الخميس، 1 أبريل 2010

جوجو و زمردة (16)

أراد "جوجو" أن يكون أول شخص يهادى شقيقته"زمردة" فى عيد ميلادها.
وفاجأها بصحبة من الورد البلدى الأحمر قائلاً:- كل سنة وأنتِ طيبة يا زمردة.
وأظهر لها الورد الذى كان يخفيه وراء ظهره وهو منتظر أن يرى إبتسامتها السعيدة بهذه الهدية الرقيقة.
قالت زمردة: وأنت طيب يا جوجو بس على قد ما أنا فرحانة إنك أول حد يهنينى وكمان جايب لى هدية بس إزاى تقطف ورد أصلاً؟.
- أنا ماقطفتش حاجة ده عم حسنين الجناينى هو اللى قام بالمهمة.
- وإزاى جناينى ويعمل كده أصلاً.. أمال مين اللى يحافظ على الورد ويراعيه لما هو يعمل كده.
-مالك يا زمردة واخدة الموضوع بحساسية كده ليه ماهو الورد كده كده هيتقطف من حد تانى أو هيدبل ويموت يبقى إيه المشكلة بقى لما أنا أخده؟.
- مش عارفة بس الفكرة مش عاجبانى ليه حد يقطف الورد أصلاً؟. هى كده هتموت أنا هشمها شوية وهفرح بشكلها بس فى الآخر يومين وهتدبل وهتموت لكن لو كانت فى بيئتها الأصلية كان عمرها هيبقى أطول من كده.
- بس هى مسيرها هتموت سواء كانت فى الغصن أو لأ.
- بس كده إحنا بنقصر عمرها الإفتراضى شوف أنت كام نحلة كانت هتتغذى عليهم وكام فراشة كانت هتستمتع بهم.
- يابنتى ده فيه محلات متخصصة فى بيع الورد الطبيعى.
-هو آه الورد شكله جميل بس أنا ماحبوش أبداً يكون هدية ليا إلا لو كان صناعى مثلاً لكن الورد الطبيعى أحب أشوفه فى الحدائق والبساتين غير كده يبقى اسمه وحشية.
- خلاص ياستى ماكنتش أعرف وجهة نظرك دى دلؤتى بقى تحبى أجيبلك هدية إيه؟.
- إمممممممم عاوزة شوكلاتة وبالونات.
- ياااه لو كنت أعرف كده من الأول كنت وفرت على نفسى الموشح ده.. حاضر ياستى من عينيا.
- ميرسى أوى يا جوجو.. يلا روح هاتهم بسرعة بقى وأنا مستنياك ولو عايز لنفسك إبقى إشترى لأنى ماعنديش نية أعزم عليك.
وذهب جوجو ليحضر لشقيقته الهدية المطلوبة عازماً على أن يعطى الورد لوالدته.
- تمت-.
==============
سؤال جانبى:
ـــــــــــــــــــ
* ما الهدية المفضلة لديك؟.


هناك 35 تعليقًا:

الأرمـوطــي يقول...

جميل اوى البوست دة بريئ ودمة خفيف تسلم ايدك
تحياتى ليكى

كلمات من نور يقول...

وردددددددددددددد

بجد ورد ولو وردة واحدة بالدنيا عندي .....ماليش دعوة بقى بزمردة ...سماح

قهوة بالفانيليا - شيماء علي يقول...

:)
ماسمعتش لسة الحلقة ..
بس هحاول اسمعها ..
الهدية المفضلة عندي : أي حاجة !!

salma mohamed يقول...

انا بموووووووت في الورد بأشكاله وألوانه وأنواعه,
ويا سلام على الورد البلدي والياسمين والفل دول من الانواع التقليدية ومن الانواع التانية الف مليون نوع ابسطها التيوليب,ياه على الورد وجماله,
ماليش دعوة بزمردة :)
صحيح انا مش بحب اقطع الورد ولا يمكن اعمل كده ولا بحب اعمل كده بس الكلام ده من الاماكن العامة,
انما في حدائق مخصوصة لتجارة الورد كده كده مش هنشوف اللي فيها الا لما نشتريه هديه او حد يهديه لنا :)
الهدية المفضلة ليا مش حاجه معينة كفاية ان الانسان اللي جابها فاكرني وبيعبر عن حبه حتى لو كانت بسيطة جدا بس بقى لو هدية من حد انا بحبه اوي هتكون اغلى هدية حتى لو كانت مجرد ورداية او شيكولاتايه :)

ستيتة حسب الله الحمش يقول...

