الثلاثاء، 17 نوفمبر، 2009

مسئولية الأم

لمن تعتقد بأن الأمومة مجرد حمل وولادة ورضاعة فقط.
لا يا عزيزتى فالأمومة أكبر من ذلك بكثير وعليكِ أن تعيدى ترتيب هذا المفهوم بداخلك حيث أن هذه المهام تقتصر على أى والدة من الكائنات الحية.فالحيونات تلد والطيور والزواحف تبيض وهذا يعنى إنكِ لستِ وحدك التى تقوم بهذا الفعل.
ولكن الفرق هنا فيما بعد الولادة هل ستظلين والدة فقط أم سترتقى لكونك أُم.
ودعينا نتفق على أن ليست كل الوالدات أمهات.
فالأمومة الحقة تحتاج إلى بعض الأفعال.
* اعطيهم الحب والحنان وأن تتقى الله فيهم ولازميهم فى طفولتهم دائماً.
* لا تتركيهم لأحد مهما كان إلا لأسباب عندك قهرية محدش هيخاف عليهم أكتر منك ولا حد أحق بتربيتهم غيرك فهم أبنائك أنتِ يعنى أنتِ أولى بيهم من أى شخص تانى.
يعنى مثلاً ما ينفعش تتركيهم عند حد بحِجة أنك هتذهبى المسجد سواء بقى هتصلى أو هتسمعى درس وبالمقابل مش هينفع تاخديهم معاكِ إحتراماً لجلال المكان وقدسيته يبقى الأفضل أنك تفضلى قاعدة معاهم. وأيضاً لو هتزورى حد ومش هينفع تاخديهم معاكِ منعاً لمضايقة من ستكونين عندهم بشقاوة أو نكد من جانب طفلك يبقى الأفضل برضه ماتروحيش وهذا ينطبق على الأفراح وجلسات السمر والخروج غير المبرر واللى ممكن تستغنى أو تعتذرى عنه. وحذار ترك ابنك عند حد وهو مريض مهما كان عذرك .أى مشوار فى الدنيا يتأجل أو يتلغى طالما أن ابنك مريض. لأن متوقعة مين هياخد باله منه إذا كنتى أنتِ ماهتمتيش به وخرجتى!!. ولو كان ابنك حتى كويس وكبر شوية تضمنى منين اللى قاعد معاهم انهم مش هيضربوه أو حتى يتحرشوا بيه أو يعطوه ثقافات رديئة أو سلبية.
الخلاصة أنتِ أولى برعايته وهو أولى باهتمامك.
* طفلك بيتعرف على العالم من خلالك فإذا لم يجدك فمن سيُعرفه على هذا العالم. مَن أولى بحضنك ورعايتك ووقتك سواه.
* ضعى ابنك دايماً فى كفة وسبب بُعدك عنه فى كفة تانية وشوفى كفة مين اللى هترجح.
* لا تلقيه فى دار حضانة وهو رضيع بحِجة عملك فمهما كانت درجة وظيفتك مش هتكون أهم من ابنك.
وتخيلى حالك لو تركك فى دار المسنين عند الكبر نظراً لانشغاله عنك.
وبعدين من أين تضمنين من ستتركيه عندهم سواء أقارب أو جيران أوحتى دادة!!.
- على فكرة شغلك مش هيقف لو خدتى أجازة أو حتى قدمتى استقالتك-.
* اعتبرى طفلك كحجابك لا تستطيعين تركه مهما حدث.
واسألى نفسك هل ممكن تتركى موبايلك أو شنطة يدك عند حد مهما كان!! تأكدى أن ابنك أهم بكثير.
وحتى لو كان معاكِ فى خروجة مثلاً إيدك فى إيده طول الوقت مايغيبش عنك لحظة واحدة. واعرفى أن الحوادث على إختلاف أنواعها بتتم فى لمح البصر. وطبيعى لو ماشية فى الشارع هيكون هو بعيد عن السيارات.
*قبل أن تفكرى فى الإنجاب من أجل التقليد الأعمى ومبدأ إشمعنى إسألى نفسك هل أنتِ مؤهلة نفسياً وجسدياً لأن تصبحى أم؟
هل أنتِ مستعدة للتنازل عن كل شئ من وقت وراحة ونوم وخروج وتبادل الزيارت بكثرة وما إلى ذلك من أجل طفلك؟
كونى صريحة مع نفسك وعلى أساس إجابتك افعلى.
* اعلمى بأن طفلك أمانة وأنتِ مسئولة عنها شئتِ أم أبيتِ. فقد يكون طريقك إلى الجنة وقد يكون طريقك إلى جهنم فاحذرى.
* اعطيه من حبك وحنانك ولا تبخلى عليه حتى تجدى هذا عند الكبر منه تجاهك.
* لا تجعليه يستبدلك داخلياً بأخرى مهما كانت.مُتخيلة إيه لو كنتى بتجعلى واحدة تانية هى اللى تأكله وتغيرله وتسرح له شعره وتدلعه وتلعب معاه وما إلى ذلك تفتكرى وقتها هيعرفك أنتِ منين أو هيرتبط بيكِ نفسياً إزاى!.
* كونى له أماً بالمعنى المفهوم . وتعلمى من عالم الحيوان فهم أيضاً يلدون ولكنهم أمهات على حق.
****
سؤال جانبى
ــــــــــــــــــــــــ
# أذكر موقف قلت فيه بأن هذه المرأة لا تصلح أن تكون أم؟.
وبالمقابل أذكر موقف لشخصية تستحق عن جدارة لقب الأم المثالية؟.

