الأحد، 3 يوليو 2011

لو كنت غالى عليك


بتردهالى!!
عشان سافرت وسيبتك قبل كده.
طيب ماهو كان غصب عنى ومحدش حاول يمنعنى ولو كنت قلت لى ماتسافريش عمرى ماكنت مسافرة لكن كنت شايفة ان سفرى مش فارق معاكم.. يومها أنت ماستحملتش فراقى ومارضيتش تركب فى العربية اللى هتوصلنى المطار رغم انك عارف إنك أنت الوحيد اللى كنت عايزاه يركب معايا.. كنت عامل فيها قوى وهتقدر على بُعدى.. لكن أنا بقولهالك صريحة أنا مش هعرف أعيش من غيرك.. إذا كنت وأنت معايا بحس إنى لوحدى أمال لما تسافر هعمل إيه وأنت أقرب حد ليا.
المشكلة أنى مقدرش أقف فى طريقك لأنى مقدرة أوى وعارفة أنت عايز تسافر ليه.. ومش عايزة أتعامل معاك بأنانية .
بس بجد مش عارفة.. وكالعادة لازم أبين أنى عادى متأقلمة على الوضع ومابينش ده قدامهم لأن إظهار مشاعرى أو عدمها مش هتفرق معاهم كتير وأنت عارفنى مابحبش أصعب على حد..
الواقع بيقول أنى أختك الكبيرة لكن الحقيقة إنك ابنى الكبير وأنى أنا أختك الصغيرة.

من كتر قربنا لبعض وشبهنا بيفكرونا توأم بس أنت مش توأمى أنت حتة منى ..
قولى بقى إزاى هقعد كده من غير بقيتى؟؟..

طيب مش تفكر هتسيبنى لمين؟ مين هيكون أمنى وحمايتى؟؟.

أنا عارفة أنك أوقات كتير بتبقى مشغول لكن لما بكون بره لوحدى ببقى مطمنة وعارفة أن محدش يقدر يقرب منى أو يضايقنى أو حتى يفكر يعاكسنى لأنك هتكون موجود علشانى فى أى وقت ومهما كان اللى وراك ..لكن دلؤتى وأنت فى قارة تانية أجيبك منين؟ أنادى على مين ينجدنى ويساعدنى.

بغض النظر عن أننا فى كل خروجة مع بعض لازم نروح البيت متخانقين بس برضه هبقى أخرج مع مين أنا؟.
مين هيكون حارسى الخاص وسائقى المتهور؟.
مين اللى لما أحب أعمل أنه خطيبى وأحط إيدى فى إيده الناس كلها تعرف أننا أشقاء بتدقيقة بسيطة فى وجهينا حيث ملامحنا المتشابهة بطريقة ملفتة.
مين هيستحملنى فى غضبى وثورتى لأتفه الأسباب وبعدها ييجى يصالحنى.
مين اللى هتكلم معاه وهو رايح ينام وفى الآخر يقولى وهو بيفصل ماتنامى بقى.
مين اللى هيضبط المنبه بتاعه عشان يصحينى لو هونايم ووراه ميعاد عشان أنا اللى أصحى فأصحيه لأنه مابيسمعش المنبه.
مين اللى هتدخل فى شئونه الخاصة ويقولى خليكِ فى حالك وأنا أقوله ماهو أنت حالى.
مين اللى هيستعمل حاجتى بدون إذنى ولما آجى أزعق يقولى هستعملها عادى ومالوش لازمة تزعقى .
مين اللى هسأله على ذوق لبسى قبل ما اخرج ويقولى إحنا مش شاريين الطقم ده مع بعض وأنا اللى منقيه.
مين اللى هيسألنى قبل مايخرج عن شياكة مايرتدى وأقوله أنت مش سألتنى قبل كده يقولى آه بس دلؤتى لمعت الشوز.
مين اللى هيفهم مزاجى عامل ازاى من غير ما اتكلم.
مين اللى هيحكى لى الفيلم بعد مايخلص رغم انى كذا مرة أقول انا عايزة اكون معاك من أول الفيلم.
مين اللى هيتفرج على أى فيلم جديد ويشوف اذا كان ينفع أنى اتفرج عليه ولا لأ.
مين غيرك القادر انه يخرجنى من اى حالة سيئة بمر بيها.
مين غيرك اللى بيدلع اسمى بأسماء كتيرة اوى عمر ماحد فكر فيها.
مين غيرك اللى لما اطلب منه يشترى لى حاجات بيجيبها زى ما انا عاوزة بالظبط من غيرما ما ابقى محتاجة اشرح ده إيه وبيتجاب منين وبيتعمل بيه إيه.

