الأحد، 13 يونيو 2010

غروب وشروق

قبل إنقطاعى عن ممارسة هواية التصوير الفوتوغرافى كنت أعشق تصوير منظر الغروب وخاصة أمام البحر . فكم كان يؤثرنى منظر الشمس وهى تغوص تدريجياً فى البحر فى استسلام تام بعد يوم من العمل الشاق وألوان السماء المتعددة التى تتكون فى هذه اللحظة.. أبدع لوحة ممكن أن تقع عينيك عليها. وفى يوم سافرت إلى البحر الأحمر وكعادتى جلست أمام البحر لكى أنتظر مشهد الغروب وأقوم بالتصوير فلون مياه البحر الأحمر رائعة بحق ولكنى للأسف لم أجد الشمس تغرب فى الماء كما تفعل مع البحر المتوسط وحينما سألت أهل البلدة علمت منهم بأن الشمس تشرق من البحر الأحمر وتغرب فى البحر المتوسط وأن عليَّ أن أشاهد منظر الشروق فهو يستحق التصوير حقاً.
وحينما رأيت منظر الشروق سحرنى حقاً وعلمت بأن الشروق أجمل بكثير من الغروب ففيه ولادة ليوم جديد فالشمس وقت الشروق تكون كمن تستيقظ من سباتها العميق طول الليل وتبدأ فى الصعود رويداً رويداً حتى تملأ بشعاعها الدافئ الكون كله.
ووقتها جال بخاطرى هذه الفكرة ماذا يحدث لو أشرقت الشمس من ناحية البحر المتوسط وغربت من البحر الأحمر..
وماذا تفعل لو فتحت الشباك صباحاً كعادتك يومياً حتى تدخل الشمس غرفتك ولكنك لم تجد الشمس فى وجهك لأنها أشرقت من الجهة الأخرى..
فيه ناس ممكن تفرح وتقول أهو تغيير بس فيه ناس تانية هيبقوا فاهمين ده معناه إيه وهيصابوا بالهلع.
فشروق الشمس من جهة الغرب يعنى غلق باب التوبة إلى قيام الساعة يعنى لم يعد يفيد الإستغفار والتضرع إلى الله بمغفرة الذنوب فكل هذا كأنك تقوم بكتابة الإجابة الصحيحة فى ورقة الأسئلة ولكن بعد إنتهاء الوقت المحدد وتجميع ورق الإجابة.
قال رسول الله صلى الله عليه وسلم" من تاب قبل أن تطلع الشمس من مغربها تاب الله عليه" رواه مسلم.
ولذلك وجب علينا أن نستعد لهذا اليوم الذى يعد من علامات الساعة الكبرى فنحن لا ندرى ماذا سيكون توقيت حدوثه.
إياك والتسويف اللى عايز يتوب يتوب دلؤتى حالاً .. محدش عارف بكره هيكون فيه إيه.
اللى عايز يتصدق .. مستنى ايه انت النهاردة يمكن يكون معاك لكن بكره الله اعلم هيكون معاك تتصدق ولا لأ.
واللى عليه أيام من رمضان اللى فات وناوى يصومها فى اخر شعبان ده لو افتكر أصلاً ..مستنى إيه ما تصوم دلؤتى .
واللى ظالم الناس واللى واكل حقوق الخلق واللى سارق واللى خاين للأمانة مستنيين إيه ماترجعوا الحق لأصحابه قبل فوات الآوان.
اللى متخانق مع اخوه أو أعز أصحابه ..مستنى ايه ماتبدأ أنت بالخير.
اللى مابيفتحش المصحف غير فى رمضان.. مستنى إيه ماتقوم تقرأ ولو حتى صفحة واحدة عشان تشفعلك عند ربنا.
اللى بيعق والديه واللى بيدمر صحته بالحشيش والمخدرات والسجاير والخمور ..مستنى إيه ولا أنت مش شايف إن دى ذنوب أصلاً.
اللى بيكذب طول الوقت بهزار.. مش ناوى تتوب ولا مفكرها مابتتكتبش عليك كدبة!.
اللى بيضحك على البنات وبيعرف يصطادهم كويس وفى الآخر يهددهم ويحاول يفضحهم.. مش ناوى تتوب !!.
اللى مابيصرفش على زوجته ومهمل فى حق ولاده.. مش ناوى تتوب وتعرف إنك مسئول عنهم وهتتسأل عليهم.
اللى بيخوضوا فى أعراض الناس.. مش ناويين تتوبوا!!.
وغيرها من القائمة السوداء التى تحتل معظم حياتنا.
فاتقوا يوما لا ينفع فيه مال ولا بنون إلا من آتى الله بقلب سليم.
أقول قولى هذا وأستغفر الله لى ولكم.



