الأحد، 25 يناير 2009

مايبقاش قلبك أسود

ليه الخصام بقى منتشر أوى كده وعلى أقل الأسباب. وفى ثانية تجد الصديقين أصبحوا أعداء.
ليه بنجرح فى بعض حتى لو كنا أعز الأحباب حين الخصام.
حياة الإنسان أقصر من أن تضيع فى خصام وهجر وزعل.
تخيل لما تتخاصم مع حد عزيز عليك أنك مش هتشوفه تانى. وأن الموت هيكون أسرع من قرار صلحكم على بعض.
مش بذمتك ده يجعل أى سبب للزعل يهون!.
ليه بدل الخصام مانواجهش بعض ونوضح سبب الزعل ونعطى للطرف الآخر فرصة فى الدفاع عن النفس وتطييب خاطرنا.!
ليه مانظنش دائما ظن خير وبأن الطرف التانى أكيد مايقصدش يزعلنا.
ليه واقفين لبعض على الواحدة.
وليه لو حد كان طيب معانا وبيسامحنا ويجيب لنا أعذار نتمادى فى تصرفاتنا على الرغم من تأكدنا انها ممكن تزعل حد احنا بنحبه هل هذا جزاء طيبته وتسامحه الدائم.!
ليه أتقل كلمة على اللسان كلمة"أنا آسف" حتى لو كنت غلطان . ليه بنستكبر نعترف بغلطنا. مع أن إسلامنا قال" وخيركم من يبدأ بالسلام".
ففى الخصام دائماً تضيع الحقوق وتضيع أوقات كان ممكن تكون فيما بعد ذكرى جميلة.
ليه موقف الضيق مابينتهيش فى الحال ونفضل نكبر فى الموضوع ونفتكر القديم كله ونتلكك لبعض.
وليه لما حد ييجى يصالحنا مابنرضاش نصالحه ده لو صالحناه من أصله!
معقول ممكن علاقة قوية بين طرفين تنتهى عشان كل واحد مش راضى يبدأ بالسلام.!
ليه مابنطبقش حديث رسولنا الحبيب فيما معناه"لا يهجر المسلم أخاه فوق ثلاث ليال"ليه ممكن نتخاصم بالسنين وكأن الموضوع بمزاجنا مش فرض علينا.!

يسعدنى إضافة الأخ الفاضل ahmed_k
العلاقات الطيبه بين أفراد المجتمع بتزيد من أواصره وقوته فالمجتمع الذي يكثر فيه الإختلاف يكون ضعيفا غير متماسك لأنه بالضروري حالة الفرد مع إنتشارها بتعم جميع المجتمع.

وهذه إضافة الأخ الفاضل Dr Ibrahim
ان نكتب االمواقف الجميلة بينا كأصحاب على الحجر أو الصخر فأن هذه الأشياء لا يمحوها الزمن ونكتب على ما يدور مابيننا من أشياء سيئة على الرمل فالرياح دوماً ستأتى لتزيله فلا يبقى منه شىء.
نصيحة:-
ـــــــــــ
* إذا زعلك شخص بينك وبينه مودة تذكر كل المواقف الجميلة التى ربطتكما ببعضكما البعض لعلها تشفع له.
* إذا أعتذر لك شخص وشعرت بأنه متأسف حقاً عما بدر منه سامحه ويكفيك شجاعته واعتذاره.
*لا تجعل سفاسف الأمور تقطع صلتك بأى حد فالإختلاف فى الرأى لا يفسد للود قضية.
* اذا انتهت العلاقة بينك وبين أحد كانت تربطك به علاقة من أى نوع اجعل مابينكما هو الاحترام المتبادل ولا تكون كالمنافق الذى إذا خاصم فجر.
* لاتهجر قلباً أحبك مهما اختلفت معه.
* اجعل بينكما جسر ولا تكسر جميع الجسور لعل المياه تعود لمجاريها بينكما مرة ثانية.
* إعلم بأن جرح السكين يلتئم أما جرح اللسان لأ فكن على حذر.
* حذار أن تهين أحداً أمام الآخرين.
* لا تخطئ فى أحد وهو مش موجود لأن الكلام هيوصله.
* ماشتمك إلا اللى مبلغك. فكن حمامة سلام.. على فكرة الكذب مباح فى حالة محاولة الصلح بين طرفين فاستغل هذه الرخصة.
* لا تهجر أحدا نجح فى رسم الإبتسامة على وجهك.
* لاتهجر قلباً وقف جوارك يوماً ما.
* لا تهجر صديقاً أعطاك وقته وتركيزه فقط لكى يسمعك.
* لا تهجر أخا مد لك يد العون يوماً ما.
* خليك أسير الجميل.
* لاتتنازل عن شخص يحبك.
* لا تكون سبباً فى انهمار دموع أحد لم يسئ إليك.
أخيراً إذا وجدت وِداً من أخيك فتمسك به فقلما تجده.

سؤال جانبى:
إيه أكتر حاجة ممكن تزعلك من الآخرين؟ وايه هى اكتر مدة خاصمت فيها حد ؟.
والسؤال ده بقى منعا للإحرج جاوبه بينك وبين نفسك
ياترى قلبك لونه إيه؟.


هناك 89 تعليقًا:

مسدس صغير يقول...

نصائح غالية اعتز بها واحاول اشتغل عليها ان شاء الله . بجد بجد انتى مدونتك مدونة ترسيخ المبادئ اشكرك يا موناليزا على النصائح الجميلة ويا ريت كل الناس تعمل بيها لأن الخصام ده منهى عنه فى السنه لقول النبى صلى الله عليه وسلم لا يهجر احدكم اخاه فوق ثلاث" أو كما قال وجزاكم الله خيرا

يوميات فنانه مفروسه جداا يقول...

السلام عليكم ورحة الله وبركاته

موناليزا الجميله
اخبارك ايه

وايه الهنا اللي انا فيه ده
اول تعليييق

ربنا يبارك في عمرك يا ماما موناليزا

ولا نسيتي ههههه

علي فكره يا موناليزا

انا مش عارفه قلبي لونه ايه

لان احيانا بتخانق وارجع في لحظتها وانسي ان في خصام واحيانا تانيه بفتكر حاجات من زمااااان اوي
تكونشي شيزوفرينك ولا انتي شايفه ايه

عموما موضوعك هايل واحلي ما فيه خلاصته اللي الاخر واحلي ما فيه اكتر بقي معناه

ربنا يجعلك صوت ضميرنا دايما كده يا رب

دومتي بألف خير

SHAPE YOUR LIFE (ABOALI) يقول...

مايبقاش قلبك اسود
خليه الوان
احمر لون يدل على الحياه
ازرق لون يدل على سموك فى السماء
أصفر لون يدل على غروب هواك
اخضر كله اوكيسجين لمن هجاك
ابيض لون لكل من تعاملك معاك


حلو اقوى تصدقى لما يكون قلبك الوان
القلب الاسود
سببه حالة الفلس الدينى
اللى ادى الى انحطاط فكرى نزولا" الى طبقة غير ادمية
من الصعب فيها عمل تشبيه بالحيوان
لاءننا لم نر حيوان اغتصب حيوان او اعتدى على حيوان او مارس الكره والخصام على حيوان اخر

الفلس الدينى
ادى الى نمو ملكات اكثر من ملكات اخرى
نمت ملكة الشهوات وما يستتبعها من كره وحسد وتناحر وهكذا
ونمت شهوة حب المال
كل هذا نما على حساب ملكة الروح وتزكيتها والارتقاء بها والسمو بها

والكلام يطول
ولكن لدينا الحلول كما ذكرتيها
ولكن لن نلتزم بها الا اذا شعرنا
ان الاديان هى التى تعطينا صفة الانسانيه وهى المسئوله عن احداث التناسق والسنفونيه بين الملكات فهى صاحبة السعادة لنا


لكى ان ترى الخنساء الشاعرة العربيه المشهورة
عندما قتل اخوها قبل الاسلام
ملئت الدنيا عويلا وصراخا
وعندما اسلمت واستشهد اولادها الاربعة
قالت ان لله وان اليه راجعوان عسى ان يكونوا فى الجنة واحمد ربى على هذا

هنا يكون القلب الغنى الخاشع الذى شهد كل الالوان



اما عن اسئلتك
انا لا اخاصم ولكنى العكس

لاءنى صريح
والصراحه فى هذا الزمن وقاحة
لذا انا وقح
وربنا يقوى الجميع

ولك تحية خاصة رقيقه من الحدائق الغناء
على موضوعاتك الرائعة
يااااااااا ام قلب الوان

ادم المصرى يقول...

بجد نصائح جميله جدا مع انها بتلاقى العكس بتعها دائما ولكن الارض تنبت الخير دائما ولا يوجد مكان لهذا بيننا ربنا يهدى كل الدنيا يارب ونشفهم كلهم بيعمل مثل نصائحك يا مقوى القلوب سبت قلبى على ديننك واجعلنى من الزين يقرأون كتابك ويفعلو به

شكرا موناليزا على بوست الرائع

بنوتة يقول...

السلام عليكم موضوعك جميل جدا وفعلا لو كلنا بننسى ونعدى هنعيش مبسوطين جدا هو الغريبة ان الموضوع ده انتشر جدا كان في بنتين أعرفهم أصحاب من زمان وزى الاخوات وفجأة سابوا بعض ومش كده وبس بقى بيقولوا في بعض كلام وحش جدا وكل واحدة تقول أنا كنت مخدوعة فى التانية ربنا يهدى
أما اكتر حاجة بتضايقنى جدا جدا
أن حد يتجاهلنى ويتعمد ده يعنى أبقى واقفة مع صحبتى وتيجى تسلم عليها وأنا الهوا
تحياتى ليكى

romansy يقول...

