الثلاثاء، 15 يناير، 2013

كم أكره


يوجد أشياء كثيرة لا تروقنى وأكره وجودها فى الناس اللى بيتعاملوا معايا وسأحاول ذكرها على سبيل المثال وليس الحصر:
- أكره الصوت العالى فى أى وقت وفى أى مكان.- سواء حد
بيزعق أو بيسمع حاجة بصوت عالى أو ضوضاء ودوشة فى المكان مجهولة المصدر-.

- أكره الزحمة وخصوصاً إذا ما صاحبها هرجلة وعدم نظام.

-أكره الزيارات المفاجئة.- مهما كانت درجة القرابة-.

-أكره الاقتراب الجسدى بينى وبين أى شخص لازم يكون فيه بينا مسافة حتى لو كانت بنت قاعدة جنبى فى المواصلات.

- أكره القبلات المتبادلة والأحضان بين البنات حين لقائهم.

- أكره إن حد ياخد عليا أوى ويلغى الحواجز ويعدى الحدود الفاصلة بينى وبينه وخصوصا لو كنا لسه عارفين بعض من قريب.

- أكره إن حد يسألنى عن حياتى الشخصية أو يتدخل فيها أو يحاول يقترح عليا فيها حاجة.

- أكره أن أكون متابعة حاجة فى التليفزيون ومستنياها وحد ييجى يتكلم معايا وقتها.


- كم أكره أن أرسل رسالة لأحدهم وأجده لا يرد .. وقتها أشعر بأنى أرسلتها إلى أخرس أو إلى شخص ميت ولكنى أدرك وقتها أنه عديم الذوق ولا يستحق مراسلتى مرة أخرى وخاصة إذا لم يوجد له عذر.

- كم أكره النهايات المعلقة.

- كم أكره التعامل مع الجبناء ومع متقلبى المزاج .

- كم أكره من يخترقون قواعد اللعبة.


- ما بحبش حد يتصل بيا مخصوص علشان يضيع وقته معايا.. أفضل التواصل بالرسائل ففيها اختصار للوقت وتحديد أسبابها بصورة واضحة.

- ما بحبش أتعامل مع حد بيرجع فى كلامه أو يقول كلمة وهو مش قدها.

- ما بحبش اسمع أو استخدم أو أقرأ ألفاظ بذيئة.

- ما بحبش الفوضى وعدم النظام.

- ما بحبش الهزار عمال على بطال وخصوصا لما بكون بتكلم جد.

- مابحبش حد يقاطع كلامى علشان حاجة ممكن تتأجل لما أبقى أخلص.

- مابحبش حد يتدخل فى حوارى مع شخص ما لمجرد أنه قاعد فى نفس المكان وسمع الحوار بالصدفة.

- مابحبش حد يلعب فى حاجتى .

- مابحبش حد يتدخل فى اللى أنا بعمله وخصوصاً لما بكون فى المطبخ.

- مابحبش أسلف حاجتى لحد وخصوصاً لو كان كتاب.

- مابحبش حد يصحينى وأنا نايمة.

- مابحبش الضلمة بس مابخافش منها.

- ما بحبش المفاجآت.

- ما بحبش الدخان عموماً والسجائر خصوصاً.

- ما بحبش الحال المايل الدنيا عندى يا أبيض يا أسود لكن الرمادى مابعرفش أتعامل معاه.

- مابحبش شغل البيت ولو دخلت المطبخ أحب أخلص كل حاجة فيه علشان مادخلوش تانى.

- مابحبش الوسايط فى العلاقات.. ليه تعمل وسيط بينى وبينك أو تسأل حد عليا أو تسألنى على حد!.

- مابحبش حد يهد اللى بنيته .

- مابحبش أنضف مكان حد وخصوصاً لو كان شخص سليم ناضج لا يعانى من أى إعاقة.

- مابحبش حد يصورنى بدون إذنى حتى لو كنت فى ندوة عامة .

- مابحبش حد ينقل كلام عن لسانى.. اللى أنا عايزاه بقوله بطريق مباشر ومن غير وسايط.

- مابحبش كلمة "يتبع" لما أكون مندمجة فى قراءة حاجة وألاقيها فى النهاية.

- ما بحبش الخصام..بصفى بسرعة لو شوفت إن اللى قدامى اهتم إنه يصالحنى .. وبالمقابل مابحبش حد يزعل منى ولو عرفت ببادر بالصلح فوراً.. لكن اللى بخرجه من حياتى مش بدخله تانى.

- ما بحبش الاتفاقات المرسلة والعلاقات المبهمة ..أحب الأمور تبقى واضحة وبأدق التفاصيل .. اللى أوله شرط آخره نور و واحد زائد واحد بيساوى اتنين.