سؤال جانبى:
ـــــــــــــــــــــــــ
ما الذنب التى ترى ناس كثيرة يفعلوه ولا يدركون أنه ذنب؟.
لو معاك ورقة و ألوان إيه المنظر الطبيعى اللى تحب ترسمه؟.

هناك 29 تعليقًا:

أنا - الريس يقول...

التوبة سهلة ..
بس النفس الأمارة بتسوف
--------------
المشكلة ان الطبع البشري بيحب الممنوع
يعني مثلا لو كان الحلال ممنوع والحرام لاء
كنت هتلاقي الناس بتعمل الحلال لانه غير مباح لهم .. هيا نظرية غريبة
علي العموم ربنا يجعلنا نتوب .. ويغفر لنا جميعا لأننا مش حمل ثانية من ناره .
-------------
اما السؤال الجانبي :
رأيي انهم بيجعلوا الله اهون الناظرين لهم .. فيختفوا من الناس وما يحطوش ربنا في بالهم.

د/على خميس يقول...

السلام عليكم و رحمة الله و بركاته
ا / موناليزا
اعجاب متواصل و ممتد بمدونة و موضوعات حضرتك
أولا ... تطفل !!! هو ليه حضرتك سيبتى التصوير الفوتوغرافى؟؟؟!!
ثانيا ... أسأل الله أن يتوب على و عليك و على سائر المسلمين
ثالثا ... من الذنوب الفرجة على الأفلام و المسلسلات و سماغ الأغانى و الأخطر الغيبة
رابعا ... منظر جدول ماء صافى ينساب بجانب شجرة خضراء وارفة ذات أزهار بديعة و بساط أخضر ممتد على الجانبين لا ينتهى إلا بسماء زرقاء صافية تتوسطها شمس العصر مع سحابة صغيرة بيضاء تقترب من الشمس ببطء ... طلع مشهد متحرك ...معلش ... اللى جه فى بالى
بارك الله فيك
تحياتى

كوكتيل يقول...

اولا شكرا على الموضوع وحلوة طريقة طرحك للفكرة :)

نسأل الله أن يرزقنا التوبة دائما قبل فوات الأوان اللهم أمين يارب العالمين


أما عن السؤال فأعتقد إن إجابتي إهي الظلم يظلمون ويطغون على الأخرين من غير أي شعور بالذنب وتأنيب الضمير :(

أما لوحتي فهي بيت ومن جانبيه البحر فأنا من عشاقه جدا وأتمنى العيش بجواره فهو مريح للنفس ويبعث الأمل ويجدد الطاقة :)

-_- يقول...

الذنب ده هو الفهلوة ..

الرشوة و التهريب و الكذب و التوقيع بين الناس ..

SHAPE YOUR LIFE (ABOALI) يقول...

جميلة لقطة الشروق وما اجمل لقطة الغروب
فاءن كان فى الشروق الامل
ففى الغروب سكن

دعوات التوبة مطلوبة ولكن بنظرية فلسفية
بلاش نتوب
نخلى نفسنا كده ايه اللى هايحصل يعنى ؟

لو القى كل الناس القمامة فى الشارع ايه يعنى اللى هايحصل ؟

من فترة رايت بكاء طفل قريب لى
ورايت الناس يتحايلون عليه ان يسكت
ويعطونه الشبسى والبونبون

وهو مستمر فى البكاء

فقلت لهم سنجرب اسلوب جديد
ان بكى اتركوه وقولوا له فى بسمة وضحك

الله صوتك جميل وانت بتعيط
يلا بقى عيط كمان كمان كمان كمان
فى لحظة سكت الطفل وكاءنه يقول مال هولاء المجانين ابكى ويضحكون ويقولون ابكى
فسكت عن البكاء الغير مبرر

لذا
علينا ان نُعرف الناس ان التمسك بالقيم ده لمصلحته وعلشان ابقاء كيانه
وليس تزكية على الله
او انه سيدخل الجنة لانه فعل هذا

