الأحد، 17 أكتوبر، 2010

ماتبقاش حمار


يعد برنامج" عالم الحيوان"من أفضل البرامج بالنسبة لى والتى لا أمل من مشاهدتها وهذا جعلنى أتأمل فى صفات الحيوانات وطباعها المختلفة وكيف أن كل صفات كل نوع تختلف عن الآخر حتى لو كانوا من نفس الفصيلة.. حتى إناث النوع الواحد تختلف طباعها وصفاتها عن ذكور نفس النوع.
وحينما كنت أسمع كلمة "حمار" تطلق كسب وإهانة لشخص ما قررت أن أتعمق فى معرفة صفات هذا الحيوان "الحمار".
فالحمار من أطيب الحيوانات فهو صاحب صاحبه, يتحمل أقصى الإهانة ويبذل قصارى جهده دائماً لإرضاء مالكه ويتحمل فوق طاقته ويحمل حمولة قد تصل لأضعاف وزنه بمراحل بالإضافة إلى ذكائه الذى يجعله يستطيع أن يذهب إلى منزله بمفرده دون توجيهات من مالكه...
ووجدت أن فيه ناس طباعها مشابهة حقاً لطباع الحمار من طيبة زائدة لدرجة تصل إلى امتهان كرامتهم لمجرد أن يرضوا شخصاً آخر بالإضافة للتضحية براحتهم من أجل من لا يقدر وعندهم إيثار وذكاء وحب العِشرة وتحمل الصعاب ومشقات الحياة ومحاولة إرضاء جميع من حولهم..
واكتشفت للأسف أن من يحملون هذه الطباع بيتألموا كتير ممن حولهم لأن اللى حواليهم اتعودوا دايماً على استغلالهم ومهما يعملوا فيهم برضه راضيين ومعندهمش نية يثوروا لكرامتهم وهذا يجعل من حولهم يركبوهم.
ولذلك لمن يحمل صفات الطيبة الزائدة عن اللزوم خليك زى الحصان لا يسمح لأحد مهما كان أن يمتهن كرامته أو اختار لك أى حيوان تانى بس ياريت ماتبقاش حمار.


سؤال جانبى
ـــــــــــــــــــــــ
* تخيل نفسك فى صحراء.. إيه أول حيوان تتوقع أن تراه؟.
* ما الحيوان التى تحب مشاهدته فى العموم؟.

هناك 25 تعليقًا:

The illusionist يقول...

انا الاول بقى

The illusionist يقول...

ما علينا

لسه بحب بوستاتك وبحترمها ولو معلقتش ببقى قريته ومستعد اكتبلك اساميهم بالترتيب

وبحب قوى اسئلتك


* تخيل نفسك فى صحراء.. إيه أول حيوان تتوقع أن تراه؟.

سحليه كبيره او حرباء

* ما الحيوان التى تحب مشاهدته فى العموم؟.

سمكه قرش

او تعبان بوا او اناكوندا

مش عارف ليه بس نفسى قوى بصراحه

صباح الخير عليكى

يوميات شحات يقول...

فعلا الحمار ده حيوان رائع

سواح في ملك الله- يقول...

قديما قال حكيم \ لاتكن صلبا فتكسر ولا تكن لينا فتثني وقال علي رضي الله عنه (ان انت اكرمت الكريم ملكته وان انت اكرمت اللئيم تمردا ) وقال الله في كتابه العزيز \ بسم الله الرحمن الرحيم( (28) وَلاَ تَجْعَلْ يَدَكَ مَغْلُولَةً إِلَى عُنُقِكَ وَلاَ تَبْسُطْهَا كُلَّ الْبَسْطِ فَتَقْعُدَ مَلُومًا مَّحْسُورًا

أحمد يقول...

الحمار، هو اللي ما يعرفش يقرا إيه اللي مكتوب !!!! هو أصلاً عمل حاجة بتدل على إنه حمار؟!

زهرة يقول...

حلو البوست .. دايماً بنعتبر الحمار دى شتمة لكن والله الحمار كلة مميزات سبحان الله ..

بالنسبة بقى للسؤال الجانبى ..

