السبت، 5 يونيو 2010

مش حلوة فى عينيه

بعد ما انتهت من شغل البيت ذهبت لتتزين فى انتظار زوجها وأصبحت كمن يظهرن فى الفيديو كليب وبعد ما اكتملت زينتها ظلت تنتظر زوجها بفارغ الصبر فهى تتزين أمام المرآة منذ أكثر من ساعتين من اختيار الوان الماكياج المناسبة لما ترتدى واختيار تسريحة الشعر ووضع التاتوهات وإرتداء الإكسسورات وما إلى ذلك من أجل أن تنال نظرة رضا وسرور من زوجها وحتى يرضى عنها الله قبله فهذا من حسن التبعل.. فهى كثيراً ما سمعت قبل زواجها بأن أكثر ما ينفر الزوج من زوجته استقبالها له برائحة المطبخ وارتدائها ملابس تنظيف البيت طول الوقت ولذلك عزمت أن تكون متجددة له دائماً.
آتى الزوج وكالعادة لم ينظر إليها وطلب الأكل وبعدها فتح التلفاز سريعاً وكأنه ينتظر شئ هام لتفاجئ به بعد تقليب القنوات بلا تحديد وجهة محددة يشاهد فيلم كارتون.
أصابها إحباط وخيبة أمل لتجاهله المتعمد لها وقالت بداخلها: تُرى لو نزلت الشارع الآن بمظهرى هذا ماذا سيكون رد فعل الرجال؟
وسألت زوجها عن هذا فقال بلا إكتراث: هيفترسوكِ.
فقالت بحزن: ليه؟.
فأجابها بشئ من السخرية: يعنى أنتى مش شايفة عاملة فى نفسك إيه.. ده أنتى ولا الرقاصة.
وأنهى الحوار قائلاً: أنا داخل أنام.
فحاولت أن تأخذ منه ولو كلمة حلوة عنوة فسألته مبتسمة: طيب مش تقولى رأيك فى تسريحة شعرى وفى لون التاتو ورسمته.
نظر لها باستهتار وقال : مش بطال.
أزالت كل ما فى وجهها من ماكياج وعلى جسمها من تاتو وشعرها من توك صغيرة والإكسسورات وما إلى ذلك من أشياء استمرت فى تجهيزها وذهبت لتنام متحسرة على كل هذا.
وتقول بداخلها بكره هعمل لوك جديد يمكن ده ماعجبوش بس المشكلة إنى متزوجة منذ شهرين وكل يوم أعمل لوك جديد يمكن أعرف ذوقه إيه وإيه اللى بيعجبه وبرضه مفيش فايدة...إمتى هحس معاه إنى أنثى مش مجرد وعاء لتفريغ شهواته.
وتتذكر نظرات الرجال اللذين يرونها ولو حتى صدفة فى الشارع وتلمح فى عيونهم جمالها فتتحسر قائلة: إيه فايدة إنى أبقى حلوة فى عيون كل الناس وفى عيون زوجى لأ.
-------------------
سؤالى لهذا الزوج:
لماذا تجعل زوجتك تتمنى غيرك وأنت معاها؟ لماذا تساعدها دون أن تدرى على خيانتك ولو حتى فى خيالها؟.
إذا لم تشبع حاجتها النفسية ورغبتها الجسدية فمن سواك سيفعل ذلك؟.
إذا كنت تشهد لها بالجمال فما هى العقبة التى تواجهك؟.
ماذا تفعل لكى ترضيك؟.
إذا كنت لا تطيقها هكذا وأنتما مازلتما فى أول الزواج إتجوزتها ليه أصلاً؟ وياترى ناوى تكمل معاها؟ ولو كنت ناوى تكمل هتكملوا ازاى كده؟.
مش أنت لو شوفت واحدة بره أو فى التليفزيون هتبقى هتتجنن عليها وتقول ياريتنى متجوز واحدة زيها طيب ماهى حلالك معاك وبكامل زينتها يبقى ليه تكسر بخاطرها وماتقولهاش ولا حتى كلمة حلوة واحدة.
- اعرف إن فيه أزواج غيرك كتير بيحسدوك عليها ويتمنوا لو أن زوجاتهم تهتم بنفسها دائماً هكذا.
- استغل فرصة عدم وجود أطفال يشغلوها عنك ويقللوا وقتها المخصص ليك فكل وقتها الآن ملك لك وحدك.
- استغل عدم تحملكما مسئوليات كبيرة واقضيا أمتع الأوقات وأطيبها لتكونا ذكرى جميلة تتذكروها فيما بعد.
- إشحن رصيدك دائما عندها تحسباً لأى ظرف.
- ضع نفسك مكانها دائما وتخيل لو أنت إحتاجت لها وهى سخرت منك وتجاهلتك.
- لا تجعلها تندم على ارتباطها بك .
- لو كنت تعانى من مشكلة ما شاركها فيها واجعلها تقف جوارك وتساندك فهى أولى بيك وحتى تعذرك أيضاً ولا تغضب منك.
- اجعل النبى صلى الله عليه وسلم قدوة ليك فى حياتك الزوجية فهو رغم مسئوليته الكبيرة عن أمة بأكملها إلا أنه كان ونِعم الزوج.
- وأخيراً احذر من معاملتك الجافة لها فستحاسب على كل ذلك. فأنت معك نعمة فحافظ عليها.

سؤال جانبى:
* تنصح الزوجة بإيه؟.

هناك 40 تعليقًا:

r يقول...

السلام عليكم موناليزا
يعنى اعتقد انها لو عملت كدا ايام الخطوبه كان رد الفعل مختلف نهائى لسبب بسيط انه اعتبر انها خلاص ملك له ومش هتضيع من ايده واهماله لها المستمر اكيد هيدفعها لاشياء كثيره لا تحمد عقباها الا الصالحه فقط
دعولتك ونصايحك فى محلها ولكن نقول بردوا ان هناك من يقدر كل شئ جميل تفعله الزوجه له
ونظره الرجل للاسباب لا اعرفها غير ما قلت لننتظر رؤيتهم لها
كل التحيه

♥♥ شذا ♥ الروح ♥♥ يقول...

السلام عليكم
ورحمة الله وبركاته
اختى الحبيبه موناليزا

الله عليكى وعلى موضوعاتك الجميله اللى تخص كل وحده فينا
وعامة من مشاكل الحياة

جعلها بميزان حسانتك
ونفع بك اللهم امين يارب العالمين

♥♥ شذا ♥ الروح ♥♥ يقول...

