السبت، 30 يناير، 2010

الحلم الضايع

وفكرته حب حقيقى
وحسيته حبيبى بجد
أتاريها علاقة جميلة
نشأت بين زميل وزميلة
الزميلة بتحب المغامرة
وهو عاشق ليها
كانت قراءتها كتيرة
وهو موسوعة فيها
كانت بتحب اللغة
وهو أستاذ فيها
كانت جديدة على الكتابة
وهو قديم فيها
كانت تتمنى قربه
وجدته دايب فيها
وماكنش يعرف
إن أى محاولة
على أوتارها
ممكن تعمل لحن
ولأن شريطها فاضى
خالى من الألحان
فكرت اللعبة حقيقة
ودابت فى الأنغام
وبعد ليالى طويلة
فاقت من الأوهام
أتاريها حبت خيال
وصورة حلوة رسماها
لواحد عادى يعنى
ولأن خيالها واسع
ماشافتش الفرق الشاسع
مع أنه أصلاً كان بايع
وآدى آخرة الحلم الضايع
=========
رسالة لطالبات المرحلة الثانوية والجامعية على وجه الخصوص ولجميع البنات على وجه العموم:
*لا تعتقدى أن كلام شخص ما معك بطريقة مهذبة يدل على بداية قصة حب مثل الأفلام المصرية المكررة.
* لاتنخدعى بالكلام المعسول وخاصة إذا لم يكن لديك خبرة كافية لمواجهة الحياة. فالشخص المعاكس ينتظر اللحظة المناسبة لافتراسك.
* لا تبدأى بمقولة إحنا زى الأخوات لأن دى مش الحقيقة لا أنتِ أخته ولا هو أخوكِ وبلاش تضحكى على نفسك.
* سيبيه دلؤتى من غير تفكير وماتقلقيش هيعيش حياته عادى جداً وهيدور على ساذجة غيرك تصدق أنه محتاجلها.
* ضعى أمامك هدف أكبر وهو النجاح فى دراستك. وتذكرى أن أهلك مش بيخرجوكِ من البيت كل يوم الصبح عشان تروحى تحبى أو تقابلى واحد من وراهم. احترمى ثقتهم فيكِ.
* لو كنتِ عارفة أنه مقطع السمكة وديلها وهو قالك أنك حاجة تانية اعرفى أنه كداب لأنك بالنسبة له مجرد لعبة جديدة عايز يكتشفها ويعرف طريقة التشغيل اللى أكيد مش هتاخد معاه كتير نظراً لخبرته فى هذا المجال.
* ماتصدقيش حكاية الظروف اللى بتظهر فجأة وبتعطل المراكب السايرة لو شعر أن الموضوع هيدخل فى الجد.
* حذار من الانجراف وراء مشاعرك الأولية لأنك لو ماسيطرتيش عليها مش هتعرفى تتحكمى فيها بعد كده.
* لو بيحبك بجد هيخاف عليكِ من نفسك ويا هيدخل البيت من بابه لو كانت ظروفه تسمح ولو مايقدرش هينسحب بهدوء.
وأخيراً ماتقوليش أنه لعب بيكِ لأنك أنتِ من سمحتِ له منذ البداية بذلك.
============
تنويه:
ـــــــــــــ
بناء على طلب الأستاذ عبدلله يسعدنا عرض هذا الموضوع

هناك 44 تعليقًا:

تأثير الفراشة يقول...

كلامك فى محله تمامااااا

ربنا يكرمك و يبارك فيكى

تحياتى لك

Dr Ibrahim يقول...

هو فعلا كده
الموضوع شغل مراهقة مش أكتر
ولو كانت البنت فاكرة ان الشاب هيتجوزها يبقى تنسى هو اه ممكن بس دا نادر جدا ان واحد يكلم واحده ويتجوزها وان اتجوزها هيبقى هناك دوما مشاكل..
فعلا هى تبقى بتضحك على نفسها لان الانسان المحترم اللى عايز يتجوز هيروح ويخبط على باب بيتها ويطلبها من ولى أمرها مش يروح يكلمها مباشرة ..ماهى ان كلمته يمكن تكلم غيره بعد كده...

