الأحد، 9 يناير 2011

نظرة على الإعلام المرئى


مما لا شك فيه أن التلفاز وشاشات السينما لها دور رئيسى فى نقل حضارات الشعوب ومعرفة عاداتهم وتقاليدهم ولذلك أوجه رسالة إلى كل القائمين على صناعة الأفلام والمسلسلات والبرامج المصرية والذين ساعدوا بشكل أو بآخر على ظهور مشاهد مسيئة للشعب المصرى وتخدش حياء الجميع.
هل تعلم أن للإعلام دور كبير فى نشأة الأجيال وخاصة فى ظل زيادة القنوات الفضائية التى تستمر على مدار اليوم بلا توقف.


ما كل هذه الألفاظ البذيئة التى انتشرت وبغزارة وكأن مجتمعنا انحسر على الفئة سليطة اللسان مهما كان مستواهم الإجتماعى.
ماذا سيفيدك إذا استخدمت ألفاظ ومناظر خادشة للحياء.. ماذا سيفيد الموضوع بهذا.. يستطيع الجميع أن يفهموا المناظر جميعها دون الحاجة لمثل هذه المناظر الوقحة المثيرة للإشمئزاز والتى تثير الغرائز فى النفوس المريضة من خلال الإيحاءات الجنسية الصريحة أو الملابس العارية أو عرض جثث مقتوله أو وجوه مشوهة أو مشاهد غير آدمية للتعذيب أو سماع ألفاظ تؤذى الأذن وتعلم الكبار قبل الصغار على أشياء قد لا يستطيعون فعلها علانية ولكن برؤيتهم لها على الشاشة ستصبح عادية.
ماذا تتوقع بعد رؤية المشاهدين لهذه المناظر ..وماهى رسالتك التى صرفت عليها الكثير من الأموال لإظهارها فى النور.
إذا كنت تريد تصوير فئة بعينها موجودة فلتعلم بأنك أسأت الاختيار فالمشاهدين وأصحاب الفئات البائسة بحاجة إلى من يعطى لهم حلول لما هم فيه وليس بتصوير حالهم فقط.
واعلم أن هناك الكثيرين الذين يأخذون ثقافتهم من الإعلام بكافة أنواعه بل وكيفية ارتكابهم لأى جريمة أيضاً.



نريد مناظر محترمة لا نخجل من رؤيتها ونطلب من أبنائنا مشاهدتها ليتعلموا القيم والأخلاق.
نريد مناظر واقعية بصيغة محترمة يعيشها الجميع وليست دخيلة على مجتمعنا.
نريد فى حالة إقتباسكم لقصة أجنبية أن تنوهوا لذلك ليعلم المُشاهد بأن هذه القصة لا تمت لواقع عادات مجتمعنا بصلة.
لا نريد الاستهتار بمشاعرنا أو خدش حياءنا أو جلب ثقافة غربية لا تمت لأخلاق مجتمعنا بصلة وإقناع الجميع بأن هذا يحدث بطريقة عادية.
لا نريد سماع أغانى مستفزة بكلماتها المتدنية. حتى لو بطريقة فى ظاهرها كوميدية.
لا نريد برامج مستفزة خالية من أدب الحوار وتستهزأ بالضيف.
وأخيراً نريد إعلام هادف وإلا فلتمتنعوا عن إيذائنا.



سؤال جانبى
ــــــــــــــــــــــ
* أذكر اسم برنامج ومسلسل وفيلم أستفزوك وتلوم من سمح بوجوده على الشاشة داخل بيوتنا؟.
* ما اكثر شئ تحرص على متابعته فى التلفاز؟.

هناك 20 تعليقًا:

أنا - الريس يقول...

بقي فكريني أقفل أصلا كل القنوات اللي بتشغل أفلام ومسلسلات
لانها بتغيب الشعب اكتر ما هو غايب أصلا .

الحمد لله داخل في السنة الثانية في عدم مشاهدة التلفزيون إلا حجات بسيطة وبالصدفة البحته .