أدعوكم لقراءة هذا الموضوع حنان أُم ففيه نصائح لمن تقوم بفعل النقيض ولكن بطريقة مبالغ فيها.
عزيزتى الأم خير الأمور الوسط.
********
على الهامش
ــــــــــــــــــــ
أدعوكم لتحفيز الهمة من خلال قراءة هذا الموضوع هلموا للإستعداد لخير أيام
وأسألكم الدعاء بأن ينصرنى الله على من ظلمونى.

هناك 33 تعليقًا:

فاتيما يقول...

مون مون
باحك نور و خير يا حبيبتى
كل نصايحك أبصم عليها بالعشرة
و احييكى عليها
الطفل من ولادته لحد ما يدخل المدرسة المفروض ميغبش عن نظر امه لأى سبب كان الا لما يكون مع حد مؤتمن زى الجدة
او الأب و لفترات قليلة كمان
و مش كتير لأن محدش هيراعاه زى الام
بعض الستات بتتصور إن المسئوليات دى سخيفة و رذلة و بتتمنى لو حد يشيلها عنها من المقرين او حتى البعاد زى الدادة و الشغالة
بس بتبقى عبيطة و الله
و بتفوت على نفسها فرصة و وقت لن يعوض فى القرب من ابنها
بخصوص سؤالينك اللى ف الآخر دول
انا ساعات بحس ف نفسى
انى مش ام تمام و كويسة بسبب سوء اختيارى و ما نتج عنه و ربنا يسامحنى بقى
و بسبب موقفى هذا و نظرة بعض الناس ليا انى ام مقصرة و عادة ميكونوش عارفين كل التفاصيل بس الشكل العام ام و رمت ابنها لطليقها و عايشة حياتها عادى ...و كدا
بناء على هذا الموقف
مبقتش احكم على اى ام مهما عملت بحكم مطلق غير لما اسمع دفاعها الاول
يعنى مثلا فاكرة
الست اللى رمت ابنها من بير سلم مجمع التحرير و الولد نده عليها و نزل صاحى ..انا عذرتها و الله
لأنها اتلطمت بيه على المحاكم عشان تجيبله نفقة و ابوها مات و كان سند ليها و رايحة الشئون الاجتماعية تقولهم خدوه عندكو يمكن يلاقى اكل و شرب و لبس ..لأن مبقاش معاها و ابو الولد نطع أصلى وارد أستراليا
و طلعت بتتعالج نفسياً من جراء قسوة الدنيا عليها و محدش جنبها ...
انا عذرتها ...لأنى فى عز ازمتى
كنت بدعى على يوسف ربنا ياخده عنده لأن فوق فى الجنة مفيش ظلم
و لا حد ممكن يأذيه ...
ساعات الواحد بيبقاله مبررات غريبة و عجيبة للى بيمر بيه
و بناء عليه مقدرش احكم على اى ام بأنها لا تستحق ....
الام المثالية بقى !!!

اكيد أمى طبعا ..
كفاية اللى شافته بسببى يعنى
و رعايتها لبابا 8 سنوات مقعد فى سريره مبيتحركش
و مشاكلى بجانب ذلك ...هى اعظم ام طبعاااااا
بحبك يا مون مونتى قوى
بوسة و حضونة يا حبيبتى
و موضوعاتك حنونة زيك تمام

MOHAMMED ELBANNA يقول...

أمة الله
كالعادة متميزة
وفعلاً الام هي مدرسة للأبناء .
تقبلي مروري
وأسأل الله ان ينصرك على من ظلمك .
محمد البنا
طريق النجاح

الزنارى يقول...

الأم مدرسة ان أعددتها
أعددت شعبا طيب الأعراق



و هل كنت الجنة تحت أقدام الأمهات من قليل
أحييك على الموضوع
مع خالص الاحترام و اللتقدير
أحمد الزنارى

حـــــدوتـــــة يقول...

