الأحد، 1 نوفمبر، 2009

جوجو و زمردة (11)

يراقب "جوجو" وشقيقته "زمردة" السمكة التى تعوم فى حوض السمك. وقد يظلا هكذا لفترات طويلة دون ملل. فهى تثير بداخلهما الشعور بالمتعة بل والتخيل أيضاً.وأثناء هذاسرحت "زمردة" بخيالها وقالت:- ياسلام لو يبقى عندى حصان.
- وده هتعملى بيه إيه؟.
تعحبت من سؤاله وقالت:- هركبه طبعاً.
- هتركبيه فين يعنى؟.
- هيكون فين يعنى ! طبعاً فى الشارع.
- ههههههه حلوة دى ماتركبى حنطور أحسن. على الأقل تبقى مبلوعة شوية.
- أنت مفكرنى بهزر!!.
- طب افرضى جبتهولك هتنيميه فين؟.
وبعد تفكير قالت:- هتبقى بايخة لو ربطته أمام العمارة بتاعتنا وكمان الحركة دى مش هتليق بمستواه لأنى عايزاه يكون حصان عربى أصيل مش أى كلام يعنى وعشان كده هربطه جوه العمارة فى المسقط.
- يا ماشاء الله. وتخرجى بيه من البيت كأنك خارجة بعربيتك مثلاً مش كده؟.
- طبعاً بس عشان الجو مايبقاش حر هخرج بيه قبل المغرب وهرجع قبل ماالدنيا تضلم لأن مش معقول هشيل كشاف معايا. وامشى براحتى بقى ولا هبقى مطالبة برخصة قيادة ولا ربط حزام ولا شنطة إسعاف ولا كل قوانين المرور المتعارف عليها . بالعكس هبقى ماشية هيبة كده. واللى هيشوفونى هما اللى هيوسعولى من غير ما أنا أتكلم. ولا حد يجرؤ يعاكسنى لأن الحصان بتاعى ساعتها هيقوم بالواجب.
- طب افرضى جيتى فى يوم مش عايزة تخرجى وهو لازم يومياً يجرى عشان رجليه ماتتيبسش هتعملى إيه؟.
- هطلع بيه فوق السطوح ياخد له لفتين.
- وهتأكليه إيه؟
- بما أنه حصان ابن ناس هأكله سكر وجزر.
- وهتعرفى تحميه؟.
- بعد تفكير عميق وإحساسها بالمسئولية تجاهه قالت: هدلُق عليه المية من فوق.
- وهتسيبيه لوحده يكلم نفسه فى الفترة اللى أنتِ هتكونى فيها مش فاضية له مثلاً!. كده ممكن يجيله إكتئاب.
- لأ خالص مين قال هجيبله سلحفاة تونسه. وبكده أضمن أنهم مش هيتخانقوا على أى حاجة أبداً.
- ده أنتى مرتبة كل حاجة بس نسيتى أهم حاجة .. هتسميهم إيه؟
- ودى برضه حاجة تفوتنى الحصان هسميه "طوسون" والسلحفاة هسميها "زوبيدة". بس المشكلة فى حاجة تانية خالص.
- خير؟.
- ياترى لو اتجوزوا هيخلفوا إيه؟.
- آه حقيقى . بصى تعالى نأكِل السمكة دلؤتى ولما ييجى بابا من الشغل نسأله.
هزت رأسها موافقة وقامت تحضر غذاء السمكة.
- تمت-.
************************
سؤال جانبى:
* ما أغرب حلم يقظة بتحلم بيه وتتمنى حدوثه؟.
* ما أكثر حيوان تحب تشاهده؟.
* ما هو الحيوان التى تفضل إقتنائه؟ ولماذا؟.

هناك 32 تعليقًا:

ستيته حسب الله الحمش يقول...

اغرب حلم اني احلم اني عاوزة اتكلم ومعرفش
او اني في لجنة امتحان ومش عارفة احل
عااااااااااااااااااااااااااااااااااااااااااااا
اكتر حيوان احب اشوفه هو الحصان :)
ليه معايا ذكريات تكنن
مش بحب اقتني حيوانات
كفاية المعمل والتشريح :)
تحياتي يا قمراية

salma mohamed يقول...

