الاثنين، 1 فبراير 2010

جوجو و زمردة (14)


ذهبت "زمردة" لتجلس بجوار شقيقها "جوجو" أثناء ممارسته للصيد لتخبره بأنها أشتاقت لأن تقوم برحلة كالتى تقرأها فى الكتب.
- مشتاقة إنى أعيش جو مغامرة والذهاب لمكان لم أذهبه من قبل ولو حتى كنت ذهبت إليه من خلال قراءتى للكتب للمختلفة.
- وأنا كمان عايز أغير جو.
- طيب نروح فين؟
- وبعد تفكير: إمممم .. إيه رأيك لو نذهب للواحات.
- الله فكرة حلوة أوى.. صحراء وأعشاب وبحيرات وهنعيش فى خيمة.
- خيمة إيه اللى هنعيش فيها! لأ إحنا هيبقى معانا عربية جامدة ومتينة هنروح بيها وهننام فيها كمان.
- ياسلام كل ده عشان ماتعملش خيمة! أمال هتبقى فين المتعة والمغامرة؟.
- أنا أعرف فين المصلحة أكتر منك ..كده أمان أكتر.
- تفتكر أن هناك هيبقى فيه حيوانات مفترسة أو زواحف سامة مثلاً؟.
- يابنتى دى صحراء يعنى تخيلى كل ماهو مؤذى من أول الذباب إلى الضباع.
- كويس أنك نبهتنى كده هاخد معايا مبيد حشرى قوى.
- أنا بقى هاخد معايا مجموعة سيديهات أغانى.
- أنا مش موافقة كده مابقاش جو رحلات لو كان لازم يعنى تسمع أغانى يبقى أنا اللى هغنى. زى ما بنعمل فى رحلات المدرسة.
- وعلى إيه بلاش أغانى خالص.
-هناخد عصاير كتير وكمان شيبسى حجم عائلى وشوكلاتة وبسكويت.
- إحنا هنقضيها كده ولا إيه؟.
- لأ طبعا ماهو هيكون معانا أساسى ساندوتشات وكولمان مياه ساقعة وترمس شاى بالنعناع.
بس هو احنا مش هننزل من العربية خالص ولا إيه؟.
- لو وجدنا مكان آمان أكيد هننزل بس الأكيد أننا هنام فى العربية عشان نبقى فى الأمان.
-طب افرض واحنا نايمين جه دب كبير ونام على كبوت العربية وأول مافتحت عينيك وجدته فى وجهك والفاصل بينك وبينه زجاج العربية.
- ياخبر دى تبقى حتة خضة.. وقتها هدور العربية وهنروح.
- طب والرحلة؟.
- بعد تخيلك الفظيع ده إعتبريها إتلغت.
-تمت-.
=============
دعوة للمناقشة:
ـــــــــــــــــــــــــــ
* لو تحب تذهب فى رحلة ترفيهيةالآن ولمدة يومين هتروح فين ؟.
ولو مسموح لك تاخد شخصان معاك هتختار مين؟.
وإيه أول 3 حاجات هتضعهم فى شنطة سفرك؟.

هناك 37 تعليقًا:

بلال عادل رجب. يقول...

لو رحله باامانه واى مكان لو باامانه شديدة والله
1. غزة
2. الاردن
3.امريكا
4.العريش
5.اسوان والاقصر
---------
اصحابى طبعا اتنين اصحابى بحبهم كتير
او بابا وماما بس لو بابا وماما مش هعرف اخد راحتى
---------
اول شى
المصحف
الملابس
الاكل
الشراب
--
وجزاكى الله خير وبالرتيب

كلمات من نور يقول...

الله رحلة ...بس يومين يبقى مينفعش عمرة ...اروح فين اروح فين؟ أروح الفيوم أو أي مكان هادي على بحر أو بحيرة بس هادي ....مسموح اخد شخصان...مش عايزة ..عايزة رحلة لوحدي ...اول 3 حاجات في الشنطة ..الموبايل والمصحف فيه والمؤذن ....الام بي ثري وعليه الأناشيد ودرسين تلاته ...كيس البن ..داه بالذات لما بانساه الأجازة بتضرب مني خالص وكل الناس مش بتصدق انا مين....وحشتيني يا جميلة

مهموهة أحمد يقول...

