الأربعاء، 5 أغسطس، 2009

عايز تتجوز ليه

تنقسم آراء الناس فى موضوع الزواج إلى عِدة آراء منها:-
الرأى لأول: يندم على اليوم اللى اتجوز فيه.
الرأى التانى: عايز يتجوز وخلاص لأنه شايف الناس كلها بتتجوز فاشمعنى هو يعنى.
الرأى الثالث: -ودول أقلية- مُضربين عن الزواج سواء بمزاجهم أو غصب عنهم.
الرأى الرابع: - ودول أقلية برضه- عرفوا يستمتعوا بحياتهم الزوجية. ويتغلبوا على أى شئ فيها.
ولذلك أردت أن أعرض فضل الزواج وثوابه العظيم حيث أن الزواج عبادة نتقرب بها إلى الله.
قال رسول الله (صلى الله عليه وسلم) : من تزوج فقد أعطي نصف العبادة . روضة الواعظين 2/375
-قال صلى الله عليه وسلم:"من رزقه الله امرأة صالحة فقد أعانه على شطر دينه فليتق الله في الشطر الباقي" رواه الطبراني والحاكم
-وروى ابن ماجة أنه قال صلى الله عليه وسلم: " من كان موسراً لأن ينكح ثم لم ينكح فليس منيّ ".
وقال صلى الله عليه وسلم: "إن كنتم من رهبان النصارى فالحقوا بهم إني أصوم وأفطر، وأقوم وأرقد وأنكح النساء، وهذه سنتي فمن رغب عن سنتي فليس منيّ".
وهذا عن فضل الزواج تعالوا إلى المعاملات بين الزوجين لتروا عظيم الثواب المنتظر لهما.
قال صلى الله عليه وسلم" دينار أنفقته في سبيل الله ، ودينار أنفقته في رقبة ، ودينار تصدقت به على مسكين ، ودينار أنفقته على أهلك ، أعظمهم أجر الذي أنفقته على أهلك " رواه مسلم .
قال الرسول " صلى الله عليه وسلم: " إذا مات الإنسان انقطع عمله إلا من ثلاثة ومنها ولد صالح يدعو له " رواه مسلم.
- قد روى مسلم والنسائي أن رجلاً سمع رسول الله صلى الله عليه وسلم يقول: " وفي بضع أحدكم صدقة فقال: يا رسـول الله أيأتي أحدنا شهوته ثم تكون له صدقة؟ فقال الرسول الكريم صلى الله عليه وسلم: أرأيتم لو وضعها في حرام أكان عليه وزر، فكذلك إذا وضعها في الحلال كان له أجر".
ويكفى أن وضع اللقمة فى فم الزوجة يعتبر صدقة. والابتسامة فى وجهها صدقة والكلمة الطيبة صدقة وإذا مسكت يدها تساقطت ذنوبكما... وغيرها من المعاملات البسيطة فى الفعل العظيمة فى الأجر
=======
من المؤسف أن يكون تفكير البنات ورغبتهم فى الزواج كمثل هؤلاء الفتيات الموجودين بالصورة
(إضغط على الصورة للتكبير)
ولذلك أوجه كلامى لهن : إيه رأيك لو غيرتى مفاهيمك البالية واستبدلتيها بمفاهيم باقية على مدى حياتك.
فأسبابك هذه سريعاً ما تنقضى وتزول لكن الأسباب الدينية لن تنتهى. وستعيشين فى سعادة زوجية حتى لو كنتِ مابتحبيش زوجك لأنك هتعتبريه هو الجسر الذى ستصلين من خلاله إلى الجنة.
أقرأى هذه الحديث الشريف الموجود فى الصورة التالية. وأنتِ بنفسك ستختارين.

أما أنت أيها الشاب: فالزواج مسئولية كبيرة عليك أن تكون قدها لأنك ستكون رب الأسرة والقوامة وحدها ليك.
ولذلك عليك أن تختارها لدينها أولاً حتى تحافظ على مالك وبيتك وعرضك وعيالك. وعليك أيضاً أن تتقى الله فيها فهى ليست مجرد خادمة أو مُربية أو واجهة إجتماعية ولكنها شريكة حياتك . حتى لو ماكنتش بتحبها طالما كتبت اسمها بجوار اسمك فى عقد الزواج أصبحت مسئول عنها وأصبحت هى شريكة لحياتك بكل ما فيها شئت أم أبيت.
ولا يجوز لك فى أى حال من الأحوال أن تظلمها أو تهينها. أو تعاملها كأنها أقل منك.أو تضع فى مخيلتك فكرة لو ماعجبتنيش هطلقها. لأن الطلاق مش بالساهل وبنات الناس مش لعبة.
عاملها زى ما تحب زوج ابنتك فى المستقبل يعامل بنتك. أو كما تحب أن يتعامل زوج أختك معها. وهكذا
ضع نفسك مكانها فى أى تصرف محرج أو طلب صعب تطلبه منها وشوف هتقبل ده على بنتك ولا لأ.
فالزواج له ثواب عظيم ويكفى أن خيرمتاع الدنيا المرأة الصالحة كما أخبرنا النبى عليه الصلاة والسلام.
يعنى باختصار الزواج مش مجرد لعبة او تسلية لأ ده مسئولية كبيرة ماتقدمش عليها إلا إذا كنت فعلاً رجل تتحمل المسئولية.



زواجك حماية ليك من الفتن المحيطة بك. فتعجل به إذا ما كنت مقتدر.- مادياً ومعنوياً ودينياً-.



سؤال جانبى:
- ما هدفك من الزواج؟ (لغير المتزوجين). وما رأيك الشخصى في الزواج؟.
- هل حققت هدفك من الزواج؟(للمتزوجين). وما رأيك الشخصى -بعد خوض التجربة-في الزواج؟.





هناك 61 تعليقًا:

ماما أمولة يقول...

ازيك يا حبيبتي

كيف حالك ؟ ان شاء الله بخير

ماشاء الله موضوع في منتهى الأهمية مكتمل من جميع الجوانب

جزاك الله كل الخير يارب

أما عن السؤال

هل حققت هدفك من الزواج؟

نعم الحمد لله فهو نعمة من الله يجب الحفاظ عليها

تقديري لك حبيبتي

وكل عام وانت بكل خير يارب

موناليزا يقول...