اكثر ما يضيقني إنهم يستضيفوا اللعيبة والممثلين علي أساس انهم مفكري المجتمع .

وشايف إن الأولي نجيب المفكرين الحقيقي من علمائنا المهجرين . ومفكرينا المطورين للمجتع والمغريين في للأفضل

Mafrousa يقول...

ابسط حاجة حيقولولك اقلبي المحطة
حاجة تفرس بجد
و بعدين مستغربين اننا بنتفرج على المسلسلات التركي!!!
المسلسلات ديه بتجيب مناظر طبيعية للبلد جميلة سيبك من قصة المسلسل
بس بتوريكي مناظر احسن من اللى احنا بنظهرها

الفيلم اللى اتفرست منه بالقوى كلمنى شكرا
فيلم زبالة الصراحة
و بعدين يجي المخرج يقولك ما ديه فئة من المجتمع
عارفة انتى لما تظهري دايما الحاجات الحلوة الناس يمكن تتغير
يتغير اسلوبها
بس للاسف بتتاخد الالفاظ و الحركات من باب الروشنة
ياااي كووول
و هيه الفاظ و حجات غير لائقة بالمرة
حتى الكرتون بتاع الاطفال دلوقتى بقا فيه كمية عنف غير طبيعية
يا بنتى انا نفسي يبقا فيه رقابة على كل شيء
بس طبعا حتلاقى اللى يطلعلك و يقولك لأ لازم الناس تشوف علشان تعرف الوحش و مش تعملة
للاسف المجتمع دلوقتى بيشوف الوحش و بيقلدة بالحرف
بقولك ايه انا مفروسة جداااا من التلفزيون و الدش اصلا
ما فيش حاجة عدلة ممكن تتفرجي عليها
:D
بس علشان مش اكون كدابة انا بتفرج على مسلسلين تركي اليومين دول
واحد بيجي الساعة 3 و التاني الساعة 8 و توم و جيري

eng_semsem يقول...

احياكي على الموضوع المهم بس المشكله ان ده بقت رسالة الاعلام النهارده انه يلوث كل دين نزل من السما ويقنع ضعاف القلوب بحاجات غلط زي ان الحجاب حبس حريه والدقن ارهاب ويجيب النماذج الغلط تبقى هي الصح ان البنت اللي مش بتعيش قصة حب وهي في الثانويه او لم تدخل الجامعه تبقى مكبوته والشاب اللي مش بيرقص ويسهر والى اخره يبقى انطوائي وجاهل
اما البرنامج وده فكرت اني ما اكتبش اسمه يحسن حد يشوفه لانه جارح للحياء تماما برنامج اسمه اهضم شئ على mtv
عباره عن نكت كلها قلة ادب

غير معرف يقول...

أحسنتِ
سأعرض هذا الموقف العابر
منذ قليل رأيت صدفة فديو كليب لأغنية لمصر ولبنان معًا وفوجئت في نهاية الأغنية التي لم أتابعها منذ بدايتها وقال لي الزميل المرافقة أنها ممتاااااااازة - فوجئت بأن المغنية التي تمثل مصر وكان اسمها على ما أتذكر : أمنية تقول" أركب الحنطور وأتحنطر "

شيء مستفز
أشاهد هذا الواقع في عملي أيضًا، والله العليم كما ضحينا بفرصٍ لأجل الالتزام بقيمة الكلمة كشكل ومضمون - الحمد لله

غير معرف يقول...

الله عليك اختي الكريمة موناليزا
منذ ايام بل واكثر كنت انتظر الساعة التي سأكتب فيها عن هذا الموضوع الهام
ولكن في كل مرة كنت اتأخر لظروف العمل وغيرها..
ربما تكون نظرتي الشخصية قاسية علي الاعلام عموما وليس علي الافلام والمسلسلات فقط
فكل شيء يجب ان تكون له ضوابط ليست لحجب الرأي ..ولكن لحجب كل ما يلوث كرامة الانسان أو يهزأ من قيم الأديان
أشكرك وجزاك الله خير

Carmen يقول...