أنت اللى بفضفض معاه براحتى.. أنت اللى بتهون عليا حاجات كتير.
وبعدين ازاى تمشى من غير ماتعلمنى السواقة مش انت بتغير عليا ورفضت انى اروح مدرسة تعليم القيادة لان اللى هيعلمنى هناك رجل..
ماشى.. مادام قررت وخلاص نويت الرحيل.. أنا مش همنعك.
ومش هقولك لما اوحشك غمض عينيك وانده عليا بس هقولك لما اوحشك أقف فى المراية وانفش مناخيرك..
طبعاً هتضحك..
وقتها هتشوفنى أنت ناسى أننا شبه بعض وخصوصاً لما بنضحك استغل الشبه ده بقى فى رؤيتى.

وماتقوليش هتوحشينى وفراقك على عينى والكلام ده.. قولى اعمل ايه لما أنت توحشنى؟؟.
أنا عارفة أن الغربة بتغير.. أنا آه ماتغيرتش وزى ماروحت زى ماجيت بس ده لأن عمرى ماحسيت انى متغربة أنا طول الوقت كنت حاسة أنى مخطوفة ومسير اللى خطفونى يرجعونى تانى.

أوعى تتغير ولو هتتغير يبقى للأحسن.. وحذار تنسانى أو حبى جواك يقل.
وإياك أتصل بيك وماتردش عليا.
ولو انى عارفة إن و لاحتى الكاميرا والنت ممكن يعوضونى عن فراقك.. أنا عايزاك على طول تكون موجود جنبى ونفسك يكون فى المكان اللى أنا فيه وريحتك تكون حواليا.
عموماً
هقولك زى ماكنت بتقولى وأنا مسافرة" خد بالك من روحك بعدى".
فى أمان الله ياحبيبى.
وترجعلى بألف سلامة يارب.
وأشوفك على خير ياقلب ماما.

-----------------------

هذه كانت مشاعرى من ستة شهور حينما فاجئنى شقيقى برغبته فى السفر.. ولكنه تنحى عن قراره هذا بعد الثورة.. والآن يريد السفر وبشدة ويسعى له..
ومشاعرى الآن.
ماقدرش ماحبكيش يا مصر لإنك بلدى.
وماقدرش ماكرهكيش لإنك جعلتى أخويا رغم كراهيته للغربه يريدها وبشدة.

ياريت تدعوا لأخويا أن ربنا يهئ له الخير حيثما كان ثم يرضيه به.. وادعوا ان ربنا يكرمه بوظيفة فى بلده تقدر شهادته وطاقته وإمكانياته علشان مايسيبنيش ويسافر.

هناك 18 تعليقًا:

غير معرف يقول...

مساء الغاردينيا موناليزا
يالله قد ايه كلامك وجعني كنت عاوزة اخفف عنك لكن صدقيني لقيت نفسي بعيط وحسيت بكل كلمة قولتيها جميل احساسكم ببعض يارب يحفظه ويحميه ويبعده عن الغربة ويلاقي نفسه في بلده وبين اهله "
؛؛
؛
لروحك عبق الغاردينيا
كانت هنا
reemaas

Bent Men ElZman Da !! يقول...

ربنا يخليكم لبعض عشان بينكم مشاعر جميله اوى بجد من الحاجات الصغيره اللى بتحصل بينكم دى
ربنا يوفقه للى فيه الخير ان شاء الله :))

مصطفى سيف الدين يقول...

حقيقي البلد ظروفها وحشة اوي اليومين دول
ربنا يكتب الخير لاخوكي دايما ويحفظه ويوفقه ويستره وييسرله اموره
تحياتي

كريمة سندي يقول...

يروح ويرجع بالسلامة .. ربنا يخليكوا لبعض اللهم آمين

مها البنا يقول...

يا الله يا موناليزا .. ربنا ما يفرق حد عن حبايبه يارب ويقر عينك بكل حبايبك حواليكى فى سعاده

وجعنى قوى البوست .. فكرنى بساعات كتير وايام حلوه .. وبرررضه الغربه خدتها منى .. وبرده كان بسبب الامكانيات التى لا تقدر والشهادات تعنى الكثير دون كارت من فلان او معرفه بأونكل علان.