السلام عليكم

اختى الكريمة اخبارك ايه
مواضيعك دائما تدعو الى الخير
بارك الله فيكى وجزاكى خيرا

تأكيدا لما قولتيه قال تعال

وَقُلْ رَبِّي ارْحَمْهُمَا كَمَا رَبَّيَانِي صَغِيرًا

وقد سمعت من الشيخ الشعراوى رحمه الله ان الله عز وجل جاء بكلمة كما ربيانى صغيرا كشرط لرحمة الله
بمعنى ان الابن يبر امه ويدعو لها بالرحمة بشرط ان تكون ربته وهو صغير واحسنت تربيته كما ذكرتى وليس ولادته فقط

سلالالالالالالالالالالالالالالالالالالالام

المجاهد الصغير يقول...

السلام عليكم
جزاكم الله خيرا
نصائح جميله
سبحان الله انا ولت ابنى وانا فى الدراسه فكانت ماما تيجى تقعد بيه فى البيت عقبال ماروح التدريب وكان تدريبى فى حضانه كنت بقلق عليه اوى مع انه مع امى وبضعه جوه عنيها فى المقابل ام تأتى ببنتها الحضانه والله ما كنتش اعرف انها بنت من شعرها المنكوش ولا حته توكه ولبس خفيف ومفيش غيار حسبنا الله ونعم الوكيل معاكى حق مش من ولدت تبقى ام
طولت عليكى
جعله الله فى ميزان حسناتك
ويبقى التواصل

د. ياسر عمر عبد الفتاح يقول...

جزاكِ الله خيراً
موضوع قيم جداً

حلم بيعافر يقول...

كلامك صح جدا
الامومة مش حمل بس
والمواقف اللى بتبين الاهمال كتير زى مثلا واحدة تخلف م الحرام وترمى ف الشارع دى متستحقش تبقى ام ف يوم م الايام والمواقف المشرفة كتير برضه واكتر من الحصر
تقبلى مرورى

الشجرة الأم يقول...

موضوع أكثر من رائع جعله الله في ميزان حسناتك ونفع الله بك الأمة الإسلامية العربية.

إحساس وغريزة الأمومة عظيمة جدا لدرجة أنه ورد في أقوال السلف (الجنة تحت أقدام الأمهات).

موناليزا يقول...

فاتيما
ـــــــــ
أختى الحبيبة:أهلا اهلا بأم يوسف الغالية
إيه المفاجأة الجميلة دى:)
ربنا يجعل ايامك كلها خير وسعادة ياحبيبة قلبى

ده المفروض فعلا لكن بتقولى لمين! زى ماقلتى كتير بيقتكروا انها مسئولية بايخة ومايعرفوش ان ده ألذ وقت ممكن يقضوه فى حياتهم
تعرفى كنت بستغرب جدا لما كنت بشتغل ان فيه امهات مش عايزين يبقى فيه يوم اجازة للطفل عشان يرتاحوا منهم وفى نفس الوقت انا اللى يادوب بالنسبة للاطفال مُدرسة ببقى مفتقدة الاطفال جدا فى يوم الاجازة!

بقى معقول بتعتبرى نفسك أم مش كويسة رغم كل اللى انتِ فيه!!
أمال الامهات اللى ماعندهمش اى مشاكل من اى نوع ومع ذلك قمة الاستهتار واللامبالة تجاه ولادهم يقولوا على نفسهم ايه
يابنتى ده فيه أمهات ميعرفوش اغنية ابنهم المفضلة وهما عايشين مع بعض فى بيت واحد!
بأمانة بجد وقتها ببقى عايزاهم يدخلوا مدونة يوسف يمكن يعرفوا الامهات بتتعامل مع اولادهم ازاى

انا فاهماكِ والله وحاسة بيكِ جدا انا نفسى اوقات كتير بشكر ربنا ان بنتى ماتت بس عزائنا زى ماقلتى اننا اسأنا الاختيار
اوقات كتير لما بحس بالذنب تجاه نفسى بقوله يارب سامحنى مكنتش اعرف انه كده
بس الحمدلله قدر الله وماشاء فعل
والمؤمن مصاب
ربنا يخليلك ست الحبايب ويباركلك فى عمرها وتفرح بيكِ يارب وبعودة يوسف لحضنك اللهم امين
:) اجمل بوسة وحضن من أحن قلب وأجمل أم فى عالم التدوين كله
بحبك جدا ياطماطم وماتتخيليش سعادتى بوجودك عندى قد ايه
نورتينى غاليتى وفى انتظارك دائما



*******************************


محمد البنا
ـــــــــــ
أهلا بيك استاذ محمد
ربنا يكرمك يارب فماتوفيقى الا بالله
مرورك يسعدنى دائما
ايوة كده الله يخليك ادعيلى دايما
أشكرك جدا لتعليقك



