الاثنين، 6 يوليو، 2009

رد الفعل

هى: إمتى ممكن نسيب بعض؟.
هو: لما تجيبيلى عيل بنفسجى.
هى: إشمعنى يعنى؟.
هو : ساعتها هعرف إنك خُنتينى.
هى: وههون عليك تسيبنى؟.
هو: ياحبيبتى ده أقل واجب.
هى: أمال لو شُفتنى مع واحد هتعمل إيه؟.
هو: هخلص عليه.
هى: كنت عارفة أنى مش ههون عليك.
هو: لأ ياحبيبتى أنتِ وراه على طول بس أنا هبدأ بيه.
هى: وده ليه بقى؟.
هو: عشان مايلحقش يهرب لكن أنتِ هتروحى منى فين هجيبك هجيبك.
هى: طب خلاص غير الموضوع.
هو: يكون أحسن برضه.
..........................
نصيحة للزوجات:
ـــــــــــــــــــــــــــــــــــــ
*لا تتجسسى على زوجك وتحاولى أن تفتشى فى أغراضه الشخصية سواء موبايل أو أى من أغراضه المشكوك فى أمرها. لأنك بالطريقة دى هتتعبى نفسك جداً . لو مالقيتيش حاجة مش هترتاحى وهتحسى أنه عارف يضحك عليكِ ولو كان فعلا شكك فى محله يبقى هتخربى حياتك. فليه ده كله سيبيها لله ولو خانك فهو خان ربنا وفعل حاجة محرمة وربنا هو اللى هيحاسبه .
*أعطيه فرصة أنه يدافع عن نفسه. سيبيه يخبى عليكِ واستمتعى بمحاولته لإرضائك وإخفاء هذا الأمر عنك. لأنك لو واجهتيه ووجدك قاسية عليه هيتمادى فيما يفعله وأعلى ما فى خيلك أركبيه.
*بدل ماتسخرى مجهوداتك للإيقاع به سخريها لجعله ينسى كل المغريات الخارجية والالتفات لكِ فقط.
*ادعي له بالهداية.
* كونى واثقة فى نفسك أكثر من ثقتك فيه.
*شوفى إيه عيوبك بالنسبة له وحاولى تصلحيها.
* جددى فى حياتك ككل سواء فى مظهرك , أو فى طريقة ملابسك , أو فى شكل البيت(غيرى ترتيب الغرف) أو فى تعاملك معاه ومع أهله, فاجئيه بأى حركة رومانسية...
* الموقف أكبر من أى عناد لأن بيتك وحياتك ممكن تخسريهم.
* لاتتمادى فى غضبك وتجعليه يؤثر على تصرفاتك حتى لا تندمى فيما بعد.
وأخيراً* لو هو خانك أنتِ ماتخونيهوش. مش عشان أنتِ ملاك ولكن عشان أنتِ مُسلمة.
.........................
سؤال جانبى:

ـــــــــــــــــــــــــــ
- ماذا تفعل لو أكتشفت خيانة شريك حياتك؟(هتسيبه بهدوء, هتنفصل عنه بفضيحة , هتسامحه, عندك إقتراح آخر).

******
على الهامش
ــــــــــــــــــــ
أدعوكم لزيارة هذه المدونة مش هنسكت. وشكر وتقدير لكل القائمين عليها.


هناك 70 تعليقًا:

عاشقة الأحزان يقول...

السلام عليكم

حبيبتى بجد بوست جميل قووى تسلم ايديكى

وربنا يهديهم الى الخير الازواج ويبعد عنهم الخيانه والذى منه

اللهم امين
تحياتى
انوسه

Sometimes يقول...

السلام عليكم
ازيك يا مونى؟ يارب تكونى بخير يارب
انا كنت قرأت فى فتوى للشيخ الشعراوى وقال لو خان سيبيه ربنا اللى هيحاسبه زى مانتى اقترحتى
بس يارب ما حد يحصل له كده ابدا
ادعيلى يا موناليزا

حاول تفتكرنى يقول...

ربنا يهدينا ويهدي الجميع

تحياتي

mohamed ghalia يقول...

لسه مقدرش احكم لأنى مجربتش الحياة الزوجية
بس التوبك هايل والنصيحة رائعة

Ramy Wasel يقول...

ماذا تفعل لو أكتشفت خيانة شريك حياتك؟

الانفصال فى هدوء
فهى لا تستحق اكثر من ذلك

وكل واحد بيعمل بأصله

وربنا يبعد عنا الخيانه
بأى شكل

موضوع رائع

المهاجر يقول...

عزيزتى البوست رائع وبلمس موضوع خطير وهى خيانة الازواج ولكن يجب عند إكتشاف الخيانة أن يخسر الخائن كل شئ

ذكري رحيل قلم يقول...

السلام عليكم

بعد التحية والسلام علي الناس الكرام اقول من الذكر هذا الكلام
الحمد لله فوق الشبهات ولله الحمد يارب نفضل كده طول العمر وما يدخل بنا شيطان الا في الخلفات العادية التي لا يخلو منها اي بيت بصراحة مش هاعلق علي الموضوع ده بس بشكرك بجد علي وجهة نظرك الكريمة وعلي نصيحك الغالية ربنا يكملك بعقلك امين
سلامس وحبي وتقديري

ليس فقيرا من يحب يقول...

السلام عليكم
حبيبتى ربنا يجعل كلامك فى ميزان حسناتك يارب
بالنسبه للسؤال فلو جوزى المستقبلى اللى ماعرفوش لسه خاننى فالحل الوحيد انى هاخرطه حتت وبعدين اقطعه وبعده بقى هادبحه وفى الاخر هاولع فيه بس كده علشان مابقاش مفتريه

fL0weR-giRL يقول...

السلام عليكم
موضوع حلو بجد
ويارب مافيش حد من بنات المسلمين يتعرض لموقف زي داه


- ماذا تفعل لو أكتشفت خيانة شريك حياتك؟(هتسيبه بهدوء, هتنفصل عنه بفضيحة , هتسامحه, عندك إقتراح آخر).
بصراحه لو كانت مجرد غلطة وعدت هسامحه
لكن لو اتجوز واحدة تانيه لقدر الله هاخد العيال واسبله البيت بكل هداوه ومش هاخليه يعرفلي طريق ............. ^_^
مشكوره ع الموضوع وبجد حلو كتير
تسلمي

إيمان بنت الحرية يقول...