فعلا الاعلام وسيلة مهمة جدا لترسيخ المفاهيم الصالح منها والسئ
ربنا يحفظنا من التفاهات اللي بتنزل ع التلفزيون
تسلم ايدك بوست رائع

مصممة أحلام يقول...

السلام عليكم و رحمة الله و بركاته

احييكي بشدة على الموضوع ده اختي موناليزا
و الله الواحد حاسس ان الهدف الطبيعي للاعلام في بلدنا اصبح تعليم كل ما هو سلبي و سفيه و منحط للشعب و نشر ثقافة قلة الادب في الشارع و البيت و المدرسة و الجامع ان امكن مش عارفة ليه بقيت حاسة ان ده مقصود و عن سابق الاصرار و الترصد بالذات بعد غلق القنوات الدينية المحترمة و ترك قنوات الاغاني و العته اللي بتجيب واحدة واقفة بتتلوى على الشاشة بتقول فوازير متخلفة و يالا اتصل احنا مستنيينك
في حوار عن القنوات الدينية اللي اغلقت سألت المحاورة الدكتور صفوت حجازي باستخاف القنوات دي نهضت بالامة في ايه و ايه الرسالة اللي بتقدمها القنوات دي للامة قصدها على القنوات الدينية مش قنوات الفوازير طبعا
نفسي انا بقى اعرف كل القنوات دي بتاعة الفوازير و اتصل بينا و الافلام الغريبة اللي اصبحت مجرد ذكر اسمها يكسف و البرامج اللي بقت نصها فنانين و لاعيبة كورة و حوارات هبلة و النص التاني مقالب و خفة دم عملت ايه بالامة غير وكستها اكتر
بالنسبة للسؤال اكتر برنامج استفزني برنامج اسمه الجريئة بقالوا سنتين بيتعرض في رمضان تقديم ايناس الديغيدي و مش حاقول ليه
انما الافلام و المسلسلات اكتر من ان حد يتكلم فيها بس بتهيألي فيه مخرج صعد على قمة الهرم و اصبح مجرد ظهور اسمه على فيلم يمنعني من مجرد اني اشوف اعلان الفيلم طبعا خالد يوسف و دايما بيقول انه بيصور الواقع الظاهر انه طول الوقت بيراقب واقع صفايح الزبالة في العالم العربي فقط

Tota يقول...

موضوع حلو اوى يا موناليزا والمشكلة ان القنوات الفضائية انتشرت بشكل غير طبيعى ودا دليل ع نجاحهم اساسا انا كل ما افتكر وانا صغيرة يعنى من حوالى 12 سنة او اكتر كانت القناة الاولى والتانية بتقفل من الساعه 7 باليل وبخاصة التالتة لكن دلوقتى ممكن تسهرى اسبوع بحاله تتابعى كل حاجة ع القنوات دى واللى بيفوتك بتلاقيه تانى يوم والله فى حاجات كتيرة اوى اوى وبخاصة الاعلام العربى ...اكتر حاجة بتضايقنى اوى وانا بشوف القنوات دى جميع الافلام اللى بيكون منتجها محمد السبكى متتصوريش قد ايه ولما اشوف ممثلة لابسة الحجاب وغيرت رايها وخلعته تانى يوم او واحد لابسة الحجاب وطالعة تمثل كتــــــــير بقى متعديش.....اما الحاجات اللى بحب اتابعها اغلبها برامج وخاصه العاشرة مساء بس بعمل ترفيه لنفسى بردة وبتفرج ع مسلسلات تركى (:

سواح في ملك اللــــــــــــــــــه- يقول...

موناليزا
هي البرامج الي بتستفز كتير
مثلا الانسة ايناس الدغيدي وبرنامجها
هالة سرحان وبرنامجها

Unknown يقول...

