السبت، 27 فبراير 2010

سامحينى


"سامحينى" هى مجرد كلمة لكن أكيد لها وقع السِحر على من تسمعها. لأنها ستشعر وقتها بمدى أهميتها ومكاناتها لدى قائلها وأن زعلها أو غضبها كان من شخص يستحق أن تعطى له اهتمامها.
وخاصة إذا ما عبرت عن غضبها أو زعلها هذا وأخبرته وتكون الطامة الكبرى من وجهة نظرها وقتها أن يقابلها بفتور أو إستهزاء.
ولكن للأسف قلما نسمع هذه الكلمة وكأنها إنتقاص من قدر قائلها. رغم أنها قد تزيل أى شحناء أو بغيضة فى قلب أى شخص مجروح لأنها تدل على الشعور بالندم وصدق الأسف وتعطى شعور بأن من يقولها يدرك معناها ولن يقوم بالإيذاء مرة أخرى.
ولكنها تظل حلم يراودنى أن أسمعها يوماً ممن تسببوا فى إيذائى.
أما عن كلمة"أنا آسف" لا أشعر بمدى قوتها كطلب السماح.
لأن من وجهة نظرى أنها مجرد كلمة وخلاص. فض مجالس زى ما بيقولوا وممكن تتقال لو اللى قدامك حس إنك صعبان عليه أو أن الكلمة دى هترضيك وهتنهى الموقف.
ده غير أنها المفروض تتقال فى مواقف مختلفة زى مثلاً لما تخبطنى غصب عنك أو تتأخر دقايق عن ميعادك لكن لما تتسبب فى أذى نفسى مابتكونش كفاية على الأقل بالنسبة لى .
وده يمكن لأنى بحافظ كويس جدا على أى كلمة بقولها للى قدامى حتى لو بهزار وبالمقابل بتوقع أن اللى قدامى هيتعامل معايا بالمثل.
ويصعب عليا جدا لما أزعل من حد وأقوله وأجده يقابل هذا باستهزاء. أو مثلاً بدل ما يكحلها بالإعتذار أجده يعميها بدعابة بايخة أو يلومنى أنى ما ببقبلش الهزار!.
ورغم حرصى الشديد أنى مازعلش حد إلا أنى لو عرفت أن فيه حد زعلان منى ما ارتاحش غير لما أبين له وجهة نظرى ويحصل عتاب بيننا واعتذر له وفى الآخر لازم يكون الموضوع انتهى من جواه وأصبحت نفسه بالنسبة لى صافية حتى لو لم أكن على علاقة وثيقة به.
لكن طلب السماح بيكون قائلها حاسس بجد بالندم والأسف أنه كان السبب فى إيذائك .
ولذلك ومن موقعى هذا بقول لأى حد زعلان منى ويشعر أنى غلطت فى حقه أو قصرت معاه
" سامحنى ماقصدتش أبداً أزعلك".

===============

سؤال جانبى:
ــــــــــــــــــــ
* لمن تقول "سامحنى" الآن عن طريق التليفون؟.
ولمن ترسل "سامحنى" الآن كرسالة موبايل أو إيميل؟.
ولمن تقولها مباشرة وأنت تنظر فى عينى مستقبلها؟.
مع ذكر الموقف.

هناك 21 تعليقًا:

P A S H A يقول...

يا باااي ع الإحراج .. كسفتيني بصراحة (وش مكسوف) .. خلاص يا ستي أنا مسامحك
هههههههههه

كل سنة وحضرتك طيبة وبألف خير إن شاء الله .

بوست جميل كالعادة .. ربنا يكرمك يا رب .

وكالعادة برضه هاعمل نفسي ما شفتش الأسئلة اللي في الآخر لإني بصراحة محتاج مدونة بحالها أعتذر فيها لناس كتييييييير جداً زعلتهم مني .. يمكن ما عنديش الشجاعة دلوقت إني أعتذر لهم ع الملأ .. بس والله بادعي لهم كلهم بظهر الغيب بكل خير وبصلاح الأحوال.

ممممم .. بس ممكن مؤقتاً أقول لي : سامحني وأنا عارف ليه !!

:))))

تحياتي





















ك









:))

سلام

- ملحوظة :
سامحيني على الإطالة !!

غير معرف يقول...

كل سنة وانتي طيبة

وحشتيني ياقمر

كلامك جميل زيك

التسامح والاعتذار شيء جميل لكن في ناس مستحيل تعتذر وبتعتبرها اهانة

ربنا يهدي

بالنسبالي مفيش حد زعلان مني ولا بيني وبين اي حد اي خلاف والحمد لله

بس مع ذلك

سامحوووووووني مكنش قصدي :)

متحرمش منك ياحبيبتي

موناليزا يقول...