هو انا مجربتش ..
بس يعنى اعتقد ان رد الفعل
هتختلف على حسب حب الزوجة لزوجها ومعزته عندها ..وكمان عقلانية الزوجة ...
والعكس بردوا ..

موناليزا يقول...

عاشقة الاحزان
ـــــــــــــ
وعليكم السلام ورحمة الله وبركاته
اختى الحبيبة:ربنا يكرمك يارب اشكرك جدا لرايك
ربنا يتقبل دعائك ويزقك بكل الخير
نورتينى انوسة الجميلة وسعيدة بتواجدك




*********************************



سم تايمز
ــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
انا الحمدلله بخير ياجميلة انتِ عاملة ايه؟ وفينك من زمان؟

سبحان الله فعلا:) وفعلا ده الحل الامثل لانها لو عملت غير كده هتبقى هى الخاسر الوحيد
ياحبيبتى ربنا ييسرلك امورك ويصلح لك جميع الاحوال ويهيئلك كل الخير
نورتينى غاليتى واسعدتينى بتواجدك




**********************************




حاول تفتكرنى
ــــــــــــــ
اهلا بيك يافندم
ربنا يتقبل دعائك
اشكرك جدا لمشاركتك




**********************************





محمد غالية
ــــــــــــــ
اهلا بيك استاذ محمد
تخيل يا فندم مش شرط يكون واقع يعنى ربنا يعافى جميع المسلمين يارب
اشكرك جدا لرايك




********************************




رامى واصل
ـــــــــــ
اهلا بيك استاذ رامى
عاجبنى اجابتك الهادئة
اشكرك جدا لرايك ولمشاركتك



********************************



المهاجر
ــــــــــ
اهلا بيك يافندم
(رجاء خاص لا تقول لى "عزيزتى")
مع احترمى الشديد لرأيك ولكن ليه مانحاولش نقومه ونلفت انتباهه
اشكرك جدا لرايك ولمشاركتك




*********************************



ذكرى رحيل قلم
ـــــــــــــــ
وعليكم السلام ورحمة الله وبركاته
اختى الحبيبة: اهلا اهلا بأجمل تحية من أجمل أخت:)
ربنا يديم عليكم نعمه ويباركلكم يارب ويسعدكم دايما
نورتينى ياجميلة ويسعدنى وجودك دائما




**********************************



ليس فقيرا من يحب
ــــــــــــــ
وعليكم السلام ورحمة الله وبركاته
اختى الحبيبة:اهلا بيكِ فى زيارتك الاولى
ربنا يكرمك يارب ويتقبل دعائك
هههههههه عسل والله
بس ايه الطيبة دى كلها:)
نورتى مدونتى واسعدتينى بتواجدك




*******************************




فلور جيرل
ـــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
اشكرك جدا لرايك
ربنا يتقبل دعائك
مع احترامى الشديد لرأيك
يعنى يوم ما يعمل حاجة حرام تسامحيه ويوم ما يعمل حاجة حلال(جوازه التانى) تعاقبيه!
نورتينى حبيبتى واشكرك جدا لمشاركتك




**********************************



ايمان بنت الحرية
ـــــــــــــــــ
اختى الحبيبة: اهلا بيكِ فى زيارتك الاولى
ويارب ماتجربيه ابدا
حبيبتى ده مجرد سؤال افتراضى وليس بالضرورة ابداً يكون واقعى(شوية خيال يعنى):)
نورتى مدونتى واشكرك جدا لتواجدك

حاسوباتيه يقول...

والله كلامك مقنع بس بصراحه صعب التنفيذ يعني صعب اني اشك في جوزي وماحاولش اضور وراه غصب عني هضور وغصب عني هفتش هو كلامك صح بس صعب تنفيذه
بالنسبه للسؤال هنفصل عنه بهدوء اكيد

yoyo يقول...

صباحك طاعةلله ورضا يارب

تسلم ايدك و الله الرسالة اللى موجودة فى البوست جميلة جدا
وانتى ماشاء الله قدريتى توصليها باسلوب جميل
بس ااحساس الخيانة صعب جدا وبيكون مؤلم
مش كل انسان بيكون له القدرة على التسامح و بدا صفحة جدبدة
ودا ممكن يحصل له كانت خيانة كبيرة ومش لها اسباب او حتى مبرارات
اعتبر الخيانة ضربة قوية موجه للعلاقة الاسرية ومن الممكن لاقدر الله ان تنهى الحياة

ربنا يبعدنا عن الخيانة يارب
اختى العزيزة دمتى بالف خير و سعادة
تحياتى
يويو

ماء تشرين يقول...

كان راى من مده انى لن اسامح ابدا حتى لو كنت بموت فيه بس انا قرات قصه لاحدى السيدات عند دكتوره تختص بعلاج المشاكل الزوجيه الدكتوره دى اسمها ناعمه الهاشمي بجد غيرت طريقه تفكيري خالص هحاول انقلك القصه وممكن تدورى في جوجل على اسم الدكتورة وهتجدى قصص فعلا مدهشه تغير تفكيرنا تماما

تقبلى مرورى

أليس في بلاد العجائب يقول...

