كم أحب

فى حياتنا أشياء كثيرة تدعو لأن نحب الحياة حتى لو كانت بسيطة..دعوة للنظر للجانب المشرق.

ومحاولة للاستمتاع بالأشياء التى نحبها.

كم أحب شروق الشمس ورائحة الصباح ونسمة الفجر.

أحب المشى جداً واعتبره رياضتى المفضلة- والجرى طبعاً بس ده كان زمان لما كان ينفع أجرى فى أى مكان عادى -.

أحب من شخصيات الكرتون بطوط .

والآنسة خوخة بطلة عالم سمسم لها أيضاً فى القلب مكان.

أحب التصوير.. -ماعدتش بحب أتصور لكن أحب أصور ولو في مكان وفيه كاميرا أحبها تكون معايا وأنا اللى أقوم بالمهمة-.

أحب العصاير وخصوصاً عصير القصب والفراولة والمانجو والبرتقال.

أحب المشمش والخوخ والبرقوق.

أحب الطبيعة بكل ما فيها من مناظر وحيوانات ونباتات.

أحب ارتداء الجوارب القطنية كالأطفال.

أحب شكل البالونات الملونة وهى منفوخة .

أحب مدونتى.

أحب أعمل نفسى مذيعة مع أى حد بتعامل معاه.

أحب المانجو وخصوصاَ التيمور.

أحب المياه وأنا بشربها أو وأنا بشوفها سواء فى البحر أو وهى نازلة من الحنفية وطبعاً أعشق المطر ورؤيته .

أحب الشوكلاتة عموماً.

والجلاكسى خصوصاً.

وأحب الشوكلاتة البيضا جداً ولو أنى نادراً لما بلاقيها.

أحب القراءة كثيراً وأعشق رائحة الكتب.

أحب شكل الأحصنة جداً وخصوصاً لو من غير لجام.

أحب الحيوانات عموماً وفصيلة القطط خصوصاً.

أحب الفواكه وخصوصاً المشمش..وأحب رائحة المانجو مع العنب.

أحب العنب.. وبحب أحطه على الجيلى .

أحب رائحة العيش الفينو وأحب تناوله.

أحب نيسكويك فى كل حالاته يتشرب أو يتاكل.

أحب الزبادى وخصوصاً لو طعمه مميز وغريب زى بالخوخ مثلاً.

لو فى خروجة وحد حب يعزمنى على حاجة سريعة أشربها ..بطلب ده

أحب جوز الهند.

أحب رائحة المطر وأحب أعمل الحركة دى وببقى فى قمة سعادتى لما هدومى تتبل- بغض النظر عن دور البرد اللى بيجيلى بعدها-.

أحب البسبوسة.

أحب موبايلى جداً واعتبره أغلى ممتلكاتى .

أحب أسرتى جداً.

أحب تخصصى .

أحب بلدى.

أحب الهدوء.

أحب النجاح.

أحب اللون الأزرق بجميع درجاته.

أحب الأشغال الفنية وخصوصاً الكروشيه.

أحب الكتابة.

أحب ألبس كوتشى.

أحب الألوان عموماً.

أحب ألون .

أحب القراءة لأحمد خالد توفيق ونبيل فاروق وبحب أدهم صبرى ورفعت اسماعيل.
- طبعاً فى ناس تانية كتير بحب أقرألهم  لكن دول لهم مكانة خاصة -

أحب اللغة العربية وأحب أتكلم بها .

أحب الأعمال الخيرية وخصوصاً الزيارات.

أحب أناجى ربنا .

أحب من المشروبات الساخنة الشاى باللبن والهوت شوكليت والنعناع ..

وأحب الآيس كريم.

وأجمل ما فى حياتى وجود ربى وهدايته لى .
أحبك ربى.

سؤال جانبى:
أذكر أكثر الأشياء التى تحبها فى الحياة.

خبايا نسائية فى معرض الكتاب

سيتواجد كتاب "خبايا نسائية"- بإذن الله- فى معرض القاهرة الدولى للكتاب لعام2013 .
الذى سيقام على أرض المعارض - مدينة نصر.
وذلك فى الفترة من 23 يناير إلى 9 فبراير.
من الساعة 10 صباحاً للساعة 7 مساءً.
فى جناح كيان كورب خيمة 2.