أظن الاعلام عندنا بعيد كل البعد عن الطريق الصحيح الذي لازم يكون عليه ، الله يهدينا و يصلح حالنا .

هذه أول مرة لي على المدونة الرائعة ،

كل التقدير

ليلى الصباحى.. lolocat يقول...

السلام عليكم ورحمة الله

الاعتقد ان الاعلام العربى بوجه العموم اصبح اداة سخيفة لسحق العقول والادراك ولدمار الفهم والذكاء اعاذنا الله

وفى تعليق لاحد الصديقات هنا Mafrousa قالت ابسط خاجة هيقولوا اقلبوا المحطة
ولذلك ... لانى لا استطيع ان اغير من مفاهيمهم واسلوبهم الردىء
تركتها لهم بالأجمال واكتفيت بكم اهل المدونات ونشرات الاخبار والقنوات (( اللى فضلت يعنى )) الدينية

تحياتى لك اختى الحبيبة وبارك الله فيك
دمت بخير

الطائر الحزين يقول...

قصدك تقولى اذكر اسم برنامج او مسلسل لم يستفزوك

تقريبا مش بشوف التليفزيون الا بالصدفة

موناليزا يقول...

مستر بريزيدنت
ـــــــــــــــ
أهلا بيك أستاذ بسام
أغلبية الناس دلؤتى بقت بتتفرج على التليفزيون بالصدفة:)
و دى حاجة كويسة

متفقة معاك جدا
أشكرك جدا لتعليقك ولممشاركتك
يسعدنا دوام التواصل


******************************

مفروسة
ـــــــــ
أهلا بيكِ حبيبتى بعد طول غياب
وهو انا هشترى تليفزيون وريسيفر وفى الاخر هفضل اقلب القنوات عشان الاقى حاجة محترمة اتفرج عليها وملاقيش!

المسلسلات التركية معلوماتى عنها انها طويلة اوى.. اذا كان على المناظر الطبيعية ففى قناة حلوة اوى بتجيب الحاجات دى على طول:)

صح .. للاسف الوحش بقى منتشر على الشاشة اوى وطبيعى اللسان يلقط الكلام اللى بيسمعه طول الوقت

انا دايما بسأل هى الرقابة فين؟؟

:) حتى توم وجيرى لما تركزى اوى فى القصة تلاقيها غير منطقية.. ليه احنا بنتعاطف مع الفار رغم ان هو المتسلل ونبقى ضد القط رغم انه بدافع عن بيته!!

أشكرك جدا لتعليقك ولمشاركتك
فى انتظارك دائما


*****************************

انج سمسم
ــــــــــ
أهلا بيك ياباشمهندس
عندك حق.. ولا السيجارة اللى مابتفارقش البطل فى كل المواقف المهمة..وطبعا الممثل بيكون محبوب للجميع فبديهى أن الشباب تقلده
وطبعا يوم مايجيبوا واحدة محجبة يا اما يجيبوها مبهدلة والوان لبسها مش لايق على بعضه ويكون معاها بطلة سايبة شعرها ولابسة اشيك حاجة فطبيعى البنات يحبوا يكونوا شكلهم حلو.. يعنى لو استغنوا عن السجاير فى مشاهد الافلام والمسلسلات القصة مش هتختل وبرضه لو ملابس الممثلات كانت حشمة وفيها حجاب بألوان متناسقة (حجاب بجد مش اسبانش)برضه مش هيخل القصة فى شئ.. وحاجات تانية تبان بسيطة بس بجد هتفرق كتير مع المشاهد

أشكرك جدا لتعليقك ولمشاركتك
يسعدنا دوام التواصل


*******************************

أحمد شريف
ــــــــــــ
أهلا بيك أستاذ أحمد
ده فيه موقف اكثر سوء.. فيه اغنية حلوة برضه مش فاكرة اسمها بس كانت عن النبى عليه الصلاة والسلام كان فيه مغنية من الفريق كانت بتغنى أغنية بيئة اسمها"زكى يا زكى".