ماما أمولة
ــــــــــ
اختى الحبيبة:اهلا اهلا بالغالية
انا الحمدلله بخير ماتحرمش من سؤالك ياحبيبتى
ربنا يكرمك واشكرك جدا لرايك
ربنا يتم عليكِ نعمه ويحفظهالك
وكل عام وانتِ وكل احبابك بالف خير نورتينى غاليتى وسعيدة بتواجدك

بنجاواتى يقول...

السلام عليكم

انا مش من المتزوجين لكنى قرأت فى كتاب الشيخ محمود المصرى "الزواج الاسلامى السعيد" ما قمتى حضرتك بسرده فى البوست
وقد عزمت ان تكون هذه كلها نوايا لى عند الزواج

واسال الله ان يبلغنى الاخلاص ويريح صدرى ويعفنى بالزوجة الصالحة

تحياتى

عاشقة الأحزان يقول...

السلام عليكم

حبيبتى الغاليه موضوع اكثر من رائع تسلم ايديكى بجد
وكل سنه وانتى طيبه

اما بالنسبه هدفنا من الزواج

الهدف هوا بناء الأسرة التي تكمل الحياة في هذا الكون

والله سبحانه وتعالة شرع الزواج لغرض بقاء الحياة وتناسل الجنسين
تحياتى

ومازلتُ أتعلم يقول...

حبيبتى موناليزا ربنا يكرمك
انا حاسة إن التوبيك ده رد على اخر بوست كتبته وشوفت رايك فيه
ربنا يكرمك عليه

موضوع مهم اوووى
بجد ربنا يكرمك كمان مرة

موناليزا يقول...

بنجاواتى
ـــــــــــ
وعليكم السلام ورحمة الله وبركاته
اهلا بيك يافندم
ربنا يهيئلك كل خير ويرزقك بالزوجة الصالحة
اشكرك جدا لرأيك ولمشاركتك




********************************




عاشقة الاحزان
ـــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
ربنا يكرمك ياحبيبتى اشكرك جدا لرايك
وكل سنة وانتِ بالف خير وصحة يارب
ربنا يرزقك بالزوج الصالح ويهئ لكل كل خير
نورتينى انوسة الجميلة وسعيدة بتواجدك





***********************************




ومازلت أتعلم
ـــــــــــــــــ
اختى الحبيبة:اهلا اهلا بالقمر
مبسوطة جداً بتعليقك والحمدلله الذى هدانى الى هذا
ربنا يسعدك يا حبيبتى ويهيئلك كل خير
نورتينى ياقمر وسعيدة بتواجدك

حاسوباتيه يقول...

بيعجبني جدا كل كلامك بالزات الي عن الجواز بجد انتي رائعه في تجميع المعرومات والاحاديث جزاك الله خير

انتي فعلا جبنتي كل الكلام الصح والمفيد

وهجاوب على اسالتك
ما هدفك من الزواج؟ (لغير المتزوجين). وما رأيك الشخصى في الزواج؟.

هدفي اكيد اني اعمل بيت وعيله واجيب ولاد يارب واربيهم صح لان انا بحب جدا جو العيله والبيت وان شاء الله اربيهم على طاعه ربنا يارب واحاول ولو بقدر صغير اني اشارك في عمل جيل صح


رايي في الجواز؟
هو شر لابد منه ههههههههههه

بهزر اكيد انا بصراحه خايفه جدا من الجواز على قد حبي لتكوين عيله وبيت فانا بجد خايفه برضو مسؤوليه كبيره حياه جديده مع شخص جديد اكيد في بينا هيكون خلافات هنتفق على حاجات ونختلف على حاجات بس بدعي من ربنا انها تكون حياه مستقره يارب بس ويكون هو بيراعي ربنا فيا وانا اراعي ربنا فيه بس بيني وبينك برضو مرعوبه

يلا عقبال كل البنات والرجاله لما يجوزا ويعيشوا مبسوطين

masrur يقول...

السلام عليكم

غالبا ما يكون الزواج في حد ذاته هو الهدف وما بعده لا نحسب حسابه
بمعنى ان تفكير الشاب في الزواج وحساباته وتخطيطه كل ذلك ينتهي عند ليلة الزفاف ولا يتخطاها
اضيفي الى ذلك سوء الاختيار من الطرفين
تكون النتيجة 90 الف حالة طلاق سنويا اغلبهم طلاق في السنة الاولى
_____--
موضوعك في نظري هو اهم المواضيع واخطرها على الاطلاق
والزواج في نظري لا نقدره حق قدره

تحياتي لك
احييك على طرحه

فرفشة الوان يقول...

جميل الموضوع اوي بس انا مش عرفة كلمة

(ينكح)انا عن نفسي الراي الرابع حلو

جميل لرجل والمراة ان يعشوا في سلام

هكذا علمنى سيدنا محمد( صلى الله عليه وسلم) يقول...

السلام عليكم ورحمة الله وبركاته

حياكم الله وبياكم اخوانى وأخواتى وسدد على طريق الحق خطاى وخطاكم وطبتم وطاب سعيكم وممشاكم وتبوأتم جميعا من الجنة منزلا .

اختى الكريمة :
وفقكى الله لما يحب ويرضى وفيه النفع للأمة كلها ، قرأت موضوعك ومن وجهة نظرى الشخصية لله الحمد تم تغطيته من جميع الجوانب عشان كدة الواحد مش لاقى حاجة تتقال أكتر من كدة ، مرة تانية وفقكى الله وزادك من عمله وكرمه .

بعتقد إن لو الواحد وفقه الله إن كان هقبل على الزواج إنه ينوى بزواجه دا إنه يأسس بيت مسلم يتردد بين أركانه لا إله إلا الله محمد رسول الله صلى الله عليه وسلم ويصون نفسه وزوجته كما ذكرتى وإتبع تعاليم المصطفى صلى الله عليه وسلم فى معاملة زوجته وأهل بيته فبكدة بيحصل على حسنات فى يومه وليله لا يحصاها إلا الله عز وجل ، دا كله بس بمجرد انه يجعل النية خالصة لوجه الله تعالى .
- والحمدلله رب العالمين ذو المن والنعمة تحقق الهدف لى من الزواج بفضل الله وكرمه.
ربنا يوفق شباب وبنات المسلمين لما يحب ويرضى ويردنا الى دينه ردا جميلا ويشف صدور قوم مؤمنين .
نفعنى الله وإياكم بالقرآن الكريم وما فيه من الآيات والذكر الحكيم
السلام عليكم ورحمة الله وبركاته

akeed يقول...