- مابحبش النفاق فى التعامل.. ما ينفعش أبين لحد إنى بحبه وأنا مش طايقاه..واتمنى ان اللى يتعامل معايا يكون صريح.

- ما بحبش حد يبعت لى رسايل على الموبايل لمجرد إن فيه عرض مجانى وهو لا يعنى حرف مما أرسله.. وبرضه مابحبش الرسايل الجاهزة عموماً.

- ما بحبش حد يقلدنى.

- ما بحبش الانتظار.

- مابحبش حد يستغلنى.

- مابحبش حد يسألنى - أنا لو عندى حاجة هقولها -

- مابحبش حد يقطف الورد.

- مابحبش حد يستعجلنى.

- مابحبش أخد أوامر من حد.




سؤال جانبى:
ـــــــــــــــــــــــ
أذكر الأشياء التى تكرهها فى الناس اللى بيتعاملوا معاك.

هناك 13 تعليقًا:

شيرين سامي يقول...

و إكتشفت إني عكسك في حاجات كتير :)

أنا في الحقيقه واخده الحياه ببساطه
يعني مبدقش معظم الوقت

بس بكره التعامل مع المنافقيـــــن
اللي بيكدبوا
و بيخونوا و يغدروا
و بيفجروا في خصامهم

أُم فرح يقول...

ما شاء الله مدونتك جميله

Amira Yusuf يقول...

عارفه انا كمان مبحبش الحاجات دي
بس لما جمعتيهم ادامي كده حسيت اد ايه انا ممكن ابقا صعبه في التعامل
"ولا خير فيمن لا يألف ولا يؤلف"
:)

انا يتضايقني بس مش بدق

زينب علي يقول...

دول كتيير جداً :) ... انا زي شيرين سامي اكتشفت اننا بنختلف كتير :)

اكتر واحدة عجبتني وموافقاكي معاها هي دي ...

- كم أكره أن أرسل رسالة لأحدهم وأجده لا يرد .. وقتها أشعر بأنى أرسلتها إلى أخرس أو إلى شخص ميت ولكنى أدرك وقتها أنه عديم الذوق ولا يستحق مراسلتى مرة أخرى وخاصة إذا لم يوجد له عذر.

قطرة وفا سابقا

مها البنا يقول...

أنا شبهك في حاجات كتير .. بس مش بالكامل
يعني مثلا انا مش بحب اسلف حد حاجتي .. لكن احب اسلف الكتب واستلفها .. العلم والأدب ليس حكر لأحد لمجرد انه هو اللي دفع ثمن الكتاب :)

أنا كمان مش بحب الخصام وصعب أزعل .. بس للأسف .. مش بصفى بسرعة أبداااا :(

مش بحب الزيارات المفاجئة برضه .. والحقيقه بفضل الزيارات خارج المنزل .. اصلا البيت بحبه للراحة .. بس بفرح قوي لما حد يجيلنا ويكون من الناس الخفيفة اللي بتتعامل كأنها في بيتها ومش قاعدة رسمي وخنقة

أما ما أصبحت أبغضه حد الرفض .. هو إن حد يديني نصيحة .. الحقيقة مبقاش عندي مكان ولو بسيط لحد يجي يقولي اعملي كذا وانا وقت ما كنت محتاجاه جنبي كان اول واحد بيصفر ولا كأنه شايفني

من الأخر كده .. بعض التشابه مألوف للتفاهم .. وبعض الإختلاف مطلوب للتميز ..
أعجبني البوست :)

Om Zaina يقول...

انا لو حفكر زيك كده
مش حعرف اعيش !!!

بعتذر لو كان تعليقي ليه علاقة باي حاجة بتكرهيها

رؤى عليوة يقول...

تصدقى متفقين جدا

بس اكتشفت ان الاسهل نقول بنحب ايه عشان هيطلع كام سطر ههههههههه



دمت بخير

موناليزا يقول...