اكتر حاجه ممكن تتعب الانسان انه يكون مزعل حد وبالذات لو عزيز عليه وكان مصدر ثقه له
بس ياريت اللى بيزعل برضه يقدر انى عمرى ما استغنى فى يوم من الايام عنه ويعرف كده كويس
ويقدر كلمه حلوه
وصدقتى له فى يوم من الايام

آخر العنقود يقول...

تسلمي وتسلم افكارك وكتاباتك يامنمن
بجد بتجيبي المفيد دايما
ربنا يكرمك ويبارك فيكى
ونصائح قيمة بجد
اما السؤال
؟
فانا لحد دلوقتى مش عارفة ايه اكتر حاجة ممكن تزعلنى من حد
مش بهزر والله
فكرت فى سؤالك
وكل ما اكتب حاجة افتكر انها حصلت معايا وسمحت اللى عملها
بمجرد اعتذاره وخصوصا لو حد عزيز عليا وبحبه
بس يمكن اكتر حاجة بتزعلنى فعلا
انى احس او اكتشف ان اللى قدامى كان بيكدب عليا فى حاجة
خصوصا لو الحاجة دى كانت سبب في حبي له

جميل ياقمر

wanna b a physician يقول...

اكتر حاجة ممكن تزعلنى من حد انه يظلمنى
او مش يقدر مدى حبى ليه ويتخلى عنى بالذات لو حبيب طبعا

اما اكبر مدة خاصمت حد
بس ده بيبقى لانه غلطان ومستكبر يعتزر او معتبر نفسه صح
تقريبا ده زمان اوى وانا صغير كان شهرين

kmt يقول...

السلام عليكم ورحمة الله وبركاته

اولا بحيكي على الموضوع

بس استوقفني جزء في البوست عن الكذب
ماينفعش اصلح بين انتين بالكذب لا اصحاب ولا ازواج
لان لو اضطرينا نكذب ع الاتنين علشان نصلحهم فدا هايكون شيء مؤقت وهايرجعوا يفترقوا سواء طالت المده او قصرت
لكن لو اتفاهموا واتعاتبوا وكبروا على السفاسف زي ما قولتي ممكن يكملوا


اما اجابتي على اسئلتك

اللي ممكن يزعلني من الاخرين الكذب والاتهامات من غير مبرر والاصرار عليها

اكبر مده خاصمت فيهامش فاكرة بجد لاني بطلت الحكاية دي من يوم ماخلعت اللبس البني بتاع ثانوي :)
بس اوقاتها كانت ممكن توصل لاكثر من اسبوع واوقات اكتر

اما عن لون قلبي
فمش عارفه لكن عارفه اني ممكن اسامح لكن منساش الجرح مرة واتنين وعشرة لكن اكتر من كده بمشي ومبرجعش مهما حصل

تحياتي
الى اللقاء

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة موناليزا
تحياتى وتقديرى
دائما انتظر البست الجديد بتاعك بكل لهفة لأتزود منه كل ماهو جميل
موضوع جميل فعلا بس ياترى كام واحد مننا هيعمل بالنصايح اللى فيه؟؟
عن نفسى انا ممكن افوت اول غلطه للانسان اللى قدامى واتعامل معاه وكأن شيئا لم يكن ومبيبقاش فيه فى نفسى حاجه منه بس لو اتكررت يبقى ده نهاية المطاف وهنا وجب الفراق وبكل احترام انما تعامل تانى او كلام مابيحصلش
لانى ساعتها بحس انه بيستغل طيبتى وتسامحى معاه وانا اكره جدا الاستغلال
اما حكاية لون قلبى ايه دى فأكيد مافيش حد فينا ممكن يقول انه قلبه اسود حتى ولو بينه وبين نفسه
(انا شخصيا قلبى لونه بحلقى او محمحى )
هههههههههه
تقبلى مرورى وتحياتى لكى ولقلمك المبدع
ودمتى بكل خير وود
والسلام عليكم ورحمة الله وبركاته

ميرا ( وومن ) يقول...

موناليزا

ازيك بجد كلامك في الصميم بس بجد ساعات في ناس برغم كل اللي قولتلية بنبقي عاوزين نكسر بينهم كل الجسور ونعمل بينا وبينهم سدود

مش علشان الواحد قلبة اسود لكن علشان ساعات في ناس بترسم علي وشك بسمة انهاردة وتطعنك في قلبك بخنجر تاني يوم تفتكري بسمتها دي ممكن تمحي ألم الطعنة

لا اظن بس عندك حق في حاجات كتير وهجاوب السؤال بيني وبين نفسي مع اني عارفة الإجابة مقدماً

تحياتي

ريمان يقول...

تصورى يا قمر

واله انتى كنتى على بالى النهارده

وبعد كده شوفت تعليقك عندى قولت سبحان الله

وحشانى بجد

وعلى فكره البوست بتاعك ده جه فى وقته والله لانى زعلانه من ناس كتير

انا بزعل اوى اما حد يفكرنى بالحاجات اللى سببتلى الم فى حياتى وبزعل اما حد يجرحنى ولو بكلمه

وممكن اخاصم كتيييييييييير

مش بعد الايام يعنى

انما بقه قلبى والله هو ابيض وزى الفل بس انا اللى دايسه عليه زى ما انتى عارفه ومش مخلياه يعرف يتنفس لحد ما بيقول ارحميييييييينى

NİSANUR يقول...

selamun aleykum I'from Türkiye,from Ankara

rovy يقول...

اختى الحبيبه كلامك جه على الجرح
مش لاقيه كلام تانى اقوله بعد كل اللى قولتيه .. ربنا يكرمك يارب و ما يحرمك ابدا من اصدقائك واحبابك
جزاكى الله كل الخير على نصائحك الغاليه
اما اجابه السؤال فانا اكثر شىء بيجرحنى من صديق هو انى فى لحظه احتياجى له جنبى ما الاقيه او انه يبعنى بسهوله و كأنى ما افرق معاه ..
اما اكثر مده خاصمت فيها حد فالحقيقه المره دى سامحنى الله شكلها حتطول و الله ما بيدى .. الله يسامحها و يهديها يارب

دمتى حبيبتى بكل ود و كل الخير
ودى و تحياتى

روابط يقول...

للأسف القلوب تلوثت فى زمن المسخ الذى نحياه
يصر كل طرف انه على حق, لنا صديق يقاطعنا منذ اسبوع, وحين سعينا نحن لنعلم لما هو غاضب, تركنا وانصرف مشيحا بيديه, هو ليس انسان سئ ولكن عقله بحاجة لبعض التقويم واعتقد اننا كلنا كذلك
تحياتى يا موناليزا

عاشقه الرومانسيه يقول...

البوست جميل واكتر من رائع والله
وعندك حق فى كل ليه قلتيها

ونصيحتك جميله واكيد هاعمل بيها
لانى بطبق منها حاجات كتير الحمد لله

اشكرك على البوست الجميل ده
ربنا يجعله فى ميزان حسناتك

ستيتة يقول...

موضوع رائع كما هي العادة
تعرفي ايه اكبر حزن عيشته في حياتي؟
ان الاقرب الى قلبي بين النساء لما غلطت في كتير وفوت كتير كتير قوي ولما انفجرت للأسف لم تعترف لم تتأسف تركتني ارحل بغير رجعة وهي تعلم انها غلطت فيا قوي

كل ما افتكرها قلبي يوجعني .. هي الاقويى بين النساء .. ولكن ساعة الأسف عرفت ان مفيش كبير وان الحمق هو الغالب

قلبتي على المواجع والبطاطس
وحشتيني وعذراكي وربنا يرجع كي بوردك للمدونة عندي قريب
بحبك في الله

حاسوباتيه يقول...

عندك حق والله الدنيا مش مستاهله

عاشقة القمر يقول...

ازيك اسفه علي التقصير بجد بوست هائله انا مش بحب انو احد يكون زعلان مني لو انا غلطان بعتذار علي طول
بس يتغاظه جدا لم احد يكون غلطان فيني مش يعتذر

ثم ثاني بتغاظه من بنات اولا ماتخطبوا او تزواجه هي بتكون صديقتك جدا
يرواح تنسيك خالص وعلاقه تقطع
ايضا في ناس اول يلقوا اصحاب تاني
بيسسويك خالص داه انا بزعلني جدااااااااااااااااا حاجات دي

صيدلانيه طالعه نازله يقول...

تخيلى فعلا احنا بقينا بنتلكك لبعض وواقفين لبعض على الواحده و فقدنا ميزه التسامح و العفو عند المقدره و الواحد كتير يزعل من حد و لما يفكر فى اللى حصل يلاقى الموضوع تافه و بسيط و فعلا احسن حاجه الاعتذار هن الاخطاء و تقبل الاعتذار من اى حد بيغلط فينا

الربان يقول...

تحياتي

كالعادة بوست جميل به من الارشادات ما ان عملنا بها ارتحنا و ارحنا...

الشيطان الرجيم ينزغ بين الناس...فيشعل الخلافات و النزاعات..
لو استعاذ كل منا بالله من الشيطان الرجيم كما ينغي ان تكون الاستعاذة بالله و بصدق مع الله و مع نفسه...لتغيرت
احوالنا....

