الأربعاء، 9 يونيو 2010

أصحاب الهموم

- لمن تعانى من شقاوة ابنها.. انظرى لمن عنده ابن معاق واحمدى الله بأن ابنك سليم ومعافى بدنياً.
- لمن تعانى من أنها تطبخ يومياً لأن زوجها يحب أن يأكل طعاماً طازجاً.. احمدى الله فغيرك لايوقد النار فى بيته من قلة ذاد اليد.
- لمن تعانى من تعبها مع أولادها الصغار.. احمدى الله وانظرى لمن حرمها الله من نعمة الإنجاب.
- لمن يعانى من صعوبة المواصلات.. انظر لمن لا يمتلك قدمين واحمد الله.
- لمن يعانى من المذاكرة وصعوبة المناهج.. انظر لمن فقد بصره وكيف يستذكر دروسه واحمد الله.
- لمن يعانى من حصول ابنه على مجموع قليل فى الثانوية العامة ويخشى من نظرات الناس.. انظر لمن لديه ابن لا يستطيع التعلم أو التكيف الاجتماعى واحمد الله.
- لمن تحزن على طبق أو كوب كُسر.. انظرى لمن سرقت شقتها بكل ما تحتوى.
- لمن تأخر سنها عن الزواج وتخشى من نظرات الناس.. انظرى إلى حال المطلقات حتى تعلمى بأن وضعك أفضل منهن بكثير واحمدى الله.
- لمن تهجر بيت زوجها لأنه لايريدها أن تعمل رغم عدم حاجتها للمال.. انظرى لمن لايصرف على زوجته ولا يجد غضاضة فى أن يطلب منها أن تعمل حتى تسلمه مرتبها واحمدى الله.
- لمن يعانى من وظيفته.. انظر لكل عاطل واحمد الله.
- لمن يعانى من ضيق شقته.. انظر لمن يسكنون فى مساكن الإيواء أو تحت الكبارى واحمد الله.
- لمن تعانى من سعة شقتها وأنها تتعب فى تنظيفها.. انظرى لمن تتكون اسرته من اكثر من عشرة أفراد ويقنطون فى غرفة وحمام مشترك واحمدى الله.
- إذا كنت تستطيع أن تعتمد على نفسك إعتماداً كلياً فى كل شئ فاحمد الله كثيرا فغيرك محروم من هذا سواء أتولد هكذا أو حدث له حادث عارض.
فالصحة تاج على روؤس الأصحاء لا يشعر به سوى المرضى.
- انظر دائماً لمن هم أقل منك حتى تشعر بقيمة ما معك فلا تنقم على حياتك واشكر الله دائما فالحفاظ على النعمة يكون بدوام الشكر عليها" ولئن شكرتك لأزيدنكم".
- كل واحد فيه اللى مكفيه فلا داعى للشكوى من أشياء تبدو بالمقارنة بالكوارث التى يتعرض لها غيرك بسيطة ولا تذكر.
- الانسان يحب بفطرته الشخص المتفائل والذى ينسيه همومه وليس من يزودها.
- بدل ما تشتكى طول الوقت حاول تغير ما أنت فيه من وضع لا يناسبك إلى وضع تحبه وتختاره بإرادتك.
- وأخيراً ارضى بما عندك تكن أسعد الناس.
----
أدعوكم لقراءة هذا الموضوع حتى تشعروا بمزيد من نعم الله علينا من هنا.

سؤال جانبى:
ــــــــــــــــــــ
ايه اكتر شكوى بتسمعها من اللى حواليك وبتضايق منها لانها من وجهة نظرك لا تستحق الشكوى؟.

هناك 31 تعليقًا:

كتابات انسانة يقول...

السلام عليكم...

موضوع شيق وممتع بارك الله فيك..

الصراحة انا انزعج من كثرة لوم الناس للحياة ودائماً يقولون ان الحياة قبيحة ويتمنون الموت..فانا اجزم بانه لو ساروا على هدي الرسول الكريم لوجدوها جميلة ^_^

تحياتي

فاتيما يقول...