سؤال جانبى:* تنصح الزوجة بإيه؟.

بصراحه مش عارفه أقول ايه لأن أنا بنت خالتى بتمر بنفس الظروف بالرغم من انها ماشاء الله على قدر عالى من الجمال والرقه ومحتاره تعمل ايه عشان تسعده

انا دايمآ لما بتكلم معاها وهى بتبكى مش بعرف اقول لها غير اتحملى عشان خاطر بيتك وابنك وحاجات كتير اووى لاذم تتعمل
بس اللى غيظنى اكتر واكتر انه مش بيعطها حقها كزوجه حقها الشرعى اللى محلله ربنا ليها
بس مش عارفه اعملها ايه
ربنا يهديه لها يارب
ويهدى كل الرجال لان بصراحه الرجال معظمهم مش يملو عينهم غير التراب
ربنا يهدى
تقبلى تحياتى
ومرورى المتواضع
وياريت بلاش تغيبى عننا كتير واسئئلى زى ما بنسئل

عين فى الجنة يقول...

انصح الزوجة بالنظافة الفائقة فى جسدها دون مكياج ولا دياولو ابتغاءا لرضا الله اولا
ثم الكلام الحلو الرقيق
بس خلاص كله حيبقى تمام

فاتيما يقول...

كالعادة موضوعاتك هايلة يا مون مون


انصح الزوجة بإيه؟؟

الصبر أكيد
مفيش غيره
بس الى حين

و الحين دا هوه ان الزوج يسمع الجمل اللى انتى كتبتيها دى

بس معرفش كلامى دا هيكون فيه ظلم و لا لأ ...بس ازواج كثر بينصحوا بعض ما يعودش مراته على الدلع عشان يعرف يسيطر عليها ...و بعض الرجال بتتصور انها لما تحسس الزوجة انها جميلة ..هتتدلع عليه و تاخد ف نفسها قلم و ميعرفش يسيطر عليها ... عارفة نظرية كسر النفس دى اللى قايمة على فكرة انك تحسس شخص ما بالنقص طول الوقت فيقعد ينشغل بأرضائك و تكملة النقص طول الوقت برضو ...و يبقى كل همه كدا

بعض الأزواج بيتصورا ان دى حيلة كويسة لجعل الزوجة صابة اهتمامها على رضا زوجها طول الوقت و فقط

ميعرفوش ان نفسها بتنكسر
و فيه حاجة جواها بتروح و متنفعش ترجع تانى ما بينهم


حلو العنوان .. بحب انغام اصلى

و بحبك قووووووى يا مون مونتى

بوسات و حضونات يا حبيبتى
و وحشتينى

العلم نور يقول...

السلام عليكم ..

أمر العلاقات الإنسانية متشابك ومعقد وفي اعتقادي أن التفريغ الغير متزن للمشاعر المكبوته والإسقاط هو أهم الأسباب في توتر أي علاقة زوجية.

♥ ♥ Amira Samy ♥ ♥ يقول...

دى أول زيارة ليا على مدونتك

و بصراحة المدونة جميلة جداً و

اعجبتنى كثيراً و أرجوا أن

تتقبلى مرورى على مدونتك الرااااائعة

الفراشة الصغيرة يقول...

انصحها بالصبر والصلاه والدعاء

الدعاء الكثييييييييير

بجد مفيش احلى من مناجاه الله

كلمات من نور يقول...

ربنا يبارك فيكي يا موناليزتي موضوع تمام التمام كعادتك دوما ...شوفي بقى الرجال أحيانا بتزهق من الزوجة الملونة وبعضهم يحب البساطه ويزعل لما زوجته تعمل زي ما قال زي الرقاصه !!!!

يعني على سبيل المثال أنا أمي في حياتها حطت الماكياج مرات على أصابع اليد تخيلي....و يوم فرحي أبويا دخل عالبنت بتاعة الماكياج وقالها عارفه لو لطختي وشها زي عروسة المولد مش حانزلها من البيت ..ههههههههههه طبعا هو قال كده وانا اديتها عياط وبوظتلها مكياج عروسة المولد ....

الرجل يحب التغيير يعني مرة بسيطه مرة شابة صغنونه مرة طفلة ووووو حقيقي هو داه التغيير ...فيه نصايح تانيه كتير يعني مثلا تبعتله ماسيج عالموب : نكتة ... كلمه حلوة ... دي بيسموها مناغشه ....لو فضل زي ما هو يبقى حله واحد بس تتجاهله تماما وتنشغل عنه حبتين (:

افروديت يقول...

عجبني اوي البوست يامونافكرته حلوه ومفيدة والمفروض ان كل ست فعلآزي مابتهتم ببيتهاتهتم بشكلهاونظافتهامعلش معلوماتي مش كتيرلاني لسه مش اتجوزت. ربنايوفقك ياقمرفي الابتعمليه

د/على خميس يقول...

السلام عليكم و رحمة الله و بركاته
بارك الله فى كل زوجة ترضى ربها فى زوجها و تتقى الله فيه
و بالنسبة للزوجة أنصحها بالدعاء و الصبر و ألا تمل و أن تشغل نفسها بمقارىء أو دور القرآن أو جمعيات خيرية أو أنشطة اجتماعية أو دروس علم أو دراسات عليا أو كل ما سبق
وفقك الله لكل خير

أنا - الريس يقول...

علي فكرة بما اني شاب
اتمني ان زوجتي المستقبلية تهتم بيا كدا
وعلي فكرة لو مكنش عنده عذر قهري
دا يبقي مش راجل لان الراجل اللي يحترم المرأة
بس معلش عندي سؤال
هيا ليه وفقت عليه من الأول اصلا
علي فكرة سوء الاختيار منها لأنها سمحت لشخصية حقيرة تخش حياتها

احب اهني الزوج انه هيجي يوم القيامة وهوا جسمه مايل لأنه لم يعدل

وقال رسول الله صلي الله عليه وسلم
"لا يَفْرِك مؤمنٌ مؤمنةً؛ إن كره منها خُلقاً رضي منها آخر" رواه مسلم

ربنا يهديه ليها
ولو فضل معاه بالاسلوب ده
انصحها انها تطلب الطلاق .. لأنه اهون دلوقت من وجود عيال يتدمروا في حياة معدتش تعرف الرحمة وتحياتي

ALLELIO- موطنـــــــــــــــــــــــــــى(ma patrie) يقول...

