الاثنين، 16 فبراير 2009

جوجو و زمردة (2)

ذهبا جوجو وزمردة للعب فى حديقة المنزل وكالعادة يقوما بالجرى والتنطيط وتقليد أفلام الكارتون وفجأة.
- عاااااااااااا آه يارجلى.. الحقينى ياماما.. عاااااااااااا.
- خلاص بقى ماتعيطيش.. وطى صوتك - رغم إنزعاجه وقلقه على شقيقته ولكنه يحاول تهدئتها قدر المستطاع-.
- ماليش دعوة رجلى اتعورت وبتجيب دم وكمان بتوجعنى أوى عااااااااا.
-شوية والدم هيقف. ضعى المنديل ده عليها وهتبقى كويسة.
- ولو موقفش هقول لماما إيه دلؤتى؟.
- لأ إياكى تقولى لماما أنتى عارفة ماما بتقلق علينا وبتخاف علينا إزاى وممكن جداً تحرمنا من اللعب عشان تخاف تقعى تانى.
- طيب أعمل إيه دلؤتى؟.
- إيه رأيك لو قمتى وكملنا لعب عادى ولا كأن حاجة حصلت.
- ورجلى المتعورة دى أعمل فيها إيه.
- أنتى بس قومى وأول ماهتمشى ونبدأ نلعب هتنسى أنها بتوجعك وهتلاقى نفسك خفيتى خلاص.
- ولو ماما شافت رجلى .
- قوليلها إنك كويسة وهى تطمن عليكى.
- صح وهى يعنى ماما هتعمل إيه غير أنها هتحرمنى من اللعب. بدل ماتحاول تخففها هتزعقلى وخلاص.
- مش بقولّك يلا هاتى إيدك.
وقامت زمردة ليكملا لعبهما وكأن لم يحدث شئ.
-تمت-
-------------------
دعوة للمناقشة/
إذا تعرضت لجرح جسدى أو معنوى كيف تتعامل معه؟.
هل تطلب مساعدة الآخرين أم تعتمد على الزمن لمداواة الجرح؟.

هناك 63 تعليقًا:

Ahmed يقول...

في كثير من الأحيان يعتبر ططلب المساعده من الاخرين ضعف

وبعد فترة زمن يتحول الألم الى حكايه طريفه نحكيها للاخرين

الفراشة الصغيرة يقول...

انا من وجه نظرى
انا محدش يمسح دمعتك الا ايدك

علشان كده ممكن تسيبى الزمن
هو اللى يداوى جراحك
احسن ما تلجىء لحد
والاخر تحسى انه مش حاسس بيكى

لجين أبو الدهب يقول...

السلام عليكم ورحمة الله وبركاته ..

فى شكلين للجروح مادى ومعنوى زى ما ذكرتى ..

المادى طبعا علاجه عند الاطباء والشافى هو الله قبل اى شئ ..

والجرح المعنوى .. وده الاصعب ..

انا هاكلمك عن نفسى ..

احيانا بنمر بجروح ولازم نعتمد على الله عزوجل اولا وبعد كده البشر ..

حد يكون مقرب تحسى انك عايزه تفضفضيله وهو هايخفف عنك هايقف جنبك ..

ساعات بتبقى فى جروح مالهاش حل بس بيكون الانسان محتاج حد يطبطب عليه ويفكره برحمة ربنا عزوجل ويفكره ان فى حد فى الدنيا مهتم بأمره ومعاه ..

وساعات فى جروح ممكن تلجأى فيها لبشر ومش مقربين منك .. بس انتى عارفة ان الناس دى هى اللى عندها داوئك .. بتبقى عايزة استشارتهم ومحتاجة تسمعى كلامهم إما لكبر سنهم او مدى خبرتهم فى الحياة ..

وساعات فى جروح ودى الاصعب بتخليكى عاجزة عن اى كلام .. واللى بيخفف شوية ودموع منسابة على الخدين وبس ..
وبتفضلى الصمت لان لو اتكلمتى الجرح هايزيد ..
وده اكتر جرح بيقرب الانسان من ربنا بجد .. لان مش قادر يتكلم مع حد غيره .. ولانه عارف انه الوحيد القادر على اخراجه من الجرح ده ويخليه ينساه ..

وبيكون طعم الطاعة والتضرع لله عزوجل فى الفترة دى من اجمل ما يكون ..

الحبيبة موناليزا ..

جزاكِ الله خير على البوست ..

ربنا يبارك لك ويجعله فى ميزان حسناتك ..

دُمتِ بخير ..

حواء يقول...

ايه يابنتي
انتي دايما بتقري افكاري
وتكتبي البوست علي هذا الاساس
بجد انا ابتديت اشك فيكي ياموناليزا
كل متحصلي مشكله القيكي بتتكلمي عنها
انا كمان مجروحه ومجروحه من حد عزيز عليا اوي
والجرح جرح نفسي ومعنوي
بس انا هسيب الزمن يداوي الجرح

كفايـة طيبـة يقول...

إذا تعرضت لجرح جسدى أو معنوى كيف تتعامل معه؟.
هل تطلب مساعدة الآخرين أم تعتمد على الزمن لمداواة الجرح؟
----

هتفرق طبعا الجرح المعنوى من الجرح المادى

بس عندي الجرح المعنوى اعتقد انى لازم اقول لماما مش زي زمردة مقدرش اكتم فى نفسيتي D:

والجرح المعنوى مش هينفعك فيه ناس كتير
احنا لازم نداوى نفسنا بنفسنا حتى لو حكيتي لحد ...
فى الاخر مفيش حد غيرك هيداوى جرحك

الجرح المادى مش مهم بقي لو جامد هروح لدكتور لو مش جامد هحط مية ساقعة وبلاستر واخليه لغاية ما يخف وحده :)

و بس :)

ريمان يقول...

السلام عليكم

ازيك يا قمر

بصى

انا لو تعرضت لجرح جسدى بعالج نفسى بنفسى ولو الامر خطير شويه بطلب مساعده الاخرين طبعا


انما بقى الجرح المعنوى

ممممممم

بصى انا اما بتجرح الجرح المعنوى ببقى فى الاول قويه جدا وصلبه جدا لدرجه ان الناس بيتغربوا من صلابتى

بعد مرور وقت

الجرح بينزف وبعانى كتير اوى

وببدأ اكتشف ضعفى

لكن سرعان ما ابدأ اداوى جرحى

ولوحدى

بدون مساعده اى حد

Gannah يقول...