أشكرك جدا لتعليقك
يسعدنا دوام التواصل


******************************

ماشى بنور الله
ـــــــــــــــ
أهلا بيك يافندم
ونحن فى انتظار ماسيكتبه قلمكم فى هذا الشأن
ده حقيقى جدا.. لان الاعلام له دور كبير فى تكوين شخصية الفرد.. شاهد أطفال الحضانة ومدى ثقافتهم التليفزيونية.

أشكرك جدا لتعليقك
يسعدنا دوام التواصل


********************************

كارمن
ــــــــــ
أهلا بيكِ ياسمسمة
أشكرك جدا لرأيك ولتعليقك
نورتينى حبيبتى واسعدنى تواجدك


*****************************

مصممة احلام
ـــــــــــــ
وعليكم السلام ورحمة الله وبركاته
أهلا بيكِ حبيبتى
عندك حق والله
تعرفى ان حتى أسماء البرامج رغم غرابتها بالنسبة لنا مسروقة من برامج فى بلاد تانية وحتى بنفس الفكرة .. يمكن فى مجتمع تانى تكون مقبولة لكن عندنا صعب نقبل ثقافة حد تانى

أشكرك جدا لتعليقك ولمشاركتك
فى انتظارك دائما


*****************************

توتة
ــــــــ
أهلا بيكِ يا توتة
أشكرك جدا لرأيك
هو مش دليل على نجاحهم على قد ما هو دليل على الفراغ اللى بيعانى منه مجتمعنا
بس جميل ان الحاجات بتتعاد على مدار اليوم الواحد كذا مرة اللى مش جميل الحاجات اللى بتعرض:)

أشكرك جدا لمشاركتك
فى انتظارك دائما


****************************

سواح فى ملك الله
ـــــــــــــــــ
أهلا بيك أستاذ خالد
هى هالة سرحان رجعت تانى ولا ايه!

أشكرك جدا مشاركتك
يسعدنا دوام التواصل


*****************************

محمد
ـــــــ
أهلا بيك أستاذ محمد فى زيارتك الأولى
ده حقيقى
أشكرك جدا لتعليقك
نورت مدونتى ويسعدنا دوام التواصل


*****************************

ام هريرة
ـــــــــــ
وعليكم السلام ورحمة الله وبركاته
أهلا بيكِ حبيبتى
ده حقيقى وكأنها خطة مدبرة
أشكرك جدا لتعليقك ولتواجدك
نورتينى ياجميلة وفى انتظارك دائما


******************************

الطائر الحزين
ـــــــــــــــ
أهلا بيك يافندم
:)
أغلبية الناس كده دلؤتى بتتفرج على التليفزيون بالصدفة
أشكرك جدا لتعليقك
يسعدنا دوام التواصل

Unknown يقول...

السلام عليكم

موضوع مهم أختي موناليزا يجب التذكير به من حين لآخر خاصة لمن لديه أطفال يريد تربيتهم بحق...

من الردود المستفزة والمكررة للمخرج والمخرجة الشهيرين بعرض أسوأ ما في المجتمع وبأقصى درجة من الفجاجة: هذه هي صورة المجتمع.. الفن وظيفته التعرية وفضح الأخطاء وليس تقديم حلول.. من يعارض هذا فهو لم يفهم القيمة من وراء الفيلم..!!!!!!!!

والله المستفز في التلفاز كثيييييير يصعب حصره.. لكن أفضل ما يمكن مشاهدته هذه اليام هو برامج التوك شو فضلا عن (بعض) القنوات الدينية التي تقدم الإسلام المعتدل وبصورة ممتعة جذابة.

تحياتي وتقديري أختي الكريمة.

مصطفى سيف الدين يقول...