اعتقد ان راجل فى السن دة ممكن ضغوط الحياة تخلية لاينظر لاشياء حولة وهو ملام طبعا لانة لازم يكون على قدر مسولية بيتة
اعتقد ان الست كدا عملت اللى عليها ولازم الرجل هو اللى يغير موقفة وحتى لو الضغوط كتيرة لازم يعمل فصل بين حياتة خارج البيت وداخلها

مرسى على التوبيك الجميل دة

طهر فؤادك يقول...

السلام عليكم ورحمة الله وبركاتة

اخبارك اية

وربنا يكرمك يارب على المواضيع الجميلة دى الى بتدى دروس جميلة للمقبلين للمتزوجين وكمان كيفية المعاملة الحسنة ودة بنشوفة من الحوار والتعليقات الهادفة ... واستخلص بقى من التعليقات الجميلة دى هو فعلا الصبر والمعاملة الحسنة والتغيير فى الشكل والروح والمضمون وربنا يهدية ليها ان شاء الله ويطبق تعاليم الرسول صلى الله علية فى معاملاتة الزوجية النبيلة والعظيمة ...

وربنا يهدى ان شاء الله والمسلمين اجمعين

Single Mummy يقول...

عزيزتى موناليزا
البوست رائع بس للأسف محير مش عارفة اقول اية للزوجة ولا لجوزها
انا اصلا محتارة فى النفس البشرية ونعقيداتها اغلب الظن ان محدش عارف هو عاوز اية بالضبط ولا اية اللى يسعدة وعليى\ة مينفعش حد يقولة اعمل كذا او متعملش
كئيبة انا صح؟
تحياتى وقبلاتى

حمـــــــــــــــــــــة يقول...

سؤال جانبى:* تنصح الزوجة بإيه؟
فات الأوان بكل صراحة كان قبل هذا التوقيت تنفع النصيحة أما الآن من الواضح فرقا كبيرا في التفكير والتصرف بينهما...مهما فعلت المسكينة لن تصل الى نتيجة إيجابية ...عبارة عن صب الماء في الرمل ...........
أحسن حاجة "ورقة و قلم "
إتفاق حول نقاط أساسية: كيفية التصرف
- خارج المنزل للعمل أو غيره
- داخل المنزل ( أكل ، نوم على الأقل)
هنالك نوعية يجب أن تقاد...بالفعل لا تستطيع البرمجة .... تكوينه هكذا
يعمل مع الآخر كأجير و لا يستطيع نفس العمل يديره بنفسه لنفسه رغم الفارق في الكسب
========>>>>
هنا يعطينا فكرة عن التزوج (خاصة بالنسبة للإيناث) بأي ثمن
مخاطرة تترتب عليها مصائبا كثيرة
الفوارق لا بد من وضعها في الإعتبار
هنا ليس بالضرورة المادة فقط
لا بل الفارق في العمر
في المستوى
في العادات و التقاليد
الخ
و دور الوالدين هنا محوري
لا أستطيع تقبل تصرف البعض
أربي إبنتي و أقذف بها في أتون تغرق فيه
وليس وحدها...بل العائلة معها و خاصة أمها وأبيها
أربي إبنتي و أقدمها لعديم أخلاق أو جاهلا
لا يمكن القبول بذلك
هي علاقة بين أثنين
إذا لم يتواصلا في كنف الإحترام
طبعا لا بد كل يقوم بدوره
للعلم ظاهرة المرأة تعمل و الرجل يلازم الحيطان تفشت و خلقت جيل رجال جديد
و كأنها عندها عجل تسمنه لبيعه بأوفر الأثمان أو يعاشر أكثر من أتان
لا حول ولا قوة إلا بالله
عالم مقلوب كرأس البصل
في النهاية مجرد رأي و من عنده أحسن ليتكرم علينا به

حمـــــــــــــــــــــة يقول...

هذه عينة مما يحدث و هي قطرة في بحر :

Salam,

Toute ma vie je l'ai attendu, je rêvais de passer ma vie avec lui et il n'est jamais venu.....

Le pire je crois c'est qu'on me demande comment une filleaussi "jolie" que moi soit encore seule......je crois que ça finit de me déprimer......

Que Dieu me pardonne mais l'amour n'étant pas venu, je ne veux pas me réveiller à 40 ans en medisant que je n'aurais pas vécu.....
J'ai eu des relations qui n'ont pas abouti car je voulais vraiment LE BON.....

Je n'y crois plus et j'ai décidé de renoncer à mon utopie et perdre ce qui est devenu aujourd'ui un fardeau qui m'a empêché de vivre en fin de compte

J'ai juste voulu témoigner, svp pas de jugements merci
من يتمعن في أسطرها يفهم و يتيقن من وضع السيف على رقابهن (ضغط مع مؤقت )و كل يوم يمر يزداد التعكر
ملاحظة: من تعذر عليه الترجمة ( أردتها بلغة كاتبتها) أنا حاضر للقيام بذلك
فقط أطلب ......شكرا

هي وظروفها يقول...

مساء الخير
بخصوص البوست فهو من الواقع

واحييك علي اختيارك كلماتكوتربتيبها وحسن عرضها

نصيحيتي للزوجه

اذا علمت ان وزجها دائم التجاهل
لها تتصرف علي طول بوجهه نظر تانيه خالص
تعمل ايه بقي يا موني اقولك
هو بيعمل انه مش شايف زينتها ومش بيهتم
تو ما تعرف انه طالع تلبس هدوم عاديه جدا
وياريت تلبس الللبيس اللي كانت بتطبخ بيه ويا سلام لو كانت ريحته بصل

تهمله كبيره بس احطلك الغدا او العشا وتقعد بعيد عنه ادام التلفزيون ولا اكنه جه

هو هيحس ان فيه حاجه غلط وهيسالها مالك وايه اللبس ده وكده
متعملش فيها بقي ساعتهاانها ناظره مدرسه وبتعاقبه لا
تقوله ابدا اصل انا حسيت ان الموضوع مش فارق معاك كتير
وكوني اتعب نفسي في توضيب مظهري عشان ارضيك وانت مش فارق معاك ده
فقولت خلاص هتعب نفسي ليه
اقولك لما تبقي محتاجني ابقي قولي قبلها وتسيبه وتقولو اقوم بقي اعملك الشاي

تشرب الشاي من هنا وتقوقلو معلش يا حبيبي اصلي تعبانه ف تنضيف الشقه والمطبخ تصبح علي خير