موناليزا
كل عام وانتى بخير
انا مكسوفه من نفسى جدااا
ازاى فاتنى احتفالك بمرور عام على المدونة
انا قريت بوست الاحتفال وعايزة اطمنك ان مدونتك من المدونات اللى بتذكر الناس بالله واعتقد ان ده اسمى هدف ممكن اى حد يحققه من التدوين
واشكرك لكلماتك عنى وانتى تعلمين كم لك من مكانه خاصة عندى
أما عن الجروح فالجسدية يجب طلب مساعدة الأخرين لان هذا من باب الأخذ بالاسباب وقد امرنا بطلب التداوى
قال رسول الله صلى الله عليه وسلم:
" تداووا عباد الله فما خلق الله داء الا خلق له دواء علمه من علمه وجهله من جهله"
أما الجروح المعنوية فأمرها مختلف لانك احيانا لا تجدين الدواء عند الناس ولا يكون الا من خالق النفوس الذى يقلب القلوب ويقدر على ان تضميد جراح النفس
الجراح المعنوية احيانا يكون علاجها صعب يتطلب الصبر والدعاء الذى هو خير دواء لها
أما الناس فأحيانا وعن غير قصد يزيدون من عمق الجرح
وقانا الله شر جروح النفس
تحياتى

الفراغ يقول...

السلام عليكم
كم من جراح شكوت منها
فلم اجد غير الدموع تداوينى
ولم اجد صدى لوجعى غير اهةبكل معانيها
ماحك ظهرك غير ظفرك فتول انت جميع امرك
حتى الوجع بيحسدونى عليه
دمتى فى امان الله

مسدس صغير يقول...

قصة حلوة اوى وخاصة عاااااااااااااا.
اما بقى اذا انا اتعرضت لجرح بصبر عليه وعمرى ما بعاتب ولا احتاج من حد يخفف عنى يمكن ده عيب بس ده انا ..

موناليزا يقول...

مهندس.أحمدابو العلا
ـــــــــــــــــــــ
اهلا بيك ياباشمهندس
صح جدا
اشكرك جدا لمشاركتك
دمت طيبا ولمدونتى زائرا


*********************************


الفراشة الصغيرة
ـــــــــــــــ
اختى الحبيبة:وجهة نظر تحترم طبعا لان هى دى الحقيقة
اشكرك جدا لمشاركتك
نورتينى حبيبتى ودمتى بخير


********************************


لجين ابو الدهب
ـــــــــــــــــ
وعليكم السلام ورحمة الله وبركاته
اختى الحبيبة:ما اجمل تعليقك ففيه تحليل عميق لكل مااردت قوله
ربنا يكرمك ويباركلك
اشكرك جدا لمشاركتك
نورتينى حبيبتى ودمتى بخير


**********************************


زوجة
ـــــــ
اختى الحبيبة:لاتنسى بأن احساس الانثى لايخيب:)
سلامتك ياام فاطمة من اى جرح
نورتينى حبيبتى ودمتى بخير


*********************************


كفاية طيبة
ـــــــــــــ
اختى الحبيبة:ربنا يخليهالك وتفضفضى لها دايما:)
جديدة بالنسبة لى حكاية وضع المية الساقعة على الجرح:)
اشكرك جدا لمشاركتك
نورتينى حبيبتى ودمتى بخير


********************************


ريمان
ــــــ
وعليكم السلام ورحمة الله وبركاته
اختى الحبيبة:انا الحمدلله بخير اذيك انتى ياريمو
تسلمى على مشاركتك
نورتينى حبيبتى ودمتى بخير


********************************


جنة
ــــ
اختى الحبيبة:اهلا اهلا بالقمر
وانتى طيبة وبالصحة والسلامة
ولا يهمك ياحبيبتى التورتة بتاعتك عايناهالك والبالونات كمان:)
كنت واثقة انك هتيجى:)
ربنا يطمن قلبك يارب
ماتشكرنيش ياجميلة ده حقك عليا ودى اقل حاجة ممكن اقولها عنك بجد

تعرفى يانوجا كنت الاول مابرضاش اذهب للاطباء مطلقا حتى لو بموت وبعد قراءتى لهذا الحديث بقيت اعصر على نفسى ليمونة واذهب على مضض
وما اجمل مشاركتك التى انتظرها دائما
انى احبك فى الله
نورتينى حبيبتى ودمتى بخير


********************************


الفراغ
ـــــــــ
وعليكم السلام ورحمة الله وبركاته
اختى الحبيبة:الله عليكى
كلامك جميل اوى
ربنا يكرمك ويرضى عنك
سلامتك ياحبيبتى من اى وجع
نورتينى ودمتى بخير


*******************************


مسدس صغير
ــــــــــــ
اهلا بيك يافندم
اشكرك جدا لرايك:)
مش عيب على قد ماهو اعتزاز بالنفس
كفاك الله شر الجراح بجميع انواعها
دمت طيبا ولمدونتى زائرا

د/عرفه يقول...

فعلا من أصعب أنواع الجروح هى الجروح المعنويه
وأحيانا مبنعرفش نعالجها
وبتتحول لجرح مزمن خصوصا لو كان من شخص قريب
طبعا اللجوء لربنا أنسب حل
وأن الواحد يحطاط شويه فى اختياره لاصحابه

وانا عن نفسى بحب المواجهه يعنى حاجه من اتنين اما تواجهى الجرح بشكل مباشر
واما نعمل زى القصه نقوم نكمل لعب بسرعه ولا أكن فى حاجه حصلت

salma mohamed يقول...

موناليزا العسل:
بصراحة الجراح فعلا بتختلف مش بس معنوي ومادي,المعنوي والمادي كل واحد ليه انواع,
يعني بيتهيألي لو الجرح المادي كبير لازم نستعين بحد,وان كان بسيط بنعالجه بنفسنا,
اما المعنوي,فساعات بنلجأ لحد عارفين ان عنده الدواء,او كلماته وطبطبته هتقلل من حدة الالم حتى لو مش هتعالجه,
واحيانا بطلب المساعدة من اللي كان سبب الجرح لو احنا عارفين ان احنا مهمين عنده فنطلب المساعدة منه علشان هو اقدر واحد يزيل الجرح وكمان بنبقى وقتها نفسنا نفضل حبايب والجرح ده ميأثرش على حبنا,بس ده حسب بقى طبيعة الشخص اللي قدمنا ومدى علاقتنا وحبنا ليه,
بس في اغلب الاحيان لايألم الجرح الا من به ألم.
معلش طولت حبه,
لأ حبتين(:

بسمة انور يقول...