أحييكي يا استاذة علي الموضوع.

تحياتي و تقديري

بنت أبيها يقول...

تعرفي ليه الخصام منتشر

لان اصبحنا انانيين

لا نرى الا انفسنا

نستطيع ان نبيع كل ما هو عزيز وغالي

في مقابل وهم اسمه الكرامة

ربنا يهدي

جميلة النصائح قوى

Heba Sayed يقول...

السلام عليكم ورحمة الله

ازيك ياقمر؟؟ عاملة ايه؟؟

موضوع جميل كالعادة

بس انا الحمدلله قلبى ابيض

بس قلبى سبب فى انه بيجيبنى وراه مع كل الناس

وبحاول اعالج النقطة دى

قلبى ابيض اوك ربنا هيحبنى

بس هطلطش كتير من الناس

يلا خير الحمدلله

بس موضوع رائع

السلام عليكم ياعسل

بسمة انور يقول...

بسم الله
المدونة حقيقى جميلة وميرسى جدا على النصائح الجميلة دى والله بحاول اعمل بيها وربنا يعينا بقى

تحياتى

بسمة

mohamed ghalia يقول...

عندك حق احنا ساعات بنكبر المواضيع قوى ومش بتكون تستاهل
لازم فعلا نستحمل شوية ونفتكر الأوقات الحلوة ونعدى لبعض
بجد موضوع هايل
دمتى فى حفظ الله

Unknown يقول...

السلام عليكم
كيف حالك اختى الجميلة وفقك الله
نصائح حلوة من قلب ابيض
وفقك الله

مصعب رجب يقول...

السلام عليكم ورحمة الله وبركاته
بالنسبة للموضوع مفيش أحسن من كده
بالنسبة للأسئلة : استعنا بالله .
إيه أكتر حاجة ممكن تزعلك من الآخرين؟
أكتر حاجة تزعلني إن واحد يسفه رأيي .

وايه هى اكتر مدة خاصمت فيها حد ؟
الحقيقة مش فاكر بس معتقدش إنها زادت عن 3 أيام .
والسؤال ده بقى منعا للإحرج جاوبه بينك وبين نفسك
ياترى قلبك لونه إيه؟
عن نفسي معنديش مشكلة أجاوب عليه على الهواء
انا قلبي يضم بين جوانبه كل الألوان المعروفة والغير معروفة أيضا .
يعني حسب الظروف .
جزاكم الله خيرا
تحياتي
والسلام عليكم ورحمة الله وبركاته

salwa يقول...

السلام عليكم
عندما يكون الصدق و الوعي موجود
تحل كل المشاكل
ادراج رائع سلمت يدك
سلام

محمد يقول...

السلام عليكم ورحمة الله وبركاته

أختنا العزيزة موناليزا


دوما نري ما يكمن في نفوسنا في كتاباتك الرائعة ... تستهوي نفوسنا لنطالعها ونري ما يحيط بها من هالات صنعناها جعلتها تغيب عن حاضرنا ولكن سرعان ما تتبدي حقيقتها من خلال ما تكتبين فينتفض كل منا حاكما علي نفسه ليسترد ما راح منها من شتات .... لقد وصلت كلماتك إلي من له قلب وهذا لا يحتاج إلي كلمات أخري بعد ما قلت من جميل العبارات ....أما أولئك الذين ماتت لديهم الأحاسيس فأولئك كما قال القائل ولو ناديت حيا لاستجاب ولكن لا حياة لمن تنادي ... خالص شكري وتقديري

كفايـة طيبـة يقول...

لاتهجر قلباً أحبك مهما اختلفت معه.
حذار أن تهين أحداً أمام الآخرين

* لا تهجر أحدا نجح فى رسم الإبتسامة على وجهك.
* لاتهجر قلباً وقف جوارك يوماً ما.
* لا تهجر صديقاً أعطاك وقته وتركيزه فقط لكى يسمعك
لا تكون سبباً فى انهمار دموع أحد لم يسئ إليك.
أخيراً من يعطيك قلبه أمانة لا يستحق أن تعبث به .
-----

حاضر والله .. وعد انى احاول اطبق الكلام ده
مع انى بالفعل بطبقه
اقولك حاجة؟
او بمعني اصح اسألك سؤال

تعليقا عالجملة دي
"إذا أعتذر لك شخص وشعرت بأنه متأسف حقاً عما بدر منه سامحه ويكفيك شجاعته واعتذاره."

طيب لو كل ده صح وبيعتذر حقا
بس موقفه ده بيتكرر مليون مرة
وتقوليله اللى بيضايقك
ويعتذر
ويرجع يعملها تانى
ده يبقي اسمه ايه ؟؟ اسامحه كل مرة بردو عشان صادق فى اعتذاره ؟
وممكن يكون مش صادق
يمكن يكون بيقول كدة عشان اعامله كويس ومش اخاصمه وخلاص .. صح ؟
وعارف انى عبيطة وطيبة وبسامح بمجرد انى اشوفه او اشوفها ويقول دي بكلمتين هيتضحك عليها

هتقوليلي هو كلامى ده اللى بيخلينا مش بنطبق القواعد دي وهي دي توافه الامور ... بس بردو لازم نشوف اللى بيحصل فى الواقع

الكلام ده لو كلنا عملناه هنبقي ملايكة ... مش هنبقي بشر عالارض
وانتى لو ملاك .. اللى حواليكي لأ

طبقي الكلام بس من غير طيبة زيادة
من اللى بتضيع حق البنى ادم دي
كفاية طيبة ونقاء من اللى احنا مش عارفين نتعامل بيهم مع الناس دول

انتى قولتيهالى قبل كدة
احنا عايزين مكان فى المدينة الفاضلة :)

بعتذر عن طول التعليق :)

Arsenal Way يقول...

رائع موناليزا
الحقيقه الانسان لو عرف قيمة الحياة لعلم انها لا تستحق ان يتخاصم من اجلها اثنان
_______________
اما بالنسبه للأسئله:
أكتر مره خاصمت حد كانت اسبوعين تقريبا
أما لون قلبي فأعتقد انه علبة الوان
مره يكون ابيض مليء بالخير
واحيانا يكون اسود واصفر واخضر

(صندوق الدنيا) يقول...

أجمل شعور هو عندما نعفو عن الآخرين....لأننا نحبهم في الله
ونتنازل عن حقنا لنفرد مساحة من الود...تجمعنا
اللهم أجمعنا تحت ظل عرشك يوم لا ظل إلا ظلك
جزاك الله خيرا أختي

ahmed_k يقول...

والله يا أختي تلك النصائح
الكثير منا في أمس الحاجة لها
فالعلاقات الطيبه بين أفراد
المجتمع بتزيد من أواصره وقوته
فالمجتمع الذي يكثر فيه الإختلاف
يكون ضعيفا غير متماسك
لأنه بالضروري حالة الفرد مع إنتشارها بتعم جميع المجتمع.
بارك الله فيكي
وجزاكي خبرا

Hanan Elshafey يقول...

الجميله موناليزا
عندم حق اوي
ساعات بنخسر ناس قريبه
يمكن يكونوا احسن ناس قابلناهم
ساعات بنخسر بعض عشان حد فينا صريح
اكتر حاجه ممكن تزعلني من حد اني اكتشف انه بيستهتر بصداقتي ماهو الانسان لو مش عايزك ميتعاملش معاك انما نظام صداقة المصلحه ده بكرهه
اما اكتر مده زعلت من حد
تقريبا كانت شهر وشويه
من اعز صاحبه ليا
بس هي غلطت في نفسها وكان لازم تحس بغلطتها لكن بعد كده عرفت ان البعد مش هو الحل
اعذري تأخيري عليكي لكن امتحانات والله
الحمد لله خلصت
دمتي بين ايادي الله

dramaqueen يقول...

من اجمل البوستات اللى قريتها

بجد برافوووووووووووووو اوى

اكتر حاجة بتوجع ان الانسان يبعد عن اللى بيحبهم بسبب زعل ومش يقدر يرجع تانى

Gannah يقول...

السلام عليكم
انا الحقيقة مقدرش أخاصم حد أبدا
ولو حصل بكون فى غاية الضيق الا أن ينتهى الخصام باسرع وقت ممكن
لكن فعلا الظاهرة انتشرت وكويس قوى انك اتكلمتى فيها لأن اصلاح ذات البين مهم جدااا
أنا اكتر حاجة تضايقنى الكذب
وقلبى لونه ايه؟؟
عايزة اجابة من علم التشريح ولا علم النفس؟؟:)
تحياتى على البوست

موناليزا يقول...