مجبش معاه اللام ده نتيجه لمده اسبوع مع ملاحظه انها تتصرف ببرود عاقل
عدي تلات اربع تيام ع الوضع ده وهو بردو منفض

تشتغل بالطريقه التانيه الهجوميه
وهي كالاتي
مثلا بعد ما ييجي من شغله ويتغدي ويريح شويه

تقوله محمود ممكن نتكلم شويه
هو انت شايف اني ممكن اعمل ايه لما تشوفني ساعتها تحس اني عاجباك
انا عايزه ارضيك واخليك اسعد راجل ف الدنيا بس انت قولي عايز تشوفني ازاي
انهي لبس بيعجبك
انهي اساتيل يخليك حابب اني اكون جمبك معاك
تتكلم معاه بصراحه وفهاش اي مجال للخجل
لو بردو مهتمش
في الطريقه التالته والاخير

الا وهي تعامله عادي اكل وشرب ولبس وليس الا
يعني ايه
يعني حتي لو طلب حقه الشرعي عشان يرضي نفسه متعترضش بس تحسسه انها مش مبسوطه وانها بتعمل كده عشان ترضيه انما اسلوب وطريقه انانيته ف الاحتاج ليها مضيقاها
اكيد هيفهم لانه اكيد بيفهم انها مش مبسوطه امتي لانها ف الاول وف الاخر مراته

مكنش بقي وطلع مبيفهش
تقولو بص بقي انا كده هخونك وتروح خايناه مهو البعيد غبي ويستاهل

موناليزا يقول...

بسنت
ــــــــ
وعليكم السلام ورحمة الله وبركاته
أهلا اهلا بالقمر
فعلا هى اكيد وجهة نظره انها اصبحت ملكه
وطبعا اى راجل طبيعى المفروض يقدر ده لكن واضح ان الزوج ده مش من النوعية دى

أشكرك جدا لمشاركتك
نورتينى بسنت الجميلة واسعدنى تواجدك




**********************************


شذا الروح
ـــــــــــ
وعليكم السلام ورحمة الله وبركاته
أهلا اهلا بالقمر
ربنا يكرمك ياحبيبتى واشكرك جدا لرأيك فيما اكتب
------
ربنا معاها بجد وخليها تتابع معانا التعليقات يمكن تلاقى نصيحة تفيدها وتقدر تطبقها

ربنا يتقبل دعائك ويهدى الجميع
وانتى تنورينى فى اى وقت
وانا متابعاكى دايما بس اوقات كتير مبعرفش ارد
نورتينى ياجميلة واسعدنى تواجدك



**********************************


راجى
ـــــــ
أهلا بيك أستاذ راجى
يعنى معقول يافندم الزوجة هتضع ماكياج من غير ماتهتم بنظافة جسدها ماهو ده الطبيعى
والكلام الحلو الرقيق هى المفروض اللى تسمعه مش اللى تقوله لانها لسة عروسة شهرين!
أشكرك جدا لمشاركتك
يسعدنا دوام التواصل




*********************************



فاتيما
ـــــــــ
أهلا اهلا بأم يوسف الغالية
ده من ذوقك ياحبيبتى ماتحرمش منك أبدا

ياااه يا طماطم تصدقى خلتينى اخد بالى من شخصية ناس كتير بيتعاملوا مع اللى حواليهم كده فعلا لدرجة ان الطرف الاخر اللى مافيهوش عيب يبدأ يشك فى نفسه
وده بجد بيكون غباء لان يوم ما الطرف التانى يعرف.. نفسه مش هتتكسر على قد مامعاملته هتتغير تماما

:) هى دى أغنية لأنغام والله؟.. أصل العنوان جه معايا كده:)

وأنا كمان ياقلبى بحبك جدااااا
وربنا يسعدك يارب ويفرحك برجوع يوسف
نورتينى غاليتى واسعدنى تواجدك




**********************************


أم الخلود
ـــــــــــ
وعليكم السلام ورحمة الله وبركاته
أهلا اهلا بالقمر
صح جدا بس الزوجة ذنبها ايه؟
نورتينى ياجميلة واسعدنى تواجدك



*********************************


سلسبيل
ـــــــــ
أهلا بيكِ فى زيارتك الاولى
أشكرك جدا لرأيم ونتمنى ان تظل عند حسن ظنك بيها
وانتى تنورينى دايما ياحبيبتى وفى انتظارك دايما



*********************************


الفراشة الصغيرة
ــــــــــــــ
أهلا اهلا بالقمر بعد طول غياب
ونعم النصيحة بس مفيش حاجة بتتحل بالدعاء لوحده لازم يصاحب الدعاء فعل
نورتينى ياجميلة واسعدنى تواجدك




*********************************



كلمات من نور
ــــــــــــــ
أهلا اهلا بالغالية
ربنا يعزك يارب وماتحرمش من تعليقك ابدا
طيب لو كان كده ما يقولها هو عايز يشوفها ازاى على الاقل يريحها من وقوفها امام المرايا بالساعات:)

:) يا عسل

ماهى قالت انها كل يوم بتغير اللوك اللى بتعمله ومع ذلك لسه مش عارفة هو ذوقه ايه!

وفعلا التجاهل هو احسن حل
بس هتعمل ايه لو تجاهلته وهو بقى كل حياتها!!

نورتينى حبيبتى واسعدنى تواجدك



*********************************


أفروديت
ـــــــــــ
أهلا اهلا بالقمر
أشكرك جدا لرأيك يا جميلة
وان شاء الله نشوفك عروسة قريب وتقدرى تنصحى البنات:)
نورتينى غاليتى واسعدنى تواجدك




*********************************


د. على خميس
ــــــــــــــ
وعليكم السلام ورحمة الله وبركاته
أهلا بيك يادكتور
نصيحة تحترم جدا
وهى اكيد هتعمل كده بس كمان شوية لانها لسة عروسة شهرين:)
أشكرك جدا لمشاركتك
يسعدنا دوام التواصل

موناليزا يقول...