السلام عليكم ورحمة الله وبركاته

يارب تكوني بخير ان شاء الله


بصي يا اختي العزيزة

لما تنزلي تشتري حاجة من اي محل .. حاجة سهلة جدااااااااااا
حتي لو احترتي بين دا ودا ودا .. بس في الاخر سهل تقرري وتشتري الحاجة

لو فكرتي في يوم تبيعي حاجة من اللي عندك .. اي حاجة تخصك .. اولا لازم يكون في اعتبارك انها حاجة مستعمله .. يعني دا بيقصر من عمرها الافتراضي .. ولازم تفكري هتبيعيها فين ولمين وبكام ؟؟ وساعات بعد التفكير دا بتقولي خسارة خليها يمكن تنفع بعدين

الشراء سهل اوي اوي انما البيع صعب جدا

بس لا يمكن ننكر ان في ناس بتبيع بمنتهي السهولة واليسر .. شغلتهم كده .. بياعين و البياع لسانه حلو .. بيعرف يجذب الزبون للسلعة حتي وان كانت مستعملة

وفي بضاعة جديدة ممكن تكون معيوبة و عيبها مش باين .. بس بيباعها شاطر حبتين

وفي الاخر دا رزق .. جاء من الله رايح لفلان .. و بارادة الله طالع من عند فلان رايح عند علان ..

قدر الله نافذ .. واللي يخون الله في امانته .. يعمل اي حاجة كبيرة ولا صغيرة

وردة يقول...

السلام عليكم ورحمة الله وبركاته
طبعا شكرا لطرحك الموضوع ربنا يكرمك
مينفعش بأي حال من الاحوال ان لما الراجل يخون الست تعمل زيه استحالة
ومش علشان حد غلط لازم نكرر الغلط عيب اكيد
وانا معاكي في نقطة ان الست تعمل نفسها مش واخدة باله ده حيخلي الراجل يتجنن اكتر لانه بمجرد ما حيعرف انها عرفت وعدتها حيعمل اللي هو عاوزه ولا حيديها اي اهتمام
لان اللي بتقبل مرة تقبل مليون مرة
امابقي لو الزوج مغرور وبيتباهي بخياته زي بعض من الناس ومش همة اي حاجة فالانفصال بكرامة احسن لها ومن غير فضايح طبعا لانها صعب تعيش في وضع مخزي زي ده
ربنا يهدي الجميهع ويصلح الامور لكل الازواج ان شاء الله
سلام

المهاجر يقول...

موناليزا

انا بعتذر عن الكلمة ولكنها دون قصد أرجوا أن تسامحينى على ذلك

والشئ الثانى فالخائن لا يتقوم ابدا لان الخيانة داء يختلف عن أى داء أخلاقى اخر
وعند نصح الخائن سيقول نعم ولكن اذا ابتعد رع إلى ماكان عليه ولذلك عقاب الخيانة للوطن الموت وخيانة الزوجية الرجم فالخيانة لا تستحق الشفقه

ارجوا تقبل رأيى وإعتزارى

على عبدالله يقول...

السلام عليكم

ان شاء الله هابقى اجيبلك ((زوجة المستقبل)) عشان تديها شوية نصايح من الدرر الغالية دى
:)

لو اكتشفت خيانة شريك حياتك ؟
بيتهيألى هاسيبوا يروح لحاله أحسن !
أصلى ممكن ارتكب جناية
:)


جزاك الله خيرا

Me7'o يقول...

ماذا تفعل لو أكتشفت خيانة شريك حياتك؟

خطوات

رقم واحد

هاقعد معاه وأخليه يشرحلى سبب الخيانة

رقم اتنين

هاحاول أصلح غلطتى انا فى نقطة القصور اللى هوا شايفها عندى

رقم تلاتة

هاقتله هوا واللى خانى معاه وبعد ما أقتلهم هاكلهم بسنانى وبعدين أفكر أعمل فيهم إيه تانى

رقم أربعة

أسيب البلد دى وأهج ومخليش حد يعرفلى طريق واصل


تحياتى

ريمان يقول...

حلو اوى الاحوار اللى فى الاول ده


خصوصا ان هو دمه خفيف شويه

بالنسبه للسؤال

انا لو حصل كده معايا هسيبه بهدوء واخرجه من حياتى

ادم المصري يقول...

كلامك في الصميم بس ياريت ياخدو بيه

دعاء يقول...

بوست جميل ورأى مثالى فى حياه تفتقد المثالية
الكلام سهل بس الفعل أصعب

ربنا يكفينا شر الخيانة وعذابها

ربنا يكملك بعقلك.

TIMMY !! يقول...

ربنا يسعد المتزوجين و يهديهم ,

و يعقّل العزاب و يبعدهم عن الزواج و مشاكله , و ينزع من قلوبهم حب الزواج و الحاجة إليه ,

mahasen saber يقول...

مونا مونا

رائعه يا مونا كعادتك فى كل كتاباتك بخصوص الموضوع ده

ربنا يجعله فى ميزان حسناتك ويفيد ستات ورجاله بيه

وفعلا الدعبسه ورا الزوج مبتجبش غير وجع القلب

ربنا يصلح حال بيوت الجميع

وحشتتتتتتتتتتتتتتتتتينى جدا جدا جدا

blue-wave يقول...

والله نصايح هايله
بس مين يسمع:))

ومازلتُ أتعلم يقول...

السلام عليكم موناليزا
بحيكى دائماً على بوستاتك الرائعة
وإسلوبها المتميز وربنا يهدى جميع الازواج

تحية جميلة وطيبة ليكى

أحمـــــــــــــد أبو العلا يقول...

العلاقه بين الزوجين محتاجه عقل وقلب من الطرفين
محتاجه يعرفوا امتى نشد وامتى نرخي

بس للأسف احيان كتير بنفقد العقل أو القلب, مع ان احدهما لا يغني عن الآخر

بالنسبه لسؤالك, على حسب نوع الخيانه؟
بس بوجه عام الخيانه صعب انها تتنسي وبالتالي السماح صعوبته هتعتمد على صعوبة درجة الخيانه


بوست ولا أجمل من كده كلام

عاشقة القمر يقول...

بوست جميل جدا احسن وافضل تسيبه بهدوء بلاش الفضيحه
مثل داه مش مفروض تخسر فيه اي كلام
فارغ تسيبه بهدواء احسن عشان تحافظ علي كرمتها

عاشقة القمر يقول...

ربنا يهدينا ويهدي الجميع

Dr.NaGuiB يقول...

السلام عليكم
موضوع جميل دايما الانسان المسلم محافظ على المبادئ دايما

بالنسبة للسؤال أظن أنه هايكون على حسب اللي هو عمله .... يعني رد الفعل هايكون مختلف

جنّي يقول...

