الأحد، 19 فبراير 2012

جوجو و زمردة (20)


دخل "جوجو " غرفة شقيقته "زمردة" وهو مبتهج قائلا لها
-: مش تباركيلى.
-: ألف مبروك ياجوجو فعلاً البرفان اللى انت حاطه حلو أوى.
-: بجد حلو؟.
-: آه.
-" بس مش ده السبب الى هتباركى لى علشانه.
-: أمال إيه؟؟.
-: أنا اتجوزت.
-: نعم يا أخويا.
-: إيه مش مصدقانى؟.
-: آه طبعاً مش مصدقاك.. اتجوزت فين وامتى وازاى ومين دى أصلا؟.
-: إيه الأسئلة دى كلها.. بس هجاوبك ما أنتى أختى حبيبتى برضه.
..اتجوزت يا ستى "سوسن" زميلتى فى المدرسة.
..كنا النهاردة فى النادى ولقيت عيال بيغلسوا عليها فأنا زعقت لهم وقلت لهم أنها مراتى.
: لا ياشيخ وكده تبقى اتجوزت؟؟.
:يابنتى اصبرى المشهد ده انا شوفته فى فيلم قبل كده وجاب نتيجة.
: وبعدين؟
:ولا حاجة العيال مشوا وأنا جبت ورقة وكتبنا فيها انها عروستى وأنا عريسها.. وعملنا عريس وعروسة فى النادى وزمايلنا زفونا وبس على كده.
:كده يا جوجو ماتعزمنيش؟.
: معلش يا زمردة هى جت كده.. الموقف هو اللى فرض نفسه.
: طيب وماما هتقولها إيه؟.
:ولا حاجة .
: خلاص أنا كمان هكلم "يوسف" وأخليه يجيب ورقة وقلم ونتجوز بكره.
: أنتى مجنونة ولا بتستعبطى؟؟.
: ليه بقى؟؟ اشمعنى أنت يعنى ما يوسف بيدافع عنى برضه؟.
: كده؟ طيب.. والله لأقول لماما.
وخرج جوجو من غرفة شقيقته منادياً على أمه.
: ماما يا ماما.. يا ماما.
الأم: فيه إيه يا جوجو؟ خير يا حبيبى؟.
:زمردة عايزة تتجوز يوسف.
الأم باستغراب: يوسف مين؟.
:زميلها فى المدرسة.
: ليه؟.
:عشان عرفت انى اتجوزت سوسن.. هى مش هتبطل تقلدنى فى كل حاجة كده؟.
: وأنت اتجوزت سوسن امتى؟.
: النهاردة.
وحكى "جوجو " للأم ماحدث فما كان منها إلا أنها اتصلت بوالدة سوسن وقاما بتقطيع الورقة.
قائلة :ما ينفعش جواز من غير مأذون ده غير أنكوا لسه صغيرين.
- تمت-
======================
دعوة للمناقشة:
ـــــــــــــــــــــــــ
* لو كنت مكان الأم كنت هتعمل إيه؟.
* تعرف حد اتجوز عرفى قبل كده؟ وكانت إيه النتيجة؟.

هناك 6 تعليقات:

سواح في ملك اللــــــــــــــــــه- يقول...

هههههههههه

هجوب علي سؤالك التاني

النتيجة

طبعا فشل لانها تهونت وهانت عليها نفسها

بالعربي كدة رخصت نفسها

طيب لو الاهل ميعرفوش

وورطوها في جوازة تانية اجباري يعني

وجه الواد رفض يطلق (عند يعني )

ايه الموقف

+ان الجواز فقد اهم شرط فيه (الاشهار )
والاعلان

نسرين شرباتي "أم سما" يقول...

لو أنا مكان الأم رح أتصرف نفس التصرف

،،،،،،،،،،

السؤال الثاني:
سمعت مرة عن بنت اتزوجت عرفي،، الأهل على طول مزعوا الورقة وطلقوا،، وما كان صاير بينهم أي شي الحمد لله،، البنت على طول زوجوها لواحد ثاني علشان يستروا عليها،، وقبل ما الكل يعرف بالقصة،، بتعرفي هاي القصص كيف بتأثر عالعيل كتير

ريبال بيهس يقول...

هههههههههههههههه

جميل جداً على الاقل فكر الأطفال نظيف

وبما أنه نظيف لازم تجلس الأم بهدوء مع

أطفالها وتشرح لهم كل شيء بدون حياء

فصحيح أنهم أطفال لكنهم على درجة من

الوعي تسمح لهم بالفهم أما العرفي

فهو محرم هنا في السعودية ولا يوجد

لدينا سوى الزواج الرسمي لذلك لا أعرف

شخص تزوج عرفي ....

تحياتي وإحترامي

dodo, the honey يقول...

عزيزتي موناليزا ..

السؤال الأول :
اممم ، كنت لأجلس مع ابني ، و أفهمه بشكل أكبر الخطأ الذي وقع فيه ..

السؤال الثاني :
لا ..
ليس لي علاقة بأشخاص كهؤلاء !
و لكنني أعرف بعض القصص !

تحيآتي لكِ ..

beautiful mind يقول...

ههههههههههه
ايه شغل العيال دا
دي نكته يعني ولا ايه
وبعدين دول كام سنه
بجد حاجه تضحك

نوال يقول...

السلام عليكم

جميل هذا الطرح أختي، توعية بموضوع مهم على لسان الأطفال ببراءتهم، ما أعجبني في القصة هو شهامة جوجو الذي تمسك بكلمة قالها دفاعا عن زميلته، لو تمسك الكبار بكلماتهم، لما حدثت مثل هذه المشاكل أصلا!

لو كنت مكان الأم، ردة الفعل ستختلف باختلاف سن الطفل، ومن المؤكد أن التعامل سيكون شرحا للموضوع وللخطأ فيه بشكل منطقي ومقنع وحازم أيضا..

أما عن السؤال الثاني فلم يسبق لي أن صادفت حالة منها بشكل قريب.

تحياتي