متميزة جدا اشكرك عليها
ربنا يعزك يارب
ويسعدنا دوام التواصل




********************************

موناليزا يقول...

نبضات
ـــــــ
أهلا اهلا بالقمر بعد طول غياب
بالتوفيق ياحبيبتى ان شاء الله وكده يبقى عذرك معاكى وهستناكى تنورى مدونتى بتعليقاتك الجميلة دايما:)

احساسى كده برضه احب السفر كرحلة ولكنى ضد الغربة تماما

ماشاء الله اول مرة اعرف ان جمعية رسالة بدأت بمجرد أسرة فى الجامعة.. ربنا يباركلهم

:) الله يسلمك ياحبيبتى
:) لما كنت مسافرة كنت فى اوائل العشرينات لكن انا دلؤتى فى آواخر العشرينات.. عمر تانى:)

ربنا يسعدك يارب .. شعور متبادل بجد وأنا أيضا اعتز بمعرفتك جدا وبفتقد كلماتك جدا سواء فى تعليقات او فى مواضبعك على مدونتك
ربنا يديم الحب بينا ويجمعنا فى ظله فى يوم لا ظل فيه الا ظله
أسعدتينى بتواجدك حقا
نورتينى ياجميلة وفى انتظار دائما




********************************


داليا
ـــــــ
أهلا اهلا بالقمر
من اسوأ الحاجات فى بلدنا موضوع الواسطة والمحسوبية بجد حاجة تخنق

:) مش انتى لوحدك اللى فى حصار على فكرة

أشكرك جدا لمشاركتك
نورتينى داليا الجميلة واسعدنى تواجدك



*********************************


هاما
ـــــــ
اهلا بيك يافندم
عندك حق جدا
فيكفى ان بلدك هى بلدك
اشكرك جدا لتعليقك
يسعدنا دوام التواصل



********************************


ستيتة حسب الله الحمش
ـــــــــــــــــ
أهلا اهلا بنبض الحكمة
:)سبحان الله .. كتير بجد حسوا كده وواضح ان المصريين مشاعرهم واحدة بجد:)

نورتينى سوتيتة الجميلة واسعدنى تواجدك



*********************************


د. على خميس
ــــــــــــــ
وعليكم السلام ورحمة الله وبركاته
أهلا بيك يادكتور
:) وكأنهم سنين بالنسبة لى اخى الكريم
كتير بجد مستغربين الشرب من الحنفية على انه نعمة المفروض نشكر ربنا عليها:)

ربنا يعزك ويتقبل دعائك اللهم امين
أشكرك جدا لتعليقك
يسعدنا دوام التواصل



********************************


افروديت
ـــــــــــ
أهلا اهلا بالقمر
عندك حق جدا
بلدنا ملهاش ذنب باللى بيجرى فيها
تسلميلى ياجميلة
نورتينى حبيبتى واسعدنى تواجدك



********************************


ذكرى رحيل قلم
ـــــــــــــــ
وعليكم السلام ورحمة الله وبركاته
أهلا اهلا بالقمر
ما قلته لا يعادل شئ بجوار مالم أقله:)

لانى اعلم تماما ما تقولين فاحب اقولك انك بالمقارنة باللى انا كنت فيه فانتى فى نعمة كبيييرة جدا:)

والحمدلله فعلا ياحبيبتى طالما من عند الله فهو خير كبير
ماتحرمش منك على كلماتك المشجعة
نورتينى غاليتى واسعدنى تواجدك



*********************************



ليلة شتاء
ـــــــــــ
وعليكم السلام ورحمة الله وبركاته
أهلا اهلا بالقمر
عندك حق
وزى ما المثل بيقول انا ادعى على ابنى واكره اللى يقول امين:)
نورتينى حبيبتى واسعدنى تواجدك

houda يقول...

حمد الله على السلامة ونورت مصر من جديد واحساسك في الكتابة جميل اوي وسبحان الله الواحد بيبقى مرتبط بمصر بشكل غير عادي ولو سابها يوم بيبقى مشتاق يرجع لها ثاني ومهما حصل للواحد من ظروف صعبة وهو فيها بتهون لحظة ما بيسبها وبتبان في عنينا انها جنة ما نفكرش نسبها تحت اي ظروف عشان كده بعتبر اللي حصل لك طبيعي جدا واحساس بيجي لكل واحد فينا المهم انك في النهاية رجعت لها اومال اللي سايبها طول حياة يقول ايه.بحضوص اللون اللي حطتيه فهو جميل جدا ويشرح القلب ياريت ماتغيريهوش وفي الاول والاخر المدونة كلها مشاء الله مذهلة ومواضعها اجمل تحياتي ونورت مصر من جديد

Unknown يقول...