موناليزا يقول...

تأثير الفراشة
ــــــــــــــ
أختى الحبيبة:اهلا اهلا بالقمر
ربنا يعزك يارب أشكرك جدا لرايك فماتوفيقى الا بالله
نورتينى ياجميلة واسعدنى تواجدك





*********************************




د/ ابراهيم
ـــــــــــ
أهلا بيك يادكتور
عندك حق بس المشكلة ان غالبية البنات ميعرفوش ده
أشكرك جدا لتعليقك
يسعدنا دوام التواصل

بنت مصر يقول...

الله عليكي بجد

فين البنات يقروا ويعرفوا الحقيقه

ربنا يستر على البنات كلها خاصة الجيل الحالي من الطالبات في المدارس

جزاكي الله خيرا

(Joudy) يقول...

عندك حق يا مونى زمن السذاجة فات من بدرى دلوقتى إحنا بقينا فى 2010 لازم يبقى فى عقل للتفكير واتخاذ القرار والرؤية من منطلق البصيرة مش مجرد النظر

تسلمى يا جميلة ووحشتينى ووحشتنى كتاباتك كتيييييييير

دمتى بكل الخير والسعادة

د. ياسر عمر عبد الفتاح يقول...

كلام مظبوط جداُ
ليه بعض البنات بيكونوا ضحايا مجمدة جاهزة؟

طهر فؤادك يقول...

السلام عليكم ورحمة الله وبركاتة

بارك الله فيكى

نصايح جميلة وغالية لكل البنات فى المرحلة الحرجة دة (مرحلة المراهقة ) وربنا يجزيكى خير عليها اللهم امين والمسلمين ...

salwa يقول...

السلام عليكم اخت موناليزا
ما اكثرهم ضحايا الغش و النفاق
لنحمي انفسنا بتطبيق صحيح لديننا
تسلم يدك
سلام

(المهاجر الى الله) يقول...

السلام عليكم ورحمة الله وبركاته :
رسالتك للبنات قوية جدا وياريت تكون بلغت مبلغها وكل بنت تتقدر تفهم الكلام ده كويس جدا،لانها لو انزلقت مش بس بتكون خاينة لربها ولنفسها ولاهلها ، دى كمان خاينة لزوج المستقبل لانها فرطت فى مشاعر مينفعش انها تديها لاى حد الا بكلمة الله ورسوله.
كل النصائح جميلة لكن اكتر شىء شدنى ليها ،
ضعى أمامك هدف أكبر وهو النجاح فى دراستك. وتذكرى أن أهلك مش بيخرجوكِ من البيت كل يوم الصبح عشان تروحى تحبى أو تقابلى واحد من وراهم. احترمى ثقتهم فيكِ.
1_ (لو كنتِ عارفة أنه مقطع السمكة وديلها وهو قالك أنك حاجة تانية اعرفى أنه كداب لأنك بالنسبة له مجرد لعبة جديدة عايز يكتشفها ويعرف طريقة التشغيل اللى أكيد مش هتاخد معاه كتير نظراً لخبرته فى هذا المجال).كلام فى الصميم ، فعلا والله ( مجرد لعبة بيكتشفها ،او ممكن ضحية جديدة بيحاول يفترسها)


2_ (ماتصدقيش حكاية الظروف اللى بتظهر فجأة وبتعطل المراكب السايرة لو شعر أن الموضوع هيدخل فى الجد).
تحليل دقيق للموقف.

3_ (حذار من الانجراف وراء مشاعرك الأولية لأنك لو ماسيطرتيش عليها مش هتعرفى تتحكمى فيها بعد كده).
مفيش انسان مش من غير مشاعر ، لكن فعلا لو سيبنالها الحبل على الغارب هتودينا فى داهية ، التحكم فى المشاعر والانفعالات مهم جدا لاتزان حياة الانسان .

وانا باعتبر ان الرسالة دى موجهة للشباب كمان

وكمان موضوع (مايبقاش قلبك اسود) جميل جدا ونقد واقعى .
بجد والله ربنا يبارك فيكى ويعزك.