السلام عليكم

نصائح ممتازة ولكن لا اجدها تتفق مع الحوار اعلاها فعدم الحوار احسن من هذا الحوار ..

اما السؤال أدعو الله تعالى ان لا يحدث ابدا مثل هذا الموقف والحمد لله الذي عافانا ..

والقرآن الكريم يقول :
{وَاللاَّتِي يَأْتِينَ الْفَاحِشَةَ مِن نِّسَآئِكُمْ فَاسْتَشْهِدُواْ عَلَيْهِنَّ أَرْبَعةً مِّنكُمْ فَإِن شَهِدُواْ فَأَمْسِكُوهُنَّ فِي الْبُيُوتِ حَتَّىَ يَتَوَفَّاهُنَّ الْمَوْتُ أَوْ يَجْعَلَ اللّهُ لَهُنَّ سَبِيلاً }النساء15

Khaled يقول...

الخيانة موضوع كبير لة أبعاد كتيرة ماينفعش تتناقش فى كلمتين ..
لكن نقدر نقول إن الانسان الخاين بطبعة مالهوش حل سواء رجل أو امرأة

و إذا كان زوجا أو زوجة ووقعوا فى بئر الخيانة و هوا ليس طبعا أصيلا فيهم فليبحث الطرف الآخر عن ما قصر فية و دفع الشريك للبحث خارج الدائرة
فأحياناً نكون مسؤلين عن خيانة من لانرضى منهم ذلك

إية المواضيع إللى تدخل السجن دى
ههههههههه

الفراشة الصغيرة يقول...

بوست جميل قوى مناليزا

فيه نضوج جميل

بس انا لو حصل كده انفصل بهدوء احسن حل

لانى للاسف مش هقدر اسامح ولا اثق فيه تانى

موناليزا يقول...

حاسوباتية
ـــــــــــــ
اختى الحبيبة:ان شاء الله ماتشكيش فيه ابداً:)
وهو كمان يعرف يحافظ عليكِ كويس
نورتينى ياجميلة واشكرك جدا لمشاركتك



*********************************




يويو
ـــــــــ
اختى الحبيبة:صباح الفل ياقمر:)
ربنا يكرمك يارب واشكرك جدا لرايك فماتوفيقى الا بالله
فعلا ياجميلة مش كل الناس عندها القدرة على التسامح وعشان كده بوجه كلامى للزوجات وبقولهم مالوش لازمة تدورى على حاجة لو عرفتيها وكانت صح هتدمر بيتك .. تغافلى قليلا واتركيه منه لله
نورتينى يويو الجميلة وسعيدة جدا بتواجدك



*********************************




ماء تشرين
ـــــــــــــ
اختى الحبيبة:سبحان الله فعلا قد نقرأ كتاب أو نسمع مجرد قصة عابرة تجعلنا تغير طريقة تفكيرنا وهذا مايميز الانسان العاقل الناضج فهو صاحب تفكير مرن
ميرسى ياقمر انا بعمل عليها بحث دلؤتى:)
نورتينى حبيبتى وسعيدة جدا بتواجدك




********************************


اليس فى بلاد العجائب
ـــــــــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير بس ده مايمنعش انى محتاجة دعائك جدا:)

"بس لا يمكن ننكر ان في ناس بتبيع بمنتهي السهولة واليسر .. شغلتهم كده .. بياعين و البياع لسانه حلو .. بيعرف يجذب الزبون للسلعة حتي وان كانت مستعملة"

طب اقول انا ايه بقى بعد الجملة الجامدة دى
بجد أثرت فيا جدا ومعاكِ حق فيها

"واللي يخون الله في امانته .. يعمل اي حاجة كبيرة ولا صغيرة"

بغض النظر على ان تعليقك خاص بالموضوع بس انا كنت محتاجة تعليقك ده جدا على فكرة
ماتحرمش منك ياقمر وسعيدة جدا بتواجدك



********************************



وردة
ـــــــ
وعليكم السلام ورحمة الله وبركاته
اختى الحبيبة: ماتحرمش منك ياجميلة الشكر لله
متفقة معاكِ جدا
ما شاء الله عليكِ رأيك ناضج ومنطقى
نورتينى وردتى الجميلة وسعيدة جدا بتواجدك




*********************************



المهاجر
ـــــــــ
اهلا بيك يافندم
اعتذارك مقبول طبعا واشكرك جدا لإجابة رجائى بصدر رحب
رأيك يحترم جدا وانا بس بحاول منع البيوت من التفكك
نورتنى واسعدتنى بمتابعتك



**********************************


على عبدالله
ــــــــــــ
وعليكم السلام ورحمة الله وبركاته
اهلا بيك استاذ على
يافندم تحت امرك:) ربنا يرزقك بالزوجة الصالحة
فعلا الطيب احسن:)
اشكرك جدا لمشاركتك




*********************************


ميخو
ــــــــ
اهلا بيك يافندم فى زيارتك الاولى
رقم واحد: ايه العقل ده كله:)
رقم اتنين: عين العقل برضه:)
رقم تلاتة: تفتكر هو ممكن يتعمل فيهم حاجة تانية:)
رقم اربعة: طب مش تستنى لما تطلع فى التلفزيون:)
نورت مدونتى واشكرك جدا لمشاركتك




**********************************


ريمان
ــــــ
اختى الحبيبة:اشكرك جدا لرايك يا جميلة
عين العقل ياريمو
نورتينى حبيبتى واشكرك جدا لمشاركتك




**********************************



ادم المصرى
ـــــــــــ
اهلا بيك استاذ ادم
الهادى هو الله وما على الرسول الا البلاغ
اشكرك جدا لتواجدك



**********************************

موناليزا يقول...

