السبت، 5 مايو 2012

الحجاب اليهودى


أول مرة شوفت فيها واحدة لابسة إسبانش فكرتها كانت بتنضف بيتها أو كانت بتغسل أو بتطبخ ونست وهى خارجة تلبس الإيشارب.. ده غير أنى كنت بشوفها فى أفلام ومسلسلات زمان كانوا بيلبسوها قطاع الطرق.. وبعدين اتضح أنها فى الآخر موضة ربطة جديدة للطرحة ..ومش كده وبس لأ دى بقت تدل على أن البنت اللى لابساها شيك وأستايل..وبعد البحث والتنقيب أتضح أن هذه الموضة ماهى إلا الحجاب المميز لليهود!!.
أيوة ماتستغربوش ماهى كل الديانات فيها الحجاب أمر طبيعى ومش محتاج خلاف أو فتاوى.


وبغض النظر عن أن فيه بهرجة زيادة عن اللزوم لكن واضح أن اللى لابساه مش مُحجبة زى ماهى مُعتقدة هى فقط أرادت أن تغطى رأسها فى وقت المفروض تخرج فيه لكن شعرها لا يصلح للخروج حالياً.

انطباعى الخاص أنه إستحالة يكون حجاب ويستر اللى لابساه.. هتلاقوا اللى لابساه يا إما رقبتها باينة يا إما مأزمة نفسها ولابسة بودى برقبة ومشبكاه بدبابيس وأصلاً أصلاً البودى مايعتبرش حجاب ولا بيستر الجسم.

شوفوا كده الصورتين دول وأنتوا تحكموا بنفسكم مين فيهم مستورة أكتر.




طبعاً ماينفعش واحدة لابسة عباية أو لبس فضفاض وتلبسه هتبقى بايخة أوى ومش لايقة.. لازم إيه بقى بنطلون وبلوزة قصيرة هتلاقي شكلها كده أشيك.. وأنا لو مكانها هقعد فى البيت كده لأن ماينفعش مسلمة تكون فخورة بحجابها وبتعتز بيه تخرج بهذا الشكل المهين للحجاب.

رسالة لمن ترتديه:
ــــــــــــــــــــــــــــــ
كونى واضحة مع نفسك يا إما مُحجبة الحجاب الإسلامى المتعارف عليه من مواصفات واضحة ومحددة.
يا إما تخلعيه خالص وربنا يهديكى وتتحجبى..
واعرفى إنك واجهة لدينك فبلاش تفتنى حد فى دينه.




سؤال جانبى:
ـــــــــــــــــــــــــ
ما رأيك الخاص فى الإسبانش؟.

هناك 9 تعليقات:

~ISLAM~ يقول...

اختراعات ملهاش لازمة

يا حجاب زى الناس

يا تريح دماغها

موضوع هايل

وتوجيه جميل ربنا يجازيكى خير

سواح في ملك اللــــــــــــــــــه- يقول...

كلامك مظبوط موناليزا احييكي عليه

SHARKawi يقول...

السلام عليكم ورحمة الله وبركاتة
بعد أن قرأت اسم العنوان خيل لي بأنكي سوف تسردي ذلك الموضوع المتعارف لنا دائما وهو أن اليهود يتحجبون ويكون من مظاهر العفة وشكل من أشكال التدين ولكنهم يعاتبون على المسلمة عندما تردية . كذلك عند النصارى فهم أيضا عندهم الراهبات المتحجبين ..
ولن أطيل في ذلك الموضوع فهو معروف لدى الجميع ..
ولكن عندما قرأت كلماتك عزيزتي .
اتضحت لي الصورة التي تريدي ان توصليها . ورغم ان الموضوع هو بالأكثر موضوع خاص بالبنات والنساء . الا انني ارى بأن الموضوع يخص الجميع .
وبالطبع لا يوجد كلام بعد الكلام الموضح في موضوعك . فانتي قد ذكرتي الخلاصة وعصارة العصارة .
الا انني اردت فقط ان اضيف ( ان تتأكد كل بنت أنها جوهرة مصونة مكنونة من ظافر قدمها إلى أخر خصلة في شعرها . والحجاب هو الحافظ الساتر الآمن لتلك الجوهرة . ) ( وان الكاسيات العاريات هم أكثر أهل النار ) ( وان مسئولية البنت وحجابها اكثر كثيرا من مجرد انه حجاب خاص بها فقط . او انه حافظ لها . بل هو حفاظ للمجتمع اجمع ) فقط بعض من العقل وبعض من التفكير والتدبير .
تحياتي . وتقبلي مروري

dodo, the honey يقول...

لا حولَ و لا قوةَ إلا بالله ,,

هم دخلوا إلينا من ها هنآا
هم دخلوا إلينا من ها هنآا
هم دخلوا إلينا من ها هنآا

..

نسرين شرباتي "أم سما" يقول...

والله يا منمن المشكلة إنو الحجاب هاد صار منتشر في كل مكان،، وبشكل كبير،، المشكلة كمان إنه ع البنت أحلى من شعرها نفسه،، وإنه في كتير بنات تحجبوا لها السبب إنه بتحط مناديل ملونة وبطريقة حلوة وتحط كمان أقراط ع ودنها ولا تنسي المكياج التقيل وخلص،، وما بتحس نفسها من جوا إنها متحجبة،، بتحس حالها ستايلش واتيكيت،، وملاحقة العصر،،،

بس بدي أطمنك لشي،،
هلأ راحة موضة الحجاب السبانش :)
هلأ نازلة جديدة موضة الحجاب التركي :)

جوجلي الحجاب التركي وشوفي شو رح يطلع معك

Bahaa Talat يقول...

السلام عليكم..
إنها زيارتي الأولى هنا، ومع موضوع أكثر من رائع جزاك الله عنه كل خير..
أسعدني المحتوى الرائع للمدونة ككل، وأسعدني كثيرا موضوع هذه التدوينة ومن أجمل ما فيها هو تعليق الأخت/ دعاء..
فعلا..
هم دخلوا إلينا من ها هنا..
ويا ليتنا ندرك ذلك فلا نتنازل عن ديننا لعرض زائل أو استجابة لوسوسة شيطان مريد.
تقبلي تحياتي..

Dr Ibrahim Samaha يقول...

ربنا يهدى بنات وشباب المسلمين
موضة وتقاليع ملهاش اى لازمة

Zanopia يقول...

اللهم آهدي بنات المسلمين

ghoneem يقول...

بعد التحية

انت بتقارني حاجتين مينفعش نقارنهم ببعض اصلا

طبعا الحجاب ال " سبانيش " احلي
تحسي معاه كدة ان كل البنات حتة واحدة ..شبه بعض .. وده بيريحني نفسيا جداااا ف التعامل معاهم
مفضلش بقي أوجع دماغي ,, كلهم أنثي وخلاص ..
لكن الحجاب الشرعي حاجة تانية واللي بتلبسه بتفرض عليكي احترامها وده بيتعبني أنا بقي لأاني زي ما تقولي كدة معقد شويتين وبرتاح أكتر مع ال " سبانيش "

مواضيعك دايما ف الجون ولا بلاش الجون عشان مفيش كورة خلاص
مواضيعك بجد روعة تسلمي وربنا ينفع بيكي

تحياتي
بالتوفيق ..................