الأحد، 24 مايو 2009

ساعدنى واساعدك

تخيل لو كنت عطشان أوى ووجدت زجاجتين ظننت أن بداخلهما ماء وهممت لتشرب من أحدهما فوجدت شخصاً يخبرك بأن الزجاجة الأولى "خل" والأخرى"سفن أب" وعندما علم بأنك عطشان جاء إليك بكوب ماء فاتر ليروى به ظمأك.
بماذ ستشعر ناحية هذا الشخص؟
هل ستقول عليه تدخل فى حياتى دون أن أسأله؟
هل ستصبح ممتن له؟
هل ستقول هذا شئ طبيعى ؟
إجابتك على هذه الأسئلة ستخبرك بمدى تقبلك النصيحة من الآخرين.
تخيل لو كنت فى حديقة وفيها مقاعد بشمسية وعندما جلست كنت ستقع لأن هذا المقعد مكسور فقمت وجلست على مقعد آخر. ثم جاء شخص هم أن يجلس على نفس المقعد الذى أكتشفت أنه مكسور.
ماذا سيكون رد فعلك؟.
هل ستنبهه بهذا؟ .
هل تتركه ليجرب بنفسه ؟.
هل تنتظر أن يسألك أولاً؟.
أم لا تهتم أصلاً؟.
إجابتك على هذه الأسئلة سيحدد مدى نصحك للأخرين.
طيب لو حد بياخد رأيك فى حاجة (سواء لون ملابسه أو تسريحة شعره أو..أو...)هتقولها بصراحة ولا هتنافق أو تجامل.
يعنى لو حد سألك على جارك مثلا اللى متقدم لبنته وأنت عارف أن أخلاقه سيئة هتقوله الحقيقة ولا هتقول الكلمة المشهورة فلان طيب بس عصبى شوية.
ولو بيسألوك على واحدة وأنتِ عارفة أنها صعبة المعشر هتقولى الحقيقة ولا هتخافى كلامك عنها يوصلها.
ولو حد بيسألك على نوع جهاز معين مثلا وأنت أصلاً ماتعرفش هتقول بكل بساطة معرفش ولا هتفتى.
طيب ولو محدش سألك من أصله برضه هتقدم النصيحة ولا هتكبر دماغك.
فيه ناس هتقول هو أنا يعنى كان مين نصحنى وناس تانية هتقول بالنسبة لموضوع الزواج وافرض حصل نصيب أنا أطلع وحشة ليه وهكذا.
ياترى أنت بقى رأيك إيه؟
على فكرة ياجماعة المسلم مايقولش وأنا مالى لأن المؤمنون إخوة واللى ترضاه لنفسك أو لأخوك برضه ترضاه لغيرك"لايؤمن أحدكم حتى يحب لأخيه ما يحبه لنفسه" وماتنساش بأن "المسلمون فى توادهم وتراحمهم كالجسد الواحد إذا تداعى منه عضو تداعى له سائر الأعضاء بالسهر والحمى"
وكمان" كان الله فى عون العبد طالما العبد فى عون أخيه".
وأخيراً :
* من استنصحك انصحه ولا تبخل عليه فقد تنقذه.
* تقبل نصيحة الآخرين بصدر رحب وخاصة عندما يكون الشخص الناصح أهلاً للثقة.
* خد بنصيحة الأقربون لك أولاً.
* عامل الناس وانصحهم كما تحب أن يعاملوك.
* انصح الناس بالخير تكسب ودهم.
* لا تنسى بأنه لو كنت فظاً غليظ القلب لانفضوا من حولك.
* لا تخف من النقد إذا كنت محقاً ولا تتجاهله إذا كنت مُخطئاً.
يسعدنى إضافة الأستاذ MOHAMMED ELBANNA
وفيها بعضاً من آداب النصيحة سواء للناصح أو الموجه إليه النصيحة.
أولاً الناصح :-
- الاخلاص لله سبحانه وتعالى في تقديم النصيحة وابتغاء مرضاة الله.
- الحكمه فى النصح واختيار الوقت والمكان والكلام المناسب {ادع إلى سبيل ربك بالحكمة والموعظة الحسنة وجادلهم بالتي هي أحسن}.
- أن تكون النصيحه في السر وليست في العلن لأن النصيحه فى العلن فضيحة وكما قال الشافعي (رضي الله عنه ):تَغمدَني بنُصْحِـك فـي انفـرادي وجَنِّبْنِــي النصيحـةَ في الجَمَاعةْ
فإنَّ النُّصْــحَ بَيـن الناس نوعٌ مـن التوْبيخ لا أَرْضَى استِمَاعه
- الامانه وعدم كتم النصيحه .
- معاونه المنصوح على التغيير من نفسه بعد النصيحة.
.ثانياً /المنصوح:-
- تقبل النصيحة بصدر رحب .
- اشكر الناصح على امانته معك .
- غير من نفسك واعمل بالنصيحه ولا تكابر على الحق ، ولا تكن ممن قال فيهم الله {وإذا قيل له اتق الله أخذته العزة بالإثم فحسبه جهنم ولبئس المهاد}.
- اعمل على نصح غيرك كما نصحك الاخرون .





هناك 74 تعليقًا:

حاجات جوايا يقول...

السلام عليكم ورحمة الله وبركاته

موضوع رائع جدا حبيبتى
فعلا الدين النصيحة
اما عن إجابة الاسئلة فالناتج انى ممن يتقبلون النصح .. وأيضا ممن يبادرون بنصح الآخرين

ومبدأى فى الحياة حب لأخيك ما تحبه لنفسك

بالنسبة للنصح فى الزواج
محصلش معايا قبل كده الموضوع ده
بس اعتقد انى هقول الحق :)
او هرشح للى بيسال عروسة تانية اكتر ملائمة


ملحوظة
بالنسبة للبنات .. لما بتحبى تنصحى واحدة ان فلان مش مناسب ليها .. رد فعلها التلقائى والفورى بيكون انك غيرانة منها ومش بتحبيلها الخير.. او حتى طمعانة فيه لحد قريبك :(


وده بيضع الناصح فى موقف حرج بالتاكيد

موضوعك رائع حبيبتى
دمتى مبدعة فى اختيار موضوعاتك وعرضها

دعاء يقول...

أنا بطبيعتى مش بحب المجاملة بس كمان مش بحب حد يزعل منى
بس لما حد يسألنى عن رأي بقول الحقيقة مهما كانت لأن الإنسان ده لجأ لي و وثق فيا. ولازم أكون عند حسن ظنه.
موضوع يدعو للتفكير و لإعادة النظر فى تصرفاتنا
جزاك الله خير.

تلميذة سلمان الفارسى يقول...

جزاكِ الله خيرا حبيبتى فى الله
مع العلم أن مايفعله الشخص مع الآخرين حتما سيقابل مثله تماما
دمتى بكل خير

حاول تفتكرنى يقول...

تماما تماما

فدائما نحتاج إلى نصح الآخرين ، فمن غير المقبول أن تكون أراؤنا دائما صواب ، أو كل اتجاهاتنا سليمة

وحتى لو أخذنا مقاعد الناصحين ، فوجب علينا عدم البخل بها على الغير ، ولو لم يأخذوا بها

النصيحة مكانتها عظيمة، ومنزلتها عند الله عالية رفيعة، وحاجة الإنسان، كل إنسان للنصح لا تقل عن باقى حوائجه ، لذلك حصر رسول الله صلى الله عليه وسلم كل الدين فيها فقال: "الدين النصيحة" ثلاثاً، لأنها بها قوامه و صلاحه، وعندما قيل له: لمن يا رسول الله؟ قال: "لله، ولكتابه، ولرسوله، ولأئمة المسلمين، وعامتهم."

تحياتي

romansy يقول...

اه لو كنا خايفين على بعض مكنش دا حال المسلمين الحمد لله على كل شئ فيه ناس كتير بتتقبل النصيحه وبتنصح وفيه ناس مش بتحب تتنصح بس الحمد لله لسه فيه خير فى المسلمين

د. ياسر عمر عبد الفتاح يقول...

طبعاً النصح شيء مهم جداً
لكن النصح ده فن
ومش كل الناس بتجيده
ولو متقلش بطريقة صحيحة .. هيتقلب لضده

ربنا يجعلنا من المجيدين له

رحــــيـل يقول...

مناليزا

تعرفى الموضوع ليه جوانب كتير يعنى مثلاانا بيفرق معايا قوى اللى بينصح لانى اصلا مش بالسهل انى اتقبل نصيحه حد بس الفكره هل الحد اللى بينصح ده انا اهمه فعلا ولا بينصح من باب الواجب والمفروض ده انا بصراحه مش بحبه خصوصا ان لازم اللى ينصحنى يكون فاهم طبيعه شخصيتى كويس لان ممكن نصايحه تكون مش مناسبه لشخصيتى
من ناحيه انى انصح اكيد لو حد يهمنى برضه جدا خصوصا لو طلب راى اكيد هقول بصراحه

فى امور الناس بتفهمها غلط يعنى انا ممكن حد يسالنى عن حد ولو رديت بغير الرد اللى هو عايز يسمعه كلامى هيتفسر بمعنى تانى عشان كده هرد رد دبلوماسى من غير كدب طبعا

تحياتى وتقديرى

محمد يقول...