بارك الله فيكى اختى الكريمة قد اعجبنى جداً التعليق تحت الصور انه لما يقولونه هؤلاء الاناس لم يولد صلاح الدين فعلاً لان الهدف من الزواج له مقاييس مختلفه عن هذه الآراء كلها اراء تؤدى ال المعاصى و عدم النزر الى الآخره ولاكن اذا تزوج المرء ليحفظ نفسة وزوجته و يدخلا الجنة معاً و ينجبا ذرية صالحه يكون سببا لهما فى دخولهم الجنه لكانت فترة الزواج بأكملها حسنات مثل الجبال .


دمتى بكل خير و جزاكِ الله خيراً على هذا الموضوع الرائع

fL0weR-giRL يقول...

السلام عليكم
*************
بجد والله بارك الله فيكي
والصور جميله جدا

وانتي كل كلمه قلتيها لو حد مشي عليها مكنش دا حلنا
وطبعا لو الواحده اتجوزت الراجل عشان دينه مش عشان عربيته ولا عشان لقطه ولا عشان اهو واحد والسلام كان كل زوجين في الدنيا دي في غايه السعاده
وبرده الراجل لو اخد المرأه العرفه دينا كويس وبتتقي ربنا بردوا ماكنش دا حلنا (فاظفر بذات الدين تربت يداك) مش دا كلام الرسول الكريم
بس والله مين بيتقي ربنا في الدنيا دي في الزمن داه

** تقبلي مروري ** وبارك الله فيكي

مصعب صلاح يقول...

السلام عليكم
الزواج طبعا نص الدين بس الخوف من الزوجة يعني لا زوجة صالحة يا بلاش
---
- ما هدفك من الزواج؟ (لغير المتزوجين). وما رأيك الشخصى في الزواج؟.
أنا شخصيا لو هاتزوج يبقى تكون واحدة تعيني على عبادة ربنا - دا بعد عمر طوييييييييييييييييييييييييييييييييل-

ايوية يقول...

تحياتى لموضوعك الجميل
اما عن السؤال فهو هدفى من الزواج ان اشعر انى مسئولة عن احد ومهتمة بة تحياتى

أم مالك يقول...

الحبيبة موناليزا
كعادتك دائما مناقشة المواضيع
الهادفة والمميزةوالمهمة
الزواج يخلف دائما وراءه الاستقرار
والهدوء اذا اقيم على الضوابط الاسلامية
حتى واذا حدثت فيه مشاكل
فاتباع الحلول التى اقرها الدين
فى هذه الحالة تجعلها لاتدوم
وبالنسبة لتحقيق الهدف من الزواج
فالحمد لله قدتحقق فالهدف كان نشأة اسرة
هادفة وذرية صالحة وقد كان ولنا الان
مايقارب عن الثلاثين سنة زواج وربنا يبارك وتحياتى

MOHAMMED ELBANNA يقول...

موناليزا
كعادتك مواضيعك متميزة .
عَنِ أَبي هُريرة رضيَ اللَّهُ تَعَالَى عَنْهُ عَنِ النبيِّ صَلّى الله عَلَيْهِ وَسَلّم قال: " تُنْكحُ الْمَرْأَةُ لأرْبَعٍ: لمالها ولِحَسَبها ولِجَمَالها وَلدينها: فَاظْفَرْ بذاتِ الدِّينِ تَربَتْ يَدَاكَ " مُتّفَقٌ عَلَيْهِ
................
ما اجمل انت يكون للأنسان شريكة لحياته تشاركة نجاحاتة وافراحة وتخفف علية وطئة الحياة ويشعر معها بالحب والاستقرار ويبادلها نفس الشعور ويدخلون معاً الجنة .
تقبلي تحياتي
محمد البنا
طريق النجاح

قيس بن الملووووح يقول...

المشكله اننا بتكلم عن فضل الزواج واهميته وده امر طبيعي ومفروغ منه لكن هل بعد الزواج الزوج والزوجه بيتقوا الله في بعض ما اظنش اللا من رحم ربي
تحياتي.

شوكولاتة يقول...

البوست جميل قوي ياموناليزا لأنه بيمس الناس كلها والمشكلة إن ناس كتير بتتجوز علشان الأسباب اللي في الكاريكاتير دي بس وده السبب في ارتفاع حالات الطلاق بالشكل الجنوني ده
أما بالنسبة لسؤالك انا نفسي اتجوز علشان يبقى ليا واحد أقدر ألجأ له في أي وقت وتاني حاجة اني أخلف ولاد يرفعوا وطنهم ودينهم وأدخل بيهم الجنة
تحياتي

الفراغ يقول...

حبيبتى موناليزا
كل سنه وانتى طيبه
انا من المتزوجات والحمد لله
ولكنى افتقد زوجى كثيرا كثيرا
ورايى ان الزواج دا نعمه من ربنا لازم نحافظ عليها
لان ثمرته ارضاء الله والرسول
وكمان زريه اتنى من الله ان يرضا عنها وعنا
واحمد الله ان اعطانى ثمرتين يوحدوا الله اللهم لك الحمد والشكر

العصفورة يقول...

السلام عليكم
تدوينة موفقة
خالص تقديرى

TIMMY !! يقول...

السلام عليكم ,

للأسف أنا عندي فكرة سوداوية عن الجواز إنه علاقة معقدة جدا ,
الطبيعي فيها الفشل و الخناقات , و الاحترام و العيش بسلاسة بتبقى حاجة شاذة :( :( :(

د. ياسر عمر عبد الفتاح يقول...

مش هجاوب علي الأسئلة علي الملأ
موضوع قيم جداً
وطراح رائع كالعادة

ربنا يعف شباب وبنات المسلمين ويقهم الذرية الصالحة

أختكم فى الله يقول...

ايه الجمال ده

موضوع رائع ونوقش بشكل اكتر من رائع

ربنا يجعله يا رب فى ميزان حسناتك

sabba7 يقول...