هههههههههههههههههههههههههههههه

حلوة اعتبريها اتلغت دي


عموما انا احلى رحلة عملتها في حياتي كانت العمرة في رمضان
كانت بجد رائعة و بتمنى لو اكررها كل يوم

ربنا يخليكي يا موناليزا يا حبيبتي
و كلامك زي السكر و الله

مع خالص حبي و تحياتي و تقديري

ستيتة يقول...

ها أروح راس سدر
ها اخد واحد بس معايا
ها احط في الشنطة قهوة سعودي علشان بيحبها
ونمر
واغنية انا بعشق البحر زيك يا حبيبي :)
تومام كده الإمتحان؟
تحياتي وخالص دعواتي بالسعادة والستر وجبر الخاطر اللي من عند الله الكريم

الأرمـوطــي يقول...

انا عدد المرات الى روحت فيها رحلات فى حياتى تتعد على صوابع الايد الواحدة ففى الاغلب مش هروح مكان عشان متعودتش على كدة...ومش هاخد معايا حد لانى مليش اصحاب كتير والى ليا مشغولين.....ومش هحط حاجة فى الشنطة لانى اصلا معنديش شنطة سفر
انا اسف لو كنت احبطك بس هيا دى الحقيقة بس بوست جامد وبيدعوا لاعمال العقل والتامل فى حال النفس
تحياتى ليكى

موناليزا يقول...

قلب بلال فارس
ــــــــــــــ
أهلا بيك أستاذ بلال فى زيارتك الاولى
ربنا يكرمك
أشكرك جدا لمشاركتك
نورت مدونتى وارجو دوام التواصل


*********************************



كلمات من نور
ـــــــــــــ
أختى الحبيبة:اهلا اهلا بالغالية
ماينفعش يا نور ماتاخديش حد معاكِ تذكرتين إضافيتين هتبيعيهم لمين طيب؟:)

تعرفى.. بابا واخواتى بيحبوا يشربوا القهوة من ايدى وانا عن نفسى بحب ريحتها بس هى شخصياً مابحبهاش:)

وأنتِ كمان وحشتيينى جدا
نورتينى غاليتى واسعدنى تواجدك



*********************************




الوفية للابد مها احمد
ـــــــــــــــــــــ
أختى الحبيبة:اهلا اهلا بالقمر
:) مبسوطة بجد انها عجبتك
يارب ياحبيبتى ينولها كل مشتاق
أنتِ اللى جميلة وعشان كده شايفة اللى حواليكى جميل
ماتحرمش من ذوقك يا مها
نورتينى ياجميلة واسعدنى تواجدك



*********************************



ستيتة حسب الله الحمش
ـــــــــــــــــــ
أختى الحبيبة:اهلا اهلا بنبض الحكمة
طب والتذكرة التانية هتتنازلى عنها كده؟:)
تمام كده ياقمر:)
ربنا يجبر بخاطرك ويفرحك زى مابتفرحينى بوجودك وبتعليقاتك الجميلة
نورتينى


*********************************


الأرموطى
ــــــــــ
أهلا بيك يافندم فى زيارتك الاولى
فعلا جالى احباط بس ضحكت لماأنت توقعت ان ده هيكون رد فعلى:)
طب ليه ماتتخيلش وتترك لخيالك العنان!
جرب كده.
مش هتخسر حاجة:)
نورت مدونتى وارجو دوام التواصل

كلمات من نور يقول...

ابيعهم؟ لا حاهديهم لأم البنات بس بما إن أم البنات عندها بنتين فشكلي كده حاتنازل بطيب خاطر عن الرحلة وحدي واطلع معاها هي وبناتها الغاليات ..بس كده الاولاد حيقولولي اشمعنى يا ماما ..وطبعا الكبار ما حيصدقوا اروح رحلة علشان البيت يبقى فوضى ..وبكده انتفى السلام المقصود بيه الرحلة يبقى مش طالعه وشكرا للعرض...

Mahmoud Ahmed يقول...

