الاثنين، 1 مارس، 2010

جوجو و زمردة (15)


كانت "زمردة" تلعب مع شقيقها "جوجو" ففازت عليه. وإيذاء غيظها له بكلماتها قال لها:
- يابنتى أنا اللى سيبتك تغلبينى بمزاجى.
- ليه بقى؟.
- لأنك أختى الصغيرة.
- لأ.. لأنك ماتقدرش.
- أصل أنتِ ماشوفتيش أنا عملت إيه النهاردة فى المدرسة؟.
- عملت إيه يعنى؟.
-فاكرة "رمزى" الولد الضخم اللى معانا فى المدرسة والمشهور بأنه بيكعبل العيال وأول مايقعوا على وجههم ياخد ساندوتشاتهم ويأكلها قدامهم والعيال بتبقى ملبوخة فى الدم اللى نازل منهم ومتغاظين من الفطار اللى اتسرق.
- آه فاكراه طبعاَ .. ماله؟.
-كان عايز يعمل معايا كده النهاردة بس أنا كنت مراقبه وماديتوش فرصة ولكنه نجح فى ان يفلت من مراقبتى ليفاجئى بوقوفه أمامى ناظراً لى متحدياً وتحرك نحوى وخبط كتفه فى كتفى وكنت خلاص هقع لكن ربنا ستر. وماتفهميش إيه القوة اللى وجدت نفسى فيها. أعتدلت وركلته فى وجهه ولكمته فى أنفه فوقع على الأرض وأنا فوقه بقى وهاتك يا ضرب وماسكتش غير لما ظل يتحايل عليا ويتأسفلى عشان مروحش أقول للناظر. لو كنتِ شوفتى نظرة الذل فى عينيه مكنتيش هتصدقى.
- برااافو يا جوجو. بس أنا رأيى أنك برضه تقول للناظر لأنه طول الوقت بيتشطر على الأضعف منه.
- بس أنا خلاص أخذت حقى.
- أيوة ما انا عارفة. بس لما هتقول للناظر مش هيفكر يعمل كده مع أى حد تانى. يعنى أنت هتحافظ على حقوق غيرك لما هو ياخد عقابه. أنت ناسى إنك الوحيد اللى وقفت قدامه والباقى كان بيخاف يشكى أو حتى يعرف ياخد حقه.
- وعشان كده متأكد أنه مش هيعمل معايا كده تانى.
- بس ممكن يعملها مع غيرك.
- وأنا مالى بغيرى. ماهما يقولوا لأنهم ماخدوش حقهم لكن أنا أخدته.
- وافرض غيرك ضعيف وخاف يقول .
- زمردة بطلى تكبرى كل حاجة كده وإذا كان على الضعفاء أنا هتدربهم.
- طب وأنا عايزة أتدرب عشان أبقى قوية.
- خلاص يلا نبدأ.
-تمت-.
==============
دعوة للمناقشة:
ـــــــــــــــــــــــــــــ
* لو شفت حاجة غلط هتبلغ عنها ولا لأ؟
يعنى مثلاً لو أشتريت علية سمن وبعد ما فتحتها لقيت فيها صرصار هتروح المحل تغيرها ولا مش هتروح ولا هتكلم الشركة المنتجة؟.
ولو كنت راكب أتوبيس مثلاً ومارضيش ينزل الركاب فى آخر الخط هتنزل عادى ولا هتقوله يجيب الأجرة ولا تاخد رقمه وتبلغ عنه؟.
وهكذا فى جميع المواقف.
* أذكر موقف مشابه تعرضت له.

هناك 30 تعليقًا:

سبايدرمان spiderman يقول...

ياااه
ده حجاه بتحصل كل يوم و في كل حاجه :(
انا عن نفسي لو حصلي حاجه من المواقف الى قلتيها في الاخر
مش هعمل حاجه خالص :(
كل الى هعمله مثلا في السمنه مش هجيب النوع ده تاني ابدا

انما بقي في الاتوبيس هو من امتي اصلا الاتوبيس بيقف في محتطه اصلا :(

انتي تقريبا مش بتركبي اتوبيسات خالص ^_^

سبايدرمان spiderman يقول...

انا مره ركبت اتوبيس من الاتوبيسات الخضراء دي
كانت اول مره اركبه فيها
ركبت من قدام كليه البنات الى مصر الجديده لحد عبود كده

و كانت اول و اخر مره

يا لهوووووووووي على الى حصلي في الاتوبيس ده

آخر بهدله :(

اهو شتمنا شويه في الناس و بس

يلا الحمد لله

^_^

إبتسامة ملاك يقول...