مسدس صغير
ـــــــــــ
اهلا بيك يافندم
ربنا يكرمك واشكرك جدا لرايك
اخجلتم تواضعنا فماتوفيقى الا بالله
ربنا يوفقك دايما وتكون قدوة حسنة للاخرين
دمت طيبا ولمدونتى زائرا


*********************************


يوميات فنانة مفروسة جدا
ــــــــــــــــــــــــــــ
وعليكم السلام ورحمة الله وبركاته
بنوتى الجميلة:وحشتيييينى جدا ايه الغيبة دى كلها؟
انا الحمدلله بخير انتى عاملة ايه؟

لا ياقلبى مانسيتش بس انتى اللى ماكملتيهاش:) ربنا يسعدك ياسمسومة ياجميلة

ههههههه لا اطمنى ماوصلتش لشيزوفرينك ولا حاجة
بس تقدر تقولى انك بتعملى كده مع ناس وناس يعنى فى ناس من معزتهم الكبيرة عندك ممكن تنسى اصلا انك زعلانة منهم وفى ناس تانية مش فارقين معاكى فبتقفى ليهم على الواحدة.. مش كده برضه ولا تشخيصى غلط؟:)

اشكرك جدا لرايك ولمشاركتك
ربنا يكرمك ياحبيبتى ويهيئلك كل الخير
نورتينى ياسمين الجميلة ودمتى بكل الخير


**********************************


ابو على
ــــــــــــ
اهلا بيك يافندم
جميل تصنيفك للالوان وجديد كمان
اما عن التشبيه بالحيوان فاعتقد ان فيلم الكارتون"الملك الاسد" فيه كل الحاجات دى:)
بالاضافة الى ان برامج عالم الحيوان لاتخلو من هذه المعارك (يعنى التشبيه فى محله)
"الفلس الدينى"ما اشمله من مصطلح
ليتنا فعلا نسمو بروحنا ونتمسك بماهو ابقى
وهو يعنى لازم تكون صراحتك وقحة!!؟ ماتقول رايك بصراحة بس بأسلوب مغلف بالحب حتى يتقبله الطرف الاخر بصدر رحب ويسمع كلامك كمان(على فكرة دى وصفة مجربة)
اشكرك جدا على تحيتك الرقيقة ومشاركتك المميزة
دمت طيبا ولمدونتى زائرا


*********************************


ادم المصرى
ـــــــــــ
اهلا بيك استاذ ادم
اشكرك جدا لرايك ولمشاركتك
دمت طيبا ولمدونتى زائرا


**********************************


بنوتة
ـــــــــ
وعليكم السلام ورحمة الله وبركاته
اختى الحبيبة:اشكرك جدا لرايك
ربنا يهديهم ويرجعوا تانى لبعض بس تعرفى ساعة الزعل كل طرف بيقول كلام وحش عن التانى حتى لو مش فيه وبكده الموضوع بيبقى اصعب وعشان كده ياريت نمسك لساننا شوية لمانكون زعلانين ومانغلطش فى حد
فعلا موقف يضايق بس تعرفى اللوم على صحبتك اللى مابتعرفكوش على بعض
اشكرك جدا لمشاركتك
نورتينى حبيبتى ودمتى بخير


**********************************


رومانسى
ـــــــــــ
اهلا بيك يافندم
طيب مايروح يصالحه بما انه زعلان انه زعله
وبعدين بدل بيحبه اوى كده يزعله ليه من الاول؟؟؟

دمت طيبا ولمدونتى زائرا


**********************************


اخر العنقود
ــــــــــــــــــ
اختى الحبيبة:ربنا يخليكى ماتحرمش منك ابدا ياجميلة
عشان انتى طيبة وقلبك ابيض:)
فعلا صعبة جدا تكونى مصدقة حد وفى الاخر يطلع كذاب
اشكرك جدا لرايك ولمشاركتك
نورتينى حبيبتى ودمتى بخير


********************************



ونا بى فيزيائى
ـــــــــــــــــ
اهلا بيك يادكتور
ياااه دى بقى بتبقى ضربة قاضية
ربنا مايجيب خصام ابدا بينك وبين اى عزيز عليك
اشكرك لمشاركتك
دمت طيبا ولمدونتى زائرا


**********************************



كيمت
ــــــــ
وعليكم السلام ورحمة الله وبركاته
اختى الحبيبة: اشكرك جدا فماتوفيقى الا بالله
حبيبتى دى رخصة ربانية ومين عارف مش يمكن مايزعلوش تانى من بعض ويكونوا قدروا قيمة بعض لما بعدوا شوية
فيه اوقات كتيرة الشيطان مابيديش فرصة للصلح وعشان كده بيبقى لازم يكون موجود طرف تالت عاقل بيحب الاتنين ومش عايزهم يبعدوا عن بعض وبدل ماينقل كلام وحش على لسان اى حد فيهم للتانى يقول من عنده كلام كويس
ويساعد فى الوصل مرة اخرى

اشكرك جدا لمشاركتك ولصراحتك فى الاجابة
نورتينى حبيبتى ودمتى بخير


***********************************



المعتصم
ــــــــــ
وعليكم السلام ورحمة الله وبركاته
اختى الحبيبة:ربنا يكرمك يارب ويبارك فيك كلامك ده على دماغى من فوق ويارب اكون قد الثقة دى
اللهم لاتؤاخذنى بمايقولون واغفر لى مالايعلمون واجعلنى خيرا مما يظنون

طيب ولو اللى عمل كده مثلا اخوك برضه هتكون نهاية المطاف؟
اشكرك جدا لرايك ولمشاركتك
دمت طيبا ولمدونتى زائرا



*********************************


وومن
ــــــــ
اختى الحبيبة:انا الحمدلله بخير اذيك انتى ياقمر
اللى يبيعنا مانشتريهوش
انا قصدى على اللى بينا وبينهم عشم وانتى متاكدة من معزتك عندهم
نورتينى حبيبتى ودمتى بخير


*********************************


ريمان
ــــــــــ
اختى الحبيبة:سبحان الله خير ياجميلة
وانتى كمان ياحبيبتى ويارب تكونى بخير
طبعا حاجة تضايق انا رأيى انك تعرفيهم ده او تكبرى دماغك:)
عارفة ياحبيبتى بس ماتخنقيهوش اوى ومش ذنبه ان لونه ابيض وان الناس اللى اتعامل معاهم كانوا عايزين يلونوه اسود
نورتينى حبيبتى ودمتى بخير


**********************************


nisanur
ـــــــــ
welcome my dear friend
i,m pleased to you,r visit to my blog


**********************************


روفى
ــــــــ
اختى الحبيبة:سلامتك غاليتى من اى جرح
ربنا يسعدك ويتقبل دعائك اللهم امين
ربنا يهديها يارب وترجعوا تانى لبعض
اشكرك جدا لمشاركتك
نورتينى حبيبتى وحفظك الرحمن دائما


**********************************


حازم سويلم
ــــــــــــ
اهلا بيك استاذ حازم
فعلا ربنا يهديه ويهدينا جميعا
وليتنا نعلم باننا جميعا اخوة
اشكرك جدا لمشاركتك
دمت طيبا ولمدونتى زائرا



**********************************


عاشقة الرومانسية
ــــــــــــــــــ
اختى الحبيبة:ربنا يكرمك واشكرك جدا لرايك ولمشاركتك فماتوفيقى الا بالله
نورتينى حبيبتى ودمتى بخير


*******************************



ستيتة حسب الله الحمش
ــــــــــــــــــــ
اختى الحبيبة:ربنا يكرمك اشكرك جدا فماتوفيقى الا بالله
سلامة قلبك من اى وجع ياجميلة
ومن هذه المواقف تظهر معادن من حولنا
المواجع والبطاطس دى وصفة تورتة جديدة ولا ايه هههههههه
وانتى كمان ياحبيبتى وحشتينى ووحشتنى مدونتك وجايالك قريب جدا حضرى كوباية شاى بلبن سخنة عشان نقرا بمزاج:)
نورتينى حبيبتى ودمتى بخير


**********************************



حاسوباتية
ــــــــــــ
اختى الحبيبة:جبتى الخلاصة .. ربنا يكرمك
نورتينى حبيبتى ودمتى بخير


******************************



عاشقة القمر
ـــــــــــ
اختى الحبيبة:لا تعتذرى ياجميلة المهم انك بخير
فعلا مواقف تضايق
ربنا يهدى الجميع
اشكرك جدا لمشاركتك
نورتينى حبيبتى ودمتى بخير


***********************************



صيدلانية طالعة نازلة
ــــــــــــــــــــ
اختى الحبيبة:ليتنا ندرك بان اعمارنا اقصر من ان تضيع فى الخصام بين الاحبة
اشكرك جدا لمشاركتك
نورتينى حبيبتى ودمتى بخير


**********************************


الربان
ــــــــــ
اهلا بيك يافندم
اشكرك جدا لرايك فماتوفيقى الا بالله
الله عليك
فعلا الشيطان هو اللى بيشجع على الخصام يبقى ليه نفرحه فينا ونبعد عن احكام الاسلام!
ربنا يعزك ويبارك فيك
اشكرك جدا لمشاركتك
دمت طيبا ولمدونتى زائرا


***********************************


بنت ابيها
ــــــــــــــ
اختى الحبيبة:اشكرك جدا لرايك ولمشاركتك
الله عليكى"وهم الكرامة" ياله من مصطلح معبر جدا
وكل واحد يقول استحالة انا اللى اعتذر الاول حتى لو كان هو اللى غلطان وتأخذه العزة بالاثم.. ربنا يهدى الجميع ويبعد عننا الكِبر
نورتينى حبيبتى ودمتى بخير


**********************************


عاشقة الحق وقاهرة الظلم
ـــــــــــــــــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير اذيك انتى ياجميلة؟
اشكرك جدا لرايك فماتوفيقى الا بالله
مش معنى ان قلبك يكون ابيض انك تكونى ملطشة وازنى الامور ياحبيبتى فالمؤمن القوى خير واحب الى الله من المؤمن الضعيف
اشكرك جدا لمشاركتك
نورتينى حبيبتى ودمتى بخير