دعاء
ـــــــ
اختى الحبيبة:اشكرك جدا لرايك
متفقة معاكِ بس الحفاظ على البيت المسلم يحتاج المحاولة
ربنا يكرمك ويتقبل دعائك:)
نورتينى دعاء الجميلة وسعيدة بتواجدك



**********************************



تيمى
ــــــــ
اهلا بيك يافندم
ربنا يتقبل نصف دعائك الاول
ويخليك تغير فكرتك بالنسبة لنصف دعائك الثانى:)
اشكرك جدا لتواجدك



*******************************




محاسن صابر
ــــــــــــ
اختى الحبيبة:اهلا اهلا بالقمر بعد طول غياب
ربنا يكرمك على رايك يارب ويتقبل دعائك فماتوفيقى الا بالله
نورتينى سونا الجميلة ووحشتيييييييينى وسعيدة جدا بتواجدك


***********************************



بلو واف
ـــــــــ
اهلا بيك يادكتور بعد طول غياب
اشكرك جدا لرايك واحنا بنعمل اللى علينا والهادى هو الله



*******************************



ومازلت اتعلم
ـــــــــــــــ
وعليكم السلام ورحمة الله وبركاته
اختى الحبيبة:ربنا يكرمك ويتقبل دعائك واشكرك جدا لرايك
نورتينى حبيبتى وسعيدة بتواجدك



**********************************



احمد ابو العلا
ــــــــــــــ
اهلا بيك استاذ احمد
عندك حق فالزواج ليس مسئولية سهلة فهو يحتاج الى النضج العقلى اولا
اشكرك جدا لرايك ولمشاركتك



**********************************



عاشقة القمر
ـــــــــــــ
اختى الحبيبة:اشكرك جدا لرايك
عاجبنى نظرتك للامور
ربنا يتقبل دعائك
نورتينى حبيبتى واشكرك جدا لتواجدك



*********************************



د/ نجيب
ـــــــــ
وعليكم السلام ورحمة الله وبركاته
اهلا بيك يادكتور فى زيارتك الاولى
اشكرك جدا لرايك
وياسلام لو نعلم جميعا بأننا سفراء لديننا على الارض لاختلفت الامور
نورت مدونتى واشكرك جدا لمشاركتك


*********************************



جنى
ـــــــ
وعليكم السلام ورحمة الله وبركاته
اهلا بيك استاذ سعيد
اشكرك جدا لرايك ومتقبلة رأيك فى الحوار:)
ربنا يعافينا جميعا ويبعد عننا شرور الشياطين
الله.. ما أجمل استشهادك بكلام الله
اشكرك جدا لمشاركتك



***********************************



خالد
ـــــــ
اهلا بيك استاذ خالد
متفقة معاك فالخيانة تتشعب الى كذا شعبة وليست واحدة فقط ولكنى هنا أقصد الخيانة التى وردت فى الحوار فى اول الموضوع
رغم ان التقصير مش مبرر ابدا للخيانة بس متفقة معاك

بدل قلت سجن يبقى عرفت تصرفك هيكون ايه:)
اشكرك جدا لمشاركتك



**********************************



الفراشة الصغيرة
ــــــــــــــ
اختى الحبيبة:اشكرك جدا لرايك ياجميلة فماتوفيقى الا بالله
عاجبنى ردك المنطقى جدا
نورتينى حبيبتى واشكرك جدا لمشاركتك

لؤلؤةالرحمن " السلفيه ".....هويتى اسلاميه يقول...

السلام عليكم ورحمه الله وبركاته

بوست رائع

جزاكى الله خيرا

بالنسبه لسؤالك

اجابتى انى اسامح وادعيله بالهدايه
اخوات كتير هتقول انى ممكن اكون بقول كلام وبس لكن لا
اكيد هزعل واتقهر وكل الاحاسيس دى لكن لو زوجى بعد عنى فده اكيد بسببى افتش واستعين بالله وارجع زوجى تانى
وادعوا له بالهدايه فهو جنتى ونارى
الجنه مش سهله المنال ولا سهله الوصول اليها
لازم نتعب ونتألم فى الدنيا عشان نوصلها بجد
================================

Hossam يقول...

صديقتى موناليزا
الموضوع خفيف ولطيف اوى
عجبنى اوى الحوار الظريف اللى فى الاول
بالنسبة لنصايحك دى بتبقى على حسب الشخصيات فى شخصيات بتدور ورا جوزها من وراة عشان تطمن وفى اللى بتدجور ادامة وفى اللى بتسكت خالص
س}الك اجبتة بالنسبة ليا انا لو بحبة اوى يبقى هسمحة ولو عملها تانى هاخد موقف واحاول اصلحة والمرة التالتة هسيبة بهدوء
وعلى فكرة ده بالنسشبة للحبيب او الحبيبة او الصديق او الصديقة
تحياتى على الموضوع الجميل

أليس في بلاد العجائب يقول...

ربنا يفرج كربك و يزيح همك ويرضي عنا وعنك :)

مش لازم يكون الخيانة دي من زوج ولا خطيب ولا حبيب .. دلوقتي تحورت و تطورت و بقت علي كافة المستويات و في كل الدرجات

هي هي نفسها خيانة زميل ولا زميلة في العمل - سواء خيانة في حاجة في الشغل او الحركات الخبيثة اللي بتتعمل من وراء الظهر لنيل ميزة ما لا يستحقها -

وهي هي خيانة البائع في اي محل او لاي بضاعة لما بيخفي عيوبها ولما بيبقي جشع في تسعيرها

وهي هي خيانة الام للاب لما بتفضل تملي دماغ ولادها بكلام وحش عن ابوهم - حتي لو هو فعلا اسوء انسان في الدنيا

وهي هي خيانة الاب اللي بيصور زوجته و ام اولاده علي انها شيطانه في عيون اولادها وعيون اللي حوليهم

وهي هي خيانة الاخ لاخوة عند احد والديه للتوقيع بينهم

كلها خيانات باشكال والوان كتيرة ميكفيهاش اي كلام علشان يحصرها


اما بخصوص نصائح الزوجات عندي حد هيفرح بيهم اوي :):) بس ادعيله ربنا يعدي اليومين دول عليه علي خير ويقوم بالسلامة يارب

ربنا يجعل ثواب ما تكتبين في ميزان حسناتك ويجعله خالصا لوجه الله تعالي :)

على خطى الحبيب يقول...