صباحك سكر ياقمر

وحشتينى جدآ ومفتقداكى عندى أوووووووووووووى

ربنا يطمنى عليكى يارب يا احن خلق ربنا

طهر فؤادك يقول...

السلام عليكم ورحمة الله وبركاتة ,,

اخبارك اية ؟؟

ربنا يكرمك يارب والمسلمين على البوست الجميل دة

وبصراحة كل المواضيع متميزة بارك الله فيكى ...

- هو بصراحة حصلى مواقف زى الى اخدتيها مثال دى بس هو فية شعرة بتفرق بين التبليغ عن الخطأ دة ولا لا يعنى لو المكان نضيف ودى غلطة ومش بتتكرر دايما يعنى حاجة عابرة او غفوة زى مابيقولوا يبقى "العفو عند المقدرة" يااختى الكريمة اما لو فعلا المكان دائما وابدا بيحصل كدة يبقى الاولى للمصلحة العامة التبليغ ...

بس دى وجة نظر بسيطة ولازم تتاخد فى الحسبان ...

نهر الحب يقول...

السلام عليكم ورحمة الله وبركاتة
بصى اجابة على سؤالك
اى نعم سأبلغ ولذلك انا محاطة بكم من المشاكل او عدم الارتياح لتواجدى
فى اماكن كثيرة

اما عن الموقف وبالاسماء فى فى بورسعيد مطعم اسمة كويك وجانبة مطعم كشرى فى قرية سياحسة ببورسعيد
وانا قاعدة باكل فى كويك على الرصيف تقريبا لاقيت علبة كشرى تقظف من فوق على راس الناس اللى على التربيزة اللى بعدى بتربيزتين
فأندهشت وكمان الناس التبهدلت
لكنهم اكتبفوا بالتأفف والصراخ لحظات
بعدها مفيش بربع ساعه تكرر الموقف
وكنت انا تقريبا خلصت اكل
ذهبت للمطعم الكشرى اللى بيشتهر بأشياء اخرى
وسالت عن مدير المحل قالوا لية قلت حصل كذا ودا لا يجوز ولا يليق
الراجل رد بمنتهى التأفف واحنا مالنا تلاقى زبون !! قلت لا طبعا لان الزبون ميقدريش يعمل كدة خاصة فى وجود امن القرية !! كمان انه مطعم ازاى هيرمى علبة ييعنى؟؟
قالى شرفتى يعنى طردنى

ومن قبل ايضا حصل صدام لى مع عسكرى بسبب ضربة لشاب فى الجمرك
وانتهى الامر بتدخل مقدم شرطة
وغيرها

بس الحمد لله انا لسة سليمة

متضحكيش انا بقولك اهو
سلامى يا قمرى

حصان المرجيحة يقول...

بصراحة و ماكدبش عليكي مش كل الاوقات ببلغ بس اوقات فاكرها و انا في الجيش كنت شجاع اوي هههههههه
كنت ممكن اشتكي واحد رتبه و مش هاممني
و كنت بعرف اخد حقي من اي حد بطريقة تخليه مايعملهاش مع حد تاني
بس رضو في اوقات بطنش سواء استهتار او جبن
شكرا ليكي

ستيته حسب الله الحمش يقول...

السلام عليكم
ازيك يا مونا

في بلدنا العزيزة لذيذة محاولة اظهار الخطأ والمطالبة بالحق والتصميم على الحصول عليه شيء مؤللللللللللللللم

ساعات اقف وأغتت وأصصم اكشف غلط واخد حقي وحقوق اللي حوليا كمان

لكن ساعات بتعب
وبزهق
وبقرف
وبستسلم
اي نعم استسلامي بيتعب نفسيتي اكتر لأنه عكس شخصيتي
بس السن ووضع الدنيا له احكام

طب انا من كام يوم جيت اصالح بين زميلين
منهم صديقة اقرب لي من الأخوات
الأولاني تعامل معايا على اني هابلة عبيطة ام بدوي
عادي مش مشكلة هو مجرد زميل
التانية بقى اللي عارفاني كويس قوي ومش مضطرة اشرح لها انا مين
تكاد تكون اتهمتني بالتحيز وبأن لي مصلحة معاه وكمان قالت كلمة جارحة وكأنها هزار
من ساعتها مش عارفة أرد على تليفونتها لأني حاسة ان وش الأسد ممكن يطلع واخسرها بشكل نهائي

ورجعت وقلت
ياني ياني ياني مش ها اعمل كده تاني

اي حد تحاولي تقولي له اخطائه تبقي عدوة
اي حد تحاولي توقفي مصلحته اللي هي مش مصلحة عامة تبقي عدوة

مفيش شيء في بلدنا اسمه نظرة موضوعيه
او تقييم موضوعي

احنا في زمن المسخ

(المهاجر الى الله) يقول...

