الثلاثاء، 24 مايو 2011

مصر محتاجالك.


أمك ولا خطيبتك يا طه؟
طه: خطيبتى طبعاً.
تقولها لبلبة لمحمد هنيدى فى فيلم لا أتذكر اسمه .
مش عارفة ليه المشهد ده بيفكرنى بوضع مصر حالياً.
مصر ولا مصالحكم الشخصية يا شعب؟
الشعب:مصالحنا الشخصية طبعاً.
زمان فى الأفلام والمسلسلات العربى لما كانت المخابرات المصرية تحب تجند حد حتى لو مالوش علاقة بأى حاجة كانت تقوله كلمة السر اللى هى : مصر محتاجالك.. ياااه تلاقى البطل فى ساعتها ومن غير تفكير لبى النداء فورياً حتى لو مالوش لا فى الطور ولا فى الطحين ولا عارف أصلاً هما عايزينه يعمل إيه.. وياسلام بقى لما الوضع يتأزم جداً والبطل يبقى خلاص بيفكر أنه يرجع فى كلامه تلاقى اللى مجنده يقوله كلمة السر التانية اللى هى :عشان مصر.. وبرضه تلاقيه فى ثانية الحماس دب جواه وبقى مستعد يضحى بروحه فداء لهذا الوطن.
زمان برضه غنوا وقالوا" مصر هى أمى.. نيلها هو دمى".

دلؤتى بقى الوضع اتغير تماماً وبقينا مقضينها أغانى وبس تتقال فى الماتشات لكن الفعل إيه!!! لا يسر عدو ولا حبيب.

لو لسه بتعتبر مصر أمك..حد يعمل فى أمه كده؟؟.
حد يلوى دراع أمه فى الوقت اللى هى عايزة تتسند
على ولادها فيه؟. بالمظاهرات الفئوية والفتن الطائفية.. ده وقته يعنى أنا راضية ذمتكم ده وقته؟؟؟.
حد يعرى أمه قدام العالم كله بدل ما يغطيها ويسترها ويدارى عيوبها؟ بانتشار البلطجة والسرقة والاحتكار وغيرها من الحوادث المؤسفة.
حد يسرق أمه ويسيبها تجوع وتشحت من باقى الدول وهى خيرها يقضيها ويفيض .. بانتشارالطمع والنهب والسلب وكأنه مال سايب مالوش أصحاب؟.
حد يسيب اللى سرق أمه وقتل أخواته وشرد أهله وأصاب أطفاله بعاهات مستديمة وأمراض خطيرة فى سجن ملوكى ويأجل إعدامه لحين ميسرة؟.
حد يشوف أمه خارجة من عملية ولادة متعسرة وبتعانى من حُمى النفاس وبدل ما يمرضها عشان تخف وتقوم يضربها على دماغها ويهريها طلبات؟؟.

قولولى بجد والله أنتوا عايزين إيه؟؟؟.
عايزين مصر تموت؟؟.
ده المعنى الوحيد لأفعالكم الغير مدروسة والتى تنم عن فوضى أخلاقية وأسلوب همجى وعدم تحمل المسئولية..مصر لسه عايشة بتتخانقوا على الورث ليه؟؟.


على فين يا مصر ولادك هيودوكى
على جنة ربنا فى الأرض ولا هيرموكى
ربنا كبير قادر ينصرك رغم اللى بيكرهوكى

وقادر كمان يذلهم ويهينهم زى ما هما هانوكى

نــــــــداء:
ـــــــــــــــــــ
با أبناء مصر هلموا لنجدة مصر ليس بالمظاهرات والاحتجاجات على الأوضاع الراهنة وليس بالاعتصامات على قلة ذات اليد فهذا ليس وقت عتاب أو تصفية حساب..هذا وقت العمل.. اعملوا على نهضة بلدكم ..اعملوا على عزتها ورفع شأنها..اعملوا على أن تكون كما تتمنوا لها.. وهذا لن يحدث بتقصيص ريشها كما تفعلون الآن..ساعدوها لتقوم وتقف على ساقيها من جديد..كونوا درعاً تواجه به أعدائها بدلاً م
ن كونكم خنجراً يتغرس فى قلبها.

حفظكِ الله يا مصر من كل سوء وجعل كيد أعدائك فى نحورهم حتى لو كانوا يحملون اسمك فى خانة الجنسية فى رقمهم القومى.. فكل من يريد بكِ السوء فهو عدو لا يستحق الحياة على أرضك أو التمتع بخيراتك أو التستر بسمائك.

هناك 15 تعليقًا:

سواح في ملك الله- يقول...

احلي كلام سمعته من بعد الثورة
العقل الباطن لشعبنا بيتهياله احنا عملنا
الثورة خلاص بقي نقعد نستني ونجني الثمار
مابعد الثورات اخطر من الثورات نفسها
الشغل وتغيير المفاهيم والنهضة بالبلد
دي الثورة الاكبر
تحيتي

سبايدرمان يقول...

مفيش كلام بعد كلامك ده


نــــــــداء:
ـــــــــــــــــــ
با أبناء مصر هلموا لنجدة مصر ليس بالمظاهرات والاحتجاجات على الأوضاع الراهنة وليس بالاعتصامات على قلة ذات اليد فهذا ليس وقت عتاب أو تصفية حساب..هذا وقت العمل.. اعملوا على نهضة بلدكم ..اعملوا على عزتها ورفع شأنها..اعملوا على أن تكون كما تتمنوا لها.. وهذا لن يحدث بتقصيص ريشها كما تفعلون الآن..ساعدوها لتقوم وتقف على ساقيها من جديد..كونوا درعاً تواجه به أعدائها بدلاً من كونكم خنجراً يتغرس فى قلبها.