Sonnet يقول...

عجباني قوي
((سيبيه دلؤتى من غير تفكير وماتقلقيش هيعيش حياته عادى جداً وهيدور على ساذجة غيرك تصدق أنه محتاجلها.))

ABOALI يقول...

عندما يخبو نور الدين فى القلب
يبحث كل عضو عن مصلحته الخاصة ويحاول ان يشبع شهوته
وحينما تحدث الصدمة نجز على الاسنان ونصاب بالهستريا سابين الزمن الندل الوحش
اللى كان لازم يكون امور وحلو وشيك

اعتماد البنت على تقوية الدين من خلال دروس اشحنلى شكرا
و عبارات احنا فى السليم واحنا جامدين قوى
هو اللى سبب حالة التوهان

اذا سئلتى عن البنت فالاولى ان تسئلى عن الام


جميل الحلم
والاجمل ان يكون واقع

خالص تقديرى

أمل حمدي يقول...

ربنا يهدي كل أولادنا وأولاد المسلمين اللهم أمين

جزاكِ الله كل الخير يا متميزة

مرايتى يقول...

السلام عليكم ورحمة الله وبركاته

ربنا يكرمك يا حبيبتى على كلامك فى الموضوع ده لانه فعلا بقى اخطر حاجه على الشباب دى بقت موضه والى ما بتكلمش ولد فى المدرسه ..
بس تخيلى ان مش الولد الى بقى دلوقتى بس بيضحك على البنت لا كمان البنات بقت هى كمان وبقى مبدا انها عايزه تبقى زى اصحابها بتحب وبتتحب فكره مسيطره على تفكيرها كنا زمان بنرمى الحمل على الولد كله بس بجد انا بقيت بشوف بنات الولاد همه الى فريسه ليهم ربنا يهدى شباب المسلمين ويحفظهم لانه فعلاحب فى مرحله مراهقه وعمره ما حيكمل

تحياتى

حصان المرجيحة يقول...

بجد كلااام اكتر من راااائع
و ربنا يجازيكي خير

hamma يقول...

كلمات صادقة
نابعة عن إقتناع
الشرائح المتأثرة أكثر من غيرها هي الشباب و لو أن الشيوخ(جمع سيخ و شيخة) فاقت بأعمالها عفوية الشباب
حبذا لو تكرمت و كتبت عن الوسائل لعدم الإنجراف و يكون فات الوقت من خلال بعض الوقائع ...........مجرد رأي
شكرا

سبايدرمان spiderman يقول...

كلام سليم جدا
و ياريت نخص الدراسه الاول اصلاو بعدين نفكر في الحاجات ده
و عن تجربه :(

KHALED يقول...

بيعجبنى جداً إختيارك الموفق لمواضيعك و ياريت البنات الساذجة تقرا موضوعك أكيد حاجات كتير كانت اتغيرت بس نقول أية غياب الإرشاد الحقيقى ورا قصص الفشل و المصائب إللى كل يوم بنسمع عنها ربنا يهدى بنات المسلمين جميعاً

ربنا يكرمك

ঔღঔ نـــوارة ঔღঔ يقول...

معك حق بكل كلمة قولتيها

ربنا يحمي بنات المسلمين

مشكووورة ياقلبي عالبوست والنصائح الرائعة

دمتِ بحفظ الرحمن

بنجاواتى يقول...

السلام عليكم

هو الموضوع فعلا متكرر واصبح فى غالب الاحيان الحب فى فترة الدراسة لا يثمر شيئا ولكن هذا لا يمنع من وجود بعض الحالات الناجحة ولكنها اسثناء للقاعدة
وحتى مع نجاح هذه الحالات فإنها كانت ستنجح حتما من غير هذه المراهقة والتجاوز

تحياتى

ريمان يقول...

السلام عليكم


الله يفتح عليكى

ربنا يحمى بنات المسلمين يا رب


شكرا ليكى يا موناليزا

إبتسامة ملاك يقول...