الدين تهذيب للنفس واصلاح للسلوك

لذا تركه يعنى حيوانية فى النفس وسوء ادب
والحياه دول
ان كنت تظلم اليوم سياءتى يوم ستكون مظلوم وهكذا

ام عن الذنب الذى اراه

اعتقاد الناس ان الله يحتاج من يدخلون الجنة

ان كان معى ريشة وقلم
سأرسم كرة ارضية
هنا الارض هنا الوطن
هنا المهد هنا السكن
هنا القلب هنا الامس وعدا"
هنا طريقى هنا الهدف
هنا الملامح هنا الامل
هنا السجود هنا حب النعم
هنا البحر هنا المرجان والسمك
هنا الانسان هنا الكون
هنا كان خلقى من عدم


سعيد بكتاباتك وقولت اطل واشوف لعلى استسقى منكى عُلو الهمم


تقديرى

حمـــــــــــــــــــــة يقول...

السلام عليكم و رحمة الله وبركاته
نعمة من عند الله يمن بها على البشر حين يفكر ، يقرأ الأشياء و يحللها ثم يخلص الى نتيجة
الحمد لله
من خلال منظر الغروب و الشروق خلصتي الى أكثر من فكرة
طرحي تغيير مكان الشروق الى الغروب و هذا علميا يعتبر كارثة على الكون
و لنشاهد ما يجري بالعالم حاليا من تغيير مناخي نتيجة إرتفاع درجة حرارة ...هذه درجة أوصلت العالم الى الهلع فما بالك تقترب الشمس الى الأرض أكثر
نسأل الله اللطف و العفو
"ربنا لا تآخذنا بما يفعل السفاء منا"
أما عن :
سؤال جانبى:ـــــــــــــــــــــــــما الذنب التى ترى ناس كثيرة يفعلوه ولا يدركون أنه ذنب؟
جواب: التساهل و عدم إعطاء كل شيء حق قدره ........ هذا يشملني و بقية كثيرة
-----
 .لو معاك ورقة و ألوان إيه المنظر الطبيعى اللى تحب ترسمه؟.
جواب: أرسم جسرا للتواصل بين البشرية

كلمات من نور يقول...

ربي يبارك في عمرك وفي قلمك يا موناليزتي الحبيبة

================

ـــــــــــــــــــــــــ
ما الذنب التى ترى ناس كثيرة يفعلوه ولا يدركون أنه ذنب؟

لما الاقي الايام دي منتقبات لابس نقاب و اقدامهن عاريه .زشوفي مش حاتكلم عن المحجبات علشان البعض منهن عايز حجاب اساسا ..باتكلم عن نقاب ...كمان حنميع النقاب ونلبسه على جيبه وبلوزه او شبشب بصباع؟؟؟؟؟؟ ازاي بس يا ناس؟؟؟
-----------------
لو معاك ورقة و ألوان إيه المنظر الطبيعى اللى تحب ترسمه؟.

دايما بحب ارسم شجرة وفروعها متشابكة كثيرا ثم ابدأت برسم الورقات وكأن لسان حتلي يقول :

ضاقت فلما استحكمت حلقاتها فرجت وكنت أظنها لا تفرج


خالص حبي وشكري للعصفورة وصاحبتها

العلم نور يقول...

ما أجمل الغروب والشروق .. جزاك الله خير على الموعظة الحسنة .. (ذكر فإن الذكرى تنفع المؤمنين).

أما جواب السؤال ..

ففي اعتقادي أن معظم الناس يعملون حساب كبير لمن هم أعلى منهم في أي منصب .. ولا يعملون نفس الحساب أو أكبر منه لمن هو خالق الكل.

وأما المنظر الذي أحب رسمه منظر القمر وهو بدر كامل وتقترب منه السحب وهو مطل على البحر الهاديء في ظلمة الليل ولا يوجد غيره والنجم القطبي في السماء.

ذكرى رحيل قلم يقول...

السلام عليكم
نسيت تقولي والناس اللي بيتخد حفهم عنوه وغصب عنهم يعملوا ايه

انا كمان بحب الغروب قوي وبحب الشروق جدا انا بقي صورت الشروق اكتر من مرة بجد روعة بس كان ع الطريق الصحراوي لاسكندرية ما اروعة
استغفر الله العظيم واتوب اليه

ربنا يرحمنا ويتوب علينا

دمتي بحب

Unknown يقول...

