مرحب شهر الصوم

وها قد هلت بشاير قدوم رمضان. كم أشتقنا له. بكل طقوسه الخاصة.
وسأعرض بعض الطقوس السيئة التى يقوم بها الفرد. حتى يصلحها ويفوز بعظم ثواب هذا الشهر .


ناس كتير مش مدركين حجم الثواب ولو أدوا الفريضة بتكون على مضض. وناسيين أن ثواب النافلة فى رمضان كثواب الفريضة فى ما سواه وثواب الفريضة كثواب سبعين فريضة في ما سواه .

برامج التليفزيون الغير مفيدة.

ماتتفرجش على حاجة مش هتفيد دنياك وآخرتك.

فستسأل عن هذا الوقت المهدر.

السجاير أصلاً حرام. واحنا عايزين نأخذ ثواب مضاعف من عمل الحسنات. يعنى السجاير مش وقتها خالص. وإيه رأيك لو بطلت سجاير فى رمضان واهى فرصة ربانية لو أنت عايز تبطل بجد.

جميل إنك تصلى فى المسجد بس مش جميل أبداً أنك تكون مصاحب بنات وكل تفكيرك هتتأخر عليهم ولا لأ. ركز فى عبادتك لأنها هى اللى هتنفعك.

بلاش يبقى رمضان زيه زى أى شهر تانى. حاول تتوب عن أى ذنب حتى لو كان بالنسبة لك صغير

" تحسبوه هيناً وهو عند الله عظيم".

الصيام مش معناه أنك تنام طول النهار عشان ماتحسش بالصيام.

التليفزيون مش هيطير. و رمضان مش جاى عشان تضييع وقتك.

ماتطبخيش أكل كتير وفى الآخر يبقى مصيره الزبالة وفيه ناس كتير مش لاقية. اطبخى على قد أسرتك ولو اتبقى حاجة ممكن جداً تديها بنفسك لأى جار فقير ليكِ أو أى عابر سبيل. لكن حرام كل الأكل ده يترمى .

مش معنى إنك صايم إنك تسوق بسرعة زيادة ومش مهم الناس اللى معاك فى الطريق. صيامك مش مبرر لأسلوبك الهمجى فى السواقة. وماتخافش هيستنوك على الفطار والأكل مش هيخلص. يا أخى ده أنت ممكن تفطر على شربة مية أو تمرة تكون معاك فى السيارة.

مين قال إن رمضان شهر النوم والتليفزيون!!!!

رمضان مش عقاب لينا عشان نفضل مستنيين المغرب من أول ما نصحى.

حبوا رمضان ده فرصة عظيمة لدخول الجنة. واستغلوا الوقت ده فى ذكر الله وقراءة القرآن وصلة الرحم أو مشاهدة برنامج دينى أو حضور درس علم أو...

غيروا نظام حياتكم . رمضان فرصة للتغيير.

ماتسمعوش الأفكار الهدامة. ديننا واضح ومش معنى إن واحد طلع فى التليفزيون بقى معاه رخصة أننا نصدقه. فيه كلام الفطرة السوية بترفضه. حكم عقلك واستفتى قلبك.

دور على الثواب فى كل أفكارك.

لو عملت حاجة وحشة يبقى العيب منك أنت.

الصيام مش منع الأكل والشرب وبس . ده صيام عن كل حاجة تغضب ربنا. ماينفعش البنت تسيب شعرها أو حتى تبقى محجبة وتطلع شوية شعر من الطرحة ولا ينفع تضعى ماكياج ولا حتى روج بحجة أنك مش هتأكليه. بلاش كده وعيب نتعامل مع ربنا بالطريقة دى. والشباب غضوا بصركم وبلاش معاكسات أو حتى نقد داخلى على البنات واللى عاملينه فى نفسهن مالكش دعوة بيهم وخليك فى نفسك وعبادتك وماتصدقش أن السجاير ما بتفطرش لأنها أصلاً حرام. وأى حاجة تانية أنت وحدك أدرى بيها بطلها حِسبة لله. واستغل فرصة وجود رمضان وجمَّع حسنات.

ماتبقاش عبد غير لربنا مش لشيشة او لسيجارة.

هتركز فى الصلاة ازاى وانت وراك حاجات دنيوية أصلاً حرام. ياجماعة ممنوع الإختلاط . سواء فى رمضان أو غيره.

إزاى تصوم ومش بتصلى؟

على فكرة الصيام الركن الرابع من أركان الإسلام. أما الصلاة فهى الركن الثانى من أركان الإسلام.

صيامك مش مبرر أنك ماتروحش الشغل أو ماتأديش حقه أو تاخده أجازة أو تتعامل بطريقة سيئة مع زملائك والعاملين وما إلى ذلك.

وأخيرا الحمدلله الذى وفقنى إلى هذا.

أما عن طقوسى الخاصة فى رمضان وبعض الأفكار البنائة

فستجدونها فى هذا الموضوع أهلاَ بالضيف الغالى . والذى أدعوكم لزيارته.

ملحوظة:

ـــــــــــــــــــــ

لا يجوز قراءة الموضوع ده دون زيارة الموضوع التانى لأن الاتنين بيكملوا بعض ولأن كمان فيه تنويه فى الآخر يهمنى أنكم تقرأوه وتدعولى بالدعاء الموجود فيه.

وبراحتكم ترك التعليقات هنا أو هناك كل التعليقات فى أى موضوع أنا برحب بيها وهنشرها بإذن الله حين عودتى من أجازتى الرمضانية.

أراكم على خير. وكل عام وأنتم جميعاً بخير.