أيضاً سيتواجد كتاب "أبجدية إبداع عفوى" والذى أشارك فيه بإحدى سلسلة الخبايا 
والتى لا تتوافر سوى فى الأبجدية فقط. 

يؤسفنى عدم حضورى لمعرض القاهرة الدولى للكتاب .

تمنيت أن ألتقى بكم جميعاً.

وأن أهنئ أصحاب الأقلام الرائعة التى أفخر بكونى منهم.

ولكن عزائى بأن كتابى "خبايا نسائية" سيكون فى استقبالكم .

سيحمل رسالة شكر لقرائى الأعزاء ويخبرهم بأنكم السبب فى وجوده.

وسيحمل رسالة تهنئة لزملائى الكُتاب متمنياً لهم التوفيق.

الجدير بالذكر وجود مجموعة متميزة لكتب المدونين فى هذا المعرض..
 ستجدون تفاصيل أكثر فى هذا الإيفينت 

أرجو أن يحوز الكتاب على إعجابكم.
وتمنياتى بالتوفيق للجميع.

هو و هى

هو يقترب منها على مهل.

وهى تبتعد عنه فى يأس .

هو لا يعلم كيف يجذبها إليه.

وهى ملت من تباطؤه.

هو يعتبرها صديقته.

وهى تعتبره عريسها المنتظر.

هو لا يريد الاستعجال.

وهى تريد حسم الموقف.

يبرر غيابه بقوله: مش عايز افرض نفسى عليكِ.

وتبرر غيابه بإحساسها : لم يعد يرغب في.

يغيب متعمداً حتى يرى هل ستسأل عليه أم لأ.

تغيب متعمدة لإحساسها بإنها مش فارقة معاه.

لن يخبرها برغبته بالزواج منها إلا إذا تأكد من إنها لن ترفضه.

لن توافق على الزواج منه إلا إذا تأكدت من حبه لها.

هو: لا يبالى لمشاعرها.
هى :تخشى زعله.

هو: يتعمد إهانتها.
هى: لاتتحمل أن تجرحه.

هو: ينزعها منه بعنف.
هى: تتمسك به بقوة.

هو: يهرب من مواجهتها.
هى : تأتى له بأعذار واهية.

هو:اعتبرها فريسته.
هى: اعتبرته فارسها.

هو :خسرها.
هى :كسبت نفسها.

هو: لا يستحقها.
هى: أخيرا أدركت ذلك.

كم أكره

يوجد أشياء كثيرة لا تروقنى وأكره وجودها فى الناس اللى بيتعاملوا معايا وسأحاول ذكرها على سبيل المثال وليس الحصر:
- أكره الصوت العالى فى أى وقت وفى أى مكان.- سواء حد بيزعق أو بيسمع حاجة بصوت عالى أو ضوضاء ودوشة فى المكان مجهولة المصدر-.

- أكره الزحمة وخصوصاً إذا ما صاحبها هرجلة وعدم نظام.

-أكره الزيارات المفاجئة.- مهما كانت درجة القرابة-.

-أكره الاقتراب الجسدى بينى وبين أى شخص لازم يكون فيه بينا مسافة حتى لو كانت بنت قاعدة جنبى فى المواصلات.

- أكره القبلات المتبادلة والأحضان بين البنات حين لقائهم.

- أكره إن حد ياخد عليا أوى ويلغى الحواجز ويعدى الحدود الفاصلة بينى وبينه وخصوصا لو كنا لسه عارفين بعض من قريب.

- أكره إن حد يسألنى عن حياتى الشخصية أو يتدخل فيها أو يحاول يقترح عليا فيها حاجة.

- أكره أن أكون متابعة حاجة فى التليفزيون ومستنياها وحد ييجى يتكلم معايا وقتها.

