الأربعاء، 1 أبريل 2009

جوجو و زمردة (4)

وجدت "زمردة" شقيقها "جوجو" شارد الذهن ويبتسم فسألته عن السبب فقال:
- بتخيل نفسى وأنا معايا فلوس كتير.
-هتعمل بيهم إيه؟.
- ياااه حاجات كتيرة أوى.
- زى إيه يعنى.
- يبقى عندى شركات وعربيات ومصانع ويبقى ليا كلمة مسموعة عند الكل وأصبح من أصحاب النفوذ اللى بفلوسهم يقدروا يعملوا أى حاجة.
- طيب ما إحنا الحمدلله معانا فلوس.
- أسكتى أسكتى أنتى مش فاهمة حاجة هى دى برضه فلوس.
- أيوة طبعاً إحنا مش ناقصنا حاجة.
- بيتهيألك. تعرفى أنا هجيب فلوس بأى طريقة عشان أصبح من أغنى الأغنياء. وهنسى حياتى دى خالص واللى هيسألنى هقوله إنى أصلى ابن ملك أو ابن وزير وإنى ماتربيتش هنا وإنى معايا شهادات كتير.
-طب بس حاسب لتبقى زى عادل إمام فى عريس من جهة أمنية لما علق شهادة تقدير عن الفروسية وطلعت مزورة وكان شكله بايخ.
- لأ متخافيش اللى هيشتغلوا عندى هيبقوا عارفين ده كويس. واللى هيغلط يبقى هو اللى جابه لنفسه.
- بس الناس هنا عارفاك.
- لأ ماهو أنا بعد كدة مش هاجى هنا تانى ولا هسأل فى حد خالص.
- يعنى ايه يعنى؟؟؟ طيب وأنا؟.
- إلا أنتى ياحبيبتى ده أنتى أختى الصغنونة ماتخافيش مش هقدر أنساكى.
- ياسلام يااخويا وأنا ايه يضمن لى انك مش هتنسانى.
- تحبى أكتبلك ورقة على بياض. وبعدين أنتى شوفتيها حصلت يعنى. قالها بضيق وكأنه اكتشف أنه مازال يحلم
- أه حقيقى.
وتهللت أساريرها فهما مازالا فى أرض الواقع.
****************
دعوة للمناقشة:
ــــــــــــــــــــــــ
* هل أصبح المال هو المقياس الوحيد لنحكم به على الأفراد؟.
* لو كسبت مليون دولار إيه أول حاجة هتعملها؟.


هناك 67 تعليقًا:

د/عرفه يقول...

أول تعليق على الموضوع

الفلوس مش كل حاجة فى الدنيا
وللأسف بحزن لما ألاقى أن الفلوس والماديات هى المعيار للتعامل مع الناس
فى حديث للرسول عليه الصلاة والسلام بيقول
{رب أشعث أغبر ذي طمرين لا يؤبه له ، لو أقسم على الله لأبره}

بالنسبة بقى لو معايا مليون دولار
اشمعنى دولار يعنى
هههههههههه
المهم اظن انى هتبرع بمبلغ كبير منها
واعد نفسى للحج
ممكن اشوف مشروع صغير كده علشان يكون مصدر مالى لو الفلوس خلصت
واكيد بالباقى هروح اتجوز
ياريت تشوفيلى عروسة بقى
هههههههههههه

رفقة عمر يقول...

الصورة جميله قوى
بنسبه 95% اصبح المال اهم شئ عند الناس والذى يقيموا به الاخرين
لو جالى مليون جنيه
انا باحب اسعد اللى حواليا قوى هاجيب لكل واحد منهم اللى نفسه فيه
وطبعا اجيب لنفسى اللى ناقصنى
واحج طبعا واعمل صدقه جاريه تنفعنى عند موتى
بس كدة المليون خلصت

TIMMY !! يقول...

السلام عليكم ,

طبعا المال مش المقياس للحكم على الأفراد ,
هو بيبقى المقياس عند الناس اللي ما عندهمش حاجة تانية - لا علم و لا أخلاق - لكن الطبيعي إنه مش مقياس ,

بالنسبة بقى لو معايا مليون دولار أول حاجة هعملها ؟؟
هغيرهم بالجنيه المصري طبعا :)

و طبعا هاخد معايا الجيش كتير , بدل ما آكل الفول بسوسه , أبقى آكل جميع الوجبات من الكنتين :)

شمس النهار يقول...

طبعا الاجابه من منطلق ايمان الواحد فينا مش في العموم
اصل انا واحده بعتبر المال وسيله وليس غايه يعني معايا زي مامعاييش
عمر المال ماكان له عندي قيمه وعمري ماقيمت الناس بالمال
الانسان بعمله وشخصيته وايمانه بالله
وبعدين بلاش انا يبقا معيا ملايين عشان انا هبوظ الشعب
يعني هعمل مشاريع للشباب يكونوا همه ملاكها عشان يحافظوا عليها
واعمل مشروع لتزويج الشباب
ومشاريع تصرف علي الارامل والمطلقات وخصوصا اللي مالهمش مكان
وحاجات كتير من النوعيه دي

*الطالبة عفو الله *زوزو يقول...

أول تعليق

احم احم

بسم الله

و الصلاة و السلام على رسول الله

اصل فرحانة باول تعليق

خلاص ندخل في الموضوع

و الله يا حبيبتي للاسف هذا ما اصبحنا نراه الناس اعمتها الفلوس و الماديات
و نسيت او تناست انها وسيلة فقط و ليس غاية

انا ظد الفكرة ان الفلوس هما كل حاجة و انهم بيحلوا كل المشاكل

انسينا و من يتق الله يرزقه من حيث لا يحتسب

خلي ثقتك و رضاك في الله و ربنا مش حسيبك

لو ربنا رزقني بفلوس كتير اولا ححج و اعتمر

ثانيا حساعد المحتاجين و اعمل حاجات كتيرة الي حتفيدني في اخرتي بالمال دة

نسال الله القناعة و الرضا بما قسم لنا

و بارك الله فيك حبيبتي

NuNa يقول...

سلام عليكم
المال ليس بمقياس للحكم على الناس و لكن للأسف في زمننا هذا اصبح هو المقياس الاساسي و الأهم بنسبه لمن يرا المال كل شئ.
لو كسبت المليون عندي حاجات واجد بكل في بالي نبي نديرهن ليا انا و اسرتي و من يحتاج من لمساعده...
شكرا

محمد يقول...

السلام عليكم ورحمة الله وبركاته

علي فكرة موضوعات جوجو وزمردة دي تنفع سلسلة تعليمية للأخلاق

جزاك الله خيرا وربنا يبارك فيكِ

خالص شكري وصادق دعائي

Unknown يقول...

السلام عليكم
ازيك يا موناليزا
اولا عايزة ادعوك على يوم للطفل اليتيم المعاق يوم 10/4 ان شاء الله
فى بورسعيد يارب تقدرى تجى
ثانيا موضوع مهم جداا
بس ليس المال وحدة المهم
المال سبب ووسيلة لكنة ليسى الاوحد
موضوع محتاج نقاش طويل هرجع لك انقاشة ان شاء الله

موناليزا يقول...

د/عرفة
ـــــــــــ
اهلا بيك يادكتور
فعلا للاسف وكأن زمن الاخلاق انتهى

بما انك ضحكت تبقى عرفت انا ليه اختارت الدولار:)
واذا كان على العروسة اول ما المبلغ ده يبقى معاك مش هتبقى محتاج حد يدور لك على عروسة لانها هى اللى هتجيلك لغاية عندك:)
بلد فلوس صحيح هههههه
اشكرك جدا لمشاركتك
دمت طيبا ولمدونتى زائرا




********************************





رفقة عمر
ــــــــــــ
اختى الحبيبة:اهلا اهلا بالغالية
اشكرك جدا لرايك فى اختيار الصورة:) والحمدلله ان نالت القبول
معكِ حق
مليون دولار ياجميلة:) المليون جنية مايعملوش حاجة دلؤتى:)
ربنا يسعدك ياحبيبتى انتى وكل اللى حواليكِ
لو هتروحى تحجى ابقى ادعيلى ماتنسيش:)
اشكرك جدا لمشاركتك
نورتينى حبيبتى ودمتِ بخير