******************************


الزنارى
ـــــــــــ
أهلا بيك استاذ احمد
عندك حق
أشكرك جدا لرايك ولتعليقك
دمت طيبا ولمدونتى زائرا

*********************************



حدوتة
ـــــــ
وعليكم السلام ورحمة الله وبركاته
أهلا بيك يافندم بعد طول غياب
أنا الحمدلله بخير اشكرك جدا لسؤالك
ربنا يعزك يارب فماتوفيقى الا بالله
الله عليك
استشهاد قوى جدا ومفيد جدا جدا
أشكرك جدا لرايك ولتعليقك



**********************************


المجاهد الصغير
ـــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
ربنا يكرمك اشكرك جدا لرايك
طولتى ايه بس!! انا سعيدة جدا بمشاركتك
نورتينى حبيبتى وفى انتظارك دايما


*********************************


د.ياسر عبدالفتاح
ـــــــــــــــــــــ
اهلا بيك يادكتور
ربنا يكرمك
اشكرك جدا لريك
دمت طيبا ولمدونتى زائرا



*********************************


حلم بيعافر
ـــــــــــــ
اهلا بيك يافندم
اشكرك جدا لرايك ولمشاركتك
يسعدنى مرورك دائما



********************************


الشجرة الام
ـــــــــــــ
اختى الحبيبة:اهلا اهلا بالقمر
ربنا يكرمك يارب اشكرك جدا لرايك فماتوفيقى الا بالله
طبعا فغريزة الامومة تانى غريزة عند المرأة
نورتينى حبيبتى واسعدنى تواجدك

ماء تشرين يقول...

انا معاكى جدا بس ياعنى بعد ما الاولاد يروحو كلا لطريقه ويكون اسرته هيبقه ايه للام الفجأه هتحس انو هى ضيعت حياتها على الاولاد دول فهما من حقها وتبدأ تتدخل في حياتهم ويمكن تخربها لازم يكون في توازن واعتقد انو العمل بيعمل التوازن ده ده راى ياريت اعرف ردك

فرسان على مر الزمان يقول...

الأمومة هى عطف وحنان
وكما قال الشاعر
الأم مدرسة إذا أعدتها
أعدت شعباً طيب الأعراق
وقال الله تعالى فى كتابه العزيز :
وَقُلْ رَبِّي ارْحَمْهُمَا كَمَا رَبَّيَانِي صَغِيرًا
صدق الله العظيم
وموضوعك هادف ورائع وأحسنتِ الإختيار
وأتمنى زيارة مدونتى فرسان على مر الزمان على الرابط التالى
http://fairsan.blogspot.com/
تحياتى
ويبقى التواصل

rovy يقول...

ازيك يا حبيبتى
وحشانى و عارفه انى وحشه جداا و مقصره فى حقك بس و الله غصب عنى انتى لسه بتقولى فى البوست ان الامومه مسؤليه و مع دخول الشتاء مريم بتحتاج رعاية مكثفة لأنها ضعيفة و كمان عندها حساسية فى صدرها و بوديها المدرسه يوم و عشرين لا خايفة عليها من قلق اليومين دول ..
كمان البنات فى فترة امتحانات و دخولى على النت بيكون خطف و مش بأقدر اعلق على البوستات لانى مش عارفه اركز ..فبجد سامحينى .. البوست رائع و فعلا انا باستغرب من الامهات اللى بيقولوا ان قلبهم جامد و بيقدروا يسيبوا اولادهم مع اى حد والله العظيم لما كنت بأضطر اسيب حد من بناتى لماما لأى سبب كنت باكون زى المجنونه و كل شويه اكلمها و قررت انهم يكونوا معايا حتى لو حأتعب مش مهم المجهود الجسدى اهون كثير من المجهود النفسى ..
عاوزه كمان احييكى جدا على البوست اللى فات بجد هايل جداا و عجبنى قوى تحرر البطله من قيود مرضها و طبيبها الزائف ايضا .. تسلمى حبيبتى و يسلم ابداعك و اوعدينى ما تزعليش منى لو غبت عنك و تعذرينى و تأكدى انك بجد فى بالى و دايما بأدعيلك
احنا داخلين من بكره على ايام مباركه و صيام من غدا ان شاء الله اوعدك انى ادعيلك مع دعوات الصيام ان ربنا ينصرك ياارب على من ظلمك ويرزقك كل السعاده و ياريت ما تنسنيش من دعاكى انا و البنات .. ربنا يكرمك من واسع كرمه و رحمته و ينصرك نصرا قويا ياارب
احبك فى الله

KHALED يقول...