السلام عليكم

وحشتينى اوووى يارب دايمآ بألف خير حبيبتى

إبتسامة ملاك يقول...

مش لاقيه كلام بعد كلامك

بجد ربنا يكرمك خير وينصرك على أعدائك يارب
ويجزيك عنا كل الخير
دمتى اختى حبيبتى
ايناس

كلمات من نور يقول...

موناليزتي الحبيبة

ربي يهدي بناتنا ويرزقهم عفة وطهارة مريم عليها السلام ويهدي شبابنا ويرزقهم عفة يوسف عليه السلام...بس إيه الحكاية فين السؤال؟

موناليزا يقول...

بنت مصر
ــــــــ
أختى الحبيبة:اهلا بيكِ
ربنا يكرمك
أشكرك جدا لرايك
وها نحن نبعث لهم بهذا النداء لعلهن يتعظن
نورتينى ياجميلة وارجو دوام التواصل



********************************


جودى
ــــــــ
أختى الحبيبة:اهلا اهلا بالقمر بعد طول غياب
ده المفروض فعلا ولكن للاسف مازال هناك فتيات يتمتعن بالسذاجة وكل واحدة بتعتقد ان حبيبها مختلف عن الاخرين

تسلميلى ياقلبى
وأنتِ كمان وحشتينى جدا
نورتينى حودى الجميلة واسعدنى تواجدك


**********************************


د. ياسر عبدالفتاح
ـــــــــــــــــــ
أهلا بيك يادكتور بعد طول غياب
"ضحايا مجمدة جاهزة"
تعبير بليغ جدا
والاجابة لانها يا عبيطة يا بتستعبط:)
أشكرك جدا لتعليقك
يسعدنا دوام التواصل


*********************************



طهر فؤادك
ـــــــــــ
وعليكم السلام ورحمة الله وبركاته
أهلا بيك يافندم
ربنا يكرمك ويتقبل دعائك اللهم امين
ولعلها تأتى بفائدة:)
أشكرك جدا لتعليقك
يسعدنا دوام التواصل


**********************************


سلوى
ــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
عندك حق
أشكرك جدا لرايك
نورتينى سلوى الجميلة واسعدنى تواجدك


**********************************


المهاجر الى الله
ـــــــــــــــ
وعليكم السلام ورحمة الله وبركاته
أهلا بيك أستاذ طارق
أرجو أن يقرأ موضوعى وتعليقك عليه الكثير لعلهم ينتبهوا لامور المفروض انها بديهية
أشكرك جدا لتعليقك الدقيق وعجبنى رأيك فى كل جزئية
ومن دواعى سرورى أن نجد رأى الرجال فى هذه المواضيع واتفاقهم فيما نقول
وأشكرك جدا لرايك على موضوعى الاخر
ربنا يكرمك يارب
ماحرمنى الله من تواجدكم المميز
يسعدنا دوام التواصل


*********************************



سونيت
ـــــــ
أختى الحبيبة:اهلا اهلا بالقمر
أشكرك جدا لرايك
ودى فعلا الحقيقة
نورتينى ياجميلة واسعدنى تواجدك


********************************


ابو على
ــــــــــــ
أهلا أهلا بصاحب التعليقات المميزة
عندك حق جدا فى كل ما قلت
وكالعادة لا نجد بعد كلامكم كلام يقال
أشكرك جدا لتعليقك
يسعدنا دوام التواصل


*********************************


أمل حمدى
ـــــــــ
أختى الحبيبة:اهلا اهلا بالقمر
ربنا يكرمك يارب ويتقبل دعائك اللهم امين
أشكرك جدا لتعليقك
نورتينى حبيبتى واسعدنى تواجدك


*******************************

موناليزا يقول...

