السبت، 1 أغسطس 2009

جوجو و زمردة (8)

دخل "جوجو" على شقيقته"زمردة" فى غرفتها فوجد كراسة الرسم الخاصة بها ممزقة وشقيقته تبكى بِشدة فسألها قائلاً: مالك يا زمردة؟ أنتِ بتعيطى ليه وإيه اللى قطع كراسة الرسم بتاعتك كده؟.
ردت عليه وهى مُنهارة:- أنا اللى قطعتها وماعدتش هرسم تانى أبداً.
- ليه بس إيه اللى حصل؟ معقول تقولى كده والرسم ده هوايتك الوحيدة . ده غير أنك موهوبة فيه كمان.
- ما هو علشان موهوبة دى لازم ماعدتش أرسم تانى.
- ممكن تبطلى عياط وتفهمينى أكتر.
- فاكر الرسومات اللى كنت برسمها لما مُدرسة الفصل تطلبها مننا فى حصة الرسم؟
- أيوة طبعاً فاكر دى كانت فى قمة الجمال وعشان كده المُدرسة أخذتهم عشان تشتركلك بيهم فى معرض المدرسة.
- ما هو أنا كنت فاهمة كده لغاية النهاردة.
- ليه ؟ إيه اللى حصل؟.
- كان فيه مسابقة أجمل فصل على مستوى المدرسة والفصل بتاع "فوفو" صاحبتى هو اللى فاز وأخذ الكاس والطلبة اللى شاركوا فى جماله اتكرموا.
رحت أشوف الفصل الفائز شكله إيه وليه الفصل بتاعى ماكسبش. لقيت كل الرسومات بتاعتى بتزين الجدران ومنسوبة لواحدة تانية وهى اللى اتكرمت.
مابقيتش مصدقة وقلت لـ"فوفو" كل الرسومات دى بتاعتى. ولأنها مش حاسة بالصدمة اللى أنا فيها لقيتها بتقولى ماكنتش اعرف إن رسمك حلو أوى كده!!.
- وما سألتيش المُدرسة ليه عملت كده؟.
- الموضوع مش محتاج سؤال لأنها رائدة الفصل ده .
- وده يخليكِ ما ترسميش تانى.!!.
-أيوة طبعاً بدل رسوماتى فى الآخر هتتنسب لغيرى يبقى مالوش لازمة.
- ياستى ارسمي وماتوريهومش لحد. المهم ما تموتيش موهبتك.
- وإيه فايدة أنى أرسم ومحدش يقولى رأيه! هرسم لنفسى يعنى!.
- ولا تزعلى نفسك أنا هقول لبابا وأخليه يشتركلك فى أى مسابقة فنية الإدارة تكون عاملاها.
- بعد إيه بقى أنا أتسرقت عاااااااااااااااااا.
- أنا هروح مع بابا بكرة المدرسة وهنصلح الوضع ده بس أنتِ ماتزعليش وبطلى عياط بقى.
مسحت دموعها ولكنها ما زالت حزينة.
*************************
دعوة للمناقشة
ـــــــــــــــــــــــــــ
* ماذا تفعل إذا أكتشفت أن هناك من يأخذ أفكارك على المدونة و أسلوبك فى الكتابة وربما نقل بعض مواضيعك دون إذنك؟
ومن وجهة نظر الجميع ما الحل المناسب مع هؤلاء؟؟.
*****
رجاء لكل من يكتب إذا أعجبك موضوع وأردت أن تنقله دون الإستئذان من صاحبه على الأقل أذكر المصدر(إيميل- جريدة - كتاب- برنامج- إحدى المدونات....) وإذا أمكن أذكر الرابط.
وأبسط حاجة خالص أن تذكر بأنه منقول ولا تنسب لنفسك أبداً ما هو ليس لك.
******
أدعوكم لزيارة هذا الموضوع : بيقولوا عليك غريب.

هناك 46 تعليقًا:

ستيتة يقول...

لو سألتي نفسك ايه الأسهل ع الإنسان
أن يبدع ويخرج عصارة تفكيره
ام ان "يسرق" مجهود غيره؟
ها تلاقي الإجابة
السرقة أسهل
وأربح تشجيعيا "لأنه فعلا سارق شيء غالي"
ولازم يكون فيه دايما حرامية
أمال النار مستنية مين والعياذ بالله؟
حقيقة معنديش رد عن إزاي نحمي أملاكنا التي لم يكفل القانون حمايتها كالمدونات
غير وضع ردع معنوي وديني لصاحب الضمير الحي
لا تسرق أفكاري فالسرقة حرااااااااااااااااام

blue-wave يقول...

ياااااااااة
ياما حصلت
مش بس على المدونه
بس انا الحمد لله بعرف اخد حقى
تحياتى

MOHAMMED ELBANNA يقول...