********************************





تيمى
ـــــــــ
وعليكم السلام ورحمة الله وبركاته
اهلا بيك يافندم
اشكرك لرأيك
:) بداية موفقة برضه
طب وهتأكل اللى معاك ولا كفاية عليهم انك هتديهم وجبتك الغنية بالسوس:)
اشكرك جدا لمشاركتك وربنا يهون عليك ايام الجيش
دمت طيبا ولمدونتى زائرا





**********************************





شمس النهار
ــــــــــــ
اختى الحبيبة:الله عليكِ
ايه الجمال ده
ربنا يسعدك ويرزقك بكل الخير
اشكرك جدا لمشاركتك
نورتينى حبيبتى ودمتِ بخير






********************************





الطالبة عفو الله
ـــــــــــــــــــ
اختى الحبيبة:اهلا اهلا بالغالية
وكأنك أول تعليق:)
ربنا يقوى ايمانك ويرزقك بكل الخير
وماتنسيش لما تروحى تعملى عُمرة تدعيلى
ربنا يكرمك ويتقبل دعائك
اشكرك جدا لمشاركتك
نورتينى حبيبتى ودمتِ بخير






**********************************





نونا
ـــــــ
وعليكم السلام ورحمة الله وبركاته
اختى الحبيبة: اهلا بيكِ فى زيارتك الاولى
اشكرك جدا لمشاركتك ولو انى مفهمتش ايه اللى ناوية تعمليه
عموما ربنا يهيئلك ولاسرتك كل الخير
نورتى مدونتى وارجو دوام التواصل





********************************






هذه حياتى
ـــــــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك ودى فعلا نيتى ربنا يقدرنى وتكون بشكل جيد
ربنا يكرمك واشكرك جدا لتواجدك وكنت اتمنى مشاركتك
دمت طيبا ولمدونتى زائرا




********************************




نهر الحب
ــــــــــ
وعليكم السلام ورحمة الله وبركاته
اختى الحبيبة: بداية اشكرك جدا على هذه الدعوة الغالية وربنا يكرمك يارب ويتقبل منا ومنكم صالح الاعمال
اعذرينى حبيبتى ظروفى الان ملخبطة على الاخر اسألك الدعاء بصلاح الحال

وانا فى انتظار دائما غاليتى:)
اشكرك جدا لتواجدك
نورتينى حبيبتى ودمتِ بخير

همس الاحباب يقول...

بصراحة الاجابة هتختلف حسب طبيعة الشخص وحسب الظروف السائدة
مع ان وجهة نظرى ان الفلوس وسيلة وليست غاية
ولكن بدانا ننظر لها من منظور اقتصادى انها غاية بل غاية الغايات مع الاسف
ولكن هناك معايير ومقاييس للشخص بعيدا عن المال فالاخلاق والاحترام مقياس اساسى حتى لو معاك كنوز الارض
لو معايا مليون دولار
اول حاجة هعملها
مشروع خيرى لرعاية الايتام والارامل
تحياتى

MOHAMMED ELBANNA يقول...

السلام عليكم ورحمه الله وبركاته
اكيد الفلوس مش مقياس حكم على الافراد ولا على نجاحهم وخصوصاً فى الزمن ده اللي اغلب الناس بقت محتاجه حتى الطبقة المتوسطه اللي بدأت تختفي ، لكن للأسف في ناس كتير بتحكم على الفرد من جيبه ويقولوا المثل الشهير ( الراجل مايعبوش غير جيبه ) طبعاً تخاريف !!!
مالراجل ممكن يعيبه قله ذوقه او بعده عن دينه او معملته الوحشه مع مراته والناس او...او.....
المهم ان بالرغم من اهميه الفلوس الا اننا ما ينفعش نخليها في قلبنا لكن نخليها في ايدينا ، يعني منخلهاش هدف وغايه لكن وسيله لتحقيق اهدافنا .
اما لو انا كسبت مليون دولار فأول حاجه هعملها فعلاً هيا اني اقدم على الماجيستير ثم الدكتوراه فى ادارةالموارد البشريه علشان انفع نفسي واخوانى المسلمين في كل مكان .
موضوع جميل
ــــــــــــــ
اتمنى تشرفوني على مدونتي الجديده
( طريق النجاح )
http://tareekelnagah.blogspot.com/

mohamed ghalia يقول...

الحوار ده دليل على عدم وجود رضا
وده اهم شىء انى الغنسان يطمح اه لكن فى الأول يرضى
الفلوس طبعا مش مقياس الى عند بعض ضعاف النفوس
لو معايا مليون دولار بجد هخاف أوى إنى أعصى بيهم ربنا وهخاف أكتر انى فى شخص جنبى يكون محتاج لجنيه واحد وأنا معايا المبلغ ده
دمتِ بكل الود
سلم لنا قلمك المشرق

SHAPE YOUR LIFE (ABOALI) يقول...

ههههههههههههه
حلو الكلام والله
طبعا" كلامك ليه ابعاد كتيرة
المال مثل اى عصر وسيلة من وسائل المرور في الحياه
بس المرور ليه قواعد
نظرة البنى ادم للمال نظرة تتغير
تبعا" لمقياس الحالة الايمانية عنده
لذا سيتم تقسيم الناس
الى ان تصلى الى من يعبدون المال ويكنزون الذهب والفضة
مرورا" بالصالحين ومصعب بن عمير خير دليل

المهم
المال مقياس لجودة لدين فى القلوب

لذا فيه ناس تاخد ايزو
وناس تاخد على قفاها

ههههههههه

بالنسبة للمليون دولار

ده سؤال ذكى
وكمان دايما احنا بنسئله اثناء المقابلات مع الموظفين الجدد
وده لقياس
مراحل وتفكير الانسان
وكمان مقياس للفكر الفردى او الاجتماعى

بعيدا طبعا"
عن انى كل واحد هايقول انا هاحج وازر بيت الله

هناك
من المشاريع والاعمار فى الارض الكثير والكثير
التى عن طريقه تحدث التجارة مع الله
وينمو معها المجتمع

انا مثلا عاوز اعمل مصنع يعتمد على مولاس القصب اللى بيكون فى محلات العصير (مصاصة الخشب)
عن طريق المصاصة دى يمكن تصنيع الكثير من المخرجات مثل الكحول والخشب والسماد وغيرها


تحياتى لك دايما

وكمان كتابة بوست عن جوجو وزمردة
لا يمنع من قصة عن زج زج وبج بج ودم الغزال
تحمل رونق قلمك

تحياتى

د. ياسر عمر عبد الفتاح يقول...

* هل أصبح المال هو المقياس الوحيد لنحكم به على الأفراد؟.

عند ناس كثير أوى أه
أو على القل أحد أهم المعايير والمقاييس للحكم على الأفراد

* لو كسبت مليون دولار إيه أول حاجة هتعملها؟.

مش عارف
هظبط نفسى بقى
بس المليون دولار يعملوا ايه فى الزمن ده .. بحبحيهم شوية ده حلم هوه يعنى حقيقى

سلوى يقول...

ناس كتير الفلوس بقت اهم شئ عنها

والفلوس طبعا مهمه وشئ جميل

يكفي إنها تغنيك عن السؤال
وتقدري تتصدقي فاليد العليا خير من اليد السفلي

وتعملي خير
وتكون وسيله للتقرب إلي الله

لكن المهم الفلوس جت إزاي ومنين


أما عن المليون
فماليش دعوة

أجبهم الأول وأنا أقولك هعمل بيهم إيه :))

لجين أبو الدهب يقول...

للاسف الدنيا حولينا بترغمنا ان الفلوس يكون عامل أساسى فيها ..

لكن طبعا الفلوس مش كل حاجة ..

عند ناس أصبحت هى العامل الأساسى واللى بتقوم عليه الحياة كلها ..

ولو معايا مليوم جنيه ..

امممممم اول حاجة هاعمل حجة

وهاجيب بباقية الفلوس شكولاتة D:

على فكرة ياموناليزا انا حبيت جوجو وزمردة جدا منك .ز

مواضيعك كلها قيمة ..

ربنا يجعله فى ميزان حسناتك ..

وبالنسبة لموضوع اليوم افتكرت دعوة كانت دايما معلمتى تقولى ادعى بيها على المال وقولى ..

اللهم اجعله فى يدى لا فى قلبى ..

جزاكِ الله خير حبيبتى ..

ودمتِ بخير ..

الفراشة الصغيرة يقول...

بصى يا موناليزا
المقوله المشهوره دلوقتى ين الناس

الجنيه غلب الكارنيه
فالمال بقى اهم شىء عند ناس كتير

اما لو معايا مليون دولار
ياااااااااااااه
ده انا هعمل بيهم عمايل

Tamer Nabil Moussa يقول...