أختي الكريمة.. حديثك ذو شجون أكثر من يستشعرها من جرب الغربة..!!

أحييك على الوصف المعبر والكلمات التي من الواضح أنها خرجت بكل صدق وتلقائية.

تحياتي.
----------
أدعوكِ لزيارة هذا الموضوع بعنوان (صديقني ولسون!).. ففيه أتحدث عن أحد تأثيرات الغربة علينا..!!

http://magidalkady.blogspot.com/2010/02/3_16.html

Unknown يقول...

على فكرة .. رغم المعاناة التي أعانيها كلما سافرت في إجازة إلى مصر في إتمام أي إجراء حكومي، أو إتمام أي مصلحة... إلا أن قلبي يعاند جسدي دائما والله هاتفا في كل وقت وحين: بحبك يا بلدي.. رغم أنف اللي عاوزين يكرهونا فيكي!!!

Unknown يقول...

يااااااااه ياموناليزا فكرتيني بالذي مضى بس مع الفارق أن غربتي دامت سنين وكنت كلما أعود إلى مصر في إجازة تأبي نفسي العودة إلى الغربة مرة أخرى.
ورغم أني ولله الحمد أستقرت ظروفي في مصر منذ فترة ليست بالقصيرة إلا أني لا أملك أي رغبة في السفر مرة أخرى.
وأحب أن أقول أني تعلمت سواء من غربتي أو من أستقراري في مصر أن أنظر دائما إلى الجانب المشرق فيها وأحاول بقدر الإمكان أن أغض نظري عن السلبيات بل كنت وما زلت أحاول أن أحولها إلى إجابيات فمثلا بعض الأمو الشاقة التي أمر بها أنظر لها أنها بمثابة وسائل لصقل نفسي وتربيتها.
وتعلمت من غربتي وأستقرارى أنه فعلا صدق من قال لكل مجتهد نصيب، وان رزقك واحد هتحصله سواء برة مصر أو جو مصر بس فين دورك أنت لتحصيله.
وفي النهاية أحب أن أؤكد أن سعادتنا الحقيقية تكمن في قلوبنا وعقولنا فإن استطعت أن تقنعي نفسك بما هو متاح فسوف تعيشين أسعد الناس إن شاء الله سواء داخل مصر أو خارجها.

موناليزا يقول...

هدى
ــــــ
أهلا بيكِ فى زيارتك الاولى
الله يسلمك ياحبيبتى
اشكرك جدا لرايك ولتعليقك
نورتى مدونتى فى انتظارك دائما




******************************


ماجد القاضى
ـــــــــــــــ
أهلا بيك أستاذ ماجد
أشكرك جدا لتعليقك

واشكرك على ذكر الرابط مع انى اشعر انى قرأته قبل كده بس زيادة الخير خيرين ونذهب اليه من جديد:)

=================
شعور يعرفه غالبية المصريين أخى الكريم


يسعدنا دوام التواصل




*********************************





نور
ــــــ
أهلا اهلا بالقمر
أشكرك جدا لتعليقك المميز
نورتينى ياجميلة واسعدنى تواجدك

rovy يقول...

وحشانى يا مونى .. وحشنى قلبك الكبير
انتمائك مش غريب عنك .. ده شىء طبيعى منك ..
ربنا يبارك فيكى حبيبتى و ما يحرمك من بلدك و لا أهلك و أحبابك أبداااا
المدونه جميله و ألوانها حلوة و كلها ذوق زيك حبيبتى ..

.............
البقاء لله فى والد نسيبه .. الله يرحمه بواسع رحمته و يصبرها يا رب ..

تحياتى و خالص مودتى

موناليزا يقول...

روفى
ـــــــ
أهلا اهلا بالغالية بعد طول غياب
إيه النور ده:)
وحشاااانى جدا ياحبيبتى
ربنا يكرمك ياحبيبتى وتسلميلى ويسلملى دعائك الجميل اللى محتاجاه بجد
والحمدلله فقد عدنا الى ارض الوطن سالمين:)

أشكرك جدا لرايك فى الوان المدونة
---
سعيكم مشكور ياحبيبتى

نورتينى روفى الجميلة واسعدنى تواجدك

م. حجاز يقول...

احساسك بالانتماء جميل جدا ورائع والمشكلة لو سألتى اى حد انته بتحبها ليه ما يعرفش انا بحبها وخلاص وما اقدرش اتنازل عن الحب ده لاى حد

واحسن حاجه اقولهالك نورتى مصر

موناليزا يقول...

الباحث عن الصفر
ـــــــــــــــــــ
أهلا بيك يافندم فى زيارتك الاولى
أشكرك جدا لرأيك ولتعليقك
وفعلا عندك حق حب مصر يجرى فى دم ابنائها

يسعدنا دوام التواصل