ربنا ينصرك دائماً و يعزك
لما تحملية فى نفسك من نقاء

أخوكى الكبير خالد

salma mohamed يقول...

تشكري يا موني اللذيذه العزيزه,
موضوع مهم جدا خصوصا في عصرنا اللي تخلت فيه كتير من الامهات عن دورها كام بحجة ظروف العصر ومتغيراته وتطوراته؟!!
الام اللي استغربت ازاي هي ام
واحده اعرفها كانت عامله لبنتها وهي في شهورها الاولى غرفه خاصه ومش بتنيم بنتها معاها ومركبه جهاز بيرن في غرفتها عند بكاء الطفله؟!!
استغربت ازاي يجيبها قلبها وبنتها ضناها الرضيعه نايمه بعيد عن حضنها؟
ازاي البنت تحس بروح امها وحبها وهي مش في حضنها؟
اما الام المثاليه في نظري هي ماما الله يرحمها
واظن ان اغلبنا هيشوف امه هي الام المثاليه ولا ايه؟ (:

الأحــــــ إيناس ــــــزان يقول...

بصى حبيبتى احترمك وارفع راية التقدير لكى
فقليل فى هذه الايام من يعلم معنى السطور ويفهم اعماق الحقيقه

وموضوعك رائع
فواصنا ديننا وربنا ونبينا بأن كلنا راع وكلنا مسؤل عن رعيته

فهذه امانه ورساله ليس فقط لأى ام ولا اب ولكن لاى شخص موضع مسؤليه اى فرد
وضعه القدر فى دور الواجب سواء الخال او العم او المؤسسات الاجتماعيه او دار الايتام
فنحن صفحة بيضاء شابها للأسف الهروب من الضمير اذا كلنا قمنا بواجبنا وراعانا ضمايرنا وعلمنا اننا سوف نحاسب على كل شىء حتى الحيوان الذى نأذيه بالشارع حينها فقط سوف تفهم الام معنى الامومه والاب والاخ وغيرهم

اتمنى من الله صاحب الرحمه ان ينصرك على من ظلمك و عاداك واعلمى ان ربك فوق كل كبير فوق كل ظالم فوق كل هم وناصرك ان شاء الله

جزاكى الله خير على ماخطت يدك واعلمى ان الشخص فان والمبدأ باق فسوف تشهد عليكى مادونت اناملك ووخطت سطورك

مودتى غاليتى إيناس

ليس فقيرا من يحب يقول...

السلام عليكم

ازيك يا حبيبتى ربنا يسعدك وينصرك

على كل اللى ظلموكى

البوست قيم جدا

امهات كتير محتاجه تقرى البوست ده

مفكرين ان الرعايه هيا انك تأكلى

وتلبسى الامومه مسئوليه عظيمه

مش اى حد جدير بيها

ياااااااه مواقف كتير تخليكى تقولى الام

دى متستحقش تكون ام زى امهات اخر

زمن اللى بيرموا عيالهم للشارع

يربيهم

وامهات كتير اوى تستحق لقب ام مثاليه

عن جدارة واهمهم ام ارمله جوزها اتوفى

وهيا فى عز شبابها وسابلها ولاد قعدت

عليهم تربيهم احسن تربيه وتعلمهم

احسن تعليم ونسيت نفسها

او ام انفصلت عن راجل ندل رمى عياله

وكافحت وعانت لوحدها علشان تربيهم

ياااااااااااااااااااه الدنيا

مليانه يا حبيبتى من ده ومن ده

تحياتى ليكى

Mr.Hazem يقول...

رااااائعه ما شاءا لله عليكي
بجد حتى كلماتك تجذب القارئ
موضوعك هااام جداً وبيمس اطفالنا جميعاً , وتوعوي للأمهات
يسلموا دياتك وبجد مدونتك رائعه
ارق نسمة

كلمات من نور يقول...

** موقف قلت فيه بأن هذه المرأة لا تصلح أن تكون أم؟
أم انفصلت عن زوجها وتزوج زوجها بأخرى فما كان منها إلا أن ألقت بابنتها الصغيرة البالغة من العمر ثلاث سنوات عند بيت جدتها للزوج بحجة :تزوج بأخرى و أنجب إذن يربي ابنته...وذهبت الأم بعيدا وظلت الفتاة مرفوضة من الجميع تذهب من هذا البيت لهذا البيت ...
وبالمقابل أذكر موقف لشخصية تستحق عن جدارة لقب الأم المثالية؟

أم يتزوج زوجها عدة مرات وفي كل مرة تتحمل من أجل أبنائها وبعد سنوات تأتي إحدى زوجاته بطفل رضيع يبلغ من العمر عام وتلقيه للزوجة الأم بحجة أنها تريد الزواج بأخر ولا تستطيع تربية ابنها مع زوج أخر ..تحتمل الزوجة الأم الصدمات وتضم الابن لحضنها وتمر السنوات وهاهوذا الطفل يصبح شابا ويقول لزوجة أبيه ماما بل و أنه يجلس عند أقدامها عند مرضها باكيل يتوسلها أن تشفى من أجله و إذا ما ذهبت إلى إحدى بناتها يذهب إليها سائلا : مش حترجعي البيت بقى يا ماما...على رأي جدتي الأم مش اللي أنجبت ..الأم اللي ربت

haninalnada يقول...