^_^
ان جيت
^_^
انا عاي اروح مرسي مطروح ^_^
و اروح لوحدي خالص
و هاخد معايا
فلوس
و الموبايل
و الكاميرا بتاعتي
و بس كده ^_^

...

الواحد يروح ينفرد بنفسه شويه و يقعد في مكان هادي

بلال عادل رجب. يقول...

اهلا بيك يااستاذ بلال لا انا لسه صغير دا انا عندى 17 سنه
كبرتينى بسرعه
ههههههههههههه
انا بلال

(المهاجر الى الله) يقول...

عليكم ورحمة الله وبركاته:
منك لله يا جوجو انت وزمردة ، قلبتوا عليا المواجع وفكرتونى بايام الشباب الذى ولى وانقضى ، انا من اكثر محبى وعشاق السفر والترحال ، للمتعة والفوايد الكتيييير اللى بتيجى منه ، وكنت دايما باطلع معسكرات تبع الشباب والرياضة والكشافة واعداد القادة والمتميزيين ثقافيا ، وبجد اجمل الاماكن اللى زورتها كانت العريش واسوان ومرسى مطروح وبورسعيد وبنى سويف .
بس المكان اللى نفسى اروحوه فعلا وهاموت لو مرحتوش وباخطط له من فترة ( تركيا ) بلدى الحبيبة ، نفسى اعيش باقى حياتى فى اسطنبول وامتع عينى بشوارعها وحضارتها .

موناليزا يقول...

كلمات من نور
ـــــــــــــــ
أهلا بعودتك ياجميلة
ههههههه
تتنازلى عن الرحلة ببساطة كده!
دول يادوب يومين
طب والقهوة اللى عملتها دى مين اللى يشربها وانتِ عارفة أنى ماليش تقل عليها:)
كده هنعطى القهوة كمان هدية للراغبين:)
نورتينى غاليتى ودمتِ بخير



********************************


سبايدر مان
ـــــــــــــ
يا أهلا وسهلا
نورت المدونة يادكتور
والتذكرتين اللى معاك زيادة هتعمل بيهم ايه؟
شوفت بقى لو معاك موبايل بكاميرا كنت وفرت مكان شئ ممكن تاخده معاك بدل الكاميرا:)
أشكرك جدا لمشاركتك
يسعدنا دوام التواصل


********************************


قلب بلال فارس
ـــــــــــــ
أهلا بعودتك يافندم
:) الكبير مش بالسن
وحتى لو كان عندك 10 سنين بس برضه كنت هقولك يا أستاذ:)
يسعدنا دوام التواصل


*******************************


المهاجر الى الله
ــــــــــــــ
وعليكم السلام ورحمة الله وبركاته
أهلا بيك أستاذ طارق
طب وليه ماتشكرهمش انهم فكروك بأيام بالنسبة لك جميلة:)

طيب كده عرفنا مكان الرحلة تركيا لمدة يومين
مع مين بقى وهتاخد إيه؟

يسعدنا دوام التواصل

حمـــــــــــــــــــــة يقول...

السلام عليكم ورحمة الله وبركاته
"يابنتى دى صحراء" فيها زواحف
كلام صحيح مائة بالمائة
و إذا م تكن صحراء فهي غابة و تصور قانونها الى جانب المفاجآت.........
والحمد لله زوزو تحلم و إلا أصبح مشكل لجوجو
------
الرحلة الترفيهية بيومين و لو يعني قليل الوقت هذا يعني كان أسبوع أحسن
المكان: نهر النيل من الشمال الى الجنوب
المرافقين : زوجتي و أولادي
الهاتف و كفى
البقية معروفة

غير معرف يقول...

السلام عليكم
انهم يتحاورون معي الآن على كرسي الاعتراف
يستجوبون مدونتي
شيء بقلبي
http://shayunbiqalbi.blogspot.com/
في مجلة التدوين العربي ادخل و شاركهم التقييم كما تحب
http://arabicos.blogspot.com/2010/02/sonnet.html
مع تحيات اختك
SONNET

إيمان يقول...

اولا ميرسى لزيارتك مدونتى ويشرفنى انى اتابعك واسلوبك الجميل عجبنى اوى
لو رحله اى مكان بس اكون مع صحابى ..بس اكيد بطبيعه جميله وبحر وفسح ولمه مش اكتر من كده
تحياتى ياقمرايه

KHALED يقول...