كالعادة سباقة بالخير و المجاملة يا مون مون

الف مبروك لرحيل و عقبال كل من تحبين و نحب و الناس كلها تفرح يا رب



اما موضوع البوست
فنتى دايما تنظرى بعين الرضا لكل شىء و دا يمكن ...لأ مش يمكن
دا اللى أكيد بيخلينا دايما نيجى هنا و قبل ما نقرى و احنا بنقرى و بعد ما نخلص دايما حاسين براحة و دفا و طمأنينة ..لأن معاكى يا مون مون دايما حاسين ان كله رضا و لازم اى ما كتبتيه فى أى موضوع هيتقال بعده على شفاهنا صمتا و علنا و كتابة .. هنقول
الحمدلله


بحبك قوى يا مون مونتى


ربنا يديم عليكى نعمة الرضا يا حبيبتى

أنا - الريس يقول...

اللهم بارك فيكي .. فقد ذكرتيني بسنة الشكر
..
فالحمد لله والشكر .. شكر لا منتهي له .. شكر عبد مقصر في حقك وحق عبادك .. فتقبل توبتي ..
جزيت خيرا وكفيت شرا وهديتي انتي واحبابك اللهم امين .

د/على خميس يقول...

السلام عليكم و رحمة الله و بركاته
ا / موناليزا
موضوع كالعادة متميز ..
فعلا يجب على كل انسان أن ينظر إلى من هو دونه فى أمور الدنيا و من هو فوقه فى أمور الآخرة ...
أجد الناس يشتكون كثيرا من ضيق ذات اليد مع أن معظمهم يعيشون فى حياة أوسع ماديا مما كان عليه سيدنا محمد صلى الله عليه و سلم
و أجدهم يشتكدن من سوء الجيل الجديد و هم نتاج تربيتهم
بارك الله فيك

كلمات من نور يقول...

اولا ربي يكرمك يا موناليزتي على موضوعاتك القيمة والهادفة دوما ..ثانيا نيجي للسؤال :


بازعل جدا من الناس اللي مش بتحمد ربنا أبدا ودايما بتنفخ و تعقد أمور حياتها وبدل ما امورهم تتصلح بتتعقد أكتر ماهو ربنا ما يحبش الناس اللي على طول معقدة حياتها من مافيش وبالتالي تلاقي دايما حياتهم سلسلة تعقيدات علشان الناس المفروض تيسر ولا تعسر ..........فيه ناس بجد كده وهم رايحيين رحله يتفسحوا تلاقيهم : أوف زحمة اوف حر اوف معرفش إيه.؟ يا لطيف انتم رايحيين فسحه تستمتعوا بس مش حتعرفوا باسلوبكم داه أبدا.....

خالص حبي وودي

غير معرف يقول...

السلام عليكم ورحمة الله وبركاته

اختى فى الله

كم اكون فى غاية السعاده
عندما ازور مدونتك التى هى واحه للهدوى النفسى وتطهير للقلوب

اختى فى الله

فعلا ليس منا بكثير من انعم الله عليه بنعمة الرضا بما قسم لله


وليس منا بكثير من يعى او حتى يعرف الحديث القدسى عن رب العزة جل وعلى


يا ابن ادم

اذا رضيت بما قسمته لك ارحت قلبك

وان لم ترضى بما قمته لك

فوعزتى وجلالى

لاعجعلنك تركض فى البريه كركض الوحش

ولن يكون لى الا ما قسمته لك

وكنت عندى مزموما

صدقت يا رب العزة والملكوت

اسال الله العلى العظيم
ان ينعم علينا واياكم بنعمة الرضا
بما قسمه الله
وان نحمده ونشكرة
وندعى له بعدم زوال تلك النعمه العظيمه

لكى تحياتى اختى فى الله على ما كتبت يمينك

وهدانا الله واياكى لما فيه الخير والصلاح

باحث عن حب يقول...

اخيتى
دائما الانسان غير راضى
عن واقعه
ومحمل نفسه بالاثقال والهموم
نحن كذالك
بنى الانسان
وننسى ان ننظر
لمن هو اقل حالا منا
دمتى بعز

E73 يقول...