أنا بقى محدش قدي في الأحلام لا أحلام النوم ولا أحلام الخيال (:
أما السؤال التاني بصراحة أعدت أفكر لقيتني
حقيقي بحب أشوف عالم الحيوانات كله بأنواعهاالمختلفه بحب أشوف عجائب الله في خلقه وأتفكر وأسبّح لجمال ودقة وعظمة الخالق,
والسؤال الثالث فأنا بموووت في طيور الزينة لأن تربيتها وعنايتها سهله ومش بيتخاف منها زي الكلاب والقطط ولا بتحتاج مكان مهيئ زي باقي الحيوانات,
وأنغامها رائعة وأشكالها جذابة وبتضفي على روحي بهجه بصحبتها.

د. ياسر عمر عبد الفتاح يقول...

أغرب حلم؟؟
إني بقيت هولو مان

أو إني أقعد في البلد لوحدي
يعني كل حاجة تبقي موجودة زي ما هيه
بس من غير ناس خالص ولا بشر
وأبقي لوحدي فيها

الأحــــــ إيناس ــــــزان يقول...

السلام عليكم
صباحاوك سكر
تعرفى الحلم اللى بشوفه دايمآ وانا صاحيه هو الموت بتخيل نفسى ياترى هموت ازاى
ايه اللى هيحصلى طيب هموت بعيده ولا على فراشتى بجد دا الحاجه الوحيدة اللى شغاله تفكيرى ودايمآ بشوفها قدام عينى

""""""""""""""""""""""
انا بقا بعشق القطط قووووووووووووى
وعندى قطه كميله قووى اسمها ساندى
وبصراحه ملية عليا حياتى
دا بجنب العصافير لانى بعشقهم وبتعلم منهم كتير قووووووووووى
الله على العصافير بجد عالم تانى
اما اقطه بجد قمة الحنان والوفاء والاخلاص ليا

معلهش شكلى طولت
اسيبك فى رعاية الله
السلام عليكم

أبو كريم يقول...

يا أمة الله رعاك الله

المهم ان السمكه اتاكلت فى الأخر!! خيانه

فعلا الحصان هيريحك من قرف قانون المرور الجديد بس ممكن بردوا عشان يستنفعوا يقولولك تسيير حيوان بدون رخصه!!!

- أغرب حلم يقظه انى فيوم حلمت انى واقف قدام شباك النتيجه فى الجامعه وواحد ورايا متشعلق على مواسير مبنى الكليه وان واحد زميلى لقانى ببص على الراجل ده وقالى يابنى شوف النتيجه قلتله هو بيعمل ايه ده قالى انته شلت لاتينى ضاد ده الكلام ده وانا فى الثانويه ويشاء القدر انى ألزق رغباتى غلط وبدل ما أدخل علوم جتلى أداب وفسنه تالته مع انى بنجح بتقدير رحت أشوف النتيجه وسبحان الله بدل ما اتزاحم على النتيجه ببص ورايا ولفوق لقيت الراجل ده متعلق بيركب تكييف والله بنفس الزى وكنت نسيت الموقف تماما لسه هقول انا عديت بماده لقيت عماد زميلى بيقولى شيلت لاتينى ضاد قلت سبحان الله

- أكتر حيوان بحب أشوفه هو الدولفين
-لو هقتنى حيوان فى البيت يبقى بغبغان

MOHAMMED ELBANNA يقول...

أمة الله
يا محاسن الصدف انا كمان بحب الاحصنة جداً .
وبتمنى ان شاء الله في المستقبل اقتني واحد منهم .
تقبلي تحياتي
محمد البنا

TIMMY !! يقول...

هههههههههه ,
بالنسبة لي أغرب حلم إني أطير , مش بجناحات لكن سباحة في الجو , بحيث تكون نسبة كثافتي إلى كثافة الهوا هي نفسها نسبة كثافتي بالنسبة للمية ,
و ساعات كتيرة بحلم إني بعوم في الهواء :)

أما أكثر حيوان بحب أشاهده هو الجاموسة ,
بحس إنها رايقة قوي و ماشية على مهلها و بتاكل على مهلها و لا حد بيركبها و لا بتجر حاجة و لا بتتعب في حاجة ,
عايشة تاكل و تروح من البيت للغيط و تتحلب و تندبح في الآخر و خلاص ,
مافيش دماغ أعلى من كده :)

بالنسبة للحيوان اللي أحب اقتناءه ... مافيش , أنا ماليش خُلق على التربية و التنظيف و الرعاية و الكلام ده ,
ثم أنا أصلا ضد تربية الحيوانات , المفروض نسيب الحيوانات تعتمد على نفسها مثل غيرهم و ما نفضلش بعضهم على بعض - نظرية فلسفية نوعا ما - :)

تحيتي

momken يقول...