نفسي نفسي اسمع البرنامج بتاعك
بس لسه مفيش نصيب
ألا هو ليه مش بتحملوا البرامج ونسمعها اعادة؟
يعني زي اليوتيوب كده؟

المهم ايه الهدية المفضلة؟
أي هدية تيجي من غير سبب ومن غير ميعاد وتكون عيني اتمنتها وفاكرة ان محدش واخد باله مني
بنبسط أيما إنبساط
حتى لو كانت شوية أم الخلول بالشطة والليمون :)

سلام لمونا العزيزة جدا

إبتسامة ملاك يقول...

وحشتينى


جميله اوووى
انا بحب جوجو وزمرده اوووووووووووى

اجمل هديه هى مصحف شريف جالى هديه ويعتبر اجمل الهدايا

الزهرة البرية يقول...

هى زمردة عندها حق تزعل من إنه استسهل وعمل ده لأننا باستسهلنا ده بنخليه شئ عادى مكن الواحد يعمله فى أى وقت وأى مكان

بس بالمناسبة تفتكرى محالات الورد دى إيه نظامها يعنى مصرح لهم ولا إيه الحكاية

* * * * * * *

أنا بقى الهدية اللى عايزاها هى وردة بيضا حلوة واحدة بس كفاية أوووى

دمتى بكل الخير والحب والسعادة

(المهاجر الى الله) يقول...

السلام عليكم ورحمة الله وبركاته :
كيف حالك اختى الفاضلة امة الله ، كل عام وانتى بخير .
الهدية المفضلة بالنسبة لى تختلف اذا كنت انا الهادى هتكون رخيصة طبعا :)اما لو كنت المهدى اليه فالبتاكيد عايزة تكون غالية قووىىى :):)
الرسول عليه الصلاة والسلام يقول ( تهادوا تحابوا ) فالهدية عنوان للمحبة والتقدير وبتكون مجرد لفتة طيبة من الهادى للمهدى له ، وبتسيب اثر طيب فى النفس مما لا شك فيه ، بغض النظر عن القيمة ( انا كنت باهزر :) ).
بس بقى انا شايف ان الهدية دى لازم تكون خاضعة لبعض الامور ، يعنى لازم اكون عارف طبيعة شخصية اللى هاقدمله الهدية دى عشان اعرف اختارها كويس لتتناسب مع فتفرحه فيتحقق الغرض منها ، وكمان متكنش حاجة حرام ، او تغضب ربنا ، وكمان لازم تكون ذات نفع يعود على المهدى اليه ، ويا حبذا لو كانت فائدتها تتعلق بمعنى معين له قيمة انسانية ،
طبعا انا باحب هدايا العطور ( فانا خبير عطور بالفطرة )والورد بانواعه والوانه وخصوصا الابيض مع الروز وعصافير الزينة وخصوصا الكنارى.
>>>>>>>>>>>>>>>>>>>>>>>>>>>>>>>>>>>

ملاحظة جانبية :
.........

حكايات جوجو وزمردة دى جميلة قوى ، فى هدفها ومعناها ورمزياتها واسلوبها وطريقة سردها ، هتكون مفيدة جدا بالنسبة للاطفال ،/ لذا اقترح ان تستمرى فيها وفقك الله ، لحد ما يوصلوا لمائة قصة ، وبعدين تجمعيهم وتبعتيهم لدار نشر عشان تنتجهم فى كتاب للاطفال ، بس خلى بالك لازم تكونى حريصة عشان حقوق الملكية الفكرية ، وعشان حقوقك المادية ، وفيه دار نشر محترمة جدا فى المنصورة ، كان فيه دكتور قريبى بيتعامل معاها ( اسمها دار الوفاء تقريبا) القائمين عليها محترمين جدا وممكن يمضوا معاكى عقد بنشر الحكايات دى .وممكن اساعدك فى الموضوع ده لو حبيتى .وبعد كدة ممكن تستمرى فيها وتعملى منها اجزاء واجزاء .
ده مجرد اقتراح فكرى فيه كويس .