السلام عليكم ورحمة الله وبركاته

أختي العزيزة

بداية شكرا لك إذ تعملين بمبدأ المساعدة والمعاومة فجزاك الله خيرا


وعن جرير بن عبد الله قال: " بايعت رسول الله على إقام الصلاة وإيتاء الزكاة والنصح لكل مسلم "

ولذا قيل الدين النصيحة

ولجرير بن عبد الله قصة جميلة تدل علي اهمية التناصح نذكرها باختصار وتصرف
إذ ورد ان جريرا ارسل غلامه لشراء حصان فلما ذهب الغلام واشتري الفرس من صاحبه قال للبائع انظرني حتي اتي لك بالمال من سيدي وفي اثناء هذا الحوار وصل اليهم جرير بن عبدالله فقال لغلامه بكم اشتريت هذا الحصان فقال بثلثمائة درهم ...... فراي جرير ان الفرس يستحق اكثر من هذا فأحذ يزيد في الثمن حتي ظن انه وفاه ثمنه ولما تعجب غلامه من فعله ذكر له هذا الحديث السابق ........ أردت بذكر هذا الموقف إذ أن الماديات من اهم العوامل التي تجعل الناس يتقاعسون عن النصح وخاصة إن كانت ستجلب لهم خسارة في وجهة نظرهم ....... انظروا الي هؤلاء كيف يقيسون الدنيا

وصدق الرسول الكريم غذ يقول أصحابي كالنجوم بأيهم اقتديتم اهتديتم


خالص مودتي وصادق دعائي

أم أحمد المصرية يقول...

انا معك في ان الدين النصيحة
انا لو حد سألني اكيد نصحه بما يخلص ضميري
لكن لو لم يسأل فهذا يتوقف علي الشخص يعني لو عارفة ان كلامي حيجيب نتيجة معاه انصحه لو شخص ليس لدي شيء ضده انصحه
لكن لو شخص حياخد كلامي لو نصحته علي محمل سيء و لن يقبله بل وممكن يرد علي رد بايخ
اوفر النصيحة احسن و الكلام ده للاسف عن تجربة حولت بعض الاصدقاء لمجرد زملاء

salma mohamed يقول...

في ناس بتقبل النصيحة حتى لو كانت طريقتها وحشه بس بتبقى عارفه ان اللي قدمها عاوز مصلحتها,
وفي ناس لا تقبل اي نصيحة,
وناس بتحتاج لطريقة معينه نتبعها في نصحه,
فلازم نراعي ده كله في النصيحة,
بجد مموضوع مميز ومفيد كعادتك,
فجزاكِ الله خيرا.

ذكرى رحيل قلم يقول...

السلام عليكم

ايوة كده كنتي فين من زمان
وحشتني موضيعك اللي وراها هدف وغاية

علي العموم انا من الاول مبعرفش اقول غير الصراحة حتي لو هتزعل الناس مني وده حاجة كنت مشهورة بيها وسط اصحابي ام عن موضوع بصراحة لو لوحدي هاعمل الصح ودل الناس اما لو معايا زوجي هاقوله اعمل انت لو الشخص رجل ولو ست هو لوحده هايقولي اعمل انت
بخصوص الشخص اللي قدم لي الماء بصراحة هاشكره من قلبي وكمان هاعرف انه انسان بيحب الخير وده طبيعي بالنسبة له لكن انا مش بحب حد يتدخل في حياتي لو انا مسمحتش له
اما الحديقة وكراسيها المكسرة انا مش هاجلس غير لما استأذن
وعلي حسب نوع الشخص
انا والله يا مني ليزا مش بعرف اجامل ولا انافق وديه بعتبرها ميزة من عند الله عز وجل
دمنا بخير وسعادة وحب
انا كنت عايزاكي

موناليزا يقول...

حاجات جوايا
ــــــــــــــ
وعليكم السلام ورحمة الله وبركاته
اختى الحبيبة:ربنا يكرمك اشكرك جدا لرايك فماتوفيقى الا بالله

ماشاء الله:)ربنا ينفع بيكِ
عن نصح البنات فده للاسف فى الغالب بيحصل او ممكن يسألوكِ بعد مايكون معدتش على الفرح حاجة او بعد الزواج بحاجة بسيطة وساعتها بجد بنبقى فى موقف لا نحسد عليه:)
بس تعرفى لو اتوضعت فى الموقف ده بجد هقول رأيى بصراحة عشان اخلص ذمتى امام ربنا
نورتينى ياجميلة وسعيدة جدا بمشاركتك








********************************






دعاء
ــــــــ
اختى الحبيبة:مشكورة جدا لمشاركتك ولتفكيرك
نورتينى دعاء الجميلة ودمتِ بخير







*****************************






تلميذة سلمان الفارسى
ــــــــــــــــــــــ
اختى الحبيبة:اهلا بيكِ فى زيارتك الاولى
ربنا يكرمك واشكرك جدا لمشاركتك
نورتى مدونتى وارجو دوام التواصل





********************************







حاول تفتكرنى
ـــــــــــــ
اهلا بيك يافندم
صح جدا
اشكرك جدا لمشاركتك
دمت طيبا ولمدونتى زائرا






********************************







رومانسى
ـــــــــــ
اهلا بيك يافندم
فعلا الغالبية بقت وحشة بس يبقى الخير فى أمة الاسلام الى يوم الدين
دمت طيبا ولمدونتى زائرا





**********************************




د. ياسر عبدالفتاح
ــــــــــــــــــــ
اهلا بيك يادكتور
ده حقيقى فلو كنت فظاً غليظ القلب لانفضوا من حولك
دمت طيبا ولمدونتى زائرا






*******************************





رحيل
ــــــــ
اختى الحبيبة: مش انتِ لوحدك ياجميلة الغالبية كده صعب انهم يتقبلوا النصيحة من أى حد أو بأى أسلوب فلكل انسان مدخل خاص وأسلوب معين لجذب انتباهه
وجميل انك تبقى فاهمة طبيعة الفرد اللى قدامك ومن ثم تستطيعين التعامل معه
نورتينى حبيبتى ومشكوورة جدا لمشاركتك






***********************************







هذه حياتى
ــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك فالشكر لله والحمدلله الذى هدانى الى هذا
اشكرك جدا لذكر هذه القصة بصفة خاصة ولمشاركتك بصفة عامة
دمت طيبا ولمدونتى زائرا






********************************






ام احمد المصرية
ــــــــــــــــ
اختى الحبيبة:احترم مشاركتك جدا واشكرك عليها
نورتينى حبيبتى ودمتِ بخير





*******************************




سلمى محمد
ــــــــــــ
اختى الحبيبة:ربنا يكرمك فماتوفيقى الا بالله
واشكرك جدا لمشاركتك
نورتينى سلمى الجميلة وسعيدة بتواجدك







******************************




ذكرى رحيل قلم
ــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
مشكوورة جدا لمشاركتك ولتواجدك
ومن معرفتى بيكِ عرفت انك فعلا مش بتنافقى (خليكِ كده على طول):)
انا تحت أمرك ياحبيبتى عينيا ليكِ
نورتينى ودمتِ بكل الخير

ومازلتُ أتعلم يقول...

السلام عليكم موناليزا
موضوع جميل جداً جداً

ولازم كل واحد يتقبل النصح فعلاً
لأن فيه ناس كتير بتخده غلط خالص
وبتزعل

تحيتى

حمـــــــــــــــــــــة يقول...

السلام عليكم و رحمة الله وبركاته
النصيحة واجبة على الجميع
لكن يبقى مدى تقبلها من الطرف المقابل
لذلك معرفة إستعداد المنصوح للإستماع قبل تفكيره في العمل بها
أحيانا تسبب للناصح متاعب جمة و معرفة الحقيقة تستغرق وقتا ليس هينا
فمثلا :
أنت حاضر بأحد الأسواق و تعلم غش أحد الباعة للبضاعة مثلا "سيارة"
هنا واجب عليك تنصح الشاري (...)و في نفس الوقت تحتاط من البائع لأنه ببساطة إذا تأكد منك لن يبقى مكتوف الأيدي
كذلك تصور شاب جاء يخطب بنت و أخلاقه وووو......لا تستاهله البنت
هنا تخيل الموقف
و إلا نعمل مثل الذي قال : لك أنت رفضت (البنت المخطوبة)أما بالنسبة لي فبشق الأنفس وافقت ..........
و الله عصر "الزئبق" لا هو سائل و لا جامد
الإنسان يعمل ما يمليه عليه ضميره
رالله الموفق

Unknown يقول...

جزاك الله خيرا

الفراشة الصغيرة يقول...

موضوع جميل

بس اختلف معاكى فى بعض من النقاط

اولا مش اى حد تأخد منه النصيحه ساعات فى ناس بتدخل افكار واشياء خاطئ ممكن تكرهك فى حياتك

ثانيا لما حد يسألأ على حد افرضى
اولا محدش شايف حد كامل ميه الميه
والحسن اننا نستر على عباد الله

افرضى انك قولتلى لا دى وحشه وكذه وكذه وكذه
طيب ماهو انتى مش كامله
وزى ما عملتى هيتعمل فيكى

افعل يابن ادم كما شئت كما تدين تدان
وربنا بيقول
فليقل خيرا او ليصمت

د/عرفه يقول...

بجد طرحتى شىء جميل اوى
كتير بقابل ناس
لما بتلاقى شىء قدامها
على طول بتقول يا عم وانا مالى
ما يعمل اللى يعمله
انا مالى

فى المقابل ناس كتير اوى برضه تيجى تكلمهم او حاجة
على طول يقول طيب ماشى وانت مالك بقى


ربنا يقدرنا على فعل الخير اين كان
وتقبل النصيحة

قوس قزح يقول...