باشا
ــــــ
أهلا بيك يافندم
:)
وحضرتك بخير
ربنا يعزك أشكرك جدا لرأيك فماتوفيقى الا بالله

خلاص بلاش على الملأ روح لكل واحد او كلمه وعرفه انك ماتقصدتش نزعلهم

:)

فى مدونتى حضرتك تطول زى ما يعجبك
نورتنى واسعدنى تواجدك



*********************************



نوارة
ـــــــ
أختى الحبيبة:اهلا اهلا بالقمر بعد طول غياب
وانتِ طيبة ياحبيبتى
فينك من زمان
يارب تكونى بخير
ربنا يعزك اشكرك جدا لرايك
عندك حق جدا
يارب دايما:)
نورتينى حبيبتى واسعدنى تواجدك

♥نبع الغرام♥♪≈ يقول...

السلام عليكم

موضوعاتك جميل زيك حبيبتى

يارب يكرمك يارب ويجعلها بميزان حسانتك

انا بقا مافيش حد معين اقوله
بس ممكن اقولها لاى انسان جرحته بدون قصد
دمتى حبيبتى
بكل الخير

ذكرى رحيل قلم يقول...

السلام عليكم
ممكن اقول علي حسب الموقف وممكن يكون الاخري مكبراها شويا من وجهة نظرها

بس انا مش بقول لحد لا انا اسف ولا سمحيني
ربنا بيسامح اما الانسان معتقدش انه يعرف حاجة عن المسامحة

عايش... ولكن !!!! يقول...

موضوعك فكرنى بحاجات كتير زمان بجد
بس معلش اسمحيلى ابعد عن الاسئله لانى مش هقدر احكى
بس انا من عادتى انى لما بكون غلطان بعتذر ومحبش حد يبقى زعلان منى
والحمد لله محدش افتكره زعلان منى غير حد كان قريب منى جدااا والاعتذار سواء منه او منى مش هيفيد بشىء

ذكرى رحيل قلم يقول...

بخصوص الاسئلة

nobody
nobody
nobody

ذكرى رحيل قلم يقول...

علي فكرة ممكن الانسان يقول سمحني وسمحيني باي شكل

وفي الاخري ابد لا توجد مسامحة من الطرف الاخر يبقي ليه يغامر بحرقة دم مرة اخري

ليس فقيرا من يحب يقول...

انتى عسوله اوى يا مونى

بوست جميل ورقيق

سامحينى اقولها لمين الصراحه مش عارفه

بس اقولها لاى حد غلطت فى حقه من غير ما

اخد بالى

ربنا يسعدك ويعزك يارب ياروح قلبى

يارب تكونى بخير

موناليزا يقول...

إبتسامة ملاك
ـــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ميرسى لذوقك ياحبيبتى ماتحرمش منك
مين ممكن يزعل منك أصلاً :)
نورتينى انوسة الجميلة واسعدنى تواجدك



*********************************


ذكرى رحيل قلم
ــــــــــــــ
وعليكم السلام ورحمة الله وبركاته
أهلا اهلا بالقمر
طب افرضى حد قالك انه زعلان منك وانتِ شايفة انك صح بتتصرفى ازاى معاه؟

---
ازاى طيب مايبقاش فيه مساحة للعتاب
أمال فين تطبيقنا للحديث الشريف" لايهجر المسلم أخاه فوق ثلاث ليالِ يعرض هذا ويعرض هذا وخيرهما من يبدأ بالسلام"

وبعدين مش يمكن اللى زعلنا ده ماكنش يقصد!

مش عارفة بجد بس يمكن لانى مابحبش الخصام والزعل فبحاول احافظ على العلاقة قدر المستطاع

أشكرك جدا لتعليقاتك ولمشاركتك
نورتينى ياجميلة واسعدنى تواجدك




*********************************



عايش ولكن
ـــــــــــ
أهلا بيك أستاذ علاء
اوكى احتراما لرغبتك هنحترم صمتك
مع احترامى لرأيك انا شايفة ان الاعتذار مهم جدا
حتى لو العلاقة هتتقطع بس يبقى فيه احترام متبادل وذكرى طيبة بدل ما كل واحد يفتكر جرح التانى ليه

أشكرك جدا لمشاركتك
نورتنى واسعدنى تواجدك



*********************************



ليس فقيرا من يحب
ـــــــــــــــ
أهلا اهلا بالقمر
:) ده بس من ذوقك
ماتحرمش من تعليقاتك الجميلة ووجودك المتميز
نورتينى ياجميلة وأسعدنى تواجدك

كلمات من نور يقول...