موناليزا يقول...

الأرموطى
ـــــــــ
أهلا بيك يافندم
أشكرك جدا لرأيك
نورت مدونتى ويسعدنى دوام التواصل



**********************************


كلمات من نور
ــــــــــــــ
أهلا اهلا بالغالية
:)وردة واحدة بس!
باقة ورد لعيونك ياقمر
نورتينى غاليتى ويسعدنى وجودك دائما



**********************************


قهوة بالفانيليا- شيماء على
ــــــــــــــــــــــــــــ
أهلا اهلا بالقمر
وانا مستنية رأيك بفارغ الصبر:)
وليه الحيرة دى بقى:)
نورتينى ياجميلة وفى انتظارك دائما


**********************************


سلمى محمد
ــــــــــ
أهلا اهلا بالقمر
هى نظريه برضه:)
التيوليب لأجمل ياسمينا
نورتينى سلومتى الجميلة واسعدنى تواجدك



**********************************


ستيتة حسب الله الحمش
ـــــــــــــــــــ
أهلا اهلا بنبض الحكمة
وانا كمان بجد مستنية رأيك جدا
والله يا اختى السايت كان فيه شوية تعديلات بس احنا ناويين نحط ارشيف للبرامج اما انه يكون زى اليوتيوب فايدينا على كتفك لو تعرفى بجد مصمم مواقع كويس ياريت تعرفينا عليه:)

شوية أم الخلول إنما إيه وصايا:)

نورتينى غاليتى واسعدنى تواجدك


***********************************


ابتسامة ملاك
ــــــــــ
اهلا اهلا بالقمر
وانتِ كمان ياحبيبتى
:) أشكرك جدا لرأيك
وهما كمان بيحبوكى جدا:)
هدية غالية
نورتينى انوسة الجميلة واسعدنى تواجدك


*******************************


الزهرة البرية
ـــــــــــــــ
أهلا اهلا بالقمر
تعرفى انا سؤالى بقى ازاى فى المحلات بيحافظوا على الورد اطول فترة ممكنة من غير مايدبل؟
...
وردة واحدة بس!!
باقة ورد أبيض لون قلبك يا جودى
نورتينى ياجميلة واسعدنى تواجدك


**********************************


المهاجر إلى الله
ــــــــــــــ
وعليكم السلام ورحمة الله وبركاته
أهلا بيك أستاذ طارق
أنا الحمدلله بخير أشكرك لسؤالك
وأنت بخير وبصحة وسعادة
:) نظريه برضه
أنا توقعت كده برضه مش معقول حد فى كرم أخلاقكم ويكون كده:)
ذوق خاص جداً ومميز جدا فى اختيار الهدايا
عموما دى هدية بسيطة نرجو أن تقبلها
==
إقتراح يستحق التفكير حقا
أشكرك جدا عليه

(المهاجر الى الله) يقول...

هدية رائعة يا امة الله ، سرنى منظر العصفورين فى الصورة ، جزاكى الله خيرا
انا هانزلها عندى عشان اعملها خلفية .

هيوووم يقول...

جميله القصه وفعلا حرام نقطف الورد لكن كلنا بنموت فى الورد وروعته معادله صعبه واحلى هديه جالتى هى بنتى جابتلى مج يجنن فى عيد الام

موناليزا يقول...

المهاجر إلى الله
ـــــــــــــ
أهلا بعودتك أستاذ طارق
مبسوطة بجد أنها عجبتك:)
متشكرة جدا لذوقك
نورتنى وفى انتظارك دائما



**********************************



هيوم
ـــــــ
أهلا اهلا بالقمر
أشكرك جدا لرأيك
وفعلا هى معادلة صعبة:)
بس الورد الصناعى مكن يحل المعادلة:)
ربنا يخليهالك ياحبيبتى ويبارك لك فيها
نورتينى ياجميلة واسعدنى تواجدك

salma mohamed يقول...

