الخميس، 13 سبتمبر، 2012

حقى وحقك (2)


ماذا يغضب فى أن يحافظ الفرد على حقه.. يوجد مواقف كثيرة أشعر فيها بأن هناك ممن لا يبالى بهذا الموضوع.
وعلى سبيل المثال:
ليس من حق أحد أن يأخذ أشيائى أو يستخدمها دون إذنى.
ليس من حق أحد أن يعطى لشخص آخر شئ من أشيائى أيضاً دون إذنى.
ليس من حق أحد أن يعزم شخصاً آخر من جيبى ويفاجئنى بهذا على اعتبار إن طلباته بالنسبة لى أوامر.
ليس من حق أحد أن يتكلم عن لسانى.
ليس من حق أحد أن يحكى أخبارى دون أن يستأذن منى.
ليس من حق أحد أن يصورنى بدون إذنى.

وهذه بعضاً من المواقف أيضاً التى تثير ضيقى:
- أكون لسه متعرفة على واحدة مابقلناش كتير يعنى لسه مابقيناش أصحاب مجرد معارف ونركب مع بعض مواصلات مثلاً وألاقيها مُصممة إنها هى اللى تحاسب لى وتزعل جداً لو أنا رفضت.. بجد بقى إيه اللى يزعل فى كده..كل واحد يدفع لنفسه أنا شايفاها حاجة عادية .

- اشترى سلعة وادفع السعر اللى البائع قال عليه وبعد كده أجدها فى مكان تانى أرخص.. طيب بتاخد أكتر من حقك ليه!!.
أو عامل المفروض أنه بيعمل حاجة وبياخد الأجرة اللى هيطلبها وبعد كده أجد شغله أى كلام ومايستاهلش أنه ياخد فلوس !.

- أطلب من حد أنه يشترى لى حاجة وبعد ما ييجى مايدينيش الباقى ولو سألت هى الحاجة بكام يعتبر ده بُخل منى!!.

-أكون بصور ورق مثلاً أو أشترى حاجة مع واحدة صاحبتى أو قريبتى وأجدها تطوع مُقدماً بدفع الحساب!!..مش لاقيه لها معنى .. فى الإسلام تعتبر هدية على اعتبار أنى ماطلبتش منها حاجة علشان تكون سلف ..لكن فى الواقع لو أنا مادفعتش الفلوس دى بطريقة أو بأخرى هتفضحنى بيهم ..وبعدين لو عايز تجامل حد ممكن تجيب له أى هدية رمزية حتى لو باكو لبان.

- من حقى لما حد يعطينى ميعاد يلتزم بيه .
- من حقى أقول رأيى بصراحة طالما طُلب منى.
- من حقى ما علقش على مدونة لمجرد إن صاحبها بيزورنى إذا كان ما يكتبه لايستهوينى أو لا أفهمه.
- من حقى أشم هواء نظيف والمُدخنين يحترموا ده ويشوفوا مكان يدخنوا فيه بعيد عن الناس ولو حتى يدخلو الحمام.


وأنت بقى من حقك إيه؟.

هناك 7 تعليقات:

habiba يقول...

السلام عليكم
مفيش شك ان دى كلها حقوق بس الناس اللى احنا عايشين معاهم مختلفين وكل حق انت قلتيه بيختلف أهميته عندهم..وكمان على حسب الطريقة اللى اتربوا عليها والناس اللى متعودين يعاملوهم بالطريقة دى.
علشان كده لازم نصبر ونتعامل بالحســنى حتى لو لقينا غير كده.
بس بجد أكتر حاجة مش بقدر أصبر عليها ان حد يقول أخبارى من غير إذنى.

اسمتعت جدًا بتدوينتك وبزيارة مدونتك :)

reemaas يقول...

عارفة لو بتمشى فى بلدنا بحقى وحقك ماكنش حد غلب والله

موناليزا يقول...

حبيبة
ــــــــ
وعليكم السلام ورحمة الله وبركاته
أهلا بيكِ حبيبتى فى زيارتك الأولى
أشكرك جداً لتعليقك
وأسعدتينى بزيارتك
نورتى مدونتى وفى انتظارك دائما



-------------------

ريماس
ــــــــ
أهلا بيكِ يا نور
إيه المانع بجد.. ماهو اللى بيضايقنى أكيد برضه بيضايق غيرى يبقى ليه نضايق بعض :)

نورتينى حبيبتى
وفى انتظارك دائما

βent Pasha يقول...

ياريييييييييييتت والله الموضوع ده يمشي

عارفة إيه ممكن اللي مخللي الموضوع ده زايد عن حده كده ؟؟
بيتهيألي العشم الزايد اللي الناس دي بتكون متوقعاه منك ، ومش عارفة إذا كان العشم بالطريقة دي عيب ولا ميزة

يلا الحمد لله على كل شئ

تحياتي لكي ياجميلة

موناليزا يقول...

بنت باشا
ــــــــــــــ
أهلا بيكِ حبيبتى
وتعرفى كمان إن اختلاف الشخضيات والبيئات اللى الواحد بيتعامل معاه ليها دور برضه :)

أشكرك جداً لتعليقك
وفى انتظارك دائما

Om Zaina يقول...

بتفق معاكي في اغلب اللي قلتيه
بس في رايي الشخصي .. انو في امور كتير مش المفروض تضايق حد
يعني لو واحدة مصرة تحاسب عني .. ده انا حعتبره كرم منها .. واكيد حيترد لها في اقرب فرصة .. بالنسبة لموقف تصوير الورق .. ليه اعتبرتي انها حتفضحك بعد كده؟ بجد انا مش فامهة .. المفروض فيه حسن الظن والنية.. يعني هية قصدها اكيد خير .. ده من باب احمل اخاك على سبعين محمل :))مش قصدي اتدخل في رايك الشخصي .. مجرد اني حبيت اضيق تعليقي .. ارجو تقبله بصدر رحب .. لاني فعلا حبيت المدونة ..

موناليزا يقول...

أم زينة
ـــــــــــ
أهلا بيكِ فى زيارتك الأولى
أنا معاكِ ان فيه أمةر تبان بسيطة لكن حكمى كان من سابق مواقف مشابهة

أشكرك لتعليقك
وفى انتظارك دائما