اغرب حلم يقظه..ان بابا يشتريلى ارض فى مدينه العبور ويطلع فيها بترول

اكتر حيوان بحبه.... هو حبيبتى (حيوانه يعنى)


اكتر حيوان بحب اقتنيه ...طائر الروخ


بوست جميل

تحياتى

همس الاحباب يقول...

اغرب حلم بحلم انى فى جزيرة لوحدى بعيد عن البشر وبسرح فى السماء ونجومها
احب حيوان احب اشاهده الحصان او الجمل
اقتنى حيوان يبقى حيوان اليف وده اكيد هيكون فى البلد مش هنا
ممكن خروف او بقرة او حصان حتى
تحياتى

موناليزا يقول...

ستيتة حسب الله الحمش
ـــــــــــــــــــ
أختى الحبيبة:اهلا اهلا بنبض الحكمة
مش عارفة ايه موضوع الحلم بلجنة الامتحانات ده! واضح انه منتشر جدا:)
طب مش كنتى تقولى ذكرى واحدة طيب:)
عذراكِ ياقلبى كان أخويا فى علوم برضه:)
نورتينى غاليتى واسعدنى تواجدك



********************************


سلمى محمد
ــــــــــ
أختى الحبيبة:اهلا اهلا بالقمر
يلا عيشينا معاكِ بقى فى عالم الاحلام:)
سبحان الله انا كمان كده احب البرامج الى قلبى عالم الحيوان:)
فعلا من اجمل الاصوات تغاريد الطيور وخاصة العصافير
نورتينى سلمى الرقيقة واسعدنى تواجدك


********************************


د.ياسر عبد الفتاح
ــــــــــــــــــــ
اهلا بيك يادكتور
ايه هولو مان ده؟
ده زى السوبر مان يعنى ولا إيه؟:)

وهتعمل ايه وقتها وانت لوحدك كده؟:)
أشكرك جدا لمشاركتك


**********************************


أحزان ايناس
ـــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
مساؤك عسل مكرر:)
الموت يااه انا بقى عديت مرحلةالحلم بيه دلؤتى انا بنتظره:)
--
لأ لأ لأ ده احنا متشابهين على كده انا كمان بحب القطط
ربنا يخليهالك ياحبيبتى
انا كمان كان عندى "بوسى":)
طولتى ايه بس!! ماتقوليش كده تانى
انتى تنورينى دايما
أسعدنى تواجدك



*********************************


ابو كريم
ـــــــــ
اهلا بيك استاذ بهاء
:) لا يافندم حضرتك فهمت غلط هما راحوا يحضروا لها الطعام(يأكلوها) يطعموها يعنى
:) طب نروح منهم فين بقى
سبحان الله فعلا
الدولفين كائن طيب ومحب البشر
والبغبغان هيقولك على اللى بيحصل فى البيت فى غيابك:)
أشكرك جدا لمشاركتك


*********************************


محمد البنا
ـــــــــ
أهلا بيك استاذ محمد
:) ربنا ينولك اللى فى بالك دايما
أشكرك جدا لمشاركتك


*********************************


تيمى
ـــــــ
أهلا بيك يافندم
حلم مميز وفريد من نوعه:)
ههههههه نظريه برضه وخصوصا بعد اللى اتسببت فى حدوثه مؤخرا من حادثة القطار
:) وجهة نظر تحترم جدا
انا عن نفسى رغم حبى لمشاهدة الحيوان بس ماحبش اشوفهم جوه اقفاص بشعر انهم محبوسين من غير جريمة عملوها
أشكرك جدا لمشاركتك


********************************


ممكن
ـــــــ
أهلا بيك يافندم
:) بترول مرة واحدة طب قول آثار:)
فهمت انا ايه بقى من حيوان حبيبتى!!
اسمه ايه طيب؟
طائر الرُخ أنا فاكره الاسم ده بس مش واخده بالى من شكله
أشكرك جدا لمشاركتك


********************************


همس الاحباب
ــــــــــ
أهلا بيك استاذ خالد
حلم رومانسى رغم الوحدة المصاحبة له
اختيارك للحيوانات المفيدة للانسان له دلالة طيبة:)
أشكرك جدا لمشاركتك

ذكري رحيل قلم يقول...