الزمان هو اللى بيجرح وهو اللى بيداوى
بس اظن ان محدش بيداوى جرحه الا نفسه

mahasen saber يقول...

مونا الحبيبه اكيد اكيد هعتمد على الله

وافضفض واستشير واسمع نصيحه تفيدنى وتريح قلبى

الطائر الحزين يقول...

الزمن كفيل بمداوة أى جرح ونعمة النسيان عظيمة

blue-wave يقول...

لا دا ولا دا
فقط الإعتماد على الله اولا
والنفس ثانيا
تحياتى

الازهرى يقول...

فى الجراح الجسدية اذا امكن علاجها بنفسى والا لجأت لمساعد الاخرين
اما بالنسبة للجراح المعنوية فلا الجأ فيها الى احد واحاول معالجتها بنفسى وباللجوء الى الله
ولكن لا اطلع عليها احدا

تحياتى دوما

Hanan Elshafey يقول...

العزيزه موناليزا
بالنسبه للجرح المادي اعتقد هنحتاج مساعده خاصة لو كان خطير
اما الجرح المعنوي فأظن انه اكتر شئ مطمئن هو اللجوء لله لان من البشر من قد تلجأين اليه فلايزيدك الاجرحا
ده رأيي والله اعلم
جزاك الله خير علي كل موضوعاتك
تحياتي

ghorBty يقول...

غاليتي موناليزا

جزاك الله خيرا كثيرا علي مواضيعك القيمه

إذا تعرضت لجرح جسدى أو معنوى كيف تتعامل معه؟.
الجرح الجسدي يهون ومع الايام بيلتئم

لكن الجرح المعنوي يبقي معي فتره ويكون اصعب بمراحل من الجرح الجسدي وهو الانسان ايه غير شعور واحساس ولو جرحت الاحاسيس لا اجد غير الله لاشكو له واتوكل عليه

هل تطلب مساعدة الآخرين أم تعتمد على الزمن لمداواة الجرح

لا اظن ذلك .. انا من النوع الذي يتملكني الصمت كثيرا ولا احب الشكوي او البوح بما داخل مكنون نفسي لاني علي يقين ان لا احد يستطيع ان يداوي ما بداخلي فبعتمد علي من بيده ملكوت كل شئ سبحانه وتعالي

بس ممكن لما الموضوع يعدي واحس انه اصبح شئ عادي بالنسبه لي لو حد سألني كنت ليه مضايقه اقول عادي اللي حصل يمكن علشان بحس نفسي خلاص اتغلبت علي الحاله وبقيت اقوي

غربتي

Maha Shahen يقول...

اعتقد الزمن كفيل يداوى الجروح لائما بالحل او بالنسيان مع مرور الوقت

كتير بيكون نفسنا حد يساعدنا بس فى امور صعب نشكى فيها الا لله سبحانه وتعالى

برغم انى مقتنعه اننا لازم نساعد بعض فى الأزمات لكنى كتير برضوا مقتنعه بالجمله اللي بتقول
لا يألم الجرح الا من به ألم
مساعدة الناس لينا ما هى الا مسكنات لو احنا مش قادرين نتجاوب معاهم علشان نساعد نفسنا فى الاساس

تحياتى

موناليزا يقول...

د/ عرفة
ـــــــــ
اهلا بيك يادكتور
اشكرك جدا لمشاركتك
دمت طيبا ولمدونتى زائرا


**********************************


سلمى محمد
ـــــــــــ
اختى الحبيبة:انتى كمان عسل وسكر:)
اشكرك جدا لمشاركتك
انا مش شايفة اى اطالة على فكرة
بصى وانتى هنا اعتبريها مدونتك واتكلمى ذى ماانتى عايزة
نورتينى حبيبتى ودمتى بخير


********************************


بسمة
ــــــــ
اختى الحبيبة:معاكى حق محدش هيمسح دمعتك غير ايدك
اشكرك جدا لمشاركتك
نورتينى حبيبتى ودمتى بخير


**********************************



محاسن صابر
ـــــــــــ
اختى الحبيبة:اذيك دلؤتى يارب تكونى بقيتى احسن
ربنا يريح قلبك دايما وتفرحى بابنك يارب
اشكرك جدا لمشاركتك
نورتينى حبيبتى ودمتى بخير


**********************************



الطائر الحزين
ــــــــــــــــــ
اهلا بيك يافندم
فعلا النسيان نعمة غالية جدا
اشكرك جدا لمشاركتك
دمت طيبا ولمدونتى زائرا


********************************


بلو واف
ــــــــــــ
اهلا بيك يادكتور
مع احترامى الشديد لرأيك
امتى نروح لطبيب نفسى؟؟
اشكرك جدا لمشاركتك
دمت طيبا ولمدونتى زائرا


**********************************



الازهرى
ــــــــــ
اهلا بيك يافندم
ربنا يحميك من اى جراح
اشكرك جدا لمشاركتك
دمت طيبا ولمدونتى زائرا


*******************************


حنان الشافعى
ـــــــــــــ
اختى الحبييبة:ونِعم بالله
ربنا يكرمك ويزيدك من فضله
اشكرك جدا لرايك ولمشاركتك
نورتينى حبيبتى ودمتى بخير


********************************



غربتى
ـــــــ
اختى الحبيبة:ربنا يكرمك فماتوفيقى الا بالله
فينا من بعض حاجات كتير:)
حماكى الله من اى جراح وحفظكى من كل شر
اشكرك جدا لمشاركتك
نورتينى حبيبتى ودمتى بخير


*******************************



نور شاهين
ــــــــــــ
اختى الحبيبة:جميل اوى رايك وتعليقك ربنا يحفظك
اشكرك جدا لمشاركتك
نورتينى حبيبتى ودمتى بخير

SHAPE YOUR LIFE (ABOALI) يقول...

