السبت، 7 يوليو 2012

نها بنت خالتى




مستغربين إنى مش عايزة أروح معاهم المصيف.. ليهم حق .. ماهم مايعرفوش إن المصيف بالنسبة لى يعنى "نها بنت خالتى".
نها بنت خالتى من القاهرة وأنا من المنصورة وميعادنا السنوى اللى بنشوف بعض فيه بيكون فى رأس البر.
نها بنت خالتى أكبر منى بأربع سنين لكن اللى يشوفنا مع بعض يعتقد إننا قد بعض.
نها بنت خالتى أنا وهى مش شبه بعض فى حاجة لا شكلاً ولا طباعاً غير فى الصوت.. اللى يسمع صوتى فى التليفون يفكرنى هى واللى يسمع صوتها فى التليفون يفكرها أنا.


المصيف يعنى أنا ونها مع بعض دايماً.. يعنى الكلام بينا عمره مايخلص.. ماهو طبيعى هيخلص إزاى هى بتحكى لى اللى حصل طول السنة اللى فاتت وأنا بحكى لها اللى حصل طول السنة اللى فاتت يعنى عندنا سنتين نحكى فيهم .. رغم إننا مع بعض دايماً سواء موبايلات أو ماسنجر لكن الكلام على أرض الواقع له مذاق خاص.

المصيف يعنى أنا ونها مانامش كل ليلة غير بعد ما نصلى الفجر وتلاقينا صاحيين الساعة تسعة الصبح واحنا فى قمة النشاط علشان نبدأ اليوم.

المصيف يعنى أنا ونها نفاجئ بعض كل سنة بهدايا عيد ميلادنا.



المصيف يعنى أنا ونها نتمشى على شط البحر من أوله لآخره - بالمعنى الحرفى للكلمة- من غير ما نحس بحر أو تعب.
المصيف يعنى أنا ونها نقعد تحت الكازينو العائم بالساعات من غير ما نحس بالوقت.
المصيف يعنى أنا ونها نقعد على اللسان لنشاهد منظر الغروب ونتصور مع بعض فى نفس المشهد كل يوم وكأن غطس الشمس فى البحر كل يوم حدث لا يتكرر .. و فى كل مرة نشاهده باستمتاع وكأنه أول مرة.


المصيف يعنى أنا ونها فى معرض الكتاب ..أنا أقرأ باستمتاع وهى شوية وتزهق وتقولى يلا نمشى.
المصيف يعنى أنا ونها نتمشى على النيل وناكل فيشار.
المصيف يعنى أنا ونها نركب عجل.. أنا أركبه علشان خاطرها مع أنى مابحبوش وهى تكون مستمتعة جداً.
المصيف يعنى أنا ونها فى السينما.. نتفرج على 3 أفلام متاكل نصهم ونطلع مش فاهمين حاجة بس مستمتعين إننا مع بعض.
المصيف يعنى أنا ونها نعمل شوبنج ومايعجبناش حاجة بسهولة وفين وفين على مانشترى حاجة.
المصيف يعنى أنا ونها نتفاجئ إن كل واحدة فينا اشترت لبس جديد ويطلع شبه بعضه حتى فى اللون.
المصيف يعنى أنا ونها وأحلامنا الوردية.
المصيف يعنى أنا ونها فى مركب فى النيل.
المصيف يعنى أنا ونها أغانى ورقص من غير مناسبة.
المصيف يعنى أنا ونها وكوتشينة أونو.
المصيف يعنى أنا ونها ومسابقات ثقافية وترفيهية من تأليفى الخاص.
المصيف يعنى أنا ونها نطلع نجرى فى سباق من غير مايهمنا الناس وناسيين خالص إنى مُدرسة وهى مُديرة مكتب رغم إنها عارفة أنى دايماً اللى بسبق فى الجرى من وأنا صغيرة.
المصيف يعنى فيلمين كاميرا36 صورة يخلصوا فى أول أسبوع.
المصيف يعنى أنا ونها نتفاجئ إننا بُكره مروحين واحنا لسه مالحقناش نشبع من بعض.

