الاثنين، 28 يونيو 2010

هنساك

لازم أنساك
وإذا كان قلبى معاك
هسيبهولك
وآجيب قلب جديد
مايعرفش عنك
أى شـــــــئ
وإذا روحى يوم سألتنى
عليــــــــك
هعمل مش سامعه
ولو سألتنى تانى
هقول إنسيه
وشوفى غيره
وأنتى يعنى خدتى
منه إيــــــــــــه
غير شوق وحنين
مالوش آخــــــــر
وياريته قـــــدر
ده ما عبــرش
ولا حتى فكــــــــر
وما بيسألــــــش
ده لا جالك ولا حن عليكى
ولو فى يوم جه وكلمك
يبقى لأنه مالقاش
قدامه غيرك
وســــاعتها
بيقول أحلى كلام
حافظه تمـــام
ما بيغلطـــــــش
ولو كان فى يوم مع ناس كتير
بينسى وجودك بضمير
ولو قالك غيرك ماليش
بعدها ما بيعبركيش
عمره ما سأل عليكى
ولا حتى اهتم بيكى
عارف حقوقه وواخدها
وحقوقك عنده سايبها
تبقى دى عيشة ولا مذلة
أيوة سيـبـيــــــه
ولا تسألى فيـــــــه
وإذا حسيتى بوجع الجرح
قطن وشاش والجرح هيبرد
هياخد وقته بس هيبرد
قطنة شوق من عاشق جالك
يتمنى تملى يكون فى بالك
عيشى معاه وأنسى أوجاعك
وخليه يكون سبب أفكارك
تسعدى بيه وتتهنى
وفى رضاه تتمنى
وفى لقاه تستنى
شيليه دايما فى عينيكى
يقدر حبك ويعيش ليكى
--------------
إهداء لمن تحب من طرف واحد أو لمن توهم نفسها بأن الطرف الآخر يحبها.. أرجو أن تتخذى قرارك سريعاً..
وهذه بعض الوسائل التى تساعدك على النسيان بشرط أن تكونى حقاً ترغبين فى النسيان لأن إرادتك هى من تتحكم فى الأمور.
* قومى بحذف كل الرسايل الخاصة به سواء على الموبايل أو على الايميل أو على الفيس بوك.
* قومى بحذف رقمه وإيميله من عندك واعملى حظر.. حتى لا تعطى فرصة لأن يكلمك فيؤثر عليكِ.
* لو حصل واتصل ماترديش عليه ولو ينفع غيرى رقمك.
* ماتعرفيهوش إنك هتنسيه غير لما تكونى بجد قد كلمتك وقتها عرفيه وشوفى رد فعله.
* خليها تيجى منك بدل ما يطلبها منك.. لأن وقتها مش هيفيد الندم.. سيبيه هو اللى يندم عليكى .
* حذار من الإستماع إلى الأغانى اللى ليها ذكريات معاه أو مشاهدة الأفلام اللى ممكن تفكرك بيه.
* حذار من الذهاب لأى مكان تعلمين مسبقاً بتواجده فيه.
* حذار من الذهاب إلى الأماكن التى كنتى معتادة عليها وهو يعلم بذلك حتى تسدى عليه كل الطرق ده إذا حاول أصلاً.
* اشغلى نفسك بحاجة جديدة( هواياتك المفضلة- زيارة دار للأيتام أو للمسنين- المساعدة فى جمعية خيرية- تعلم طهى أكله جديدة أو صنف حلويات- زورى أقاربك وصديقاتك اللى بقى لك كتير ما شوفتيهومش - اتصلى بصديقتك التى تعلمين جيداً أنها ستجعلك تبتسمين فى نهاية المكالمة...).
* إعتبريه مات واحزنى عليه من قلبك عشان يوم ما تشوفيه تانى صدفة تبقى عارفة من جواكى أن مفيش ميت بيصحى.
*تذكرى قسوته معكِ دائما كل ما وجدتى نفسك هتضعفى.
* استعينى بالله وادعيه إنك تنسى.. فالقلوب بين أصابع الرحمن يقلبها كيف يشاء.



سؤال جانبى:
ـــــــــــــــــــــــ
* ما وسيلتك فى النسيان؟.

هناك 15 تعليقًا:

أنا - الريس يقول...

هذه كلمات قلب مجروح
بصوت مبحوح
الا القلوب صعب أن تداوي
ولكنها في النهاية تداوي
سلمت الأنامل
وربنا يجمع المحبين بالزواج علي كتاب الله وسنة نبية
ويهدي العاصين وأنا أولهم ويرضي عن التائبين لوجهه

هي وظروفها يقول...