السلام عليكم

ازيك يا مونمون عاملة ايه
عمري ما حلمت حلم غريب

ومش بحب الحيوانات ولا الطيور

بخاف وبقرف منهم بصراحة

قصةجميلة دمتي

بخير

Mr.Hazem يقول...

اغرب حلم اني بعد ما تخرجت من الكلية , قال احلمت اني بقدم اخر مادة عندي
وقال انا مش عارف احل ابداً
وقاعد بحكي طيب انا اتخرجت من الجامعه لييييييييش خلوني اعيد هادي المادة :(

---
احلى شي بحبو هو القط ونفسي اقتنيه لكن اخواتي بيخافو
بحسو بريئ وغير هيك انه نظيف :)

يسلموا

Butterfly يقول...

كتير اوى اتمنيت انى اركب حصان
وبحب أشوفه وكمان بحب الفراشة جدا
وبحب السمك كمان ههههههههههه

كلمات من نور يقول...

عليكي أسئلة يا موناليزتي اللي وحشاني قوي جدا خالص..بس عموما المرة دي سؤال منهم قوي والباقي سهل الردود

سؤال جانبى:
* ما أغرب حلم يقظة بتحلم بيه وتتمنى حدوثه؟.

أغرب حلم يقظة باحلم به إني أروح أعمل عمرة أو حج ..أنا مع الأسف مش عارفه أسيب العصابة و أروح أحج أو أعتمر و بالرغم من إني أيام الثانوية حجيت وعمل عمرات كتير إلا إن حنيني للعمرة لا يفوقه أي حنين حاليا..دعواتك
* ما أكثر حيوان تحب تشاهده؟.

أكتر حيوان أحب أشوفه هو السمك بالرغم إنه ميعتبرش حيوان بس عديها بقى بيريح أعصابي جدا
* ما هو الحيوان التى تفضل إقتنائه؟ ولماذا؟.

نفسي في كلب جدا بس مع الأسف عارفه إنه حرام يبقى في البيت معايا .بس حقيقي باحس إنه أوفى حيوانات الأرض وذكي و حبوب

سومه...مجنونه فى بلد عاقل يقول...

يا ريتنا نرجع تانى لعقليه الاطفال كنا استريحنا
بحب اشوف الاسد بحس فيه بالقوه اللى بيفتقدها مجتمعنا
ولو حقتنى حقتنى حيوانين الاول قرد عشان بيعرف يمشى اموره مش زينا بيعك الدنيا
او ثعلب عشان العرب بيفتقدوا المكر والزكاء حقتنيهم يمكن اتعلم منهم

موناليزا يقول...

ذكرى رحيل قلم
ــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
انا الحمد لله بخير ماتحرمش من سؤالك ياحبيبتى
:) اجابة مميزة
نورتينى حبيبتى واسعدنى تواجدك



******************************



مستر/ حازم
ــــــــــــ
أهلا بيك استاذ حازم
سبحان الله! يا ما أحلام
:) عجبنى مراعاتك لمشاعر اخواتك
ربنا يحميكم ويخليكم لبعض
أشكرك جدا لمشاركتك


********************************



بيترفلاى
ـــــــــ
أختى الحبيبة:اهلا اهلا بالقمر
حبك للفراشة ده واضح جدا على فكرة:)
نورتينى حبيبتى واسعدنى تواجدك



*********************************



كلمات من نور
ـــــــــــــــ
أختى الحبيبة:اهلا اهلا بالقمر
:) دائما اسئلتى تنتظر اجابتك
والله القلوب عند بعضها جدا:) انتى كمان وحشاااااانى جدا

:) عصابة تقولى على الملايكة اللى عندك عصابة ههههههههه
ياه ياحبيبتى ومين سمعك الشهر الجاى ستزداد مشاهد الحجيج والكعبة وسيأخذنى حنينى إليها
ضعطتى على نقطة ضعفى زيارة البيت
والله بدمع وانا بكتب دلؤتى
تعرفى انى مبعرفش انام بجد غير لما بتخيل نفسى هناك
ربنا يكتبهالنا يااااارب قريب احنا وكل مشتاق اللهم امين

نعديها:) وماله السمك انا كمان بحب اتفرج عليه
ايه ده ايه ده احنا متفقين جداعلى فكرة:)
نورتينى غاليتى واسعدنى تواجدك



*********************************



سومة مجنونة فى بلد عاقل
ــــــــــــــــــــــ
أختى الحبيبة:اهلا اهلا بالقمر
تفكير مميز جدا:)
نورتينى حبيبتى واسعدنى تواجدك

salwa يقول...