موناليزا
احساس صعب لما الواحد يكتشف انه اتسرقت افكارة وتعب ومجهود العمر .
وافضل طريقة في موضوع زي دة هي مواجهه الشخص اللي عمل كدة ونعرفة ان احنا كشفناة ونحسسة ان كل الناس بتشاور علية وتقول اللص اهوة .
تقبلي تحياتي على مواضيعك الجميلة
محمـد البنا
طريق النجاح

د. ياسر عمر عبد الفتاح يقول...

سرقة الأفكار يمكن أسوا من سرقة المال
وحاجة تضايق جداً لما نلاقي حد مد إيده جوه دماغك وأخد فكرك وإبداعك

طبعاً مش هتوقف عن الكتابة
لأن ده حصل فعلاً ومتوقفتش
لكن هبقي متضايق جداً
وبرضه فرحان جداً

لأن معني غن الحاجات بتاعتي اتسرقت
يبقي كانت في الأصل جميلة وتستحق
الناس لا تركل كلباً كيتاً

♥نبع الغرام♥♪≈ يقول...

السلام عليكم

تسلم ايديكى ياقمر بجد جميله قووى

بس تعرفى احنا مش هنقدر نقول غير حسبى الله ونعمه الوكيل

هنعمل ايه بس كلنا بنتسرق ومش لاقين اللى يرجع حقوقنا

تحياتى
انوسه

وحي القلم يقول...

السلام عليكم
فكرة سرقة الافكار دي كارثية ولازم ليها حل
احنا عملنا مدونة اسمها افشنا حرامي لهذا الغرض
ماذا تفعل إذا أكتشفت أن هناك من يأخذ أفكارك على المدونة و أسلوبك فى الكتابة وربما نقل بعض مواضيعك دون إذنك؟ومن وجهة نظر الجميع ما الحل المناسب مع هؤلاء؟؟

أنا لو اكتشفت كدا هاكتبها له ف تعليق
والحل المناسب لهؤلاء ان يموتوا أو تقطع عقولهم

غير معرف يقول...

السلام عليكم
ما شاء الله موضوع جميل كالعادة
أتمنى لك التوفيق
دام قلمك وسلمت يداك
ودمت بكل الخير

ذكرى رحيل قلم يقول...

السلام عليكم

ازيك يا مونمن عاملة ايه
يعني هي جت ع الرسم كلها كوسة يا ستي حسابهم عند ربنا

اصلك هتعملي ايه في بلدنا المشهور بيخد مجهود المغمور

احلي حاجة اخدتها منك الكود
دمتي جميلة

GiGi world يقول...

المهم ان كل بلدنا ماشيه كده الا مارحم ربي
بجد فكره البوست ده هاااااااااااايله
جزاك الله خيرا كثيرا
بحبك فى الله ياقلبى

rovy يقول...

شىء بشع ان الانسان يشوف مجهوده بينسب لغيره .. احنا ايه اللى حصل لنا و ليه الضمير مات فى ناس كثير جداا كده ..
محتاجين لصحوة مش عارفه ازاى ممكن نجدها لكن احنا فعلا مش ممكن نستمر من سىء الى اسوأ بالشكل ده ..
بالنسبه لسرقة التدوين .. عاوزه اقولك ان كل مكان فيه الناس الوحشه و اللى ضميرها مات مع كل الاسف حتى فى التدوين .. بس مهما سرقوا و قلدوا فى الاخر لن يصح الا الصحيح و هما اكيد حينكشفوا .. طبعا نفسى حد يقولنا ازاى ممكن نحمى مدونتنا و افكارنا من الناس دى ..
سلمت يداكى حبيبتى على مواضيعك الهامه اللى دايما بتناقشيها و دمتى فى رعاية الرحمن دوما ..

ارق تحياتى و خالص محبتى لكى دوما

fL0weR-giRL يقول...

السلام عليكم
*************
بجد الواحد بيحس بزعل شديد لو حد سرق حاجه من مجهوداته وخاصه لو هو كان تعبان فيها وجيه واحد متعبش وخدها علي الجاهز

انا لو حد خد حاجه اصلا بتاعتي انا هزعل بيني وبين نفسي بس مش هقدر اتكلم وهعمل زي زمرده هقعد اعيط لغايت لما حدا تاني يجي ياخد حقي

انا عجبني وصفك للموضوع وكانت طريقتك جميله جدا


**تقبلي مروري **

غير معرف يقول...

موناليزا الحبيبة
هو شعور محزن جدا
لم اتعرض له ولم الاحظه على احد
بس انا واثقة انه بيحصل
الموضوع موضوع ضمير واخلاق
ولو حصلت معايا لازم حبين للسارق انه عرفته
تحياتى

موناليزا يقول...