الزواج هو نعمة من أهم وأجمل نعم الله عز وجل علينا فقط أذا جعلنا شرع الله عز وجل هو ركائز واعمدة هذا الزواج فقط أذا تم الأختيار كما علمنا نبينا (فأظفر بذات الدين تربت يداك)(أذا أتاكم من ترضون دينه فروجوه)

وعموما أنا الحمد لله فى قمة سعادتى بعد مرور عام على زواجى والحمد لله

طوبة ذهب وطوبة فضة يقول...

elzwag hwa agmal n3ma khlkaha allah lyg3l ben trfen modah wr7ma wrbat ghlez ela yom el din ykfy an tkon el nya khalsa llah bansha bet sal7 wangab zorya sal7a

همس الاحباب يقول...

بسم الله ما شاء
كعادتك دائما متميزة فى موضوعاتك
الموضوع رائع جدا وهام
وحضرتك ذكرتى كل جوانبه السلبية والايجابية
جزاكى الله خيرا
والحمد لله قد تحقق الهدف من الزواج
اما راى الشخصى بعد خوض التجربة فده محتاج بوست مش تعليق
تحياتى لحضرتك

mohamed ghalia يقول...

فعلا قليلين الى بقى ينجحوا فى حياتهم
نفسى اتجوز
عفاف لنفسى
سنة الله فى الأرض
ذرية لإعمار الكون
اعمل حاجة لدينى

أحمـــــــــــــد أبو العلا يقول...

هدفي في الزواج اني احصل منه على عفة النفس وطمأنينة في الحياه

الأزواج سكن لبعضهم

فكرة الاضراب عن الزواج موضه خطيره وآفه ممكن تدمر حياتنا

ماء تشرين يقول...

انا عن نفسي هدفى طبعا طاعه الله وتكوين بيت مسلم وعفه نفسي وعفه زوجى واكيد ولاد اطلع منهم من ينفع الامه في اى شئ بس يمكن يعمل حاجه بس

راى في الزواج هو دلوقتى فقد حجات كتير فقد اهم اساس من اسسه وهو الموده والرحمه كلو بيدور على الحب ومش فاهمين انو الموده والرحمه اكبر واشمل من الحب الهو قمه الانانيه

بوست جميل جزاك الله كل خير

تقبلى مرورى

حلم بيعافر يقول...

انا مش متجوز

بس عايز اتجوووووووووووز

والله انا شايفها علاقة جميلة وحلوة واتنين بيطمنوا لبعض وبيعملوا بيت واسرة وبيعمروا فى الارض

جوزونى بقىىىىىىىىىىىىىى

Dr Ibrahim يقول...

جزاكم الله كل خير
ولعل الكل يعى ويتعظ...

ঔღঔ نـــوارة ঔღঔ يقول...

كيفك ياقلبي

يارب تكوني بالف خير

البوووست هايل جدا والله كلامك دائما اكثر من رااائع وفيه اهمية كبيرة

ربنا يباركلك ياحبيبتي ويعطيكي على اد نيتك

والله النماذج الي ذكرتيها مؤسفة جدا

انا رغم صغري بالسن الا اني كان غرضي من الزواج تكوين اسرة والاستقرار وانجاب الاطفال واني احب واتحب :) في الحلال طبعا

والحمد لله حققت نص هدفي اصله الحلو ميكملش :(

موضوع الخلفة مكعر جونا بس الحمد لله على كل حال واملنا في ربنا كبير :)

تستاهلي احلى بوسة عالبوست الرائع

امووووووواه

ربنا يخليكي ويوفقك يارب

Butterfly يقول...

بصراحه انا كنت اﻷول مش عاوزه أتجوز كرهاه
ويمكن مازلت كمان من كميه المشاكل اللى باشوفها وبسمعها.
بس مؤخرا فكرت انى مش زى حد وعارفه انى ان شاء الله اقدر اعمل حاجات غيرى مش يقدر يعملها واعيش فى جو هادى بعديا عن أى نكد :)

ghorBty يقول...

السلامـ عليكمـ

جزاك الله خيرا موناليزا ونفع الله بك

والله يصلح الاحوال

سامحني اشعر انني ليس لدي رغبه في الاجابه بس الموضوع عجبني قلت اقولك جزاك الله خيرا ..

دمت بخير ..

مهندسة لعزة الامه يقول...

بسم الله ماشاء الله ؛الموضوع رائع وكويس انه نتكلم فى الموضوع ده علشان مننساش اهدافه وميبقاش الموضوع كده وخلاص

انا لست متزوجة واجابتى على السؤال

انى احاول عمل واجباتى واحقق الهدف اللى ربنا خلقنا علشانه وهو اعمار الارض (بالذريه الصالحة )باذن الله

ويبقى عندنا رجال صالحين مثل سيدنا ابوبكر وعمر وعلى و....

ونساء صالحات مثل السيدة خديجة وعائشة وفاطمة واسماءو....

7annen يقول...

موضوع مهم جدا وكامل اوى ودمه خفيف تسلم ايدك

حنين

الفقيرة إلى الله أم البنات يقول...

جعله الله فى ميزان حسناتك يا حبيبتى وادام عليك نعمة الفهم على الله

بعد تجربة الزواج
الحقيقه انا مكنتش بتجوز لهدف..كان البنات بتتجوز وانا اتجوزت زيهم..بس لو رجعت الايام كنت أكيد هافكر بشكل آخر
بعد ما من الله على بالفهم عليه
بس الحمد لله على نعمة الفهم على الله
والآن رزقنى الله بوردتين وزوج احسبه على خير بشر مثل ما أنا بشر..ولكن انا وهو لنا أحد نخاف منه..فنتقى الله في بعضنا
نحن نخاف من الله..واسأل الله ان يهدى زوجى ويهدينى لما يحب ويجعل ذريتنا صالحه

كان نفسى هدفى من الزواج يكون كده
بس انا كنت من اللا هييين

بحبك فى الله

dr.lecter يقول...

لاسباب كثيره عفه النفس والاستقرار والسند العاطفي وبس

موناليزا يقول...

