الثلاثاء، 1 ديسمبر 2009

جوجو وزمردة (12)

كان "جوجو" يستعد للذهاب إلى درسه الخصوصى إلى أن لمحته شقيقته "زمردة" وهو يرتدى حذائه فقالت له:
- إيه ده أنت لابس شرابى وكمان واخد قلمى؟.
- أيوة, شراباتى فى الغسيل وقلمى خلص.
قالت بغضب واضح- إزاى تفتح دولابى أصلاً من غير ما تقولى وتستأذن منى.
رد عليها باستهتار- عادى يعنى إحنا أخوات.
- ده مش مبرر. دى حاجتى وكان المفروض تستأذنى.
- أنتِ عاملاها مشكلة ليه؟.
- لأنك أخذت حاجتى بدون إذنى.
- يعنى لو كنت إستأذنتك كنتِ وافقتى؟.
تلعثمت قائلة:- كان ممكن.
- خلاص ياستى اعتبرينى أستأذنتك وأنتِ وافقتى.
- بس ده ماحصلش. أنا بعد كده هقفل دولابى وآخد المفتاح معايا.
- خلاص ياستى ماحصلش حاجة. سلام بقى عشان أنا أتأخرت.
تركها وانصرف وظلت "زمردة" غاضبة. إلى أن عاد "جوجو" وأعاد إليها ماأخذه منها.
- تمت-.
--------------------------------
دعوة للمناقشة:
ــــــــــــــــــــــ
* هل "زمردة" ليها حق تغضب؟.
* هل تعرضت لمثل هذا الموقف سواء كنت مكان "جوجو" أو" زمردة" مع ذكره ؟.

هناك 46 تعليقًا:

الشجرة الأم يقول...

في الحقيقة لزمردة الحق في أن تغضب خصوصا أنها من النوع المحافظ وليس مستهتر كجوجو ..

ورغم أن أعاد جوجو لها ما أخذه منها بغير إذن فكان من المفروض أن يهيئ نفسه للخروج ويرتب اغراضه قبلها بفترة حتى يتعلم المسؤولية..

وقد تعرضت لهذا الموقوف وكنت مكان جوجو وأيضا بيني وبين أختي ونفس لكلمة قلتها نحن أخوات وما تفرق ..

فردت لي وقالت على عيني وعلى راسي لكن تخيلي الوضع لو كان المستعار زوجك وليس قلمك .. فهل تمانعين في إستعارته !!

Sonnet يقول...

السلام عليكم
أجازة العيد خلصت و القصص تتوالى
أعانك الله يا قمر

salma mohamed يقول...

حقيقي مش كل حاجه بتاعتي باعتبرها بالخصوصيه دي ومعظم حاجاتي مشاع لباقي الاسره,
ولو اني باعتبر ان المفروض الاستئذان في جميع الاحوال لانه من الذوق والادب وعن نفسي انا باعمل كده,
لكن بعض ممتلكاتي باعتبرها خصوصيه ومش بحب ان حد يفتحها او ياخدها او يطلع عليها من غير اذني وبزعل لما يحصل كده ولو انها احيانا ده بيحصل برضه (:

واحدة مفروسة يقول...

ااااااااااااااااااااااه
جيتيلى على الوجيعة
و شكلك حتفرسيني
بصي يا ستى انا مشكلتى الاذلية انى بستأذن على كل حاجة...كل حاجة
كل ما يمكن ان تتخيليه
و المشكلة انى بتبع نفس الاسلوب مع اهلى ,,مامتى و اخواتى و زوجي
و المشكلة انهم دايما يقولولى ايه يا بنتى مالوش لازمة الاستئذان...بس انا بستأذن لازلت
همه بقا...او بعضهم بقا مش بيستأذن و ديه مش بتعمل عندى مشكلة.خالص على فكرة...بس بحس ان كان حد حيفتح دولابي ولا درجي و ياخد حاجة...على الاقل يقولى طيب بعد لما ياخد..مش لازم قبل
بس من باب المعرفة يعنى
تحياتي
ههههههههه
انا دخلت المدونة م غير استئذان

alwani يقول...