ستيتة حسب الله الحمش
ــــــــــــــــــــ
اختى الحبيبة:اهلا اهلا بنبض الحكمة
تعرفى ان فعلا السرقة سهلة وخصوصاً للمحترفين:)
عجبنى اوى جملتك دى"أمال النار مستنية مين والعياذ بالله؟"
نورتينى حبيبتى وسعيدة بتواجدك



**********************************




بلو واف
ـــــــــ
اهلا بيك يادكتور
ربنا يوفقك دايما بس مش كنت تقولنا بتاخد حقك على النت ازاى واهو كله بثوابه:)
اشكرك جدا لتواجدك




********************************




محمد البنا
ـــــــــــ
اهلا بيك استاذ محمد
أحترم رأيك جدا بس أحب اضيف لحضرتك ان الكلام ده كان زمان لان بكل بساطة اللى اختشوا ماتوا:)
اشكرك جدا لرايك ولمشاركتك



**********************************



د.ياسر عبدالفتاح
ــــــــــــــ
اهلا بيك يادكتور
تعرف انى كنت لسه بقول لنفسى كده ان لو الفلوس اتسرقت ممكن ترجع لكن لو اى حاجة تانية مادية او معنوية اتسرقت بيبقى صعب اوى انها ترجع وسليمة زى ما كانت
مع احترامى الشديد لرايك لو كل حاجة جميلة اتسرقت بعد كده مش هنلاقى حد يعمل اى حاجة جميلة طالما عارف انه هيتسرق
اشكرك جدا لمشاركتك ولتواجدك




*********************************




عاشقة الاحزان
ــــــــــــ
وعليكم السلام ورحمة الله وبركاته
اختى الحبيبة:اهلا اهلا بأنوسة الجميلة
ونِعم القول "حسبى الله ونعم الوكيل"
اشكرك جدا لرايك
نورتينى حبيبتى وسعيدة بتواجدك




*******************************




مصعب صلاح
ـــــــــــ
وعليكم السلام ورحمة الله وبركاته
اهلا بيك استاذ مصعب
ربنا يكرمك على فكرة هذه المدونة
اشكرك جدا لمشاركتك



**********************************




العصفورة
ــــــــــــ
وعليكم السلام ورحمة الله وبركاته
اختى الحبيبة:ربنا يكرمك يارب واشكرك جدا لرايك فماتوفيقى الا بالله
نورتينى ياعصفورة وسعيدة بتواجدك



***********************************




ذكرى رحيل قلم
ـــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
انا الحمدلله بخير ازيك انتِ ياجميلة

على رأيك ربنا كبير
على فكرة الكود مش حماية كاملة برضه:)
نورتينى ياجميلة وسعيدة بتواجدك




***********************************




جيجى وورلد
ـــــــــــــ
اختى الحبيبة:اهلا اهلا بالقمر
ودى المصيبة
ربنا يكرمك واشكرك جدا لرايك
وانا كمان بحبك جدا فى الله:)
وأحبك الذى أحببتنى فيه
ربنا يجمعنا تحت ظله يوم لا ظل فيه الا ظله
نورتينى جيجى الجميلة وسعيدة بتواجدك



*********************************



روفى
ـــــــ
اختى الحبيبة:اهلا اهلا بالقمر
ولذلك صدق رسولنا صلى الله عليه وسلم حينما قال"بدأ الاسلام غريباً وسيعود غريباً فطوبى للغرباء"
وفعلاً ياريت نلاقى حل لانتهاك جميع الحقوق سواء فى النت او فى الواقع
ربنا يكرمك واشكرك جدا لرايك
نورتينى روفى الجميلة وسعيدة بتواجدك




**********************************



فلور جيرل
ــــــــــــ
وعليكم السلام ورحمة الله وبركاته
اختى الحبيبة:يارب ما تتعرضى للموقف ده ابداً لان لو الواحد معرفش ياخد حقه بنفسه هيبقى صعب حد يرجعهوله
ربنا يكرمك واشكرك جدا لرايك
نورتينى حبيبتى وسعيدة بتواجدك



********************************


أم مالك
ــــــــــ
اختى الحبيبة:اهلا اهلا بالقمر
ويارب ماتتعرضى له ابداً
ياااه "الضمير والاخلاق" تعرفى بفرح اوى لما بحس ان لسه حد عارفهم
ياريت المواجهة بتنفع ده ممكن يعترف ويقولك كمان اعلى ما فى خيلك اركبيه وعادى جداً
بس ربك كبير يمهل ولا يهمل
نورتينى حبيبتى وسعيدة بتواجدك

بنجاواتى يقول...

واضح ان الموضوع بدأ يتكرر

انا بصراحة ما اتعرضتش للموقف ده فى التدوين
لكن ممكن يكون حصل لى فى حاجات تانية وفى كل مرة بحاول استرجاع حقى ولو فشلت خلاص هعمل ايه يعنى

بصراحة الحل صعب جدا ومش موجود اساسا

تحياتى

هكذا علمنى سيدنا محمد( صلى الله عليه وسلم) يقول...