ياااااااااا عينى على جوجو و زمردة 2
من منا لم يتعرض فى يوم لجرح سواء معنوى او جسدى
اولا
كل انسان على نفسه بصير
ثانيا هناك من نستطيع اصلاحه نحن
لذا علينا تحديد الالويات اولا فى حياتنا

الشيخ الشعراوى يقول
لكل انسان منطقة حرجة
وهى المنطقة التى نستطيع فيها فرد ايدينا يعنى تقريبا نص متر على جميع الاتجاهات ان لم يكن متر
تلك المنطقة نشم فيها عبير الحياه
نستمتع فيها بالحركة والتفكير المريح
وهكذا

وهذا يحدث عندما نتعرض لتحديات او جروح
وانا دائما احب ان اسميها توابل الحياه
نحتاج ان نفكر و ونقلب صفحات العقل
فاءن تم التعامل مع الجرح جيدا"
وكان لنا من الحنكة والخبرة بحيث يكون بعد الجروح انطلاق وثقة ان الجروح هى اختبارات من الخالق ليزيد من نقاءنا
كنا بهذه الطريقة على الطريق السليم

اما عن اللجوء للغير
يجب الاعداد اولا له قبل التعرض للجروح
اى اعداد الصحبة الخيرة واهل المشورة
الموثوق بهم اهل الامانة
وحاليا هولاء قليلون
لذا البحث عنهم مطلوب قبل التعرض للمشاكل
ليكونوا لنا الحصن ودرع الامان

اما عن الزمن فى مدواة الجرح
كما تعرفى اننا اسمنا انسان من النسيان
وتلك حكمة من الخالق حتى يهون علينا
ما نواجه فى الدنيا
ولكن الهروب الى الزمن
يعقبه حسرة فى القلب خصوصا اذا كان الجرح غائر
لذا نقاء السريرة والتصالح مع النفس
هى الوسيلة لمقابلة تلك التحديات

اخيرا

الدعاء هو طعام المسلم

ومن استغن عن طعامه وهن ضعف جسده
وغلبه دود الحياه
وهى يا سيدتى مشاكلها وجروحها


تحياتى

ماء تشرين يقول...

انا بشوف انو انت وحدك القادر على مدواة جراحك لان كل الحولك زى مامت جوجو وزمرده مش هيعملولك حاجه غير جلدك والجروح في اعتقادى لاتزول وانما تختفي في الذاكرة الى ان ياتى موقف يحضرها ليها فهى مبتموتش ابدا ولكن تتراجع بسبب عامل الزمن ده في راى المتواضع

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة موناليزا
تحياتى
بس جوجو ده عاقل قوى كده ويفكر بمنطقيه زياده (بيفكرنى بنفسى وانا صغنن تمام زى ماكنت بعمل هههههههههه)
انما عارفه انهم معاهم حق فى اللى عملوه
فى احيان كتير بيكون قلق الاهل وحبهم الزياده بيخنق ويضايق وممكن يحرم الاطفال من حاجات كتير بيحبوها ومش بس الاطفال ده حتى الكبار انا شخصيا بيحصل معايا كده ساعات
اما موضوع الجرح ده عادى يعنى يادوب ينظف فى ساعتها بأى حاجه وبعد كده يخف وحده
تقبلى مرورى وتحياتى
ودمتى بكل خير وود
والسلام عليكم ورحمة الله وبركاته

المعتصم يقول...

اه معلش بس يعنى الحوارات الاطفالى مش لازم تكون بالنحوى يعنى ممكن تمشى عاميه(هما مش ولاد سيبويه)يعنى بدل مايقولها ضعى المنديل يقولها حطى المنديل ممكن تمشى
...................
انا اتكلمت على الجرح الجسدى الملموس
انما الجرح المعنوى برده هسيب للزمن وهو اللى هيداويه
لانه مالوش دوا تانى غير كده
تحياتى

jonoon 3aqel يقول...

ياااااااااااااه...
السؤال فاجئني صراحه...
======
يعتمد على المشكلة و حجمها...
لكن بشكل عام..
أحاول اصلحها..و أخلي الزمان يداويها..و لا من شاف..و لا من دري..

طلب المساعده مش سهل..مع أنه دايما بنقول للغير.." اطلب المساعده"...

و الانسان مابيحبش يظهر ضعفة.. او خطأه للغير...

جزاك الله خير
تحياتي
جنون عاقل

KHALED يقول...

ماحك جلدك مثل ظفرك

الربان يقول...

تحياتي

اولا كل عام وانت بالف خير ومبروك مرور
عام علي المدونة عقبال 101 سنه..و معذرة علي التأخير.


بالنسبة للجرح... اعتقد ان الجروح انواع...فالبسيط منها ( سواء كان معنوي او جسدي)...يمكن الاستشفاء منها
بقليل من الصبر و العناية و العزيمة و ذلك دون اللجوء الي العون من الاخرين.

بالنسبة للجروح غير البسيطة...ففي رأيي ان طلب العون لن يكون عيبا او نقيصة.... بل يمكن طلبه من الام او الاخت...

كلنا نحتاج الي الاخرين...و نحتاج الي من يسمع لنا و يتداوب معنا....

لكن علينا ان نختار بدقة و عناية فائقة من نتحدث اليه و نستمع له.

أسأل الله العظيم رب العرش العظيم...بأسمائه الحسني و صفاته العلي
ان يفرج كرب المكروبين...و يسعد قلوب الجميع...و ان ينير لنا بصيرتنا و يشد
من ازرنا و عزمنا..


تحياتي و تقديري

Arsenal Way يقول...

الجرح الجسدي يجب ان اطلب فيه المساعده

اما الجرح المعنوي او النفسي فلا تداويه الا الايام

تقبلي مروري

salwa يقول...

السلام عليكم
مؤضوع شيق
من الناحية الجسدية اكيد يجب الاستعانة بالاطباء
من الناحية المعنوية يجب المناقشة مع اصحاب الشان
و ان لم نصل لنتيجةالزمن كاف بمداواة الجروح و نتعلم من التجربة
سلمت يدك
سلام

romansy يقول...

الحرج الجسدى اهون بكتير من الجرح الروحى مع الزمان الجرح الجسدى تداويه الايام
ولكن جرح الروح باقى حتى نهايه العمر

واحد من البلد دى يقول...

السلام عليكم و رحمة الله و بركاته

اعذرينى اختاه على الانقطاع فحالتى النفسية و البدنية الحمد لله سيئة جدا..

ولكن ردا على البوست

فانا احب دائما مساعدة الاخرين لكننى لا اطلب ابدا مساعدة احد لانى اعتبر ذلك من الضعف و انا احب ان ابدو قويا دائما..