السلام عليكم

انا لسة كاتب النهاردة موضوع ومشكلة بين ام وبنتها بسبب الفلوس والسلطة اللى اصبحت ناس كتير بتدور عليها وتتمنى تكون ليها بأى طريقة

مليون اعمل بيهم اية

مش عارف بس لما يجونى ممكن يكون وقتها اقولك

تحياتى

صمت المشاعر يقول...

ربنا يجزيكي خير علي البوست لانه بيناقش قضيه مهمه جداا


بس انا من رئيي ان الفلوش بجد مش اهم حاجه تبقي ايه لزمة الفلوس بدون رضا ربنا علينا ولزمتها ايه بدون سعاده وصحه وطاعه

مش كل حاجه بجد الفلوس بس الزمن دا للاسف بقت كل حاجه في الفلوس

ومازلتُ أتعلم يقول...

للاسف فيه ناس اهم معيار عندهم الفلوس
مع إن فيه معايير أهم بكتير جداً
والفلوس ديه مجرد هبه من ربنا
لاتعبر بأى حال عن الشخص واخلاقه ودينه.


لو جالى مليون دولار
هبطل اتفرج على من سيربح المليون:)
لابجد...فعلاً عمرى مافكرت لو جالى فلوس هعمل ايه؟؟؟

ديما بفكر بالمشقلب
محتاجة ايه اعمله..وهل فيه فلوس ولا لا؟

بس لو هسأل نفسى لو معايا مليون دولار هاعمل ايه؟
أكيد هاحولهم لجنيهات بسرعة
لان الدولار فى النازل:)


و اكيد هتبرع بجزء كبير
وهشبرق نفسى بقى واللى حواليا كمان.

salma mohamed يقول...

بالنسبة ان المال اصبح مقياس للحكم,
فده مش عندي انا,
اهم حاجه واهم مقياس هو الدين,
اما بقى لو كسبت مليون دولار هاعمل ايه
اولا لازم اتاكد ان مصدرهم من حلال,
تاني حاجه هشوف كل اللي نفسي فيه انا وكل اللي اعرفهم وكل حد محتاج لحاجه من اللي حواليا واحققها واسافر حج وعمرة واعمل مشروع ينمي الباقي لو كان فيه باقي ولو اني ما اظنش ان هيبقى فيه (:

موناليزا يقول...

همس الاحباب
ـــــــــــــ
اهلا بيك استاذ خالد
اشكرك جدا لرايك ولمشاركتك
وربنا يقدرك على فعل الخير دايما
دمت طيبا ولمدونتى زائرا




*********************************




محمد
ـــــــــ
وعليكم السلام ورحمة الله وبركاته
اهلا بيك استاذ محمد
متفقة معاج جدا فالراجل بيعيبه حاجات تانية كتير غير قلة الفلوس
ربنا يرزقك علما نافعا وقلبا خاشعا
==
دعوة غالية سألبيها سريعا باذن الله
اشكرك جدا لمشاركتك
دمت طيبا ولمدونتى زائرا





********************************




محمد غالية
ـــــــــــــ
اهلا بيك استاذ محمد
اشكرك جدا لمشاركتك
اللهم ارزقنا الرضا واجعلنا سببا فى سعادة وفك كرب من حولنا اللهم امين
دمت طيبا ولمدونتى زائرا




**********************************




ابو على
ــــــــــــ
اهلا اهلا بصاحب التعليقات المميزة
الله عليك
عاجبنى جدا تشبيهك ده
وصح جدا فممكن نقيس الايمان فى القلوب بهذا المقياس
انا مبسوطة بما تريد فعله رغم انى مش فاهمة اوى بس مش عارفة حسيت انى مبسوطة بجد(يمكن عشان هيبقى فيه فرص عمل لناس كتير مممم يمكن)
ربنا يرزقك يارب وتفعل كل ماتريد فى طاعة الله

اما عن زجزج وبجبج ودم الغزال فانا لو اعرف أقول على طول(على راى عادل امام فى مسرحية شاهد ماشافش حاجة):)
عموما ربنا ييسر وسأحاول مع قلمى:)
اشكرك جدا لمشاركتك
دمت طيبا ولمدونتى زائرا



**********************************




د. ياسر عبد الفتاح
ـــــــــــــــــــــ
اهلا بيك يادكتور
اشكرك جدا لمشاركتك
ليه الطمع ده:) مليون دولار حلو اوى بس هما ييجوا:)
دمت طيبا ولمدونتى زائرا




*********************************





سلوى
ـــــــــ
اختى الحبيبة:ده حلم ياسلوتى
انتى بس رتبى امورك عشان اول ماييجوا ماتفكريش كتير:)
اشكرك جدا لمشاركتك
نورتينى حبيبتى ودمتِ بخير





*********************************




لجين ابو الدهب
ـــــــــــــــ
اختى الحبيبة:اشكرك جدا لمشاركتك
وماتنسيش تدعيلى وانتى بتحجى:) وبما انك هتجيبى شوكلاتة بقى يبقى هاجى ازورك:)
حبيبة قلبى وهما كمان بيحبوكِ وطبعا موناليزا انتى فى قلبها طبيبعى دى مش محتاجة كلام:)
ربنا يكرمك ياقمر ويباركلى فيكِ
مااجمل هذه الدعوة اشكرك جدا لتعليمى اياها
اللهم اجعل المال فى يدى وليس فى قلبى
اشكرك جدا لمشاركتك
نورتينى لجين الجميلة ودمتِ بخير





********************************






الفراشة الصغيرة
ـــــــــــــــــ
اختى الحبيبة:للاسف بقى ده المتعارف عليه
طب مش كنتتقولى حاجة منهم:)
اشكرك جدا لمشاركتك
نورتينى حبيبتى ودمتِ بخير





**********************************





تامر نبيل
ـــــــــــــــ
وعليكم السلام ورحمة الله وبركاته
اهلا بيك استاذ تامر
اشكرك جدا لمشاركتك
طيب ايه رأيك ماتفكر من دلؤتى عشان لما ييجوا متضيعش وقت فى التفكير:)
دمت طيبا ولمدونتى زائرا




****************************




صمت المشاعر
ــــــــــــــــ
اختى الحبيبة:ربنا يكرمك اشكرك جدا لمشاركتك
وفعلا معاكِ حق
اللهم انا نسألك رضاك والجنة
نورتينى حبيبتى ودمتِ بخير




*******************************





وممازلت أتعلم
ــــــــــــــــ
اختى الحبيبة:اشكرك جدا لمشاركتك
والله انتى عسل:)
والله هو الدولار نازل!!
ربنا يرزقك ياحبيبتى بكل الخير
نورتينى ياقمر ودمتِ بخير




**********************************




سلمى محمد
ــــــــــــ
اختى الحبيبة:الله ينور عليكِ
لا طبعا هيتبقى كتير دول مليون دولار:)
ربنا يرزقك بالحج قريبا وماتنسيش تدعيلى هناك:)
اشكرك جدا لمشاركتك
نورتينى سلمى الجميلة ودمتِ بخير

ستيتة يقول...

فيه ناس يصلحهم الفقر
ولو اغتنوا لطغوا

وفيه ناس يصلحهم الغنى
ولو افتقروا لنسوا وتذمروا

هل انا انمي للفريق الأول او التاني
الله اعلم

بس ادعو الله ان يضعني في الفرقة الشاكرة الراضية سواء في الفقر او الغنى

انا بتمنى المليون دولار علشان عندي مزاج اعمل اكل كل يوم والناس الغلابة تاكل وساعتها استقيل م الشغل واقعد للموضوع ده

بس ايش ادراكي مش يمكن لو رزقتهم انسى وتلهيني الدنيا واقول مثل قارون؟

علشان كده انا سعيدة بالخير اللي ربنا اداهوني

ولا عيش الا عيش الآخرة

بحبك

وردة يقول...

البوست ده بجد مهم جدا
انا من رأيي المتواضع ان المال لايصنع سعادة الانسان بل بالعكس اذا زاد عن حده ممكن يصيب صاحبه بالمشاكل
ويصبح كل هدفه ازاي يحافظ عليه او يكبره مش يستمتع بيه
اما عن المليون دولار فححج الاول
وبعدين اجيب كل اللي نفسي فيه انا واهلي واصحابي
وخلاص
اظن مش حيكفوا
ههههههههههه
ابقي استلف منك بقي
سلام

KHALED يقول...