من رأيي لها كل الحق أن تغضب ^^

أهم شيء أحب من الجميع أن يقدره هي خصوصياتي
ومسألة الإستعارة ذون أخذ إذن يخلق جو من الفوضى واللا مبالاة

مشكوووورة يا عزيزتي على مناقشاتك الإجتماعية المهمة

Tamer Nabil يقول...

هما اخوات صحيح

بس كان واجب علية اخواها يستأزن منها عشان تحس بوجودها وانة عامل ليها اعتبار وخايف على زعلها

ربنا يوفقك

مع خالص تحياتى

spiderman ( المدونه الإسلاميه ) يقول...

السلام عليكم

يااااااااااه
مشهد متكرر في حياتي اليوميه ^_^
مــــــع اخواتي
و في كل حاجه و خصوصا الملابس و الموبايل و اللاب توب
وكل حاجه
الموقف ده تاريخي معايا بيحصل على طووول

ده حاجه عاديه بتحصل في كل بيت

........

و فيها ايه لما نكون اخوات و نستأذن ؟؟؟

ادام الحاجه مش بتاعتك يبقي مينفعش تاخدها من غير استئذان

......

ياااااااه
دايما بتيجي على الجرح ^_^

تحياتي ليكي

spiderman ( المدونه الإسلاميه ) يقول...

نسيت اسال صحيح (( سؤال على جنب يعني ))
مين جوجو و زمرده ^_^

ريمان يقول...

مش بحب ابداااااا حد ياخد منى شىء بدون اذن

الزنارى يقول...

السلام عليكم
أكيد البكل ممكن يتعرض لنفس الموقف
بس مش لازم فى الجزمة ممكن يكون أى حاجة تانية موبايل لاب توب كتاب حاجة مهمة .
و الواحد و لله الحمد كان جوجو .
مش عارف زمردة تزعل لية منا هرجعلها الحاجة عاعموم ألف شكر عالموضوع .
مع خالص الاحترام و التقدير
أحمد الزنارى

ماء تشرين يقول...

بصى يامنونتى هى بتحصل مهم اخوتنا هنموتهم ياعنى ياعنى لو حاجه مش مهمه اوى تكبر دماغها بس هو ملوش حق ياعنى هى دى بقه لغه الحوار وازاى تمتص غضب القدامك لو كان قالها يااختى ياحببتى انا عايز حاجه من رحتك معايا وبوسه كده هو انا ليه غيرك ده انت اختى حببتى ياعنى حركتين كده بس

تقبلى مرورى

sookra يقول...

انا معاها وغضبها دا انا بعمله كتير لما بيحاولوا انهم يدخلوا حياتى بدون استئذان

Mr.Hazem يقول...

اصلا والحمد لله عمري ما اخدت شي من دون استأذان صاحبها
حتى غرفة اخواتي اخجل ادخلها لأي سبب رغم انها اختي وعايشة معي .. :$
بصراحه كيف بيتربوا الابناء بصيروا
يسلموا موناليزا
طرحك هادف كالعادة

موناليزا يقول...

الزنارى
ـــــــــــ
وعليكم السلام ورحمة الله وبركاته
اهلا بيك ياأستاذ أحمد
:)عشان تعرف بس ان شعور "زمردة" مابيكونش ظريف:)
يعنى أنت تقبل تكون مكانها عادى:)
أشكرك جدا لمشاركتك
مع التحية



*********************************


ماء تشرين
ــــــــــــ
أختى الحبيبة:اهلا اهلا بالقمر
شكلك كده مع "جوجو":)
أشكرك جدا لمشاركتك
نورتينى ياجميلة واسعدنى تواجدك


**********************************


ريمان
ــــــــ
اختى الحبيبة:اهلا اهلا بالقمر
ومين سمعك يا ريمو:)
نورتينى ياجميلة واسعدنى تواجدك


********************************


واحدة مفروسة
ـــــــــــ
اختى الحبيبة:اهلا اهلا بالقمر بعد طول غياب
:) هفرسك ليه بس؟
طب وايه المشكلة لما تستأذنى.. الحال من بعضه على فكرة:)
بس انا غيرك فى الشق التانى لانى بحب الناس تتعامل معايا زى مابتعامل معاهم:)
ادخلى ياحبيبتى المدونة عادى بدون استئذان:) بيتك ومطرحك:)
نورتينى مفروستى الجميلة واسعدنى تواجدك

موناليزا يقول...