وصدقينى

طلب المعونة من الله عز وجل ليس فيه اى ضعف لانى متاكد تماما ان من اطلب منه هو قادر على تحقيق مطلبى و انه سبحانه و تعالى اقوى منى و من اى قوى سواه جل و علا و تنزه عن كل نقصان

تحياتى

ميرا ( وومن ) يقول...

الله جوجو وزمردة دول فكروني بحاجات كتير حلوة

يارتنا فضلنا صغيرين ياريت

بصي الجرح الجسدي مش بيقلقني قوي يمكن علشان انا والحمد لله حد جامد والناس بتستغرب ردرود افعالي يعني مرة مثلا خبططتني عربية قدام الجامعه الحمد لله جت بسيطة بس انا كل اللي عملتة اني عديت الناحية التانية وابتديت اشوف ايه اللي حصلي وسط زهول اصدقائي

الجرح المعنوي بقي مش بختلف رد فعلي تجاهه برضة ببان جامدة ويمكن ده بيغري البعض انهم يتمادوا في جرحي لكن ساعتها برد بقسوة وقوة وانعزل مع نفسي لحد ما احس اني اقدر اتكلم واتناقش واناقوية فبدور علي الناس اللي بتحبني بجد واحكيلهم بس مش بقدر الجأ لحد وانا ضعيفة ولا بحب اعيط في حضن حد
ميرسي قوي علي الفضفضة الحلوة دي

قوت القلوب يقول...

الجرح المادي بقول إني تعبانة علشان يبقى فيه مشاركة وجدانية وأحيانا يكون فرصة علشان أدلع شوية

لكن الجرح المعنوي بشكي همي لله وأطلب منه العون والصبر
وأحيانا أحكي لأختي لأني بحترم رأيها وتفكيرها

rovy يقول...

موناليزا الغاليه
الالم الجسدى فى كثير من الاحيان يحتاج الى مساعده و لكن الالم النفسى او الجرح النفسى فده اللى اكيد بنحتاج فيه لمساندة الاصدقاء و الناس اللى بتحبنا بصدق لأنه بيكون المه اصعب من اننا نتخطاه بمفردنا و الاهم ان نلجأ للمولى عز وجل الرحمن الرحيم اللطيف و اقرب قريب اكيد احساسنا بأنه معانا و انه ملجأنا حيطمنا و حنقدر اكيد نتخطى الجرح و ربنا يبعد عنك حبيبتى كل الجراح و الالام و يرزقكى كل السعاده
دمتى بكل ود و خير و سعاده
تحياتى

أختكم فى الله يقول...

حبيبتى ازيك وحشتينى ووحشتنى مدونتك بقالى كتير اوى منقطعة معلش

انتى ايه اخبارك

موناليزا يقول...

ابو على
ـــــــــــ
اهلا بيك يافندم
"المنطقة الحرجة" ياله من تعبير بليغ أول مرة أسمع عنه

تعرف ان معاك حق فعلا فالضربة التى لا تميتنى تقوينى

اما عن اللجوء للغير فمع احترامى الشديد لرأيك أرى أن هذه الابتلاءات تأتى فجأة ودون سابق انذار فلا يستطيع المرء وقتها أن يفكر فى اى شخص ليساعده ولكنه يقبل مساعدة أى شخص يعرضها عليه ويكون كما الغريق الذى يتعلق بقشة ويكتشف بعدها ان اقرب الاشخاص اليه لم يعرضوا عليه المساعدة

"نقاء السريرة وتصالح النفس" فعلا علاج رائع وارى ان اختصارهما الرضا عن الله

اما عن الدعاء فهو سلاح فعال فعلا ونعمة غالية من الله لنا
(اللهم لاتجعل لنا دعاء الا اجبته"

اما عن جملتك الاخيرة ففيها عمق فلسفى
اشكرك جدا لمشاركتك
دمت طيبا ولمدونتى زائرا


*********************************


ماء تشرين
ـــــــــــــ
اختى الحبيبة:وجهة نظر تحترم طبعا
اشكرك جدا لمشاركتك
نورتينى حبيبتى ودمتى بخير


******************************


المعتصم
ــــــــ
وعليكم السلام ورحمة الله وبركاته
اهلا بيك يافندم
جوجو بيمارس سُلطته كأخ:)

اما عن قلق الاهل الزائد فهذا يسمى خوف مرضى(خد بالك بقى عشان ماتعملش كده مع ولادك)

اما عن ملاحظتك ورغم انى مكنتش مستصيغة كلمة"حطى" بس فعلا معاك حق:)
ومع ذلك قلمى لايطاوعنى ان ابدل كلمة فصحى بكلمة اخرى عامية(بص ممكن تشوف لى كلمة تانية بنفس المعنى واخف وطأة من "حطى"..خدمة بلوجية يعنى)

اشكرك جدا لرايك ولمشاركتك
دمت طيبا ولمدونتى زائرا


**********************************


ميبى سون
ــــــــــ
اهلا بيك يافندم
تعرف ان غالبية الناس كده
اشكرك جدا لمشاركتك
دمت طيبا ولمدونتى زائرا


**********************************


خالد
ــــــــ
اهلا بيك استاذ خالد
صح جدا
اشكرك جدا لمشاركتك
دمت طيبا ولمدونتى زائرا


******************************


الربان
ـــــــــ
اهلا بيك يافندم
وانت طيب وبالف صحة وحمدالله على سلامتك ويارب تكون قضيت اجازة سعيدة
تعليق فيه من الحكمة الكثير والكثير ربنا يكرمك ويتقبل دعائك
اشكرك جدا لمشاركتك
دمت طيبا و لمدونتى زائرا


********************************


مصطفى ابو زيد
ــــــــــــــــ
اهلا بيك ياباشمهندس
اشكرك جدا لمشاركتك
عافانا الله جميعا من اى جراح
دمت طيبا ولمدونتى زائرا


********************************


سلوى
ــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
نورتينى حبيبتى ودمتى بخير


*******************************


رومانسى
ـــــــــ
اهلا بيك يافندم
سبحان الله قد قلت الجملة دى قريبا جدا
عافانا الله جميعا من اى جراح
اشكرك جدا لمشاركتك
دمت طيبا ولمدونتى زائرا


*******************************


واحد من البلد دى
ـــــــــــــــــــ
وعليكم السلام ورحمة الله وبركاته
اهلا بيك يافندم بعد طول غياب
المؤمن مصاب أخى الكريم
الضعف ليس عيب ابدا فنحن بشر واوقات كثيرة نحتاج الى شحن بطارية قوتنا عن طريق بعض الاشخاص المقربين
ونِعم بالله
اللهم فرج هم المهمومين وفك كرب المكروبين
اشكرك جدا لمشاركتك
دمت طيبا ولمدونتى زائرا