مرايتى
ـــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
أشكرك جدا لرايك
وفعلا انا عن نفسى معتقدة ان استحالة ولد يقدر يضحك على بنت الا لو هى أعطت له الفرصة
نورتينى ياجميلة واسعدنى تواجدك


**********************************


حصان المرجيحة
ــــــــــــ
أهلا بيك يافندم
ربنا يكرمك واشكرك جدا لرايك
يسعدنا دوام التواصل


********************************


هاما
ـــــــ
أهلا بيك يافندم
أشكرك جدا لرايك
والوسائل ذكرتها هنا فى اول الموضوع بين الطلبة والطالبات وفى موضوع "قابلينى على الشات" فلو فيه اى حاجة تانية ياريت تفكرنى بيها
يسعدنا دوام التواصل


********************************


سبايدر مان
ـــــــــــ
أهلا بيك يادكتور
أشكرك جدا لرايك
ومتفقة معاك جدا فلكل مرحلة عمرية ولها اهتمامها الخاص
يسعدنا دوام التواصل


*********************************


خالد
ــــــ
أهلا بيك استاذ خالد
ربنا يكرمك يارب فماتوفيقى الا بالله
عندك حق فلو فيه أم توجه أو أب يتابع كانت الدنيا اختلفت كثيرا
أشكرك جدا لتعليقك
يسعدنا دوام التواصل


********************************


نوارة
ـــــــ
أختى الحبيبة:اهلا اهلا بالقمر بعد طول غياب
ربنا يعزك يارب واشكرك جدا لتواجدك
نورتينى ياجميلة ووحشتيينى


**********************************


بنجاواتى
ــــــــ
وعليكم السلام ورحمة الله وبركاته
أهلا بيك يافندم
أشكرك جدا لرايك
يسعدنا دوام التواصل


********************************


ريمان
ـــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
الشكر لله ياقلبى
ربنا يكرمك يارب
نورتينى ريمو الجميلة واسعدنى تواجدك


*******************************


ابتسامة ملاك
ــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
وأنتِ كمان ياحبيبتى كلك ذوق

حلوة الدعوة دى من ده على طول يا نوسة الله يخليكى:)
ربنا يسعد قلبك يارب
نورتينى ياجميلة واسعدنى تواجدك


********************************


كلمات من نور
ــــــــــــــ
أختى الحبيبة:اهلا اهلا بالقمر
كنت لسه جاية أسأل عليكِ:)
ربنا يتقبل دعائك يارب
سؤال حصريا لكِ فقط:) وبصفتك أم
لو كان عندك بنت وقالت لك انها بتحب زميلها فى الجامعة كنتِ هتتصرفى معاها ازاى؟
أى خدمة:)
نورتينى ياجميلة ووحشتييييييينى جدا
وتسعدينى دايما بتواجدك

*الطالبة عفو الله *زوزو يقول...

بتكابي اشعار من ورانا يا جميل
جميل اوي النثر الي كتبتيه في الاول عجبني اوي تسلم ايدك
اما عن الموضوع فربنا يهدي شبابنا لازم اولا و اخيرا يعرفوا الضوابط الشرعية لعلاقة الجنسين
الله المستعان
تحياتي

كلمات من نور يقول...

أنا إيه اللي خلاني أسأل

عموما أنا اللي جبته لنفسي

حاقولك على سر ..أنا عندي بنوته ..تبقى بنت خالتي ..بس مامتها حملت فيها في نفس وقت حملي في ابني الكبير ..وكل ما كبرت كلما عاملتها بمنطلق بنوتي وبيني وبينها علاقة حب دايما باقي بنات خالاتي و أخواتي البنات بيتغاظوا مننا بسببها ...بنوتي دي دايما تتكلم معايا وتستشيرني حتى وهي بعيده آلاف الأميال ..بس كل فترة نتكلم عالانترنت وتحكيلي و أنصحها وتسمع كلامي حبا في الله وطاعة لأوامره ..حقيقي يمكن لو بنتي بجد مكنتش سمعتلي كده زيها .ربي يخليلنا كل البنات والشباب ويهديهم آجمعين...

أم .. بوبه يقول...

بجد كلامك حلو جداا وواقعى .. بجد عجبنى جداااااااا

وبالذات

لأن شريطا فاضى وخالى من الألحان


وأتمنى إنك نتورينى هنا

http://awraktanbod.blogspot.com/

أحمد شريف يقول...