- كم أكره أن أرسل رسالة لأحدهم وأجده لا يرد .. وقتها أشعر بأنى أرسلتها إلى أخرس أو إلى شخص ميت ولكنى أدرك وقتها أنه عديم الذوق ولا يستحق مراسلتى مرة أخرى وخاصة إذا لم يوجد له عذر.

- كم أكره النهايات المعلقة.

- كم أكره التعامل مع الجبناء ومع متقلبى المزاج .

- كم أكره من يخترقون قواعد اللعبة.

- ما بحبش حد يتصل بيا مخصوص علشان يضيع وقته معايا.. أفضل التواصل بالرسائل ففيها اختصار للوقت وتحديد أسبابها بصورة واضحة.

- ما بحبش أتعامل مع حد بيرجع فى كلامه أو يقول كلمة وهو مش قدها.

- ما بحبش اسمع أو استخدم أو أقرأ ألفاظ بذيئة.

- ما بحبش الفوضى وعدم النظام.

- ما بحبش الهزار عمال على بطال وخصوصا لما بكون بتكلم جد.

- مابحبش حد يقاطع كلامى علشان حاجة ممكن تتأجل لما أبقى أخلص.

- مابحبش حد يتدخل فى حوارى مع شخص ما لمجرد أنه قاعد فى نفس المكان وسمع الحوار بالصدفة.

- مابحبش حد يلعب فى حاجتى .

- مابحبش حد يتدخل فى اللى أنا بعمله وخصوصاً لما بكون فى المطبخ.

- مابحبش أسلف حاجتى لحد وخصوصاً لو كان كتاب.

- مابحبش حد يصحينى وأنا نايمة.

- مابحبش الضلمة بس مابخافش منها.

- ما بحبش المفاجآت.

- ما بحبش الدخان عموماً والسجائر خصوصاً.

- ما بحبش الحال المايل الدنيا عندى يا أبيض يا أسود لكن الرمادى مابعرفش أتعامل معاه.

- مابحبش شغل البيت ولو دخلت المطبخ أحب أخلص كل حاجة فيه علشان مادخلوش تانى.

- مابحبش الوسايط فى العلاقات.. ليه تعمل وسيط بينى وبينك أو تسأل حد عليا أو تسألنى على حد!.

- مابحبش حد يهد اللى بنيته .

- مابحبش أنضف مكان حد وخصوصاً لو كان شخص سليم ناضج لا يعانى من أى إعاقة.

- مابحبش حد يصورنى بدون إذنى حتى لو كنت فى ندوة عامة .

- مابحبش حد ينقل كلام عن لسانى.. اللى أنا عايزاه بقوله بطريق مباشر ومن غير وسايط.

- مابحبش كلمة "يتبع" لما أكون مندمجة فى قراءة حاجة وألاقيها فى النهاية.

- ما بحبش الخصام..بصفى بسرعة لو شوفت إن اللى قدامى اهتم إنه يصالحنى .. وبالمقابل مابحبش حد يزعل منى ولو عرفت ببادر بالصلح فوراً.. لكن اللى بخرجه من حياتى مش بدخله تانى.

- ما بحبش الاتفاقات المرسلة والعلاقات المبهمة ..أحب الأمور تبقى واضحة وبأدق التفاصيل .. اللى أوله شرط آخره نور و واحد زائد واحد بيساوى اتنين.

- مابحبش النفاق فى التعامل.. ما ينفعش أبين لحد إنى بحبه وأنا مش طايقاه..واتمنى ان اللى يتعامل معايا يكون صريح.

- ما بحبش حد يبعت لى رسايل على الموبايل لمجرد إن فيه عرض مجانى وهو لا يعنى حرف مما أرسله.. وبرضه مابحبش الرسايل الجاهزة عموماً.

- ما بحبش حد يقلدنى.

- ما بحبش الانتظار.

- مابحبش حد يستغلنى.

- مابحبش حد يسألنى - أنا لو عندى حاجة هقولها -

- مابحبش حد يقطف الورد.

- مابحبش حد يستعجلنى.

- مابحبش أخد أوامر من حد.

سؤال جانبى:
ـــــــــــــــــــــــ
أذكر الأشياء التى تكرهها فى الناس اللى بيتعاملوا معاك.