بلدنا قامت فيها الثوره .. وغيرت نظام الحكم .. بس نسينا احنا كمان نتغير.

لسه يا موناليزا .. لسه سنين .. ومع ذلك .. مينفعش نكره مصر .. لأنها ببساطه



مصر :)

rack-yourminds يقول...

ان شاء الله ربنا هييسر له الخير واسال الله ان يوفقه الي ما يحب ويرضي

ربنا يخليكم لبعض

Butterfly يقول...

يااااااااااااه احاسيس جميله جدا كان نفسى أحسها بس ربنا ما أردش
ربنا يهدى أخوكى ويرجع فى كلامه تانى ومايسافرش
البلد أولى بيه وبينا كلنا لو كلنا زهقنا وسبناها مين هيعمرها ويطهرها

وربنا يخليكوا لبعض يارب

~ISLAM~ يقول...

كلنا هذا الرجل
اخوكى معذور جدا فى بلد قاسيه جدا

ربنا يصلحله الحال ويوفقه فى حياته سواء هنا او بره ويخليكم ليعض دايما

فارس عبدالفتاح يقول...

سلام عليكم


الغربة مصنع الرجال .. واسألي مجرب خليه يسافر ويشوف الصراع من اجل اثبات الذات ، فاذا نجح فهو استطاع ان يواجه صراع الحياة بكفاءة . وان لم يستطع الاستمرار وفشل في سفره فعرفي انه اخفق وسقط سقوط مروع في هذه التجربة التي تصنع من اشباه الاطفال والمراهقين والشباب ... رجال .

فالغربة مصنع للرجال مثل العسكرية تماماً ، بال اشد ضراوة من ذلك .

نسرين شرباتي "أم سما" يقول...

واضح جداً انكم متعلقين ببعض أوي
ربنا يخليكم لبعض
ويحميه يا رب
وتفرحوا بيه
لو عاوزة عروس تعالي اديكي من عندي :)
،،،،،،،،،،،،،،،،،،،
يروح ويرجع بالسلامة يا رب
او ربنا يكرمه بوظفيفة كويسة علشان تفضلوا مع بعض ويفضل هوا لمصر :)

الطائر الحزين يقول...

اللهم دبر له شئونة ويسر له الخير حيث كان

ويخليكم لبعض

مرايتى يقول...

ربنا يكرمه ويقدرله الخير حيث كان ويرضه به اللهم أمين

حلو قوى إحساسكوا ببعض
كنت كده برضه لما أخوى سافر بس مش بنفس الدرجه دى بس للأسف إتعودنا لأنه أكيد الى خلاه يسافر ظروف الحياه فى مصر الى للأسف لسه ما اتغيرتش بعد الثوره كتير

ربنا يكرمه بالخير يارب ويصبر قلبك يا حبيبتى

موناليزا يقول...

ريماس
ـــــــ
أهلا بيكِ يا ريماس
جعل الله يومك ملئ بالطاعات
أنا دموعى كانت بتكتب معايا على فكرة:)
ربنا يكرمك يارب ويستجيب دعائك اللهم آمين

أشكرك جدا لمشاركتك
وفى انتظارك دائما


*******************************

بنت من الزمن ده
ـــــــــــــــــــ
أهلا بيكِ
يارب يا حبيبتى

ماتحرمش من مشاركتك
وأشكرك جدا لوجودك


********************************

مصطفى سيف
ـــــــــــ
أهلا بيك يا دكتور
ده حقيقى وربنا يعديها على خير
ربنا يخليك ويستجيب دعائك اللهم آمين

أشكرك جدا لمشاركتك
ويسعدنا دوام التواصل


*******************************

كريمة سندى
ــــــــــــ
أهلا بيكِ يا كريمة
الله يسلمك.. لكن هو حالياً مش مسافر هو فقط لديه رغبة

ربنا يخليكِ ياحبيبتى
أشكرك جدا لمشاركتك


********************************

مها البنا
ـــــــــــ
أهلا بيكِ يا مها
ياااارب اللهم آمين

أنا بكره الغربة أوى يا مها:(

أشكرك جدا لمشاركتك
وفى انتظارك دايما


******************************

راك يورمايند
ـــــــــــــ
أهلا بيك يافندم
يااااارب اللهم آمين

أشكرك جدا لمشاركتك
ويسعدنا دوام التواصل


*******************************

بيترفلاى
ــــــــ
أهلا بيكِ حبيبتى
ربنا يرزقك بكل الخير

ربنا يخليكِ ويستجيب دعائك اللهم آمين
نورتينى حبيبتى
وفى انتظارك دايما


******************************

اسلام
ـــــــ
أهلا بيك أستاذ اسلام
المشكلة انى عارفه انه معذور وأنه عنده حق

ربنا يكرمك يارب ويستجيب دعائك
أشكرك جدا لمشاركتك


*******************************

فارس عبدالفتاح
ـــــــــــــــــــ
وعليكم السلام ورحمة الله وبركاته
أهلا بيك أستاذ فارس