السلام عليكم
أنا مؤيد تماماً لشيء أن من يحب عليه أن يطرق الأبواب في النور ومن مدخلها الأمامي
أذيع لكِ سراً .. سأعتبر أنك وافقتِ عليه

حينما من الله علي بفتاه رأيت أنها سكنت قلبي ورأيت في نشاطها وعطائها تلاحماً مع فكري وطموحي وغايتي من الدنيا وكان هذا في السنة الجامعية الأولى لي ، حادثتها في أول مرة وأول ما خاطبتها به بعد أن بُحت لها بمشاعري أن تخبر أهلها وطرقت أنا بنفسي باب أهلها بعد ذلك
نعم لم يكتمل الموضوع ولم يشأ الله أن يدوم سوى لأسابيع قليلة لكن يبقى أن احترمت الفتاة وكنت أميناً عليها وعلى نفسي ومجتمعي وكما دخلت باحترام خرجت بتقديرٍ من أسرتها
نعم لم أكرر الكرة من جديدٍ من بعدها لكن إن حدث سيكون طرقي كذلك في العلن فهو أخصر الطرق للفلاح

موناليزا يقول...

الطالبة عفو الله
ــــــــــــــــ
أختى الحبيبة:اهلا اهلا بالقمر
:)من وراكم ازاى بس كل حاجة بكتبها بعرضها على طول
أشكرك جدا لرايك فيه انتِ الوحيدة الى الان اللى قلتيلى رأيك فيه:)
هو فعلا لازم بس للاسف مش حاجة لازمة بتتعمل
نورتينى زوزو الجميلة واسعدنى تواجدك



*********************************


كلمات من نور
ــــــــــــ
أختى الحبيبة:اهلا بعودتك ياجميلة
:) بتقولى كده من ورا قلبك أنا عارفة:)
عشان تعرفى بس إنك جميلة:)
ربنا يخليكى لأحبائك دايما
نورتينى وتسعدينى دائما بتواجدك



**********************************


أم - بوبة
ـــــــــــــ
أختى الحبيبة:اهلا اهل بالقمر
أشكرك جدا جدا لرايك
انا فى الطريق:)
نورتينى ياجميلة واسعدنى تواجدك


*********************************



أحمد شريف
ــــــــــ
وعليكم السلام ورحمة الله وبركاته
أهلا بيك أستاذ أحمد
سرك فى المدونة:) يعنى قول براحتك

ليت الجميع بنفس احترامك لنفسك وللاخرين
ربنا يديك على قد نيتك الطيبة
أشكرك جدا لمشاركتك
يسعدنا دوام التواصل

(أم البنين) يقول...

عندك حق
والله بيصعب عليّه قلوب البنات...وكمان الشباب
لما كل واحد منهم يترجم اللطف...على أنه حب
سبحان الله
اللهم حصن أولادنا بغض البصر وحفظ الجوارح

salma mohamed يقول...

كلام مظبوط تمام,
بس ياريت البنات تفهم وتعامل ربنا وياريت الشباب يتقوا ربنا في بنات الناس,
والصح مالهوش غير طريق واحد,
أنا دايما بقول عبارة مقتنعه بيها تماما واتمنى كل البنات تعمل بيها:
كثرة الدق على النوافذ لا يمكن أن تجدي طالما للدار باب.

شمس النهار يقول...

ماشاء الله ماشاء الله
بجد
كلام جميل صح في الصميم

سلامي

موناليزا يقول...

أم البنين
ـــــــــ
أختى الحبيبة:اهلا اهلا بكاتبتى المفضلة بعد طول غياب
ربنا يكرمك ويتقبل دعائك اللهم امين
أشكرك جدا لتعليقك
نورتينى ياجميلة واسعدنى تواجدك



*******************************



سلمى محمد
ـــــــــ
أختى الحبيبة:اهلا اهلا بالقمر
أشكرك جدا لرايك ولتعليقك
ربنا يحميكى ودمتِ سالمة
نورتينى ياجميلة واسعدنى تواجدك




********************************



شمس النهار
ــــــــــ
أختى الحبيبة:اهلا اهلا بالقمر
ربنا يعزك أشكرك جدا لرايك
نورتينى شموسة الجميلة واسعدنى تواجدك

الوفية للأبـــد -- مها أحمد يقول...