حاشترى عربية فيراررى

ســـــــهــــــــــر يقول...

السؤال : ليه الفلوس سيطرت على افكارنا و حياتنا و مش اى فلوس لا باه الحلم بانها تكون كتير
يمكن عشان ما بقاش فيه حد ادنى للحياه الكريمه متوفر بسهوله
يمكن عشان خط الفقر اللى بيعلى كل يوم و يبلع شرائح معاه
يمكن عشان مش كلنا بنقوم بدورنا ف التكافل الاجتماعى
يمكن و يمكن و يمكن كتير
بس لو فعلا اطفالنا بتفكر ف كده يبقى العيب فينا كلنا و مش بقصد اتهم شخص بعينه
لكن يمكن بتهم جيل بحاله ,, مجتمع بحاله ..

هو انتى دايما كده تجرجرينى ف كلام كتير بمواضيعك المثيره للجدل

بس جميله كالعاده

Mony يقول...

و الله جيتي علي الوجيعة يا موناليزا


ايوة وجيعة
عن حكيم بن حزام -رضي الله عنه-، عن النبي -صلى الله عليه وسلم- قال:
اليد العليا خير من اليد السفلى، وابدأ بمن تعول، وخير الصدقة ما كان عن ظهر غنى، ومن يستعفف يعفه الله، ومن يستغن يغنه الله


لسة كنت بتكلم عن الموضوع ده مع زوجي من فترة
كنت بقول له لو معايا مليون جنيه(مش دولار)هعمل بيهم ايه
(بحلم علي ادي)

اجيب لماما شقة في الحي اللي بتحبه
(انا حاطه عيني علي واحدة فعلا)
و اجهزها لها بكل ما تتمني

و كده المليون جنيه خلصوا


انما لو مليون دولار زي ما بتقولي



و اساعد المحتاج في تكالليف الحج
(علي نفقتي)
و ابدأ بأقربي اللي لم يحجوا

و اساعد الشباب و البنات المحتاجين في نفقا الزواج

و مش عايزة اي حاجة ليا غير ما يسترني انا و زوجي و اولادي


حتي زوجي غار مني و قال طيييب طالما انت ما اديتينيش من المليون بتوعك حاجة انا كمان مش هديكي من المليون بتوعي حاجة و اصرفهم علي ملذاتي الخاصة
(بيغيظني يعني)


لكن كلها احلام
ربنا المستعان

(المهاجر الى الله) يقول...

السلام عليكم ورحمة الله وبركاته:
فيه واحد سأل واحد فقير :قاله انت ليه مابتدعيش ربنا انه يزقك المال الوفير عشان تبقى زى فلان الغنى :
رد عليه وقاله اللى الفرق بينى وبينه يوم واحد بس :
استغرب السأل جدا وقاله ازاى؟
رد الفقير وقال امبارح فات وعدى بحلوه وبمره وبكرة دة فى علم الله ومحدش عارف ايه اللى ممكن يحصل (يعنى انا ممكن الاقى نفسى فوق وهوه تحت ) واليوم دة منشغلش بالنا بيه.
فيتبقى اليوم اللى احنا فيه وهوه دة الفرق اللى بينى وبينه:
..................
اذا جعلنا من المال مقياسا للحكم على الناس ، يبقى احنا بكدة بنفضل ابو لهب على سيدنا محمد (والعياذ بالله).
.............
المفرض اننا نحكم على الناس باخلاقهم ودينهم وعلمهم بالله : فالعلم يحرس صاحبه اما المال فيحرس من صاحبه .
................
لو (خير اللهم اجعلة خير) لقيت نفسى معايا مليون دولار ..الحقيقة انى هبقى محتار اعمل بيهم ايه
اتبرع بيهم لحركة حماس :
استعملهم فى مساعدة الشباب والفتيات على الزواج والعفة :
اعمل بيهم عمليات جراحية للناس اللى محتاجه عمليات ومش قادرة:واللا اعمل زى امراء الخليج واروح كباريهات اوروبا وارميللى قد خمسين مليون دولار تحت رجلين الرقاصة اهو يادوب شوية الفكة اللى معايا (لحظة .. الكلام على مليون دولار بس).. مش مستواياالكلام دة .. دول يادوب ممكن اقزقز بيهم شوية لب و سودانى على كورنيش النيل:
بس يظهر كدة ان فى الاخر وانا محتار كدة .. يحصل اللى مكنش عالبال ولا عالخاطر .. الدولار سعرة ينزل قصاد الجنيه المصر وتتقلب الاية ويبقى هوه الملطشة والجنيه الملك . وتجينى سكته قلبية حادة ..... و........ اصحى من النوم عشان الاقى نفسى مكنت متغطى كويس . احمم.

...............
تقبلى مرور اختى الكريمة وبارك الله فيك.
وياريت بلاش تعيشينا فى الاحلام وتقللبى علينا المواجع هههههه.

ملكة في بيتي يقول...

هل أصبح المال هو المقياس الوحيد لنحكم به على الأفراد؟

لو بنتكلم عن الحكم على الافراد بمقياس المال فالناس عموما 3 اصناف:

صنف مقياسه الوحيد المال.

يعني لو وجد الشخص اللي بيتعامل معاه من أصحاب الأموال فذلك كفيل بأن يجعله يغفر أي عيب وأي خطأ وأي نقص من وجهة نظره
ولو مافيش مال فالتعامل مع الشخص الفقير ما يلزمهوش حتى لو كان من أغنى الأغنياء بدينه وأخلاقه وقيمه ومبادئه.

وصنف آخر تجد المال مقياس من ضمن المقاييس وليس الوحيد

وجود المال ضرورة من وجهة نظره ولكن في نفس الوقت لا يدفعه المال إلى غض النظر والطرف على أخطاء وعيوب صاحب المال

وصنف آخير ونادر الوجود لا يضع المال ضمن حساباته مطلقا
فعنده الأفضلية بالتقوى ولا شيء غير الدين وحسن الخلق يستحق القياس عليه

**************
لو كسبت مليون دولار إيه أول حاجة هتعملها؟.

اكيد هلاقي مليون حاجة اعملها

مش هو ده اللي شايه همه

اللي يهمني ان الفلوس ما تغيرنيش

سهل اني ارصلك خطة عمل لاغتنام هذه الاموال فيما يرضي الله ويخدم الاسلام والمسلمين

بس يا ترى لما املك المال فعلا هعمل وانفذ

ولا نفسي هتتغير وحب المال وشح النفس هيطغى ؟

اللهم قنا شح انفسنا يارب

دمتي مبدعة

تحياتي

Hanan Elshafey يقول...

مهما الناس قالت الفلوس مش مهمه
بيرجعوا يقيموا كل شئ بيها
اصبح كل شئ بقيمته الماديه حتي الاشخاص
الزواج ، المشاعر .. كل شئ
الصحيح ان الفلوس تبقي وسيله وليست غايه نحقق بيها احلام مقنعه ومفيده مش نستخدمها للنفوذ والسلطه
موضوعاتك ديما حلوه
جزاكي الله عنها كل خير
اما لو معايا مليون دولار
هعالج والدي ، واعمل له هو ووالدتي حج ، اشتري بيت ، انشر اعمالي الادبيه لو تستاهل ساعتها والباقي بقي هعملل بيه مشروع لان والدي بيقول الفلوس موجوده عشان تشتغل وتشغل معاها ناس تانيه غيرنا
ودي

حاول تفتكرنى يقول...

مليون دولار ميعملوش حاجة

سأفترض جدلا أنهم مليار

بسم الله الرحمن الرحيم
إِنَّا جَعَلْنَا مَا عَلَى الأَرْضِ زِينَةً لَّهَا لِنَبْلُوَهُمْ أَيُّهُمْ أَحْسَنُ عَمَلا
صدق الله العظيم

لا اتمناهم

تحياتي

Gannah يقول...

ازيك يا موناليزا؟؟
الفلوس بقت فعلا مقياس للتقدير عند معظم الناس الا من رحم ربى وده الواقع وانت بتسمعى يا باشا بتتقال لكل اللى معاه فلوس
عمل ايه؟؟؟
اولا اسمحيلى المبلغ متواضع شوية فى عالم الملايين مليون واحد مش هيعمل حاجة
على ايه حال هعمل مشروع استثمارى فى المدينة علشان ابقى مقيمة هناك علطول
وهحجز سفينة احط عليها كل الناس اللى بحبهم ونلف العالم
وطبعا انت وروفى معزومين

تحياتى

موناليزا يقول...