السلام عليكم ورحمة الله وبركاته :
دائما متألقة بموضوعاتك المتميزة ، ربنا يبارك فيكى دوما ، استمرى فى ما انتى فيه فانتى حقا تثرى عقولنا دوما بمناقشات هادفه .
شوفى هو انا فيا عادة او خصلة مش عارف حلوة وللا وحشة ، ان لما انسان يخطىء فى حقى بافض ورا حقى ده لحد ما اخده حتى لو هياخد منى وقت طويييييل جدا مش بازهق ولا بامل ولا باتعب ،وممكن اسلك طرق كتيرة جدا حتى لو مش مشروعة قانونا المهم انها ماتكونش مخالفة شرعا ، ورائى دايما ان القوانين الوضعية انما وضعت لتضيع الحقوق .
ودائما استشهد بالاية الكريمة / ومن انتصر بعد ظلمه فاؤلئك ماعليهم من سبيل /
والحديث الشريف الذى قال فيه الرسول الكريم ما معناه / رحم الله رجلا اذا باع واذا اشترى واذا اقتضى ، قيل وما اقتضى يارسول الله ، قال ان يعرف حقة ويطالب به / لذلك انا مقتنع جدا بانى مينفعش اسيب حقى مطلقا حتى لو كان على حاجة ماتستاهلش ، ده لو كان الموضوع يخصنى لوحدى ، بيكون حكاية بقى لو كان ممكن يجر ضرر على المجموع ،لكن بردوا بيبقى فيه جوانب لازم اراعيها ، من باب التراحم ، يعنى مش لازم اقف لكل واحد على الواحدة والا الحياة هتقف وخصوصا انها دنيا لازم يكون فيها الحلو والوحش والا تبقى جنة ، والحياة المثالية اللى شايفنها فى احلامنا دى حياة مستحيلة لكنها بتكون مثالية بحق وحقيقى لما يكون فيه رحمة بين الناس ،
يعنى مثلا انا من اشد الناس الموسوسة بخصوص النضافة ، كنت باتغدى فى مطعم وفوجئت انى لقيت فى الطبق / زلطة صغيرة/ قومت على جنب رايح للعامل المسؤل عن الحكاية وكلمته بالراحة لانى من ناحية مش عايزة يتاذى ومن ناحية مش عايز المطعم نفسة يتاذى ، لو كنت لقيته بيبجح كان ممكن اتصرف تصرف تانى .
وفى مرة لقيت باجيب ولاد اخويا من الحضانة وانا باعودهم انهم يمشوا لوحدهم على حنب عشان يتعرفوا على الطريق فوجئت بموتوسيكل يينحرف ناحية بنت اخويا ويخبطها ولولا انى شوفت الظرف اللى اضطره لكدة كنت مش هاسيبه خالص لكنى اثرت السلامة لانه كان مضطر وسيبته يمشى بعد مااعتذر .
وهكذا .
طولت عليكى قوى .
تحياتى

GiGi world يقول...

القمر بتاعنا وحشتينى
بالنسبه لموضوعك انت عايزه كلام الكتب ولا الواقع

الواقع بيقول اخد حقى بايدي واذا رروحت لحد مش هيسمعنى حتى
ربنا يهدينا

موناليزا يقول...

سبايدر مان
ـــــــــــــ
أهلا بيك يادكتور
معقول هتسكت!!
نعرف انى مبعرفش اسكت لو لفيت حاجة غلط بس لانى بنت وماينفعش طول الوقت اتكلم وازعق بصوت عالى يا اما مثلا اقول لحد من اخواتى وهو يتصرف يا اما ابلغ الشركة المتخصصة ولو مالقيتش قدامى اى خيار تانى لازم اتكلم
امى دايما تقولى كان المفروض تبقى محامية مش مُدرسة رياض أطفال:)

وهى جت على الاتوبيسات بس ده حتى سواق التاكسى ممكن يستعبط وينزلنى فى اول الشارع مثلاً بس ساعتها بقى هو وحالتى النفسية وقتها يعنى لو ليا مزاج اتمشى باخد الموضوع عادى وانزل ولوماليش يا اما هينزلنى فى المكان اللى انا عايزاه يا اما هديله نص الاجرة