تامر نبيل
ــــــــــــ
اهلا بيك استاذ تامر
مش كده برضه:)
أشكرك جدا لمشاركتك
مع التحية


******************************


المدونة الاسلامية سبايدر مان
ــــــــــــــــــــــــــــ
وعليكم السلام ورحمة الله وبركاته
اهلا بيك يافندم
يعنى بتكون فى موقف "زمردة" دايما:)
====
هو سؤال وجيه فعلا:)
دول ياسيدى زى بوجى وطمطم كده:)
ملحوظة: اعتذر بالنيابة عن بلوجر عن اللخبطة فى نشر تعليقاتك
أشكرك جدا لمشاركتكم وفى انتظاركم دائما



*********************************


الوانى
ــــــــ
اختى الحبيبة:اهلا اهلا بالقمر
انا اللى بشكرك على اتفاقك مع "زمردة"
نورتينى ياجميلة واسعدنى تواجدك


********************************


الشجرة الام
ـــــــــــــ
اختى الحبيبة:اهلا اهلا بالقمر
عجبنى تعليقك
و رد أختك مقنع جدا:)
نورتينى ياجميلة واسعدنى تواجدك


*******************************



سلمى محمد
ـــــــــــ
أختى الحبيبة:اهلا اهلا بالقمر
أشكرك جدا لمشاركتك
وجميل فعلا ان نحترم خصوصيات الاخرين والاجمل ان يتعاملوا معنا بالمثل
نورتينى سلومتى الجميلة واسعدنى تواجدك

موناليزا يقول...

سونيت
ــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
كله على الله:)
نورتينى ياجميلة واسعدنى تواجدك


**********************************


سكرة
ــــــــ
اختى الحبيبة:اهلا بيكِ فى زيارتك الاولى
أشكرك جدا لمشاركتك
نورتينى ياسكرة وارجو دوام التواصل



*********************************


مستر حازم
ــــــــــ
اهلا بيك استاذ حازم
أشكرك جدا لرايك ولمشاركتك
مع التحية وفى انتظاركم دائما

الفراغ يقول...

طبعا حصل كتير
بس انا كنت بمنع ده
وخصوصا مع كتبى
بس عن نفسى لما بحتاج حاجه من حد
لازم استأذن
لازم احترام ممتلكات الاخرين حتى لو ورقه تخصهم

(المهاجر الى الله) يقول...

السلام عليكم ورحمة الله وبركاته :
على فكرة جوجو ده زودها قوى وكان لازم زمردة يبقالها موقف اكثر تشددا من كده ، انا عن نفسى خصوصياتى امر لا يقبل النقاش من قريب ولا من بعيد واللى يتعدى على خصوصياتى ولو بالشء اليسيير باعتبرها اهانة مباشرة لشخصى ،لكن الموقف اللى باخده بيبقى حسب حجم وظروف الاعتداء ده . لكن ممكن اسمح بشكل غير مباشر لاخواتى او لاحد اصدقائى استخدام بعض اشيائى بدون استئذان مسبق .

موناليزا يقول...

الفراغ
ــــــــ
أختى الحبيبة:اهلا اهلا بالقمر
أخلاق ياحبيبتى من يومك
ده المفروض فعلا
نورتينى ياجميلة واسعدنى تواجدك




********************************



المهاجر الى الله
ــــــــــــــــ
وعليكم السلام ورحمة الله وبركاته
اهلا بيك استاذ طارق
ازاى بتلوم "زمردة" انها مخدتش موقف حازم مع "جوجو" وانت نفسك ممكن تعديها لاخواتك!!
ماتنساش أنه أخوها برضه:)
أشكرك جدا لمشاركتك
مع التحية

أم مالك يقول...