**********************************


بسمة
ــــــــ
اختى الحبيبة:اهلا بيك فى زيارتك الاولى
اشكرك جدا لرايك والحمدلله الذى هدانى الى هذا
نورتى مدونتى واشكرك جدا لمشاركتك


**********************************


محمد غالية
ــــــــــــ
اهلا بيك استاذ محمد
جبت الخلاصة ربنا يكرمك
دمت طيبا ولمدونتى زائرا


***********************************


نهر الحب
ـــــــــ
وعليكم السلام ورحمة الله وبركاته
اختى الحبيبة:انا الحمدلله بخير اذيك انتى ياجميلة
اشكرك جدا لرايك
نورتينى حبيبتى ودمتى بخير


*********************************


ابو اسامة
ـــــــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك والحمدلله الذى هدانى الى هذا
ربنا يكرمك لمشاركتك ولاجابتك الصريحة
دمت طيبا ولمدونتى زائرا


*********************************


سلوى
ــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
نورتينى حبيبتى ودمتى بخير


**********************************


هذه حياتى
ــــــــــــ
وعليكم السلام ورحمة الله وبركاته
اهلا بيك يافندم
اشكرك جدا لهذا الاطراء الجميل فما توفيقى الا بالله
دمت طيبا ولمدونتى زائرا


********************************


كفاية طيبة
ـــــــــــــ
اختى الحبيبة:متهيألى يبقى كده بيستعبط وبيستغل طيبتى ولذلك لازم له وقفة
شوفتى ماقلتش توافه الامور ذى ماتوقعتى:)
بس انتى حلتيها فى الاخر نطبق الكلام من غير طيبة زيادة
فعلا غاليتى البشر هم من يسكنون الارض واسم مدونتك خير دليل:)
لا تعتذرى على الاطالة (هى فين الاطالة دى)خدى راحتك المدونة وصاحبة المدونة مبسوطين بتعليقك:)
نورتينى حبيبتى ودمتى بخير


**********************************


مصطفى ابو زيد
ــــــــــــــــ
اهلا بيك استاذ مصطفى
صح جدا بس ده لو علم بالفعل
اشكرك جدا على مشاركتك واجابتك بس لسة سؤال على فكرة ماجاوبتوش
ايه اكتر حاجة ممكن تزعلك؟
دمت طيبا ولمدونتى زائرا


*********************************


ام البنين
ـــــــــــ
اختى الحبيبة:العفو عند المقدرة من اخلاق النبلاء.. النبلاء فقط
اشكرك جدا لمشاركتك
نورتينى حبيبتى ودمتى بخير


**********************************


احمد-ك
ـــــــــ
اهلا بيك استاذ احمد
ما اجمل اضافتك واسمحلى ساضيفها للموضوع
اشكرك جدا لمشاركتك
دمت طيبا ولمدونتى زائرا


*********************************


حنان الشافعى
ـــــــــــــــ
اختى الحبيبة:اذيك ياجميلة عملتى ايه فى الامتحانات؟ ربنا ينجحك يارب
صح ياحبيبتى صداقة المصلحة دى ماتعتبرش صداقة من اصله
يارب مايبقى فيه خصام تانى ابدا مع اى حد بتحبيه
اشكرك جدا لمشاركتك
نورتينى حبيبتى ودمتى بخير


********************************


دراما كوين
ـــــــــــــ
اختى الحبيبة:اشكرك جدا لرايك والحمدلله الذى هدانى الى هذا
اشكرك لمشاركتك
نورتينى حبيبتى ودمتى بخير


*********************************


جنة
ــــــــ
وعليكم السلام ورحمة الله وبركاته
اختى الحبيبة:اهلا اهلا بجنتى الجميلة
اشكرك جدا لمشاركتك
:)ايوة كده ورينا شغل الدكاترة
لا ياستى عايزاه تبع رؤيتك الخاصة
مش ده يبقى تبع علم البصريات برضه ولا انا كده روحت فى حتى تانية؟:) ولو انى عارفة لونه من غير ماتقولى :)
نورتينى حبيبتى ودمتى بكل الخير

Dr. Ibrahim يقول...

والله بتفكرينى حضرتك

بقصة جميلة خلاصتها

ان انا نكتب االمواقف الجميلة بينا كأصحاب على الحجر او الصخر فأن هذه الأشياء لا يمحوها الزمن
ونكتب على ما يدور مابيننا من أشياء
سيئة على الرمل فالرياح دوماً ستأتى لتزيله فلا يبقى منه شىء

ربنا يبارك فى حضرتك....

mohra يقول...

بنحاول يا موناليزا و ده نوع من جهاد النفس
تحياتى و مودتى

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمه موناليزا
تحياتى
اولا ياريت تبقى تركزى انا مش اختى الحبيبة (احنا صعايده عيب)
ثانيا اكيد اخواتى مش هيبقو عاوزين يستغلونى وبعدين مين قالك انى مازعلتش من حد فيهم !!!!!
انا مرة قعدت مخاصم اخويا الكبير اكتر من شهر لغاية ماجه صالحنى
بس الموقف ساعتها كان يجرح قووووووى
صحيح اتصالحنا بعد كده انما هو دلوقتى بياخد باله كويس وهو بيتعامل معايا علشان الموقف ده مايتكررش تانى
تقبلى مرورى
ودمتى بكل خير وود
والسلام عليكم ورحمة الله وبركاته

حياتى نغم يقول...

نصائح طيبه لو الناس تمسكت بها لأصبح العالم جميلاً ، أكثر ما يزعجنى قلة الإحترام ، وعن الخصام لاأعرف الخصام ولكن أعرف التجنب ، والقلب أحواله كثيره والسبب هما الناس فيه ناس لا يصلح معها القلب الطيب .

موناليزا يقول...

د/ابراهيم
ـــــــــــ
اهلا بيك يادكتور
اشكرك جدا على مشاركتك واسمحلى اضيفها للموضوع
دمت طيبا ولمدونتى زائرا


***********************************


مهرة
ــــــــ
اختى الحبيبة:فعلا جهاد بس كله يهون لانه فرض علينا عدم الخصام لاكثر من 3 ليال
ربنا يقدرنا جميعا
نورتينى حبيبتى ودمتى بخير


*********************************


المعتصم
ــــــــــ
وعليكم السلام ورحمة الله وبركاته
اهلا بيك يافندم
اولا :انا اسفة جدا(وش مكسوف) غلطة مطبعية غير مقصودة فارجو المعذرة:)
ثانيا: اخترت علاقة الاخوة لانها من اقوى العلاقات والتى اردت ان تكون علاقتنا بجميع من حولنا مثلها "اليس المؤمنون اخوة"
شهر بحاله!!
بس الحمدلله انكوا اتصالحتوا ويارب مايكون فيه خصام تانى ابدا مع اى حد بتحبه
اشكرك جدا لمتابعتك
دمت طيبا ولمدونتى زائرا


*********************************


حياتى نغم
ـــــــــــ
اختى الحبيبة:اشكرك جدا لرايك وارجو ان نطبقها جميعا
حتى التجنب ياجميلة المفروض مايبقاش فيه تجريح واهانة لكن مايحدث هو النقيض تماما
نورتينى حبيبتى واشكرك جدا لمشاركتك

كلنا مقاومة يقول...

السلام عليكم

التطرف في الحب خطير مثل التطرف في الكراهية فكل شىء زاد عن حده انقلب الى ضده فيجب ترك مساحة صغيره لاحتمالية الكراهية بعد حب واحتمالية الحب بعد كراهية

فسبحان مقلب القلوب

غير معرف يقول...

بصراحة مش دايماً بيكون ابيض
اعترف انه في اوقات بيكون اسود

في النهاية احنا بشر و أكيد في حاجات مش من السهل تتمحى او نسامح فيها

بس بنحاول على قد ما نقدر

موضوع جميل

nado يقول...

ياريت الناس بجد ترجع تانى تحس ببعض ومانحاولش نجرح بعض وبجد عندك حق لو كل واحد زعلت منه فى لحظة غضب حاول تفتكر حاجه حلوه عاملها بجد هتلقى مواقف كتير بجد... جميل قوى ان الواحد وهو تايهه فى الدينا يشوف ايد بتوصله للبر بر النجاه
دومتى صدوقه
تحياتى

حواء يقول...

السلام عليكم
ازيك ياموناليزا وحشاني جدا والله
البوست بتاعك ده تحففففففففه تحفه بكل المقاييس
انا قريت كل البوستات اللي فاتتني عندك
بس فيه بوست علق معايا ومش عارفه انتي بتتكلمي علي نفسك ولا بتتكلمي علي حد غيرك
طبعا لما تبقي تفتكري انك معاكي ايميلي وضفيني هنبقي نتناقش في موضوع البوست اللي شاغلني
تحياتي ياعسل

موناليزا يقول...

كلنا مقاومة
ــــــــــــــ
وعليكم السلام ورحمة الله وبركاته
اهلا وسهلا
عندك حق
سبحان الله فعلا
نورت مدونتى واشكرك جدا لمشاركتك


----------------------------------


كيتشب
ــــــــــ
اهلا بيك يافندم
اشكرك جدا لرايك ولمشاركتك الصريحة
دمت طيبا ولمدونتى زائرا


********************************


نادو
ــــــ
اختى الحبيبة:اهلا اهلا فينك من زمان ياجميلة يارب تكونى بخير
نورتينى حبيبتى واشكرك جدا لمشاركتك


*******************************


زوجة
ـــــــــ
وعليكم السلام ورحمة الله وبركاته
اختى الحبيبة:انا الحمدلله بخير اذيك انتى يا ام فاطمة
اشكرك جدا لرايك ومبسوطة انك قرأتى موضوعاتى السابقة ويارب تكون عجبتك:)
طب كنتى قوليلى اسمه ايه؟
ايميلك ياحبيبتى انا ضايفاه عندى من يومها بس انتى لسه ماقبلتيش الاضافة
نورتينى ياجميلة ودمتى بخير

zOzO يقول...