السلام عليكم ورحمة الله وبركاتة
كيف حالك حبيبتى؟
والله كلام ممتاز وموزون جدا
الذنب الذى يفعلة الناس ولا يعلمون ذلك
اعتقد الغيبة والنميمة والظن
اما اذا رسمت فهرسم سلمى وابيها بيلاعبها واحنا فى حديقة او مصيف
بس يا رب نخرخ
ههههههههههههه
دمت بالف خير وود حبيبتى

مجداوية يقول...

السلام عليكم

يا سلااااااااااام يا موناليزا أنا بأحب فعلاً آجي مدونتك بتحسسني إن الدنيا حلوة أوي عشان فيها نفوس جميلة

وأحلى حاجة الأسئلة اللي بتيجي في نهاية التدوينة , هي ساعات بتيجي خارج المقرر لكن برضه أسئلة مبدعة مش عارفة ليه متحطيش أسئلة امتحانات الثانوية العامة عشان الناس تحب التعليم
:)

بجد مش هزار والله
أسئلة جميلة وبتخلي الدناغ تفكر

الذنوب اللي بتعملها الناس وهي مش واخدة بالها منها كتير جدا لكن حاختار اختيار عشوائي :

النميمة
بنتكلم عادي جدا عن ناس مش موجودين ونذم فيهم ونطلع فيهم القطط الفاطسة بدعوى الشكوى منهم وده ذنب كبير جدا لكن مع الأسف بنكرره في اليوم يجي ميت مرة
لا أستثني نفسي فأنا أحيانا أجد نفسي مجرورة لحوار من هذا النوع لكن بفضل الله بأنتبه وبأراجع نفسي حتى لو تلاحظي حذفت تدوينة موت وموت لأني حسيت بشبهة النميمة والذم حتى لو كان بغرض عرض مشكلتها
لازم نراجع سلوكيتنا ونقومها ونصر على تغيرها فينا

*************

أنا دايما بأرسم عصفور الجنة
أو أى زهور
وحاليا بأمزج الآيات القرآنية بالزهور المجسمةوالمرسومة

richardCatheart يقول...

اولا انت المفروض هوايه رائعه زى دى ماتتوقفيش عنها ابدا

لان فيها تامل فوق العاده ودا فى حدذاته غسيل للروح والعقل

تحياتى على البوست ربنا يجعلنا من التوابين ويحسن خواتيمنا يارب

داليـ ـ ـ ـ ـ ـ ــــا يقول...

الموضوع هايل
فكرتينى بنفسى لما كنت اروح مكان عشان اتفرج على منظر الغروب
وفكرتينى باأخويا لما بيبقا فى البحر الاحمر وبيقعد يلتقط صور منظر الغروب

السؤال الاول
انا بشوف الناس بتتكلم على الناس كتير اوى دى نميمه
وطبعا بيستعبطوا وهما عارفين كويس ان دى عقابها شديد عند ربنا

السؤال التانى
هرسم منظر الغروب

تحياتى ع الموضوع الجميل

موناليزا يقول...

مستر بريزيدنت
ـــــــــــــ
أهلا بيك يافندم
عندك حق هى النفس الامارة بالسوء
:) فعلا هى نظرية غريبة
لأن المفروض ان الانسان العاقل هو من يختار طريق النجاة وليس العكس

أشكرك جدا لمشاركتك
يسعدنا دوام التواصل



**********************************


د. على خميس
ــــــــــــ
وعليكم السلام ورحمة الله وبركاته
أهلا بيك يادكتور
ربنا يعزك يارب فما توفيقى الا بالله
:)
أولا: لأنى استحرمت الفلوس اللى كنت بدفعها فى شئ لا يفيد أحد (ثمن الفيلم وثمن تحميض الفيلم) وفيه غيرى مش لاقى ياكل
ثانيا: ربنا يتقبل دعائك اللهم امين
ثالثا: أشكرك جدا لمشاركتك
رابعا:الله على الجمال:) ماشاء الله على الذوق الرفيع

أشكرك جدا لتعليقك
يسعدنا دوام التواصل



**********************************


كوكتيل
ـــــــــ
أهلا اهلا بالقمر
الشكر لله ياجميلة فما توفيقى الا به

يااارب

اه والله عندك حق ولا كأنهم عملوا حاجة!