الحبيبة الغالية موناليزا
وحشانى ياحبيبتى ووحشنى الدخول عندك
احترام الاخرين فى التعامل شىء مهم
انا اتعامل بالمبدا ده
استئذن عند الاخذ واحب الاستئذان منى
عند العطاء
لكن ساعات بتكون فيه امور بسيطة بين
الاخوات بيكون فيها تفاوت شوية
المهم التعامل يتم باحترام مش بالاغتصاب
ربنا مايحرمنا من مواضيعك
ودعواتك ياحبيبتى

ABOALI يقول...

العشم
كلمة نتوراثها منذ النشأة
وتحت عبأءة تلك الكلمة تستباح خصوصيات والكثير من العموميات ايضا

جوجو وزمردة هما اسقاط على واقع اكبر نحياه

وهو استحلال حقوق الغير تحت بند صداقه زماله اخوة ووو
وغيرها

العيب مش فى جوجو ولا زمردة
لان ده نتاج الاعراف والمعتقدات المستبدلة بما يوازيها من الاديان

ونموذج ما حدث بين جوجو وزمردة يحدث يوميا

فى التنازل عن الحقوق تحت بند العشم

وما اخذ بسيف الحياء فهو حرام

ولكن اول من عليه الا يتنازل عن حقه هو من سلب منه
عليه ان يكون حازم فى رد فعله
فكثيرا يسىء لنا الاخرين بجهالة او تحت بند الطيبه

ربنا يرحم الجميع
واشكرك على سلسلة جوجو وزمرده

(Joudy) يقول...

بصراحة ليها حق أنا معاها فعلا

والموقف ده حصل كتييييييير معايا وتقريبا متكرر يوميا

بس أنا سمعت أحد المشايخ بيقول إن الأهل لازم يدورا فى حاجة ولادهم بداعى الاطمئنان حتى ولو من غير ما أولادهم يعرفوا

بصراحة أنا محتارة إن كان ده صح ولا لا

ولو بقيت أم أعمل ده مع أولادى ولا لا

دمتى بكل الخير والسعادة

كلمات من نور يقول...

ههههههههههههههه أنا عايشة مع عصابة مفترية مكونة من زوج و أربعة أبناء ودايما أصحى من النوم ألاقي الموبايل مش جنبي و ألاقي رصيدي شبه صفر و أقولهم هو أنا عايشة في محطة مصر.؟؟؟؟؟

يحق لزمردة أن تغضب و أن تضع قانون خاص بها علشان كل إنسان بيحب يكون له خصوصيات وحقوق وواجبات ....و الأخ جوجو داه لازم يتعلم علشان أكيد لو حصل العكس حيغضب ويستنكر ويدين..وحشاني يا موناليزتي ادعيلي ألا عمودي الفقري موريني أيام ملونة والحمدلله

رفقة عمر يقول...

هى بصراحه حاجه تتضايق جدا لو حد اخد حاجه من غير استأذن
بس تخيلى اننى قرأت فى حق الصحبه والاخوة فى السنه
ان من كتر حق الصاحب على صاحبه انه ممكن ياخد اى شئ من غير استأذن
مابالك بالاخوة
الامر محتاج تتدريب ومجاهده علشان نقدر نوصل للنفس المتسامحه

هكذا علمنى سيدنا محمد( صلى الله عليه وسلم) يقول...

السلام عليكم ورحمة الله وبركاته
حياكى الله وبياكى أختى الكريمة وجعل الجنة مثواى ومثواكى وطبتى وطاب سعيكى وممشاكى وتبوأتى بإذن الله من الجنة منزلا
كل سنة وحضرتك طيبة وبخير ، عارف إنها متأخرة بس انا كنت مسافر مكة لأداء فريضة الحج ومكنش عندى وقت أعرفكم ، بس أحب أطمن حضرتك انى مش نسيتك بدعاء مخصوص الحمدلله رب العالمين أثناء الحج خصوصا الدعاء الذى تطلبينه فى كثير من مدوناتك
أدعوا الله أن تكونى بخير وفضل من الله عز وجل
دمتى فى معية الله

همس الاحباب يقول...