**********************************


وومن
ـــــــ
اختى الحبيبة:مبسوطة بجد انهم فكروكى بحاجات حلوة:)
ايه ده ايه ده!! ده انتى ذيى بالظبط على فكرة
انا كمان مرة خبطتنى عربية والحمدلله جت سليمة بس الفرق انى ماعدتش الشارع لا مشيت عادى خالص وبعد ماروحت بقى بصيت ايه اللى حصلى

ربنا يعافينا يارب ويبعد عننا اى مكروه
اشكرك جدا لمشاركتك
نورتينى حبيبتى ودمتى بخير


*********************************


قوت القلوب
ـــــــــــــ
اختى الحبيبة:اهلا بيك فى زيارتك الاولى
اختبار بتقلقى فيه حبايبك يعنى:)عايزة تشوفى غلاوتك عندهم
ربنا يكرم اختك ويخليكوا لبعض
اشكرك جدا لمشاركتك
نورتى مدونتى وارجو دوام التواصل


******************************


روفى
ــــــ
اختى الحبيبة:انا برضه من رأيك:)
رينا يسعدك ويتقبل دعائك ويحفظ لك بناتك الهم امين
اشكرك جدا لمشاركتك
نورتينى حبيبتى ودمتى فى رعاية الله


*********************************


اختكم فى الله
ــــــــــــــ
اختى الحبيبة:اهلا اهلا بالقمر وحشتينى جدا كنتى فين لعل المانع كان خير
انا الحمدلله بخير اشكرك لسؤالك ويارب تكونى دايما بخير
نورتينى حبيبتى ودمتى بخير

شمس النهار يقول...

قصه لطيفه ومنطق اطفال لطيف
اما عن الجراح فالصبر والايمان بالله والزمن والنسيان خير طبيب

SemSem يقول...

البوست جميل جداااا
ونقطة المناقشة مفيدة جدا لمعرفة الشخص نفسه
وانا بطبيعة الحال احب اداوى جروحى بنفسى ومسألش حد أو اطلب من حد المساعدة عشان يداويلى جروحى

تحياتى بكل ود

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة
تحياتى
انا وضعت(مش حطيت)نفسى فى ازمة
وانا اجيب كلمة بديلة منين دلوقتى ؟؟؟
خلاص مشيها زى ماهى
دى حتى حلوة وزى الفل
ضعى المنديل
والنبى زى العسل اهه
سيبك من هلوسة الجماعه الصعايده واوعى تغيرى حاجه فى البوست خليه زى ماهو كده
هههههههههههههههههههه
وبعدين لازم جوجو يمارس سلطته الاخويه امال ايه مش بيقولها ضعى المنديل يبقى لازم يمارس السلطه
وموضوع الخوف المرضى ده لما يبقى العيال ييجو ابقى اشوف هخاف عليهم ولا ايه الظروف
هههههههههههههههههههههههههههههه
تقبلى مرورى وتحياتى
ودمتى بكل خير وود
والسلام عليكم ورحمة الله وبركاته

حاجات جوايا يقول...

الحقيقة سواء كان الجرح جسدى أو معنوى مش بحب اشكى لحد ..
وتفيد بإيه الشكوى غير انها هتوجع قلب اللى بيحبونا
اتعودت اشيل لوحدى كل حاجة
وربنا المعين

TIMMY !! يقول...

السلام عليكم ,

مش عارف ليه ما شدنيش في الموضوع غير خوف جوجو و زمرده من عقاب الأم ,

اللي بدل ما تعودهم إزاي يتعاملوا مع الصعوبات زي الجروح و غيرها بتخليهم يهربوا من المشكلة و بتعقهدم أكثر و أكثر و تمنعهم من اللعب !!

معلش بق , الجزء ده اللي شدني أكثر حاجة :)

تحيتي

موناليزا يقول...

شمس النهار
ــــــــــــ
اختى الحبيبة:اشكرك جدا لرايك ولمشاركتك
نورتينى ياجميلة ودمتى بخير


*********************************


سمسم
ــــــــ
اهلا بيك يافندم
اشكرك جدا لرايك ولمشاركتك
وعافانا الله جميعا من اى جراح
دمت طيبا ولمدونتى زائرا


********************************


المعتصم
ـــــــــ
وعليكم السلام ورحمة الله وبركاته
اهلا بيك يافندم
هههههههه هلوسة ايه بس ده انا اقتنعت بكلامك جدا:) بس عشان خاطرك هلتزم بالنص ومش هغير حاجة:)

واذا كان على العيال فانا واثقة انك هتخاف عليهم (ماتقلقش من النقطة دى)
رزقك الله بالزوجة الصالحة والذرية الطيبة قريبا اللهم امين
اشكرك جدا لمتابعتك
دمت طيبا ولمدونتى زائرا


***********************************



حاجات جوايا
ـــــــــــــــ
اختى الحبييبة:اشكرك جدا لمشاركتك
ربنا يحفظك من اى مكروه
نورتينى حبيبتى ودمتى بخير


********************************


تيمى
ـــــــــ
وعليكم السلام ورحمة الله وبركاته
اهلا بيك يافندم
ملاحظتك فى محلها على فكرة لان ده برضه قصدته فى الموضوع
انك ممكن تخاف تلجأ لحد عشان مايلومكش ويوجه ليك الاتهامات بدل مايحاول يساعدك
اشكرك جدا لمشاركتك ولتحديد هذه النقطة
دمت طيبا ولمدونتى زائرا

و القادم....أجمل يقول...

السلام عليكم
فكرة الموضوع جميلة اوي
بتجيبي الافكار دي منين
:D
--------------
بصي انا مهما كبرت صغير
بجد مهما الواحد كبر
برضوو لازم يرجع للي اكبر منه
بيكون عنده خبرة و يقدر يوجهك و
يطيب جرحك و يرشدك
دا ميمنعش اني بتكون للواحد شخصية مستقلة بس برضوو بحب اشرك الاخرين
و خاصة والدتي

و بما اني مليئة بالتناقض
:D
ساعات بكتم في نفسي
:((((((


تسلم ايدك على الموضوع
ربنا يوفقك و يبعد اي جرح
أو حزن عنا جميعااااااا

رئـــــيسـة حزب الأحلام يقول...