مستر/ بريزيدنت
ــــــــــــــ
أهلا بيك يافندم
والله عندك حق
ماهو محدش يعرف نصيبه فيه فين واكيد لو كانت تعرف انه كده ماكانتش وافقت عليه
الطلاق.. قرار جرئ جدا وماظنش انها هتقدر عليه لانها لسه عروسة واكيد محدش من اهلها هيوافق

أشكرك جدا لمشاركتك المتميزة
يسعدنا دوام التواصل



********************************



بلياتشو
ـــــــــ
أهلا بيك يافندم
فى السن ده!!.. :) ضحكتنى بجد لان العريس لسه شاب فى منتصف العشرينات

وعندك حق جدا فى اللى بتقوله
أشكرك جدا لمشاركتك
يسعدنا دوام التواصل



**********************************



طهر فؤادك
ــــــــــ
وعليكم السلام ورحمة الله وبركاته
أهلا بيك يافندم
أنا الحمدلله بخير اشكر لسؤالك
ربنا يعزك يارب فماتوفيقى الا بالله

فعلا لا نملك لها سوى الدعاء
أشكرك جدا لمشاركتك
يسعدنا دوام التواصل



*********************************



سنجل مامى
ـــــــــــــ
أهلا اهلا بالقمر
لا ياجميلة انتى مش كئيبة ولا حاجة بس نضيفة اوى ومش عارفة تتعاملى مع اللى حواليكى

ربنا يهيئلك كل الخير
نورتينى حبيبتى واسعدنى تواجدك



**********************************



هاما
ــــــــ
أهلا بيك يافندم
تعليقك مميز جدا واعتقد انه هيفيد ناس كتير جدا وعلى اختلاف الاعمار أشكرك جدا عليه
------
ايوة ياريت تبعت لنا الترجمة بعد إذنك:)

يسعدنا دوام التواصل



***********************************



هى وظروفها
ـــــــــــ
مساء النور
أهلا بيك يافندم
أشكرك جدا لرأيك

بغض النظر انى مش عارفة مين "مونى" و"محمود" بس ممكن نعتبرهم اسماء الزوج والزوجة:)

بجد نصايحك حلوة جدا واكيد زوجات كتير هتستفيد منها
ربنا يكرمك عليها
وأشكرك جدا جدا لمشاركتك المتميزة
يسعدنا دوام التواصل

ليله شتاء يقول...

السلام عليكم

موضوعك جميل أوى

سمعت دكتورة علم نفس قالت: لا تنتظرى الرجل دائما يمتدح فى جمالك أو أهتمامك به لأنه يعتبر الاهتمام ده شئ طبيعي منك وأنه مش مطالب انه كل مرة يرجع البيت يمتدح أهتمامك بنفسك لكن طبعا ينتقد لو أهملتى ولو بسيط فى نفسك

سبحان الله وكأن الرجل كائن غريب هههههههه

داليـ ـ ـ ـ ـ ـ ــــا يقول...

انصحها هى
دى هى بصراحه عملت الا عليها وزياده شويتين
انما لو هنصح هنصحه هو
وبردوا مش عارفه اقلك ايه
يمكن المخلوقه مختارتش الوقت المناسب لكل الا عملته ده يعنى ااقصد انه ممكن يكون جاى من الشغل مش طايق روحه فعشان كده ماهتمش
انما هى تخلى بردوا مظرها كويس عشان نفسها فى الاول وفى الاخر ولو هتنتظر كلام جميل يبقا تختار الوقت المناسب لسماع هذا الكلام
وبعدين بردوا هى متخشش على الراجل كده فجأه يعنى تمهد الاول ههههههههه

موضوع لذيذ حقيقى
وانا كان نفسى افتح ع الرابع واتكلم بحريه مطلقه بس يالا كفايه كده

تحياتى يامونى

Unknown يقول...

السلام عليكم
في البداية شكرا موناليزا على الموضوع
أختي الكريمة لاحظت ان كل الردود تحاملت جدا على الزوج مع أن المشهد لم يظهر إلا القليل عنه.
فلا نعلم ظروف هذا الزوج بالضبط فممكن أن يكون في مشاكل في حياته خارج المنزل، وممكن أن يكون من الشخصيات الكتومة التي لا تتحدث إلا بعد إلحاح.
بل من الممكن أن يكو تزين هذه الزوجة له ماهو إلا عملية إستفزاز لمشاعره كأنها في وادي وهو في وادي آخر، وهذا واضح من مشاهدته لافلام الكرتون أنه في حالة نفسية يريد بها الهروب إلى شيئ بسيط جدا لا يحتاج منه أي تفكير.
نصيحتي لهذه الزوجة.
قبل أن تجهد نفسها وتفكيرها فيما تفعل لإرضاء زوجها أن تعقد معه جلسة مصارحة تتحدث معه فيها عما يحزنها ويرضيها وتسأله عما يرضيه وعما يغضبة في كل شيئ مهما كان صغير أو عظيم فالبشر يتفاوتون في متطلباتهم تفاوت كبير جدا.

فأول سنه زواج هذه عن نفسي أطلق عليها سنة الاستكشاف العظيم التي سيترتب عليها طريقة التعامل مع الطرف الآخر باقي الحياة.

وأنصحها أن تؤجل موضوع الاطفال إلى بعد السنة الأولى حتى يكون عندها وضوح أكثر في الرؤيا تجاه زوجها وهل هو فعلا الزوج الذي تستطيع أن تكمل معه حياتها أم لا.

فهذه الأمور نسبية جدا فكثير من الزوجات تكيفن مع أوضاع مشابهة بل وأصعب وهي الوحيد التي عليها أن تأخذ قرار لنفسها.

وأسفة على الإطالة

حمـــــــــــــــــــــة يقول...

ترجمة النص الفرنسي
تقول الفتاة :
---------------
إنتظرته كل حياتي،أحلم تمضية عمري معه...... و هو لم يأتي أبدا
المصيبة أظن حين أسأل : كيف ؟ شابة جميلة مثلك تبقى عازبة......أظن هذا ســـ .... سيجنني
ربي سامحني و لكن الحبيب لم يأتي
لا أريد الإستيقاظ في عمر 40 سنة ليقال لي:لن تخوضي التجربة
جربت ربط علاقات و لم تكلل بالنجاح لأنني لا أريد غير الحلال
لا ولن أصدق
قررت التخلي نهائيا عن مشروع العمر و ضياع الذي أصبح اليوم حملا ثقيلا
فقط أردت المشاركة بشهادتي
من فضلكم بدون أحكام
شكرا
---------------------

لجين أبو الدهب يقول...

الصراحة مش فاهمة !!
لسه بقالهم شهرين وبيقولها كده امال لما يستنى وتحمل وتبقى مش فايقه هايعمل ايه ..