جزاكِ الله خيرا موني العزيزة على الهدية الرقيقة زيك :)

ahmed_k يقول...

ههههههه
بصراحه زمرده زودتها حبتين وكمان بتتشرط في نوع الهديه
أنا بقى مش عارف هديه معينهمفضله لدي
بس أنا واحد قريبي راح الحج وقالي عايزني اجيبلك ايه من هناك قلتله اوع تجيبلي حاجه كل شيئ هنا موجود وزي الفل
فكلمني من هناك وأصر قلتله بقلك أيه يا عنم جيبلي سبحه بس
قالي ل حجيبلك جلابيه قلتله اوع إلا دي
وحلفت عليه بلاش جلاليب راح برضو جاب جلابيه بالعافيه
يعني حتى لما احدد شيئ مش عايزه يجيلي بالعافيه

دمتي بخير

حصان المرجيحة يقول...

كلام زي الفل
بس وجود الاعالم المثالي ده صعب شوية
و اظن انه بيبدأ من التربية
و علي فكرة انتي ممكن اتكلمتي علي الورد
بس ده بينطبق علي الشغل برضو
كلامك صح جدا

salwa يقول...

السلام عليكم اخت موناليزا
فعلا الوردبمكانه الطبيعي اجمل بكثير
جوجو و زمردة دائما لهم نكهة خاصة
ربنا يحميكي و يوفقك
سلام

موناليزا يقول...

سلمى محمد
ـــــــ
دى أقل حاجة بجد
أنتِ تستاهلى اكتر من كده بكتير
ومبسوطة بجد انها عجبتك
تسلميلى ياقلبى وفى انتظارك دايما



**********************************


أحمد-ك
ــــــــ
أهلا بيك أستاذ أحمد
:) حقها برضه بدل ما تجيلها هدية هى مش عايزاها
اذا كان هو ماجبهاش ليك
فلك ما طلبت

اتفضل
يسعدنى دوام التواصل

*******************************


حصان المرجيحة
ــــــــــــــ
أهلا بيك يافندم
مع احترامى الشديد لرايك ولتعليقك بس انا مش فاهمة يعنى ايه ينطبق على الشغل؟
نرجو التوضيح ولكم خالص الشكر



*****************************


سلوى
ـــــــ
وعليكم السلام ورحمة الله وبركاته
أهلا اهلا بالقمر
ربنا يكرمك واشكرك جدا لرايك
نوتينى سلوى الجميلة واسعدنى تواجدك

دندنة قيثارة الوجد يقول...

قصص جميلة وفيها عبر رغم بساطتها تسلم الأيادي

إبراهيم محسن يقول...

فعلا قتل الورد لغير المنفعه منه بتبقى اهدار لجمال وروعة وشكل الورد

الهديه دايما المفضلة بالنسبة لي واللي بحب اهادي بيها واحبها تكونلي لو هدية
الكتاب
اي كتاب
او قصة
او رواية
بحس فعلا اني طاير بيها

بوست جامد

ولد مصري يقول...

الواد جوجو ده شكله ابن حلال مصفي

ربنا يديله على قد نيته

بالنسبة للحاجة زمردة متهيألي كان المفروض تقبل الهدية وبعدين تقوم بالعتاب الغير مباشر بدل ما تكبس جوجو

وكمان تبعته يجبلها شوكولاته وبالونات

يلا علشان يتعود :)

هديتي انك تردي الزيارة :)

تحياتي

موناليزا يقول...