السلام عليكم
بداية احييكي علي طرحك قضية مهمة وخطيرة زي قضية القنوات واللي بيذيعوه من أفلام تخدش الحياء سواء من الكلام او المناظر وفوق كده معدومة القصة والافادة الفيلم اما بيكون كوميدي لدرجة التفاهة او مسف لدرجة انه للكبار فقط
نفسي بقي نلغي حكاية للكبار فقط دي ولو فيلم قصته كده يبقي بلاش منه احسن مش عايزينه يا سيدي احترم اطفالنا اللي بيتفرجو علي التلفزيون
غير بقي الكليبات المريعة اللي مبتهتمش بالصوت ولا الاغنية قد ما بتهتم بالمناظر اللي تاخد عقل الجمهور
بالنسبة للافلام الفارساني كتير اوي اوي ومن زمان جدا خدي عندك افلام المقاولات في التمانينات وافلام الست ايناس وافلام خالد يوسف
والبرامج متعديش في برامج كتير بتعدي الخطوط الحمرا ومبتحترمش عقلية المشاهد
حتي البرامج الرياضية مدحت شلبي مثلا اتعدي الخط الاحمر وقال نكتة جتله في مسج كانت خارجة عن النص واتحول للتحقيق لما برنامج رياضي يحصل فيه كده اومال نتفرج علي ايه
بصراحة حال الاعلام عندنا بقي يقرف ولازم تتحط جزاءات صارمة علي مقدمي البرامج
شكرا ليكي اختي الفاضلة وتحياتي

TIMMY !! يقول...

انتي عاوزانا نزور الحقيقة و نجّل الصورة ؟؟

لا , الفن فن , لازم يُظهر كل حاجة من سفالة و دعارة و فسق و مجون ,
أيوة ,
أصله انعكاس للواقع

و طبعا ... رسالة !!

ويكا يقول...

موناليزا
انا معاكى فى حاجات وحاجات فاتتك

اللى معاكى فيه فعلا انهم جعلوا الحد الادنى من الفصال الخلقى بينا وبيهم هو البذائه وقلة الادب فبالتالى اللى هيتابع طول الوقت سيكون قليل الادب عادى مبدأيا وبعد كده يبدأ يتناقش فى بقى فى مدى قلة الادب

اللى مش معاكى فيه

انا ما اظنيش انى ينفع اروح لناس بتوع كباريه واقولهم يا جماعه ليه ما تقدموش عصير وفاكهه بدل الخمرا علشان نقدر نيجى نسهر معاكم

الافلام والمسلسلات من الاصل لا يجوز متابعتها او الفرجه عليها ، ولو فرضنا جدلا اننا هنتابعها برده بغض النظر عن عدم جوازها فلو قاطعنا الافلام والمسلسلات المخله منها ، اتومتيك المخرف والمنتج والمؤلف هيحترموا نفسة اللى خلفوهم وهيحسنوا من اسلوبهم حتى يرضوا الذوق العام من المشاهدين (لان المشاهد هو اللى بيتحكم فى ايه اللى بيتعرض قدامه مش المخرج ولا الممثل .... ماحدش بيجبرنا نعرض شئ ).
وعااادى ما فيه افلام كتيره ابيحه اتعرضت واحنا ما روحناهاش ومنها عدد لا بأس به سقط واحنا ما حصلناش حاجه وعايشين اهه وكويسين وما اتاذيناش من مشاهدتها

اتمنى تكونى فكرتى وضحت لانها برده معتمده على اسس اقتصاديه تجاريه واسس فكريه اجتماعيه واعلاميه


سبحانك اللهم وبحمدك سبحانك لا اله الا انت نستغفرك ونتوب اليك

ahmed_k يقول...