أول حيوان أتوقع إنى أشوفة فى الصحراء .. ممكن يبقى ثعبان ولو إنه مش حيوان يعنى *_^

وبحب أشوف عموماً العصافير ولو إنها بردوا مش حيوانات ..

تسلم أفكارك :)

SHAPE YOUR LIFE (ABOALI) يقول...

اعتقد انك كنتى ماشية كويس وهاتقولى كلمتين كويسين عن الحمار
بس يظهر استكثرتى على الكائن الجميل ده الكلمتين دول يا موناليزا

ليه التعصب ده يا موناليزا ميصحش

اما عن صفات بعض الناس الغير مرغوبة
او اللى عندها حياء سلبى
تلعب البيئة والتربية دور كبير فى صقل تلك الصفات على الرغم من سوء تلك الصفات وما ينتج عنها

ولهولاء البشر مميزات
فمرور الزمن واكتمال دورة النضوج
ندرك نحن كيف ظلمنا امثال هولاء وكيف كان يضحكون من اجلنا فنسارع اليهم
ان كان للخلق الكريم مكان فى قلوبنا
نعتذر ونتمنى السماح منهم

لذا كل شيىء له جوانب خفية مهما كان الظاهر سلبى
وكل هولاء صمتهم وصبرهم او حتى تنازلهم
صرخات لنا ولكن فى همس رقيق

لعلنا نعى وندرك

لو تخيلت نفسى فى الصحراء اول حيوان اتوقع ان اراه
هو حيوانية نفسى
التى سترى الواقع الحقيقى لها
وستدرك كم كانت معاشرة بنى الانسان حتى وان كانوا غير متوافقين فى الصفات
فهم الذين يحلو بهم العيش وينمو

ولو تكلمنا بعيد عن التعمق
اتمنى ان ارى سفينة الصحراء الجمل

الحيوان الذى احب مشاهدته
هو الاسد رمز المهابة والعزة

تقديرى لما تسطرين هاهنا

قطرة وفا يقول...

* تخيل نفسك فى صحراء.. إيه أول حيوان تتوقع أن تراه؟.

حصان ابيض أو بني :)

* ما الحيوان التى تحب مشاهدته فى العموم؟.

الغزال

قطرة وفا يقول...

اه صحيح

البوست عجبني جدااً

نسيت أسجل إعجابي :)

momken يقول...

سيدتى المحترمه جدا

ذكتى كل مناقب الحمار

لكنك ببساطه نيتى امرين هامين

ضرب الله مثلا فاستمعوا له
بسم الله الرحمن الرحيم

(ان انكر الاصوات لصوت الحمير)

فقد خلق الله صوته وانكره
والنكران اى الاسواء على الاطلاق

وقال تعالى

بسم الله الرحمن الرحيم
(مثل الذين حملوا التواره ولم يحملوها كمثل الحمار يحمل اسفارا)
صدق الله العظيم

وهى تنم عن الجهل..او الجهل برغم ان العلم متاح

فبرغم احترامى فعلا لذلك الكائن الذكى والوفى والوديع
الا ان المثلين يكونان فى راسى حين انعت احدهم بانه حمار

ولله المثل الاعلى

استمتعت جدا بحديثك الشيق جدا

انا كمان كنت بحب عالم الحيوان ومحمود سلطان

تحياتى

كلمات من نور يقول...

الحيوانات مهانة ومتقدرش تنطق علشان هي لا تنطق بس البشر بقى فيهم اسوأ من الأنعام كما قال الله تعالى في كتابه..... واقرأي معي هذا المقال سيعجبك كثيرا عن الحيوانات وهو بعنوان: كل الإحترام للحيوانات