بصراحة العرض مش مغرى ... مش مسافر

موناليزا يقول...

هاما
ـــــــ
وعليكم السلام ورحمة الله وبركاته
أهلا بيك يافندم
زوزو مين؟ آآه :) تقصد زمردة:)
خلاص يافندم اسبوع
بس بقية الأيام على حسابك احنا عرضنا يومين بس:)
أشكرك جدا لمشاركتك
يسعدنا دوام التواصل



********************************


سونيت
ـــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
يسعدنى الاشتراك وربنا يسهل واعرف اترك تعليق هناك
بالتوفيق دائما



********************************



ايمى مونى
ـــــــــ
أختى الحبيبة:اهلا بيكِ فى زيارتك الاولى
:) أشكرك جدا لرايك ولذوقك
جميل.. طب وهتاخدى معاكِ ايه؟
نورتِ مدونتى وارجو دوام التواصل



********************************


خالد
ــــــ
أهلا بيك أستاذ خالد
!!
مش مغرى عشان اليومين دول الجو برد؟
ولا لأن العدد مش كافى؟
طيب تتنازل عن الرحلة دى لمين؟
ماهو مينفعش حد ييجى عندى ومايجاوبش:)

يسعدنا دوام التواصل

MOHAMMED ELBANNA يقول...

موناليزا
1- اي مكان فيه مناظر طبيعيه خلابه .
2- اصحابي .
3- ( قلم وأوراق - كتاب - كاميرا )
تقبلي مروري
طريق النجاح

طهر فؤادك يقول...

السلام عليكم ورحمة الله وبركاتة

جميلة القصة بس اتلغت لية كدة قبل ماتبدااا هههه على العموم جميلة بارك الله فيكى

- اما الرحلة الى نفسى اطلعها ان شاء الله عمرة ..

- اخد مين معاية ؟؟ امى

- الى هخدة معاية ؟؟ المصحف واى حاجة لازمة بقى (فرشة سنان مكنة حلاقة )

(المهاجر الى الله) يقول...

احيانا لازم انسى احلى الايام والمواقف الطريفة عشان كل ما افتكرها بتالم انها مش هترجع تانى ،وعموما شكرا ليهم كتيير،
ولما اقرر اروح تركيا مفيش حد معين هاخده معايا لانى افضل انى اكون لوحدى عشان ابقى على حريتى فى الحركة والتنقل واعرف استكشف بلدى الاصليه على راحتى ومزاجى ،وكمان مفيش حاجة معينة غير لوازم السفر والحجات البديهية اللى ممكن يحتاجها اى شخص مسافر لمدة يومين ، ملابس ، فرشة اسنان ، ادوات الحلاقة ، عطور ، الكاميرا بتاعتى اللى سجلت معايا اجمل الذكريات على مدار 15 سنة والحجات دى بقى

KHALED يقول...

أنا عايز شهر فى جزر هواى مع اتنين ماقدرش أقولك مين هما

لن اتنازل لأى حد و حاخد معايا الكاميرا الديجيتال علشان يبقى بالصوت و الصورة

rovy يقول...

أزيك يا مونى
صباح المغامرات الجميل يا جميل :))
أيه الجرأه دى كلها :))
كويس أن الرحلة أتلغت فى الوقت المناسب ..
لو رحلة و حأختار .. أكيد الغردقه
و طبعا أخذ أسرتى (زوجى و بناتى )
أخذ معايا المصحف ..الأسعافات الأوليه و الدوا اللى ممكن نحتاج له و طبعا فرشات الأسنان
.كتاب للقرأه قبل النوم مع أنى فى الغردقه بالذات الكتاب كان بيتظلم معايا طول اليوم فى رحلات و بالليل مجهده جداا يدوب أمسكه فى أيدى أنام على طول :))
دى المرات الوحيده اللى نمت فيها من غير أرق و صحيت نشيطه جداا و بدرى و كمان أتنظم ميعاد نومى و أستيقاظى ..
حتى فى الساحل الشمالى مش بأعرف أستثمر اليوم صح ..

تحياتى

♥نبع الغرام♥♪≈ يقول...