سؤال طرح للمناقشه جميل جدا لو تعرضت لجرح معنوى او جسدى
دائما ما ننظر للاخرين على انهم من يداونا بس بجد الجرج بيبقى عايز ايد تانيه غيرنا هى اللى تداوى يعنى ممكن احنا مثلا نداوى نفسنا هو ممكن بس لو عندنا ارادة
الموضوع جامد وفى افكار كتير هو ليه احنا مش بنداوى نفسنا لاننا اكتر حد عارف ايه اللى وجعنا والوجع دة جوانا يبقى ليه مش نعالجه احنا
تحياتى لكى ياقمر

ذو النون المصري يقول...

غالبا ما اعتمد علي نفسي في حل مشكلاتي او اتركها بلا حل كي يمر عليها الزمن و يدوسها و يهرسها في الارض فلا يبقي لها اثر يذكر

قوس قزح يقول...

خالينى اتكلم معاكى بصراحة
ليه الواحد لما بينجرح باخد نفسه بعيد و يسيب جرحه يدوايه الزمن ؟
هو ده السؤال اللى مفروض نسأله لنفسنا

لان بصراحة العيب مش فى المجروح انه فضل يعالج نفسه بنفسه
العيب فى الناس اللى حواليه و مدى تفهمهم للجرح ده

اوقات الواحد بيكون مش مستحمل نصيحة او لوم بيكون بس محتاج حد يطبطب عليه من غير شفقة او سخرية
و اوقات تانية بيكون محتاج حد يشجعه و يسنده و يخليه يحس انه قوى من تانى

لو انا ملاقيتش اللى يفهم ازاى يداوى جرحى ..عمرى ما هخلى حد يدوينى

احنا محتاجين نتعلم ازاى ندواى بعض
محتاجين نكون احن من كده على بعض
محتاجين طولة البال مع بعض

و اعتقد موقف الام هنا بالزعيق و الحرمان باللعب تانى اكبر دليل على انها مش طبيب شاطر
و له حق الولد يطلب اخفاء الجرح عنها


تحياتى

EMMY BABY يقول...

اممممممممممم لو جسدى ممكن الجأ لدكتور بدل ما الجرح يدهور

لكن لو معنوى لم ابوح لاحد ما بداخلى غير نفسى ويكفينى ان الله بجانبى


طبيعة غريبة صعبة اوى انى احكى لحد اللى جوايا بسهولة

معرفشى ده صح ولا غلط

تحياتى يا موناليزتى

ايمى

موناليزا يقول...

والقادم اجمل
ــــــــــــــ
وعليكم السلام ورحمة الله وبركاته
اختى الحبيبة:الله يكرمك:) فماتوفيقى الا بالله
اشكرك جدا لرايك فهذا من فضل ربى
عاجبنى صراحتك جدا ربنا يعزك ويخليلك والدتك ويبعد عنك اى حاجة وحشة
اشكرك جدا لمشاركتك
نورتينى حبيبتى ودمتى بخير


*********************************


رئيسة حزب الاحلام
ــــــــــــــــــ
اختى الحبيبة:اشكرك جدا لرايك
دى حقيقة فعلا ومش عيب ابدا نطلب مساعدة الاخرين
ايوة مش هيبقوا حاسين بالوجع اللى جوانا بس هيقدروا يتحكموا اكتر مننا فى علاج الجرح ذى بالظبط لو دكتور شاطر واتجرح هيدور على دكتور تانى يقوم بتخييط جرحه
عافانا الله جميعا من اى جراح
اشكرك جدا لمشاركتك
نورتينى حبيبتى ودمتى بخير


********************************



ذو النون المصرى
ـــــــــــــــــــ
اهلا بيك يافندم
مع احترامى الشديد لما تفعل هل تنجح فى هذا؟
اشكرك جدا لمشاركتك
نورتينى حبيبتى ودمتى بخير


*********************************


قوس قزح
ـــــــــــ
اختى الحبيبة:الله عليكى
لمستى نقطة مهمة قصدتها بالفعل
فالاولى ان تتم المساعدة بدل القاء اللوم وتصيد الاخطاء
اشكرك جدا لمشاركتك
نورتينى حبيبتى ودمتى بخير


********************************


ايمى بيبى
ــــــــــــ
اختى الحبيبة:هو صح جدا لو مفيش حد ترتاحى له وتثقى فيه لكن لو لقيتى حد يكون اهلا للثقة ولديه من الحكمة والخبرة فلا تترددى فلعله يأخذ بيدك ويساعدك على اجتياز اى ازمة
ربنا يبعد عنك اى جرح ياجميلة
اشكرك جدا لمشاركتك
نورتينى حبيبتى ودمتى بخير

الفقيرة إلى الله أم البنات يقول...

مونى
اجمل حاجه فى البوستات بتاعتك
ما قل ودل يعنى بتجيبى من الآخر
وهاقولك الجرح الجسدى ان شاء الله يلتئم مع الوقت سواء بطبيب او مداوة فى المزنل
ام الجرح المعنوى..لا يندمل ابداط
ولكن تنسى آلآمهم بذكر الله

دمت بخير يا حبيبتى

على عبدالله يقول...

السلام عليكم

استعين بالله اولا وقبل كل شىء"مع يقينى بان الله وحده هو القادر على مداواة جرحى "
ثم اهل الثقة ..

وان كان الزمن كفيل بمدواة اعتى الجراح

محمد يقول...

السلام عليكم ورحمة الله وبركاته

الأخت موناليزا ...
لعل أمورك تسير علي ما يرام .... إن مسألة حياتنا بشكل عام لا تستقيم من غير تقلبات وتغيرات وخاصة لا تنسين أننا في دار اختبار وابتلاء لا دار راحة وتنعم ..... إن المواقف المتعددة التي تمر بنا وتعصف بنا من وقت لآخر ليست إلا كالتوابل التي توضع علي الطعام فرغم طعمها الغير مستساغ بمفردها فإننا لا نتصور كيف تكون الحياة بغيرها .... الجروح وسيلة لتعرف مدي نعمة الله عليك وقت الشفاء .... ما يقلقنا ويتعب راحتنا أننا دوما نفكر في الأمور التي تمر بنا تفكير الأطفال وننظر إليها نظرة الأطفال .... فإذا ما أردنا الراحة والصفاء النفسي فلنمعن التفكير ولنرهف الحس .... وليكن الله معينك في كل أمورك ..
مع خالص شكر وتقديري

Heba Sayed يقول...

