الخلافات الزوجية

كثيراً مانسمع عن حدوث خلافات بين الأزواج ونادراً مانسمع عن زوجين حياتهم خالية من المشاكل.
وحينما نسأل أحد الزوجين عن هذه الأسباب قد يقول بأنه لا يشعر براحة لأن شريك حياته لا يستمع إليه ويرفض المناقشة ومستبد برأيه.
وقد يقول الطرف الآخر: رده الوحيد على كلامى هو الصمت ومهما اعمل مفيش حتى نظرة رضا أو تقدير.
ولذلك أوجه نصيحة لكلا الطرفين:
- أنتما الآن مسئولان عن إقامة هذا المنزل وإعماره ولذلك وجبا عليكما أن تستمتعا بهذا حتى تستطيعا النجاح.
وذلك عن طريق مصارحة الطرف الآخر دائماً بما يضايقك.
مثال:
للزوجة: بدل ماتقولى عليه أنه مستبد برأيه وديكتاتور
عرفيه بصراحة أنك عايزاه يسمعك ويتناقش معاكِ ويا تقنعيه يا يقنعك.
للزوج: بدل ماتتهمها أن أكلها مش حلو زى أكل مامتك
عرفها أنك بتحب الأكل يكون فيه شطة وبهارات كتير مثلاً.
للزوجة: بدل ماتقولى عليه بخيل.
عرفيه أنك عايزاه يجيب لك هدية من وقت للتانى
للزوج: بدل ما تقول عليها أنها بتخرج بدون إذنى.
عرفها أنك لازم تبقى عارف هى هتخرج إمتى ورايحة فين وإنك بتضايق لما تيجى البيت مابتلاقيهاش.
للزوجة: بدل ماتقولى أنا معرفش عنه حاجة.
عرفيه أنك تحبى تعرفى هو بيخرج يروح فين عشان عايزة تكون مطمنة دايماً عليه.
للزوج:بدل ما تقولها مش وقته انى اشتريلك هدوم جديدة.
عرفها إن ظروفك المادية لا تسمح بالشراء فى الوقت الحالى.
للزوجة: بدل بتتعبى وتتضايقى أنه بيعزم قرايبه كتير.
عرفيه أنك مش متعودة على كده وأن العزومات بتكون متعبة جدا وأنك مابتحبيش الزحمة وخصوصاً لو على طول.
للزوج: بدل ماتيجى من بره وإيدك فاضية رغم أنها مأكدة عليك تجيبلها حاجات.
أول ماتشوفها عرفها إنك مالقيتش اللى هى طلبته.. بكده هتحس إنك مهتم بيها وبلاش تستنى لما هى تسألك وبلاش تقولها إنك نسيت.
وهكذا فى جميع المواقف
فالصراحة ورغبتكم فى الاستمرار كفيلة بجعل حياتكم وردية.
واعلموا بأن السعادة إرادة.. وإذا لم تكن تريد إسعاد نفسك فلا أحد يستطيع فعل ذلك.
فإذا قابلك الطرف الآخر بأى شئ إيجابى أعده لك خصيصاً لا تصده وارسم على وجهك البسمة - حتى وإن لم تشعر بذلك- ويكفى أنه أراد إسعادك على طريقته.
ونصيحة أخيرة.. لا تدخل أى مناقشة مع شريك حياتك وأنت تزعم على أن يكون هو الخاطئ فأنتما لستما فى مبارة ومابينكما ليس منافسة ولكنه حياة.

سؤال جانبى:
ــــــــــــــــــــــ
* ما أكثر شكوى تسمعها دائما من الأزواج؟.