الله على الهدوء فى هذا النظر.. لو هتعيشى فى مكان زى ده ماتنسيش تبعتيلى:)

نورتينى حبيبتى واسعدنى تواجدك



*********************************


شارم
ـــــــ
أهلا بيك يافندم
قول كمان أخى الكريم لعل كلماتك يقرأها الجميع

أشكرك جدا لمشاركتك
يسعدنا دوام التواصل



*********************************



أبو على
ــــــــــ
أهلا اهلا بصاحب التعليقات المميزة بعد طول غياب

ويبقى الأمل من أجمل الاشياء

هو فعلا اسلوب فلسفى ليس من السهل أن يؤدى الغرض منه ببساطة

أنا طريقتى مختلفة تماما فى اسكات بكاء الاطفال:) يعنى لا بتحايل عليهم عشان يسكتوا ولا بقولهم عيطوا كمان.. ومع ذلك بيسكتوا وبيضحكوا كمان:)

أشكرك جدا لمشاركتك وفعلا وكأنهم يمنون على الله أن اسلموا

تسعدنى مشاركاتك دائما وأقف كثيرا أمامها
ربنا يعزك يارب واشكرك جدا لتعليقك
يسعدنا دوام التواصل



*********************************


هاما
ـــــــ
وعليكم السلام ورحمة الله وبركاته
أهلا بيك يافندم
فعلا والله وان تعدوا نعمة الله لا تحصوها
أشكرك جدا لمشاركتك
وعجبتنى الرسمة:)

يسعدنا دوام التواصل



**********************************


كلمات من نور
ـــــــــــــــ
أهلا اهلا بالغالية
ربنا يخليكى ليا ياحبيبتى وماتحرمش من دعائك ليا:)
---
أيوة قوليلهم كمان.. مناظر تغيظ
--
سبحان الله:) انا كمان دايما برسم الرسمة دى

مبسوطة ان العصفورة وصلت الامانة:)

نورتينى غاليتى واسعدنى تواجدك



*********************************

موناليزا يقول...

أم الخلود
ـــــــــ
أهلا اهلا بالقمر
ربنا يكرمك ياحبيبتى فما توفيقى الا بالله

عندك حق جدا وهذا للاسف
:) جميل اختيارك للرسمة فيها هدوء

نورتينى حبيبتى واسعدنى تواجدك



**********************************


ذكرى رحيل قلم
ـــــــــــــ
وعليكم السلام ورحمة الله وبركاته
أهلا اهلا بالقمر
يفوضوا أمرهم لله بس الاول مايسكتوش ويعملوا المستحيل عشان يرجعوا حقهم تانى

ما اجمله من منظر:)

ربنا يسعدك ياحبيبتى
نورتينى ياجميلة واسعدنى تواجدك



*********************************


حتى تشرق الشمس
ــــــــــــــــ
وعليكم السلام ورحمة الله وبركاته
أهلا اهلا بالقمر بعد طول غياب
أنا الحمد لله بخير أشكرك جدا لسؤالك

أشكرك جدا لمشاركتك
وواضح فعلا ان اغلبية الناس عارفة ان الغيبة ذنب ولذلك ارجو أن نمتنع تماما عنه:)

وهتعرفى ترسمى أشخاص!!:)
وان شاء الله تخرجوا قريب
:)
نورتينى ياجميلة واسعدنى تواجدك


********************************


مجداوية
ـــــــــ
وعليكم السلام ورحمة الله وبركاته
أهلا اهلا بصوت الحق

وانا كمان بحب زيارتك لمدونتى جدا:)

:)
:)
انا مستغنية عن عمرى عشان احط امتحانات الثانوية العامة لا ياستى الطيب أحسن:)

رأيك ده على دماغى والله:)

عندك حق جدا الغيبة والنميمة تعتبر آفة المجتمع بحق .. ربنا يعافينا منها يارب

كما عاهدتك رقيقة وفنانة متميزة:)
نورتينى غاليتى واسعدنى تواجدك



*********************************



ريتشارد قلب القطة
ــــــــــــــــــ
أهلا اهلا بالقمر
هرجع لها ان شاء الله لما اجيب كاميرا ديجيتال:)
ده حقيقى
أشكرك جدا لتعليقك
نورتينى حبيبتى واسعدنى تواجدك


******************************


داليا
ــــــــ
أهلا اهلا بالقمر
أشكرك جدا لرايك ولمشاركتك المتميزة
نورتينى ياجميلة واسعدنى تواجدك

Unknown يقول...