لا يا دكتور محمود لازم بعد كده تاخد موقف صارم وماتسيبش حقك..
بس بالعقل:)

نورتنى وأشكرك جدا لمشاركتك


**********************************


ابتسامة ملاك
ـــــــــ
صباح الفل على عيونك ياقمر
دايما بذوقك وطيبة قلبك بتغلبينى
ماتحرمش منك أبدا ياحبيبتى
نورتينى انوسة الجميلة واسعدنى تواجدك



********************************


طهر فؤادك
ـــــــــــــ
وعليكم السلام ورحمة الله وبركاته
أهلا بيك يافندم
أنا الحمدلله بخير أشكرك لسؤالك
ربنا يعزك يارب اشكرك جدا لرايك فما توفيقى الا بالله

مع احترامى لرأيك بس العفو عند المقدرة ماينفعش اطبقه وانا عارفة ان اللى قدامى مش هيغير موقفه
هحكيلك على حاجة: مرة واحدة صاحبتى بتحكيلى على موقف حصلها هى ومامتها مع سواق ميكروباص وانه مارضيش ينزلهم فى مكان هو المفروض رايحه وعايز ينزلهم فى نص الطريق هما وبقية الناس عشان يحمل من جديد وياخد اجرة جديدة ولما خدوا رقمه وبلغه عنه جه يتأسف ويعتذر عشان يتنازلوا وهما طبعا اتنازلوا
وقتها انا عاتبتها لانه اتحايل عليها بس عشان مايروحش فى داهية لكن تصرفه مش هيتغير لكن لو اتعاقب مرة هيحرم يعملها تانى

أشكرك جدا لمشاركتك
نورتنى


*******************************


نهر الحب
ــــــــــ
وعليكم السلام ورحمة الله وبركاته
أهلا اهلا بالقمر
:) عسل يا نوسة وربنا
ايوة كده تسلمى ياحبيبتى
انا زيك برضه مابعرفش اسكت بس لو حد من اخواتى معايا بسيبه هو يتولى الموضوع:)
نورتينى ياجميلة واسعدنى تواجدك



********************************


حصان المرجيحة
ـــــــــــــ
اهلا بيك يافندم
اشمعنى فى الجيش طيب:)
وبعدين المفروض بعد الجيش تكون اكثر صرامة :)

نورتنى واشكرك جدا لمشاركتك



********************************


ستيتة حسب الله الحمش
ــــــــــــــــــ
وعليكم السلام ورحمة الله وبركاته
أهلا اهلا بنبض الحكمة
وحشتيييينى جدا
انا الحمدلله بخير ماتحرمش من سؤالك

ياااه انا اكتر واحدة حاسة بالموضوع ده وخصوصا لما اطلب حقى من حد وهو بكل جراءة يقولى مالكيش عندى حاجة!!
ولانى معنديش نية اتنازل عن حقوقى بلاقى رد فعل عنيف وكأن انا الظالمة المفترية!!!!

تقدرى تقولى فعلا احنا فى اخر الزمن

نورتينى سوتيتة الجميلة واسعدنى مشاركتك



*******************************


المهاجر الى الله
ــــــــــــــــ
وعليكم السلام ورحمة الله وبركاته
أهلا بيك أستاذ طارق
ربنا يكرمك يارب فما توفيقى الا بالله
أشكرك جدا على هذه الدفعة المعنوية:)

طبعا خصلة حلوة جدا وياريت تبقى عند الناس كلها بس فى الحق وبس
أنا عن نفسى أحييك عليها

لا يافندم حضرتك تتكلم براحتك مفيش تطويل ولا حاجة
لان المواقف المذكورة اكيد هتعلم من يتخذ موقف سلبى دائما
نورتنى واشكرك جدا لمشاركتك


*******************************


جيجى وورلد
ــــــــــــ
أهلا اهلا بالقمر بعد طول غياب
وحشتييينى جدا

متفقة معاكِ جدا:)
نورتينى جيجى الجميلة واسعدنى تواجدك

إبتسامة ملاك يقول...