جميله اووى يا مونى
ههههههههههه
تحفه انا برده من عشاق السفر موت
وياما طلعت رحلات كتيره اوووى

الرحله اللى احب اطلعها مكان هادى ويكون فيه البحر والسما وبيت صغنون

اخد معايا ممممممممممم

معلهش هو واحد بس حبيبى ثم حبيبى


الشنطه هيكون فيها
طبعآ معجون الاسنان وفرشتى وفوطى الخاصه ومستلزماتى الشخصيه

تحياتى ليكى

ايناس

لجين أبو الدهب يقول...

ليه كده ياموناليزا قلبتى عليا المواجع ..

اصلى نفسى اطلع رحلة كده اغير جو يومين ..

هاروح تركيا ولو منفعتش يبقى تايلاند ..

وهاخد شخصان :
- زوجى
- ماما ..

اول 3 حاجات هاحطهم

المصحف ومطوية الاذكاروالسبحة ودول هاعتبرهم حاجة واحدة ..

وتانى حاجة الكاميرا

الت حاجة مستيكة.. ( لبان )


جاوبت كده مظبوط ..

الجايزة ايه بقى ؟؟

اممممم

توقعتها ..


تذكرتين للمكان اللى نفسى اروحه D:

دمتِ بخير ..

* ياريت انتى كمان تجاوى على الاسئلة ياموناليزا ..

موناليزا يقول...

محمد البنا
ـــــــــــ
أهلا بيك أستاذ محمد
أحييك على حسن اختيارك
وأشكرك جدا لمشاركتك
يسعدنا دوام التواصل



**********************************


طهر فؤادك
ـــــــــــ
وعليكم السلام ورحمة الله وبركاته
أهلا بيك يافندم
ماهو خاف للدب يبوظ العربية:)
أشكرك جدا لرأيك
أحييك على حسن اختيارك
يسعدنا دوام التواصل


********************************


المهاجر الى الله
ـــــــــــــــ
أهلا بعودتك أستاذ طارق
مع ان المفروض الذكريات الحلوة بتقويناولكنى احترم وجهة نظرك
يعنى هتتنازل عن التذكرتين!!بس دى رحلة ترفيهية وليست استكشافية يعنى هتبقى حلوة أكتر بالصحبة
أشكرك جدا لمشاركتك
يسعدنا دوام التواصل



*******************************


خالد
ـــــــ
أهلا بعودتك أستاذ خالد
:) طب اعمل ايه فى نفسى ماهو لازم أسأل
ليه متقدرش تقولى هما مين؟
اوكى عموما تكلفة بقية الايام على حسابك:)
وااو.. كاميرا ديجيتال:) اختيار موفق
أشكرك جدا لمتابعتك
يسعدنا دوام التواصل


*******************************


روفى
ـــــــ
أختى الحبيبة:اهلا اهلا بالغالية
أنا الحمدلله بخير ماتحرمش من سؤالك
:) مساء الفل ياقمر
:)
عجبتنى فكرة الاسعافات الاولية انا كمان باخد العِدة معايا:)
تعرفى ان رغم حبى للقراءة بس عمرى مافكرت اخد الكتاب معايا فى اى رحلة لانى مش هبقى فاضية له خالص:)
نورتينى حبيبتى واسعدنى مشاركتك



*********************************


ابتسامة ملاك
ــــــــــــــ
أختى الحبيبة:اهلا اهلا بالقمر
تسلميلى يانوسة
طب والتذكرة الباقية هتديها لمين؟
ماهو لازم يبقى فيه محرم برضه:)
أشكرك جدا لمشاركتك
نورتينى ايناس الجميلة واسعدنى تواجدك