بسم الله الرحمن الرحيم
السلام عليكم ورحمة الله وبركاته

الحمد لله الحمد لله الحمد لله
الحمد لله الذي لايحمد على مكروه سواه

والحمد لله مؤمنة بأنني في أمور الدنيا يجب أن أنظر إلى من هو أقل مني وأحمد الله على نعمه
وفي أمور الدين يجب أن أنظر لمن هو أعلى مني وأسأل الله له الثبات والزيادة وأحاول جاهدة الوصول لما هو عليه أو أفضل

بالنسبة لأكتر شكوى... الشكوى من الأهل بصارحة حاجة بتضايقني

مش لأن فيه ناس تانية مقطوعين من شجرة ونفسهم يبقى لهم أهل يشتكوا منهم لكن لأن الأهل "وخاصة الأب والأم" لو حطيت نفسي مكانهم مش هحب إن ولادي يطلبوا مني أبقى ملاك

وحاجات كتير لو فتحت في الكلام فيها مش هبطل

بجد جزاكِ الله خير على مدونتك الجميلة دي برتاح نفسيًا جدًا لما بدخلها

عارفة أني مش بدخلها بصورة دائمة لكن المشكلة في قلق الامتحانات

(ست* جنى* الحسن) يقول...

سلامو عليكو..
الله يعزك يارب ويسعدك ويفرح قلبك على الكلام الجميل ده وجزاكى الله كل خير.
انى احبك فى الله.
بهديكى فيديو(رحلة جنيه)من مدونة جنة

العلم نور يقول...

موضوع مهم جدا ومفيد جعله الله في ميزان حسناتك ..

ومن أكثر الشكاوي التي واجهتها أن البعض من النسوة تدعي التعلق لدرجة الهيام بشخص في النت وتظل تتحادث معه وتراسله وتكلمه وتهيم به وتترك بيتها وزوجها .. ولا يعرفون بجلل ما يقومون به وهو الخيانة الزوجية.

رحلتنا في الحياة يقول...

الحمدلله على كل شئ بوست رائع جدا
جزاكى الله خيرا

حمـــــــــــــــــــــة يقول...

سؤال جانبى:ــــــــــــــــــــايه اكتر شكوى بتسمعها من اللى حواليك وبتضايق منها لانها من وجهة نظرك لا تستحق الشكوى؟
------------->>>>
صعوبة الحياة : تربية الأولاد و الميراث أكثر المواضيع تشترك فيها الأغلبية .....
----------<<<<

فارس عبدالفتاح يقول...

اولاً هبدأ بالنقطة التي فعلاً انا بعاني منها شخصياً :

لمن تهجر بيت زوجها لأنه لا يريدها أن تعمل رغم عدم حاجتها للمال ..

بس مع الاسف انا لم اتزوج الى الان ولكن كل ما اتقدم الى واحده ترفض الارتباط مني عشان مش عيزها تشتغل

بصراحة انا بفكر اتجوز جواز امريكاني يعني الست تشارك بالنص في كل حاجة حتى مصاريف البيت اليومية ومصاريف العيال ومصاريف الخدامة .. طبعاً لان سعادتها مش هتبقى فاضية عشان تربي العيال او تطبخ او تنضف البيت

يعني هدخلها في دوامه دفع الفلوس وسوف استنزفها الى ابعد مدى ممكن .. ونشوف بأه هتقدر تصمد تجاه الالتزامات المالية ولا هترفع الراية البيضة


لكن برضه مع الاسف


مش هلاقي وحدة ترضى تتزوج زواج امريكي وعيزاك تصرف عليه وعلى البيت والعيال وبعدين هي تشتغل وتخلي فلوسها لنفسها وانت تاكل طوب وعيالك يطلعوا منحرفين او فشلين مش مشكلة


المشكة ان الست هانم تحقق ذاتها وتشتغل وتكسب فلوس عشان يكون هناك مساواة مع الرجل


معلهش اصله انا مغلول من الموضوع ده وهنفجر من جنابي .. وأربت اقتنع انه مفيش بنت في الزمن ده عندها عقل سلمي تقدر تميز بيه وتعرف اللى عايز يصونها واللى عايز يبهدلها .. وانه هناك بنات ناس محترمين ملتزمين محافظين ربوا بناتهم على التربية المسؤولة تجاه تربية النشء تربية سلمية