مش شرط يافندم.. الرجل رجل مهما ظل فى داره والطفل طفل لو التحق بالموساد

ممكن جدا ان الانسان يثبت ذاته فى بلده وهذا قمة التحدى وخصوصا حينما تكون بلد عقيمة.. اما من يثبت ذاته فى الغربة فليس بالأمر العسير فممكن جدا واحد يتغرب ويغسل صحون أو يكنس شوارع وييجى بلده يعمل باشا على اللى حواليه

***************************

نيسرينا
ــــــــــ
أهلا بيكِ يا نيسو
يارب يا حبيبتى
الله يكرمك..عروسة إيه بس.. مش لما اتجوز أنا الأول :)
----
حاليا لسه هو مش مسافر فقط الرغبة تلح عليه وبشدة
أيوة ادعى كده على طول الله يخليكِ

ماتحرمش من تعليقاتك
وأشكرك جدا لمشاركتك


*******************************

الطائر الحزين
ــــــــــــــ
أهلا بيك يافندم بعد طول غياب
اللهم آمين
ربنا يكرمك يارب ويستجيب دعائك اللهم آمين

أشكرك جدا جدا لدعائك
يسعدنا دوام التواصل


******************************

مرايتى
ــــــــ
أهلا بيكِ يا حبيبتى
ياااااااااارب

وعشان البعد بينسى مش عايزاه يسافر
مش عايزة علاقتنا بعض تبقى مجرد ذكرى

يارب يا حبيبتى
ماتحرمش من تعليقاتك
وأشكرك جدا لمشاركتك

eng_semsem يقول...

ربنا يسهل ليه الحال في اي مكان يختاره ربنا ليه
الدنيا عمرها ما هتدينا كل حاجه ولازم نككسب حاجه ونخسر حاجه يارب يكون والحياه في مصر هي الحياه براها ايام بتعدي حلوه وايام بتكون تعيسه مع اختلاف اسباب الفرح والتعاسه
تقبلي تحياتي

موناليزا يقول...

انج- سمسم
ـــــــــ
أهلا بيك يا باشمهندس
ربنا يكرمك ويستجيب دعائك

أشكرك جدا مشاركتك
ويسعدنا دوام التواصل

هاني النجار يقول...

ازيك يا موناليزا.. يارب تكوني بخير.
أما بالنسبة لأخوكي، قولي له ان فيه واحد لا تعرفوا ولا هو يعرفك بيقولك: أوعي تسيب بلدك لأن ترابها يساوي كنوز الدنيا، وحبها لأنها تستاهل تتحب، لكن لو شايف نفسك مش راجل وانك مش هاتقدر تقف جنبها.. سبها وسافر زي غيرك، بس لازم تعرف ان فيه ناس شافت الويل والذل والقهر والظلم في السجون والمعتقلات، وظروفهم أصعب من ظروفك الف مرة، وبرضه مستحيل يفرطوا فيها

الاحلام يقول...

جميل هذه المشاعر وجميل هذا الحنان لكن اتمنى ان تتركيه يسافر ان كان حقا السفر فيه مصلحه له فالامور هنا مازالت تحتاج الى وقت كبير حتى تستقر فاننى ادعو الله سبحانه وتعالى ان يرشده الى الطريق الصحيح دمتم بصحه دائما تقبلى تحياتى الاحــــــلام

موناليزا يقول...

المهاجر
ــــــــ
أهلا بيك يا فندم بعد طول غياب
أنا الحمدلله بخير أشكرك لسؤالك
قلت يافندم وهقول
ولكن حجته قوية

أشكرك جدا لمشاركتك
ويسعدنا دوام التواصل


********************************


الأحلام
ــــــ
أهلا بيك يافندم
دعواتك
وربنا ييسر اللى فيه الخير

أشكرك جدا لمشاركتك
ويسعدنا دوام التواصل