السلام عليكم ورحمة الله وبركاته
حياكم الله وبياكم أخوانى وأخواتى وسدد على طريق الحق خطاى وخطاكم

أزيك اختى الكريمة أدعواالله أن تكونى فى خير ومنة من الله عز وجل .

انا بأكد على كلامك اللى فى الأخر إنه المفروض كل واحد مينساش ينسب كل حاجة لصاحبها على الأأقل بذكر المصادر كما ذكرتى أو بكلمة منقول لو مكنش قادر يوصل للمصادر اللى بنى عليها معلوماته ، لإنه ميعرفش أد إيه الإنسان دا تعب عشان يكتب موضوع ما فمينفعش ييجى أى واحد بكل بساطة وياخد منه مجهوده دا .

منــار فايد يقول...

انا اتسرقت من على المدونه مرتين لحد دلوقتي
وصدقني ماعرفتش اعمل حاجه
فكرت ابطل اكتب
بعدين قلت انا ماصدقت اكتب حاجه الناس تعجبها
وماصدقت جاتلي فرصه الكتابه
فلغيت الفكره وقلت حسبي الله ونعم الوكيل

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى الكريمه
تحياتى
انا شايف انها ماتبطلش رسم بس تبقى تاخد بالها بعد كده وعلى رأى المثل ماحدش بيتعلم ببلاش واهى دفعت الثمن واتعلمت الدرس
انما حكاية السرقه دى حلها ايه ؟؟ بصراحه مش عارف
ههههههههههههههه
يمكن علشان انا مش موهوب فمش خايف ان حد يسرقنى !! (هيسرق ايه ياحسرة)
ههههههههههههه
تقبلى مرورى وتحياتى
والسلام عليكم ورحمة الله وبركاته

أبو كريم يقول...

يا أمة الله.. وفقك الله
الموضوع الى أثرتيه ده قمه فالحقيقه.. والشاهد الى سوقتيه ده واقعى جدا.. وهقولك حاجه كل الى بينقل حاجه عشان يحطها عنده ده ليه معنى واحد انها عجبته فعلا وغيران انه مش عارف يعمل زيها فبينقلها حرفيا يا أما بيحاول يغير فيها بس كده او كده هو عارف انه حرامى...
ونصيحتى لك ان تحذرى منه قراء مدونتك وتفضحى سرقته كما سيحدث لكل لص يوم القيامه بأن يأتى بما سرق محمولا أما الأشهاد

ولك جزيل الإحترام

منى يقول...

السلام عليكم ازيك يا موناليزا
تعرفى حصل معايا حاجه زى دى فى المدرسه بس مش فى الرسم يعنى
متكلمتش ومشتكتيش لكن من 15 سنه لسه منستش وبسال ليييييييييه؟ رغم ان ربنا جابلى حقى لعندى

دلوقتى بعد ما كبرت بقول متسكتيش ،لو فى المدونه ..اكتبى عندك وعند اللى اخد حاجه مش بتاعته وانتى اكيد هتقدرى تفرقى بين توارد الخواطر وبين النقل المقصود
ربنا يهدينا جميعا ويرضى كل واحد بقسمته عشان ميبصش لحاجه غيره
كل الحب والتحيه

طوبه فضه وطوبه دهب يقول...

aked el modo3 da bydaya awy khsosan lma ykon mn bnat afkark wt3bana awy feh sa3tha bt7sy f3ln ank atsraty wlzy dol lazm ykon fe kanon yrd3hm wyoafhm 3nd 7dohm

لو عرفوه هيحبوه يقول...

السلام عليكم ورحمه الله وبركاته

موضوع هام جزاك الله خيرا

ندعوكم للمشاركه معنا فى حمله لو عرفوه هيحبوه لنصره النبى صلى الله عليه وسلم

تعرفوا معنا على مولد وطفوله النبى صلى الله عليه وسلم وما بها من معجزات

ومازلتُ أتعلم يقول...

طيب ايه رايك بقى ياموناليزا
فى واحدة زيىى خايبة بتقول للناس تعالوا اسرقونى
من وأنا صغيرة خايبة جداً وأعمل مجهود فى حاجة أو أبدع فيها
واللى جانبى ياخد الجايزة
والله بجد

مرة وأنا فى ابتدائى طلعت الاولى على المدرسة
فالمديرة جات بتوزع جوايز.... أنامسمعتهاش
فراحت بدالى التانية وقالتلها أنا الاولى وانا واقفة....عادى جداً!!!
المديرة قالتلى إنتى موافقة تديها جايزيتك
اتكسفت ومردتش
والله..أخدت الجايزة بدالى
اعاااااااااا

(اتكسفت) ديه لحد دلوقتى وأنا عندى 21 سنة
عملالى مشاكل كتير جداً فى حياتى
لحد دلوقتى....