شيرين سامى
ــــــــــــ
أهلا بيكِ يا شيرين
يعنى عكسى فى كل حاجة كل حاجة :)

بالناس اللى انتى بتكرهي تتعاملى معاهم دول يبقى احنا متشابهين جداً :)

نورتينى حبيبتى وفى انتظارك دائما

------------------------

أم فرح
ـــــــــ
أهلا بيكِ أم فرح فى زيارتك الأولى
أشكرك جداً لرأيك فى مدونتى
وفى انتظارك دائما

----------------------

أميرة يوسف
ــــــــــــــ
أهلا بيكِ يا أميرة
جميل إن الانسان يواجه نفسه باللى بيحبه واللى بيكرهه
والأجمل ان اللى يتعاملوا معاه يستوعبوه زى ما هو المفروض يستوعبهم

أنا قلقانة أكون نسيت حاجات تانية أصلا :)

فى انتظارك دائما

-----------------------

زينب على
ـــــــــــ
أهلا بيكِ يا زينب

إيه الكروتة دى!!
مش متعودة منك على كده :(
فين التعليق المفصل على كل حاجة كتباها وتوضيح اللى بتتفقى معايا فيه واللى بتختلفى فيه :)

فى انتظارك دائما

------------------------

مها البنا
ـــــــــــ
أهلا بيكِ يا مها
:)
الكتب غالية عندى جداً وعمرى ما سلفت حد كتاب ورجعه ولو رجعه بيبقى كأنه كان بيتخانق معاه :(
أنا ممكن أهادى كتاب لكن مااسلفوش ^_^

- أنا كمان صعب أزعل.. بفضل أدى فى أعذار ومبررات للطرف التانى حتى لو هو ماقالهاش لأنى عارفة انى لو زعلت صعب جدا أتصالح
أتصالح لو الصلح تم بسرعة وقتها اهتمامه بزعلى هيشفع له عندى

- فين وفين على مانشرت ثقافة آداب الزيارة مع اللى بيتعاملوا معايا
ياااخبر ده أنا أخدت وقت كبيييير
بس برضه فيه اللى لسه بيعتبرها قلة ذوق منى لو قلت لواحدة مثلا وأنا بضحك مش كنتى تقوليلى إنك جاية! وكأنى كده أهانتها!!

- أنا اللى بيضايقنى فى النصايح انها بتيجى بعد ما المصيبة بتحصل مش قبلها :)

أسعدنى تعليقك جداً
ومشكورة لحضورة المميز
فى انتظارك دائما

-----------------------

أم زينة
ــــــــــ
أهلا بيكِ أم زينة
هو الموضوع صعب أوى كده :)

مش عارفة ليه تعليقك حسسنى انى بكره كل حاجة ومش هقبل كلام من حد!!

دورى كده جواكِ كويس هتلاقى اكيد فى حاجات ممكن تكون بتضايقك من اللى حواليكِ.. هو جميل انك مش فاكراها ومش حطاها فى دماغك بس ده مايمنعش انها موجودة
احنا مش ملايكة وطبيعى بنتعامل مع بشر
وكل واحد فينا له طباع مختلفة تماما عن الآخر
ولكن بعض الود واللين هو اللى بيخلى الأمور تعدى :)

ولا تقلقى لا أكره التعليقات على موضوعاتى بل انتظرها كثيراً مهما اختلفت معى بشرط ألا تتعدى حدود الأدب:)

فى انتظارك دائما ويسعدنا تواجدك

-------------------

رؤى عليوة
ـــــــــــ
أهلا بيكِ رؤى
:)
ماهى نفسها برضه بس نعكس الكلمات وهيطلع بنحب حاجات كتير ^_^

نورتينى
وأسعدنى اتفاقنا
فى انتظارك دائما

فافى يقول...

موناليزا
وحشتنى مدونتك كتير وكمان بعتب عليكى انك مش بتزورينى :(
فى الحقيقه متفقه معاكى فى كل اللى قلتيه هى فعلا حاجات تضايق ماعادا فيما يخص الدخان لانى بحب دخان الشيشه تفاح جدا :)
مش عيب انك تكرهى الحاجات دى لكن العيب انك تسيبيها تتحكم فيكى يعنى اكرهيها زى مانتى عايزه لكن اوعى اوعى تفتكرى انك هاتقدرى تصلحيها فى الناس :)
ولو فضلتى تكرهيها وسبتيها تؤلمك وماقدرتيش انك تصلحيها فى ذات الوقت فى الناس لانك مش هاتربيهم من جديد يبقى هتصابى بالاحباط والاكتئاب طول الوقت
وده بقى اللى عيب كبير
لازم تتعلمى تكونى مرنه وتحولى الحاجات دى لاشياء ايجابيه عشان ماتسيطرشى هى عليكى
تحياتى :)

فافى يقول...

