مهنة أهله

"هو مين فهم الراجل إن الست اتخلقت بس علشان تخدمه؟"
هكذا بدأت حوارها الغاضب
فرديت: أمه طبعا اللي ربته على كده وأبوه بعدها بحكم الوراثة واللي برضه أمه ربته عليه.. أيوة ماتستغربيش ست زيك بالظبط هي اللي فهمت ابنها ده من خلال تصرفاتها معاه من وهو صغير .. مابتخليهوش يعمل حاجة لنفسه ولو له أخت بتخليها برضه تخدمه  وكأنه صاحب إعاقة ما.. فطبيعي لما يكبر ويبقى راجل ملو هدومه تلاقيه برضه في حكم الطفل المعاق.

إنك تخدم نفسك دي نعمة كبيرة مابيحسش بيها غير المحروم إجباريا منها.
وبالنسبة للناس اللي بتاخد من الدين اللي على مزاجها
فأحب أفكرهم بإن النبي (صلى الله عليه وسلم) كان في مهنة أهل بيته
وإن شغل البيت اللي هو أصلا بيتك لا ينتقص من قدر رجولتك.

متخيل يعني إيه تكون راجل مكتمل العافية وتطلب من حد يجيبلك كوباية ميه أو يكويلك هدومك أو يعملك كوباية شاي وغيرها من طلبات بسيطة يستطيع تلميذ ابتدائي فعلها ببساطة إذا تم تدريبه.
متخيل منظرك وأنت بتمنع زوجتك مثلا من الذهاب لمكان ما مهم بالنسبة لها لإنك محتاج حد يعملك الأكل أو حتى يسخنه لو هو كان في التلاجة مثلا جاهز ع التسخين!
متخيل لما تكون لوحدك تماما ومش عارف تقلي بيضتين وتحطهم في رغيف عيش مثلا.
متخيل انك مابتعرفش تعمل لنفسك القهوة المظبوط اللي بتعملك دماغ.
متخيل انك مابتعرفش تسخن لنفسك حتى رغيف عيش.
متخيل يعني ايه مش عارف ترتب هدومك وتحطها في الدولاب مثلا أو تطبقها بعد الغسيل أو حتى تحطها ع الشماعة مظبوط.
متخيل لو معاك طفل صغير هتحتاس بيه فعلا ومش هتعرف تعمله حاجة مع إنك كبير كفاية علشان تساعد طفل صغير.
متخيل لو الأنثى اللي معاك في البيت أيا كان علاقتك بيها(أم، زوجة، ابنة، أخت) تعبت في يوم من الأيام ومحتاجة اللي يعملها حاجة تاكلها مش هتعرف غير انك يادوب تناولها كوباية ميه.
وغيرها كتير من الأمثلة...

إزاي تقبل تعيش كفاقد لأعضائك وأنت في كامل صحتك!
الست مش آلة ولا جهاز كهربائي.. ليها حياة برضه عايزة تعيشها .. مش من حقك تستنزفها لمجرد إنها بتعمل كل حاجة من غير ماتظهر اعتراض..
 لو قسمتوا شغل البيت عليكوا الحياة هتكون ألطف.
وليكن شعارك اخدم نفسك بنفسك محدش ناقصك.