المهم .. معلهش طلبت معايا رغي بس والله العظيم فعلا انا هنفجر من الموضوع ده


اما بالنسبة للشكوى التي اسمعها من الناس هي ان كل الناس بتشتكي من الناس

يعني لما تقعد مع واحد يحسسك انه انسان فاضل وان كل الصفات الجميلة والوديعة فيه والناس هي اللى وحشه

مع انه مفيش انسان كامل بس برضه مش عايز يقتنع انه هو ايضا بيعمل نفس العمايل اللي بينتقدها في الناس


الطمع حب النفس الخداع الحسد الحقد حب الاستحواز الصراع الرخيص والسلبي من اجل المال البخل الخيانة النفسنه ( الكبر والغرور )

كل هذه الاشياء ويمكن اكتر يشتكي منها جميع الناس مع ان كل واحد منها ممكن بيكون فيه صفات من ضمن الصفات دي بس هو مش عايز يعترف انه هو الاخر داخل نطاق هذه الدائرة

وأأسف على الاطالة

فارس عبدالفتاح .. قومي عربي

كوكتيل يقول...

صباح الخيرات :)

موضوع حلو :)

سؤالك جوابه عندي :)

أكثر شكوه أهي فلانه عندها وأنا ما عندي وليه أنا بس اللي يصير فيني جذي

بمعنى أخر عدم الرضا أساس كل هلأمور والمشاكل :)

فئة قليلة تطبق وصية حبيبنا المصطفي صلى الله عليه وسلم في أن ننظر لمن هم أقل منا وليس العكس لندرك ما نحن فيه من نعم فنشكر الله عليها ونهنا ونسعد

فاللهم لك الحمد على نعمك علينا ونسألك الرضا دوما اللهم أمين

وجزاك الله كل خير :)

ليله شتاء يقول...

السلام عليكم

أولا ألف مبروك لسارة وربنا يتمملها على خير ويبارك لها فى حياتها الجديدة

*****

موضوعك كالعادة متميز
فعلا لو نرضى بكل حاجة ربنا قسمهلنا ونحمد الله على نعم كتير فى ايدينا وغيرنا مش لاقيها أكيد هنرتاح ونكون دائما حاسين بالرضى والسعادة

******
أكتر شكوى بسمعها وبتستفزنى هى اول حاجة قولتيها شقاوة الاطفال لان المفروض ان الام عارفة انهم اطفال عندهم طاقة والشقاوة دى حاجة كويسة ليهم والمفروض هى كأم تتحمل كده

*****
دمتى متميزة

salma mohamed يقول...

اللهم أوزعني أن أشكر نعمتك التي أنعمت عليّ.
الرضا بالمقسوم سبب الهناء والسعادة،
فمن رضي أرضاه الله وأسعده،ومن تذمر ولم يرضى كان ذلك تنكيدا وتعاسه له في حياته،
المؤمن ان اصابته نعمة شكر وان اصابته بلية صبر فكان خيرا له،
رزقنا الله جميعا الرضا والصبر والشكر.
جزاكِ الله خيرا موني.

موناليزا يقول...

كتابات إنسانية
ــــــــــــــــ
وعليكم السلام ورحمة الله وبركاته
أهلا بيكِ فى زيارتك الاولى
ربنا يكرمك أشكرك جدا لرأيك
عندك حق جدا
نورتِ مدونتى ويسعدنى دوام التواصل



**********************************


فاتيما
ـــــــــ
أهلا اهلا بأم يوسف الغالية
وأنا اجى جنبك إيه بس.. عقبال يارب ما نباركلك قريب:)

ربنا يعزك يارب .. بقى انا استاهل كل الكلام الجميل ده:)
الحمدلله بجد فما توفيقى الا به

وربنا يديم علينا نعمة الحب فيه لأنى كمان بحبك جداااااااا وببقى مبسوطة اوى بزيارتك وبتعليقك
ماتحرمش من تواجدك ابدا ياحبيبتى
نورتينى طماطم الجميلة وفى انتظارك دايما




*********************************


مستر /بريزيدنت
ــــــــــــــ
أهلا بيك يافندم
ربنا يكرمك يارب ويتقبل دعائك ولك بالمثل اللهم امين
أشكرك جدا لتعليقك
يسعدنا دوام التواصل