* لمن تقول "سامحنى" الآن عن طريق التليفون؟
ولا حد
ولمن ترسل "سامحنى" الآن كرسالة موبايل أو إيميل؟

للأستاذ أحمد عبد المنعم على مدونتي وتدوينتي الاخيرة حيث اشعر انني أخطأت في حقه ....

ولمن تقولها مباشرة وأنت تنظر فى عينى مستقبلها؟.

لزوجي علشان لما بيكون عصبي بيزعل و يزعلني و أنا اللي أصالحه مش هو ...


وحشتيني يا فتاتي وربي ميجيبش زعل بين الكل ويسامحنا ويعفو عنا ويرحمنا برحمته الواسعة ....تحياتي

Lady E يقول...

دي حاجة بتدرس في اللغات يا موناليزا

ان لما حد يعتذر من حد يقول له بعتذر عن كذا أو سامحني مش انا اسف

الأسف في اللغة بيبقى لو حصل وفاة أو خبر مؤسف فتلاقي الشخص بيقول انا اسف اني سمعت الخبر ده

فعلا في فرق في معاني واحساس الكلام

دمتي بخير

جنّي يقول...

السلام عليكم

تعرفي اختنا الطيبة ان ديننا وقرآننا بسط هذه المسألة ولو وعاها الناس لخلت المحاكم من كثير من القضايا واقرأي لكلام ربنا سبحانه وتعالى :

{وَلا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ }فصلت34

وبكلمة سامحني يحول العدو لصديق حميم قريب .. ليتنا لا نغفل عنها دائما اذا اسئنا لاحد ..

اما موقف خاص فلن اتورع ابدا في الاعتذار عند الاساءة لاي شخص ولا يحضرني موقف الآن .. ولو هناك حد زعلته ها اتصل بيه واقوله سامحني شكرا ..

تحيتي وسلامي

Single Mummy يقول...

عزيزتى موناليزا

اية الكلام الجامد جدا دة البوست رائع واللة كالعادة وبالنوسبة للأسئلة انا هارد عليهم بس بطريقتى يعنى بسرعة هاجرى على الناس اللى المفروض اعمل معاهم كدة وهاعملة؟ اية رايك مش الفعل احسن من القول فقط بس
متشكرة بجد على الدفعة دى
تحياتى وقبلاتى

مهموهة أحمد يقول...

موناليــــزا ..........
وحشتيني خالص يا حبيبتي و الله
و بجد موضوع اكتر من رائع و الله و فعلا كلمة سامحني او سامحيني مليانة معاني و مشاعر جميلة رقيقة فوق الوصف و الله

اما عن السؤال الجانبي ؟؟؟
اقول سامحيني في التليفون لماما حبيبتي لاني اتغربت مع جوزي و بعدت عنك و انا بتمنى و لا ثانية تضيع من عمري و انا بعيدة عنك بس سنة الحياة هنعمل ايه ؟؟؟

و اقول سامحيني في الايميل لدكتورة عندي كنت متخيلاها اختي و هي حسستني بكده في اوقات بس لقيت اني حتى و لا هامش في حياتها الا وقت ما تبقى عايزة مصلحة او حاجة مني الاقيها تتقرب مني بشكل رهيب -- فبقولها سامحيني اني رسمتك اختي بجد و انتي ما تستاهليش

و اقول سامحني في عين حبيبي و جوزي صحيح انا ما غلطتش فيه و الحمد لله
و بتمنى عمري ما نغلط مع بعض ابدا
بس بقوله سامحني يمكن انا اكون مقصرة في حبك او مقصرة في وصف حبي ليك
و ربنا يخلينا لبعض و يبعد عننا كل شر يا رب


خالص حبي يا موناليزا و شكرا ليكي يا حبيبتي

موناليزا يقول...