موضوع جميل يا موناليزا
الام بحر من العطاء بلا حدود
تسلم ايدك
بالتوفيق دايما

موناليزا يقول...

ماءتشرين
ـــــــــ
أختى الحبيبة:اهلا اهلا بالقمر
انا معاكِ ان فراغ الام واهتمامها الزائد بابنائها ممكن يلخبط حياتهم بس ده مش مبرر ابدا لتركها لهم وهم مازالوا لا يعتمدون سوى عليها
يعنى هى ممكن جدا تاخد اجازة من شغلها لفترة لا تقل عن سنتين او تلاتة كمان بعد الولادة لتتفرغ لهم تماما
نورتينى حبيبتى واسعدنى تواجدك



*********************************


فرسان على مر الزمان
ــــــــــــــــــــــ
أهلا بيك يافندم فى زيارتك الاولى
أشكرك جدا لرايك ولتعليقك
نزرت مدونتى وارجو دوام التواصل



*********************************



روفى
ـــــــ
أختى الحبيبة:اهلا اهلا بالغالية
أنا الحمدلله بخير أزيك انتِ ياحبيبتى وحشاانى جدا والله وعايزة اطمن عليكِ
:) عذراكِ ياحبيبتى بس أنتِ بتوحشينى
ياحبيبتى ربنا يخليكِ ليهم يارب وتفرحى بيهم ويباركلك فيهم يارب
الف سلامة على مريومة الجميلة بعيد الشر عنها
مقدرش ازعل منك أصلاً أنتِ حبيبتى يا روفى:)

أشكرك جدا على رأيك فى تدوينتى السابقة

:) تعرفى انى فاكراكِ جدا اول مابقرأ حاجة عن فضل العشرة الاوائل من ذى الحجة بفتكر كلامك ليا السنة اللى فاتت وبدعيلك وقتها
ربنا يحفظلك بناتك يارب وينجيهم من كل شر ويفرحك بيهم ويخليكى ليهم ياحبيبة قلبى
أهى الدعوات دى عندى بجد تساوى كنوز الدنيا كلها:)
ماتحرمش منك أبدا ودمتِ لى أختا غالية وقلبا حنونا صادقا
نورتينى غاليتى واسعدنى تواجدك




*********************************



خالد
ــــــــ
أهلا بيك استاذ خالد بعد طول غياب
:) أسعدنى تعليقك جدا
خالص دعواتى لك بالتوفيق والخير والعِزة أينما كنت


********************************


سلمى محمد
ـــــــــ
أختى الحبيبة:اهلا اهلا بالقمر
اشكرك جدا لرايك
:) ضحكتينى بجد على اللى واضعة جرس يرن لو بنتها عيطت
ركبته ازاى!! :)
على العكس بقى انا اعرف واحدة كانت بتحس ببكاء ابنها حتى لو مش معاه فى نفس الشقة بجد سبحان الله
ربنا يرحم مامتك انا عن نفسى حبيتها جدا فى الله
ومش كل الناس للاسف بيظنوا ان امهم هى الام المثالية فانا مازلت اتذكر زميلة فى نفس الفصل وكنا فى اولى اعدادى وكانت بتشتم مامتها وبتدعى عليها كمان ومش فاكرة مامتها كانت عملت فيها ايه بس اللى انا فاكراه انى رديت عليها وقتها بان ده مش سبب انك تدعى على مامتك!!
نورتينى سلومتى الجميلة واسعدنى تواجدك



*******************************


أحزان ايناس
ـــــــــــــ
أختى الحبيبة:اهلا اهلا بالقمر
بعد كلامك وتعليقك الجميل ده بجد مش عارفة أقول ايه:)
دايما بتحرجينى بذوقك وكرم اخلاقك
أشكرك جدا على رأيك وأحييكِ على كل ماقلتى
نورتينى حبيبتى الجميلة واسعدنى تواجدك



*********************************


ليس فقيرا من يحب
ــــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك ياحبيبتى ويتقبل جعائك ويرزقك بكل الخير اللهم امين
أشكرك جدا لرايك ولمشاركتك القيمة
دمتِ لى أختا وصديقة وفية
نورتينى ياجميلة واسعدنى تواجدك