في أول البوست عندما وصلت في القراءة لجزء خروج الشمس من المغرب انتابتني قشعريرة، لأني شعرت كأنك تحولت في وصفك من حلم جميل إل كابوس، طبعا لأني أدرك معنى ذلك، ولم أكن أعرف أن هذا مجرد مدخل للتذكرة.. الفكرة مميزة ما شاء الله.. جزاك الله خيرا على التذكرة.. وإن شاء الله سيكون في ميزان حسناتك من أيقظته تذكرتك من غفلته.. آمين.

Unknown يقول...

استأذنك ..
انا مو عندي مدونة
بس الصور عاجبانى
ممكن انسخ منها لاستاخدامها مثبل كخلفيات
او انى ابعتها لأصحابي

شكرا

(ست* جنى* الحسن) يقول...

سلامو عليكو..
جزاك الله كل خير على التذكرة.
لكن رغم ان الحرام بين والحلال بين الا ان دايما الممنوع مرغوب.الا من رحم ربه.
اللهم لا تسلط انفسنا علينا .
امين يارب العالمين.
لك تحياتى. وجعله فى ميزان حسناتك.

موناليزا يقول...

ماجد القاضى
ــــــــــــ
أهلا بيك أستاذ ماجد
ربنا يكرمك وأشكرك جدا على دعائك وعلى تعليقك

يسعدنا دوام التواصل



*********************************



بلو
ـــــــ
أهلا وسهلا
لك ما طلبت
يسعدنا دوام التواصل


**********************************



ست الحسن
ـــــــــ
وعليكم السلام ورحمة الله وبركاته
أهلا اهلا بالقمر
ربنا يكرمك ياحبيبتى واشكرك جدا لتعليقك ولدعائك
نورتينى ياجميلة واسعدنى تواجدك

salwa يقول...

السلام عليكم اخت موناليزا
ما اروع ما تكتبين لفائدته
وهذا ما تعودناه منكي و جزاكي الله كل خير
اللهم اجعلنا من التائبين
سلام

blue-wave يقول...

ياريت لو نقدر نتوب
بس نتوب بجد
واكتر ذنب فى رأيى مش بناخد بالنا منه
هو التكشيرة
ف تبسمك فى وجه اخيك صدقه

ghoneem يقول...

السلام عليكم

أخبار حضرتك ايه فرحان جدا اني رجعت ولقيت مدونتك الغالية مازالت غالية

ربنا ينفع بيكي ويبارك فيكي
انا رجعت الحمد لله بعد فترة انقطاع وبدعي انه يكون رجوع دائم ان شاء الله

انا حبيت بس أمر وألقي التحية علي الجميع والي لقاء ان شاء الله

تحياتي وخالص دعائي

بالتوفيق..................

momken يقول...

جميل اوى البوست ده

اسلوب ادب جميل وقاعده دينيه راسخه


تسلم ايدك

بصى

انا بضايق اوى لما الاس تشوف واحد مفطر فى رمضان
ويبقوا اعاوزين يفتكوا بيه

مع ان نفس الناس بيروحوا يصلوا الظهر وكل اصدقئهم ممش بيروحوا وبياخدوها عادى

هو الصوم اصبح فجاءه اهم من الصلاه

الى اعرفه ان الصلاه عماد الدين مش الصوم
والصوم له كفاره للمفطر وقضاء اما الصلا لاء
والصوم فى اوقات يمكن التغاضى عنه
الصلا لاء

الناس اتعودت ذنب ترك الصلاه
لكنهم لازالو يقدسون الصوم جدا لانه من العالم للعام


دنى بخير
تحياتى

موناليزا يقول...

سلوى
ــــــــ
وعليكم السلام ورحمة الله وبركاته
أهلا اهلا بالقمر
ربنا يعزك يارب فما توفيقى الا بالله
دمتِ غاليتى بكل الخير
نورتينى واسعدنى تواجدك



**********************************


بلو واف
ـــــــــ
أهلا بيك يادكتور بعد طول غياب
بإرادتنا طبعاً هنقدر

وعندك حق فما أكثر الوجوه العابسة
أشكرك جدا لتعليقك
يسعدنا دوام التواصل



*********************************



غنيم
ــــــــ
وعليكم السلام ورحمة الله وبركاته
أهلا بيك يادكتور بعد طول غياب
أنا الحمدلله بخير أشكرك جدا لسؤالك
وأسعدنى رأيك فى مدونتى كثيرا

عوداً أحمدا
نورت عالم التدوين من جديد
ومدونتى فى انتظارك دائما



*********************************


ممكن
ـــــــ
أهلا بيك يافندم
تعليق غريب شوية وكنت هتوه منك لولا آخره الذى أوضح مقصدك

وفعلا ترك الصلاة من اعظم الذنوب
أشكرك جدا لمشاركتك
يسعدنا دوام التواصل

ســـــــهــــــــــر يقول...

