من كتاباتي (91)

1- زي ما بنربي الطفل إنه ماينفعش يقاطع حد وهو بيتكلم. ده أدعى يحصل لما نكون كبار.
ما تثتأثرش بالحديث لنفسك، اسمع غيرك، ماتعليش صوتك، طالما محدش وجه لك كلام ماتتكلمش، قول رأيك باختصار.

2- اللي هتزرعه في قلوب اللي حواليك هتحصده.. يستثنى من هذا أصحاب القلوب المريضة الشبيهة بالأرض البور.

3- الحب فعل
اللي بيحبك هيبقى عايز يشوفك وهيسعى لده.
اللي قلقان عليك هيعرف ازاي يوصلك ويطمن عليك.
اللي وحشته هيجيلك بس علشان يحضنك.

مواقف ممكن ماتاخدتش وقت كبير لكن تأثيرها في النفس عظيم.

4- لما بنشوف حد بيرتب أوضته أو بينضف مكانه أو بينظم حاجته مابنقولش أصله (بنت) بنقول أصله (نضيف، مرتب، منظم)
النوع مالوش علاقة في كونك بتحب تعيش في مكان نضيف أو لأ
مالوش علاقة إذا كنت اتكالي أو بتعتمد على نفسك.
فمهما كان عمرك أو نوعك محدش ملزم يخدمك.

فيه مطاعم وكافيهات بتتعامل بمنطق (ساعد نفسك بنفسك) محدش هييجي يسألك عن طلبك او حتى يقدم لك المنيو.. أنت اللي هتقوم تيجيب القائمة وتختار منها وتطلب وتدفع وبعد كدة تقوم تجيب طلبك.
وأنت وقتها بتعمل ده عادي بنفس راضية لكن في بيتك بتكسل تقوم تجيب لنفسك كوباية ميه طالما ممكن تطلب من حد ويجيبهالك.
ماتبقوش مستنزفين للي معاكم كدة، طالما تقدر ومعندكش مانع جسدي فساعد نفسك بنفسك.

5-تحية وتقدير لكل طبيب يستوعب حالة مريضه النفسية، ويتحمل أسئلته وعصبيته وتمرده.
تحية لمن يتعامل مع المريض كإنسان ضعيف وليس ألة أصابها عطب.
لو الإنسان السليم محتاج للكلمة الطيبة مرة في اليوم فالمريض محتاجها 24 مرة.
"قولوا للناس حسنا"

6- مفهوم الأديب بالنسبة لي، هو من يطوع الكلمات لإيصال أفكاره.. هو صاحب كلمة؛ ولهذا لا أستوعب بالمرة أن يصف أحدهم نفسه بهذه الصفة أو جهة ما رأس مالها الأول "الكلمة" أن يتراجع في كلمته، ألا يكون بقدر ما تفوه به..
كأن يعلن عن شيء ما خاص بأخر ثم يعتذر بأن الإعلان لم يكن دقيقا.
كأن يؤجل موعد أو يلغيه دون العودة لصاحب الشأن.
كأن يتعامل كموظف ليس له في الأمر شيء ينفذ التعليمات الموجهة إليه حتى وإن كانت ستسيء لمصداقية الجهة التي يعمل بها.

فنصيحة: قبل الإعلان عن أي شيء مهما كان، أن تتأكد أولا بأنه لن يتم إلغاءه أو تأجيله أو تأخيره عن الموعد المعلن عنه.
أصحاب الكلمة من المفترض أن يحترمون الوقت ويقدرون قيمة الإنسان.

7- فن اختيار الهدايا
إنك تهادي الآخر بالحاجة اللي هو يحبها أو هيستخدمها أو يكون فيه رابط ما بينها وبينه.
وبديهي ماتتفذلكش في اختيار هدية ما على اعتبار كونها مختلفة وماجاتلوش قبل كده..
مش منطقي يكون هو في كلية طب فأنت علشان تجيب له هدية مختلفة تهاديه مثلا بمسطرة حرف T أو علشان هو أهلاوي مثلا تجيب له شعار الزمالك!
ابذلوا مجهود في اختيار الهدية ولا تنسوا الحديث النبوي "تهادوا تحابوا"

8- وأنت هتستفيد إيه لما تحرج غيرك أو تظهر حاجة هو مش عايزها تبان أو محدش واخد باله منها.
ماتحترموا حياة الناس ومساحتهم الشخصية.
أنا عارفة إنه صعب ومحتاج مقاومة وجهاد للنفس بس معلش حاول حفاظا على إنسانيتك.

9- الكلمة الطيبة بتهون كتير.. فكونوا لطفاء.
"الكلمة الطيبة صدقة"
ممكن تصحى زعلان لكن لما تلاقي أبوك بيصبح عليك.. نفسيتك تهدى.
ممكن الطبيخ يبوظ والحلة تتحرق لكن لما تلاقي جوزك مايعلقش او يقولك فداكي ومايهمكيش.. احساسك بالذنب يخف.
ممكن بضحكة ومجاملة عابرة لبائع بسيط تحلي يومه وتخلي مزاجه حلو حتى لو ماباعش حاجة.

الدنيا جاية ع الناس كلها فمانبقاش احنا كمان بنرازي في بعض.


10- عمرك فكرت في نعمة إن الأجهزة الكهربائية اللي بتستخدمها شغالة.
عمرك امتنيت للتلاجة والغسالة إنهم بيأدوا مهامهم على أكمل وجه.. وإنك مثلا مش محتاس في الأكل ولا في الهدوم ولا خاضع لمواعيد صيانة وما إلى ذلك.
حاول تتأمل في النعم الكتيرة اللي بتستخدمها وامتن لوجودها واحمد ربنا عليها.

11- ولادك اللي مش عاجبك تصرفاتهم هم نتاج معاملتك ليهم.. اللي بتزرعه جواهم هتحصده.
شوف بقى أنت بتزرع إيه؟
حب، قسوة، حنان، إهمال، تجاهل، اهتمام، رعاية وما إلى ذلك.