حاسوباتية
ــــــــــــــ
أختى الحبيبة:اهلا اهلا بالقمر
ربنا يكرمك يارب فماتوفيقى الا بالله
وسعيدة جدا برأيك
ربنا يحقق لك كل ماتتمنى ويرزقك بكل الخير
طالما هتراعى ربنا فيه فلا داعى للخوف:)
ربنا يسعدك ياحبيبتى ويرزق الجميع بالرفيق الصالح
نورتينى ياقمر واسعدتينى بتواجدك

**********************************

مسرور
ــــــــــ
وعليكم السلام ورحمة الله وبركاته
اهلا بيك استاذ مسرور
ده حقيقى وكما الافلام العربية ينتهى الفيلم بعد مشهد الزفاف مع ان المفروض ان الحياة بتبدأ بعدها
اشكرك جدا لرايك ولمشاركتك
دمت لمدونتى زائرا

**********************************
فرفشة الوان
ـــــــــــــ
اختى الحبيبة:اهلا اهلا بالقمر
(ينكح) بمعنى يتزوج
اشكرك جدا لرايك وربنا يسعدك ياحبيبتى
نورتينى ياجميلة واسعدتينى بتواجدك


*********************************
هكذا علمنى سيدنا محمد صلى الله عليه وسلم
ـــــــــــــــــــــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك ويتقبل دعائك اللهم امين
الحمدلله الذى هدانى الى هذا فماتوفيقى الا به
صح جدا المهم تظبيط النية لله
ربنا يباركلك فى حياتك ويتقبل دعائك اللهم امين
اشكرك جدا لريك ولمشاركتك
دمت لمدونتى زائرا
*********************************
اكيد
ــــــــ
اهلا بيك يافندم
وفعلا التعليق مقصود فلو كل شخص اختار شريك حياته على اساس دينى وسأل نفسه ياترى الشخص ده ينفع يكون اب او ام لاولادى لاختلفت الحياة تماما
ربنا يكرمك يارب واشكرك جدا لرايك
دمت لمدونتى زائرا

**********************************

فلور جيرل
ـــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
ربنا يكرمك ياحبيبتى فماتوفيقى الا بالله
للاسف كلامك حقيقى من يتقوا الله فى زمننا هذا اصبحوا قلة قليلة
نورتينى ياجميلة واسعدتينى بتواجدك

********************************

مصعب صلاح
ــــــــــ
وعليكم السلام ورحمة الله وبركاته
اهلا بيك استاذ مصعب
اشكرك جدا لرايك ولمشاركتك
وربنا يهيئلك كل الخير
دمت لمدونتى زائرا


***********************************
ايوية
ــــــــ
اختى الحبيبة:اهلا اهلا بالقمر
اشكرك جدا لرايك ولمشاركتك
وربنا يسعدك ويرزقك بالزوج الصالح
نورتينى ياجميلة واسعدتينى بتواجدك

********************************

أم مالك
ـــــــــ
اختى الحبيبة:اهلا اهلا بالغالية
ربنا يكرمك يارب فماتوفيقى الا بالله
اشكرك جدا لرايك ولمشاركتك
وربنا يباركلك فى حياتك اللهم امين
نورتينى حبيبتى واسعدتينى بتواجدك


*********************************

محمد البنا
ـــــــــــ
اهلا بيك استاذ محمد
الحمدلله يافندم فماتوفيقنا الا بالله اشكرك جدا لرايك ولمشاركتك
دمت لمدونتى زائرا


*********************************

قيس بن الملوح
ـــــــــــــــــ
اهلا بيك يافندم
وعشان كده بكلم الازواج اكتر لانهم لو طبقوا شرع الله لاصبحت حياتهم الزوجية جنة
تمنياتى بالسعادة القلبية للجميع
دمت لمدونتى زائرا

**********************************

شوكولاتة
ـــــــــ
اختى الحبيبة:اهلا اهلا بالقمر
ربنا يكرمك ياحبيبتى اشكرك جدا لرايك ولمشاركتك
وربنا يرزقك بالزوج الصالح والذرية الطيبة اللهم امين
نورتينى ياجميلة وفى انتظارك دائما

*********************************

الفراغ
ــــــــــ
اختى الحبيبة:اهلا اهلا بالغالية
وانتِ طيبة وبصحة وسعادة:)
ربنا يباركلك فى ذريتك ويرحم زوجك ويخليكِ لاولادك اللهم امين
نورتينى حبيبتى واسعدتينى لتواجدك

*********************************

العصفورة
ـــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
ربنا يكرمك واشكرك جدا لرايك
نورتينى ياجميلة واسعدتينى بتواجدك

*******************************

تيمى
ــــــــ
وعليكم السلام ورحمة الله وبركاته
اهلا بيك يافندم
اسمحلى اصح لك هذا المعتقد فالشواذ فقط هو مايوجد من خلافات وتعقيد لان الاصل فى الزواج المودة والرحمة وده الطبيعى وليس العكس
ربنا يرزقك بالزوجة الصالحة
اشكرك جدا لمشاركتك ودمت لمدونتى زائرا

********************************
د. ياسر عبدالفتاح
ــــــــــــــــــــ
اهلا بيك يادكتور
ربنا يكرمك واشكرك جدا لرايك وربنا يتقبل دعائك
على فكرة حضرتك ممكن تجاوب وانا مش هنشر التعليق:)
دمت لمدونتى زائرا

*******************************

اختكم فى الله
ـــــــــــــ
اختى الحبيبة: اهلا اهلا بالقمر
ربنا يكرمك يارب ويتقبل دعائك فماتوفيقى الا بالله
نورتينى حبيبتى واسعدتينى بتواجدك

*********************************

موناليزا يقول...

صباح
ـــــــ
اختى الحبيبة:اهلا بيكِ فى زيارتك الاولى
ربنا يسعدك ياحبيبتى ويباركلك فى حياتك
نورتى مدونتى وفى انتظارك دائما




***********************************



طوبة ذهب وطوبة فضة
ــــــــــــــــــــ
اختى الحبيبة:اهلا اهلا بالقمر
ربنا بسعدك ياحبيبتى ويزقك بالزوج الصالح
ملحوظة:هو جهازك مش بيكتب عربى ولا ايه؟
نورتينى حبيبتى واسعدتينى بتواجدك




********************************



همس الاحباب
ــــــــــــ
اهلا بيك استاذ خالد
ربنا يكرمك يارب فماتوفيقى الا بالله
ربنا يسعدك ويباركلك فى حياتك
وكده يبقى احنا منتظرين هذا البوست:)
اشكرك جدا لمشاركتك ودمت لمدونتى زائرا





*********************************





محمد غالية
ــــــــــــ
اهلا بيك استاذ محمد
ربنا يسعدك ويرزقك بالزوجة الصالحة
اشكرك جدا لمشاركتك ودمت لمدونتى زائرا



**********************************




احمد ابو العلا
ــــــــــــــــ
اهلا بيك استاذ احمد
اشكرك جدا لرايك ولمشاركتك
دمت لمدونتى زائرا