جميل اوى البوست ده

احنا لو عملنا كده
و كل واحد نصح التانى و بطريقة مهذبة و بعيدة عن التريقة او النفاق او كسر الخصوصية
هيكون المجتمع بتاعنا من احسن المجتمعات فى العالم

تحياتى لكى

المعتصم يقول...

بسم ا لله الرحمن الرحيم
السلام عليكم ورحمة الله وبركاته
الاخت الكريمه
موناليزا
تحياتى
موضوع جميل
واسلوب الطرح هايل
انا عن نفسى بقبا النصح من اى حد لانى بستفيد من رأيه حتى لو كان غلط
انما المشكله لما بحاول انصح حد ويكون مش من الناس اللى عندها قابليه لكده
الموقف ده بيكون محرج جدا بصراحه وساعات كتير بحس بالندم انى قدمت النصيحه لحد مايستاهلش
انما اهو الواحد برضو بيعمل اللى عليه
انما موضوع الجواز ده انا ماجربتوش وربنا يستر ومااجربوش (مش ناقصين تخبيط مع حد )
يمكن انا جربته مرة كنت متقدم لواحده ووالدها كان بيسأل عليا ووقع فى جماعه كان بينهم وبينا خصومه كده
وطبعا قالوا فى حقى كل خير يعنى
خلوا الراجل حتى بطل يسلم عليا فى الجامع
ههههههههههههههههههههههههههه
كالعاده موضوع جميل ومفيد
جزاكِ الله عنه خير الجزاء
تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

صيدلانيه طالعه نازله يقول...

مشكلتى ان لسانى دايما سابقنى يعنى لو فيه حاجه غلط بانتقدها حتى لو على سبيل الهزار المهم اوصل وجهه نظرى و اللى يحصل يحصل
فى الجواز طبعا حقول رأيى سواء بالسلب او الايجاب لان رأيى ده امانه و من حق ان اللى طلب رأيى ياخد منىرد امين ووافى سواء مع او على الشخص المستفسر عنه

بن آدم يقول...

تدوينه جميله - جزاك الله خيرا على التذكرة
أما عن النصيحة فأنا على شقين
الأول اذا اتسألت النصيحة ان شاء الله هكون صادق فيه قدر الإمكان بس من غير تطاول أو فظاظة فىالنصيحة والا هيطفش وعمره ما هيستنصحنى تانى
وطبعا كتمان الموضوع - اللى بيبقى عايز النصيحة فى الغالب بيحب الكتمان - فلازم الواحد ياخد باله من الموضوع ده

ثانيا المبادرة بالنصيحة - أرى أنى عشان أبقى مبادر بالنصيحة لازم الأول أكون بصورة ما على درجة من الملازمة للمنصوح عارف الظروف اللى حواليه عشان أعرف أنصحة كويس - وأستدل حتى من مواقفه الشخصية

أخيرا النصيحة العامة - لعامة الناس اللى أعرفه واللى معرفهوش دى أنا مبعرفش أعملها خالص وان كنت شايف ان لازم يكون فيه حد أو مجموعة يقوموا بالدور ده والا النصيحة العامة تيجى من حد تانى زى المتلفيون(tv)وساعتها فى الغالب بتبقى مصيبة
جزاكم الله خيرا على التذكرة وأسأل الله أن ينفعنا بها

MaNoOoSh يقول...

أنا أول مرة اجي أسلم
ومبسوطة اني جيت فى الموضوع دة
هقولك على حاجة.. أنا فعلا بحب انصح الناس لما اشوف انهم هيقعوا فى أي مشكلة.. بس تخيلي انها مع أقرب الناس بتتقلب اني مش عايزالهم الخير واني غيرانة منهم وبحقد عليهم وكلام اسوأ من كدة.


بس الحقيقة طبع النصح دة صعب يتغير بردو مبقدرش اشوف حد قدامي محتاج نصيحة فى ايدى ومقدمهاش.. بس اللى مقبلهاش اتعلمت اني اسيبة لنفسه.
تحياتي يا قمر

MOHAMMED ELBANNA يقول...

أمة الله
موضوع متميز ومهم في نفس الوقت .
فنحن فعلاً فى زمان وجب فيه النصح والارشاد وبالاخص للذين تاهوا فى الدنيا وحادوا عن الطريق .
ولكننا نعاني في هذا الزمان من صنفان :
الاول/ وهوالناصح الذي لا يستطيع النصح بالمعروف والحكمه ولكن ينصح الاخرين بنوع من التوبيخ والتجريح الذي لا يليق بأنسان ، وعندما تعاتبه يقول لك يجب ان تكون النصيحة قويه حتى يعمل بها من انصحة !
الثاني / هو المنصوح نفسه ، فلربما ننصح احد بالحسنى الا انه يرفض بدعوى النصح ويدعي انه فوق النصح والتقويم .

وحتى لا أطيل عليكي اود ان اضيف على كلامك الغالي بعضاً من آداب النصيحة سواء للناصح او الموجها أليه النصيحة.

أولاً الناصح /
- الاخلاص لله سبحانه وتعالى في تقديم النصيحة وابتغاء مرضاة الله.
- الحكمه فى النصح واختيار الوقت والمكان والكلام المناسب {ادع إلى سبيل ربك بالحكمة والموعظة الحسنة وجادلهم بالتي هي أحسن}.
- ان تكون النصيحه في السر وليست في العلن لأن النصيحه فى العلن فضيحة
وكما قال الشافعي (رضي الله عنه ):

تَغمدَني بنُصْحِـك فـي انفـرادي
وجَنِّبْنِــي النصيحـةَ في الجَمَاعةْ
فإنَّ النُّصْــحَ بَيـن الناس نوعٌ
مـن التوْبيخ لا أَرْضَى استِمَاعه

- الامانه وعدم كتم النصيحه .
- معاونه المنصوح على التغيير من نفسه بعد النصيحة .

ثانياً /المنصوح
- تقبل النصيحة بصدر رحب .
- اشكر الناصح على امانته معك .
- غير من نفسك واعمل بالنصيحه ولا تكابر على الحق ، ولا تكن ممن قال فيهم الله {وإذا قيل له اتق الله أخذته العزة بالإثم فحسبه جهنم ولبئس المهاد}.
- اعمل على نصح غيرك كما نصحك الاخرون .

ختاماً اختى ارجوا الا اكون أثقلت عليكي بالرد .
مشكوره على مواضيعك المتميزة .
تقبلي مروري .
محمـــد
طريق النجـاح
___________________
عن جرير بن عبد الله -رضي الله عنه- قال: بايعتُ رسول الله صلى الله عليه وسلم على إقام الصلاة، وإيتاء الزكاة، والنصح لكل مسلم.
(متفق علية )

غير معرف يقول...

الحبيبة موناليزا
كعادتك دائما صاحبة البوستات المميزة
ومرورى على مدونتك اساسى عندى
بالنسبة للنصيحة انا اتقبلها لو كان
من يوصلها لى ليس فظا
وكذلك انصح باللين واجدد النية فى ان تكون النصيحة خالصة لوجه الله
اما بالنسبة للزواح
امبارح حدث معى موضوع غريب
اتصلت بى احدى البنات المقربات
واذا بها تدعينى على عقد قرانها
المهم باركت لها وكالعادة سالتها ان كنت اعرف العريس فوصفته لى
وانا بناته يحضرون معى فى المسجد
ايوه بناته لاتتعجبى فهو يكبرها
ب27 عاما ومنفصل عن ام البنات
المشكلة ان بنات هذا الرجل يحكون لى كثيرا عن مساوىء هذا الاب وانه يكرر
الزواج خاصة من الفتيات الصغيرات
وسبب الانفصال عن الام كان قصة من
هذه الزيجات فما كان منى الا انى قلت
للبنت العروس هل سالتوا عليه كويس
قالت اه فقلت لها معلوماتى انه له
ماضى غير مشرف فتحروا الامر
لم اقل غير ذلك ولم ادخل فى تفاصيل
الا انى وجدتها رافضة النصج وتقولى
كل انسان له اخطاؤه واحنا مش ملايكة
وانتهى الحوار على ذلك والعقد يوم
الجمعه أآدى نموذج وربنا يهدى
نفع الله بك فى كل ماتكتبين
وتحياتى

نكهة مغربية يقول...

و الله موضوع مفيد جدا و الواحد مبيعرفش يعمل ايه في الحالات دي هو فعلا لازم ننصح الناس بلي نقدر عليه

تسلمي على الموضوع

ELMASRYA - MRS WRITER يقول...