السلام عليكم ورحمة الله.....
موضوع هادف أكيــد(موناليــزا),
نصايح غالية وياريت كل البنات تعمل بيها, متهيألى لو عملوا كدة وسمعوا بنصايحك حياتهم هتبقى طيبة ان شاء الله,
اما بخصوص السؤال الجانبى:-
انا بقول نسيب بعض فى هدوء بدل من الفضايح وربنا يسامحة.

على خطى الحبيب يقول...

نسيت أقولك(موناليــزا),
أسف على تأخيرى فى الرد, لكن يمكن موضوع "مروة الشربينى" مأثر علينا شوية.

******
مش احنا قلنا قبل كدة نشيل بقى موضوع الموافقة على التعليقات دة !!!

MaNoOoSh يقول...

الخيانة صعبة جدا وبتثير فى النفس مشاعر صعب السيطرة عليها

ولذلك صعب جدا الانسان يتخيل رد فعله الا لو اتحط فى الموقف
ربنا ما يحط حد فى الموقف ده أبدا

بس فعلا بلاش الانسان يقعد يدور ويدعبس على حاجات هتجرحة لما يعرفها الا اذا كان قادر على السيطرة على مشاعره

أم أحمد المصرية يقول...

بص بقي يا موني الكلام شكله حلو قوي لكن اعتقد ان الواقع صعب يبقي مثالي كده
يعني انا ممكن اعمل لزوجي كل الحاجات الحلوة دي لأني بحبه لكن لو الشك دخل فلن احاول او ارغب في استرداده

الازهرى يقول...

كما تعودنا ان نجد درر من النصائح الغالية هنا

وخاصة
بدل ماتسخرى مجهوداتك للإيقاع به سخريها لجعله ينسى كل المغريات الخارجية والالتفات لكِ فقط

لأنه كان سببا فى هدم الكثير من البيوت المترابطة فى مواقف كنت شاهدا عليها

تحياتى دوما

GiGi world يقول...

معلش يعنى
انا مش ربنا صحيح
بس انا مش هقبل خيانه
واكيد هيبقى انتهى
هو اللى معاه دي اي حد ولا ايه

salwa يقول...

السلام عليكم اخت موناليزا
الخيانة طعن بالسكين و جرحها كبير
اللهم اجعلنا ممن يحسنون التصرف
كلامك صحيح و تسلم يدك
سلام

سندس وأمل يقول...

يعنى الواحده تسيب زوجها يتسرمح:)زى ماهوا

عايز ومتكلمهوش؟

وبالنسبه للى انا هأعمله على حسب نوع الخيانه...:)

سلامات ياجميل

سندووووووووسه

jonoon 3aqel يقول...

ربنا يستر علينا و يهدي سرنا و يبعدنا عن الحرام و يغنينا عنه بالحلال..

تعتمد على نوع الخيانة...

خيانة في وعد..
خيانة في كذبة..
غير عن الخيانة في مقابلة شخص آخر..

و الله ما بحبش افكر ف الحاجات دي..لكن لو كانت زوجتي..و خانتني خيانة متوسطه هديها فرصة واحده اضافيه لا غير..

لو كانت الخيانة كبيره..يبقى المعروف اولى..و تروح بيت اهلها و ربنا يستر عليها


جزاك الله خير

تحياتي

موناليزا يقول...

لؤلؤة الرحمن
ــــــــــــــــ
وعليكم السلام ورحمة الله وبركاته
اختى الحبيبة: ربنا يكرمك واشكرك جدا لرايك
:) ربنا يكملك بعقلك ويرزقك بالزوج الصالح
نورتينى حبيبتى واشكرك جدا لمشاركتك




********************************



حسام
ــــــــ
اهلا بيك استاذ حسام
بداية رجاء خاص لا تقول لى "صديقتى"
اشكرك جدا لرايك
انت متأكد يافندم من إجابتك ؟هتسامحه وتديله بدل الفرصة اتنين!!
على فكرة الموضوع خاص بالازواج وليس الاحبة ولاصدقاء
عموما اشكرك جدا لمشاركتك



**********************************



اليس فى بلاد العجائب
ــــــــــــــــــــ
حبيبتى الغالية:اهلا بعودتك التى تسعدنى دائما:)
ربنا يسعدك ويعزك يارب ويتقبل دعائك اللهم امين:)

متفقة معاكِ جدا فالخيانة لها فروع كتير
ولكنى هنا اتحدث عن الازواج ولذلك ذكرت الحوار فى اول الموضوع حتى لا تختلط الامور

ربنا يقومه بالسلامة يارب ويرجع بقى قريب ونفرح بيكم عاجلا غير آجلا اللهم امين:)
نورتينى غاليتى واسعدتينى بتواجدك



**********************************


على خطى الحبيب
ـــــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك ويعزك يارب اشكرك جدا لرايك فماتوفيقى الا بالله
ياريت ولو واحدة بس تستفيد منه ربنا يسمع منك:)

أخلاق والله يافندم
----
يافندم سيادتك تنورنى فى اى وقت
****
لأ خالص عمرنا ماتكلمنا فى النقطة دى:)

اشكرك جدا لمشاركتك




**********************************



منوش
ـــــــــ
اختى الحبيبة:متفقة معاكِ وربنا يسمع منك ويبعدها عننا اللهم امين
ده حقيقى وبعدين كمان ليه مانحترمش خصوصية الاخر مش جايز يكون مابيخونش بس مابيحبش حاجته تتفتح من غير اذنه
نورتينى منوشة الجميلة واشكرك جدا لمشاركتك



***********************************



ام احمد المصرية
ـــــــــــــــــ
اختى الحبيبة:عارفة ان التنفيذ صعب ولكن محاولة منا للبقاء على البيوت قائمة دون ان يطاردها شبح الانفصال

وتسيبيه لواحدة تانية كده ببساطة!!
نورتينى حبيبتى واشكرك جدا لمشاركتك



*********************************



الازهرى
ـــــــــ
اهلا بيك يافندم
ربنا يكرمك يارب فماتوفيقى الا بالله
اشكرك جدا لتواجدك