*********************************


د. على خميس
ــــــــــــــ
وعليكم السلام ورحمة الله وبركاته
أهلا بيك يادكتور
أشكرك جدا لرأيك فما توفيقى الا بالله

عندك حق جدا
أشكرك جدا لمشاركتك
يسعدنا دوام التواصل



*********************************


كلمات من نور
ـــــــــــــــ
أهلا اهلا بالغالية
ربنا يعزك يارب فما توفيقى الا بالله
عندك حق جدا.. ايوة عارفاهم انا الناس دى وببقى عايزة اقولهم كل اللى حواليكم حاسين برضه بالحر والزحمة والتلوث والضوضاء بي لو كلنا اشتكينا مش هنخلص .. ماهو يا نحل الموضوع يا اما نتأقلم على وجوده:)

تسلميلى حبيبتى وماتحرمش من تواجدك المميز




**********************************


أم الابناء
ـــــــــــ
وعليكم السلام ورحمة الله وبركاته
أهلا اهلا بالقمر
ربنا يعزك ويسعدك دايما والحمدلله الذى هدانا الى هذا

ربنا يكرمك ويتقبل دعائك اللهم امين
واشكرك جدا على تعليقك المميز واستشهادك بالحديث القدسى
نورتينى حبيبتى واسعدنى تواجدك



*********************************


محمود باحث عن حب
ــــــــــــــــــ
أهلا بيك أستاذ محمود
ده حقيقى للاسف وكما قال رب العزة " وقليل من عبادى الشكور"
أشكرك جدا لتعليقك
يسعدنا دوام التواصل




********************************



اى73
ــــــــ
وعليكم السلام ورحمة الله وبركاته
أهلا اهلا بالقمر بعد طول غياب
تستاهلى الحمد يا حبيبتى
عجبنى اوى كلامك اننا المفروض ننظر لمن هو اقل منا فى الدنيا ولكن ننظر لمن هو اعلى منا فى الدين

والغريب ان اللى بيشتكوا من اهاليهم مايقدروش يتخيلوا حياتهم من غيرهم لانهم مايعرفوش اهلهم حاميينهم ازاى وشايلين عنهم ايه

اتكلمى براحتك ولا يهمك
ياحبيبتى انتى تنورينى فى اى وقت
وربنا يعدى الامتحانت على خير
نورتينى ياجميلة وفى انتظارك دايما



**********************************

موناليزا يقول...

ست الحسن
ـــــــــ
وعليكم السلام ورحمة الله وبركاته
أهلا اهلا بالقمر
ربنا يكرمك يارب ويتقبل دعائك وكِ بالمثل اللهم امين
أحبك الذى أحببتنى فيه وأنا ايضا احبك فى الله
إهداء غالى من أخت حبيبة أشكرك عليه
نورتينى ياجميلة واسعدنى تواجدك




**********************************


أم الخلود
ــــــــــ
أهلا اهلا بالقمر
ربنا يكرمك أشكرك جدا لرأيك

ومن ده كتير وتبقى أزمة لو ما رنش عليهاأو لو النت فصل:)

أشكرك جدا لمشاركتك
نورتينى حبيبتى واسعدنى تواجدك



********************************


أحاسيس ايوشة
ـــــــــــــ
أهلا اهلا بالقمر
ربنا يكرمك وأشكرك جدا لتعليقك
نورتينى ايوشة الجميلة واسعدنى تواجدك



********************************


هاما
ـــــــــ
أهلا بيك يافندم
فعلا ما اكثر هذه الشكاوى
أشكرك جدا لمشاركتك
يسعدنا دوام التواصل



*********************************


فارس عبد الفتاح
ــــــــــــــــ
أهلا بيك أستاذ فارس
لو تسمحلى أقول رأيى.. ليه ما تتقدمش لواحدة أصلاً ما بتشتغلش.. هتلاقيهم كتير على فكرة وخصوصا ان فيه بنات كتير امنيتهم الوحيدة انها تتجوز وتقعد فى البيت:)