http://mhg1962.ba7r.org/montada-f22/topic-t1178.htm
----------------------

لو ماشيه في صحرا يارب أقابل جمل مش تعلب ولا ذئب ولا حيوان اخر مفترس

أحب اشوف الكلاب رغم اني مش باقرب منهم علشان أنوفهم بس جايز حبي ليهم يعود لأيام الولادة ..بابا جاب كلب وولف ضخم من كلية البوليس وكان بيحب يقعد جدا جنب سريري ومحدش يقرب مني وماما هددت و انتحبت لغاية ما مشى ..بعدها أصحاب خالي كان عندهم كلب وولف برضه قضينا معاها سنين تحبنا وتخاف علينا لدرجة كانت تقف تستنانا لغاية الباص ما ييجي و تطلعنا لغاية البيت وتنزل بعد ما جدتي تأكلها مكافأة لها ...مرة هزرت معاها بعود القصب وزعلت مني حسبتني حضربها و أنا أساسا كنت يمكن 6 سنوات أو 5 كنت عايزة أشوف حتاكل قصب والا لا ...فضلت يا موناليزتي تيجي تستناني كل يوم وتشوفني نزلت من الاتوبيس وطلعت البيت وتمشي ولا تبصلي ,لغاية صاحبها ما صالحنا وخلاها تفهم اني كنت باحاول اخليها تحب القصب زي ما أنا بحبه......شفتي بقى يا ستي بتخلينا نيجي عندك ونقعد نحكي نحكي ( تسلم إيديك يارب )

ماجد القاضي يقول...

كالعادة.. فكرة جميلة ومميزة..

1- طبعا رغم الصفات الجميلة العديدة التي ذكرتيها، فلن استطيع أن أقول لشخص ما أنت كالحمار في قوة تحمله :) إلا لو عاوز أشتمه بالذوق.. زي اللي بيقول لواحد أنت كالكلب في وفائه.. هههه.. يبقى الواحد مش عارف اللي زي ده يشكره ولا يلكمه في أنفه!!!
عامة حيوانات لها بخت وحيوانات لأ...!
فالربط بصفات الحصان والأسد لا غبار عليها... فلنكتفي بها..

2- طبعا متابعة البرامج الشبيهة بعالم الحيوان يساعد لمن أدرك على تنشيط عبادة غائبة لدينا وهي عبادة التأمل (أو التفكر) في خلق الله وعجائبه.. أحييكِ على الإشارة إليها هنا.

3- جميل منك أن أوضحتي أن صفات الخنوع وقبول المهانة من الآخرين (باسم الطيبة) ليس مستحسنا على الدوام (خاصة مع من لا يفهم قيمة إنسانية حض عليها الشرع الحنيف وهي الذلة للمؤمنين).

4- بالنسبة لسؤالك: بصراحة لا أحب التواجد في الصحراء.. لكن عامة بحب شكل وحيد القرن (الخرتيت)...

تحياتي أختي الكريمة.
-----------
ملحوظة لـ The illusionist:

لا أتمنى لك -بكل صدق- مقابلة حيوان من اللي ذكرتهم، إلا إن كنت نفسك تنتهي بالقضم أو البلع أو العصر... طبعا باضحك... ربنا يعافيك... أحسن لك تتفرج عليهم في السينما وتستمتع إنك خارج سليم في الآخر وإن ناس تانية هي اللي اتاكلت :).
 

فارس عبدالفتاح يقول...

والله اول حيوان اتوقع مشاهدته في الصحراء اما العقارب والحيات ، واما الضب واليرابيع الجبلية .

اما الحيوان الذي احب ان اراه دائماً هو القط وخصوص لو كان ذكراً .. ومتوسط العمر .

ويكا يقول...

اول حيوان يجى على بالى اشوفو فى الصحراء هو : الاسد مش عارف ليه

والحيوان اللى عايز اشوفه بوجه عام هو : حصان عربى اصيل ممشوق الجسد مستأنث جاهز لامتطائه ولو بغير سرج

Sonnet يقول...

short stories for your kids
قصص أبلة فضيلة لأطفالك
أرجو المشاركة مع الجميع
http://www.archive.org/details/AblaFadeela

شمس النهار يقول...

فعلا في ناس صفتها متفقه مع صفات الحمار

بس بدرجات

وبرضه بيتالموا في صمت

بوست غريب مبتكر

اكيد حصان علشان اجري بيه من الصحراء دي

بحب العصافير اللي علي الشجرة اللي قصادي جدا

:))

حنان الشافعي يقول...