وممكن أعمل اى حاجة واتعب فيها
واسمها مش بتعتى بسهولة

بس الحمد لله مش بطل اكمل اللى عايزة أعمله
بتعب فى الأول شويتين بس بفوق وبكمل تانى

رغيت ياموناليزا المرة ديه استحملينى:)
تحياتى ياحبيبتى

ريمان يقول...

انا والله نفسى الاقى حل


بس المشكله انهم بينكروا انهم بينقلوا مواضيع مش بتاعتهم او انهم بيسرقوا بالعكس دول بيلفوا ويدوروا ويحوروا فى الكلام ويتوهو اللى بيكلمهم وينصحهم


يا ريت بجد يبقى فى حل لان دى سرقه

ذكرى رحيل قلم يقول...

كل سنة وانت طيبة
يارب تعود علينا الايام بخير حضرتي زادك وفطارك وطيب ناوية علي برنامج معين عل العموم انا اخذت اجازة عشان احضر كل ده
كل عام وانت بخير
دمتي جميلة

الفراشة الصغيرة يقول...

صح الله يا موناليزا

عارفه فى بعض الاحيان

بعمل بحث على النت علشان اعرف فى حد اخد حاجة منى ولا لا

لانه بجد موضوع سخيف
انك تعمل حاجة وتنسب لغيرك

ومعاكى اكيد فى ان اللى ياخد حاجه من حته يكتب اسم المكان

علشان امنه النشر

موناليزا يقول...

بنجاواتى
ـــــــــــ
اهلا بيك يافندم
فعلا الموضوع صعب جدا فإذا غاب الضمير فمن نخاطب!
اشكرك جدا لمشاركتك



*********************************



هكذا علمنى سيدنا محمد صلى الله عليه وسلم
ــــــــــــــــــــــــــــ
اهلا بيك يافندم
اشكرك جدا ربنا يكرمك ويتقبل دعائك
انا الحمدلله بخير اشكرك جدا لسؤالك
ليتهم يدركون ذلك
اشكرك جدا لمشاركتك




**********************************



شباك موارب
ــــــــــــ
اختى الحبيبة:اهلا بيكِ فى زيارتك الاولى
انا معاكِ اننا مش لازم نبطل نكتب بس برضه لازم يعرفوا اننا مش هنسيب حقنا لا دنيا ولا آخرة
نورتى مدونتى واشكرك جدا لمشاركتك





***********************************




المعتصم
ـــــــــ
وعليكم السلام ورحمة الله وبركاته
اهلا بيك يافندم
فعلا محدش بيتعلم ببلاش
ملهاش علاقة بالموهبة على قد ما ليها علاقة بالملكية:)
اشكرك جدا لمشاركتك ويسعدنى مرورك دائماً




*********************************



ابو كريم
ـــــــــــ
اهلا بيك استاذ بهاء
:) دعاء جميل بجد ربنا يتقبل
انا واثقة انه لو كان على المدونات كان اتظبط:) بس حضرتك عارف مجال النت واسع جداً ومش مدونات وبس
ربنا يكرمك واشكرك جدا لرايك ولمشاركتك




*********************************




منى
ــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
انا الحمدلله بخير ماتحرمش من سؤالك ياحبيبتى

فيه حاجات مابتتنسيش والحمدلله ان ربنا رجعلك حقك عقبال كل مظلوم
توارد ايه بس تعرفى يامنى انى بشوف موضوعاتى منقولة مش بس بالنص لأ ده بالصور اللى انا وضعاه كمان:)
عايزة أسألهم بجد بيعملوها ازاى:)
نورتينى منمن الجميلة واسعدتينى بتواجدك




**********************************



طوبة ذهب وطوبة فضة
ـــــــــــــــــــــــ
اختى الحبيبة:اهلا اهلا بالقمر
وياسلام كمان لو كان موضوع خاص جداً مش بس من بنات افكارك:)
وانا معكِ اناشد بوضع قانون رادع لحماية الملكية
نورتينى حبيبتى وسعيدة بتواجدك




**********************************



لوعرفوه هيحبوه
ـــــــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك واشكرك جدا لرايك
دعوة مقبولة وبالتوفيق ان شاء الله




**********************************



ومازلت اتعلم
ــــــــــــــ
اختى الحبيبة:اهلا اهلا بالقمر
تصدقى اتضايقت بجد من المديرة لانى لما كنت مُدرسة مكنتش بسمح لاى حد ياخد حاجة مش بتاعته ولو كنت مكان المديرة دى ماكنتش اتصرفت زيها ابداً
رغيتى ايه يا بنتى ده انتِ عايزالك قاعدة:)
ازاى تسمحى اصلاً لحد يتعامل معاكِ كده وياخد مجهودك على الجاهز
ماشوفتيش "زمردة" هتموت نفسها من العياط ازاى لما بس عرفت اللى حصل:)
بجد ماتتهاونيش فى حقوقك ابداً وابذلى قصارى جهدك لان ربنا هيسألك على ده
ويارب ماتتسرقى تانى:)
نورتينى ياجميلة وسعيدة بتواجدك