دلؤتى بقى خلاص المصيف ماعدتش له طعم.
نها اتجوزت وسافرت مع زوجها ومابقيناش نشوف بعض غير فى المناسبات العائلية -إن وجدت وتصادفت مع نزولها أجازة-
قضينا مع بعض مصيف بعد زواج نها وانجابها بس ماكنش بنفس طعم مصايف زمان.

خلاص كبرنا والدنيا لهتنا وماعدناش زى زمان.
بقينا مانعرفش حاجة عن بعض دلؤتى غير كل فين وفين.
بقينا مانشوفش بعض يمكن غير بعد سنين.
فراقنا ماعدتش بيوجعنا.

وهكذا هى الحياة
مش الموت بس اللى بيفرق الحياة كمان بتفرق.



هناك 11 تعليقًا:

مصطفى سيف الدين يقول...

ان شاء الله ربنا يجمعكم على خير دايما و يحفظكم لبعض

yosef يقول...

الحمد لله انها بخير
وهايّ حال الايام بتفرق وبتجمع

دمتِ بخير

هبة فاروق يقول...

حلوه اوى يا مونى بجد اتاثرت جدا بعلاقتك بنها بنت خالتك
عارفه انا وكارولين كنا زيك كده انتى وبنت خالتك بس بعد الجواز والاطفال مبقناش بنحس بمتعه زمان ..كانت ايام جميله انطلاق وعدم مسؤليه لكن كل وقت وله أذان
الظاهر كده احنا كبرناومش واخدين بالنا
بجد يا خساره كانت ايام
بوست فكرنى بالذى مضى

beautiful mind يقول...

فعلا مفيش حاجه بتستني علي حالها
ودي سنة الحياة وكان لازم دا يحصل ان اجلا او عاجلا
ان شاء الله ربنا هيرزقك باللي يعوصك عن بنت خالتك

Bent Men ElZman Da !! يقول...

اختلاف الحياه بيقتل كتير من ذكرياتنا وعادتنا الجميله
بس كفايه انها بخير وان شاء الله ربنا يجمعكم فى يوم قريب :))

Unknown يقول...

جميله اوي الصداقه الوفيه دي بجد اثرت فيا تسلم ايدك

ظلالي البيضاء يقول...

أستاذة منى ..
لبخبلصة في آخر عبارة :"ليس الموت وحده من يفرق .. لكن الحياة كذلك تفرق"
مثل نها كنتُ مع أخي حتى إنني بت عنده في الأسبوعين الأولين بعد ليلة زفافه ..
ثم حدث معي اكتئاب عندما أجبرني والدي على العودة للمنزل ..
وعلى أثره سعى والدي في زواجي ..

لكن بعد سنوات قليلة خرج أخي للعراق ولم يعد ..
أفتقد له وقد فرقنا الموت كما تفتقرين لنها وقد فرقتكما الحياة ..

دمت بألف خير .. أثرتِ شجوناً في قلبي ..

EMA يقول...

مش الموت بس اللى بيفرق الحياة كمان بتفرق..

ياه العبارة دى فظيعة اوى بجد

ذكريات جميلة لما بنفتكرها بنضحك و نعيط فى نفس الوقت !

تسلمي يا مونا و ربنا يسعدك يا رب

تحياتي

مها البنا يقول...

"مش الموت بس اللى بيفرق .. الحياه كمان بتفرق"

تصدقى صح؟؟؟ صح قووووووى

rona ali يقول...

ربنا يجمعكم قريب
بس هو دة التطور الطبيعى للحياه وانا عارفه انك مش مستنيانى اقولك كده
بس انا حاسه اوى بكل اللى كتبتى بس الفرق مع اختى بقي :(

موناليزا يقول...

نورتونى جميعاً
وأشكركم جداً لمشاركتكم
واعترف بتقصيرى فى الرد منفرداً وفى التعليقات لديكم
ولكنى حقاً أتابعكم جميعاً
وأسعد بوجودكم فى مدونتى
وأرجو قبول معذرتى

رداً على كل التعليقات
"مابقاش بينا كلام يتقال.. لو اتكلمنا فى الموبايل حتى بنبقى ساكتين.. متعة الحوار اللى كانت بينا زمان خلاص راحت.. وبقينا كإننا أغراب وما يربطنا الآن صلة الدم فقط "

فى انتظاركم دائماً