ما اكره فى حياتى اد الزوج القاسى الجاف
اللى لسه فى دماغه موروث سى السيد وان الستات لازم تاخد على دماغها واياك تقولها كلمة حلوة لتاخد عليك ..

حسبنا الله ونعم الوكيل بجد فى كل زوج بالشكل ده ..

واقول لكل زوجة اعملى اللى عليكى واتقى الله وطبقى احاديث الرسول صلى الله عليه وسلم وخلى اعمالك تبقى لوجه الله ..

مش للعبد .. علشان يوم ما يستقلها العبد على الاقل تاخدى عليها اجر عند الله ..

جزاكِ الله خير يامونزى على المواضيع الحلوة دى بجد ..

دمتِ بخير ..

غير معرف يقول...

السلام عليكم
طبعا المشكله فى الزوج هنا انه مش عارف النعمه اللى هو فيها
زوجه تحاول ارضائه وهو مش مهتم
طبعا تهريج ان الزوج يقابل مجهودها بلا مبالاه
والزوجه ربنا يكرمها تصبر باه وتحتسب وتحاول اكثر من مره
وان كنت اعتقد ان المصارحه شيء مهم
ربنا يكرمك ويوفقك

باحث عن حب يقول...

السلام عليكم
موضوع منتشر بين الازواج بالفعل اسمع به واشاهده واقرأ عنه فى منتديات عديده
وهو واقع
ولكن بلا تحيز مشاغل الحياه والضغوط والشغل والفكر لانه
لو قعد فى البيت مين اللى هيصرف عليهم
هيشحتوا
الصبر ثم الصبر
والدعاء ومحاوله اختراق هذا الزوج
وطبعا معروف اخلاقه ودينه قبل الزواج من السؤال عنه
ان تتركه وتتريس فى اصدار الحكم عليه وتجاهد وتحاول ان تخترق اسواره اسوار قلبه
وليس اسوار جسدها هنا الفارق المرأه لها عاطفه جياشه وقلب يملك الدنيا ولكنه تريد واحد فقط هو ملك لها وليس العكس ولكنها لا تدرك ذالك
هذا رأيىء ولم اعيش المشكله لانه لسه مفيش نصيب
والواحد مش عارف من وجهه نظرى الراجل ده محترم شويه مش عارف لو مكانه ممكن اعمل ايه ممكن اطلع غلب اللى شفته فيها من صوت عالى ف وجهها ولازم تستحمل بس انا برضو لازم اراعى انها موجوده فى البيت الوقت ده كله لوحدها
موضوع صعب والله
ربنا يسترها وميصدرش منى حاجه زى دى ابدا

حاجات جوايا يقول...

ازيك يا مونا يا جميلة
وحشتينى يا قمر
موضوعك جميل كالعادة وحساس
مش عارفة ليه الحياة الزوجية متبقاش سهلة وسلسة كده والحياة تبقى حلوة
لازم يطلع زوج خنيق او زوجة نكدية

تقريبا الحل الوحيد اللى يضمن راحة بال الطرفين انهم ميتجوزوش من الاساس

بجد فيه نسبة اضراب كبيرة عن الزواج منتشرة
الموضوع مش موضوع عنوسة وفقر
لا فيه ناس سنها وحالتها الاجتماعية والاقتصادية تسمح بالزواج ومش راضيين يتجوزوا
من ايه ده بقى
من النماذج دى
اللى عقدت نفسها وعقدت اللى حواليها كمان
ربنا يهدى ازواج وزوجات المسلمين يارب وقبل ما يتجوزوا او يفكروا فى الزواج يفهموا يعنى ايه زواج ويعنى ايه مسئولية وتحمل واجتهاد لنيل رضا الطرف الاخر عشان ربنا يرضا عليهم والحياة تبقى مقبولة وليها طعم

ربنا يوفقك دايما يا منمونة ويرزقك بكل الخير يارب

د. إيمان مكاوي يقول...

كثير من الرجال يعتبر الزوجة شيء ممل وممكن على فكرة يعبر عن إعجابه الشديد بأقل مما فعلته زوجته من امرأة أخرى ...
على العموم على الزوجة أن تصبر وتعود نفسها على ألا تنتظر منه تعليق وتقوم بكل ما تفعله من أجل نفسها أولا وتتجاهله قليلا ساعتها سيقبل هو عليها
تحياتي لموضوعاتك المميزة

نبضات يقول...

بوست مميز كالعادة خصوصا انك بتتناولى مشاكل عصريه بتقابل ناس كتير ولا تلاقى أهتمام بالبحث ومحاولة معرفة الحلول فى العادة

أنا عن نفسى أنصح الزوجة ...أولا بفهم زوجها أكتر ومحاوله أستنتاج صورتها فى خياليه كما يحب ، البحث عن هوايه تشاركه فيها أو حديث جذاب ومن هنا ممكن يلتفت لها

فالتجدد ليس فى اللبس والمظهر فقط ولكن فى الحديث ، فى الاكل ، فى الأفكار

ولكى يكون الزواج ناجح لابد ان يوجد الحب والتفاهم والصبر

وفهم كل طرف للطرف الاخر ومعرفة مايحبه وما يسعده

فقد تهتم الزوجه بمظهرها من وجهة نظرها أنه بذلك تكون جميله ولكن يجب ان تأخذ فى حسابتها الزاوية التى يحب ان يراها زوجها بها

ودائما تكون متجددة ممكن مره او اكثر مش عجبته تعجبه المرة اللى بعدها المهم يكون عندها صبر ومحاولة لجذب الطرف الاخر ليس بالمظهر فقط ولكن فى الحديث والهويات

صحيح ان أؤمن ان أكثر الرجال صعب أرضائهم ولكن ليس مستحيل المهم ان الانسان يعمل إلى عليه

والمسؤليه بتكون على المرأه أكتر فى سعادة البيت وسعادة الزوج لان طبيعتها ورقتها تميل للفنون أكثر من الجديه فهى روح البيت وأيضا الرجل يشاركها المسؤلية نجاح الزواج وسعادة البيت ولكن المرأة عليها المسؤليه اكبر

ودائما الرجل يحتاج للفهم أكثر من الحب ، يحتاج أن تكون الزوجة فهماه أكتر ماهى حباه ، لأن الفهم يجعل الأنسان متفهم ماذا يفعل لكى يسعد الاخر

أسفه على الاطاله وهذه وجهة نظرى المتواضعه التى تحتمل الصواب أو الخطا


تحياتى الدائمه لكى

ميرا ( وومن ) يقول...