يا حبيبتي يا جميلة يا صاحبة المواضيع المميزة

لسه والله حالا مديه اللينك بتاع مدونتك لواحده صاحبتي وقلتلها صاحبة المدونة دي رائعة ومواضيعها مميزة ودعيت ليكي

بصي بقى يا ستي بالنسبة لاستجابتي للنصيحة

طبعا لو نصيحة طيبة وصادقة وتدعو للخير ومبنية على أساس عقلي ومنطقي سليم بستمع ليها وأنفذها

وبالنسبة لنصح الآخرين أنا رهيبة جدا وبنصح الناس بشكل جامد كأنهم ولادي أو أخواتي وبخاف عليهم

لو مش بعرف في حاجه بقول ماعرفش لكن ممكن أبذل جهد علشان أعرف وأوصل الخدمة لمن طلبها

لو حد سأل عن واحد أو واحده للزواج وأنا متأكده إن العريس ولا العروسه دول مش كويسين او معروف عنهم أكيد صفات سيئة لازم أقول بس برضه هقول لا تأخذ بكلامي واسأل تاني وتأكد إحتمال يكون ربنا هداهم أو كانت التصرفات دي لظروف نفسية لكن ماينفعش أخبي حاجه عنه ويروح يتدبس

لكن برضه الواحد بيخاف من الحكم على الآخرين

أنا ماتحطتش في موقف زي ده قبل كده وفعلا السؤال بتاعك محير

طيب بصي هخليها مثلا إن لو أعرف سلوك سيء وحاجه جوهرية قوي أقول ولو سلوك نتيجة متاعب نفسية لكن الشخص كويس أسكت يمكن الزواج يعالج هذه السلوكيات

يوووه بقى أنا محتاره يا ليزا الكلام عن الناس مخيف

لأ أنا احترت ومش عارفه أرد أقول إيه

لا حكم عقلي ولا حكم قلبي مريحني لأني ممكن أظلم أي طرف منهم

هقول ماعرفش وخلاص

بس كده أبقى سلبية وكدابه

عاااااااااااااااااا جاوبي إنتي وفهميني

أحبك في الله

salwa يقول...

السلام عليكم
طبعا النصيحة واجب ديني كما ذكرتي
و لكن يبقى التنفيذ و فاعليته
تتعلق بدرجة علاقتنا و نوع الشخص الذي نسدي له النصيحة.
كعادتك ادراجاتك رائعة
سلام

اقصوصه يقول...

اكيد النصيحه وايد مهمه

وهاي نوع من المسؤليه تجاه المجتمع

لازم كلنا ما نقصر بهالدور

تدوينه جميله

hasona يقول...

السلام عليكم

نشكرك علي الموضوع الجميل
وأهدافه الرائعة

،،،،
هأقبل النصح - وهانصح غيري مهما كانت النتيجة- بأقول رأي بكل صراحة لكن بأسلوب جميل ولبق

فعلا لازم نساعد بعض بكل شفافية ومصداقية
لأن المسلم للمسلم كالبنيان يشد بعضه بعضا

تحياتي

موناليزا يقول...

ومازلت اتعلم
ــــــــــــــ
وعليكم السلام ورحمة الله وبركاته
اختى الحبيبة:ربنا يكرمك واشكرك جدا لرايك ولتعليقك
نورتينى حبيبتى ودمتِ بخير

***********************************
هاما
ــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك ولمشاركتك
وجعلنا الله ممن يستمعون الى القول فيتبعون احسنه
دمت طيبا ولمدونتى زائرا
*******************************
احمد تاك
ــــــــــــ
اهلا بيك استاذ احمد
ربنا يكرمك اشكرك جدا
دمت طيبا ولمدونتى زائرا
********************************
الفراشة الصغيرة
ــــــــــــــــــ
اختى الحبيبة:اشكرك جدا لرايك واحترم اختلافك معى
بالنسبة لأولاً فانا متفقة معاكِ فيها
لكن ثانيا: انا مش بقصد انى اغلط فى حد لما انصح حد بمساوئ شخص اعرفه لكن اقصد انى انبهه ودى من ضمن حالات مسموح فيها الغيبة وخاصة اذا كان رأيى هذا سيتوقف عليه تحديد مصير شخص معين .. هذا والله اعلم
نورتينى حبيبتى ودمتِ بخير
*******************************
د/ عرفة
ــــــــــــ
اهلا بيك يادكتور
اكتر كلمة بتضايقنى فعلا "ماليش دعوة أو وأنا مالى"
ازاى مسلم يقول ماليش دعوة يعنى اشوف طريق فى حفرة كبيرة مثلا ومانبهش الناس!!
اللهم اجعلنا ممن يستمعون الى القول فيتبعون احسنه
نورتنى يادكتور واشكرك جدا لمشاركتك
********************************
قوس قزح
ـــــــــ
اختى الحبيبة:اهلا اهلا بالقمر
ربنا يكرمك اشكرك جدا لرايك
صح جدا فالاسلام لم جوانب حياتنا جميعها ليتنا حقا نطبقها
نورتينى ياجميلة ودمتِ بخير
**********************************

المعتصم
ـــــــــــ
وعليكم السلام ورحمة الله وبركاته
اهلا بيك يافندم
ربنا يكرمك اشكرك جدا لرايك
عاجبنى اوى انك بتعمل اللى عليك فى نصح الناس
الموقف اللى حصل معاك ده بجد منتشر جدا وتحس ان ماعدتش فيه امانة حتى فى النصيحة بجد مش قادرة افهم ليه مثلا لما اختلف مع حد اغلط فيه واشهر كمان بحاجات ممكن تكون مش فيه عشان بس انتقم منه ده لو حرب مش هتبقى كده
اللهم اجعلنا من عبادك المخلصين المهتدين لطاعتك
نورتنى يافندم واشكرك جدا لمشاركتك
****************************
صيدلانية طالعة نازلة
ـــــــــــــــــــــ
اختى الحبيبة:الله عليكِ
فرحتينى بجد لان حسيت ان مش انا لوحدى اللى بعمل كده:)
نورتينى ياجميلة ودمتِ بخير
********************************
بن ادم
ـــــــــ
اهلا بيك يافندم
ربنا يكرمك واشكرك جدا لرايك
الله عليك
ربنا يعزك على مشاركتك القيمة
دمت طيبا ولمدونتى زائرا
********************************
منوش
ــــــــ
اختى الحبيبة:يا اهلا وسهلا
ده العادى اليومين دول بس احنا برضه لازم نعمل اللى علينا ونخلص ذمتنا امام الله
اشكرك جدا لمشاركتك ولرايك
نورتى مدونتى وفى انتظارك دائما
********************************
محمد البنا
ــــــــــ
اهلا بيك استاذ محمد
ربنا يكرمك يارب على رايك ومشاركتك القيمة
واسمحلى سأضيفها للموضوع حتى يستفيد منها الجميع
نورتنى يافندم وفى انتظار مشاركتكم القيمة دائما
*******************************
أم مالك
ــــــــــ
اختى الحبيبة:ربنا يعزك يارب فماتوفيقى الا بالله
ومرورك شرف لمدونتى ويسعدنا دائما
الله عليك
وحقا"لو كنت فظا غليظ القلب لانفضوا من حولك"
سبحان الله فى المواقف دى بتحسى ان فيه غشاوة على عينها ولا حول ولا قوة الا بالله
فعلا الهادى هو الله
يارب اختارلنا ودبر لنا فنحن لانحسن التدبير
نورتينى ياجميلة ودمتِ بخير
********************************
نكهة مغربية
ـــــــــــــ
اختى الحبيبة: اهلا بيكِ فى زيارتك الاولى
مشكورة على مشاركتك
نورتى مدونتى وارجو دوام التواصل
********************************
المصرية مسز رايتر
ــــــــــــــــــ
اختى الحبيبة:اهلا اهلا بالقمر
ياحبيبتى ماتحرمش منك ابدا ربنا يعزك يارب ويجعلنى دايما عند حسن ظنك بيا
:) اشعر بحيرتك ولكنى حسمت موقفى من فترة سأقول ما اعرفه واطلب منهم التأكد من مصادر اخرى
وانصحهم بصلاة الاستخارة
شوفتى بسيطة وسسهلة ازاى:)
نورتينى ياجميلة وسعيدة جدا بمشاركتك
******************************
سلوى
ــــــــ
وعليكم السلام ورحمة الله وبركاته
اختى الحبيبة:ربنا يكرمك واشكرك جدا لرايك ولمشاركتك
دايما منورانى:)
********************************
اقصوصة
ــــــــ
اختى الحبيبة:اشكرك جدا لرايك ولمشاركتك
نورتينى ياجميلة ودمتِ بخير
*******************************
حسونا
ــــــــ
وعليكم السلام ورحمة الله وبركاته
اهلا بيك يافندم
ربنا يكرمك يارب فماتوفيقى الا بالله
الله عليك اشكرك جدا لمشاركتك
وتقبل الله منا ومنكم صالح الاعمال
دمت طيبا ولمدونتى زائرا

لجين أبو الدهب يقول...

فعلا اشارتى لنقطة مهمة جدا ..

وهى مدى تقبلنا للنصيحة ..

فى انسان لما تقوليله اتقى الله كأنك بتدعى عليه يقولك ليه شايفنى بعمل ايه تقوليلى اتقى الله ..

وكمان احنا ممكن ليل نعهار نقول احنا صدرنا رحب لتقبل النصيحة انما الوقت الفعلى تلاقى الصدر ضاق ولا يتحمل ..

بالرغم من ان النصيحة دى فى احيان كتير بتكون فيها النجاة ..


جزاكِ الله خير موناليزا حبيبتى ..

وعلى فكرة وحشتينى اوى ووحشتينى بوستاتك القيمة اللى بتكتبيها بس قرات كل اللى فاتنى دلوقتى ..

اشتقت اليكِ بجد ..

ربنا يزقكِ كل ما تتمنى دنيا واخرة ..

MOHAMMED ELBANNA يقول...

أمه الله
لا مانع عندي ابداً من نقل ما تريدين مما كتبت لموضوعك المتميز .
على الرحب والسعه، فالغرض واحد وهو افاده اكبر قدر من الاخوة والاخوات
(ان اريد الا الاصلاح ماأستطعت )
وارجوا الا تنسيني من دعائك بظهر الغيب .
جزاكي الله خيراً .
تقبلي تحياتي .
محمــد
طريق النجاح

rovy يقول...

