الخميس، 26 مايو 2011

السلم الشيطانى


قال تعالى " ولا تتبعوا خطوات الشيطان".
للشيطان طرق ملتوية كثيرة.. يكفى أنه يرانا من حيث لا نراه.. ويعرف مواطن ضعف الجميع وينتهز أى فرصة لتزيين المعصية لأن المعصية غير مستحبة لأى إنسان مهما كانت ديانته ويرفضها أى عاقل ولذلك يقوم الشيطان بتزيينها وتجميلها ويتعامل مع الإنسان بسياسة البال الطويل ويكفى قسمه وتحديه للمولى عز وجل حينما قال" وعزتك وجلالك لأغوينهم مادامت أرواحهم فى أجسادهم" وهذا يعنى أنه من الغباء أن نتهاون به فهذه وظيفته إلى يوم الدين.. ولذلك أردت أن أذكر نفسى وإياكم لبعض طرقه فى التعامل معنا بعرض بعضاً من الأمثلة.
* من ترتدى طرحة طويلة مثلاً.. يزين لها بأنها لاتظهر جمال وشياكة ماترتدى ولماذا اشتريتى هذا الفستان الغالى طالما سيختبئ وراء طرحة لامانع من تقصيرها قليلاً.. أو ما سيضير إذا ارتديتى الإسبانش فهذا على الموضه أكثر والدين يسر والمهم أنك تغطين شعر رأسك.. ما المانع أن تخلعى الحجاب يوم زفافك أو فى المناسبات عموماً فهذه مجرد ليلة ولن تضر فى شئ فالله غفور رحيم.



* مدمن المخدرات.. كانت البداية مجرد سيجارة وعزومة كمان.. إثبت للجميع بأنك رجل وتستطيع السيطرة على نفسك فى أى وقت تريد..تعانى من مشاكل عاطفية الحل بسيط المخدرات هى الحل.. جربها وأنت تشوف بنفسك.

* الاختلاط بداية للزنا.. سواء اختلاط أقارب الزوج وزمايله بالزوجة أو غيرها من الأمثلة المعروفة للجميع.. والبداية أنتم زى الأخوات أو أهلى عارفين أو أنا واثقة من نفسى أو أنت مابتعملش حاجة غلط ما الكل متصاحب إشمعنى أنت يعنى .. ماتبقاش معقد..والزنا أنواع فالعين زانية وزناها النظر والأذن زانية وزناها السمع واللسان زانى وزناه الكلام والفرج يصدق هذا أو يكذبه.

* التحدث فى الهاتف لتضييع الوقت..الثرثرة والغيبة والنميمة.. التوقيع بين الناس..
* إدمان المواقع الإباحية أو القنوات البورنو تبدأ بنظرة فضولية أو إشمئزاز..
* إضاعة الوقت بالساعات فى ألعاب الكمبيوتر.. تبدأ بالتجربة والمنافسة والرغبة فى الفوز.. ومش مهم إن الصلاة ماتتصلاش فى وقتها والمذاكرة مش هتطير وطلبات أمك مابتنتهيش وأبوك دقة قديمة وأنت يعنى بتضر مين ما أنت قاعد فى حالك من وقت مابتصحى لحد مابتنام ماببتحركش من مكانك.
* عدم الإستذكار.. يبدأ بإجراء مكالمة هاتفية لأخذ المنهج مثلاً وطبعا الكلام يحلو والمكالمة ماتخلصش غير لما تكون عايز تنام.. أو ترد على تليفون المنزل أو تستقبل اتصال على موبايلك أو رسالة.. مشاهدة حلقة من مسلسلك المفضل على اعتبار أنها حلقة مهمة ومش هتتعاد تانى..
* عقوق الوالدين.. يبدأ بعلو الصوت.. أو نظرات حتقار.. وأنهم مش فاهمينك وبيفكروا بطريقة قديمة...
وغيرها من الأمثلة التى عبرت عنها الصور التالية:

ملحوظة هامة:
ــــــــــــــــــــ
يوجد شياطين فى الإنس لاتقل خطورتهم عن شياطين الجن.. والزن على الودان أمر من السحر.. والتنازل يبدأ بخطوة.. والتعود يجعل فعل الشئ عادى.. والوحش مابيحبش يكون هو بس اللى وحش ..ده بيحب الكل يبقى زيه عشان بينه وبين نفسه يقول مش أنا لوحدى.. وهتلاحظوا دى مثلاً فى رغبة المدخن وإلحاحه فى أن يشرب زميله غير المدخن سيجارة أو أنه يصاحب بنات أو يسهر معاه لوش الفجر قائلاً بنبرة الصديق الصدوق جرب ومش هتندم هى دى حياة اللى أنت عايشها إيه الإلتزام والجو اللى يخنق ده.. أنا بستغرب أنت مستحمل نفسك إزاى.