طبعآ أسف لتأخرى النت عملها معايا نلتمس العذر لأنوسة

طبعآ وحشتنى جوجو وزمرده اوووووووووى
بلاقى نفسى معاهم وبحسنى طفله برجع للزمن الملائكى الجميل

نيجى بقا للموضوع الاهم
حصلت ليا كنت فى كافى شوب وطلبت شاى
وللاسف بعد ما شربته لاقيت فيه ذبابه يع يع
يالهوووووووووووووووى
كنت هموت ورجعت مش تتخيلى موقفى كان عامل ازاى
هههههههههههههه
ومره تانيه اشتريت من البقال اللى جنبنا برطمان عسل اسود 2 كيلو وبعد ما فتحته لقيت كله دود والله العظيم كانت صدمه وروحت اتخنقت مع البقال وقلت له انت غشاش
وحسبى الله ونعمه الوكيل
انا عن نقسى لما بشوف اى حاجه غلط بجد يا مونى مش بسكت ولو حصل ايه
لان الساكت عن الحق حيوان اخرس
ربنا يكرمك على موضوعات الهادفه الجميله
بحبك اووووووووووووووووى
واسفه لتأخرى بس النت كان فصل
سلامى حبيبتى
ومنتظراكى معتيش بتزورنى زى الاول ليه يارب يكون خير
تحياتى

الوفية للأبـــد -- مها أحمد يقول...

موناليــــــــزا ........
حبيبة قلبي واحشاني خالص و موضوع جميل اوي و فعلا الغلط مش لازم نسكت عليه بس هنعمل ايه احنا بنخاف و نقول نمشي جنب الحيط و خلاص و خلينا في نفسنا

يللا ربنا يحفظنا من كل شر يا رب

لكن لو قلت لسواق الميكروباص رجعلي الاجرة بيتهيقلي هكون حكمت على نفسي بالاعدام لان اكيد هو مش هيرد عليا ده هيطلعلي سنجة و لا مطوة و لا سيف و لا حتى صاروخ ار بي جي
ههههههههههههههههههههههههههههههه
و بدل ما اروح على بيتي هروح على قبري

هنقول مصر بلدنا كل حاجة فيها بالمقلوب
ههههههههههههههههه
اما لو كان اكل و لقيناه بايظ فعلا بنرجله و نتصل على الشركة و نعمل بلاوي بس ده في مصر
لكن بما اني مش عايشة في مصر فما بنلاقيش حاجة غير صالحة للاستهلاك الادمي بالعكس هنا بيحترموا الانسان اوي مش زي مصر

ربنا يحفظنا و يكرمنا يا رب

خالص حبي و تقديري ليكي يا قمرايا

P A S H A يقول...

السلام عليكم


لأ بجد حلوة الحكاية .. عجبتني :))

مش عارف ليه مش شايف أسئلة المرة دي لعل المانع خير ؟؟
:))))

خلاص خلاص هاجاوب أهه !

مممممممم .. حسب الموقف والموود .. لإن ساعات ممكن يكون الموقف عادي .. وأنا أكون منفعل فأعبر عن رفضي بطريقة مبالغ فيها .. تعتبر غلط في حد ذاتها !! إنما لو الموقف يستدعي .. زي بتاع علبة السمنة ده مثلاً .. هاروح للمحل بس مش هارجعها له
.. هادلقها عنده ع الأرض وأسيبها وأمشي في برود .. ويبقى يفتح بقه !!
(حصل فعلاً موقف مشابه بس مش فاكره قوي .. والراجل كان هايتشل يا عيني )

ههههههههههههه

تحياتي
:))
سلام

كلمات من نور يقول...

موناليزتي يا اخصائية الأسئلة الصعبة
* مرة كنت بافطر في الست أيام البيض أو صيام نوافل في النادي وطلبت معايا طبق بنجر وفي وسط الأكل لقيت صرصار في البنجر ..ندهت الجرسون بالراحه وبسكات شاورت على الصرصار اللي كان ميت الحمدلله مش صاحي وبيلاعبلي شنباته مثلا ..المهم بهدوء اخد الطبق وقالي : أسفين أصل النهاردة كما بنرش المطابخ في المطعم .أجيب لحضرتك غيره؟ قلتله لا لا شكرا شبعت ...

* أنا مش باركب اوتوبيسات بس مرة حصل لي موقف مع سائق تاكسي وانا في وسط الطريق وقف وصمم اني انزل علشان هو مالوش مزاج يروح المشوار بتاعي ..أنا عملت غضنفر وقلت له انا حانزل بس حاخد رقمك ..ويادوب قلت كده ونزلت لقيت بيقول كلام محدش سمعه قبل كده والعيال بقوا سامعين وانا ابعدهم علشان الكلام بجد خادش ومسمعوهوش قبل كده ...واللي زعلني إنه ملتحي ومشغل قرآن ...الله يهديه

موناليزا يقول...