السلام عليكم اخت موناليزا
اولا اسفة للتاخير
انا حريصة دائما علىمتابعة مدونتك الرائعة
طبعا نحلم ان يرضى الله عنا , و حلم اليقظة الوحدة العربية
بشكل عام احب الحيوانات و اكثرها القطط
سلاااااااااااام

Heba Faruq يقول...

الحيوانات كلها مخلوقات رائعة
أحبها كثيرا لكني لا أحب اقتناءها
لأن الأفضل أن نتركها تعيش في بيئتها الطبيعية بحريتها وبلاش ننكد عليها
الرحمة حلوة

مع حبي

موناليزا يقول...

سلوى
ـــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
تسعدنى زيارتك ومتابعتك دائما
لا عليكِ غاليتى مكانك محفوظ دائماً
ربنا ينولك ماتتمنى وتبغي
نورتينى سلوى الجميلة واسعدنى تواجدك



*****************************




هبة فاروق
ـــــــــــ
أختى الحبيبة:اهلا اهلا بالقمر
:) عسل ياهبة
وجهة نظر تحترم جدا وانا عن نفسى أؤيدها
نورتينى ياجميلة واسعدنى تواجدك

المعتصم يقول...

السلام عل يكم ورحمة الله وبركاته
اختنا الكريمه
تحياتى
بلاش حكاية اغرب حلم يقظة ده
عشان كلهم اغرب من بعض
(انتِ مش عارفه الصعايده بيفكرواازاى)

بحب اتفرج على القطط جدا وخصوصا وهى بتلعب وبتتشاقى
وكمان بحب اربيها فى البيت
كان عندى قطه اسمها نعناعه بس ماتت وبنتها اللى مربيينها دمها تقيل مش زى نعناعه
بس ده مايمنعش انى بحبها برضو
هههههههههههههههه
تقبلى مرورى وتحياتى
والسلام عليكم ورحمة الله وبركاته

طبيبك الخاص يقول...

عن الحلم
نفسى اجمع بين الاتى

انا
ابى
امى
زوجتى
بناتى

المكان الاول..بيت الله

المكان التانى..جو هادى وصافى زى جو اسكندريه وبحرها


الحيوان اللى بحب اشوفه
هو البط لما يكون صغير اوى لسه
بحس بالبراءه وببقيا نفسى اخده فى حضنى بحس انه ابنى او بنتى احساس غريب شويه انا عارف

الحيوان اللى ان شاء الله هجيبه عصفورتين يملوا عليا الشقه لحد ما ربنا يكرمنى واتجوز واخلف ولجيب بنات امامير كده

موناليزا يقول...

المعتصم
ــــــــ
وعليكم السلام ورحمة الله وبركاته
أهلا بيك يافندم
طيب شاركنا ولو واحد بس:)
واضح ان القطط واخدة شعبية جامدة جدا:)
فعلا اول قطة بيبقى ليها معزة خاصة
كان عندى قطة برضة "بوسى" بس ماتت من غير ماتتجوز وبالمقابل ماجبتش ولاد
- طب ماهو محدش اتقدملها اصلا وهى مابتخرجش الشارع:)-
المهم بعدها اخويا جاب قطة تانية لسه مولودة"كاتى" بس كانت شريرة رغم جمالها الذى يفوق "بوسى "بمراحل ونتيجة لهذا قمنا بطردها ورجعناها لصاحبها تانى:)
ماقولتليش بقى بنت"نعناعة"اسمها ايه؟

أشكرك جدا لمشاركتك


********************************


طبيبك الخاص
ــــــــــ
أهلا بيك يادكتور
إن شاء الله تجمع بينهم قريب:)
هو احساس غريب لانه فيه حنان زيادة شوية:)
بس انا متفقة معاك شكل البط وهو صغير جميل فعلا
حلوة العصافير:)
ربنا يرزقك بالزوجة الصالحة والذرية الطيبة اللهم امين

طهر فؤادك يقول...