موناليزا

معلش انا حسيت حاجة غريبة في الحكاية دي

ساعتين بتحط ميك آب وتوك واكسسوارت

هي عروسة مولد ولا ايه ؟؟ وجوزها بيقولها شكلك زي الرقاصة !!!!

معلش أعذريني انا اصلي مش متخيلة التركيبة دي انا مش بحب الميكب أصلا ومش متخيلة واحدة تحطة في ساعتين وتكمل عليه باكسسوارات وتوك

وبعدين مين قال ان النيولوك ولا الأوفر لوك ده هو اللي هايسعد جوزها

لو هي ست جميلة خلقة ربنا ماتكتفي بلبس نضيف ورقيق وشيك وكفاية تكون متسرحة وريحتها حلوة
وبيتها مترتب وكل شئ مظبوط

مهو يمكن مشكلتها انها مأفوره والشكل مش كل حاجة

نصيحتي ليها انها تتعامل بطبيعتها يعني حتي لو عروسة جديدة ومكملتش شهرين في الآخر الحياة معايشة وحتي لو كانت بتتجمل له مش طبيعي يشوفها كل يوم متزوقة كدة مهو اكيد اتعود عليها كدة وبقت مش بتلفت نظرة

خالص مودتي

موناليزا يقول...

ليلة شتاء
ــــــــــ
وعليكم السلام ورحمة الله وبركاته
أهلا اهلا بالقمر
أشكرك جدا لرأيك

:) طيب ويا ترى رأى الدكتورة إيه فى الزوج اللى بيهمل فى نفسه اثناء وجوده فى البيت.. ده عادى برضه:)

نورتينى ياجميلة واسعدنى تواجدك




**********************************



داليا
ـــــــــــ
أهلا اهلا بالقمر
:)
ما هى أصلا مابتشوفوش غير فى الوقت ده وهو جاى من الشغل.. فهى بتحاول تلحقه قبل ماينام عشان تحسس نفسها انها متجوزة
:)
اتكلمى زى مايعجبك وخدى راحتك على الاخر زى مدونتك بالظبط:)

نورتينى داليا الجميلة واسعدنى تواجدك



*********************************



نور
ـــــــــ
وعليكم لسلام ورحمة الله وبركاته
أهلا اهلا بالقمر
الشكر لله ياحبيبتى فما توفيقى الا به

عجبنى وقوفك فى صف الزوج:) ولكن مهما كانت ظروفه خارج المنزل.. قدامه اختيارين يا اما يشارك زوجته فى مشاكله عشان تعذره لمعاملته الجافة معاها يا إما ينسى كل مشاكله اول مايدخل البيت

ونصيحة حلوة جدا بتأجيل الانجاب
أشكرك جدا على مشاركتك المتميزة
نورتينى ياجميلة واسعدنى تواجدك



*********************************

هاما
ــــــ
أشكرك جدا لارسال الترجمة
وللاسف هذا حال الكثيرات

يسعدنا دوام التواصل


**********************************



لجين ابو الدهب
ــــــــــــــ
أهلا اهلا بالقمر
فى الوقت ده هيبقى معاه حجته لتجاهلها انها مش مهتمية بيه وبنفسها:)
احلى نصيحة بجد انها تتعمل مع ربنا مش معاه
ماتحرمش منك ياحبيبتى
نورتينى لوجى الجميلة واسعدنى تواجدك




********************************



م. محمود فوزى
ــــــــــــ
وعليكم السلام ورحمة الله وبركاته
أهلا بيك أستاذ محمود
أشكرك جدا لتعليقك ولمشاركتك وليته يقرأ كلامك
يسعدنا دوام التواصل




*********************************


محمود باحث عن حب
ــــــــــــــــــ
وعليكم السلام ورحمة الله وبركاته
أهلا بيك أستاذ محمود
بس هى مابتطلبش منه يقعد فى البيت هى بتطلب حقها الطبيعى والمفروض بدل وصل البيت ينسى اى حاجة تانية كانت بره ويفتكر ان فيه زوجة مستنية تسمع منه كلمة حلوة بدل ما تدور عليها بره وخصوصا انها لسة عروسة

:) ماهو ده اللى ناقص انه يشخط فيها كمان بعد كل اللى هى عاملاه عشانه.. لو عمل كده المسافة بينهم هتبعد اوى اكتر ما هى بعيدة

ويارب ما تكون فى الموقف ده ابدا لانك مش هتكون قد التوابع اللى هتحصل بعده:)

أشكرك جدا لمشاركتك
يسعدنا دوام التواصل



********************************


حاجات جوايا
ـــــــــــــ
أهلا اهلا بالقمر بعد طول غياب
أنا الحمدلله بخير ماتحرمش من سؤالك
أنتى فين يابنتى وحشتييييينى جدا

ربنا يكرمك يارب واشكرك جدا لرايك فيما اكتب فما توفيقى الا بالله

:) وده برضه الحل!! انهم مايتجوزوش
بدل مايعملوا اضراب ياخدوا محاضرات فى فن التعامل بين الزوجين ويعتبروه كورس تنمية بشرية:)

تسلميلى سالى الجميلة وماتحرمش من تواجدك المميز
نورتينى حبيبتى



***********************************


د. ايمان مكاوى
ـــــــــــــــــ
أهلا اهلا بالقمر


بيعتبرها أنها بقت خلاص حق مكتسب ومايعرفش انه بيموت جواها حبها ليه

وعجبتنى فكرة انها تتجاهله شوية:)
تسلميلى ياحبيبتى وماتحرمش من تواجدك المتميز
نورتينى



**********************************



نبضات
ــــــــ
أهلا اهلا بالقمر

الحمدلله الذى هدانى الى هذا:)

الكارثة بقى لو مالقتش اى ميول مشتركة:)

ماشاء الله عليكى بجد تعليقك عاقل ورزين وينبئ بمستقبل زوجة ناجحة بإذن الله:)
ربنا يسعدك ياحبيبتى
هنقول تانى ..طولى براحتك انا بحب تعليقاتك:)
نورتينى ياجميلة واسعدنى تواجدك



*********************************



ميرا
ـــــــ
أهلا اهلا بالقمر
:) تخيلى لو واحدة مش محجبة ورايحة فرح هتبقى عاملة ازاى
هتاخد وقت على ماتختار هتلبس ايه وتختار التسريحة المناسبة اللى تليق على اللى هى لابساها وتختار الوان الميكب ..والاكسسوارات لزوم تكملة الطقم.. يعنى ساعتين دول يعتبروا وقت قليل اوى كمان:)

زى ماتقولى كده بتحاول تقلد البنات اللى بيطلعوا فى الفيديو كليب واللى عارفة ان الرجال هيتجننوا عليهم

تعرفى المشكلة بجد احساسها ان زوجها مش شايفها سواء حاطة ميكب او لأ
ماهى بقى لها شهرين وكل يوم بتعمل لوك جديد.. يبقى اكيد المشكلة عنده هو .. لانه كان ممكن يريحها ويقولها ايه اللى بيحبه وخلاص

وعندك حق هو تقريبا خد على شكلها وهى ماعدتش فارقة معاه:)

نورتينى ميرا الجميلة واسعدنى تواجدك

mrmr يقول...