الله عليكي
بجد بتعجبني مواضيعك
عاقله اوي
ومن الحياه
تسلم ايديك
ووحشااااااااااني اوي
الحمد لله خصلت انا شوفت تعليقك عندي دلوقت بس انا علي البلوج هنا قبل ما اشوفه
سبحان الله بجد
القلوب عند بعضها
هههههههههههههههههههههه

غير معرف يقول...

ما يبقاش قلبك اسود؟؟؟؟؟؟؟؟؟؟

نفسي يا مونمون

انا بزعل ومش بقول لحد اني زعلت منه
وافضل زعلانة زعلانة زعلانة واهدى لوحدي وارجع تاني بس اكيد مش زي الاول ومش عارفة اتغير خالص

:(

مها ميهوووو

KHALED يقول...

أكتر حاجة ممكن تزعلنى من حد إنة يكون واحشنى و نفسى اشوفة و أنا ولا على بالة .......

أنا قلبى لونة فحلقى

ههههههه

عاشــــــ النقاب ـقــــة"نونو" يقول...

جزاك الله خيرا
ياريت نرجع لمنهج ديننا
حتى ان حديث الخصام مش بس هو اللي بيدعو لنبذ الخصام
فيه كمان لا يؤمن احدكم حتى يحب لاخيه ما يحب لنفسه
فكرك لوطبقناه هتكون الدنيا ازاي
بارك الله في ابداعاتك
تحياتي

موناليزا يقول...

زوزو
ـــــــ
اختى الحبيبة:اهلا اهلا بالقمر وحشتييينى جدا ويارب تكونى وفقتى فى اداء الامتحانات..عايزينك ترفعى راسنا بتقدير محترم:)

ربنا يكرمك ياحبيبتى فماتوفيقى الا بالله
نورتينى زوزو الجميلة ودمتى بخير


***********************************


احسن تستاهل
ــــــــــــــ
اختى الحبيبة:ايه رايك لما تجربى العتاب؟
مش يمكن تكونى بتزعلى من حاجات الطرف التانى مش عارف اصلا انها بتزعلك

نورتينى مهماميهو الجميلة ودمتى بخير


*********************************


خالد
ـــــــ
اهلا بيك استاذ خالد
مش يمكن يكون عذره قوى او مش عارف ان دى حاجة مهمة بالنسبة لك
أقولك ماتبدأ وتروحله انت:)
فحلقى يافنان ياكبير هههههه ده اللى هو لونه ايه يعنى:)
اشكرك جدا لمشاركتك
دمت طيبا ولمدونتى زائرا


**********************************


عاشقة النقاب
ـــــــــــــــــ
اختى الحبيبة: ربنا يكرمك واشكرك جدا لرايك ولمشاركتك
يااه لو طبقنا شرع الله لاصبحت الدنيا جنة
نورتينى حبيبتى ودمتى بخير

منى يقول...

تعرفى يا موناليزا بحس وانا عندك انى بتعلم كتير وبسال نفسى اساله كتير اوى
وبحس ان ربنا بيجعل منك كتير سبب يردنى
لنفسى
يا رب نتحرمش من وجودك فى حياتى ابدا
وغيابى دايما بيكون غصب عنى
كل التحيه والحب والاحترام
واطيب الدعوات

حاول تفتكرنى يقول...

يعجبنى جدا الاسئلة التي تدور بين الذات ، فإن قمنا بسئُلها ، سيكون تأثيرها اقوي بكثير من ملايين الكلمات الموجهة من الغير

لا داعي لتكرار الإشادة بموضوعاتك ، يكفي أنها موجهة لهدف ، وتصلنا فى كل الاحوال ونحاول فيها

تحياتي

موناليزا يقول...

منى
ــــــ
اختى الحبيبة:ربنا يكرمك يارب فماتوفيقى الا بالله
اللهم لاتؤاخذنى بمايقولون واغفر لى مالايعلمون واجعلنى خيرا مما يظنون
ربنا يسعدك ياحبيبتى ويهيئلك كل الخير ويوفقك فى حياتك اللهم امين


********************************


حاول تفتكرنى
ـــــــــــــ
اهلا بيك يافندم
ربنا يكرمك فماتوفيقى الا بالله
اشكرك جدا لمشاركتك
دمت طيبا ولمدونتى زائرا

الازهرى يقول...

الموضوع جميل
والنصائح اجمل

الاسف لا يكون ثقيلا الا على المعاندين
وبانتشارهم انتشر الشقاق واتسع الخلاف

والحل بسيط ان نقبل باننا نخطىء
والامام الشافعى يقول
رأيى صواب يحتمل الخطأ ورأى الناس خطأ يحتمل الصواب

اكتر حاجة ممكن تزعلنى من انسان
ان يأتى ما يجعلنى افقد ثقتى به

ولا اذكر بالفعل اكثر مرة خاصمت فيها انسان
فالمرات قليلة ولكن للحق انا اسامح كثيرا ولكن غضبتى عنيفة للغاية حتى اننى اكثر من يخاف منها

لون قلبى ؟
صعب اعرف لكن انا بحب كل الناس ومعاملتى معاهم كويسة ولله الحمد لدى الكثير من الاصحاب

تحياتى دوما

Fantastic يقول...

اذا انتهت العلاقة بينك وبين أحد كانت تربطك به علاقة من أى نوع اجعل مابينكما هو الاحترام المتبادل ولا تكون كالمنافق الذى إذا خاصم فجر.

انا متفقه معاكى ف الجزء ده جدا
احييكى على البوست ده:)

ELMASRYA - MRS WRITER يقول...

السلام عليكم ورحمة الله وبركاته

إيه الجمال ده يا موناليزا ؟

مدونتك أكثر من رائعة

ماشاء الله لا قوة إلا بالله

ربنا يبارك فيكي ويجزيكي خير على كم الأحاديث الشريفة اللي حاطاها على هامش المدونة

بالإضافة إلى الكلمات والنصائح النافعة

ده أول موضوع أقراه ليكي وواضح إنك عايزة وقت كبير أتفرغ فيه لقراءة كل ماكتبتيه

استمري على بركة الله ولا توقفي أي كلمة نافعة ممكن أن تفيد غيرك

طريقتك في كتابة الموضوع مرتبة جدا ومنظمة لأنك لم تتركي جزئية متعلقة بيه لم تذكريها

ما شاء الله عليكي

كلامك عن العلاقة التي تنقطع بسهولة بين الناس بعد الود والعشرة صحيح تماما ويحدث كثيرا وليس له أسباب منطقية

ربنا يهدينا جميعا ويبعث في نفوسنا السكينة وينعم علينا بالقدرة على استعمال المنطق والعقل في ردود أفعالنا وفي تصرفاتنا

سوف أضيفك إلى مدوناتي وأقوم بمتابعتك بإذن الله

على فكرو يا موناليزا أنا عندي 15 مدونة

ماتتخضيش كل واحدة منهم متخصصة في موضوع معين ومش بكتب فيها من بنات أفكاري

لكن اللي بكتبلك منها دي هي اللي هقوم بالتدوين فيها بنفسي

ادعيلي أقدر أعقدم شيء نافع مفيد لمن حولي ينفعني في حياتي وبعد مماتي

خالص مودتي

و...تــحــيــاتــي

مجلة الأم الصغيرة يقول...

جزاك الله كل خير على النصائح الراقية

و أضيف لك جملة لخيري رمضان :

لذة الانتقام لا تدوم سوى لحظة .. و لكن الرضا الذي يوفره العفو يدوم إلى الأبد

ملكة في بيتي يقول...

السلام عليكم ورحمة الله وبركاته

احييكي على هذه التدوينة الجميلة

واسجل متابعة لمدونتك الرائعة

اما بالنسبة لسؤالك

بصراحة ما سالتش نفسي قبل كده اكتر حجة تزعلني من حد ايه

بس اعتقد الكدب

ماحبهوش ابدا

وبالنسبة للخصام انا ما بخاصمش حد

وببئى صريحة مع اللي قدامي وخصوصا لو باقية عليه

بس مش في لحظتها

بمعنى لو حصل منه موقف ضايقني بصبر لما اهدى لاني لو اتكلمت ساعتها ممكن اندفع واتهور وما ببقاش مسيطرة على كلامي قد كده فممكن ساعتها نزعل من بعض بجد والموضوع يكبر

فبستنى لما اهدى وبعدين اصارحه

وعموما انا بهدى بسرعة يعني في نفس اليوم او اليوم اللي بعده بالكتير بتلاقي الموضوع خلص فما اضطرتش اخاصم احد

والسؤال الاخير بئى

بيني وبين نفسي :)

تحياتي

Fahd يقول...

هو سؤال بس هي التدونية دي مقصود بها حد معين

ولا بريئة

علي العموم هي نصائح جميلة
بس غضب عني ضحكت لما قرات النصيحة دي

إعلم بأن جرح السكين يلتئم أما جرح اللسان لأ فكن على حذر

هو ده فصحي ولا عامية

بارك الله فيكي

موناليزا يقول...