السلام عليكم
موناليزا حبيبتى لو تعرفى اد ايه لما طلبت مشاركتكم لى برأيكم فى اخر بوست كنت مجتاجه لكم و اد ايه ارائكم الجميله و الحكيمه نورت بصيرتى و ريحتنى جداااا بجد ..
الحمد لله على وجودكم فى حياتى و ربنا ما يحرمن منك حبيبتى و حقيقى بأشكرك جدااااااا
اكيد عندك كل الحق ما ينفعش اشوف حد حيقع و اسيبه يقع و اقول يجرب لازم انصحه
الدين نصيحه .. فعلا
اكيد لازم نخلص فى النصيحه اللى بنقدمها لان من الممكن انه يترتب عليها حاجات كثير ..
كان الله فى عون العبد ما دام العبد فى عون اخيه ..
ياريت كل الناس تبطل سلبيه و تقدم بحب و اخلاص النصيحه لكل الى تقدر تقدمها له ..
دمتى غاليتى مبدعه و جميله
خالص مودتى و حبى

ماء تشرين يقول...

بصي ياموناليزا النصيحه في الزمن ده بتتفسر بحجات كتير انا نادرا ماانصح حد معرفوش لكن لوحست انو هيقع في مشكله او هيتأذى بنصح طبعا وعايزة اقولك والله انو موقف حصلى قريب خالنى بجد منصحش حد غريب ابدا ياعننى مع انى والله مقولتش غير ايه قرانيه " اذا جائكم فاسق بنبأ فتبينوا " بس والله وتعملى موال وزاد كلام على النصيحه ياله ربنا عامل بالى في القلوب

لكن القريبين منى بنصحهم من غير مااحس اصلا

لكن بالنسبه لموضوع الزوج انا معاكى انو الواحد يخاف الكلام يوصل بس ياعنى لو فيها او في عيب كبير مش ينفع لانو ربنا هيحسبنا وهيبقه تظليل ربنا يرحمنا


تقبلى مرورى

وردة يقول...

بجد والله ماشاء الله
موضوع جميل بحق ومش مجاملة
وبشوفه ادامي يوميا
انا بحب اسمع الغير كتير لما بطمن لنصيحة حد بحب اسمعه ينصحني
اما لو نصحت حد مرة وحسيت انو اتضايق منها بصراحة مش بكررها
علي اساس اني شعرت بأحراج
انا بعتبر النصيحة كلمة حق مهم جدا ان الانسان يقولها
والا يعتبر نفسه منافق
ربنا يكرمك
بجد موضوع جميل
سلام

كلمات من نور يقول...

كلام صح يا أمة الله ولكن مع الأتسف ليس جميعنا يعمل بمبدأ صديقي من أهدى لي عيوبي

يعني شفت واحده اتقدم لبنتها عريس حاجه زي ما بيقولوا جاهز من كله

ولما قريبة لنا نصحتها وقالت لها عن شيء يعيبه في دينه ...قاطعتها بل واتهمتها أنها تريده لابنتها

و أعرف بعض الأخوات لو قلتي لهم عن عيب بدواخلهم ممكن يعتبروكي عدوة لدودة بعد عشرة عمر

سبحان ربي إلا المتقين المؤمنين اللي بيحبك اكتر لو شاورتي له على عيب وقلتي له إياك وهذا و إياكي يا أختاه من هذه

ربنا يجعلنا من المستمعين الناصحين المؤمنين

طوبه فضه وطوبه دهب يقول...

فعلا موضوعك جميل وهجوبك على بعض الاسئله اولا لو حد ادانى كوبايه ميه هشكره طبعا مش كفايه انه هيرحمنى من العطش ثانيا موضوع الكرسى لازم هنبه الشخص قبل ما يقعد دا واجبى وحقه عليا ثالثا ودا اهم حاجه لو حد سئلنى عن واحده او واحد وبالاخص فى موضوع الجواز لانه حياه كامله ودينى يحتم عليا انى لازم انصح واعمل اللى عليا وبعدها اللى يحصل يحصل لكن ما ينفعش اكون عارفه حاجه عن حد واسكت هو دا اللى قدرت اجاوب عليه وعندك حق الدين النصيحه وحق المؤمن على المؤمن النصح والارشاد

ميرا ( وومن ) يقول...

مونا أزيك عاملة إيه وحشتيني خالص خالص

بالنوسبة للأسئلة هكون ممتن ليه
والسؤال التاني هانبهة ليه

موضوع الجواز دة موضوع حساس واا ليا تجربة معاه

بنت خال مامتي مرتين تتخطب لناس أعرفهم وأبقي اعرف انهم مش كويسين ومامتي تقولي مش تقولي مش هايسمعوا كلامك وبصراحة وقتها كنت صغيرة وأظن ان محدش كان هاياخد بكلامي
أو واحد كان أبن عم صحبتي وجارهم وكنت أعرف من صاحبتي أنه مدمن وفعلا بعد الخطوبة هي عرفت
والتاني كان مدرس في مدرستي وأستاذ بنت خالي الصغيرة برضة وكنت أعرف انه لعبي ومش جد وبرضة اتضح ان عندي حق
عموماً دلوقتي لو أتسألت ومتأكدة من كلامي هاقول لأن الوقت هايكشف الحقيقة ولو اتفهمت غلط دلوقتي هايبان بعد فترة

حياتى نغم يقول...

السلام عليكم / موضوع طيب جزاكِ الله عنا خيراً بالطبع نَنصح ونتناصح ونُنصح وإلا سيكون هناك عيب ما فى النفس .
قال رسول الله صلى الله عليه وسلم :
" المؤمن للمؤمن كالبنيان يشد بعضه بعضاً "
" انصر أخاك ظالماً أو مظلوماً "
وظالماً بأن ترده عن الظلم ومظلوماً بأن تعينه على الرد عنه الظلم .
بوركتِ ووفقتِ .

KHALED يقول...

موضوع مميز كالعادة

جزاك الله خير

شمس النهار يقول...

البوست دسم ولطيف جدا

النصيحه واجبه
سواء ليك اوعليك

وانت بذكاء لخصتي الموضوع
الدين النصيحه

وانا شخصيا بعتبر النصيحه الخالصه لوجه الله تعالي مسؤليه زي الشهاده باظبط
يعني اللي ينصح غلط زيه زي اللي قال الزور

شكرا ليكي

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

امة الله

نعم ان الدين النصحية

ولابد ان يتقبل كل منا نصائح غيره فلعل غيرنا اكثر من خبرة ودراية

ولابد ان نقدم النصيحة لغيرنا مادام فيها خير له

ولكن طريقة النصح هي التى ستساعدك
اما على تقبلها او رفضها

فكما نعلم النصيحة على الملأ فضيحة
فلاتنثصح احد في ملأ حتى لا يكون رد فعله سئ

ولابد ان تكون النصيحة باسلوب جيد
لا باسلوب الامر والنهي

وهكذا اذا تقبل كل منا النصيحة من غيرة فمن الصعب بأذن الله الوقوع في مشاكل وقع فيها سابقينا لاننا سنستفيد بخبراتهم

تقبلي تحياتي

أميرة يقول...

سئل بن تيمية رحمه الله أيهما أنفع للعبد الاستغفار أم التسبيح ؟؟؟
فأجاب : إذا كان الثوب نقياً فالبخور وماء الورد أنفع , وإذا كان دنساً فالصابون والماء أنفع !!
فالتسبيح بخور الأصفياء والاستغفار صابون العصاة

افضي بس وارجعلك اجاوب :)
يارب تكوني بخير
اتكعلبت في المقولة دي فقلت انتو اولي بيها :)

منى يقول...

حبيبتى موناليزا
السلام عليكم ورحمه الله وبركاته
كتير بقدم النصيحه وكتير بتمنى حد يقدمها لى بس فعلا المهم الطريقه اللى تحسسك ان اللى بينصح عايزلك الخير حتى لو متعرفوش.
انا دايما مدينه لحسن خلقك وسؤالك عنى ربنا يكرمك يا رب وارجو انك كمان متنسنيش من دعواتك
تحياتى

مجرد مدونة يقول...

في صحيح مسلم : ( حق المسلم على المسلم ست : إذا لقيته فسلم عليه ، و إذا دعاك فأجبه ، و إذا استنصحك فانصح له ، و إذا عطس فحمد الله فشمته ، و إذا مرض فعُده ، و إذا مات فاتبعه )

جزاكم الله خيرا

z!zOoOo يقول...

السلام عليكم

الاخت العزيزه موناليزا. يارب تكوني بخير

طبعا بوست هايل وكنت لسه بتكلم فيه مع أمي وقبلها مع واحد صاحبي عن طرق النصح وأداب الاسلام في تعليمنا النصح

اشهر القصص قصه الحسن والحسين والوضوء

لما الحسن والحسين (رضي الله عنهم ) شافوا راجل بيتوضأ غلط قالوا نفهمه ازاي نفهمه ازاي

راحوا جم وقعدوا يتخانقوا ده يقولوا انا بتوضا احسن منك .. والتاني يقوله انا بتوضا احسن منك

قالوا نحكم الشيخ ده ما بينا

ده اتوضا ما شاء الله عليه .. اتوضا التاني ما شاء الله عليه محدش فيهم غلط

الراجل لما شاف كده فهم علطول إن هو الي بيتوضا غلط وهما عايزين يلفتوا نظره

والقصه ديه بتبينلي دايما ادب الاسلام
واخلاق وتربيه بيت النبوه ( اللهم صلي وسلم وبارك علي سيدنا محمد وعلي اله وصحبه اجمعين

وانا طبعا لو وقعت بالكرسي زي ما قولتي أكيد لو لقيت حد هيقعد لازم اقوله حتي لو كسفني

ولو إتسئلت في موضوع الجواز ده بالذات هقول رأيي في الشخص ورزقي علي الله لأني هتسئل يوم القيامه

وانا مش بحب افتي لو معرفش حاجه بقول معرفش وبسمع اكتر مما بتكلم

موضوع جميل بجد

مستنين موضوعات اجمل واجمل

دمتي بكل ود

في رعايه الله

momken يقول...