طولت البال تبلغ الامل
عليها بالصبر
لان ده قسمتها ونصيبها واكيد ح يجى يوم ويحس بانه ذى ما له حقوق فله واجبات
موضوع جيد يستاهل ان كل زوج وزوجه يكونوا على درايه به
دام قلمك

فارس عبدالفتاح يقول...

انصح الزوجة بان تفهم نفسية وعقلية زوجها لكي تعلم من اين يستثار ومن اين يحبط وكيف تكون مرغوبة في نظرة وكيف تكون منبوذة

الانفس والامزجة تختلف من انسان الى انسان فهناك رجال لا يبهرهم التزين المفرط .. بل ينظرون الى هذه المراة على انها تافهة او انها تستخدم هذا التزين للسيطرة على الرجل والايقاع به .. وقد يحدث رد فعل عكسي واظن ان هذا ما حدث

كذلك هناك رجال تحب هذا النمط من الاستثارة فكل على حسب الانفس والامزجة

ثانياً :


الصبر وعدم الملل والتأفف واظهار الضجر للرجل .. فالمراة تريد الكلام المعسول والملاطفة .. ولكن بعض الرجال ينظرون الى هذه الامور بانها نوع من التفاهات الزائدة عن الحد وهذا يحدث بسبب اختلاف الجنس فالرجل خشن بطبعه والمراة ناعمة بطبعها .. فلابد من فهم هذه الاختلافات في الطبيعة

كذلك ضغوط الحياة كفيله بان تعكر صفو بحر او محيط .. فكيف يكون بال زوجك مع هذه الضغوطات


ثالثا :

المصراحة هي خير اسلوب لحل المشاكلة اذا كان هناك تمسك بالاستمرار في العلاقة الزوجية ( المحترمة ) فالرجل او بعض الرجال يحترمون المرأة الجرئية التي تصارح وتناقش بعقلانية

واكرر

بعقلانية .. بحيث يكون النقاش بعيد ان الرومانسية او الخشونة والعنف

يكون بطريقة وضع الاصبع على جرح دون ان ينزف او يحدث الم حتى لا يكون هناك رد فعل عكسي من الرجل


بعد هذا كله اذا لم يتفهم هذا الرجل ويقدر ما تفعله هذه الزوجة من اجله فهو بكل ادب واحترام

لا يعلم شيء عن الذكاء الاجتماعي

TIMMY !! يقول...

للأسف العكس هو اللي بيحصل ,

بتلاقي الزوجة في البيت مش مهتمية بنفسها خالص ,
و لما تيجي تخرج تبقى على سنجة 10 !!

تقريبا الزوجة اللي حضرتك بتتكلمي عنها دي " حالة خاصة " !!

ربنا يهدي الازواج و الزوجات لما فيه الخير

richardCatheart يقول...

تحياتى على البوست يا ليزى بجد

من الكلام القليل اللى بلقيه موجه للراجل

ديما بلاقى الكلام موجه للست ودا خنقنى صراحه

سواء من ناس اهل الدين المفروض انهم اهل دين ياعنى


بجد جميل لكى تحياتى

فشكووول يقول...

من غير الاسئله الكتيره للرجال يا موناليزا
طب هى فين الست اللى بتعمل كدا ؟

لــــ زهــــــراء ــــولا يقول...

وحشتيني جداااا لمحت اسمك في شاي بالفانيليا قلت ادخل اسلم وابوس عشان افتكرت ايام زماااااااااااااان

حلو قوي الموضوع جزاكِ الله كل خير

لـــولا

salwa يقول...

السلام عليكم اخت موناليزا
لنتق الله في كل امورنا تصلح
دنيانا و اخرتنا
تسلم يدك و اعذري تقصيري
سلام

موناليزا يقول...

مرمر
ــــــــ
أهلا اهلا بالقمر
كلماتك جميلة لكن الطبيعى فى اول الزواج ان يهتم الزوج بزوجته
ربنا يكرمك ياحبيبتى واشكرك جدا لتعليقك
نورتينى واسعدنى تواجدك



*********************************


فارس عبدالفتاح
ــــــــــــــــــ
أهلا بيك أستاذ فارس
أشكرك جدا جدا لمشاركتك المتميزة
وهو فعلا معندوش ذكاء اجتماعى عشان يجعل عروسته تحس الاحساس ده فى اول جوازها

يسعدنا دوام التواصل



*******************************


تيمى
ـــــــ
أهلا بيك يافندم
واكيد كمان الزوج اللى بتكلم عنه حالة خاصة:)
أشكرك جدا لتعليقك
يسعدنا دوام التواصل


**********************************


ريتشارد قلب القطة
ــــــــــــــــــ
أهلا اهلا بالقمر
ماتحرمش من رأيك وتعليقك الذى اسعدنى بجد ياحبيبتى
والحمدلله الذى هدانى الى هذا
نورتينى ياجميلة واسعدنى تواجدك



**********************************


فشكوول
ـــــــــ
أهلا بيك يافندم
موجودة أخى الكريم
فبطلة الموضوع حقيقية:)

يسعدنا دوام التواصل



*********************************


لولا وزهراء
ــــــــــــ
أهلا اهلا بالقمر بعد طول غياب
ربنا يكرمك ياحبيبتى واشكرك جدا لتعليقك
نورتينى لولا الجميلة واسعدنى تواجدك



********************************


سلوى
ــــــ
وعليكم السلام ورحمة الله وبركاته
أهلا اهلا بالقمر بعد طول غياب
عندك حق جدا
انتى تنورينى فى اى وقت ياحبيبتى
مدونتى فى انتظارك دائما