**********************************




ريمان
ــــــــ
اختى الحبيبة:اهلا اهلا بالقمر
سبحان الله بجد السارق دلؤتى بقت عينيه قوية كده ليه
ربنا عل كل ظالم
نورتينى ريمو الجميلة وسعيدة بتواجدك




*********************************




ذكرى رحيل قلم
ـــــــــــــــ
أختى الحبيبة:وانتى بصحة وخير وسعادة
هتوحشيينى جدا وجايالك حالاً:)
نورتينى ياجميلة وهفتقدك جدا




***********************************



الفراشة الصغيرة
ـــــــــــــــــ
اختى الحبيبة:اهلا اهلا بالقمر
حتى البحث برضه اوقات مش بيبين
ماعدتش فيه حاجة مضمونة
وليتهم يعرفون حاجة اسمها أمانة من اصله
نورنينى ياجميلة وسعيدة بتواجدك

Unknown يقول...

سلامو عليكم
طيب ايه رايك لما موقعك يكون من صفحة واحدة
و موقعك يتسرق بنفس العنوان

و كتر خير اللي سرق تعب نفسه اوي و غير ايميل المراسلة لأيميل تاني !؟


بصراحة انا جالي احباط و حالة قرف لأن اللي سرق سرق كل حاجة حتي لو مكنتش اخدت فيها وقت بس ده شغلي انا

ميتهياليش اللص ممكن كلمة ترجعه !

yoyo يقول...

احساس صعب جدا جدا
لما تلاقى مجهودك و تعبك اتنسب لانسان اخر لا يستحق وانت اصبحتى مجرد متفرج لا حول له ولا قوة
عارفة وقتها الانسان بيحس بالانكسار اوى لانه مش عارف ولا قادر ياخد حقه
بس مش معنى كدا انه خلاص يستسلم لا بس اديه اتعلم من الخطا و يقدر يصلحه
لكن يقتل موهبة جواه صعب

مش عارفة ازاى ممكن نحمى املاكنا فى وقت بقت السرقة و انعدام الضمير وباء منتتشر
ربنا يستر علينا و يهدى الجميع يارب
تسلمى اختى على الموضوع الجميل
تحياتى
يويو

دعاء يقول...

اخبارك ايه يا موناليزا
شوفي يا ستي الناس في الزمن ده بيقولوا اللي يلاقي فرصة يستغل أو يسرق أو يضحك على حد وما يستغلهاش يبقى غبي.
لأن لا فيه رقابه على حاجة ولا على حد.هتقولي طيب و الضمير والخوف من ربنا.محدش هيسمع لك.

ربنا يهدي الجميع بس دايما توقعي ان في ناس وحشين كتير.

سلام

د/عرفه يقول...

سلام عليكم

عن نفسى اى حديكتب بنفس اسلوبى او ياخد موضوع مطروح عندى ده دليل تميزوطالما انا مش راغب فى الكسب المادى فالموضوع مدعاه للفخر مش للحزن
وده دليل ان الشىء المكتوب ده ذو قيمة


رغم ان الاحساس بالسرقة برضه مش حلو

فرفشة الوان يقول...

طبعاهغضب وهعمل حاجة ولو مانفعش

هقول حسب الله وعمه الوكيل

بس بجد الموضوع جميل

أختكم فى الله يقول...

سبحان الله فى الوقت اللى بقرا فيه موضوعك ده كنت لسة بقرا موضوع فى مدونة تانية عن سرقة الافكار والمواضيع ونشرها فى جرايد ومجلات بدون اذن

واضح انها بقت ظاهرة

وحلها ان الناس تراعى ربنا

موناليزا يقول...

المعلم محمد صاحب المطعم
ـــــــــــــــــــــ
وعليكم السلام ورحمة الله وبركاته
اهلا بيك استاذ محمد
رأيى قلته فى الموضوع فالشعور بحق لا يوصف
حسبى الله ونعم الوكيل
اشكرك جدا لمشاركتك


***********************************



يويو
ـــــ
اختى الحبيبة:اهلا بيكِ بعد طول غياب
وعشان كده مش لازم نسكت
نورتينى يويو الجميلة وسعيدة بتواجدك




**********************************



دعاء
ــــــــ
أختى الحبيبة:اهلا اهلا بالقمر
انا الحمدلله بخير ازيك انتِ ياجميلة
أصبحنا نعيش فى غابة وليس فى دنيا طبيعية
نورتينى حبيبتى وسعيدة بتواجدك




*********************************



د/عرفة
ـــــــــ
وعليكم السلام ورحمة الله وبركاته
اهلا بيك يادكتور
انا أحترم وجهة نظرك رغم اعتراضى عليها
اشكرك جدا لمشاركتك




**********************************




فرفشة الوان
ـــــــــــــ
اختى الحبيبة:اهلا اهلا بالقمر
اشكرك جدا لرايك
نورتينى حبيبتى وسعيدة بتواجدك



*********************************




أختكم فى الله
ـــــــــــــــ
أختى الحبيبة:اهلا بيكِ بعد طول غياب
ولذلك الموضوع اكبر من اننا نسكت عليه
نورتينى حبيبتى وسعيدة بتواجدك

وردة يقول...