عن تميم الدارى عن النبى صلى الله عليه وسلم انه قال
(النصيحه لله ولكتابه ورسوله وائمه المسلمين وعامتهم)

صدق رسول الله صلى الله عليه وسلم

جزاكى الله خيراً

موناليزا يقول...

لجين ابو االدهب
ـــــــــــــــــ
اختى الحبيبة:اهلا اهلا وحشتينى ياجميلة
كنت سمعت من الشيخ خالد الجندى حاجة عن كلمة اتقِ الله او صلى على النبى وغيرها من العبارات التى تقال فى موقف الغضب او الخناق مثلا عاجبنى انه ساعتها قال ياريت محدش يبقى يدخل الدين فى الوقت ده منعا لاى تفوه بكلمات تغضب الله فى هذه اللحظات

متفقة معاكِ جدا قليل اوى اللى بيقبلوا النصيحة
نورتينى يالوجى وسعيدة بعودتك ومتابعتك



*********************************



محمد البنا
ــــــــــــــ
اهلا بيك استاذ محمد
سعيدة بعودتك واهتمامك بالرد
قد تمت الاضافة وربنا ينفع بها الجميع ويرزقك بكل الخير
دمت طيبا ولمدونتى زائرا




********************************



روفى
ــــــــ
وعليكم السلام ورحمة الله وبركاته
اختى الحبيبة:الحمدلله اننا نطبق شرع الله فى علاقتنا مع بعض فالمؤمن للمؤمن كالبنيان يشد بعضه بعضا
ربنا يديم الحب بينا:)
اشكرك جدا لمشاركتك
نورتينى روفى الجميلة ودمتِ بخير






********************************




ماء تشرين
ـــــــــــ
اختى الحبيبة:ماقلتيه يعانى منه الغالبية ولذلك بقى علينا ان نتقبل النصيحة من الاخرين كما نطلب من الاخرين تقبلها مننا:)
نورتينى ياجميلة ودمتِ بخير




**********************************



وردة
ـــــــ
اختى الحبيبة:ربنا يكرمك يارب فماتوفيقى الا بالله
نورتينى وردتى الجميلة وسعيدة جدا بمشاركتك وتواجدك






********************************





كلمات من نور
ــــــــــــ
اختى الحبيبة:اشعر اننا حقا اصبحنا فى اخر الزمان.. فالصادق يكذب والكاذب يصدق.. وربنا يعافينا
نورتينى ياجميلة واشكرك جدا لمشاركتك





******************************


طوبة ذهب وطوبة فضة
ــــــــــــــــــــ
اختى الحبيبة:اشكرك جدا على مشاركتك
وربنا يعزك وينفع بيكِ
نورتينى ياجميلة وسعيدة بتواجدك





********************************




وومن
ـــــــــ
اختى الحبيبة:اهلا اهلا بالقمر وحشتيييييييينى جدا ايه اخبارك؟
انا الحمدلله بخير ماتحرمش من سؤالك

صح جدا احنا نعمل اللى علينا حتى نبرأ ذمتنا امام الله
نورتينى ياجميلة وسعيدة بتواجدك



**********************************




حياتى نغم
ـــــــــــ
وعليكم السلام ورحمة الله وبركاته
اختى الحبيبة:ربنا يكرمك اشكرك جدا لرايك ولمشاركتك
نورتينى حبيبتى ودمتِ بخير




*******************************



خالد
ــــــــ
اهلا بيك استاذ خالد
ربنا يكرمك أخجلتم تواضعنا فماتوفيقى الا بالله
دمت طيبا ولمدونتى زائرا





*******************************


شمس النهار
ـــــــــــ
اختى الحبيبة:ربنا يكرمك ويعزك يارب على رايك وتعليقك
نورتينى شمس الجميلة وسعيدة بتواجدك



*******************************



ابو صهيب (الجمعاوى الاصيل) سابقا
ـــــــــــــــــــــــــــــــــ
وعليكم السلام ورحمة الله وبركاته
اهلا بيك يافندم
صح جدا
نورتنى واشكرك جدا لمشاركتك




*******************************



اليس فى بلاد العجائب
ـــــــــــــــــــ
اختى الحبيبة: ربنا يعزك يارب
جميلة بجد المقولة واول مرة أقرأها
مشكوورة جدا على هذه الهدية القيمة
فى انتظارك دائما ياجميلة وسعيدة بتواجدك





*********************************




منى
ـــــ
وعليكم السلام ورحمة الله وبركاته
اختى الحبيبة:اهلا اهلا بالقمر
فينك من زمان وحشتيييينى جدا

معاكِ حق المهم الاسلوب فى النصيحة

مدينة ايه بس! هو احنا فيه بينا الحاجات دى لا طبعا ده انتِ اختى وكنت قلقانة عليكِ.. ربنا يعزك ويسعد ويرضى عنك اللهم امين
نورتينى منى الجميلة وسعيدة جدا بتواجدك





*********************************




مجرد مدونة
ــــــــــــ
اهلا بيك يافندم فى زيارتك الاولى
ربنا يعزك على مشاركتك القيمة
نورت مدونتى وارجو دوام التواصل




*******************************




زيزو
ـــــــ
وعليكم السلام ورحمة الله وبركاته
اهلا بيك يافندم
انا الحمدلله بخير اشكرك جدا لسؤالك
سعيدة جدا بمشاركتك وبتواجدك
وربنا يكرمك على تعليقك ويعزك دايما بطاعته
دمت طيبا ولمدونتى زائرا




*******************************


ممكن
ــــ
اهلا بيك يافندم
ربنا يكرمك على مشاركتك واشكرك جدا على زيارتك
دمت طيبا ولمدونتى زائرا

wanna b a physician يقول...

النصيحة شىء مهم جدا فى الحياة ويجب تقبل النصيحة من الاخرين حتى وان كنت لن تعمل بها

ونصح الاخرين هو واجب علينا لاننا دوما ما نحتاج من ينصحنا فاذا لم نجد ماهو شعورنا فلذلك يجب ان ننصح من يحتاج لكى لا يشعر بهذا الشعور


تحياتى

الفراغ يقول...

سلام عليكم اختى موناليزا
بعد العمر اللى انا عيشته..ااقدر ااقولك
ان الكلمه الطيبه صدقه
وان المنصوح لايقبل النصيحهالا ممن يحب..واحيانا لايقبلها منه ايضا..
فالنت موجود..وبنتى كل ماقولها اى حاجه تقولى مانا دخلت على النت وسئلت
اما انا فلا اريد ان ينصحنى احد الا اذا سئلت..فانا اقبل النصيحه لما اريدها بس

ولكن عند الخطر...اتكلم واجرى على الله

أميرة يقول...

:) انا تاني

السلام عليكم ورحمة الله وبركاته

بصي يا اختي العزيزة

لو حد نصحني بخصوص الزجاجتين .. هقوله كتر خيرك :) ربنا يكرمك :) وهكون ممتنة ليه لانه خدمني وتعب نفسه و جابلي المية اللي كنت محتجالها :)
" من شكر الناس شكره الله "


اما حكاية الكرسي المكسور دي
هو حل من اتنين
يا اما اشيل الكرسي دا في حتة تانية بعيد عن نظر حد يفكر يقعد عليه .. اهو نبقي خلصنا من مشكلته من منبعها
او لو انتبهت ان حد هيقعد عليه اكيد هقوله انه مكسور ولو مفيش غيره موجود .. هتحرج و اقوم انا و اقعده مكاني او لو بنت وممكن نتقاسم المقعد :))

اما اللي بياخد راي حد زي حالاتي يبقي هو اللي غلطان D:
لاني في كل الاحوال غالبا مش هقول حاجة تضايق اللي قدامي علشان محرجهوش لاني مرضاش حد يحرجني فمش هعملها في حد اكيد :)

الا لو كانت حاجة وحشة اوي اوي يعني زي قصيرة ولا عريانة .. هقول بردة بس وانا علي استحياء و متوقعه ان كلامي ميعجبش وغالبا بردة اقوله بطريقة متعجبش اللي قدامي .. ساعات مبعرفش اداري يعني :) فالاحسن محدش ياخد رايي D:

اما في موضوع العريس ولا العروسة باه فهيبقي علي حسب اللي قدامي واللي اعرفه اصلا و معتقدش اني في كل الاحوال في موقف حكم علي اي حد في الدنيا
لاني مبشوفش من الشخص الا اللي بيظهره و اللي غيره فدا كتير .. لو في حاجة حصلت معايا تجاه الحد دا او منه هحكيها زي ما حصلت واللي هيسمعها له يحكم مش انا .. وبعدين هقوله الاولي يستخير ربنا وهو يدله ويسأل كتير ويسال كويس اوي .. خصوصا الزمن دا :(