ولا يهمك يا فندم كلنا آذان صاغية

فعلا موضوع الكل بيستغربه لما تلاقى الكل بيشتكى من اللى حواليه على اعتبار انه هو ملاك مابيغلطش

أشكرك جدا لمشاركتك
يسعدنا دوام التواصل


*********************************


كوكتيل
ــــــــ
أهلا اهلا بالقمر
مساء الفل حبيبتى:)
ايوة صح فعلا
محدش عاجبه حاله
تسلميلى ياجميلة
نوررتينى حبيبتى واسعدنى تواجدك



********************************



ليلة شتاء
ــــــــــ
وعليكم السلام ورحمة الله وبركاته
أهلا اهلا بالقمر
الله يبارك فيكى ياحبيبتى أشكرك بالنيابة عنها لتهنئتك
---
ده حقيقى فالحل الوحيد فى الرضا
-----
عندك حق جدا وبعدين لما الامهات تشتكى من شقاوة ولادها اللى حواليهم المفروض يستحملوهم ازاى

نورتينى حبيبتى واسعدنى تواجدك



*********************************



سلمى محمد
ــــــــــ
أهلا اهلا بالقمر
ربنا يعزك ياحبيبتى ويرزقك الرضا دائما
وفعلا عند حق
نورتسنى سلومتى الجميلة واسعدنى تواجدك

Single Mummy يقول...

حبيبتى موناليزا
نفسى اعرف الحاجات العبقرية دى بتجيبيها ازاى والعبقرية هنا اقصد بيها البساطة والصدق واللة الموضوع دة جة ف معادة بالنسبة ليا وان شاء اللة تأثرى الايجابى بية فى ميزان حسناتك ربنا يباركلك
تحياتى وقبلاتى

داليـ ـ ـ ـ ـ ـ ــــا يقول...

موضوع جميل يامونى

كتير فعلا بسمع شكاوى من ناس
واتمنا بس انى اكون مكانهم لان دى مش شكاوى دى حاجات تافهه

الحمد لله على كل الا ربنا يجيبه

تحياتى

باحث عن حب يقول...

استأذنك باضافه مدونتك
الى مدونتى المتواضعه

r يقول...

السلام عليكم موناليزا
ونعم باله عندك كل الحق
الحمد لله على كل شئ
واكتر شكوى متكرره من المحيطين بى
هى الاحوال الماديه ومطالب الاسره والابناء

الفقيرة إلى الله أم البنات يقول...

بوست رائع يا حبيبتى فى الله
شامل لكل شئ
انا واحده من اصحاب الهموم الحقيقيه فى حاجات كتيير
وبرضه شايفه انى أحسن من غيرى كتيير
وشايفه ان ابتلائى مقارنة بغيرى رحمه
صحيح بتنتابنى نوبات حزن وضيق ولكن ليس من ابتلاء الله
من الناس حولى


اكتر شئ
هو الضيق من إن العيال مش بتذاكر ومغلبينى
ههههههههه

لانى انا عندى بنتى ...معاقه وبتتعلم كل شئ من الألف للياء ...وبندور على الطرق اللى نعلمها ..والحمد لله البنت بتتعلم بفضل الله مش بفضلنا

اما موضوع المذاكره مش مفروض تكون شكوى تقض المضاجع
بس سبحان من خلق فى كل قلب ما يشغله ويجعله مهموم

mohamed ghalia يقول...

قل لمن يحمل هما همك لن يدوم
كما عهدتك دوما رائعة فى كتاباتك

حاجات جوايا يقول...

والله انتى جميلة يا موناليزا
كل مواضيعك بتدل على انك انسانة جميلة
ربنا يكرمك يا حبيبتى ويرزقك بكل الخير يارب
----------
اكتر شكوى بسمعها من اللى حواليا انهم عايزين يتجوزوا
بذمتك دى حاجة تستاهل
هههههههههههههه

حاجات جوايا يقول...

الف مبرووووووووك لسارة
ربنا يتمم لها على خير يارب
ويبارك لها فى زواجها وزوجها وحياتكها المقبلة ان شاء الله

موناليزا يقول...