**********************************


مستر/ حازم
ـــــــــــ
أهلا بيك استاذ حازم
ربنا يكرمك يارب فماتوفيقى الا بالله
اشكرك جدا لرايك ويسعدنى تواجدك



*********************************


كلمات من نور
ــــــــــــ
أختى الحبيبة:اهلا اهلا بالغالية
دائما انتظر مشاركتك فهى ثرية حقاً
أشكرك جدا لوجودك فى حياتى
نورتينى حبيبتى واسعدنى تواجدك



**********************************


حنين الندى
ـــــــــــ
أختى الحبيبة:اهلا بيكِ فى زيارتك الاولى
أشكرك جدا لرايك ولتعليقك
نورتى مدونتى وفى انتظارك دائما

ريمان يقول...

السلام عليكم


وحشانى يا قمر


حلو اوى الموضوع وجميل اوى توضيحك لمفهوم الامومه الحقيقى

Dr Ibrahim يقول...

فعلا عند حضرتك حق
هناك فرق بين الوالدة والأم
فالوالدة تلد والأن هى من ترعى وتحافظ على أبنائها وتربيهم وتنمى فيهم القيم والأخلاق فعليها مسئولية كبيرة
وكما قال الشاعر حافظ إبراهيم

الأُمُّ مَـدْرَسَــةٌ إِذَا أَعْـدَدْتَـهَـا
أَعْـدَدْتَ شَعْبـاً طَيِّـبَ الأَعْـرَاقِ
الأُمُّ رَوْضٌ إِنْ تَـعَهَّـدَهُ الحَـيَــا
بِـالـرِّيِّ أَوْرَقَ أَيَّـمَـا إِيْــرَاقِ
الأُمُّ أُسْـتَـاذُ الأَسَـاتِـذَةِ الأُلَـى
شَغَلَـتْ مَـآثِرُهُمْ مَـدَى الآفَـاقِ

تحياتى

موناليزا يقول...

ريمان
ـــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
اشكرك جدا لتعليقك
نورتينى ريمو الجميلة واسعدنى تواجدك




**********************************




د/ ابراهيم
ــــــــــ
أهلا بيك يادكتور
أشكرك جدا لتعليقك
دمت طيبا ولمدونتى زائرا

mohamed ghalia يقول...

بجد ياريت كل الأمهات يقرأو موضوعك ده
ربنا يسعدك دايما

Heba Faruq يقول...

موضوع جميل ومهم
أنا شخصيا أعرف بنات كل
مفهومهم عن الأمومة أنهم
حيجيبوا طفل زي العروسة
بتاعتهم وهم صغيرين
يعني عروسة حيلعبوا بيها

لكن برضه مينفعش ننسى ان
فيه امهات كثيرات يضطررن للنزول
للعمل لظروفهم الاقتصادية الصعبة
كما ان فيهم أرامل ومطلقات ليس لهم أي عائل فيجب أن نقدر لهم عدم تخليهم عن اطفالهم وكفاحهم في الحياة من أجلهم

اقصوصه يقول...

نصائح قيمه ومفيده

جزيت خيرا عليها

موناليزا يقول...

محمد غالية
ــــــــــ
أهلا بيك استاذ محمد
أنا أيضاَ أرجو هذا:)
ربنا يتقبل دعائك لى ويرزقك مثله اللهم امين
أشكرك جدا لتواجدك



********************************


هبة فاروق
ــــــــــــ
أختى الحبيبة:اهلا اهلا بالقمر
أشكرك جدا لرايك
وفعلا يوجد الصنفين
ولا نستطيع أبدا أن ننكر فضل الأم التى تقوم بدور الأم والأب معاً
نورتينى هبة الجميلة واسعدنى تواجدك




***********************************




أقصوصة
ـــــــــ
أختى الحبيبة: اهلا اهلا بالقمر
ربنا يكرمك اشكرك جدا لرايك
نورتينى ياجميلة واسعدنى تواجدك

طوبه فضه وطوبه دهب يقول...

حقا الامومه هى اعظم كلمه ولها حقوق وواجبات فليست مجرد تقليد اعمى او انجاب من اجل الانجاب ولكنها مسئوليه وتحتم على الام ان تتحملها منذ اول لحظه وحقا الام اللى ما تستحقش انها تكون ام هى ام ماشيه وسايبه ايد ولادها وسيباهم عرضه للحوادث وخصوصا الطبقه المتدنيه ثقافيا من الباعه واولاد البوابين بجد مأساه وما بحسش انهم امهات بالعكس مجرد كلمه وليست احساس وشعور تسلم ايدك ياقمر

mahasen saber يقول...