الازهرى
ـــــــــ
اهلا بيك يافندم
اشكرك جدا لرايك ربنا يكرمك فماتوفيقى الا بالله
فعلا تجد كثيرين يعتقدون بأنهم لا يخطأوا أبدا حتى لو الخطأ واضح ولكنهم يرفضون الاعتراف بذلك وكأنها جريمة!
اشكرك جدا لمشاركتك ولاجابتك
دمت طيبا ولمدونتى زائرا


*********************************


فانتاستيك
ــــــــــــ
اختى الحبيبة:اهلا بيكى فى زيارتك الاولى
اشكرك جدا لرايك ولمشاركتك
نورتى مدونتى وارجو دوام التواصل


*********************************


أنت تسأل والكمبيوتر يجيب
ـــــــــــــــــــــــــ
اهلا وسهلا
دعوة مقبولة
نشكركم عليها


***********************************


مس رايتر
ـــــــــ
وعليكم السلام ورحمة الله وبركاته
اختى الحبيبة:اهلا بيكى فى زيارتك الاولى
الله يكرمك يارب ده بس من ذوقك فماتوفيقى الا بالله
ربنا يسعدك كما اسعدتينى بتعليقك الجميل ورايك فى مدونتى والحمدلله فهذا من فضل ربى
اضافتك لمدونتى شئ يسعدنى
ماشاء الله 15 مدونة ربنا يزيد ويبارك ويجعلهم جميعا فى ميزان حسناتك
عايزة الروابط بتاعتهم:)
ربنا ينفع بيكى يارب ويستخدمنا لنصرة دينه اللهم امين
نورتى مدونتى واسعدتينى بزيارتك
واشكرك جدا لمشاركتك وفى انتظارك دائما


********************************


قطرات من شواطئ الحياة
ــــــــــــــــــــــ
اختى الحبيبة:ربنا يكرمك واشكرك جدا على مشاركتك القيمة
نورتينى حبيبتى ودمتى بخير


**********************************


ملكة فى بيتى
ــــــــــــ
وعليكم السلام ورحمة الله وبركاته
اختى الحبيبة:اهلا بيكى فى زيارتك الاولى
اشكرك جدا لرايك والحمدلله ان نالت مدونتى الاستحسان من جانبكم فهذا من فضل ربى
الله عليكى تعرفى ان ده احسن اسلوب لان عند الغضب الشيطان بيبقى موجود ويكبر الموضوع حتى لو كان حاجة صغيرة فجميل انك بتستنى لما تهدى .. ربنا يبارك فيكى
من اجابتك على فكرة قدرت اعرف لون قلبك ايه:)
نورتى مدونتى واشكرك جدا لمشاركتك وارجو دوام التواصل


********************************


فهد
ــــــــ
اهلا بيك استاذ فهد
كان ممكن اجاوبك لو كنت لقيتك جاوبت على اسئلتى
اشكرك جدا لرايك
ومش عارفة بجد ايه اللى يضحك فى الجملة دى!
واذا كان على استفسارك اذا كانت فصحى ولا عامية فأحب اعرف أنت شايفها ايه؟
دمت طيبا ولمدونتى زائرا

عايش... ولكن !!!! يقول...

حلوه النصائح برغم ان محتاجه مجاهده للنفس علشان نحققها
دى طبيعة النفس البشريه التعالى وان يكون اتقل كلمه على لسانها "انا اسف"
اما عن السؤال فمفتكرش انى خاصمت حد انا لو زعلان من حد بقوله فى وشه حتى لو فيها قلة زوق بس الصراحه احسن شىء ولو فى زعل ع الاقل بلقى السلام عليه
ربنا يجازيكى خير يارب

oRiGiNaL HeArT يقول...

لسة متخانقة مع انتيمتى النهاردة
مش عارفة ليه
بس هى زعلتنى اوى
ومكنتش بفكر اكلمها كام يوم كدة
بيتهيئلى هروح اتصل بيها دلوقتى :)

محمد عبد الباسط يقول...

بارك الله فيكى اختى الكريمة على كلامك ومشاعرك ونصائحك الغالية
كلامك رائع لكنها النفس تودى بصاحبها حتى الهلاك
اسال الله ان يزيل من بين قلوب امتنا الحقد والضغينة وان يجعلنا اخوانا خالصين لوجهه

شرفنى زيارتك لمدونتى المتواضعة

تقبلوا تحياتى
حلم كبير

سلوى يقول...

كل ما كان الشخص اللي جرحك أو زعلك قريب من قلبك
فبيكون الجرح صعب يتنسي

مش بتكلم على شئ الزعل بسبب شئ تافه
زي ما ناس كتير بتعمل
بتكلم عن الجرح اللي بجد

جميله الأسطر اللي ختمتي بها
ربنا يحفظك موناليزتي

موناليزا يقول...

عايش ولكن
ــــــــــ
اهلا بيك يافندم
اشكرك جدا لرايك ولمشاركتك
دمت طيبا ولمدونتى زائرا


*********************************


اوريجينال هيرت
ـــــــــــــــ
اختى الحبيبة:والله فرحتينى انك هتكلميها ايوة كده خيركم من يبدأ بالسلام :)
ربنا يسعدك ومايبقاش فيه خصام تانى ابدا مع اى حد بتحبيه
نورتينى حبيبتى ودمتى بخير


*********************************


محمد عبد الباسط
ــــــــــــــــــ
اهلا بيك استاذ محمد فى زيارتك الاولى
ربنا يكرمك واشكرك جدا لرايك ولمشاركتك
نورت مدونتى وارجو دوام التواصل


***********************************


سلوى
ــــــــ
اختى الحبيبة:دى حقيقة فعلا محدش بينجرح اوى غير لما يكون بيحب اوى
اشكرك جدا لرايك ولمشاركتك
نورتينى سلوتى الجميلة ودمتى بكل الخير

dr_samarmar يقول...

جميل جميل جميل جدا الموضوع دا

و غاية فى الأهمية

لازم نتخلى عما نسميه الكرامة قصاد الأخوة الغالية فى الله
و نتنازل بقدر المستطاع

و دا أكيد بيكون ليه أثره فيما بعد دا غير ثواب ربنا الكبير

تحياتى :)

ماء تشرين يقول...

اصعب حاجه تحس انك بيجي عليك اعز الناس انا قلبي للاسف اسود لانى بفضل بقيه لاخر الوقت بس لما بقلب ببعد وبنهى الصداقه مش عارفه ده صح ولا غلط على فكره ياريت بجد تقوليلى لانو مش عارفه ده حرام ولا لا انا بعدت لانى مقدرتش استحمل انو تكون علاقه الصداقه مصالح وبس صعب اوى
موضوع جامد اشكرك على طرحه

حـــــدوتـــــة يقول...

السلام عليكم

الصراحة انتى جيتى على الجرح
لان من اكتر العيوب اللى فيا واللى نفسى اتخلص منها
هى ان قلبى اسود بمعنى انى مبنساش حاجة لحد
وعلى فكرة يمكن انا الوحيد اللى فى اصحابى اللى نادرا لما بزعل من حد منهم
عشان هما عارفين انى بعدى مرة واتنين وتلاتة لكن لما ازعل من حد بجيب القديم والجديد وانهى العلاقة معاه خالص والى الابد

سلالالالالالالالالالالالالالالالالالالالالالالام

موناليزا يقول...

د/سمرمر
ـــــــــ
اختى الحبيبة:اهلا بيكى فى زيارتك الاولى
اشكرك جدا لرايك ولمشاركتك
نورتى مدونتى وارجو دوام التواصل


***********************************


ماء تشرين
ــــــــــــ
اختى الحبيبة:لست اهلا للفتوى
ولكنى اعتقد ان فى هذه الحالة يفضل ان تكون العلاقة محدودة يعنى مانهيش العلاقة نهائيا ولكنى اتعامل فى حدود
ولو حصل وتجنبتى شخص فليظل الاحترام بينكما
هذا وبالله التوفيق
اشكرك جدا لمشاركتك
نورتينى حبيبتى ودمتى بخير


**********************************


حدوتة
ـــــــــ
وعليكم السلام ورحمة الله وبركاته
اهلا بيك يافندم
عاجبنى صراحتك اوى وجميل انك عارف ان ده عيب
اشكرك جدا لمشاركتك
دمت طيبا ولمدونتى زائرا

elsha3er يقول...

جزاكى الله خيرا على هذة النصائح




احمد الشاعر

Unknown يقول...

السلام عليكم ورحمة الله وبركاتة
كيف حالك يا موناليزا؟
يارب تكونى فى افضل حال
والله يا اختى انا معاكى فى كل كلمة كتبتيها
لان انا من نوع الناس اللى مش بعرف انم وفى حد زعلانة منة او مزعلاة
فالو كل الناس عملت بالنصايح دى
انا اكتر واحدة هرتاح
جزاكى الله خيرا على البوست
وجعلة الله فى ميزان حسناتك
دمتى بالف ود

fL0weR-giRL يقول...