دندنة قيثارة الوجد
ــــــــــــــــــــ
أهلا وسهلا فى زيارتك الاولى
أشكرك جدا لرأيك
نورت مدونتى ويسعدنى دوام التواصل



***********************************


ابراهيم محسن
ـــــــــــــ
أهلا بيك أستاذ ابراهيم فى زيارتك الاولى
أشكرك جدا لرايك ولمشاركتك
واختيارك فى نوع هديتك المفضلة أحييك جدا عليه
نورت مدونتى ويسعدنى دوام التواصل




**********************************



ولد مصرى
ـــــــــ
أهلا بيك يافندم بعد طول غياب
:) أكيد هو بيشكرك على رأيك فيه
:) اما زمردة فقالت كده من عشمها
أشكرك جدا لتعليقك وهديتك هتوصلك حالا
نورتنى ويسعدنى دوام التواصل

ليس فقيرا من يحب يقول...

يا سلام على رقتك يا موناليزا

ربنا يسعدك ويكرمك على قد نيتك الطيبه

وقلبك الرقيق

بوست جميل

اجمل هديه مش عارفه ابسط حاجه من غير

ما تكون على بالى حتى لو شوكلاتايه

ممكن تخلينى اطير فى السما

اخبارك ايه يا قلبى

يارب تكونى بالف خير

اموووووووووووووواه

ســـــــهــــــــــر يقول...

اولا وحشتنى مدمونتك و انتى طبعا
و ثانيا انا مع كامل احترامى لراى زمرده بموووووووووووووت ف الورد
و بحبه جدا جدا جدا
صحيح اه بيصعب علينا انه بيموت بسرعه
بس ممكن نطول عمره كام يوم نحطه ف ميه و نغيرهاله و نحط له اسبرينه ف الميه او شوية سكر

ايام ربيع جميله عليكى و على كل اللى حواليكى

موناليزا يقول...

ليس فقيرا من يحب
ــــــــــــــــ
أهلا اهلا بالقمر
ماتحرمش من ذوقك ابدا رونى الجميلة
أنا الحمدلله بخير ياحبى
أحلى شوكلاتة لأجمل رانيا
نورتينى حبيبتى واسعدنى تواجدك



********************************



سهر
ــــــــ
أهلا اهلا بالقمر بعد طول غياب
وأنتِ كمان وحشتينى وأنا ومدونتى مفتقدينك جدا:)
هى فكرة برضه:)
يارب ايامك كلها تكون سعادة
نورتينى سهر الجميلة واسعدنى تواجدك

E73 يقول...

بسم الله الرحمن الرحيم
السلام عليكم ورحمة الله وبركاته

أولا أنا سعيدة قوي اني عرفت انك عاملة حلقات في الراديو وان شاء الله أسمعها

ثانيا بالنسبة للورد أنا من وجهة نظري انه من المخلوقات اللي ربنا خلقهالنا علشان تمتع بها وأصلا في أراضي زراعية بيزرعوا فيها الورود كمحاصيل علشان يبيعونها زي الرز والعدس والفول كدة
فانا لما هشتري الورد هنفع البائع والمزارع وبائع البذور

وعلشان كدة أنا بحب قوي لما حد يهاديني بحاجة تكون الورد

مهموهـــــــة يقول...

موناليزا .....
حبيبة قلبي واحشاني واحشاني واحشاني و الله
و معلش اني غيبت الفترة اللي فاتت دي
بس و الله كانت ظروف و مش قعدت على النت خالص
بس اكيد هتتعوض ان شاء الله

البوست رائع كالعادة و وراه هدف كالعادة
بس انا هديتي المفضلة ؟؟
انها تكون من انسان بحبه و يحبني
مش انها تكون نفاق

خالص حبي و تقديري

أحمد شريف يقول...

السلام عليكِ
طالعت التدوينة .. على فكرة تقريباً أطالع كل التدوينات التي تطرحيها وعدم طرحي لتعليقات ليس معناه أني لا أطالعها

دمتِ بود

واحد من البلد دى يقول...

السلام عليكم ورحمة الله وبركاته

إننى أعتبر قطف الورود نوع من أنواع القتل...أليس إزهاقا لروح...لكننا للأسف مفهوم الروح لدينا مختلف حيث أننا نعتبر أن الروح هى فى الإنسان فقط وبعضا منا(وليس كلنا)يعتبر الروح فى الإنسان والحيوان فقط...أما إذا تعاملنا مع الأمر من منطلق العقل و من مفهوم الأخت زمردة هانم فإننا بذلك سوف نكون قد وصلنا إلى مرحلة لا بأس بها من الرقى و التقدم...