ستيتة حسب الله الحمش
ــــــــــــــــــــــ
اختى الحبيبة:معاكِ حق طبعا
الله:) فكرتك حلوة اوى ايه رأيك تبقى تخلينى اطبخ معاكِ:) عشان الثواب يبقى بالنص وماتقلقيش بعرف اطبخ كويس :)
ربنا يرزقك ياحبيبتى بكل الخير
نورتينى ياجميلة واشكرك جدا لمشاركتك




**********************************





وردة
ـــــــــ
اختى الحبيبة:اهلا اهلا بالقمر بعد ول غياب
اشكرك جدا لرايك ولمشاركتك
ان شاء الله هيكفوا ويفيضوا كمان:)
بس لو احتاجتى سلف ولا يهمك احنا فى الخدمة:)
ماتنسيش تدعيلى وانتى بتحجى:)
رزقنى الله واياكِ بزيارة بيته قريبا
نورتينى وردة الجميلة ودمتِ بخير






*******************************




خالد
ــــــــــ
اهلا بيك استاذ خالد
ولو انى مش عارفة شكلها ايه بس واضح كده انها غالية:)
سؤال جانبى لو تسمحلى عايزها لونها ايه؟
ربنا يرزقك يارب وتجيبها قريب
اشكرك جدا لمشاركتك
دمت طيبا ولمدونتى زائرا





**********************************




سهر
ــــــ
اختى الحبيبة:متهيألى الاتهام الاول على التليفزيون اللى بوظ عقول الناس وجعل كل التفكير يكون بهذه الطريقة المادية البحتة . شوفى الافلام والمسلسلات ابطالها بيعيشوا ازاى وفين ..ونفوذهم واصلة لايه وده طبعا تجسيد مصغر للواقع اللى يمكن ماكناش واخدين بالنا منه بس واضح ان الجرعة الاعلامية كانت مكثفة لتجعل الغالبية يقتنعون تماما بان المال هو الحل السحرى لاى شئ

بس برضه ماقلتيليش لو معاكِ مليون دولار اول حاجة هتعمليها ايه(غير انك هتجيبيلى هدية طبعا:))
نورتينى سهر الجميلة ودمتِ بخير





*******************************




مونى
ـــــــ
اختى الحبيبة:اهلا اهلا بالقمر بعد طول غياب
ازيك ياحبيبتى يارب تكونى بخير
مين عارف مش يمكن الحلم يبقى حقيقة فى يوم من الايام:)
ربنا يسعدك ياجميلة انتى وكل من تحبين
نورتينى مونى واشكرك جدا لمشاركتك





*******************************




المهاجر الى الله
ــــــــــــــــــ
وعليكم السلام ورحمة الله وبركاته
اهلا بيك يافندم
اشكرك لذكر هذه القصة ولرايك ومافيه من حكمة
ههههههه بغض النظر عن كل هذه الاحلام المتناقضة بس لو بطلنا نحلم نموت:)
نورت مدونتى واشكرك جدا لمشاركتك




*********************************






ملكة فى بيتى
ــــــــــــــــ
اختى الحبيبة:اشكرك جدا لرايك ولمشاركتك
بس برضه ايه اول حاجة هتعمليها؟
ربنا يرزقنا الرضا دايما
نورتينى حبيبتى ودمتِ بخير





********************************





حنان الشافعى
ـــــــــــــــ
اختى الحبيبة:اشكرك جدا لرايك ولمشاركتك
ربنا يشفى والدك يخفف عنه يارب ويقدرك على فعل الخير ويرزقك بكل الخير والسعادة انتى ومن تحبين
نورتينى حبيبتى ودمتِ بخير







*********************************





حاول تفتكرنى
ـــــــــــــ
اهلا بيك يافندم
ربنا يرزقك الرضا
دمت طيبا ولمدونتى زائرا





********************************




جنة
ـــــــــ
اختى الحبيبة:اهلا اهلا بالغالية
انا الحمدلله بخير ماتحرمش منك ياحبيبتى
اشكرك جدا لرايك ولمشاركتك
الله:) اهو دا الكلام
طبعا موافقين على العزومة يارب تكسبيهم قريب:)
نورتينى جنتى الجميلة ودمتِ بخير
بحبك جدا:)

طوبه فضه وطوبه دهب يقول...

اختى الغاليه عمر ما كانت الفلوس مقياس لاى حاجه مش لكل حاجه والا كان اصحاب المال والمليونيرات هم اسعد البشر لكنهم بالعكس اتعس مخلوقات الله وفى دراسه حديثه انهم اكثر الاشخاص تناول للمهدئات والمنومات لانهم بيحرموا من اقل متع الحياه اللى اقل اقل انسان يمكن ان يتمتع بها فيحيوا تعساء وتموتوا تعساء الحمد لله على الفقر اقصد على النعمه الكبيره دى اما لو اخدت مليون دولار مش عارفه عمرى ما فكرت نفسى اوى اعمل مزرعه خيول عربيه اصيله بس مش هيبقى فيها غير فرس واحد بس لانه هو بمليون دولار اصلا

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى الكريمة
موناليزا
تحياتى
هههههههههههه دماغ جوجو واحلامه على فكرة هى كل احلام الاطفال الصغيرين اللى فى سنه
دا كمان فيه كبار بيحلمو بالحاجات دى
ومحدش راضى وعاجبه حاله
والحمد لله على كل حال
......
الفلوس عمرها ماكانت مقياس والكلام ده مش كلام شعارات وكلمتين فاضيين
يعنى مثلا انا بحترم حسنى بتاع البطاطا جدا ليه ؟؟ لانه راجل مش بيرضى ياخد حاجه مش من حقه وبياكل لقمته من شغله وعرقه على الرغم من فقره الفظيع
فيه ناس معاها فلوس كتيييييييير ومش برضى حتى اسلم عليهم لانهم ممكن لو لقوا حاجه مش من حقهم وممكن ياخدوها بياخدوها ولو على حساب الفقير
......
لو معايا مليون دولار اعمل بيهم ايه ؟
بصراحه مش عارف
وبعدين يعنى هتيجى منين المليون دولار دول ؟؟؟ انا واقعى ومش بحب احلم بحاجات صعبه انها تتحقق
طبعا كان ممكن اقول هروح احج وعمل واسوى
بس انا قلت الحقيقه وهى انى مش عارف بس لو جت المليون دولار ساعتها هبلغك وهقولك انا بعمل بيهم ايه
ههههههههههههههههههههه
بوست جميل كالعاده
تقبلى مرورى وتحياتى
ودمتى بكل خير وود
والسلام عليكم ورحمة الله وبركاته

KHALED يقول...

هيا دى العربية إللى حاشتريها كبداية

ملكة في بيتي يقول...

بعد تدقيق وتمحيص

اقدر اقولك ان اول حاجة هعملها باذن الله

اني احسن وضعي ووضع اسرتي والبي احتياجتها الاول

وبعد كده اعمل مشروعات استثمارية اشغل فيها الشباب العاطل

اجيب لهم خبرات تعلمهم الشغل وبعد كده اشغلهم بمرتبات تفتح بيوت

وأجوز شباب العائلة

وبعد كده بئى

ايه الرغي اللي انا فيه ده :$

انتي طلبتي اول حاجة بس

كفاية كده

تحياتي

أم أحمد المصرية يقول...

السؤال الازلي الفلوس وسيلة و لا غاية ربنا لا تجعل الدنيا اكبر همنا و لا مبلغ علمنا
بجد وحشتوني
في انتظاركم تزوروني

Unknown يقول...

الفلوس وسيلة للسعادة مش هي السعادة ومهم كمان نعرف هي جات منين
وأول مليون حطلع عشره لله واشتري شقة؟؟؟؟؟؟؟
ويبقى التواصل

بـِصَمتـِـ أميرة ــــى يقول...

الفلوس وسيلة ولكن الان للاسف الاغلبيه الظمى الفلوس اصبحت هدف
ربنا سبحانة وتعالى قال (المال والبنون زينة الحياة الدنيا ) صدق الله العظيم
ولكن الجشع اللى ملا الناس عشان يوصلو للزينة دى خلاهم يتصارعو ويخسرو بعض عشان الجنيه
توبيك جميل وحيوى وبالنسبة بقى لو انى معايا المبلغ ده مله هعمل بيه ايه

اعتقد انى هعمل حاجات كتير اولهم انى اخلى امى تحج ان شاء الله وانزه نفسى يعنى اكيد لانى زى اى انسان نفسى يبقى عنده حاجات كتير بس مش هنسى ربنا

تقبلى مرورى
اسعدنى تواجدى هنا كثيرا


ملكة بحجابى

موناليزا يقول...