سنجل مامى
ــــــــــــ
أهلا اهلا بالقمر
:) ربنا يعزك يارب فماتوفيقى الا بالله
تعليقك ورأيك فيما اكتب اسعدونى جدا
ربنا يسعدك ياحبيبتى ويرزقك بكل الخير
نورتينى سارة الجميلة واسعدنى تواجدك



**********************************


داليا
ــــــــ
أهلا اهلا بالقمر
أشكرك جدا لرأيك
وفعلا عندك حق فيه شكاوى ماتستاهلش أصلا
نورتينى داليا الجميلة واسعدنى تواجدك



**********************************


محمود باحث عن حب
ـــــــــــــــــ
أهلا بيك أستاذ محمود
لينا الشرف يا فندم

يسعدنا دوام التواصل



**********************************


بسنت
ـــــــ
وعليكم السلام ورحمة الله وبركاته
أهلا اهلا بالقمر
تستاهلى الحمد ياحبيبتى
وما اكثر هذه الشكاوى:)
نورتينى بسنت الجميلة واسعدنى تواجدك



********************************


الفقيرة الى الله أم البنات
ـــــــــــــــــــــــ
أهلا اهلا بالقمر بعد طول غياب
ربنا يزيد حمد وشكر ليه ويخفف عنك ما انتى فيه اللهم امين
أشكرك جدا لرايك ولمشاركتك
نورتينى غاليتى واسعدنى تواجدك



*******************************


محمد غالية
ــــــــــــ
أهلا بيك أستاذ محمد
ما اجمله من تعليق

ربنا يعزك يارب فما توفيقى الا بالله
أشكرك جدا لتعليقك
يسعدنا دوام التواصل



*********************************



حاجات جوايا
ـــــــــــــ
أهلا اهلا بالقمر
ماتحرمش منك ياحبيبتى ده بس من ذوقك
(اللهم لاتؤاخذنى بما يقولون واغفر لى مالايعلمون واجعلنى خيرا مما يظنون)
--
:) من وجهة نظرى الشخصية طبعاً لأ :)

---
الله يبارك فيكى وانا بشكرك على تهنئتك لسارة بالنيابة عنها
كلك ذوق يا حبيبتى

نورتينى سالى الجميلة واسعدنى تواجدك

Unknown يقول...

موضوع مهم للغاية، يجب التذكير به من حين لآخر.

واسمحي لي بأن أكمل موضوعك (وأجيب عن سؤالك في نفس الوقت) بهذا الموضوع:

http://magidalkady.blogspot.com/2010/03/5.html

المجاهد الصغير يقول...

السلام عليكم
مدونه رائعه
وبجد كانك بتوجى لى الكلام فى اول نصيحه
جزاكى الله خيرا
سبحان الله الانسان صح مش بيعجبه حاله الا مايشوف حال الاخرين
الحمد لله
الحمد لله
الحمد لله
دمتى بخير حبيبتى

طهر فؤادك يقول...

السلام عليكم ورحمة الله وبركاتة

ربنا يبارك فيكى ياموناليزا يارب والمسلمين اجمعين ..

موضوع جميل فعلا ودايما ننظر للاقل منا علشان نحمد الله على نعمتة ...

- اماعن شكوى على طول من الاخرين ان الحالة مش كويسة ماديا يعنى مع ان ربنا مانن عليهم بالستر والحياة الكريمة ... فربنا يهدينا ويهديهم اللهم امين والمسلمين .

موناليزا يقول...

ماجد القاضى
ـــــــــــــ
أهلا بيك أستاذ ماجد
أشكرك جدا لتعليقك وهنروح حالا نشاهد الرابط

يسعدنا دوام التواصل




*********************************



المجاهد الصغير
ـــــــــــــــ
وعليكم السلام ورحمة الله وبركاته
أهلا أهلا بالقمر
ربنا يكرمك ياحبيبتى وتعليقك ده اسعدنى جدا
نورتينى



*********************************



طهر فؤادك
ـــــــــــــ
وعليكم السلام ورحمة الله وبركاته
أهلا بيك يافندم
ربنا يعزك يارب اشكرك جدا لدعائك

عندك حق جدا الشكاوى مستمرة من ناس المفروض يساعدوا غيرهم مش يشتكوا!

أشكرك جدا لرأيك ولمشاركتك
يسعدنا دوام التواصل