********************************



ماء تشرين
ـــــــــــــ
اختى الحبيبة:اهلا اهلا بالقمر
اشكرك جدا لرايك ولتعليقك الجميل
ربنا يكرمك ويتقبل دعائك اللهم امين
نورتينى حبيبتى واسعدتينى بتواجدك




*********************************




حلم بيعافر
ـــــــــــــ
اهلا بيك يافندم
ربنا يرزقك بالزوجة الصالحة
تعليقك ده يعتبر اعلان صريح عن فتح باب التقديم فعليك انتظار المتقدمات:)
اشكرك جدا لمشاركتك
ودمت لمدونتى زائرا





***********************************




د/ابراهيم
ـــــــــــــــ
اهلا بيك يادكتور
ربنا يكرمك
ونأمل هذا أيضاً
اشكرك جدا لمشاركتك ودمت لمدونتى زائرا





*********************************




نوارة
ـــــــــ
اختى الحبيبة:اهلا اهلا بالقمر
انا الحمدلله بخير ماتحرمش من سؤالك
ربنا يكرمك يارب فماتوفيقى الا بالله
ربنا يباركلك فى حياتك ويرزقك يارب بالذرية الصالحة
لاتملى من الدعاء ياحبيبتى ربك كريم ومفيش اكرم منه اطلبى منه بقلب جامد وان شاء الله سترين بنفسك
اشكرك جدا لمشاركتك
نورتينى حبيبتى واسعدتينى بتواجدك




*******************************




بيترفلاى
ـــــــــ
اختى الحبيبة:اهلا اهلا بالقمر
الله عليكِ
ايوة كده
احنا نطبق شرع الله والباقى ده بتاع ربنا
ربنا يرزقك بالزوج الصالح
نورتينى حبيبتى واسعدتينى بتواجدك



**********************************




غربتى
ــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
ربنا يكرمك ياحبيبتى واسعدتينى حقاً بتواجدك
نورتينى ياجميلة وفى انتظارك دائما




********************************




مهندسة لعزة الامة
ــــــــــــــــــ
اختى الحبيبة:اهلا بيك فى زيارتك الاولى
ربنا يكرمك ياجميلة فماتوفيقى الا بالله
ربنا يهيئلك كل خير ويرزقك بالزوج الصالح والذرية الطيبة اللهم امين
نورتى مدونتى وفى انتظارك دائما



***********************************



حنين
ــــــــ
اختى الحبيبة:اهلا بيكِ فى زيارتك الاولى
ربنا يكرمك يارب فماتوفيقى الا بالله
واشكرك جدا لتعليقك الذى اسعدنى
نورتى مدونتى وفى انتظارك دائما




********************************



الفقيرة الى الله ام البنات
ـــــــــــــــــــــــــــــ
اختى الحبيبة:اهلا اهلا بالقمر
ربنا يكرمك يارب ويتقبل دعائك والحمدلله الذى هدانى الى هذا

ربا يباركلك يارب فى حياتك وفى زوجك وفى ابنتيكِ وتفرحى بيهم وتشوفيهم دايماً فى احسن حال
احنا لسه فيها ظبطى النية لله وهتاخدى ثواب على كل حاجة ولو حتى على الابتسامة
ربنا يسعدك يارب ويقربك منه دايما
أحبك الذى أحببتنى فيه:) وانا كمان بحبك جدا فى الله
نورتينى غاليتى واسعدتينى بتواجدك






**********************************


د/ ليكتر
ــــــــــ
اهلا بيك يادكتور فى زيارتك الاولى
ربنا يرزقك بالزوجة الصالحة ويهيئلك كل خير
نورت مدونتى وارجو دوام التواصل

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى الكريمه موناليزا
تحياتى
الموضوع حلو قوووووووووووى كالعاده يعنى
بس المشكله ان معظم الكلام اللى مكتوب فيه كتييير من الناس عرفاه بس مش بتعمل بيه وهى دى المصيبه
اللى عاوز يتجوز علشان البنت دى حلوة قوى وعاجبه جمالها وبس
واللى عاوز واحده تخدمه وخلاص واللى واللى زى ماانتِ كاتبه وزى الصور مابتقول
بالنسبه للسؤال مش هكدب واقول كلام كبير وكده وهجاوب بصراحه
كنت عاوز اتجوز اول مرة لما حبيت قوى وحبيت ان العلاقه الجميلة دى تكون فى اطار شرعى وهو الزواج
تانى مرة (اللى كانت من فترة بسيطه) كانت بسبب انى اكون اسرة وانجب طفل صغير وده بسبب انى متعلق بابن اخويا قووى فكنت عاوز اخلف طفل زيه كده
بس ده مايمنعش انى كنت مختار واحده متدينه وعلى خلق علشان تكون هى ام الطفل ده
بس الظاهر ان النصيب لسه ماجاش
وان شاء الله لما النصيب ييجى واتزوج هحاول قدر المستطاع انى اتقى ربنا فيها واعاملها زى مااحب انها تعاملنى بالظبط
تقبلى مرورى وتحياتى ودمتِ بكل خير وود
والسلام عليكم ورحمة الله وبركاته

ريمان يقول...

جميل موضوعك

لانه بيصحح المفاهيم


وكمان بيظبط وبيحدد نوايا الشباب من الزواج



تحياتى ليكى يا قمر

بالنسبه بقه لسؤالك مش هقدر اجاوب عليه الوقتى اما ابقى افكر فى الجواز اصلا هبقى اجاوب على سؤالك واقولك هدفى ايه


تحياتى ليكى

وردة يقول...

كالعادة بتعب اوووي علشان الاقي تعليق علي البوست بتاعك
بجد فعلا كل موضوعاتك قوية ماشاء الله
ربنا يرزق كل شباب وبنات المسلمين ازواج صالحة يكونو ستر ليهم في الدنيا
وسعادة وخير
وسبب في دخولهم الجنة ان شاء الله
ربنا يكرمك
سلام

rovy يقول...

اختى الحبيبه موناليزا
موضوعك كالعاده هادف و مفيد و كالعاده عندما تتناولين موضوع ما فأنت تستوفينه من جميع الجوانب ..
فلا يبقى لمن يعلق سوى ان يقول لكى بكل صدق سلمتى غاليتى و سلمت يداكى ..

خالص مودتى و ارق تحياتى

موناليزا يقول...