طوبة دهب وطوبة فضة
ـــــــــــــــــــ
اختى الحبيبة:اشكرك جدا لرايك ولمشاركتك
بس انا مابتكلمش على حياتهم الخاصة على قد مابتكلم على نظرة الاخرين لهم
ايه ده هى الخيول العربية غلت أوى كدة!!!
بس ماتنسيش تعزمينى عندك :)
نورتينى حبيبتى ودمتِ بخير




*******************************




المعتصم
ــــــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك ولمشاركتك
عاجبنى نظرتك لعم حسنى بس مش فاهمة يعنى ايه ماتسلمش على واحد غنى حتى لو كان ظالم يعنى لو مد ايده ليك عشان يسلم هتقوله ايه؟ ولا دى مجرد كناية عن رأيك فى من يعمل نقيض عم حسنى؟

ايه اللى هتيجى منين دى؟ اهى جت وخلاص:) جت من عند ربنا هتعترض!!:) رزق وربنا باعتهولك
على فكرة انا بديلك فرصة انك تحلم لانه لسه ببلاش فاحلم بسرعة قبل ماتلاقية اتأمم :)
انا بقى عايزاك تفكر دلؤتى هتعمل بيهم ايه عشان لما ييجوا ماتضيعش وقتك فى التفكير:)
دمت طيبا ولمدونتى زائرا





********************************




خالد
ـــــــ
اهلا بيك استاذ خالد
وااااااو :)
كده بقى عندى حجة قوية انى أأجل فكرة الارتباط مجددا الى ان تمتلك هذه العربية التحفة



عشان تزفنى فيها:)
نورتنى وسعيدة جدا بالصورة





*******************************





ملكة فى بيتى
ـــــــــــــــ
اختى الحبيبة: سعيدة بعودتك
ربنا يرزقك يارب وتحققى كل اللى تتمنيه ويجعلك سببا فى سعادة كل من حولك
نورتينى حبيبتى ودمتِ بخير





********************************






ام احمد المصرية
ــــــــــــــــــ
اختى الحبيبة: يا اهلا يا اهلا
كنتى فيييييييييين؟؟؟
قلقتينى عليكِ
الحمدلله انك بخير

فى انتظار اجابتك على السؤال التانى:)
وانتى كمان وحشتيييينا جدا
نورتينى ياجميلة واسعدتينى بزيارتك





*******************************





معتز شاهين- باحث تربوى
ــــــــــــــــــــــــ
اهلا بيك استاذ معتز
اشكرك جدا لرايك ولمشاركتك
وربنا يرزقك يارب بكل الخير
دمت طيبا ولمدونتى زائرا





*********************************





ملكة بحجابى
ــــــــــــــ
اختى الحبيبة:اشكرك جدا لرايك ولمشاركتك
وربنا يرزقك بكل الخير ويكتب الحج لمامتك قريبا (وابقى خليها تدعيلى هناك:))
نورتى مدونتى واسعدنى مرورك وارجو دوام التواصل

salwa يقول...

السلام عليكم اخت موناليزا
للاسف اصبح المال عند الكثيرين المقياس
ولكن لا يجب ان لا نياس فلا زال يوجد
ناس تخاف ربها فعلا
ان ربحت مليون دولار ابني مدارس
لكي تقفل سجون
ادراج راااائع كعادتك
سلام

المعتصم يقول...

بسم الله الرحمن الرحيم
السلام عليكم ورحمة الله وبركاته
اختنا الكريمه موناليزا
تحياتى
انا بتكلم على المبدأ وانه الفلوس مش مقياس اتعامل بيه مع الناس
وعم حسنى ده مثال هو واللى عكسه
انما ده مايمنعش انه فيه ناس معاها فلوس وكويسين وانا بحترمهم انما مش علشان فلوسهم
..........
اللهم لا اعتراض
وهو فيه حد يكره الفلوس
بس هى تيجى
مليون دولار
يعنى يعملو خمسه مليون وستمية الف جنيه مصرى
والله كويس
مبلغ حلو برضو
نحلم بقى شويه
اولا احنا اربعة اخوات ووالدى يعنى خمسه يبقى المبلغ يتقسم علينا كلنا
يبقى كل واحد هياخد دخ بتاع مليون والفكه هنشترى بيها حتة ارض جنبنا ونبنيها بيت تانى علشان نوسع على نفسنا
وبعد كده وبما انى هموت وازور الكعبة يبقى نعمل رحلة حج جماعية للبيت كله
ثم بعد ذلك هكبر المشروع بتاعى
وكده الفوس هتبقى خلصت انما من ارباح المشروع هتجوز واشترى حتة عربيه صغنونه

على فكرة الاحلام اتأممت من زمان بس تقريبا انتى ماتعرفيش
هههههههههههههههههههههههه
بس هو فيه سؤال معلش
طب انتى هتستنى الاستاذ خالد يشترى العربيه علشان تتزفى فيها
هنفترض انه حصل قريب ولو ان العربيات الفيرارى دى غاليه قوى بس ربنا يديه ويكرمه ويشتريها يارب
هتتزفى فيها ازاى ؟؟؟؟ ماتستغربيش اوى كده
العربيه دى مش بتشيل غير شخصين بس
يعنى لو العريس مش بيعرف يسوق يبقى مش هتتزفى فيها ولو بيعرف يسوق هلى ياترى الاستاذ خالد هيهون عليه يسيب لكم العربيه الغاليه دى ؟؟؟؟؟
ده سؤال برئ على فكرة
ههههههههههههههههههههههههههههههه
تحياتى ودمتى بكل خير وود
والسلام عليكم ورحمة الله وبركاته

KHALED يقول...

لأ لأ بقة كدة حانطمع من أولها ..
طبعا ربنا يرضيكى ويقدملك الخير و بما إنى أخوكى فلازم تسمعى كلامى ..
أنا ناوى أزفك فى إللى أحلى من الفيراررى ..
مالة دة

هههههه

موناليزا يقول...

سلوى
ـــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
وربنا يرزقك يارب بكل الخير
نورتينى سلوى الجميلة ودمتِ بخير





********************************





المعتصم
ــــــــــــ
وعليكم السلام ورحمة الله وبركاته
اهلا بيك يافندم
اشكرك جدا للتوضيح
ايه دا ايه دا طب ومامتك؟؟ كده تنساها ولا عشان صعايدة بقى المرأة مهدور حقها:) من موقعى هذا بأطالب بتعديل هذا التقسيم:)

ماتنساش تدعيلى وانت بتحج:)

حتى الاحلام أتأممت!! ياخبر.. عادى فى حاجات كتير حصلت واضح انى معرفهاش اصل عُمرى وقع منه كام سنة كدا ومعرفتش ايه اللى حصل فيهم:)


ايوة هستناه(يشتريها على مهله خالص انا مش مستعجلة او بمعنى اصح مش عايزة اكرر التجربة تانى بس ممكن وجود العربية يغرينى فارجع فى كلامى ههههههه)

تصور اول مرة اعرف انها لشخصين بس
عادى وبما ان خيالى واسع وقدرتى على الحلم لم تنتهى أو تتأمم بعد هحلها :)

انا طبعا مايرضنيش استاذ خالد يسيب لنا العربية(اصلى بحب اضع نفسى مكان الاخرين قبل مااطلب حاجة)

ممكن استاذ خالد يسوق والعريس جنبه وانا فى شنطة العربية ههههههههه
عروسة بقى ومحدش ياخد على افعالها بس طبعا الشنطة هتكون مفتوحة عشان التهوية:) وعشان اتفرج على العالم الخارجى كمان:)
وممكن كمان
استاذ خالد يسوق عادى برضه والعريس جنبه وانا جنبهم وهخلى الفستان مايبقاش منفوش اوى والباب يتقفل كويس عشان مش مع اول ملف الباب مايتفتحش وانا اكون على الارض هههههههه

وممكن انا والعريس نبقى على سقف العربية من فوق ههههههههه وبرضه استاذ خالد اللى هيسوق

وممكن اركب مع الاستاذ خالد والعريس يركب فى اى عربية تانية ونكون جنب بعض وممكن ساعتها اعمل له اختبار واقوله لو حصلتنى يبقى تستاهلنى واخلى بقى استاذ خالد يسوق باقصى سرعة(المهم يعنى مايلحقنيش وده المطلوب لانى مش ناوية اكرر التجربة تانى بس هبقى مبسوطة انى ركبت العربية وخلاص) ههههههه

شوفت بقى محلولة ازاى:)

نورتنى وسعيدة بتواصلك






*********************************




خالد
ـــــــــ
اهلا بيك استاذ خالد
حقى طبعا مش انا صاحبة البشارة السعيدة :)
هههههههههههههه ماشى يا استاذ خالد
اهو برضه تجديد
انا يعنى هعرف مصلحتى اكتر من اخويا الكبير:) يمكن يبقى وشه حلو عليا:)
بس ده يادوب ليا لوحدى لان ناوية فستانى يكون منفوش اوى العريس بقى يقعد فين؟ ابقى قعده جنبك بقى وخلاص
جوز اختك بقى ولازم تستحمله:)

نورتنى وسعيدة بتواصلك

المعتصم يقول...