كلمات من نور
ـــــــــــــــ
أهلا اهلا بالغالية
إيه رأيك فى الصورة؟
هروح أشوف اى تدوينة تقصدى:)
:) ربنا يخليكم لبعض طول عمرك طيبة وقلبك أبيض

ربنا يسمع منك ويبعد عن المسلمين اى شحناء
وانتِ اكتر ياحبيبتى
يارب دايما تكونى بخير
وماحرمنى الله من تواجدك المتميز



********************************


ليدى اى
ــــــــــ
أهلا اهلا بالقمر بعد طول غياب
فعلا فيه فرق كبير بينهم ومع ذلك قليلا ما نسمع كلمة "أنا آسف" إذا ما أخطأ أحدهم
نورتينى حبيبتى وميرسى على المعلومة




*******************************



جنى
ـــــ
وعليكم السلام ورحمة الله وبركاته
أهلا بيك أستاذ سعيد
ياااه تعرف ان الموضوع ده واجعنى بجد
حينما أقرأ كلام الله وأجده لا يطبق
رغم ان فيه ناس بتقرأه عادى ومتعودين يختموه كمان بس تقول ايه لقد ختم الله على قلوبهم وأبصارهم غشاوة

أشكرك جدا لمشاركتك ولتفكيرك
نورتنى واسعدنى تواجدك



*********************************


سنجل مامى
ـــــــــــ
أختى الحبيبة:اهلا اهلا بالقمر
أشكرك جدا لرايك فماتوفيقى الا بالله
الله عليكِ
:) ايوة طبعا كده أحسن كتير
نورتينى ياجميلة واسعدنى تواجدك



********************************


الوفية للابد مها احمد
ـــــــــــــــــــــ
أختى الحبيبة:اهلا اهلا بالقمر
وأنتِ كمان ياحبيبتى ويارب دايما تكونى بخير

فعلا عندك حق
:) هى اكيد مسامحاكِ وبتدعيلك كمان

مع احترامى لاجابتك التانية بس شايفة اللى يستحق الكلمة دى منك بجد هى نفسك

:) ربنا يسعدكم ويخليكم لبعض

سعيدة جدا بمشاركتك
نورتينى مها الجميلة

مشخبطاتي يقول...

السلام عليكم..

تدوينة (لطيفة)

كثيرأ ماأفكر متى أقولها..فأنظر إلى شخصي ومتى أحب سماعها..ثم أقارن ..!

وهي فعلاً أفضل بكثير جداً من كلمة أنا آسف..تشبيه جميل جداً ..شكراً عليه.


الأسئلة محرجة جداً :D

تحياتي.

salwa يقول...

السلام عليكم اخت موناليزا
اولا بمناسبة المولد النبوي الشريف
اطيب التمنيات لكل الامة و اعاده الله علينا بافضل الاحوال
عن الادراج انه رائع
و ما كان من القلب يصل للقلب
خاصة بموصوع التسامح ,فسرعان ما يتضح
الاسود من الابيض و الصح من الخطء
تسلم يدك
سلام

رفقة عمر يقول...

ازيك موناليزا
يارب تكونى بخير

للاسف مافيش حد زعلته علشان ااقوله سامحنى
بالعكس انا فيه ناس كتير زعلتنى ومحتاجه منهم يقولولى سامحينى

أميرة الأحلام يقول...

حبيبتى حلو اوى الموضوع ده
عندك حق فعلا في الي قولتيه قد ايه كلمه سامحينى بيكون لها تأثير مختلف تماما عن كلمه اسف
انا عن نفسي بحس فعلا بان الي بيقولها لي بيكون فعلا نادم على الي عمله معايا عكس كلمه انا اسف بحس انها مجرد كلمه تتقال للخروج من موقف معين وخلاص من غير الاحساس فعلا بالغلط
واكيد لن اتهاون في انى اقولها لاي حد حاسه انى زعلته منى لانى مابحبش حد يزعل منى ولا بحب ازعل حد ولو حصل ده بيكون غصب عنى
دمتى في حفظ الله دائما

موناليزا يقول...

مشخبطاتى
ــــــــــ
وعليكم السلام ورحمة الله وبركاته
أهلا بيك يافندم
أشكرك جدا لرايك ولتعليقك
نورتنى واسعدنى تواجدك




********************************




سلوى
ــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك واشكرك جدا لتهنئتك ولتعليقك
نورتينى سلوى الجميلة واسعدنى تواجدك




*********************************



رفقة عمر
ــــــــــ
أختى الحبيبة:اهلا اهلا بالقمر بعد طول غياب
انا الحمدلله بخير ماتحرمش من سؤالك

بصى انتِ تيجى تقعدى جنبى:)
نورتينى ياجميلة واسعدنى تواجدك



*********************************


اميرة الاحلام
ــــــــــــ
أهلا اهلا بالقمر
أشكرك جدا لرايك ولتعليقك
نورتينى ياجميلة واسعدنى تواجدك