إبتسامة ملاك
ـــــــــــــ
أهلا بعودتك ياقمر
:) عذر انوسة معاها طبعا وواضح ان النت وحش على انحاء المحافظة بتاعتنا:)
بيعمل معايا الحركة دى بقى له كام يوم

ببقى مبسوطة بجد بحبك لجوجو ولزمردة:)

ايوة كده شطورة ماتسكتيش على حقك أبدا
لان الساكت عن الحق شيطان اخرس أصل حرام نظلم الحيوان:)

ربنا يعزك ياحبيبتى واشكرك جدا لرايك
وماتتأسفيش ياحبيبتى انتِ تنورينى فى اى وقت بس ياريت تعذرينى لانى كمان النت عندى مش متظبط
وماتتأخريش فى تنزيل بوستات جديدة لانك بتوحشينا

نورتينى انوسة الجميلة واسعدنى تواجدك



********************************


الوفية للابد مها احمد
ـــــــــــــــــــــ
أختى الحبيبة:اهلا اهلا بالقمر
واهو ده اللى جايبنا لورا:)

عسل يا مها:) ماتعمليش الحركة دى وانتِ لوحدك.. أنا حذرتك أهو:)

وهذا للاسف ان يحترم الانسان فى كل مكان إلا هنا:(

نورتينى مها الجميلة واسعدنى مشاركتك



*********************************



باشا
ـــــــ
وعليكم السلام ورحمة الله وبركاته
أهلا بيك يافندم
أشكرك لرأيك
:)
ياااه أخيرا هتجاوب على الأسئلة يا اهلا يا اهلا

والله حركة جامدة جدا:) انا عن نفسى بفكر اعملها لو حصللى الموقف ده:)

ياريت لو افتكرت الموقف تحكيهولنا عشان نتعلم:)

نورتنى واسعدنى تواجدك



**********************************



كلمات من نور
ــــــــــــــ
أهلا اهلا بالغالية
:) حلو اللقب ده وجديد كمان:)

ياخبر صرصار.. حصلت !!وايه دخل رشهم للمطبخ فى وجوده فى الاكل.. ما احنا بنرش برضه ومابيحصلش حاجة:)

الموقف التانى ده حدثى ولا حرج من كل حاجة بقى من اول السواق اللى متوقع ان متحكم فى ارواح الناس لغاية اللى بيتخفوا وراء ستار الدين
بجد حاجة تحزن
ربنا يرحمنا برحمته ويخرجنا منها على خير

نورتينى غاليتى واسعدنى تواجدك

سبايدرمان spiderman يقول...

و الله انا بحاول اكبر دماغي
و لأني بتعصب و عصبيتي وحشه قوي و معرفش الى قدامي :( و ممكن ابهدله ، فبيريح نفسيو بحمي نفسي من الضغط و السكر و اسكت ، اريح حااااااااجه و الله ، ده بعد تجربه .

انما بتاع التاكسي كمان ينزلني على اول الشارع ، هي عمرها ما حصلت معايا ، بس لو حصلت و الله ما هدفعله الاجره خالص

امال انا واخد تاكسي ليه مش عشان يوصلني لحد باب البيت

ما كنت اخدت عربيات اجره بقي ^_^

......

بس انتي حاولي تهدي ،متخديش كل حاجه على اعصابك ،(( كبري تريحي تعيشي )) ، ده شعاري ههههههههههههههههههههه بعد طول معاناه مع البلاوي الى احنا فيها

جنّي يقول...

السلام عليكم

بالطبع وجهة نظر جوجو خاطئة .. فإسلامنا دين جماعة ولا يشجع الانانية والفردية ..

عن حذيفة قال : قال رسول الله صلى الله عليه وسلم : « من لم يهتم بأمر المسلمين فليس منهم ، ومن لم يصبح ويمس ناصحا لله ولرسوله ولكتابه ولإمامه ولعامة المسلمين فليس منهم » الطبراني والحديث ضعفه الالباني ..

وبالطبع سأبلغ لو كنت مكان جوجو..

تحيتي وسلامي

أحمد شريف يقول...

السلام عليكم
تدوينة موفقة جداً
عن نفسي لا أترك حقي مهما كان ولو رأيت سلوك خطأ على شاكلة ما ذكرتِ من أمثلة لا أتهاون في أن يكون لي موقف منها .. بصدق والله

لا أحب كل : انت مالك في المصالح والشئون العامة

هل عمل الملف لديك ؟

موناليزا يقول...