يعنى لو خدنا على سبيل المثال نقطتين نتناقش فى انك تحوليهم لشىء ايجابى
وليكن 1- التعامل مع متقلبين المزاج
لا تجعليهم يقودوا هم العلاقه بل كونى من القوه ان تقوديها انتى بمعنى انك لا تكونى اداه لمزاج سيادتهم ولكن قولى ماتودين قوله وفعل ماتودين فعله فى الوقت الذى تحبين ان تفعلى او تقولى ذلك دون الالتفات لمودهم المصون :)
ولكن استثنى من ذلك طبعا الوقت اللى انتى بتكونى عايزه تطلبى فيه طلب من حد او الوقت اللى بتكونى عايزه فيه توصلى حاجه لحد يبقى لازم تختارى الوقت المناسب ساعتها عشان ده بيكون تحت اطار الذكاء الاجتماعى :)
2- مبحبش حد يقلدنى
انا كمان بكره ده بس لازم تعرفى ان لما حد يقلدك او يستعمل حاجتك ده معناه اعتراف منه بأهميتك وقدوتك له لانه يريد ان يكون مثلك او صوره منك ودى حاجه حلوه وايجابيه مش وحشه ان حد يبقى نفسه ومنى عينه يبقى زيك :)
وقيسى على كده كل الحاجات اللى بتكرهيها بقى
ولازم تعرفى ان كل الحاجات دى بتحصل طول الوقت لكن شطارتنا بقى اننا منخلهاش تأثر علينا
واتمنى البوست القادم يبقى عن الحاجات اللى بتحبيها :)
سورى على الاطاله وتحياتى :)

موناليزا يقول...

فافى
ــــــــ
أهلا بيكِ يا فافى
وأنتى كمان وحشتى مدونتى كثيراً
وأنا إذا كنت لا أترك تعليق فأنا صدقاً أتابعها جيدا

:)
يعنى اختلافنا بس على دخان شيشة تفاح
لو كده بسيطة ^_^

مين قال انى بفكر اغيرها فى الناس انا اللى بتعامل معاه بقبله على عيبه لكن بحاول أبين له أنا بحب إيه يمكن ذوقياً يعمله :)
وده معناه انى باجى على نفسى كتير مع أغلبية الناس :)

-------------

بالنسبة لمتقلبى المزاج حلهم بالنسبة لى المقاطعة أنا معنديش مرارة تتحمل تقلباتهم ولو حصل تعامل بيكون فى أضيق الحدود ولو مزاجهم اتعدل وحبوا يقربوا ويهزروا صدقاً ماببقاش طايقاهم
بالنسبة لى مرضى نفسيين ومحتاجين يتعالجوا
( ربنا مايحوجنى ليهم ولا يحطهم فى طريقى أبداً )

2- بالنسبة للتقليد معنديش مشكلة لو حد قلدنى واعترف بده لكن مايقلدنيش وينكر أو كأنه معملش حاجة

أنتى عارفة زى إيه مثلا
لما تكونى مشيرة حاجة على الفيس وبدل ماتلاقى حد عملها شير تلاقيه خد الصورة مع كوبى وباست للكلمات وحطها عنده
وتلاقيه يستقبل بقى كلمات المدح بصدر رحب وكأنها بتاعته بالفعل

أنا مرة كتبت الجملة دى
" مش عيب إنك تقلدنى العيب إنك تنكر إنك بتتعلم منى "


سعيدة بتعليقك
وطولى زى مايعجبك :)
فى انتظارك دائما

Om Zaina يقول...

مش قصدي والله بس فعلا ده الانطباع اللي جالي وانا بقرا البوست

طبعا انا مش حقدر ارد على كل نقطة بالتفصيل .. لكن على سبيل المثال لو بعت لحد رسالة وماردش .. ببساطة حرجع لحديث الرسول عليه الصلاة والسلام .. احمل اخاك على سبعين محمل .. يعني ححطله سبعين عذر قبل ما ازعل منه

واما معاكي ان حياتنا فيها الكثير من المنغصات .. لكن الشاطر اللي ما يخليها تأثر عليه .. ثلثي الحكمة في التغافل)مش كده برضو والا ايه؟
مسائك مسك وعنبر :)

موناليزا يقول...

أم زينة
ــــــــ
أهلا بعودتك

- ولو كل الأعذار خلصت!!
ولو لقيتيه موجود واستلم الرسالة بالفعل واعطيتيه فترة كمان يبقى إيه!!

أنا بعذر الناس دايماً على فكرة لانى بحط نفسى مكانهم لكن اللى بايده بيظهرلى انى مش فارقة معاه هو كمان طبيعى مايبقاش فارق معايا

وانا إذا كنت بكره الحاجات المذكورة إلا أنى بتعامل مع الناس اللى بيعملوها على مضض.. أوقات ببين ده وأوقات لأ
يعنى باجى على نفسى علشانهم ومن غير ماهما يحسوا كمان

مسائك فل وياسمين :)

يسعدنا دوام التواصل