كل سنة وحضرتك طيبة
واسف جدا على التاخير
ولكن ظروف العيد والاجازة
طبعا متفق مع راىء زمردة لابد ان جوجو يستاذن اولا لان كل انسان له خصوصياته
بالرغم من انهم اخوة فلابد لهم من الاستئذان اولا
حتى لو كان من البديهى العلم بالموافقة مسبقا
وجميعا حدث معه ذلك بالرغم من عدم الرفض ولكن الاستئذان افضل
تحياتى

salwa يقول...

السلام عليكم اخت موناليزا
اكيد تحصل مع الجميع و ردود الفعل عليها متفاوتة من شخص لاخر
من وجهة نظري امر غير مقبول و ارفضه
تسلم يدك دائما لديكي المفيد
سلام

موناليزا يقول...

أم مالك
ـــــــــ
أختى الحبيبة:اهلا اهلا بالغالية
ايه المفاجأة الجميلةدى:)
ربى مايحرمنى من تعليقاتك وتواجدك الدائم
أشكرك جدا لمشاركتك
نورتينى غاليتى واسعدنى تواجدك



*********************************


ابو على
ـــــــــ
اهلا اهلا بصاحب التعليقات المميزة
صدقت أخى الفاضل فمن يتنازل عن حقه أولا لا يلوم أحد فيما بعد
وانا مؤمنة تماما بأن ما أخذ بسيف الحياء فهو حرام
أشكرك جدا لمشاركتك ولتواجدك المميز
مع التحية


**********************************


جودى
ــــــ
أختى الحبيبة:اهلا اهلا بالقمر بعد طول غياب
انا متفقة مع ما قاله الشيخ لان فى الزمن ده لو ولى الامر ماراقبش ولاده كويس ممكن يحصل حاجات هو مش متخيلها
أشكرك جدا لمشاركتك
نورتينى ياجميلة واسعدنى تواجدك



*********************************


كلمات من نور
ـــــــــــــــ
أختى الحبيبة:اهلا اهلا بالقمر
:) ربنا يخليهوملك ويخليكى ليهم

ياحبيبتى الف سلامة عليكِ بعيد الشر عنك
ربنا يخفف عنك يارب ويشفيكِ ياقادر ياكريم
نورتينى ياجميلة واسعدنى تواجدك

موناليزا يقول...

رفقة عمر
ــــــــــ
أختى الحبيبة:اهلا اهلا بالقمر
معلومة جديدة بالنسبة لى!!
بس مش حاساها قدرة على التسامح على قد ماهو احترام ممتلكات الغير مهما كانت بسيطة
طب ايه الفرق كده بقى بينها وبين السرقة؟
نورتينى رفقة الجميلة واسعدنى تواجدك



********************************


هكذا علمنى سيدما محمد صلى الله عليه وسلم
ـــــــــــــــــــــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك ويعزك يارب وماحرمنى الله من تعليقكم ودعائكم الجميل
وحضرتك بخير يافندم
لا عليك عذرك معاك
:) كنت لسه هلومك انك ماقلتش بس بما انك دعيتلى بالنصر يبقى خلاص براءة:)
ماتتخيلش سعادتى بجد انك افتكرت تدعيلى هناك ربنا يسعدك ويتقبل دعائك اللهم امين
جزاكم الله عنى خير الجزاء
انت مش عارف بجد تعليقك ده رفع من روحى المعنوية قد ايه:)
وفقك الله دائما لما يحب ويرضى
أشكرك جدا لتواجدك
مع التحية



*******************************


همس الاحباب
ـــــــــــــ
اهلا بيك استاذ خالد
وحضرتك بخير وصحة وسعادة
لا عليك أخى الكريم عذرك معاك:)
أشكرك جدا لمشاركتك
يسعدنا دوام التواصل
مع التحية


**********************************


سلوى
ـــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
أشكرك جدا لرايك ولمشاركتك
نورتينى سلوى الجميلة واسعدنى تواجدك

مدونتى إسمها مرايتى يقول...