كده شكلك مش هتتجوزى خالص
دا اخونا الاستاذ خالد نقل نقله فظيعه
من الفيرارى للتوك توك مرة واحده
طب مافيش فى النص مرحله انتقاليه ؟؟ يعنى حتى عربيه نص عمر وبعدين نروح للتوك توك
انما كده بصراحه صدمة جامده اخر حاجه
ههههههههههههههههههههههههههههههههه

المعتصم يقول...

انتى شكلك على نياتك
ماما دى كده اكتر واحده كسبانه
لانها كده هتاخد مننا احنا الخمسه
وبعدين مين اللى قال ان حقها مهدور
دى هى الخير والبركه

موناليزا يقول...

المعتصم
ـــــــــ
اهلا بيك يافندم
انا قلت من الاول مش عايزة:)
ولا صدمة ولا حاجة اهو برضه اتفسح شوية بيه
عادى أختك واخدة المواضيع ببساطة:)
====
وانت اول مرة تعرف!
هو فى حاجة موديانى فى داهية غير انى على نياتى:)
عموما ايوا كده الاعتراف بالحق فضيلة
ربنا يخليهالكم ويباركلكم فى عمرها
ممكن تخليها تدعيلى
دمت طيبا ولمدونتى زائرا

Unknown يقول...

السلام عليكم ورحمة
الله تعالى وبركاته
بصى وبكل صراحة
الفلوس بقت شىء
حيوى واساسى اوى
فى حياتنا اينعم مش
هى كل اسباب السعادة
بس برضه من غيرها مش
حيبقى فيه سعادة خاااالص!
ولو معايا فلوس بالكترة دى أممم
مش عارفة الحقيقة لكن اللى متاكده منه حأروح أحج (حج فاخر ) وكمان حاشترى ولو اوضة او حتى كشك على البحر
نفسى فعلا اسكن جنبه وانا (بصحتى وعافيتى )واروح كل يوم امشى الصبح
على الشط.واهى احلام مين عارف!

ahmed_k يقول...

للأسف هناك الكثير من الناس من يحكمون على غيرهم بمقياس ما يملك من المال والعقار وهذه طامة كبرى
فلرب أشعث أغبر إن أقسم على الله لأبره
فالأفضليه للتقوى والعلم
هكذا أمرنا ربنا سبحانه وتعالى
ونبينا الكريم عليه الصلاة والسلام حين قال (إذا جاءكم من ترضون دينه وأمانته فزوجوه إلا تفعلوا تكن فتنة في الأرض وفساد كبير) ولم يقل إذا جاءكم من ترضون ماله ولذلك نجد من المشكلات الناجمه على الإختيار على أساس المال وترك مبدأ الدين والأمانه

ولو كسبت مليون دولار اول حاجه حهملها حطلع زكاتهم 2.5%وبعدين أفكر

قصه جميله وهي أحلام لكل طفل بس طبعا مش بالسوء ده
حلم الغنى يحلمه كل طفل لكن الجحود صعب أن يدركه الأطفال

موضوعك جميل كعادة مدونتك دوما
وتقبلي تحياتي

حارة سد يقول...

لو كان المقياس هو مقياس المال
لكان العظماء وسادة القوم منذ أزل التاريخ ليسوا من ذوي الاحترام

ولكان الملوك الجبابرة هم من يستحقون الحترام والتقدير ورفعة المكان

لن أرد على سؤال امليون دولار...لأنني قد أدعي شيءا الآن وحينها سيختلف الوضع تمام الاختلاف
سأكون سعيدا ان أعطيتيني المبلغ حتى اروي شعوري بالتفصيل
:)

الحارة سد

ريمان يقول...

طبعا المال مش مقياس ابدا نقيس بيه الناس

لو معايا المبلغ ده اول حاجه افكر فيها انى احج واخد معايا ماما وبابا

جنّي يقول...

السلام عليكم

المال فتنة قبل ان يكون زينة الحياة الدنيا ..

التغيرات المادية في مجتمعنا والعالم من حولنا جعل معظم الناس الا من رحم ربي ينظر للمال على انه غاية ..

اما الحكم على الافراد من الناس من ينظر اليه انه المقياس الوحيد ..
اما الكيس الفطن ينظر لاشياء اخرى : {يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ }الحجرات13

السؤال الثاني : ندعو الله ان يجعلها في ايدينا وليس في قلوبنا ..

اما ما افعله
عن أبي هريرة ، قال : قال رسول الله صلى الله عليه وسلم : « دينار أعطيته في سبيل الله ، ودينار أعطيته مسكينا ، ودينار أنفقته على أهلك » ، قال : « الدينار الذي تنفقه على أهلك أعظمها أجرا » أخرجه مسلم من حديث وكيع ، عن الثوري

دعواتك لي بتمام الشفاء

واثقة بربها يقول...

الفلوس مش كل حاجه
هى شئ مهم فى الحياة كوسيلة لحياة افضل
بس مش غاية

لانها شئ ممكن يروح فى اى وقت
و للى فاكر انها ممكن تعمل له مكانه بين الناس ده واهم كبير
لان دوام الحال من المحال
_____

بالنسبة ليا لو معايا مليون جنية
هفكر كتير هعمل بيهم ايه
لانى مش هيبقى معايا مليون جنية كل يوم

اول حاجه هجيب للى نفسى فيه ليا و لعيلتى و لكل للى بحبهم

ثانى حاجه جزء منهم هيروح فى الخير

ثالث حاجه هحاول اعمل مشروع ناجح اعيش من خلاله

هاني سعيد يقول...

اه دا حقيقى للاسف اصبح المال هو مقياس للبنى ادميين بس على فكرة اللى يخلى المال مقياسه للى قدامه بيطلع حد خسيس ومايساويش حتى ان الواحد يفكر فيه دقيقة مهما كان قريب مننا او عزيز علينا لان عمر المال ما هيوزن بنى ادم ولا يعمل انسان وبالعكس الانسان هو اللى اصلا اخترع المال وعمله وبلو معايا مليون مليم هعمل بيهم ايه صدقينى حاجات كتير بس هما فيييييييييييييييييييييييييييييييييييييييييييييييييين
تحياتى ونتواصل بود

موناليزا يقول...

نوراهاتى
ـــــــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
ربنا يحقق احلامنا جميعا
وابقى اعزمينى عندك عشان نتمشى سوا على البحر:)
نورتينى حبيبتى ودمتِ بخير




******************************




احمد-ك
ـــــــــــ
اهلا بيك استاذ احمد
اشكرك جدا لرايك ولمشاركتك
ينصر دينك:)
على فكرة لم يعد يوجد اطفال فى براءة الاجيال السابقة وده من واقع تعايشت معاه فترة لانى
كنت مُدرسة رياض اطفال واوقات كتير كنت بشعر ان انا الطفلة ببرائتى مش هما:)
دمت طيبا ولمدونتى زائرا




**********************************




حارة سد
ـــــــــــ
اهلا بيك يافندم
اشكرك جدا لرايك ولكنى اتحدث عن انطباعكم الشخصى تجاه المال
واذا كان على المليون دولا بسيطة غمض عينيك وتخيل انك كسبتهم ووافينى بالاخبار:)
دمت طيبا ولمدونتى زائرا





**********************************




ريمان
ــــــــ
اختى الحبيبة:اشكرك جدا لرايك ولمشاركتك
ربنا يرزقكم بالحج قريبا وماتنسوش تدعولى:)
نورتينى حبيبتى ودمتِ بخير






*******************************





جنى
ــــــــ
وعليكم السلام ورحمة الله وبركاته
اهلا بيك استاذ سعيد
اشكرك جدا لرايك ولمشاركتك المتميزة
شفاك الله وعفاك اخى الكريم وجعل ما انت فيه فى ميزان حسناتك
دمت طيبا ولمدونتى زائرا




*********************************




واثقة بربها
ــــــــــــ
اختى الحبيبة:اشكرك جدا لرايك ولمشاركتك
ورزقكِ الله بكل الخير
نورتينى حبيبتى ودمتِ بخير




*********************************




هانى سعيد
ــــــــــــ
اهلا بيك استاذ هانى فى زيارتك الاولى
اشكرك جدا لرايك ولمشاركتك
وكنا عايزين نعرف اول حاجة ناوى تعملها
نورت مدونتى وارجو دوام التواصل

Unknown يقول...