السلام عليكم
اكتر حاجة من رأي بتخلي الناس تشيل من بعض الخصام
اي اتنين بيتخاصموا كل شخص منهم بيعتقد انه هو المحق وان الشخص الأخر هو الي عليه كل الأخطاء فعلا الأنسان لازم يعرف يسامح عشان يقدر يعيش
لأن كل واحد ليه شخصينه وممكن انسان يكون فيه صفه هو عجباه لكن من شخص اخر تكون هذه الصفه لا تحتمل ولذلك تحدث الخلفات عشان كدا ربنا سبحانه وتعالي امرنا ان احنا دئما نكون متحابين ومتسامحين فقال الله تعالي:
(ولاتستوي الحسنه ولا السيئه ادفع بالتي هي احسن فاذا الذي بينك وبينه عدوه كأنه ولي حميم))

وشكرا لكي فعلا موضوع حلو كتير وبيحصل كتير


اتمني زيارة مدونتي المتواضعه

ولكي كل الشكر والأحترام :)

الوردة البيضا يقول...

السلام عليكم يا أمة الله
أولا أشكرك على زيارتك الجميلة لمدونتي المتواضعة وأعتذر لتأخري في رد الزيارة... مشاغل والله
ثانيا : أحييك جدا على موضوع البوست وأتفق معك في كل كلمة كتبتيها، وعن نفسي فأنا والحمد لله صاحبة قلب أبيض من اللبن الحليب، ولا أستطيع أن أخاصم أحدا مهما فعل -وأعني ما أقول - وحتى إن أساء لي أحدهم فيكفي أن يبتسم من أساء إلي عندما يراني، لأانسى كل ما حدث وأبادله أو أبادلها الابتسام وكأن شيئا لم يكن.
تحياتي وتمنياتي لك بالتوفيق
وجزاك الله خيرا على هذا الموضوع الجميل

salma mohamed يقول...

السلام عليكم
بوركت يداك,
كلامك في منتهى الروعة والصدق,وياريت كل الناس تعمل بيه,
وكمان ياريت الناس تتذكر ان الرسول صلى الله عليه وسلم طلب مننا ان نجد سبعين عذر لما حد يغلط في حقنا,
ومننساش ان ربنا بيحب العفو عند المقدرة وان اسم العفو من اسماء الله الحسنى,ومننساش ان الدين المعاملة,
حاجات كتير لو الواحد خلاها في باله عمره ما هيغلط في حق حد ولا هيزعل ويشيل من حد,
وياريت نخلي شعارنا
صل من قطعك واعط من حرمك واعفو عمن ظلمك تنل رضا ربك وتفز بجنته.

تيوليب يقول...

فعلا نصائح جميلة جدا ربنا يكرمك عليها

موناليزا يقول...

الشاعر
ـــــــــ
اهلا بيك استاذ احمد
ربنايكرمك اشكرك جدا
دمت طيبا ولمدونتى زائرا


*********************************


حتى تشرق الشمس
ــــــــــــــ
وعليكم السلام ورحمة الله وبركاته
اختى الحبيبة:انا الحمد لله بخير اذيك انتى ياجميلة
ربنا يكرمك ويبارك فيكى يا ام قلب ابيض
نورتينى حبيبتى ودمتى بخير


***********************************


فلور جيرل
ــــــــــــــ
وعليكم السلام ورحمة الله وبركاته
اختى الحبيبة:اهلا بيكى فى زيارتك الاولى
ياريت كلنا نفكر كده
انا اللى بشكرك على تعليقك الجميل ومشاركتك الاجمل
نورتى مدونتى ويسعدنى زيارتك


**********************************


الوردة البيضا
ـــــــــــــــ
وعليكم السلام ورحمة الله وبركاته
اختى الحبيبة:ولا يهمك المهم انك جيتى واسعدتينى بزيارتك
ربنا يكرمك ويبارك فيكى ياصاحبة القلب الابيض:)
نورتينى حبيبتى ودمتى بخير


***********************************


سلمى محمد
ــــــــــ
وعليكم السلام ورحمة الله وبركاته
اختى الحبيبة:اهلا بيكى فى زيارتك الاولى
الله عليكى وعلى تعليقك الجميل
اشكرك جدا لمشاركتك
نورتى مدونتى وارجو دوام التواصل


*********************************



تيوليب
ــــــــــ
اختى الحبيبة:اهلا بيكى فى زيارتك الاولى
اشكرك جدا لرايك ولمشاركتك
نورتى مدونتى وارجو دوام التواصل

بستان الحب يقول...

اهم شىء ان نزن الحدث بميزان الشرع واسال نفسى هل مافعله الشخص الاخر يغضب المولى عز وجل ؟هنا لابد ان اغضب اما اذا كان الموضوع فيه حظ للنفس وانتصار لها هنا لابد ان اسامح واعفو واصفح جزاكم الله خيرا تدوينه رائعه

طوبه فضه وطوبه دهب يقول...

عارفه بجد كلامك جميل اوى وفى مكانه اوى اوى عارفه بقى اصعب شىء فى الدنيا ايه لما حد يكون عزيز عليكى اوى وتختلفوا مع بعض وبدل مايقولك ربنا يسامحك ويسهلك ويوفقك يقلك منك لله تفتكرى توجع ولا لا هى دى الصداقه وهم دول الصحاب تسلم ايدك

zainab يقول...

بجد يا موناليزا البوست ده جميل جدا

مش عارفه ليه الخصام و الزعل كتر ماعدش حد طايق حد و الظلم انتشر و الحياة بقت صعبه

يارب اللهم اجعلنى من المتسامحين و اجعل عبادك من المتسامحين

جزاك الله خيرا

TAMTAM يقول...

كلام حضرتك صح جدا
المفروض نسمع كل كلمه الرسول عليه الصلاة والسلام قالها
اهم حاجه علاقتنا تكون طيبه بالناس
واظن المفتاح في الكلمه الطيبه
اتمني حضرتك تيجي تزوري مدونتي
قريب يا رب

اوعى تفكر يقول...

جزاكم الله خيرا
على تلك النصائح

زى الهوا يقول...

كلام جميل ونصائح غالية من مدونة غالية , ربنا يباركلك يابنتى ويجعله فى ميزان حسناتك

EMMY BABY يقول...

ربنا يكرمك يا موناليزا

مش عارفة اقلك ايه بس ياريتنى مكنت قريت الموضوع لانى منكرشى انى بعانى من موضوع الخصام فى الفترة دى مع صديقة بس انا علطول زى ما متعودة رحت صالحتها صدتنى حسيت بجرح كرامتى وقررت الابتعاد

ولكنى لا اشعر بالذنب لانى حاولت ولانى اصلا لم اخطىء من البداية بشهادة من حولنا ولكنى كما قلتى اتبعت قول رسولنا الكريم خيركم من بدأ بالسلام

ساعات كتير بنكون لازم نبعد عن اشخاص حتى لا نرتكب كثير من الاخطاء وحتى لا نتعرض لموقف يمكن ان يجرح نفوسنا

ومع ذلك بعد لما قريت الموضوع حاسة انى عايزة اصالحها لتالت مرة بس فى حاجة منعانى

تحياتى

ايمى

موناليزا يقول...

بستان الحب
ـــــــــــــ
اختى الحبيبة:نصيحة غالية جدا لايفعلها الا المتقين
اشكرك جدا لمشاركتك
نورتينى حبيبتى ودمتى بخير


**********************************


طوبة ذهب وطوبة فضة
ــــــــــــــــــــــ
اختى الحبيبة:حقا ان الكلمة الطيبة صدقة سواء كانت من صديق او غيره لانها بتدوم ويصعب نسيانها مهما كانت
ربنا يهدى نفوسنا جميعا
نورتينى حبيبتى ودمتى بخير


**********************************



زينب
ــــــــ
اختى الحبيبة:ربنا يكرمك
واشكرك جدا لرايك ولمشارتك وربنا يتقبل دعائك اللهم امين
نورتينى حبيبتى ودمتى بخير


*********************************


طمطم
ـــــــ
اختى الحبيبة:صح جدا الكلمة الطيبة مفتاح لكل الخير
نورتى مدونتى وتسعدنى زيارتك


**********************************



اوعى تفكر
ــــــــــــ
اهلا بيك يافندم
ربنا يكرمك
اشكرك جدا لمشاركتك
دمت طيبا ولمدونتى زائرا


*********************************



زى الهوا
ــــــــــ
اختى الحبيبة:اشكرك ياقمر على تعليقك الجميل ده
ربنا يكرمك
نورتينى حبيبتى ودمتى بخير


**********************************


ايمى بيبى
ـــــــــــ
اختى الحبيبة:واضح انك بتحبيها وصعبان عليكى صداقتكما ويابختها بيكى
اعرفى ياايمى ان الشيطان مش هيسكت وهيحاول يفرق بينكم دايما بس انتى خليكى اقوى منه واستنى عليها شوية لما تهدى والموقف يعدى لان واضح انها لسة متأثرة بيه وان شاء الله تتصالحوا وترجعوا لبعض تانى:)
نورتينى حبيبتى ودمتى بخير

د/ رامي شهاب الدين يقول...

موضوع رائع ونصائح غالية جدا جدا


لون قلبى أكيد طبعا زى كل البشر أحمر


أما الخطأ إللى لايغتفر هو الخيانة


دمتى بكل الود ..تحياتى

موناليزا يقول...

د/ رامى شهاب الدين
ــــــــــــــــــــــ
اهلا بيك يادكتور
اشكرك جدا لرايك ولمشاركتك
:)ده اجابة طبية على فكرة انا عايزاها نفسية
دمت طيبا ولمدونتى زائرا

Unknown يقول...

فعلاً موضوعكم حساس وملموس في حياتنا العمليه وانا اري ان الذي قلبه اسود ويظل حاقد علي اخوه لا يدخل الجنه قدر انمله