المعتصم
ـــــــــــ
وعليكم السلام ورحمة الله وبركاته
اهلا بيك استاذ مصطفى
ربنا يكرمك يارب واشكرك جدا لرايك:) فماتوفيقى الا بالله
عاجبنى اوى اهدافك فى كل مرة
ربنا يارب يسعدك ويرزقك بكل الخير ويرزقك بالزوجة الصالحة قريباً ان شاء الله
اشكرك جدا لمشاركتك ولتواجدك
دمت لمدونتى زائراً






*********************************




ريمان
ــــــــ
اختى الحبيبة:اهلا اهلا بالقمر
اشكرك جدا لرايك
وربنا يهيئلك دايماً كل الخير
نورتينى ريمو الجميلة وسعيدة بتواجدك




********************************





وردة
ـــــــ
اختى الحبيبة:اهلا اهلا بالقمر
ربنا يكرمك يارب فماتوفيقى الا بالله
ربنا يسعدك ويتقبل دعائك اللهم امين
نورتينى وردتى الجميلة وسعيدة بتواجدك





*******************************




روفى
ـــــــ
اختى الحبيبة:اهلا اهلا بالغالية
سبحان الله بجد كنت لسه بقول لنفسى فين روفى وتواجدها المميز:)
يعنى القلوب عند بعضها:) وده من فضل ربنا علينا
ربنا يكرمك يارب فماتوفيقى الا بالله
بحبك جدا ووحشتييينى جدا جدا جدا
ربنا يسعدك دايما ياحبيبتى
نورتينى غاليتى واسعدتينى بتواجدك

Ahmed Al-Sabbagh يقول...

موضوع جميل جداً

Ahmed Talk يقول...

موضوع جميل جدا وطيب ربنا يبارك فيكي يارب

بالتوفيق دوما إن شاء الله

أبو كريم يقول...

يا أمة الله وفقك الله وسدد خطاك دائما... بجد أرفع القبعه لهذا المقال الرائع...

يا سيدتى والله لو علم الناس ان الزواج جنه بضم الجيم اى عاصم لهم من المفاتن التى تحيطهم خصوصا هذه الأيام ليسر الناس على بعضهم البعض لكى يعفوا ابنائهم ولكننا ابعد ما نكون عن منهج الله ورسوله


بالنسبه للرد على سؤالك فانا متزوج من سنه بالظبط يعنى زى النهارده السنه الى فاتت 8/8/2008 والحمد لله سعيد بزواجى لانى جعلت كلام الله ورسوله الفيصل بينى وبين زوجتى فى اى شىء يطرأ لنا دون ان نحتكم لاحد من اقاربنا والحمد لله


اللهم أرزقنا الرضا والتقى والعفاف والغنى اللهم يسر لنا الحلال وأغننا به وعسر علينا الحرام وأبعدنا عنه
أمين

حاول تفتكرنى يقول...

سئل سقراط ايهما أفضل بالنسبة للرجل أن يتزوج ام يظل اعزبا قال :
"فليتخذ الطريق الذى يروقه فلسوف يندم فى كلا الحالتين "

الفلاسفة أنفسم لم يكونوا رأيا

تحياتي

طبيبك الخاص يقول...

السلام عليكم

موضوع جميل استفدت منه كتير

هدفى من الزواج ان شاء الله تعالى ان اكون اسره صغننه

امنيتى ان ربنا يرزقنى بتوائم بنات
هسميهم سلمى وندا وتوائم زكور هسميهم عمر وعبد الرحمن

هعلمهم حجات كتير هعلمهم سيرن النبى عليه الصلاه والسلام وسيره الصحابه العظام سيدنا عمر وابو بكر وعلى رضى الله عنهم

هلعب معاهم رياضه اسبوعيا ان لم يكن يوميا
عندنا دكتور فى الجماعه ربنا يكزمه يارب كان بيقول انتوا الى حد يقصد_يقصد طلبه الطب_اتحرمتوا من حجات مهمه من اهمها انك تلعب رياضه يوميا..بس ياولاد تقدروا تعملوا ده مع اولادكم ولادك امتداد ليك...عجبتنى الكلمه جداا

بتمنى من ربنا انه يحققلى امنيتى ان ربنا يكملى على خير مع خطبتى وان نعيش مع بعض وانه يقدرنا على تربيه ولادنا تربيه صحيحه انفع بيها دينى ووطنى واهلى

تحياتى

Mr.Hazem يقول...

مرحبا , اول شي بحب اشكرك جزيل الشكر لتواجدك بمدونتي ومتابعتك وانا اعترف اني مقصر بحقك ويفترض اتواجد عندك على طول , ولكن كانت عندي ظروف اجبرتني عن الانقطاع ,, ولكن الحمد لله انا هلأ معكم وبيناتكم وباذن الله بنتواجد على طول معكم
, وغير هيك بيشرفني اني احط رابط مدونتك عندي من ضمن المدونات الصديقه :)

اما بخصوص موضوع الزواج , فيجب ان نخلص النسة لله سبحانه وتعالى خصوصاً في موضوع الزواج , بان يرزقك الله الزوجة والذرية الصالحة , فهذا اهم شيئ بالتأكيد
اضف لذلك بأن السعادة الحقيقيه هي عندما تكون انت وزوجتك متفقين ومتفاهمين , ويكون هدف كل واحد منكم هو ارضاء الله اولاً وحفظ الزوج , ومن نايحة اخرى تربية الاولاد تربية صحيحه , وان يكون كلا الزوجين همهما اسعاد بعضهما البعض
يسلموا موناليزا :)

ضكتور يقول...

جزاكم الله خيرا جزيلا

اللهم عجل لي بالزواج يارب العالمين

جزاكم الله خيرا

تحياتي

موناليزا يقول...