حقا يا موناليزا فقد أصبح التليفزيون وما يقدمه من مسلسلات وأفلام لا تمت لواقعنا بصله في قمة الإستفزاز والإنحدار الخلقي ، مما كون ثقافة الإباحيه في كثير من قطاعات المجتمع
فقد ظلت السينما معول هدم في قيم وأخلاقيات المجتمع حتى أصبح شبابنا فاقدا للقيم والأخلاق والمجدعه التي أشتهر بها المصري ، فأصبح النصب فهلوه والخيانه حب والسرقه شطاره
كان الشاب المعاكس يتصرف تصرفه على إستحياء والآن نسمع عن التحرش بكل جرأه وبجاحه
فإلى متى سيظل هؤلاء الماسونيين يسيطرون على إعلامنا ؟؟ وإلى أين سيصلون بأخلاقيات مجتمعنا إنحدارا ؟؟
نسأل الله العفو والعافيه

Hasan يقول...

السلام عليكم ورحمة الله وبركاته

من فترة مش بقرأ أراء حضرتك للأسف
تقصير مني
علي العموم أنا مش فاكر صراحه اسم فيلم لكن
تقريبا أكثر من 90 % من أفلامنا فيها كلام خارج

وأكثر حاجه بحب أتابعها علي التلفزيون لو قعدت

MBC Action
National Geographic
Al Jazera

موناليزا يقول...

ماجد القاضى
ــــــــــــ
وعليكم السلام ورحمة الله وبركاته
أهلا بيك أستاذ ماجد
ده حقيقى وخصوصا ان الاطفال هم اكثر فئة تشاهد مايعرض فى التلفاز وتتأثر بيه جدا

تعرف ان فيه مخرجين كتير غيرهم برضه بس الاعلام مش بيركز عليهم.. ممكن اقعد اتفرج على فيلم عشان افهم هو عايز يقول ايه وفى الاخر الاقى كلمةالنهاية وانا أصلاً ماوصلنيش القصة مش بس الهدف:)

أشكرك جدا لتعليقك ولمشاركتك
يسعدنا دوام التواصل


******************************

مصطفى سيف
ــــــــــــ
وعليكم السلام ورحمة الله وبركاته
أهلا بيك أستاذ مصطفى
أشكرك جدا جدا على تعليقك واتفق معاك فى كل ما قلته
يسعدنا دوام التواصل

******************************

تيمى
ــــــــــ
أهلا بيك يافندم
:) تصدق فعلا انى كنت عايزاهم يزوروا الحقيقة

أشكرك جدا لتعليقك
يسعدنا دوام التواصل


*******************************

ويكا
ـــــــ
أهلا بيك يا باشمهندس
أشكرك لاتفاقك معى فى جزء معين
وبالنسبة لاختلافك معى فى الجزء الآخر مع احترامى الشديد لرأيك ولكن المقاطعة مش هى الحل لأن اللى هيقاطعوا مهما كان عددهم فهم برضه فئة قليلة بالمقارنة باللى بيتفرجوا
يعنى مثلا حضرتك مابتروحش سينما وانا كمان مابروحش سينما .. تفتكر ده هيأثر معاهم!!
طبعاً لأ لأن اللى بيروحوا كتيييييييير جدا وغالبيتهم أقل من 20 سنة
وعشان كده لازم هما اللى يحترموا حياء المشاهد وعقليته وأخلاقه

أشكرك جدا لتعليقك
ويسعدنا دوام التواصل


*******************************

أحمد-ك
ـــــــــ
أهلا بيك أستاذ أحمد
عندك حق فللاعلام دور مؤثر جدا.. وياريت المسئولين عنه يعرفوا ان اى حاجة بتتعرض هتكون فى ميزان أعمالهم
أشكرك جدا لتعليقك
يسعدنا دوام التواصل


******************************

حسن غيتا
ــــــــــ
وعليكم السلام ورحمة الله وبركاته
أهلا بيك أستاذ حسن بعد طول غياب
يافندم حضرتك تشرفنى فى أى وقت فمكانك محفوظ دائماً

فعلا البذائة أصبحت هى السائة بطريقة تخدش حياء الجميع

أحييك جدا على اختياراتك
وأشكرك جدا لتعليقك
يسعدنا دوام التواصل