وبرضه النساء ليهم دور كبير لو شافت فتاه صغيرة السن لا تصافح الرجال تقولها بس ده زى أخوكى أو ده زى عمك أو ده أنتوا متربيين مع بعض..
أو لو شافتها مابترفعش حواجبها أو مابتحطش ميك آب تقولها ليه مش عاملة زى اللى فى سنك وبدرى عليكى وإن الله جميل يحب الجمال وأنا لا أكذب ولكنى أتجمل.
أو مابتروحيش أفراح مختلطة ليه..أو مابتسمعيش أغانى ليه.
.أو ليه على طول بتسمعى قرآن هو أنتى فى ميتم إيه الفال اللى أنتى مشغالاه فى البيت على طول ده.
أو ليه خانقة نفسك بالحجاب لما بتزورى حد أو حد يزورك ده الجو حر نار.. فكى عن نفسك شوية وبعدين ده أنتى فى بيتك.
وغيرها كتييييييييير
اللى يحب يضيف أمثلة فكلنا آذان صاغية.







اللهم إنك سلطت علينا عدواً عليماً بعيوبنا يرانا هو وقبيله من حيث لا نراهم.. الله آيسه منا كما آيسته من رحمتك وباعد بينه وبيننا كما باعدت بين المشرق والمغرب وقنطه منا كما قنطه من عفوك.. إنك ولى ذلك والقادر عليه.
أقول قولى هذا واستغفر الله لى ولكم.

هناك 18 تعليقًا:

كريمة سندي يقول...

اللهم سخر لنا ملائكة السماء وصلاح الأرض اللهم آمين.

موضوع جدا جميل ومجهود أكثر من رائع تحياتي الصادقة

مصطفى سيف الدين يقول...

اللهم امين
نستغفرك اللهم ونتوب اليك
الشيطان مسالكه عديدة واسلحته قوية وضعفنا الانساني يكمن في جهاد انفسنا
لو اننا استطعنا ان نتحكم في النفوس و نجعلها تزهد في اطماعها وشهواتها ربما لن يجد الشيطان سبيل لنا
تحياتي لكي وجزاكي الله خيرا

سواح في ملك اللــــــــــــــــــه- يقول...

مقال تستحقي عليه جايزة
ورسومات معبرة
ومن ناحية شيطان الانس فقد قالها
رسولنا الكريم في حديث مختصر
(المرؤ علي دين خليله فلينظر احدكم من يخالل)
صدق الرسول الكريم

Unknown يقول...

البوست مهم جداً يا منى أشكرك على مجهودك و الصور معبره جداً.
للأسف شياطين الانس كتيييير و ممكن يكونوا قريببين و ليهم سيطره على اللي حواليهم ربنا يهديهم و ايانا...حتى الأهل ممكن يقدموا تنازلات دينيه كتي عشان البنات تتجوز...و الأصدقاء بيسخروا من بعض عشان يبقوا الاتنين على معصية.
شكراً على الموضوع المهم و السرد الرائع.
تحياتي و كل الود لكي

شمس النهار يقول...

اومال هو اتسمي الوسواس الخناس ليه

بوست رائع

Mahmoud Ahmed يقول...

اعوذ بالله من الشيطان الرجيم

اللهم إنك سلطت علينا عدواً عليماً بعيوبنا يرانا هو وقبيله من حيث لا نراهم.. الله آيسه منا كما آيسته من رحمتك وباعد بينه وبيننا كما باعدت بين المشرق والمغرب وقنطه منا كما قنطه من عفوك.. إنك ولى ذلك والقادر عليه.

جزاكي الله كل خير على التنبيه
تحياتي لكي

eng_semsem يقول...

تسلم ايديكي موضوع مهم جدا ولازم ناخد بالنا منه في كل حياتنا فعلا الشيطان بيزين قدامنا حاجات سيئه عشان نغرق في بحر المعصيه
جزاكي الله عنا خير الثواب

TIMMY !! يقول...

فعلا شياطين الإنس أحيانا بيكونوا أشد خطرا من شياطين الجن ,
علشان كده ربنا أمرنا نستعيذ به من الاثنين { الذي يوسوس في صدور الناس , من الجِنَّةِ و الناس }

lina يقول...

السلام عليكم و رحمة الله و بركاته

جزاكِ الله خيرا على المجهود الطيب و الطرح المفيد

تحياتي
لينا.

Unknown يقول...

السلام عليكم أختي موناليزا..

أنا مش هقول غير جملة واحدة:
"امتى هتجمعي سلسلة التدوينات التوعوية دي في كتاب"؟!!!!!!!!!!

تحياتي وتقديري الدائمين.

rack-yourminds يقول...

اكتر حاجه بستفزني انه في شريحه كبيره من فتيات الزمن ده تلاقيهم مصاحبين رجاله بذريعة الزماله والصداقه ويبقي تخلف لو حد انتقدهم

أنا - الريس يقول...

اللهم أرنا الحق حق وارزقنا اتباعه
وارنا الباطل باطل وارزقنا اجتنابه

موناليزا يقول...