اولا سؤالك الاخير ده بقي

عشان اغلب الشباب لو جاوبوا هيكدبوا ف طريقه نسيانهم او هيجملوا

بس الشيء الوحيد المجرب شخصيا

ان النسيان مش موجود في اي علاقه كانت كامله

بس مع مرور الوقت وحدوث تاقلم البني ادم بيتناسي وبيعيش وبيفرح وبيضحك

وخصوصا لو قابل شريك حياه او اقام علاقه كخطوبه او جواز
من حد عنده القدره علي مخاطبه حواسه ومشاركته بما حمله الكلمه من معني
جميع مناسباته

ومع الوقت وسنه سنه بتلاقي الحبيب القديم اتحط ف الرسياكل بن
تعرفي ليه لاني اعتقد ان القلب او العقل خصوصا مكان لا يفرمت ولا يتم فرمته ولكن
الموضوع القديم بياخد شكل جديد ويتمحور ف ذاكره الا وعي
بس بعد مرور سنين
لو مريتي ف مكان كان بيجمعكم او سمعته افيه كان بيقوله او لزمه خاصه من لزماته تلاقي عقلك يقول الكلمه دي بتاعه فلان يااااااااااااااااااااااااااه الله يمسيه بالخير

وممكن لو كان شخص سيء تقولي راح ف الوبا وغار ف داهيه
وخال هنادي اللي مبيرحمش نفذ فيه حكم التلاعب والخداع
واخيرا هناك انواع من البشر وان قلت بس لالاسف مبتعرفش تنسي مهما مرت سنين ومهما شاف واتعرفت واتجوزت حتي بيفضل للقديم مكان كده في زاويه من زوايه القلب ومكان خاص بيه مهما مرت الايام
سلامو عليكو

قلم رصاص يقول...

النسيان دا نعمه ميقدرهاش الا اللي جربها وعاشها حتى لو كانت في تجارب منقوصه ومش حقيقيه

ماهو ساعات بتكون التجارب تافهه بس واخده مساحه كبيره جدا من حياة الانسان ومحسسه شيطانه او قرينه انها كل حياته وبدونها هيغرق

بوست تنويري متميز
احييكِ عليه

ووسيلتي للنسيان هي
النسيان نفسه

تقبلي مروري وتحيتي

موجة يقول...

فيه كتاب باحلام مستغانمي
اسمه : نسيان دوت كوم
روعة الروعة ياريت تقريه
طبعا كلامك جميل وربنا مايكتبهاش على حد انه يحي من طرف واحد
خالص تحياتي
موجة

Single Mummy يقول...

عزيزتى مونى
ربنا يكرمك على النصائح الهايلة دى خصوصا للبنات الصغيرين وكمان مفيدة وتنويرية للكبار اللى احيانا مش بيعرفوا يسيطروا على انفعلاتهم وعواطفهم ان شاء اللة فى ميزان حسناتك
سؤالك الاخير ....بلاش انا والنبى
تحياتى وقبلاتى

زهرة يقول...

حلو أوى الكلام

النسيان صعب جداً

لكن موجود جدا وحقيقى اوى والا مكناش قدرنا نعيش

Mahmoud Ahmed يقول...

:(

بوست صعب قوي قوي قوي

:(

جنّي يقول...

السلام عليكم

الكلمات رائعة وبسيطة الفهم.. ولكني أشك ولو في ان نسبة ضئيلة تقوم بسماع نصائحك الذهبية .. فالضعف سمة بشرية والنسيان والغفران سمات جميلة لعل وعسى ..

اجابة السؤال : الزمن كفيل بالنسيان ..

فارس عبدالفتاح يقول...

اولاً : محصليش اني اعيش الوهم ده .

ثانياً : التعامل مع المشكلة بموضوعية هو الطريق الصحيح لنسيانها بطريقة طبيعية وصحية .

ليله شتاء يقول...

السلام عليكم

واحشتنى اوووووووى موضوعاتك

بجد جميلة والصورة حلوة اووووووووى ومعبرة اووووووى

وسيلتى فى النسيان تذكر كل اساءة منه


دمتى بخير

r يقول...

افضل وسيله للنسيان انك تنشغلى بأشياء اخرى فلا تجدى الوقت للتفكير
بجانب رؤيه ومقابله اخرين بهم مميزات تفوق الاول وقتها ستظهر العيوب
والنسيان الحقيقى يأتى مع الوقت

حـــــدوتـــــة يقول...

السلام عليكم

نظرا لخبرتى السابقة
فى دعاء جميل قوى ممكن نقوله

اللهم لا تذهب قلبى الى ما صرفته عنى

سلالالالالالالالالالالالالالالالالالام

كلمات من نور يقول...

الله عليكي وعلى بوستاتك ...بس مع الأسف الإنسان مهما قرا بيمر بتجارب ولا يستمع للنصيحه ثم يندم ويقول : كيف أنسى؟

=================

لفاروق جويدة زمان قصيدة تدعى : طاوعني قلبي على النسيان ...أما السؤال يا ست الأسئلة كلها فجوابه إن الإنسان لو مش بينسى كان زمانه ضاع فهي نعمة ننسى هذا و ننسى هذه وننسى ذكرياتنا الأليمة....خالص حبي و تقديري لموناليزتي الحبيبة

ghoneem يقول...

بعد التحية ..

النسيان نعمة كبيرة ..
بس هية القلوب بين أصابع الرحمن يقلبها كيفما شاء عشان كدة الحل الوحيد عشان النسيان فعلا هيبقي الرحمن وفقط ....

ربنا يحفظك

تحياتي

بالتوفيق.................

موناليزا يقول...

أعتذر مجدداً على عدم قدرتى على الرد على تعليقاتكم أو الرد على الرسائل الخاصة أو ترك تعليق لديكم
ولكننى مازال يسعدنى إستقبال تعليقاتكم وتواجدكم ودوام تواصلكم
فأهلاً ومرحباً بكم فى مدونتى دائماً
ولا تنسونى من صالح دعائكم.
أمةالله/ موناليزا