السلام عليكم ورحمة الله وبركاتة ,,,

ماشاء الله موضوع جميل ... بارك الله فيكى

اما عنى انا بحب كل الحيوانات جدا وخصوصا القطط وانا صغير كان عندى قطة بس لما كبرت للاسف مش عارف امارس الهواية دى لظروف كتيرة ... بس انا بحب الحيوانا بوجة عام لان كل حيوان بيعلمك حاجة سواء بطريقة مباشرة او غير مباشرة... ودينا الجميل علمن الرفق بكل المخلوقات .. لانها من خلق الله .

(Joudy) يقول...

انا جيت متأخر شوية بس معلش الحمد لله إنى وصلت رغم الزحام

أكتر حلم يقظة غريب كان إنى بطير فى السما

وأكتر حيوان بحب أشوفه هو القطة وبالذات مع أولادها

وأكيد طبعا أكتر حيوان احب يكون معايا هو القطة

دمتى بكل الخير والسعادة

rovy يقول...

هههههههه
وحشانى جداا يا قمر
ايه الاحلام البريئه جداا دى
الله يا مونى جواكى طفله جميلة قوى ما شاء الله عليكى .. ربنا يحميكى و يحقق لك كل احلامك ياارب .
بس حكاية زواج الحصان بالسلحفاه ده صعب جداا يتحقق :)
بصى حبيبتى انا من و انا طفله صغيره و انا حاسة انى عايشه دايما باحلم لدرجة انى كنت خايفه لما كبرت شويه ان يجى وقت ما اعرفش افرق فيه بين الواقع والاحلام اللى باعيشها فى خيالى
لكن دلوقت بدأ الواقع بمسؤلياته الكثير يأخذنى من احلام اليقظه و يبقى لى و لنا جميعا احلام مشتركه تمر علينا حميعا مثل انقاذ الاقصى و دخوله منتصرين .. او توحيد المسلمين و احترامهم لبعض علشان العالم يحترمهم ..
و احيانا بأحلم على المستوى الشخصى جداا انى افرح ببناتى و اشوفهم احلى عرايس يااارب و كمان ساعات بأتجنن و افتكر ان لسه عندى وقت احلم انى اكون كاتبه كبيره و مشهوره و محبوبه
طبعا حتى الاحلام لها نثريات غريبه بتدخل ما بين سطور احلامنا من وقت للتانى و يبقى لنا ان نحلم و نحلم لان احلامنا اكبر دليل على وجودنا احياء

بحبك جداا و بأحب برائتك و رقتك دى جداا

عبد من عباد الله يقول...

اغرب حلم ، ان مصر جابت 4 في الجزائر

افضل حيوان ، فيه كتير زي الحصان طبعاً و الغزال و الدولفين كذا حاجه يعني

لكن اجيب حيوانات دي ممممممم ؟

ممكن الحصان ، لاني بحس انه ممكن يكون صديقي و ربما اتعلم منه القوه و الشهامه و الصداقه بجد

موناليزا يقول...

طهر فؤادك
ــــــــــــ
وعليكم السلام ورحمة الله وبركاته
أهلا بيك يافندم
ربنا يعزك أشكرك جدا لرايك
أحترم نظرتك جداً فجميع مخلوقات الله لا نملك حين مشاهدتها سوى التأمل فى قدرة الله وقول سبحان الله
أشكرك جدا لمشاركتك



********************************


جودى
ــــــــ
أختى الحبيبة:اهلا اهلا بالقمر
حمدالله على سلامة الوصول:)
بس جميل فى الهواء الطلق:)
القطط واخدة اصوات عالية جدا على فكرة:)
نورتينى جودى الجميلة واسعدنى مشاركتك



**********************************



روفى
ـــــــ
أختى الحبيبة:اهلا اهلا بالغالية
وانتى كمان وحشاااانى جدا جدا

:) ربنا يعزك يارب
ماتنسيش انى كمان تخصص رياض أطفال:)
ياااه ياروفى أحلامك تثير الشجن بداخلنا جميعا رغم حلمنا بأن تتحقق

ربنا يفرح قلبك ببناتك يارب
مين عارف مش يمكن حلمك بان تكونى كاتبة مشهورة يتحقق قريب
فعلا غاليتى من لا يمتلك القدرة على الحلم لا يمتلك الكثير
وانا كمان بحبك جدا وحساكِ بريئة جدا
نورتينى روفى الجميلة ويسعدنى وجودك دائما



*********************************



عبد من عباد الله
ـــــــــــــــــ
أهلا بيك يافندم
:) هو الأمل ضعيف أوى كده
ولو جبت حصان هتربيه فين؟

أشكرك جدا لمشاركتك

معتز شاهين - باحث تربوي يقول...