كريمة سندى
ـــــــــــ
أهلا بيكِ يا كريمة
ربنا يتقبل دعائك
ربنا يكرمك يارب فما توفيقى الا بالله
نورتينى حبيبتى وفى انتظارك دايما


*********************************

مصطفى سيف
ـــــــــــ
أهلا بيك يا دكتور
حقاً إن أقوى جهاد هو جهاد النفس
ربنا يبعد عنا شياطين الانس والجن وينجينا من شرهم ومكرهم دايماً اللهم آمين

أشكرك جدا لتعليقك
ويسعدنا دوام التواصل


******************************

سواح فى ملك الله
ــــــــــــــــ
أهلا بيك أستاذ خالد
:) الله يكرمك يارب فما توفيقى الا بالله

أشكرك جدا على تعليقك
ويسعدنا دوام التواصل


********************************


شيرين سامى
ـــــــــــ
أهلا بيكِ يا شيرين
أشكرك جداً لرأيك فى البوست والحمدلله الذى هدانى لهذا

عندك حق فشياطين الانس من اخطر ما يكونوا

والأمثلة اللى ذكرتيها فعلا بتحصل واكتر من كده كمان

ربنا يحفظنا وينجيا من شرور الانس والجن اللهم آمين

نورتينى حبيبتى واسعدنى تواجدك


********************************

شمس النهار
ــــــــــــ
أهلا بيكِ يا شموسة
صح

أشكرك جدا لرأيك ولتعليقك
نورتينى حبيبتى وأسعدنى تواجدك


******************************

سبايدرمان
ــــــــــــ
أهلا بيك يا دكتور
ربنا يكرمك ويتقبل دعائك اللهم آمين
أشكرك جدا على تعليقك
ويسعدنا دوام التواصل


******************************

انج- سمسم
ـــــــــــ
أهلا بيك يا باشمهندس
ربنا يكرمك يارب
ويقدرنا على مواجهة أنفسنا والعودة سريعاً لطريق الله

أشكرك جدا لتعليقك
ويسعدنا دوام التواصل


********************************

تيمى
ــــــــ
أهلا بيك يافندم

ده بكتييير وخصوصا لما يبقى حد قريب منك ويعرف نقاط ضعفك

أشكرك جدا لتعليقك
ويسعدنا دوام التواصل


********************************

لينا
ـــــــ
وعليكم السلام ورحمة الله وبركاته
أهلا بيكِ يا لينا بعد طول غياب
ربنا يكرمك يارب فما توفيقى الا بالله
نورتينى حبيبتى واسعدنى تواجدك


******************************

ماجد القاضى
ــــــــــــــ
وعليكم السلام ورحمة الله وبركاته
أهلا بيك أستاذ ماجد
:)
تقدر تقول مستنية حد يتبنانى ويساعدنى فى الخطوات المتبعة فى هذا الشأن نظراً لجهلى فى هذه الأمور

بجد بشكرك جدا على هذا الإطراء ورؤيتك فيما أكتب
يسعدنا دوام التواصل


*******************************

راك يورمايند
ــــــــــــــــ
أهلا بيك يافندم
عندك حق جداً وما اكترهم
واللى يغيظ اكتر لما تلاقى رجال برضه بيتكلموا طول الوقت عن الدين وبرضه عندهم الاختلاط ده عادى!!

أشكرك جدا لتعليقك ولمشاركتك
ويسعدنا دوام التواصل

******************************

مستر بريزيدنت
ــــــــــــــ
أهلا بيك أستاذ بسام
اللهم آمين
أشكرك جدا لدعائك ولتواجدك
ويسعدنا دوام التواصل

ابراهيم رزق يقول...

السلام عليكم

كنت فى الساحل الشمالى و الشمسية اللى جنبى لقيت واحد بيشد زوجته عايز ينزلها بملابسها البحر و يقول لها عشان متنسيش المايوه تانى
بدون تعليق

تحياتى

Emtiaz Zourob يقول...

طرح مميز كالعادة ..

الكاريكاتير بعض منه رأيته من قبل والبعض اول مرة أقرأه .. ربنا يبعد عنا شياطين الانس قبل شياطين الجن ..

الدنيا بقت مليانة ..

دمت بخير وبارك الله فيك يا اختي العزيزة

موناليزا يقول...

ابراهيم رزق
ـــــــــــــ
وعليكم السلام ورحمة الله وبركاته
أهلا بيك أستاذ إبراهيم

لأ حمش

أشكرك جدا لمشاركتك
ويسعدنا دوام التواصل


*******************************


وجع البنفسج
ــــــــــــــ
أهلا بيكِ حبيبتى
أشكرك جدا لرأيك
وربنا يتقبل دعائك ويحفظنا جميعاً
ربنا يكرمك يارب وفى انتظارك دايماً

Carmen يقول...

اللهم امين
جزاك الله خيرا حبيبتي

موناليزا يقول...

كارمن
ـــــــــ
أهلا بيكِ يا سمسمة
ربنا يكرمك يا حبيبتى
نورتينى وأسعدنى تواجدك