حفظكِ الله يا مصر من كل سوء وجعل كيد أعدائك فى نحورهم حتى لو كانوا يحملون اسمك فى خانة الجنسية فى رقمهم القومى.. فكل من يريد بكِ السوء فهو عدو لا يستحق الحياة على أرضك أو التمتع بخيراتك أو التستر بسمائك.

مصطفى سيف يقول...

صدقتي والله اختي العزيزة
ما يثير حفيظتي هذه الايام اننا نهتم بقضايا فرعية وننخرط فيها وتستهلك فيها كل مخزون طاقتنا ونهدر الاهم
اتفق ان المستوى المعيشي لجميع فئات الشعب ضعيف واتفق معهم يجب ان يتظاهروا من اجل مستوى افضل فهل هذا الوقت ملائم؟
كذلك ما يحدث من تفريق وتشتيت واعتصامات طائفية هل هذا وقته؟
اننا كشعب نتفنن في ان نفرط في ثورتنا ونتفنن في كيفية اضاعة البلد
الاحوال الاقتصادية بدأت في التدني البورصة خسائرها مستمرة لا اتكلم عن تهويل فكل ذلك في طريقه للحل وكل ذلك يمكن تداركه سريعا لكن فقط دعونا نعمل كي لا تستمر ازمتنا الاقتصادية
دعونا نعمل لنعلي من شأن هذه البلد
دعونا نعمل لانه لن ينفعنا الا ما نعمل
تحياتي لفكرك الواعي واشكرك على البوست الراقي وليته يكون دافعا لنا لمحاولة الترقي بهذا البلد

eng_semsem يقول...

خلينا في الاهم في البيت الكبير اللي بيلمنا كلن ا في الشجره العاليه اللي بنقف نحتمي تحتها من الشمس خلينا نفكر نبنيها ونساعد كل اللي بيحميها من غير تفريط في حقوقنا المسلوبه والمطالب تفضل محطوطه قدام عيننا ما نكونش احنا اللي فرضين راينا يا تعملوا اللي عايزينه دلوقتي ياما بلاش طول عمر المحاكم بتاخد وقتها في اصغر القاضيا ومين ليه قضيه خلصت في 3شهور ولو حتى صحة توقيع
ياريت نسندها تقف من تاني

مامة مازن يقول...

والله تسلمى تسلمى
احنا اعصابنا مش مستحملة والله العظيم
يا خوفى يا خوفى يا خوفى من اللى جاى
كان جوانا الامل ان بكرة احسن لولادنا بس الامل بيغيب بيغيب
وربنا يستر

كريمة سندي يقول...

كلمات جميلة ومن القلب والله ربنا يحفظكم

نور الدين يقول...

اتمنى ان تجد صرختك آذاناً تسمع فقد كثرت الخناجر وكل يريد نصيبه من الوليمة المحرمة
إنهم يأكلون أمهم إن مصر كأم خاضت مخاضاً عسيراً وبدلاً من أن يمدوها بأسباب الحياة إذا بهم يطلقون عليها ذئاب المطامع
لك الله يامصر

محمد الجرايحى يقول...

أحييك على موضوعيتك
وعلى مشاعرك النبيلة
تقديرى واحترامى

rack-yourminds يقول...

صدقتي يا سيدتي ليس هذا وقت مطالب فئويه واعتصامات ,واكيد عندما تسترد الدوله عافيتها سوف تتحقق كل تلك المطالب ,بس احنا محتاجين صبر شويه فالثوره لم تكمل بعد شهرها الرابع
__
مقال رائع ,تسلم ايدك

فارس عبدالفتاح يقول...

سلام عليكم


والله اللى هيصدق لما يقولولو ان مصر امك .. برضوا هيصدق لما يقولولو مصر مش امك

هههههههههههههه

في تلك الحالتين هو راجل معندوش اي فكرة عن اي حاجة وليس لديه اي خطوط فاصلة او رؤية واضحة او فكرة او منهج اونظرية او حتى معتقد .

ربنا يصلح الحال

Carmen يقول...

عندك حق حبيبتي بأيدك جدا في رأيك

Dr Ibrahim يقول...

بالفعل مصر تحتاج للجميع..
يجب أن نعمل من أجل بناء البلد..
لا ان نلتفت للخلافات..

أبو حسام الدين يقول...

هو كما قلت حقا.
أسال الله أن يصلح الأحوال

الاحلام يقول...

ياله من كلام رائع يالها من معانى جميله هذا هو الكلام الجميل لابد حقا ان نغير من مفاهيم الكل دمتى بكل خير تقبلى تحياتى الاحــــــلام

موناليزا يقول...

أهلا وسهلا بجميع السادة الحضور
لا أجد كلام سوى أن نوحد جهودنا ونتكاثف جميعا ليس فى العمل فقط لنهضة بلدنا ولكن بالدعاء أيضاً فمصر بحاجة ماسة إلى رحمة ربنا قبل كل شئ

نورتونى جميعاً
وأسعدتونى بمشاركتكم وتعليقاتكم
وفى انتظاركم دائما