**********************************



جيجى وورلد
ـــــــــــ
اختى الحبيبة:ياواد ياجامد:)
عاجبنى ثقتك فى نفسك:)
ربنا يرزقك يارب بالزوج الصالح
نورتينى جيجى الجميلة واشكرك جدا لمشاركتك



*********************************


سلوى
ـــــــ
وعليكم السلام ورحمة الله وبركاته
اختى الحبيبة:ربنا يكرمك ويتقب دعائك اللهم امين
نورتينى سلوى الجميلة واشكرك جدا لرايك




********************************


سندس وامل
ـــــــــــ
اختى الحبيبة:هى آه مش هتكلمه بس ممكن تعمل حاجات تخليه ينسى السرمحة دى خالص:)
نوع الخيانة واضح على فكرة:)
راجعى الحوار فى اول الموضوع
نورتينى سندوسة الجميلة واشكرك جدا لمشاركتك


*********************************



جنون عاقل
ـــــــــــ
اهلا بيك يافندم
ربنا يتقبل دعائك اللهم امين
اشكرك جدا لمشاركتك

اللى تشوفه يقول...

السلام عليكم
معلش اتاخرت فى تعليقى بس كان عندى مشكلة ف التعليقات

بجد صدمة لما تلاقى الشخص اللى وثقت فيه بيغلط او بيخون زى ما حضرتك عبرتى
بس احنا مش اوعى من ربنا اللى اوحى لرسوله صلى الله عليه وسلم
ان كل بن ادم خطاء وخير الخطائين التوابين

فايه يعنى
غلطة او اتنين تلاتة ومرة بالحسنى ومرة تكبرى ومرة تقفى بئا
كدا كفاية
ساعتها حتى مش هتلومى نفسك انك بتهدمى حياة لانك كدا بتنقذى نفسك
"ومن احياها فكأنما احيا الناس جميعا"
مابالك حييتى نفسك؟
دا رايى
ولو فيه م المثالية كتير
بس ربنا يعين كل فرد على العفو والتسامح
الرد بالضبط
هسامحه ان شاء الله

ودا كمان دليل على ثقة الانسان بنفسه وتقديره لذاته
لان الطرف المخطىْ فاهم كويس ايه اللى بيحصل
جزاكم الله خيرا
تقبلى مرورى

ahmed_k يقول...

ما شاء الله عليكي كلامك ونصائحك عين العقل وكلها درر لابد وأن نتدبرها جيدا
الخيانه من أقسى الكلمات فما بالك لو تحولت لفعل فهي أكثر من الخمر بمئات المرات سلبا للعقل وتغييرا للفكر
ورد الفعل تجاه الخيانه يتحدد حسب درجة الخيانه طبعا فليس كل الخيانه تؤدي لفقد الإنسان السيطره على نفسه
فبخصوص سؤالك خيانة شريك الحياه صعبا جدا لأنهما المفروض كيان واحد في جسدين فلو كانت الخيانه من شريك حياتي وصلت لحدها الأقصى من علاقه مع آخر ففي تلك الحاله الله وحده يعلم ما قد يحدث وممكن ينتهي الأمر بي عند فضيلة المفتي هههه
أما لو أقل من ذلك فلكل مقام مقال

ونعوذ بالله من الخيانه والخائنين
ونسأل الله أن يحفظنا ومن نعول منها ومن عواقبها

مع خالص تحياتي

أليس في بلاد العجائب يقول...

انا عارفة انها عن الازواج

انا برد علي الجملة اللي عجبتك في التعليق الاول اللي يخون الله في امانته يخون في الكبيرة والصغيرة

فاللي يعمل اللي كتبته دا استحاله يكون امين مع زوجته او مع زوجها !!

حتى تشرق الشمس يقول...

السلام عليكم ورحمة الله وبركاتة
كيف حالك يا قمر؟
هههههههههه
الاسئلة بصراحة تحفة
ربنا يعافينا من الخيانة
ولو اكتشفت بعيد الشر عنى حاجة زى دى
انا هموت بمنتهى البساطةلانى بحب زوجى جدااااااااا
وهو كل الحياة هو و سلمتىربنا يخلهوملى يا رب
دمت بالف خير

مدحت محمد يقول...

حلوة عيل بنفسجى دى

بس الصراحة نصايحك كلها صح

لو خيانة بقى اعتقد انى هسيبه بهدوء

ღ White Rose ღ يقول...

السسسسسسلام عليكم =)


بجد تدوينه قيّمة خاصة للمتزوجآت ..

والله يكفينا شر الخيانة ..

اما بالنسبة لسؤالكـ ..

برأيي ان من يخون لا يستحق ذرة اهتمآم مني .. وربما اتركه ايضا ..

موناليزا .. بجد انا مبسوطة اني عرفت مدونتك هذه ..


اشكرك عزيزتي ..

موناليزا يقول...

اللى تشوفه
ــــــــــــــ
وعليكم السلام ورحمة الله وبركاته
اختى الحبيبة: ولا يهمك ياجميلة انتِ تنورينى فى اى وقت:)
ربنا يكملك بعقلك:) ويرزقك بالزوج الصالح اللى مايضعكيش فى هذا الموقف ابدا
نورتينى حبيبتى واشكرك جدا لمشاركتك




*********************************



احمد-ك
ـــــــــ
اهلا بيك استاذ احمد
ربنا يكرمك اشكرك جدا لرايك فماتوفيقى الا بالله
:) يافندم ربنا يرزقك بالزوجة الصالحة ويتقبل دعائك اللهم امين
اشكرك جدا لمشاركتك



*********************************



اليس فى بلاد العجائب
ـــــــــــــــــــ
اختى الحبيبة:عندك حق واشكرك جدا للتوضيح
بحبك جدا وفى انتظارك دائما




***********************************



حتى تشرق الشمس
ـــــــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير ازيك انتِ ياجميلة وسلمى عاملة ايه دلؤتى؟

:) ياحبيبتى بعيد الشر عنك ويارب يحفظلك بيتك ويباركلك فى زوجك وابنتك ويسعدكم دائما اللهم امين
نورتينى حبيبتى واشكرك جدا لمشاركتك



********************************



مدحت محمد
ــــــــــــ
اهلا بيك استاذ مدحت
:) أى خدمة
اشكرك جدا لمشاركتك



******************************



وايت روز
ــــــــــ
وعليكم السلام ورحمة الله وبركاته
اختى الحبيبة:اهلا بيكِ فى زيارتك الاولى
اشكرك جدا لرايك ولمشاركتك
نورتى مدونتى وسعيدة بتواجدك وارجو دوام التواصل

mohra يقول...