ممكن اقول رايي في حد مش بحبه او معترضة علي حاجة فيه بذكر الحسن فيه قبل السيء يعني لو واحدة زي ما قولتلي صعبة المعشر وانا اعرفها .. هقول ممكن بسبب ظروف معينة الانسان دا يكون متضايق او مش طايق نفسه و ممكن اكون انا شفتها في وقت غلط .. الله اعلم .. ممكن يسال حد تاني علشان يتأكد
ومش خوف ان الكلام يوصل لاني مش هفتري علي الحد دا بحاجة محصلتش .. انا مبحبش الكلام الكتير .. لو في موقف معين حصلي معاهم هقوله زي ما حصل انما سمعت عن فلان كذا دي مبحبهاش

وان اتسألت في حاجة اعرفها او لا .. لو معرفهاش هقول معرفهاش لو الموضوع يهمني اعرفه .. ولو الموضوع ميهمنيش مش هسال وهسيب اللي قدامي يكمل كلامه

لو محدش سألني دي تفرق .. حسب الموقف .. وحسب ثقتي من المعلومة اللي هقولها .. لو حاجة هتفيد حد وواثقة منها هقولها .. يعني مش هفرض رايي الا لو شفته مناسب للموقف

في موضوع الجواز دا زي ما قالولك .. اللي هتقولك غيرانه واللي هتقولك بيحسدوا وحاجات كتيرة شبه كده .. بس عموما خير الكلام وصية الرسول صلي الله عليه وسلم لا خاب من استخار .. ولو في فرصة بذكر وصيته عند اختيار الزوج او الزوجة :)

اسوووووووووووء نصيحة يا اختي العزيزة

اللي يدبحك وهو فاكر نفسه بينصح

يعني اللي ينصح حد يا ريت يفتكر انه لو في موقف المنصوح .. هل الكلام اللي هقوله دا هيوجعه؟ هل طريقتي تضايق؟
هل اصلا اللي بقوله له اي قيمة لو كان حد نصحني بيه ؟

وافتكر زي ما بتقفل الباب في وش حد مرة نصحك .. بردة هتلاقي اللي يقفل الباب في وش نصيحتك .. في الاول وفي الاخر الرفق في النصيحة والرفق بالمنصوح

سلمت يداكِ علي الكلام الطيب دا

ويارب انجح في الاختبار D:

وعلي فكرة بردة
اللي بيساعد حد محتاج المساعدة .. لما بيجي عليه الدور وبيحتاج هو مساعدة .. ربنا بيسخرله اللي يساعده ويقف جنبه زي ما هو وقف جنب حد في يوم من الايام :)

وحي القلم يقول...

السلام عليكم ورحمة الله وبركاته
موضوع رائع جدا
فعلا النصيحة مهمة جدا لأني الشيء اللي يفكر فيه اتنين أفضل من 1 و3 افضل من 2
تقبلي مروري

موناليزا يقول...

ونا بى فيزيائى
ــــــــــــــــ
اهلا بيك يادكتور
الله عليك
اشكرك جدا لمشاركتك
دمت طيبا ولمدونتى زائرا




********************************





الفراغ
ـــــــــ
وعليكم السلام ورحمة الله وبركاته
اختى الحبيبة:عندك حق محدش بيقبل النصيحة بسهولة وخصوصا لو ماطلبهاش
نورتينى حبيبتى وسعيدة بتواجدك





******************************





اليس فى بلاد العجائب
ــــــــــــــــــــ
وعليكم السلام ورحمة الله وبركاته
اختى الحبيبة:اهلا بيكِ ياجميلة فى مدونتك التانية:)

بما انك جيتى بقى ولانى ببقى مبسوطة جدا بالكلام معاكِ فهنتناقش براحتنا:)

اهو الموقف بتاع الزجاجتين دول ده اللى المفروض نعمله لو حد نصحنا بحاجة مفيدة حتى لو احنا ماطلبناش منه ويكفى انه تطوع بنصيحته من غير ما اطلبها منه
ده فيه ناس انتِ بتطلبى نصيحتهم ومع ذلك بيخذلوكِ أو يفتوا من غير علم أو يوقعوكِ فى حفرة وده يخليكِ تندمى انك حتى طلبتى رأيهم

عاجبنى اوى موقفك الخاص بالكرسى المكسور كلها حلول جميلة بصراحة:)

لاننا زى بعض فى اننا مابنحبش نحرج حد لو حد خد رأينا قرأت عنها فى كتاب خاص بقواعد الاتيكيت فى المواقف دى
بصى ياستى لو واحدة فستانها مش حلو عليها مثلا ممكن ماتقوليهاش مباشرة بس ممكن تقولى ذوقك جميل بس اللون لو كان فاتح شوية مثلا او القماش لو كان أنعم من كده او لو كان من غير الكسرة دى مثلا .. كده يعنى وقيسى بقى على اى حاجة تانية:)

رأيك بقى فى الزواج تقريبا زى بعض بحكى اللى شوفته منه او منها وقوله اتأكد من مصادر اخرى وعليك بالاستخارة
بصرة يعنى:)

برضه زى بعض فى بقية الحاجات:)

الله عليكِ
ولا اللى معتقد انه بينصحنى وهو بيفرج عليا الناس:)
عجبنى مقولة اوى بتقول"ليكن عتابك كالنسيم يهز ولا يعصف "

ده اكيد كان الله فى عون العبد طالما العبد فى عون اخيه
ربنا يعزك يارب ويسعدك يارب
نورتينى غاليتى وسعيدة جدا بمشاركتك



**********************************




مصعب صلاح
ــــــــــ
وعليكم السلام ورحمة الله وبركاته
اهلا بيك استاذ مصعب
ربنا يكرمك واشكرك جدا لرايك ولمشاركتك
وحقاً ما خاب من استشار
دمت طيبا ولمدونتى زائرا

kochia يقول...

موضوع قيم جدا
تحياتي

زى الهوا يقول...

كلامك جميل بجد ياموناليزا ونصيحتك لينا وصلت

شكرا ياقمر

أميرة يقول...

افتكرتلك حاجة كمان كنت نسيتها بمناسبة النصايح

عارفة دلوقتي استخدام الانترنت في الاطلاع و معرفة الدين بشكل اعمق خلي حياتنا مختلفة عن اهلنا واللي اكبر منا اللي مش متاح ليهم الحكاية دي

لو لقيت حاجة .. معلومة ما جديدة .. جديدة علي انما هي مؤكده مثلا في السنة وبعد ما لقيت سندها وكل حاجة .. بالصدفة مش رايحة قاصدة تقولها للي اكبر منك .. موقف حصل وقولتي اللي تعرفيه .. اغلب المواقف هتلاقي اعتراض منهم

هي العيلة دي اللي جاية تعلمنا طول عمرنا بنعمل كده واهلها شفناهم بيعملوا كده و هكذا

دي اللي بتبقي مشكلة حقيقي .. لانها حاجة في الدين .. و حد زيي كده بيخسر القضية علشان مهما كانت معايا الحجة بيقولوا احنا كده و اتربيناعلي كده .. فاهماني :(

مرة في رمضان مش فاكرة علي ايه بالصدفة سمعت خالد الجندي واحدة بتساله بتقوله بصلي التراويح وكنت لابسه عباية تيجر و فيها تل ولا دنتيل مش فاكرة و بتقوله ان في واحدة منقبة بتصلي جنبها قالتلها لازم تلبس شراب وهي بتصلي علشان مينفعش تصلي برجلها من غير شراب .. رد رد غريب جدا.. انتقد المنقبة وانها بتتدخل في خصوصيات التانية و بتقولها مش لابسة شراب والست اللي بتكلمه قالتله انها كلمتها علي العباية انها فيها نقوش و ملفتة .. وهو بردة رد انتقاد لكلام المنتقبة !!
وفي الاخر مفهمتش انتي مكلماه تساليه هل صحيح لازم شراب ولا مكلماه علشان يسخر من اللي قدمتلك نصيحة ولا ايه المقصود !! الله اعلم

والموضوع دا شفته من اكتر من حد في التليفزيون .. يبقي حد بيساله علي حاجة وهو بيرد حاجة تانية ولا يبقي عايز يرضيه وميزعلهوش !!

مش عارفة باه :(

Abo 7anf يقول...

السلام عليكم
اكيد لازم ننصح
بس فى حاجه مثلا لو الشاب كويس او الفتاه كويسه جدا
وفى بعض الافراد الفى عائلتها مش كويسين
بيتهالى منحكمش عليه او عليها بذنب مش ذنبه
و فى نفس الوقت منحكمش بالظاهر
و منخدش راى شخص واحد لان محدش يعرف الفى نفس الشخص دا ايه

mimi يقول...

اسعدني توقيعك في مدونتي ... وما سعدت به أكثر هو زيارتي لكي وقراءة موضوعاتك

اضافها الله لميزان حسناتك

حـــــدوتـــــة يقول...

السلام عليكم

اختى الغالية بارك الله فيكى
موضوع مهم وطريقة عرض سلسه
وكالعاده مدونة تستحق الاحترام والتقدير

سلالالالالالالالالالالالالالالالالالالالالالالالام

صاحبة هدف يقول...

جزااااااكم الله خيرا كثيرا

ادعيلي عندي امتحانات

mostafa rayan يقول...