ملحوظة..

دلوقتى عرفت مين جوجو و زمردة اللى كنت باسأل حضرتك عليهم..

دمتى فى حفظ الله

موناليزا يقول...

اى 73
ـــــــــ
وعليكم السلام ورحمة الله وبركاته
أهلا اهلا بالقمر بعد طول غياب
وأنا فى انتظار رأيك:)
وجهة نظر برضه:)
هدية خاصة جدا
نورتينى ياجميلة واسعدنى تواجدك



*********************************


مهموهة
ــــــــ
أهلا اهلا بالقمر
وأنتِ كمان ياحبيبتى
ولا يهمك ياقلبى مكانك محفوظ دايما
أشكرك جدا لرايك ولتعليقك
بس برضه ما قولتيش ايه الهدية المفضلة اللى تحبى الناس يهادوكى بيها؟
نورتينى مها الجميلة واسعدنى تواجدك



**********************************


أحمد شريف
ــــــــ
وعليكم السلام ورحمة الله وبركاته
أهلا بيك أستاذ أحمد
:) الحال من بعضه فأوقات كثيرة لا أجد تعليق مناسب لتدويناتك رغم متابعتى لها
عموما حضرتك تنورنى فى أى وقت
يسعدنى دوام التواصل



********************************



واحد من البلد دى
ـــــــــــــــــ
وعليكم السلام ورحمة الله وبركاته
أهلا بيك يافندم
عندك حق فارواح البشر مش كل الناس بيحترموها وهذا للاسف
أسعدنى رأيك فى موقف زمردة:)
وسعيدة أكتر لأنك أخيرا تعرفت على جوجو و زمردة:)
نورتنى ويسعدنى دوام التواصل

E73 يقول...

حبيبييييييييييييييي
شكرا يا لوزة بجد عجبتني جدا هديتك الجميلة دي

ربنا يخليكي يا رب ويكرمك

أنا ببقى مبسوطة قوي وأنا عندك هنا في المدونة

:)

موناليزا يقول...

اى 73
ــــــــ
:) وانا مبسوطة بجد انها عجبتك
وسعيدة أكتر بتواصلنا
نورتينى حبيبتى وفى انتظارك دائما

E73 يقول...

شكلي هغلس عليكي بزيادة كدة

بس مش عارفة ليه راديو مطلقات مش راضي يفتح معايا

لما بضغط على الرابط بيفتح صفحة وفيه فوق كدة في النص مكتوب بلاي أو استوب

وسواء ضغطت أي حاجة مش بيطلع صوت ولا بيدي أي رد فعل

موناليزا يقول...

اى 73
ــــــــ
حبيبة قلبى انتِ تنورينى دايما
ببقى سعيدة بجد بتواجدك عندى

بصى ياستى دوسى بلاى واستنى شوية هو بياخد وقت على مابيحمل:)
يعنى أديله فرصته:)
فى انتظار رأيك ياقمر

نسيبه يقول...

السلام عليكم ورحمة الله وبركاته
أنا مش هأعلق المرة أنا هأسألك سؤالين
إزاي بتعرفي تعبري عن إللي عايزاه؟(ماشاء الله لا قوة إلا بالله يعني)
وإزاي إنتي لسه كده؟إزاي لسه محافظه علي نفسك بعد كل ده؟(بدون إحراج يعني ما تزعليش مني)

موناليزا يقول...

نسيبة
ـــــــ
وعليكم السلام ورحمة الله وبركاته
أهلا اهلا بالقمر
سؤال وجيه:)
تقدرى تقولى انها نعمة من ربنا والحمدلله انها موجودة
سؤالك التانى بقى
امممممم
إيمانى ويقينى فى الله هما اللى مخلينى قادرة اعيش لغاية دلؤتى

أى خدمة:)

نورتينى حبيبتى واسعدنى تواجدك