احمد الصباغ
ــــــــــــــ
اهلا بيك استاذ احمد فى زيارتك الاولى
اشكرك جداً لرايك
نورت مدونتى




**********************************



احمد تاك
ـــــــــــ
اهلا بيك استاذ احمد
ربنا يكرمك واشكرك جدا لرايك
دمت لمدونتى زائرا





*********************************



ابو كريم
ـــــــــــ
اهلا بيك استاذ بهاء
ربنا يكرمك يارب فماتوفيقى الا بالله
اشكرك جدا لرايك
وهذا للاسف اخى الكريم فمنهج الله اصبح آخر شئ يتعامل به الغالبية

كل سنة وانتوا طيبين ومع بعض دايما متجمعين ويارب عقبال ما يعدى 110 سنة
وتكونوا فى اكمل صحة وسعادة

خير ما فعلت فتدخل الناس فى حياة اى زوجين ليس بقرار صائب
ربنا يسعدكم ويباركلكم فى حياتكم
ربنا يكرمك ويتقبل دعائك واشكرك جدا لمشاركتك
دمت لمدونتى زائرا







**********************************




حاول تفتكرنى
ــــــــــــــــ
اهلا بيك يافندم
:) لأنهم من وجهة نظرى لم يقرأوا كتاب الله ولم يدرسوا فقه الزواج
دمت لمدونتى زائرا





********************************




طبيبك الخاص
ــــــــــــــ
وعليكم السلام ورحمة الله وبركاته
اهلا بيك يادكتور
أسعدتنى حقاً بإفادتك وأشكرك جدا لرايك

ربنا يسعدك ويحقق هدفك ويرزقك بالذرية الطيبة
وعن موضوع التوائم ربنا يمتع زوجتك المستقبلية بالصحة وطولة البال:)
ويارب فكرتك عن تربية ابنائك تفضل موجودة ومايشغلكش عملك عنهم:)
اشكرك جدا لمشاركتك
دمت لمدونتى زائرا






*********************************




مستر/ حازم
ــــــــــــ
اهلا بيك استاذ حازم
يافندم سيادتك تنورنى فى اى وقت ويسعدنى ان تكون مدونتى من ضمن المدونات الصديقة

اشكرك جدا لرايك ولمشاركتك فالزواج طاعة لله
دمت لمدونتى زائرا





*********************************




ضكتور
ـــــــــ
اهلا بيك يادكتور
ربنا يكرمك ويرزقك بالزوجة الصالحة
اشكرك جدا لمشاركتك
دمت لمدونتى زائرا

blue-wave يقول...

الزواج
هو تكامل
ومشاركه
واتحاد
فقط

z!zOoOo يقول...

السلام عليكم

ازيك يا موناليزا

يارب تكوني بخير

انا جيت اسلم وامضي حضور :)

انا قريت شويه من الموضوع بس انا اتعودت علي موضوعاتك الجميله

يارب تكوني بخير دايما

دمتي بكل ود

في رعايه الله

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

بارك الله فيكي اختنا الفاضلة على هذا

العرض الاكثر من رائع

ولتعلمي ان اكثر من 35% من حالات الطلاق في مصر الان هي من الزيجات الحديثة مابين سنة وثلاث سنوات زواج بل ان هناك حالات لم تتعدي ثلاث شهور زواج

وهذا لاننا تخلينا عن الفهم الصحيح للزواج وانه مودة ورحمة بين اثنان وميثاق غليظ لابد ان يبنى برابطة قوية ليست الجمال والمظهر والفلوس

فاقول الى الفتيات من جائكم من تردون دينه وخلقة فزوجه وهذه توصيةالنبي

واقول الى الشباب تنكح المرأه لاربع لدينها ومالها وجمالها ونسبها فاظفر بذات الدين تربت يداك
وهذه ايضاً توصية النبي

اذا التزمنا بهذه القواعد لعشنا جميعاً في مجتمع هادئ مستقر

تحياتي على الموضوع الرائع ونأسف على الاطالة

salwa يقول...

السلام عليكم
اولا اللهم بارك لنا بشعبان و بلغنا رمضان مع اطيب تمنياتي
ثانيااسفة للتاخير انا كنت اجازة
موضوعك كعادتك شيق و مهم و يا ليت يستفيد منه و يطبقوه كل من يرغبوا بالزواج
جزاكي الله كل خير
سلام

موناليزا يقول...

بلو واف
ــــــــــ
اهلا بيك يادكتور
اشكرك جدا لرايك
دمت لمدونتى زائرا





********************************




زيزو
ــــــــ
وعليكم السلام ورحمة الله وبركاته
اهلا بيك استاذ زيزو
يافندم شاكرين تواجدك ورأيك
وتسعدنا زيارتكم دائما
وانا الحمدلله بخير اشكرك جدا لسؤالك
دمت لمدونتى زائراً






***********************************





ابو صهيب
ــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك اشكرك جدا لرايك فماتوفيقى الا بالله

للاسف هذه حقيقة فنسبة الطلاق مرتفعة جداً
اشكرك جدا على تذكيرنا بأحاديث النبى عليه الصلاة والسلام وارجو ان يتذكرها الجميع
اشكرك جدا لمشاركتك
ودمت لمدونتى زائرا






******************************




سلوى
ــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
اولا: ربنا يكرمك يارب ويتقبل دعائك اللهم امين
ثانيا: وجودك يكفينى فلا تعتذرى على التأخير فأنا فقط ما يضايقنى فى غيابك هو قلقى عليكِ لكن انتِ عارفة انتِ تنورينى فى اى وقت

ماتحرمش منك ياحبيبتى واشكرك جدا لرايك
نورتينى سلوى الجميلة ودمتِ بخير

EMMY BABY يقول...

بوست جميل اوووووى يا موناليزا

ربنا يكرمك فعلا

ويهدينا جميعا ويعفنا جميعا بالزواج

مع ان فى ظاهرة غريبة اوى الشباب دلوقتى كبار ومش متزوجين معرفشى ده سببه ايه صراحة

تحياتى

ايمى

egyboy يقول...

جزاك الله كل خيرا ..جميلة تلك هذه النصائح الغالية أما بالنسبة للسؤال فأريد أن أتزوح لأربى أبناءا يدعو لى بعد وفاتى
بارك الله فيك أختى الكريمة

موناليزا يقول...

ايمى بيبى
ـــــــــ
اختى الحبيبة:اهلا اهلا بالقمر
ربنا يكرمك ياجميلة واشكرك جدا لرايك
الظواهر الغريبة انتشرت بكثرة ولا نعلم لها سبباً
لعله خير:)
نورتينى ايمى الجميلة واسعدتينى بتواجدك














********************************


ايجى بوى
ــــــــــ
اهلا بيك يافندم
ربنا يكرمك اشكرك جدا لرايك
ربنا يرزقك بالزوجة الصالحة والذرية الطيبة
اشكرك جدا لمشاركتك
دمت لمدونتى زائرا