سباديدر مان
ــــــــــ
أهلا بعودتك يادكتور
ايوة يافندم هو راحة بس من وجهة نظرى مؤقتة لان تأنيب الضمير بقى هيشتغل وازاى تشوف الغلط وتسكت وكده يعنى

ماهو انا لما قلت لسواق التاكسى كده قالى هاتى اللى تجيبيه فقلت له انت اللى تحكم على نفسك:)

حاولت كتيير مش عارفة واضح انه عيب خلقى:)

نورتنى يافندم واسعدنى متابعتك


******************************



جنى
ـــــــ
وعليكم السلام ورحمة الله وبركاته
أهلا بيك أستاذ سعيد
ياااه يافندم ومين بس بيطبق تعاليم الاسلام الا من رحم ربى
أحييك جدا على مشاركتك
نورتنى واسعدنى تواجدك



**********************************



أحمد شريف
ـــــــــ
وعليكم السلام ورحمة الله وبركاته
أهلا بيك أستاذ أحمد
أشكرك جدا لرأيك
وأحييك جدا على موقفك

--
أشكرك لاهتمامك ولكن النت بطئ هذه الايام ولا يحمل الملف للاخر

نورتنى واسعدنى تواجدك

TIMMY !! يقول...

ممممممممم

على حسب الموقف ,

يعني لو مستعجل مثلا في حاجة زي الأتوبيس مثلا , يبقى هشوف مصلحتي بدل ما أتأخر ,

و لو حاجة برضه تافهه زي صرار في علبة زبادي - مش سمنة - برضه هكبر دماغي ,

موقف مشابه , كنت مرة راكب توك توك , و جنابه جابني على أول الشارع و بيقول لي معلش علشان مستعجل ,
..........
ما سيبتهوش غير لما وصلني لباب البيت بعد ما رخمت عليه - لأنه من بدأ الرخامة - و لأني كنت فاضي ساعتها ,

يعني ,بتبقى حسب الموقف و حسب الظروف

rovy يقول...

أزيك يا مونى .. وحشانى و دايما مش بلاقيكى على الياهو .. ياريت أكلمك قريب ..

مش دايما بنبلغ عن الخطأ يا موناليزا
يمكن ثقافة التبليغ عن الخطأ ضاعت مننا فى الزحمه .. لما كنت صغيره فى مدرسه الراهبات أتعلمت ده كويس أوى . بس مع الوقت أكتشفت أن مش دايما لما بنبلغ بنلاقى اللى يهتم :( ..
أخر موقف أتعرضت له من يومين أشتريت شريط دواء و فوجئت أن فيه كبسوله مختلفه فى لونها عن باقى الشرط و شكلها واضح جدا أنها مختلفه .. لما سألت الصيدلى قالى عادى بتحصل كثير ما تخديش الكبسوله المختلفه و خلاص ..!! طيب لو حد ما أخدش باله .. او ست كبيره و نظرها ضعيف .. او أو .. كان أيه يجرى .. ؟ عادى مش مهم ..طيب من أمتى حد بيخاف على صحتنا ..؟ ! تقتكرى لو عندى أمل يتصلح الحال مش كنت رفعت قضيه على شركة الأدويه دى ؟.. بس بصراحة معنديش وقت و لا روح للمواضيع دى .. سامحينى لو حستينى محبطه شويه ..اصلى حزينه على اللى وصله حالنا ..
تحياتى لكى غاليتى دائما ..

طوبه فضه وطوبه دهب يقول...

ديما جميله يا قمرايا مش كل المواقف بصراحه بدخل فيها فى موقف ممكن اخد فيه قرار واصمم اتصرف وموقف تانى ممكن احس انه ما ينفعش التصرف فيه فبسكت المهم انتى عامله ايه قلقانى عليكى خالص ولو اقدر اكلمك واطمن عليكى ياريت تقولى لى

موناليزا يقول...