إيه أول حيوان تتوقع أن تراه؟.

أفعي او عقرب


ما الحيوان التى تحب مشاهدته فى العموم؟
دولفين وفيل وخيل

وحشتيني علي فكره
اسفه اني مش باجي من زمان

ويكا يقول...

على فكره ، ركوب الخيل فعلا متعه كبيره ، وانا شايف فعلاً بالنسبالى حيوان من الممكن الواحد يستمتع بيه فى الصحراء (حال ما توافر الماء والغذاء طبعا) هو الخيل.

قمة الفروسيه والانطلاق والقوه ، انا كان عندى خيل على فكره فعلا وكان ممكتع جداً وكان لا ينقصه الا انى ابقى بيه فى مكان واسع اقدر اجرى بيه زى ما انا عايز

التدوينه جميله على فكره

أبـو مــودة يقول...

السلام عليكم ورحمة الله وبركاته اختي اسمحي لى بان اقول اختي العزيزة موناليزا
فكل من لى علاقة بهم في الله غاليين ولهم منزلة وقدر كبير عندي واسال الله ان يعلى قدرنا جميعا عنده , تحياتي لكي , انا دائم المتابعة لمدونتك وعدد قليل من المدونات التى تتسم بالآداب والاخلاق الاسلامية فالدين خلق والمدونات سلوك قبل المادة التي تحملها

وقرأت الموضوع مرات عديدة استمتعت جدا بس عندي اعتراض (اوبستراكشن)
خليك زى الحصان لا يسمح لأحد مهما كان أن يمتهن كرامته أو اختار لك أى حيوان تانى
هو الانسان لازم يختار حيوان (وكرمنا بني ادم )
أتمنى لك المزيد من الحس المرهف والمشاعر النبيلة
والتعبير الصادق الذي يفيض بما في الوجدان

عــلاء ســالـــم يقول...

السلام عليكم

فعلا معاكي حق في كلامك
الأيام دي الطيبه بتتفهم غلط وناس كتير بتفتكرها ضعف

بالنسبة للحيوان اللي بأحب أشوفه جداً ( في التليفزيون طبعاً) النمر أو الأسد

salwa يقول...

السلام عليكم اخت موناليزا
فعلا لكرامتنا حق علينا
لا تكن لينا فتعصر
و لا قاسيا فتكسر
تسلم الايادي

TIMMY !! يقول...

فيه قناة اسمها
national geographic
دي هتعجبك فيها حاجات كتير عن الحيوانات البرية

أما بخصوص السؤال لو أنا في الصحراء إيه أول حاجة هشوفها ,
فأنا فعلا بروح الصحراء كتير بحكم شغلي
لكن مش بلاقي غير فيران و عصافير
و آثار أقدام ثعالب أو ذئاب بس

TIMMY !! يقول...

آه , أما بالنسبة للسؤال التاني ,
فبجد بحب أبص للحمار قوي ,
بشوف فيه طيبة مش غباء زي ما الناس بتقول ,
بل أحيانا بشوف فيه الانكسار و الظلم ,
و على فكرة انا كنت ألفت شعر في الحمير قبل كده , بس ما نشرتوش في المدونة دي ...

Atef Shahin يقول...

أنا مثلك أعشق برامج عالم الحيوان فهي إضافة إلى الجرعة الثقافية تجعلنا نتأمل في خلق الله
أما بالنسبة للحمار تحديدا فهو على غير ما يظن الكثيرون من أذكى الحيوانات ويعرف من عاشوا في الريف أن الفلاحين يركبون الحمار من الحقل وهو يذهب بهم إلي بيوتهم دون أي توجيه منهم فهو يعرف الطريق عن ظهر قلب وهذا لا يتأتى إلا لحيوان ذكي
موضوع جميل
تحياتي

موناليزا يقول...

أهلا وسهلا بجميع السادة الحضور
سعيدة جدا بمشاركتكم وتعليقاتكم ورأيكم فيما أكتب

اسمحولى أرد على "ممكن"
أنا بشكرك لتذكيرى بآيات الله

نورتوا مدونتى
وفى انتظاركم دائما