هاسيبه بهدوء

اما التجسس ده اظن انه مش من النفس السويه

أليس في بلاد العجائب يقول...

وانا كمان :)

وومن يقول...

مونا أزيك عاملة ايه ؟

بصي علشان الكلام في الموضوع ده بالذات بيتعبني انا هاسامحة لو بحبة وهاراجع نفسي في تقصيري

انما لو مش بحبة استحالة مفيش شئ هايشفعلة

أحسن تـستاهـل يقول...

لو اكتشفت ده لا قدر الله بعد الشر يجعل كلامنا خفيف هعمل العمايل واسوي الهوايل .. هعمل عبيطة ولا كإني عرفت حاجة.. بس هدلعه وشخلعه وحتة شفتي واوريله من كل الدلع كل اشي
نياهاهاهاهاها
منمن وحشتيني

مها ميهوووو

Me7'o يقول...

بصى
انا عجبنى ردك على كلامى
فجبت اسمك فى آخر بوست عندى
أوك
تحياتى

موناليزا يقول...

مهرة
ــــــ
اختى الحبيبة:اهلا اهلا بالقمر بعد طول غياب
عاجبنى ثقتك فى نفسك:)
نورتينى ياجميلة واشكرك جدا لمشاركتك



********************************



اليس فى بلاد العجائب
ـــــــــــــــــــ
حبيبتى الجميلة ربنا يديم علينا نعمة الحب فيه ويجمعنا تحت ظله فى يوم لا ظل فيه الا ظله
ربنا يسعدك يارب ويفرح قلبك قريب:)




*********************************





وومن
ــــــــ
اختى الحبيبة:اهلا اهلا بالقمر بعد طول غياب
انا الحمدلله بخير ازيك انتِ ياجميلة
ربنا يرزقك يارب بالزوج الصالح وما يضعكيش فى الموقف ده ابداً:)
نورتينى ميرا الجميلة ووحشييييينى جدا واشكرك جدا لمشاركتك



********************************






احسن تستاهل
ــــــــــــــــ
اختى الحبيبة:اهلا اهلا بالقمر بعد طول غياب
ايوا كده خليكِ شاطرة:)
ربنا يسعدك يامهاميهو ويرزقك بالزوج الصالح
نورتينى حبيبتى ووحشتيينى جدا واشكرك جدا لمشاركتك






***********************************



ميخو
ــــــ
اهلا بيك يافندم
رغم انى مش فاهمة حضرتك تقصد ايه بإنك جبت اسمى
بس اشكرك لرايك فى ردى على تعليقك

Me7'o يقول...

يعنى
اتفضلى زورينى وأشربى الشاى
ماشى

ديالا يقول...

بصي بوست هايل جدا

الحوار الي في الاول دمه شربات

بجد بقي بحييكي علي البوست ده

موناليزا يقول...

ميخو
ـــــــ
:) كلك ذوق يافندم
عزومة مقبولة بس خليها شاى بالنعناع او شاى بلبن:)
اشكرك جدا لمتابعتك




*********************************




ديالا
ــــــــ
اختى الحبيبة:اشكرك جدا لرايك الذى اسعدنى جدا
نورتينى ياجميلة وفى انتظارك دائما

سمسم يقول...

السلام عليكم
ربي يحفظ كل بيوت المسلمين
يحتاج انجاح الزواج لوعي كامل من الطرفين
وسعة صدر
وربي يخليكي بوست جميل

موناليزا يقول...

سمسم
ـــــــ
وعليكم السلام ورحمة الله وبركاته
اختى الحبيبة:اهلا بيكِ فى زيارتك الاولى
ربنا يكرمك واشكرك جدا لرايك
نورتى مدونتى وارجو دوام التواصل

نسيبه يقول...

السلام عليكم ورحمة الله وبركاته
الخيانه شيءصعب جدا ربنا يعافينا واللي إنت إتكلمتي عنه إسمه خطوات الشيطان سواء في إيقاع الرجل في خيانة زوجته أو إنه يخليها تشك فيه وبعدين تبدأ تدور ورا الشك ده ولو لقت حاجه تواجهه فهو يعند وكل المشاكل بقي بعدها طبعا الشيطان له جانب كبير بس مش كل السبب الشيطان لأن الإنسان الخائن أكيد بيكذب وبيعمل حاجات تانيه كتير وربنا ما يكتبها علينا بس لو ده حصل لا قدر الله معايا مش عارفه ممكن أعمل إيه فعلا ربنايستر

موناليزا يقول...

نسيبة
ـــــــ
وعليكم السلام ورحمة الله وبركاته
اختى الحبيبة: يا اهلا يا اهلا
ربنا يرزقك ياجميلة بالزوج الصالح اللى يتقى ربنا فيكِ ومايغلبكيش معاه:)
نورتينى حبيبتى وأسعدتينى بتواجدك

أبو كريم يقول...

على الخائن تدور الدوائر...وكما قال فاروق جويده

أسقطت حبك من سنين حياتي



وصلبته شبحا على الطرقات



وجمعت أيام الفضائل كلها



فوجدت بعدي أجمل الحسنات



قد كنت في ليل الظلال خطيئة



لا الصوم يغفرها ولا صلواتي


يعنى طلق وانسى وسيبها للى هايحاسبها

موناليزا يقول...

ابو كريم
ــــــــــ
اهلا بيك يافندم
ما اجمل تعليقك واستشهادك بهذه الابيات
اشكرك جدا لمشاركتك