ما كنتش بفكر ليه بحب الشروق و ما بحبش الغروب اللى بيصيبنى بكآبه غير مبرره - وقتها - لكن بعد شويه عرفت انى يمكن اكون شخص متفائل ( يمكن )

الصبح امل جديد
و يا رب يقبل توبتنا جميعا
استغفر الله الذى لا اله الا هو الحى القيوم و اتوب اليه

فارس عبدالفتاح يقول...

اعتقد ان اكثر الذنوب التي يفعلها الناس جميعاً وقد اكون انا واحد منهم في بعض المواقف هي .. تزكية النفس

اما اذا كان معي ورقة والوان مكنتش هرسم الا منظر طبيعي واحد وحقيقة لا مفر منها وهي رزائل النفس البشرية


بس مش عارف هرسمها ازاي .. طبعاً هي منظر طبيعي لكل البشر من ابينا ادم الى ان تقوم الساعة بما فيهم انا فانا لا اذكي نفسي


لكن المعضلة ان النفس البشرية لا احد يعرف كنها وكينونتها فبالتالي لن استطيع او يستطيع اي انسان ان يرسم جانب منها وهي الحقد والحسد والكذب والخيانة والوحشية والصلف وكل الرزائل

اظن انها سوف تكون هذه الصورة صدمة ذات وقع رهيب على بني البشر مهولة عندما يرون انفسهم رأي العين


سبحان من ركب الخير والشر في اناء واحد سبحانه وتعالى تجلت قدرته سبحانه وتعالى عما يقولون علواً كبيرا

حصان المرجيحة يقول...

حبيت اسلم
و اعتذر عن طول غيابي
شكرا ليكي

زينب علي حبيب يقول...

كلامك حلو ومعاك حق

يااا رب نكون من التوابين يااا رب :)

ج1: البنات اللي بتحط صور بنات من غير حجاب على بروفايلهم او اي مطرح وكأنو حرام يبينو وشهم بس عادي يبينو وش و عورة غيرهم من البنات ... حتى لو كانوا فاسدات ... دا مش يعني اننا حلال نشيل صورهم ويشوفوها الرجالة عندنا !!!

وكمان ...اللي بيسمعوا كلام الشيوخ باللي يعجبهم ... واللي مبيعجبهمش وميوافقش اهوائهم ... لا احنا مش مقتنعين ... وهما مقتنعين بكدا ... ناسيين قول الله عز وجل : "أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ فَمَا جَزَاءُ مَنْ يَفْعَلُ ذَلِكَ مِنْكُمْ إِلَّا خِزْيٌ فِي الْحَيَاةِ الدُّنْيَا وَيَوْمَ الْقِيَامَةِ يُرَدُّونَ إِلَى أَشَدِّ الْعَذَابِ وَمَا اللَّهُ بِغَافِلٍ عَمَّا تَعْمَلُونَ "

صدق الله العلي العظيم


ج2: امممم برسم اشجار ومية وكدا يعني ... منظر هادئ و مليان باللون الأخضر والأزرق

سوري على الاطالة :)

موناليزا يقول...

سهر
ـــــ
أهلا اهلا بالقمر بعد طول غياب
ده اكيد طبعا نوع من انواع التفاؤل
ربنا يكرمك ياحبيبتى وأشكرك جدا لتعليقك
نورتينى واسعدنى تواجدك



*********************************


فارس عبدالفتاح
ـــــــــــــــــ
أهلا بيك استاذ فارس
صح لان ده هيؤدى بعد كده للكِبر وما اكثره حاليا

فاجئتنى بالصورة التى سترسمها

أشكرك جدا لتعليقك ويسعدنا دوام التواصل



**********************************



حصان المرجيحة
ــــــــــــــ
أهلا بيك يافندم
عذرك معاك ومكانك محفوظ دائما
ومدونتى فى انتظارك دائما




**********************************



قطرة وفا
ــــــــــــ
أهلا اهلا بالقمر

ما اجمل مشاركتك
تسلميلى حبيبتى واسعدتينى بتواجدك