بتحصل كتير وأحيانا بعمل زى زمرده
المبدا نفسه
ان طالما عاوز حاجه يستاذن وتعدى على حريتى ممكن أكون عاينه حاجه مش عاوزاه يشوفها او لاى سبب
وللامانه احيانا كتير بعدى واستهيف الموضوع
بس بفضل الاستاذان ما حبش حد يحطنى فى الامر الواقع

ليس فقيرا من يحب يقول...

بصراحه هو حقها زمرده تزعل طالما هيا

ملتزمه بكده كمان بس الصراحه انا

واخواتى عادى مفيش مشاكل اللى

بيحتاج حاجه بياخدها كان ممكن جوجو

ياكلها بكلمتين وتخلص المشكله

الواد جوجو ده واد متقفل اوى

وبيستفزهاهههههههههههههههههههههه

تسلم ايديك يا روح قلبى

المعتصم يقول...

السلام عليكم ورحمة الله وبركاته
اختنا الكريمه موناليزا
تحياتى
بيحصل كتير جدا انى اكون مكان زمردة
دايما الباشا الصغير اللى هو اخر العنقود واخد شراباتى وقمصانى
ودايما الوالد بتتخانق معاه وانا اللى بفض الاشتباك بينهم واخليه ياخد اللى هو عاوزة ومش بتضايق
انما ده بيكون مع اخواتى بس
انما اى حد تانى بيحاول انه يتعدى على حق من حقوقى بره البيت ايا كان الحق ده ايه
مش بسكت له وبياخد جزائه الصحيح
وده اللى المفروض انه يحصل وان الشخص مش لازم يسيب او يفرط فى اى حق من حقوقه انما ممكن نتسامح مع بعض الاحباب بس لما يكونوا عارفين ان الحاجه دى مش هتضايقنا
تقبلى مرورى وتحياتى
والسلام عليكم ورحمة الله وبركاته

موناليزا يقول...

مدونتى اسمها مرايتى
ــــــــــــــــــــ
أختى الحبيبة:اهلا اهلا بالقمر
هى فعلا بتبقى حسب الموقف بس انا شايفة ان المبادئ ما بتتجزأش:)
اشكرك جدا لمشاركتك
نورتينى ياجميلة واسعدنى تواجدك



********************************


ليس فقيرا من يحب
ــــــــــــــــــ
أختى الحبيبة:اهلا اهلا بالقمر
هو"جوجو" مش مقفل على قد ماهو واخد الحياة ببساطة اكتر منها:)
أشكرك جدا لمشاركتك
نورتينى ياجميلة واسعدنى تواجدك



*******************************



المعتصم
ـــــــــ
وعليكم السلام ورحمة الله وبركاته
اهلا بيك استاذ مصطفى
دايما لما بقرأ تعليقاتك بحس بجد ان لسه الدنيا بخير
هو انا معاك طبعا ان فيه فرق بين معاملتنا للاحباب وللناس العادية بس برضه الاستئذان المسبق شئ جميل:)
أشكرك جدا لمشاركتك
يسعدنا دوام التواصل
مع التحية

سندس وأمل يقول...

اه طبعا زمرده ليها حق الغضب..

بالنسبه للتعرض للموقف فده طبيعى يعنى:D

بس انا لما باخد حاجه من عند اخوتى

بيزعقولى نفس الحكايه معاهم افضل ازعق

لحد انى اعيط...بس انا اساسا

بعمل كده معاهم...الى عايزه اوصله

انه زمرده تلاقيها بتعمل نفس الحكايه

معاه:D

بس هى مش واخده بالها بس:D

سندس

ذكري رحيل قلم يقول...

السلام عليكم
كل سنة وانت طيبة

ومن الله اقرب وفي طاعته دائما
دمتي بحب وود وطيبة وفرحة قلب

موناليزا يقول...

سندس وأمل
ـــــــــ
أختى الحبيبة:اهلا اهلا بالقمر
هو ممكن ناس كتير فعلا تكون كده
بس الطبيعى اللى مانرضاهوش لنفسنا برضه مانرضاهوش لغيرنا
نورتينى ياجميلة واسعدنى تواجدك




*********************************



ذكرى رحيل قلم
ـــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر بعد طول غياب
وانتِ طيبة ياحبيبتى وبخير وصحة وسعادة
نورتينى ياجميلة واسعدنى تواجدك

واحد من العمال يقول...