تيمى
ـــــــ
أهلا بيك يافندم
وجهة نظر تحترم
بس صرصار فى علبة زبادى حاجة تافهة!
أشكرك جدا لمشاركتك
نورتنى واسعدنى تواجدك



*********************************


روفى
ــــــ
أهلا اهلا بالغالية
أنا الحمدلله بخير ماتحرمش من سؤالك
ماسنجر الياهو ده بجد مش عارفة اعمل فيه ايه بقى له كتير اوى رافض ينطق يطلع لى ساعة رملية وخلاص على كده

عندك حق وهذا للاسف رغم انى اتذكر موقف عمرو خالد كان بيحكيه
كان فى بلد اجنبى مش فاكره اسمها واشترى سرير صغير لابنه ومش فاكرة برضه ايه اللى كان فى السرير فهو راح رجعه ولقى اهتمام شديد جدا وأخده اسم ابنه وادوله سرير جديد كتعويض عن السرير التالف وقدموا شكوى للمصنع وازاى تصنعوا سرير مش مناسب للطفل

وهو يقول وانا متغاظة ان الكلام ده مش عندنا:)

سبحان الله حتى فى الدواء طب ايه لسه فاضل!!!

مش انتِ لوحدك ياروفى اللى محبطة انا خلاص شوية وهيجيلى اكتئاب

ربنا يرحمنا برحمته
نورتينى حبيبتى واسعدنى تواجدك


*********************************



طوبة فضة وطوبة دهب
ــــــــــــــــــ
أختى الحبيبة:اهلا اهلا بالقمر
أنتِ اللى جميلة بجد وموقفك الاخير عجبنى جدا
تسلميلى ياحبيبتى
انا محتاجة الدعاء جدا ربنا بس هو اللى يقدر يخفف اللى انا فيه
سامحينى ياقلبى مش هعرف احكى لان الموضوع اعقد من انه يتحكى
بس بالله عليكِ تدعيلى

نورتينى واسعدتينى جدا بتواجدك وماتحرمش منك ابدا

Sharm يقول...

نبلغ عن الخطأ !!

احيانا

طهر فؤادك يقول...

السلام عليكم ورحمة الله وبركاتة
ربنا يكرمك يارب والمسلمين ...
شاركونا فى حملة "لا للتهويد " علشان نبدأ النشر بداية من السبت 6 /3 بأذن الله تعالى الله يكرمك ساعدونا
http://rasoulallah1.blogspot.com/2010/03/blog-post.html

موناليزا يقول...

شارم
ـــــــ
أهلا بيك يافندم
أشكرك جدا لمشاركتك
نورتنى واسعدنى تواجدك




*********************************



طهر فؤادك
ــــــــــــــ
وعليكم السلام ورحمة الله وبركاته
أهلا بيك يافندم
ربنا يقدرنا جميعا بإذن الله
نورتنى

فشكووول يقول...

ازيك يا موناليزا
عارفه احنا النهارده مشكلتنا ايه .. ان كل واحد بيقول نفسى نفسى

واللى بياخد حقه مش بيسأل عن اللى مهضوم حقه..
حتى الناس ساعات تشوف الغلط قدامها وما تقدرش تقول انه غلط
القيم اتغيرت والمجتمع بدأت اوصاله تتفكك وتتحلل .. بحكم ما فعله فينا العسكر

تحياتى

كيــــــــــــارا يقول...

والله يامونى السلبية وحشه جدا

لكن ي حاجات الظروف بتجبرك انك تسكت لكن مش بتسكت كتير لان الصرخه المكتومة بتندفع وبتوصل

*الطالبة عفو الله *زوزو يقول...

اولا احب اقلك يا موناليزتي الجميلة انك وحشتيني اوي اوي

اما عن الموضوع فبصراحة غالبا اكيد حتكلم و مش حسكت بس احيانا الوضع لو اتكلم فيه حيودي نفسه فيداهية او على الاقل حيدخل في متاهة هو مش قدها

مش فاكرة دلوقتي موقف اتعرضتله

عديهالي

تحياتي

موناليزا يقول...

فشكوول
ـــــــ
أهلا بيك يافندم بعد طول غياب
انا الحمدلله بخير أشكرك جدا لسؤالك
عندك حق جدا
وهذا للأسف
نورتنى واسعدنى تواجدك



**********************************



كيارا
ــــــــ
أختى الحبيبة:اهلا اهلا بالقمر بعد طول غياب
وحشتيييينى يانيمو

عندك حق
نورتينى حبيبتى واسعدنى تواجدك



********************************


الطالبة عفو الله
ــــــــــــــــ
أختى الحبيبة:اهلا اهلا بالقمر
وانتِ كمان يا زوزو ياقمر
يعنى القلوب عند بعضها:)

ده حقيقى للاسف مش فى كل الموقف نقدر ناخد حقنا بسهولة

خلاص براءة المرة دى عشان خاطر عيونك:)
بس لو افتكرتى حاجة تيجى على طول:)

نورتينى زوزو الجميلة واسعدنى تواجدك