موناليـــــزا .........

بجد موضوع في غاية الاهمية فعلا و اكيد معاكي حق في كلمة قولتيها

بس صدقيني دي مرحلة كل بنت بتمر بيها حتى لو مع نفسها
بس لازم تحصل لانها في سن بيحصل فيه التغير الجسمي و التغير الهرموني و التغير العاطفي للبنت و الولد بس البنت هي اللي بتتأثر أكتر لانها مخلوق عاطفي اكتر من الراجل


عموما شكرا يا موناليزا يا حبيبتي على نصايحك دي و يا ريت الكل يسمعها بجد

انا سعيدة بيكي اوي و اكيد ضيفت مدونتك على القايمة المهمة عندي لانها بجد تستاهل و الله

تقبلي مروري الاول يا صديقتي الغالية و ان شاء الله ليس الاخير

مع خالص حبي و تقديري

wella يقول...

كلام جميل ملوش مثال
مقدرش اقول حاجة عنة

بس مين اللى يعمل بية

بجد البنات عوزين توعية فى الموضوع دة بجد

momken يقول...

بوست رائع ونصيحه غاليه جداً

بس مش لبنات ثانوى فقط

ممكن نعممه شويه ونبعته لجميع بنات حواء

دمتى بخير


تحياتى

لولا وزهراء يقول...

السلام عليكم ورحمة الله وبركاته
كلامك مس قلبي
حلوة قوي حكاية الظروف اللي بتظهر فجاءة وتعطل المراكب السايرة اذا الموضوع دخل في الجد
ربنا يحميكِ ويفرح قلبك بكل خير ويسعد كل لحظات حياتها

شعرك ده ياقمر؟ مرتب وحلو جدا والله تسلم اناملك

جميل ان كل حاجة حباها هو كان استاذ فيها
هي كانت ضحية
وقلبها كان فريسة

موناليزا يقول...

الوفية للابد مها أحمد
ــــــــــــــــــــ
أختى الحبيبة:اهلا بيكِ فى زيارتك الاولى
متفقة معاكِ طبعاً إنها مرحلة طبيعية بيمر بيها الانسان عموما ولكن يجب وجود ضوابط حتى لا تنجرف فى تيار مشاعرها إلى مالاتحمد عقباه

ربنا يكرمك ياحبيبتى واشكرك جدا لرايك فما توفيقى الا بالله
إضافتك لمدونتى عندك من دواعى سرورى طبعاً
نورتى مدونتى مها الجميلة وفى انتظارك دائما



**********************************


ويلا
ــــــ
أختى الحبيبة:اهلا بيكِ فى زيارتك الاولى
ربنا يكرمك أشكرك جدا لرايك ولتعليقك
وها أنا أقوم بهذا من خلال موضوعاتى لعل وعسى:)
نورتى مدونتى وفى انتظارك دائما



********************************


ممكن
ـــــــ
أهلا بيك يافندم بعد طول غياب
ربنا يكرمك أشكرك جدا لرايك
فعلا هو للبنات عموما
يسعدنا دوام التواصل



*******************************



لولا وزهراء
ـــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يعزك يارب أشكرك جدا لرايك ولدعائك
:) ايوة ياحبيبتى انها كلماتى الخاصة وكل ما يكتب فى مدونتى فهو نتاج قلمى
ميرسى ياقلبى لانك رفعتى من روحى المعنوية
هو ده بجد اسمه شعر؟
الجميلة "زوزو" قالت عليه "نثر" كدة انتوا لخبطونى وعايزة متخصص يقولى اللى انا كتباه ده اسمه ايه؟:)

نورتينى ياجميلة واسعدنى تواجدك

لولا وزهراء يقول...