الموضوع مش بس مؤلم
لا بجد حاجة فظيعة اوووي ومحستش به غير لما جربته
انا اتسرق مني قبل كده مدونه ومن ناس كتير اعرفهم
والحاجات اتكتبت بأسم حد تاني وساعتها اتجنيت
وبصراحة لولا ان المدونين وقفو جنبي مكنتش عرفت اعمل ايه
بجد والله ناس محترمة بجد ربنا يكرمهم وعلشان كده عملنا مونة آفشنا حرامي
وديه اتعملت علشان اي حد اتسرق منه حاجة نقدر كلنا نساعده
اشكرك علي طرحك الموضوع
واتمني يارب محدش يتعرض له
سلام

سندس وأمل يقول...

معرفش الناس ازاى اصلا تقدر تنسب

حاجه مش ليها...

عجيبه يادنيا والناس الى فيكى..!!

وطبعا الحمد لله لسه مش حصل لى كده

امل

كلمات من نور يقول...

فيالحياة يا أمة الله الكثير الكثير من هذا المثال بءا برسومات طفلة صغيرة ولا نهاية لهذا إلا بالضمير والعودة للمعاملة الإسلامية

ربي يهدينا جميعا ويبعدنا عن هذه الأمور ويبعد عنا سارقي الأفكار والكلمات

تعرفي من فترة لقيت مقال مكتوب عن العراق بإسمي وحاطين الإيميل بتاعي في منتدى عراقي

قعدت اقولهم يا عالم يا ناس انا مش بتاعة السياسة أو بالمعنى \الأصح بطلت سياسة من ساعة ما قفلولي مجموعتين عالياهوو وعاقبوني بإنهم مسحوا إيميلاتي عالياهوو وكمان عالهوتميل

وبما إني أم عيال قررت عدم الخوض في السياسه أصل ازاي يعني يودولي عيش وحلاوة في جوانتنامووو؟؟؟

حاجه تحزن بجد بس الواحد بيفوض أمره لله تعالى وبيحاول ما بوسعه لأخذ حقه حتى لا يكون شيطان أخرس

ربي يبارك فيكي و يزيدك علما وحبا في دينك

م م يقول...

السلام عليكم
جوجو وزمردة واخيراً فوفو
اسماء جميلة
الكلام عن الملكية الفكرية واحترامها
في عالمنا العربي ضربٌ من خيال
مستحيل طبعاً بل من رابع المستحيلات ان تنتهي ظاهرة الاعتداء على الحقوق
خصوصاًعلى الانترنت
فتلك ثقافتنا الانترنتية و" كله بيسرق من كله "
وعن اسئلتك
ان اكتشف سرقة اشيائي ليس بيدي ما افعله
وفي رأيي الحل الوحيد لعدم سرقة افكارك هو ان تكتب بالهيروغريفي

تحياتي لك

Hossam يقول...

صديقتى العزيزة
دائما تطرحى مشكلة عن طريق قصة قصيرة وممتعة
احييك على اسلوبك الجميل
بالنسبة للمناقشة
انا اكرة هذا النوع من الشخصيات
والحل مع هؤلاء هو التصادم معهم عن طريق المواجهة
انا اخاف من هذا النوع لذا ساحاول عمل privacy للمدونة
بجد تحياتى للموضوع الجميل
تحياتى

موناليزا يقول...

وردة
ـــــــ
اختى الحبيبة:اهلا اهلا بالقمر
انا اللى بشكرك على تعليقك الجميل
نورتينى وردتى الجميلة وسعيدة بتواجدك



*********************************



سندس وامل
ــــــــــــ
اختى الحبيبة:اهلا اهلا بالقمر
المصيبة ان ده بقى العادى!
يارب مايحصلكيش كده ابدا
نورتينى امل الجميلة وسعيدة بتواجدك




***********************************



كلمات من نور
ـــــــــــــــــ
اختى الحبيبة:اهلا اهلا بالقمر
هو فين الضمير ده متهيألى انه واخد اجازة مفتوحة عند معظم الناس:)

ياخبر .. كل ده عقاب!!
:) لا ياحبيبتى بعيد الشر عنك ولادك يزوروكى كده وانتِ فى الروضة الشريفة ويجيبولك ميه ساقعة كمان