**********************************


لجين ابو الدهب
ـــــــــــــ
أختى الحبيبة:اهلا اهلا بالقمر
:) الله
عجبتنى اجابتك
وفعلا الرحلة على حساب المدونة:)
أجاوب! إمممم.. اوكى
المكان/ العين السخنة(ماروحتهاش قبل كده)
الاشخاص /شقيقى الأصغر وأمى
لأشياء/ شاحن الموبايل لان الموبايل طبيعى انه هيكون معايا
(شنطة سفرى الصغيرة بتبقى جاهزة دايما وفيها كل أدواتى الخاصة وكل ماتتخيلى من اشياء حتى الصابونة:) وطبيعى المصحف وكتيب الأذكار والكاميرا وما الى ذلك
هى الاسم انها شنطة صغيرة بس بتبقى تقيلة بجد:) والشاحن هو الوحيد اللى مابيبقاش موجود فيها وعشان كده ذكرته
شنطتى الكبيرة بقى اللى هيكون فيها ملابسى أول حاجة طبعا الشراب:)
شنطة ايدى بقى أول حاجة فيها بتبقى المناديل
أى خدمة:)
إجاباتى أهى يا ستى وحصرياً للوجى وبس
نورتينى ياجميلة واسعدنى تواجدك

غير معرف يقول...

السلام عليكم
الإجابة إذا كانت رحلة ترفيهية لمدة يومين : لا أعرف بصراحة .. محتار

========= من يأتي معي
كذلك محتار .. مينفعش الوالد والوالدة لأن حركتهم ثقيلة وأنا حركتي سريعة ونشط ومبهمدش ولو تركتهم وشفت حالي هكون قلقان عليهم ، وبعد كده بقى في الأصحاب وأستاذي دكتور طارق وناس كثيرة

===========
بالنسبة لأهم الأشياء اللي هتحصل عليها
بصراحة بعض الكتيبات الخاصة ودفتري الخاص وأقلامي ومصحفي

ههههههههههه
أظن إجاباتي تستحق صفر

هناء محمود يقول...

الرحلة

تركيا .. نفسى أشوفها بجد

والشخصين

أكيد بوبة وأبو بوبة

وآخد معايا

بامبرز بوبة ولعبها .. اهم حاجة

ههههههههههههههه

أميرة الأحلام يقول...

حلوه الرحله دى
بس ليه تتلغي
ههههه
نفسي اروح مكه والمدينه انا صحيح رحتهم كتير قوي قبل كده يمكن اكتر من 10 او 15 مره بس بجد مافيش مكان احلى ولا اجمل من كده
ومش هاخد حد معايا خالص
موضوعك جميل
تسلمى عليه

موناليزا يقول...

أحمد شريف
ــــــــــ
وعليكم السلام ورحمة الله وبركاته
أهلا بيك أستاذ أحمد
طيب ماهى حيرتك دى هتخلينى أسأل ايه الأماكن اللى محتار بينها:)
الاجابة التانية هنمشيها أستاذ طارق وواحد صاحبك
والاجابة الثالثة تمشى برضه مع ان ما ظنش ان هيبقى فيه وقت للقراءةأو الكتابة
:) لا اطمن مش صفر ولا حاجة
أشكرك جدا لمشاركتك
يسعدنا دوام التواصل



*********************************


أم بوبة
ـــــــــ
أختى الحبيبة:اهلا اهلا بالقمر
:) مش بقولك أنتِ عسل
نورتينى ياجميلة واسعدنى مشاركتك


*********************************


أميرة الاحلام
ــــــــــــ
أختى الحبيبة:اهلا اهلا بالقمر
:) يكن جوجو مابيحبش تخيلات زمردة
إختيار موفق
نورتينى ياجميلة واسعدنى تواجدك

حصان المرجيحة يقول...

عايز اروح اي حتة فيها بحر
و اخد ابويا و امي
و مش مهم اخد ايه معايا
المهم اني اتخنقت و عايز اغير جو هههههه
شكرا ليكي

هكذا علمنى سيدنا محمد( صلى الله عليه وسلم) يقول...

السلام عليكم ورحمة الله وبركاته
ازيك اختى الكريمة أدعوا الله ان تكونى فى عقو وعافية من الله عز وجل

هكذا علمنى سيدنا محمد( صلى الله عليه وسلم) يقول...

الرحلة : الى مكة والمدينة
هاخد معايا كل اللى بحبهم وبكون فرحان وانا معاهم.
الشنطة : بحب لما اتحرك أكون خفيف اوى اوى ومش أشيل حاجة عشان كة مش واخد شنط ( هحاول أعمل إستثناء للاب توب )

موناليزا يقول...