أغرب حلم مش فاكر أصل كلهم غراب

شكل الواحد مهيس اليومين دول

ويبقى التواصل

NilE_QueeN يقول...

مش عارفه والله اقولك ايه

كلامك بيعجبني جدا بحس فيه بعمق و خيالك واسع ما شاء الله
و بتعرفي ازاى توصلى اللى انت عايزاه باسلوب يتحب

انا مش ببطل احلام و بحب الحيوانات كلها و نفسي اقتنى game parkمش حيوان واحد

(المهاجر الى الله) يقول...

السلام عليكم ورحمة الله وبركاته:
كيف حالك اختى الفاضلة موناليزا ، اسأل الله ان تكونى بافضل حال واتم عافية.
اذا كانت الحاجةام الاختراع فالحلم ابوه
اغرب حلم يقظة حلمت بيه واتمنيت انه يحصل بس مافيناش من التريقه ها ،انى اكون رائد فضاء عشان امتع عينى بعظمة خلق الله واطلع القمر واستكشفه شبر شبر وعلى اقل من مهلى ، براحتى يعنى ،هههه
........
من تفكير باحب الجمل والحصان العربى الاصيل والغزال
الجمل لانى هاتعلم منه الصبر وقوة التحمل لو مرة حسيت انى هاتهور وبعدين له منافع كتيير.
الحصان العربى الاصيل جلد وقوى وذو همة بتفكرنى بهمم الرجال الشوامخ امثال القعقاع بن عمرو وابى الدرداء .
الغزلان بقه فدى لان جمالها لايقاوم مهما سمرت عينى عليها مش هازهق من جمالها الربانى وخصوصا جمال عيونها.
من الطيور : اكيد الصقر يكسب على طول، انا باسميه ملك الاجواء مش قمام وذوقه رفيع وقناص من الدرحة الاولى وخصوصا الباز.
والبط لانى باحب اكله دايما وباضعف قدامه ولما بيكون مشوى على الفحم مقدرش اقااااوم.

الشجرة الأم يقول...

أغرب حلم يقظة راودني هو أني تمنيت أن أتزوج إنسان يخلقه الله لي أنا فقط كما خلق أبونا آدم.

أما أكثر حيوان أحب مشاهدته هو الطاووس، لإعتزازه بنفسه.

وأما الحيونات فأنا لا أحب إقتنائها لسببين، أولا لأني أخاف منها حتى الأليفة، وثانيا لأني أحب أن تكون في بيئتها الطبيعية.

موناليزا يقول...

معتز شاهين
ــــــــــــ
أهلا بيك استاذ معتز
كنا عايزين ولو واحد بس :)
أشكرك جدا لتواجدك



******************************



نايل كوين
ـــــــــــ
أختى الحبيبة:اهلا اهلا بالقمر
ربنا يكرمك ياحبيبتى اشكرك جدا لرأيك ولدعمك لى فماتوفيقى الا بالله
:) ياواد يا جامد
طيب حلم بحلم بقى لازم تعزمينى عندك فيها:)
نورتينى ياجميلة واسعدنى تواجدك



*********************************


المهاجر إلى الله
ـــــــــــــــ
وعليكم السلام ورحمة الله وبركاته
أهلا بيك يافندم
أنا الحمدلله بخير أشكرك جدا لسؤالك

:) عجبتنى الجملة دى"اذا كانت الحاجةام الاختراع فالحلم ابوه"
:) اطمن مش هتريق لانى انا كمان حلمت الحلم ده بس مش عشان استكشف حاجة ولكن عشان اجرب كثافة الهواء وانعدام الجاذبية وانا لابسة البدلة الغريبة اللى لونها فضى

اما عن اختياراتك للحيوانات ونظرتك ففيها قوة وشموخ غير عادى أحييك عليها
أشكرك جدا لمشاركتك



***********************************


الشجرة الام
ــــــــــ
أختى الحبيبة:اهلا اهلا بالقمر
:) كل البنات تقريبا حلمت نفس الحلم
وجهة نظرك تجاه الحيوانات تحترم جدا
نورتينى ياجميلة واسعدنى تواجدك