ربنا يكرمك يارب ويتقبل دعائك
نورتينى غاليتى وسعيدة جدا بتواجدك




********************************



مسرور
ـــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك فى اختيارى للاسماء
ودى الكارثة فعلا اننا بنتعامل مع الضمائر النائمة
اللى عايز يسرق هيسرق حتى لو كتبت بالصينى هو كل اللى هيعمله انه هينقل وبس ومش مهم حتى هو ناقل ايه:)
اشكرك جدا لمشاركتك




*********************************



حسام
ـــــــ
اهلا بيك استاذ حسام
رجاء خاص لا تضع اى القاب قبل اسمى "موناليزا" وحدها تكفى

ربنا يكرمك يافندم اشكرك جدا لرايك فماتوفيقى الا بالله
المواجهة دى كانت زمان يا استاذ حسام لما كان لسه فيه حاجة اسمها عيب ومايصحش دلؤتى بقى عادى تماما وممكن يطلعوك انت كمان الغلطان!
للاسف مش نافع معاهم اى حاجة:(
اشكرك جدا لمشاركتك
وتمنياتى بالتوفيق الدائم

عين فى الجنة يقول...

لو اشار المقتبس الى مصادر اقتباسة لاحترمه الناس

آه وكفى يقول...

ملهاش حل يا موناليزا لأن كل واحد رقيبه ضميرو وان لم تستح فاصنع ماشئت هنعمل ايه وعلى فكرة انا كل صور المدونة عندي اللي معمولة جرافيك مسروقة
D:
لكن اللي بالرصاص بتاعتي والله
بس فعلا بجد مش ليها حل لكن هقولك يعني ممكن انتي تفهمي المسروق من الموش مسروق مثلا في مدونة شعر وليكن عن طريق تتابع الاحداث واسلوب الكتابة نفسو لأن مستحيل الروح او الطريقة هتختلف وكمان المواقف ممكن تلائي بوست مكمل لواحد قبلو فهماني

تحياتي

طهر فؤادك يقول...

السلام عليكم ورحمة الله وبركاتة
جزلكى الله خيراا على الموضوع الجميل دة وجعلة فى ميزان حسناتك ان شاء الله والمسلمين .... علشان فعلا الموضوع دة مهم جدا وكمان كما علمنا رسولنا الكريم العظيم ومعلم البشرية سيدنا محمد صلى الله علية وسلم :- من غشنا فليس منا .... ونقول صدقت يارسول الله فيما قلت لان التدليس ونسب مايعملة الغير لأنفسنا فهو غش وتدليس ..
وجزاكى الله خيرا على الموضوع مرة ثانية وادعوكى وكل من يتابعونك الى مدونتى وهى (رسول الله 1) واريد ان اعرف رأيكم الغالى فيها واليكم اللينك :-
http://rasoulallah1.blogspot.com/

Dr. Ibrahim يقول...

قصة جميلة

توضح أهمية حقوق الملكية الفكرية


تحياتى

موناليزا يقول...

راجى
ــــــــ
اهلا بيك استاذ راجى
ده حقيقى
اشكرك جدا لمشاركتك



********************************



اه وكفى
ــــــــ
اختى الحبيبة:اهلا بيكِ
هما غالبيتهم بالرصاص أصلاً:)فهماكِ بس القارئ مالوش دعوة بالحوارات دى خالص:)
نورتينى حبيبتى وسعيدة بتواجدك





**********************************




طهر فؤادك
ـــــــــــــــ
وعليكم السلام ورحمة الله وبركاته
اهلا بيك يافندم فى زيارتك الاولى
ربنا يكرمك اشكرك جدا لرايك
ليتنا نطبق تعاليم الاسلام
دعوة مقبولة واشكرك جدا عليها
نورت مدونتى



**********************************




د/ابراهيم
ـــــــــ
اهلا يبك يادكتور
اشكرك جدا لرايك ولتواجدك
دمت طيبا ولمدونتى زائرا

شمس النهار يقول...

ازيك عامله ايه
بجد بوست جامد
ودي بقت موضه
واللي بيعمل كده والا هو هنا
حتي اسلوب الاخراج للموضوع
يعني ممكن فكره تعجبك تكتبيها من وجهة نظر تانيه بس تقولي علي اللي ابتدا
لا دلوقتي عيني عينك
من الالف للياء بيتاخد
انا اتعمل فيا كده بس دخلت وقلت جميل اننا نتبادل الافكار والتعليقات هنا مفيده جدا:)

وحشتيني:)

موناليزا يقول...

شمس النهار
ــــــــــــ
اختى الحبيبة:اهلا اهلا بالقمر
انا اسفة جدا لتاخيرى فى الرد عليكِ

ربنا يكرمك ياحبيبتى واشكرك جدا لرايك وفعلا من اسوا الاشياء ان يأخذ مجهودك غيرك وينسبه لنفسك
وانتِ كمان ياقمر وحشتيييييييينى جدا ويارب دايما تكونى بخير
نورتينى حبيبتى واسعدتينى بتواجدك