حصان المرجيحة
ـــــــــــــــ
أهلا بيك يافندم
:) كلنا هذا الرجل
أشكرك جدا لمشاركتك
يسعدنا دوام التواصل



**********************************


هكذا علمنى سيدنا محمد صلى الله عليه وسلم
ــــــــــــــــــــــــــــــ
وعليكم السلام ورحمة الله وبركاته
أهلا بيك يافندم
الله يكرمك
أنا الحمدلله بخير أشكرك جدا لسؤالك وماحرمنى الله من دعواتكم الطيبة
إختيار موفقك)
أشكرك جدا لمشاركتك
يسعدنا دوام التواصل

salma mohamed يقول...

أكتر مكان بتمنى أروحه دلوقتي مكة المكرمة مسقط رأسي,
ونفسي أكون جوه الحرم المكي عند الكعبه صحيح يومين مش كفايه ابدا بس لو ساعه واحده هناك بالدنيا كلها
ولو السفر هاخد فيه اتنين بس يبقى والدي واختي,
والاشياء اللي هتتاخد هي الاشياء الضروريه بس لو هقتصر على 3 حاجات يبقى مصحفي وموبايلي ولبسي.

ليس فقيرا من يحب يقول...

السلام عليكم

ازيك يا مونى يا حبيبتى

اخبارك ايه يا جميل يارب تكونى بخير

اممممممممممممممممممم

اروح فين

اروح اليونان او الواحات او مكان فيه

بحر ومرتفعات

اخد مين مش عارفه ممكن اخد صرصارة

وانوسه اخواتى اصل بابا وماما

هيبقوا تقااااااااااااااال ومش

هاعرف اهيص هههههههههههه

اخد ايه

شويه مصاصات كتييييير ولبان ولب

وكاميرا وهدوم وفلوس ومصحف صغنون اوى

كان اخويا مديهولى وايه تانى

مش فاكرة هههههههههههههههههه

هاتى بقى التذاكر

*الطالبة عفو الله *زوزو يقول...

هو فعلا انا مسافرة بعد يومين
مسافرة المانيا ان شاء الله
و الشخصين مختورين خلاص هما امي و ابي
و اول حاجة حطتها في الشنطة قرءان و هدوم و حاجات كدة
و لسة بضبط الشنطة مش حاطة كل حاجة لسة

على فكرة يا حبيبتي اللقاء المدونين اون لاين بكرة اوعي تنسى
ان شاء الله حيكون على الساعة 9 مساءا بتوقيت مصر يا ريت يكون الوقت مناسب ليك

حستناكي يا حبيتي

بنت الصالحين يقول...

* لو تحب تذهب فى رحلة ترفيهيةالآن ولمدة يومين هتروح فين ؟

الإسكندرية

ولو مسموح لك تاخد شخصان معاك هتختار مين؟.
أمي ومعلمتي

وإيه أول 3 حاجات هتضعهم فى شنطة سفرك؟

مصحف وكاميرا



جميـــــل أوي جوجو


لازم زمردة تنكشه اوي اهو لغى الرحلة هههه

موناليزا يقول...

سلمى محمد
ـــــــــ
أختى الحبيبة:اهلا اهلا بالقمر
:) اختيار موفق وربنا يعودنا قريب يارب
نورتينى سلمى الجميلة واسعدنى تواجدك


********************************


ليس فقيرا من يحب
ــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
أنا الحمدلله بخير ماتحرمش من سؤالك

لبان ولب:) وااو ماتاخدونى معاكم:)
مشاركة متميزة ياسكر
نورتينى ياجميلة واسعدنى تواجدك


**********************************



الطالبة عفو الله
ـــــــــــــــ
أختى الحبيبة:اهلا اهلا بالقمر
بالسلامة ياحبيبتى ان شاء الله
ان شاء الله ربنا يسهل والماسنجر يشتغل:)
نورتينى زوزو الجميلة واسعدنى تواجدك



*********************************



عاشقة الفردوس
ـــــــــــــــــ
أختى الحبيبة:اهلا اهلا بالغالية بعد طول غياب
:) مشاركة متميزة
تسلميلى ياغالية
نورتينى واسعدنى تواجدك