السلام عليكم

طبعا الزمن كفيل ليداوى الجروح وماتسببه فى تعب نفسى ومعنوى

طبعا بوست رائع كما عودتينا موناليزا

دمتى سالمة وبخير

موناليزا يقول...

الفقيرة الى الله ام البنات
ـــــــــــــــــــــــــ
اختى الحبيبة:اشكرك جدا لرايك:)
عافانا الله جميعا من اى جراح
اشكرك جدا لمشاركتك
نزرتينى حبيبتى ودمتى بخير


***********************************


على عبدالله
ـــــــــــــ
وعليكم السلام ورحمة الله وبركاته
اهلا بيك استاذ على
حقا"الا بذكر الله تطمئن القلوب"
اشكرك جدا لمشاركتك
دمت طيبا ولمدونتى زائرا


*******************************


هذه حياتى
ـــــــــــــ
وعليكم السلام ورحمة الله وبركاته
اهلا بيك يافندم بعد طول غياب
الحمدلله فى فضل ونعمة من الله اشكرك لسؤالك
ما اجمل هذه الكلمات التى تثلج الصدر
اشكرك جدا لمشاركتك
دمت طيبا ولمدونتى زائرا


*********************************


هبة سيد
ـــــــــــ
وعليكم السلام ورحمة الله وبركاته
اختى الحبيبة:معاكى حق بس بياخد وقت طويل اوى
عافانا الله جميعا من اى جراح
ربنا يسعدك فماتوفيقى الا بالله
اشكرك جدا لرايك ولمشاركتك
نورتينى حبيبتى ودمتى بحير

محمد عبد الباسط يقول...

الجسدى بسيط جدا لو قارناه بالمعنوى

غالبا ما اصمت وانتظر ان يمن الله عليا بنسيان او تحول
فما سمى الانسان الا لناسيه ولا القلب الا لانه يتقلب
ولكن احيانا وفى الصعاب اجد راحتى فى التحدث وطلب العون من اخوانى

تقبلوا تحياتي

حلم كبير

د. ياسر عمر عبد الفتاح يقول...

إذا تعرضت لجرح جسدى أو معنوى كيف تتعامل معه؟.
هل تطلب مساعدة الآخرين أم تعتمد على الزمن لمداواة الجرح؟.

لا دى ولا دى
بعتمد على ربنا إنه يقوينى وأقدر أداوى جراحى بنفسى

fL0weR-giRL يقول...

السلام عليكم
اه فكرتيني بـ ايام الطفوله كان الواحد كل شويه يقع ويتعور ويقوم يكمل لعب هههههه
اما للأجابه عن الأسئله

إذا تعرضت لجرح جسدى أو معنوى كيف تتعامل معه؟

لو كان جسدي اكيد هاحاول ادويه طبعا عشان الوجع

اما لو معنوي ممكن مافكرش فيه اصلا خالص

هل تطلب مساعدة الآخرين أم تعتمد على الزمن لمداواة الجرح؟.
بصراحه الأتنين للأن ممكن تاخد رأي الناس في بعض الأحيان وينفعك
ولو مانفعش اسيب الزمن يداويه


لك كل الشكر والتقدير

^_^

موناليزا يقول...

محمد عبد الباسط
ـــــــــــــــــ
اهلا بيك استاذ محمد
متفقة معاك جدا
اشكرك جدا لمشاركتك
عافانا الله من اى جراح
دمت طيبا ولمدونتى زائرا


*********************************


د.ياسر عبد الفتاح
ـــــــــــــــــــــ
اهلا بيك يادكتور
ربنا يقوى ايمانك ويثبتك
اشكرك جدا لمشاركتك
دمت طيبا ولمدونتى زائرا


*********************************


فلور جيرل
ـــــــــــ
وعليكم السلام ورحمة الله وبركاته
اختى الحبيبة:فعلا واحنا صغيرين كانت جراحنا بتخف بسرعة او يمكن لاننا ماكناش بنفكر فى وجودها من اصله
اشكرك جدا لمشاركتك
ربنا يحميكى من اى مكروه
نورتينى حبيبتى ودمتى بخير

حاول تفتكرنى يقول...

قال أحد الفلاسفة :

إذا اردت ان تستمر بعد السقوط
لا تنظر خلفك
ولا تنظر أمامك
أنظر داخلك

تحياتي

حـــــدوتـــــة يقول...

السلام عليكم

انا عارف انى مقصر معاكى
على عكسك تماما بس سامحينى
وكل سنة والمدونة اكثر انتشار ونجاح
وعقبال ما تكمل السنة المئة

سلالالالالالالالالالالالالالالالالالالالالالالام

موناليزا يقول...

حاول تفتكرنى
ــــــــــــــ
اهلا بيك يافندم
ونِعم القول
اشكرك جدا لمشاركتك
دمت طيبا ولمدونتى زائرا


********************************


حدوتة
ــــــــ
وعليكم السلام ورحمة الله وبركاته
اهلا بيك يافندم
عذرك معاك وربنا ييسرلك جميع امورك
اشكرك جدا
وكل سنة وانت من زوارى المفضلين
دمت طيبا ولمدونتى زائرا

الـمـصـــرية - إمرأة ..وأفتخـر يقول...

قصه جميله ومعناها خطييييير

بصي يا موناليزا

الإنسان إذا لم يستعين بقدراته التي وهبها الله له للتغلب على آلامه وأزماته هيتحول بمرور الوقت لشخص انهزامي سلبي في احتياج دائم للآخرين

وبصراحه أنا عن نفسي مش بستعين بالناس للتغلب على مشاكلي وعلاج آلامي

بستعين بالله مافيش أكبر ولا أقدر ولا أحن منه على عباده

مواضيعك شيقه قوي يا موناليزا

سيفت المواضيع اللي أشرتي ليها في موضوع سابق ليكي

بس بجد عايزة تفرغ تااااااااااام علشان أقدر أقرا واعلق

خالص مودتي وتحياتي

موناليزا يقول...

المصرية امراة وافتخر
ــــــــــــــــــــــ
اختى الحبيبة:اهلا اهلا وحشتينى ياجميلة
اشكرك جدا لرايك ولمشاركتك
اسعدتينى بجد بمتابعتك واهتمامك بمواضيعى السابقة وفى انتظار تعليقك:)
نورتينى حبيبتى ودمتى بخير