لولا وزهراء
ـــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يعزك يارب أشكرك جدا لرايك ولدعائك
:) ايوة ياحبيبتى انها كلماتى الخاصة وكل ما يكتب فى مدونتى فهو نتاج قلمى
ميرسى ياقلبى لانك رفعتى من روحى المعنوية
هو ده بجد اسمه شعر؟
الجميلة "زوزو" قالت عليه "نثر" كدة انتوا لخبطونى وعايزة متخصص يقولى اللى انا كتباه ده اسمه ايه؟:)

نورتينى ياجميلة واسعدنى تواجدك

" سعدت بترحيبك ربنا يعزك ويكرمك ويسعد قلبك ويفرحك...ده اسمه شعر جمل قصيرة تنتهي بقافية وموزون هما بس اول 3 ابيات او 4 عانوا عايزين يضبطوا شوية بس انا رتبت جملهم على حسب تذوقي ليهم وطلع شعر هااااااايل واللهع مس قلبي بالرغم من بساطة كلماته الا انها كانت معبرة جداً تمس القلب
النثر هو قصة لها جمل طويلة تنتهي عادتاً بسجع كما في كتاب الاغاني للاصفهاني قد درسناه في المرحلة الثانوية وقد يتضمن المحتوى قصة فكاهية او دعابة ...انتي مبدعة سلم لنا فيض قلمك
(:

لولا وزهراء يقول...

وفكرته حب حقيقى
وحسيته بجد حبيبى

أتاريها علاقة جميلة
نشأت بين زميل وزميلة

الزميلة بتحب المغامرة
وهو عاشق ليها

كانت قراءتها كتيرة
وهو موسوعة فيها

كانت بتحب اللغة
وهو أستاذ فيها

كانت جديدة على الكتابة
وهو قديم فيها

كانت تتمنى قربه
وجدته دايب فيها

وبمحاولة منه للعب على اوتارها الفاضية
..
عملت لحن!!
لأن شريطها فاضى خالى من الألحان

فكرت اللعبة حقيقة
ودابت مع الأنغام

وبخيالها بدئت ترسم دنيا م الاحلام

وبعد ليالى طويلة
فاقت من الأوهام

على انه شخص عادي وده اثبتته الايام

وأتاريها حبت صورة ..مجرد خيال

ولأن خيالها واسع
ماشافتش الفرق شاسع

مع أنه كان في الاصل بايع
وآدى آخرة الحلم الضايع

واخرة اللي تجري بخيالها ورا الاوهام


على قد ما قدرت حاولت اضبط قافية الابيات ...بس انا مش شاطرة قوي تعرفي انتي عشان كتباه بأحساسك حسناه قوي وحبناه قوي مش لازم القافية تكون موجودة ومش لازم الوزن المهم الاحساس تعرفي لو دونتي سطور فاضية هنحسها لانها طالعة من قلب جميل زيك (:

موناليزا يقول...

لولا وزهراء
ـــــــــــ
أهلا اهلا بالقمر
ماتحرمش من تواجدك ياحبيبتى ولا من متابعتك التى تسعدنى حقاً
وأشكرك بجد لانك عرفتينى الفرق بينهم هو انا اه درسته فى ثانوى بس طبعا نسيت:)
وتذوقك لكلماتى بجد نابع من ذوقك وجمالك الداخلى
:) والله ياجميلة تعليقاتك دى على دماغى من فوق
وبجد مش لاقيه كلام يوصف مدى امتنانى وشكرى من تعليقك
ربنا يسعدك ويفرح قلبك ويرزقك كل الخير
نورتينى حبيبتى وفى انتظارك دائما

نسيبه يقول...

السلام عليكم ورحمة الله وبركاته
معاكي كل الحق بس ياريت البنات تسمع كلامك لأن وقتها بتكون البنت مسحورة بالكلام المعسول والمغامرة التي تعيشها ربنا يحفظ بنات المسلمين من كل سوء ويزوج أيامي المسلمين

موناليزا يقول...

نسيبة
ــــــــ
وعليكم السلام ورحمة الله وبركاته
أهلا اهلا بالقمر
وأنا كمان أتمنى هذا
اللهم احفظ بناتنا وشبابنا من كل شر اللهم امين
نورتينى حبيبتى واسعدنى تواجدك