طبعا النيحة مهمة جدا
وكما في الحديث ( المؤمن مرأة اخيه )
لكن في امرو الجواز الحاجات دي بتكون حساسة جدا لأنها بتتعلق بمستقبل بنات
الموضوع بجد محرج وربنا ييس للجميع
تحياتى لك

mostafa rayan يقول...

على فكرة يا موناليزا اللي بيحب حد مش هيهمه راي الاخرين فيه وحتى مش هيفكر يسالهم من الاصل لأنه واخد القرار مسبقا
يعنى لو انا بحب بنت والناس كلها قالت انها وحشة مش هسمعهم وكذلك لو بنت حبتنى وكل الناس قالولها لاء بلاش هتصمم على موقفها في الارتباط بيا
تحياتى لك

الفقيرة إلى الله أم البنات يقول...

موناليزا يا حبيبتى
افعل ما يمليه على ضميرى ولا يضيرانى أبدا ردود الناس..ولا رد افعالهم طالما النصح لله
ولن اسكت عن معلومه اعرفها..واصؤغها بشكل واضح وغير مهين

اتقبل النصح والانتقاد...ولا اتضايق ابدا فئاعرف عيوبى واشكر من يعرفنى عيوبى
ولكنى لا احب من يمارس مرضه النفسى على ويهين فقط للمتعه
لا اقبلها
ولكن فى النهايه النوايا هى اللى بتحكمنا

موضوع مميز دجمت بخير

بنت أبيها يقول...

عجبنتي التمهيد للموضوع

المسلم شخص ايجابي ... حيث يقول صلى الله عليه وسلم :" من رأى منكم منكراً فليغيره ... "الى اخر الحديث الشريف.

كما قال :"المؤمن للمؤمن كالبنيان يَشُدُّ بعضُه بعضاً – وشبك بين أصابعه"

سملت يداك

موناليزا يقول...

كوشيا
ــــــــ
اختى الحبيبة:اشكرك جدا لرايك
نورتينى ياجميلة وسعيدة بتواجدك



*******************************



زى الهوا
ــــــــــ
اختى الحبيبة:اهلا اهلا بالقمر
انا اللى بشكرك على تواجدك وعلى تعليقك
رغم انى لسه قلقانة عليكِ
ليه على طول قافلة التعليقات وبتتأخرى جدا على مابتكتبى؟
نورتينى ياجميلة وفى انتظارك دائما





*******************************



أليس فى بلاد العجائب
ـــــــــــــــــــ
اختى الحبيبة:سعيدة جدا بعودتك
ده حقيقى وكأن معلوماتهم أمر مسلم بيه وغير قابل للتعديل أو التكميل
فكرتينى برضه أول ماعرفت حديث تحريم المصافحة من غير النوع ولما جيت أطبقه
ياخبر ماقولكيش بقى فيه اللى يتريق وفيه اللى يقول كلام بايخ وانى متزمتة وبسئ للاسلام بس الحمدلله انتصر الحق:) واصبحت لا اخجل من قول لا اصافح الرجال بقلب جامد حتى لو كان مين:)(الرجال طبعا اللى مش من محارمى)
بس تعرفى عزائنا الوحيد اننا بنعمل اللى علينا واللهم قد بلغت اللهم فاشهد

:)ولا المذيعين والمذيعات اللى بيسألوا فى أدق الخصوصيات للسائل كفضول مش اكتر
بس فيه برضه ناس قبل ما بتسأل على التليفزيون بتجيب قصة حياتها من الاول ومش بيقولوا السؤال مباشر فده ممكن يلخبط المسئول
بيعجبنى اوى الدكتور مبروك عطية عشان كده لايخشى فى الحق لومة لائم

نورتينى ياجميلة وفى انتظار دائما




****************************




ابو جنف
ــــــــــ
وعليكم السلام ورحمة الله وبركاته
اهلا بيك يافندم
متفقة معاك جدا لان محدش بيختار قرايبه
نورتنى واشكرك جدا لمشاركتك




********************************




ميمى
ـــــــ
اختى الحبيبة:اهلا بيكِ فى زيارتك الاولى
ربنا يكرمك واشكرك جدا على هذا التعليق الرقيق والجميل
نورتى مدونتى وارجو دوام التواصل



*******************************




حدوتة
ــــــ
وعليكم السلام ورحمة الله وبركاته
اهلا بيك يافندم
ربنا يعزك يارب فماتوفيقى الا بالله(اخجلتم تواضعنا)
نورتنى واشكرك جدا لتعليقك




*******************************



صاحبة هدف
ــــــــــــ
اختى الحبيبة:ربنا يكرمك ياجميلة وينجحك بتفوق وترفعى راسنا يارب
نورتينى حبيبتى ودمتِ بخير






**************************



مصطفى ريان
ــــــــــــ
اهلا بيك استاذ مصطفى
ده حقيقى وانا متفقة معاك جدا
بس انا اقصد فى العموم أصل حكاية الجواز عن حب ده بقى نشاذ القاعدة:)
نورتنى يافندم وسعيدة بمشاركتك




*******************************



الفقيرة الى الله ام البنات
ـــــــــــــــــــــــ
اختى الحبيبة:الله عليكِ
مشكوورة جدا على مشاركتك
نورتينى ياجميلة وسعيدة بتواجدك




*******************************



بنت ابيها
ــــــــــــ
اختى الحبيبة:الحمدلله فماتوفيقى الا بالله:)
اشكرك جدا لرايك ولمشاركتك
نورتينى ياجميلة ودمتِ بخير

akeed يقول...

موضوع هام جداً كان الله فى عون العبد ماكان كان العبد فى عون اخيه

و من الايمان ان تحب لأخيك ما تحب لنفسك ما اعظم ديننا الايثار لو تعاملنا به لكنا فى سلام و هدوء ودون خلافات قال الله تعالى " يؤثرون على انفسهم ولو كان بهم خصاصة "

Kiara يقول...

وصلتي فكره باسلوب سهل جدا

الدين نصيحه ولازم نكون في عون بعض دا الهدف اننا نتكامل ببعض وليس فرد

kimo يقول...

السلام عليكم ورحمه الله

موضوع جميل جدا

الدين النصيحه

تقبلي مروري

تأثير الفراشة يقول...

بوست جميل بجد و خاصة
"لا تخف من النقد إذا كنت محقاً ولا تتجاهله إذا كنت غلطان"

فعلا مبدأ مهم جدا، و أحييكى و أحيى أستاذ محمد البنا على الاضافة لأنها كانت ضرورية فعلا

ربنا يعيننا جميعا على إجادة فن الحوار و فن التناصح

جزاك الله خيرا

موناليزا يقول...

أكيد
ـــــ
اهلا بيك يافندم
ربنا يكرمك واشكرك جدا لرايك ولمشاركتك
دمت طيبا ولمدونتى زائرا





*******************************




كيارا
ــــــــ
اختى الحبيبة:الحمدلله فماتوفيقى الا بالله
الله عليكِ
صح جدا وبالطبع متفقة معاكِ
نورتينى ياجميلة وسعيدة بتواجدك





********************************





كيمو
ــــــ
وعليكم السلام ورحمة الله وبركاته
اهلا بيك يافندم فى زيارتك الاولى
ربنا يكرمك واشكرك جدا لرايك
نورت مدونتى وسعيدة بمرورك





*********************************





تأثير الفراشة
ــــــــــــ
اختى الحبيبة:اشكرك جدا لرايك والحمدلله الذى هدانا الى هذا فماتوفيقنا الا بالله
نورتينى ياجميلة وسعيدة بتواجدك

غير معرف يقول...

انا الحمد لله بتقبل النصيحة وبحب انصح الاخرين

بس بالنسبة للنصح في الزواج بتكون صعبة حبتين وبحاول قدر الامكان اقول الحقيقة وبرأيي اهم حاجة ما اقعد اجامل واشكر في حد انا متاكدة انه وحش واخلاقه سيئة

ممكن المح بالكلام والحدق يفهم لانه بالزواج بالذات بتتفهم انها غيرة او حسد :(

البوووست كالعادة اكثر من رااااااائع

جزاكي الله كل خير

والف شكر للاخ MOHAMMED ELBANNA

على الاضافة الرائعة

دمتم سالمين

موناليزا يقول...

نوارة
ــــــــ
اختى الحبيبة:ربنا يكرمك ياجميلة ومشكورة جدا لرايك
والحمدلله فماتوفيقنا الا بالله
نورتينى نوراة الجميلة وسعيدة جدا بتواجدك

نسيبه يقول...

السلام عليكم ورحمة الله وبركاته
طبعا الدين النصيحه ولو تذكر الإنسان وقت ما يكون هيعطي النصيحة لأحد أنه ممكن يكون مكانه سيقولها بشكل مختلف ولو لجألله أولا سيسخر له من ينصحه ويوجهه ولا ندم من إستخار ولا خاب من إستشار وهذا دعاء ونصيحه من الرسول صلي الله عليه وسلم وكما تدين تدان فإذا راعينا الناس ومصلحتهم في نصحنا لهم سيراعينا الله والناس في نصحهم لنا

موناليزا يقول...

نسيبة
ــــــــ
وعليكم السلام ورحمة الله وبركاته
اختى الحبيبة:اهلا اهلا بالغالية
ياسلام فعلا لو كل واحد وضع نفسه مكان اى شخص فى اى موقف وتعامل معاهم كما يحب ان يتعاملوا معه لاصبحت الدنيا اجمل بكثير
وفعلاً ما ندم من استخار
نورتينى حبيبتى وسعيدة جدا بتواجدك