كلامك عين العقل يا مونا يا حبيبتى وكل كلمه حاسيتها خارجه من قلبك

ربنا يكرمك وبرزقك بكل الخير

وربنا ينصرك على من عاداكى وان شاء الله هينصرك قريب

المشوار طويل بس ربنا بيرد الحق لصاحبه ولو بعد حين

mahasen saber يقول...

اما سؤالك الاخير فأكيد كلنا بنشوف امهاتنا الامهات المثاليات

انا عن نفسى شايفه امى كدا يكفى اليى بتعمله عشان ابنى وعشانى وحبها المفرط ليا ولاخواتى ولابنى

ربنا يكتبها ووالدى من اصحاب الجنه
وكل امهات وابهات الجميع

موناليزا يقول...

طوبة فضة وطوبة ذهب
ــــــــــــــــــ
أختى الحبيبة:اهلا اهلا بالقمر
عندك حق فى كل كلامك
أشكرك جدا لرايك
نورتينى ياجميلة واسعدنى تواجدك




**********************************




محاسن صابر
ــــــــــ
أختى الحبيبة:اهلا اهلا بالغالية
وحشااانى جدا ياحبيبتى

من اللى بشوفه قدامى من استهتار الامهات كان لازم اتكلم

ايوة كده ياسونا الله يخليكى ادعيلى دايما وخصوصا اليومين دول
ربنا كبير وكريم اوى وانا واثقة فيه وعارفه انه مش هيخذلنى

ياحبيبتى ربنا يخليهالك ويفرحها بيكِ دايما
ويباركلك فى بيرو ويخليكى ليه
نورتينى سونا الجميلة واسعدنى تواجدك جدا

حاول تفتكرنى يقول...

لا اعرف كيف سأعلق علي وضوع كهذا ، فالموضوع له قيمة كبيرة وتناوله ليس كسابق التناول للموضوعات الهامة التي تعودنا عليها ، طبعا لأ اقصد بالمرة التهوين من التناول ، لكن اقصد ان هناك مناطق كثيرة لم تعطها الاهتمام الذي تعودناه عندما نقرا لك ونشفق عليك ونغار منك فى آن واحد للمجهود الكبير والسرد الخارج المنافسة فى كل ما نراه هنا

الأمومة
عندما تحدث الغرب عن الفروق بين الجنسين من الناحية البيولوجية ، قالوا ان لا فروق ابدا بيولوجية بين الجنسين غير عملية الحمل ، حتي الامومة مكتسبة ، يستطيع الرجل ممارستها اذا اعتاد عليها ، ساعود لهذه النقطة مرة اخري

ان الهدف لأي بنت على وجه الأرض - ولن اتكلم عن الاناث فى المطلق اي كان النوع - ليس الحب ، فالحب تتداول عليه الاحوال كالليل والنهار ، وليس الزواج ، فالزواج كذلك يتنقل بين برودة الشتاء وحرارة الصيف ولا الاستقرار ولا اي شىء ، انما هدفها الاسمي أن تكون أم ، وربة منزل ، وربة جيل ، ايا كان مستواها الثقافي ، الاجتماعي ن الاقتصادي ، الفكري ، فالامومة هو اول الالويات واغلي الامنيات وانقي الاحلام لديها وتلك هي النقطة الثانية

عندما اكتشف العالم خطا نظرية الجندر ( النوع الاجتماعي ) كما فى النقطة الاولي ، وتأكد - كما أكد الإسلام - الفروق البيولجية العديدة بين الجنسين بما يتوافق مع وظيفة كل كائن ، كناحية عامة وما نتأكد منه فى النقطة الثانية ككجانب خاص ، وجدتي اتحفظ على العبارة الواردة فى المقال : ودعينا نتفق على أن ليست كل الوالدات أمهات.

ووجدتي اذهب إلى ابعد من ذلك
ربما كانت الامومة تتعلق بالانثي ولو لم تلد ، ربما خلقها خالقها أما وهي لم تبرح رحم امها ، ولو لم يرزقها بطعم الأمومة الفعلي
أما مسؤليات الأمومة فقد يتنازل عنها البعض وهذا البعض جزء لا يذكر ، وربما لا نستطيع ان نراه تحت المجهر العادي ايضا فى بحر الامومة اللامتناهي

للأسف الأمومة هذا الأحساس الذى نفقده كرجال مهما تعلقنا بأبنائنا ، وما سنعجز عن وصفه مهما وصلت درجة البلاغة فينا

ندعو لك بالخير دائما ، ومن ظلمك يكفيه دعاؤك وحدك

اشكرك بشدة
تحياتي

موناليزا يقول...

حاول تفتكرنى
ــــــــــــــــــ
أهلا بيك يافندم
أحترم رأيك جداً ولكنى أردت توجيه الكلام هنا لفئة بعينها
أشكرك جدا لمشاركتك ولتواجدك