السلام عليكم

كثيراً ما تحدث مثل هذه المواقف بين الأخوه
لكن المفروض الإستئذان
حدث ذلك كثيراً بينى وبين أخى وكانت بتعدى
كان حب امتلاك مبكر شويه

ودمتِ بخير حال

عاشقة الفردوس يقول...

هلا ياموون

آه زمردة لها حق تغضب

::::::::

حصلت لي قبل كدا

أخويا فتح دولابي عادي
عرفت وقلت لابي وزعقله : ))

ومحصلتش تاني الحمدلله

: ))

Dr Ibrahim يقول...

طبعا ليها حق لان المفروض ان الواحد يستأذن قبل ما ياخد حاجة حد افرض الحد دا عايزة الحاجة دى ضرورى قبل الشخص اللى طالبها ..

اتعرضت كتير قوى لمواقف من دى سواء كنت الشخص دا او دا..

رفقة عمر يقول...

ازيك موناليزا

على فكره انا كمان استغربت زيك لما قريت فى حقوق الصحبه

هنا هاتلاقى كل حاجه عن حقوق الصحبه
http://www.al-eman.com/IslamLib/viewchp.asp?BID=383&CID=29#s1

موناليزا يقول...

واحد من العمال
ــــــــــــــــ
وعليكم السلام ورحمة الله وبركاته
أهلا بيك يافندم فى زيارتك الاولى
أشكرك جدا لمشاركتك ولتعليقك
نورت مدونتى وارجو دوام التواصل


***********************************



عاشقة الفردوس
ـــــــــــــــــ
اختى الحبيبة:اهلا اهلا بالقمر
أشكرك جدا لمشاركتك
نورتينى ياجميلة واسعدنى تواجدك



********************************


د/ ابراهيم
ـــــــــــــــ
اهلا بيك يادكتور
ازاى اتعرضت للموقفين رغم اعتراضك على تصرف "جوجو" :)
أشكرك جدا لمشاركتك
مع التحية



*******************************


رفقة عمر
ـــــــــــ
أختى الحبيبة:اهلا اهلا بالقمر
أشكرك جدا لمتابعتك ولذكر الرابط
نورتينى ياجميلة وفى انتظارك دايما

اللؤلؤة يقول...

السلام عليكم
زمردة ليها حق فى كل ما قالته
لأن جوجو لم يستأذن منها
خالص تقديرى

اللؤلؤة يقول...

موناليزا
السلام عليكم
حدث هذا الموقف معى فقد
فوجئت بشخص حصل على ip الخاصة
بجهاز كمبيوترى دون إذنى
وقدغضبت جداً وثارت ثورتى
خالص تقديرى

موناليزا يقول...

اللؤلؤة
ــــــــــ
وعليكم السلام ورحمة الله وبركاته
اهلا بيك يافندم بعد طول غياب
أشكرك جدا لتعليقك ولمشاركتك
مع التحية

HasanGhita يقول...

السلام عليكم ورحمة الله وبركاته
أولا بردك هسأل حضرتك
ممكن أخد قصة جوجو ده وأبعتها لأصاحبى على الميل
أنا بعت أول حلقة بسل قلت لازم أستأذن
وده حاجتك فلازم أستأذن
ههههه

الإجابة
طبعااا لازم تزعل عشان هو خد شىء بدون إستأذنها وكده هى حست بتقليل من قيمتها مش أكتر


بتعرض للموقف ده كتير جدااا
ومش بحب حد يستخدم حاجتى أبداا
ممكن أجيبله أحسن منها بس حاجتى ما يستخدمهاش مش عارف ليه

موناليزا يقول...

حسن غيتا
ـــــــــ
وعليكم السلام ورحمة الله وبركاته
أهلا بيك استاذ حسن
أشكرك لانك بستأذنى واتفضل يافندم بس ياريت تذكر رابط مدونتى:)

أحييك على اتفاقك مع زمردة:)
واشكرك جدا لمشاركتك
يسعدنا دوام التواصل