المال عصب الحياة وأى أمة لا قيمة لها بدون المال .. هذا على المستوى العام ، لكن الناس لدينا لديهم ثقافة " اللى معاه قرش يساوى قرش " فالمشكلة على نوعية التنشئة .

"أم أدهم المصرية" يقول...

السلام عليكم ورحمه الله وبركاته

سؤال اعتقد اجابته واحده عند الكل

اكيد الفلوس بقت كل حاجه وبيها بنتحكم فى كل حاجه

المشكله مش فى الفلوس المشكله فينا احنا لاننا بقينا عبيد للفلوس

اما بئه لو كسبت مليون دولار
هعمل كتير بس اول حاجه هعمل جامع كبيرررررررررررر جدا حتى لو اضطريت اصرف المليون دولا على الجامع بس

-------------------------------

موناليزا يقول...

ابو المعالى فائق
ــــــــــــــــــ
اهلا بيك يافندم فى زيارتك الاولى
اشكرك جدا لزيارتك وكنا نريد رأيكم وانطباعكم الشخصى
نورت مدونتى وارجو دوام التواصل





*********************************




لؤلؤة الرحمن
ــــــــــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
بس الاجابة مش واحدة عند الكل ولاحاجة(اقرأى التعليقات:))
ربنا يرزقك بكل الخير
نورتينى حبيبتى ودمتِ بخير

Punny_Punny يقول...

* لا المال لم يصبح هو المقياس الوحيد حتي تحت الأوضاع المالية السيئة, و لا يعتبره المقياس الوحيد سوي الأطفال و أصحاب النفوس المريضة.

* أما لو كسبت مليون دولار فأول حاجة هاعملها إنييييي ...
هاتجنن!!!!!!!!!!!!

موناليزا يقول...

بنى بنى
ــــــــــ
اختى الحبيبة:اشكرك جدا لرايك ولمشاركتك
:) بعيد الشر عليكِ
طيب نخليهم بالجنية بدل الولار:)
نورتى مدونتى وارجو دوام التواصل

احساس لسه حى يقول...

عزيزى

المال بقه اكبر سند فى الكون اليومين دول

لاكن لكى احكم على الفرد المال هيحكم عليه فى اشياء واشياء لا

الاخلاق بس اللى بتحكم على انسان لاكن التعامل معاه شئ اخر

هو السؤال مش واضح

الحكم على اى انسان ملهوش دعوى بالمال

لاكن لو تقصدى التعامل معاه او اى شئ اخر ممكن لاكن هحكم عليه ازاى يعنى


لو كسبت مليون جنيه

بصراحة اى حاجه ممكن اقولهالك دلوقتى معملهاش لما تجيلى المليون جنيه

لان الكلام دايمن سهل لاكن الواقع بيغير التفكير


حلو عرض الموضوع فى قصة بين شقيقين

وسلميلى على جوجو وزمردة

تحياتى

سلام

موناليزا يقول...

احساس لسه حى
ـــــــــــــــــ
اهلا بيك يافندم
بداية لا تقول لى عزيزتى..موناليزا افضل
نوضح السؤال اى خدمة يافندم:)
يعنى بتحكم على الاشخاص من خلال ما يمتلكه من مال وسُلطة أم انطباعاتك على الاخرين كيف تحددها؟

المليون بالدولار يافندم مش بالجنيه:)
عموما احلم دلؤتى ولما ييجوا نبقى نقارن:)
اشكرك جدا لرايك ولمشاركتك
سلامك هوصله لجوجو ولزمردة حاضر من عينيا:)
دمت طيبا ولمدونتى زائرا

dreem يقول...

مليون دولار امممممممممممممم
هاخد امى وبناتى واخواتى وولادهم ونطلع كلنا نحج
وهخرج زكاة كتيييييييييييير
واشترى لبنتى عربية وافرق شوية فلوس على الاقارب
وخلاويص الفلوس خلصت
ما معاكيش خمسة جنيه سلف لغاية ما افك الدولارات ههههههههههه
فكرة مفتكسة دى
تحياتى

موناليزا يقول...

دريم
ـــــــــ
اختى الحبيبة:اهلا بيكِ فى زيارتك الاولى
اشكرك جدا لرايك ولمشاركتك
ربنا يرزقك بكل الخير وتحققى كل ماتتمنيه انتى وكل احبابك وماتنسيش تدعيلى:)
خمسة جنية بس ياحبيبتى انتى تؤمرى:)
نورتى مدونتى وارجو دوام التواصل

نسيبه يقول...

السلام عليكم ورحمة الله وبركاته
انا رايي ان احنا اللي بنحدد الحكم علي الافراد يكون تبع لتفكيرنا الشخصي وكل واحد يحكم تبعه هو ولكن طبعا المال ليس المقياس الصحيح ولا الوحيد في الاخلاق ,المعاملات,التفكير,حاجات كتير جداغير المال
وعايزة اقول حاجه مهمه جدا ان الطفل ده ممكن فعلا يبقي كده لما يكبر وخاصه لو فضل الحاجه اللي يفكر كده من الاول موجوده بس مشكلة الاطفال ان احنا ما نعرفش طريقة تفكيرهم دايما ولو مش عاوز يعرفنا حاجه مش هنعرف
نيجي لاجمل سؤال انا لو جالي مليون جنيه اول حاجه هاعملها اني اودي ماما تحج وتاخد معاها مبلغ كبير للمصاريف والشراء وتاني حاجه اعطي كل اسرة اعرفها الف جنيه ولو اتبقي فلوس هاشتري عربيه وياريت لو يبقو تلاته اربعه مليون عشان كان نفسي اعمل مجمع كبير يضم مستشفي علي اعلي مستوي وفيها علاجها واشعتها وتحاليلها علشان كل المرضي الفقراء يتعالجو عندي ببلاش علي اعلي مستوي بس للاسف محتاجه اكتر من اربعه مليون ومحتاجه ناس تشتغل معايا وتتابع وتدير الموضوع الحلم كبر مني شوية معلش بس ربنا قادر علي كل شيء معلش نسيت اقول ان في مسجد كبير هيبقي ان شاء الله جنب المجمع اهم حاجه فيه انا كبير وواسع ومنور ونظيف جدا وفي عامله كويسه جدا ومنظمه المكان ومنظفاه زي العامله اللي عندنا في المسجد اللي باحضر فيه معلش طولت عليكي
بس ما عرفتش انت هتعملي ايه؟

موناليزا يقول...

نسيبة
ـــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
على فكرة هما بالدولار مش بالجنية يعنى حسبة خمسة مليون جنية كدة:)
خدى راحتك بقى:)
ربنا يرزقك مامتك يارب حجة قريبا وابقى خليها تدعيلى هناك
انا معاكِ قلبا وقالبا
يعنى ممكن نشارك بعض بالفلوس والمجهود كمان:)
انا ياستى اول حاجة هطلع 2.5% للمستشفيات ومعاهد الاورام
وهشاركك فى مشروعك بجزء كبير منه بس هضيف مكتبة كبيرة فيها أمهات الكتب وهعمل مشغل للتفصيل وهنعلم بنات كتير وشباب كمان ويبقى مصنعنا مشهور جدا وعلامة "صنع فى مصر" فخر لمنتجاتنا ماهى على أحسن مستوى
وهجيب بالباقى هدايا كتير لكل احبابى
بس ياستى:)ده اللى فى دماغى دلؤتى

اللهم ارزقنا الطاعة والرضا والعفاف والغنى
نورتينى حبيبتى ودمتِ بخير