الثلاثاء، 29 مايو، 2012

من كتاباتى (6)


1-عجباً لمن يترك الفوضى بداخله ترتع وينصب نفسه قاضياً على الخلائق.
----------------------
2- المرأة تلك اللغز المحير تحتاج أحياناً إلى كتالوج لمن يتعامل معها.
الرجل ذلك السؤال الغامض يحتاج أحياناً إلى قاموس لمن تتعامل معه.
------------------------
3- مش عيب أنى أخطئ لأنى بشر.
ومش عيب أنى أقبل التوجيه.
ومش عيب أنى أعترف بخطئى.
ومش عيب أنى أصحح خطئى واتعلم منه.
لكن العيب أنى أسخر من المخطئين وكأنى معصومة.
----------------------
4- مشكلتى إنى واخدة الدنيا جد.
---------------------
5- إزاى هانت عليهم الأرض يبوروها.
-------------------
6- مش كل الناس تعرف اللى أنت تعرفه فتعامل معهم على هذا الأساس.
---------------------
7- توكة الشعر : آخر هدية ممكن تقدمها أو تتكلم عنها مع مريضة سرطان.
----------------------
8- أعشق فى ذاتى تحديها للصعاب
وأنت ماذا تعشق فى ذاتك؟.
--------------------
9- رسالة من الروح للجسد: عفواً لقد نفد رصيدكم.
------------------
10- أحلى حاجة فى الأطفال أنهم ممكن يعيطوا بصوت عالى فى أى وقت وفى أى مكان طالبين النجدة.
-------------------
11- وفجأة تسود فى عينينا الحياة.
--------------------
12- النظافة لا تحتاج إلى أسباب.
-------------------
13- أعشق أحزانى فبها أكتب.
وأعشق سعادتى فبها أبتسم.
و أعشقهما سوياً فبهما أحيا.
--------------------
14- أعزف كلماتى فى ارتجالية
وحينما استمع إلى اللحن
أجده مقطوعة موسيقية يعقبها تصفيق ممن حولى..
وحينها أتسائل بتعجب هل أنا حقاً من قمت بالعزف!!.
------------------
15- إزاى أطلب الميه
والناس شايفينى بحر.
-------------------
16- اخرج بره الدنيا وانظر .. ستجد هراء.
-------------------
17- لما تكونى متزوجة ومستقرة فى حياتك
هتحسى بكلام أى بنت موجوعة إزاى!!!

أفضل أن تتابعى فى صمت على أن تقولى كلام يدل على عدم معاناتك أو عدم تفهمك للموقف الطروح.
-------------------
18- ما أبغض الفضول الذى يجبرك على قراءة شئ لا تهواه
وما أجملها من متعة حينما تقرأ شيئاً تهواه لكاتبك المفضل.
-------------------
19- ياترى الانسان النظيف ممكن يحتفظ بنظافته هذه كم من الوقت فى مكان يعج بالقاذورات.
------------------
20- لو كنت ناوى على الرحيل لا تدخل فى حياتى.
----------------------
21- قد يحدث فى حياتك موقف عابر تكاد لاتذكره ولكنه يؤثر فى فرد آخر تأثير إيجابى.. اهتم بجميع تصرفاتك مهما كانت بسيطة.
---------------------

22- شاركت الطلبة نجاحهم وحنيت لهذا الشعور الرائع.. أن تظهر شهادتى الدراسية فأجدنى ناجحة.

---------------------

23- ليه مفيش فى حياتنا خاصية النوتيفيكيشن اللى من خلالها أقدر أعرف مين اتكلم عنى أو كتب أى حاجة عنى سواء بخير أو بشر.

------------------------

24- من يقتل شخصاً لايعرفه يوصف بالمجرم
ماذا إذاً عن وصف من يقتل شخصاً كان كل همه إسعاده.
--------------------
25- ليه أصحاب الصور اللى فى الألبومات مابيسمعوش كلامنا ليهم.
----------------------
26-أسعى إلى الكمال.

السبت، 26 مايو، 2012

ابن الوز عوام


"ابن الوز عوام" مثل مصرى مشهور.نسمعه كثيراً حينما يكون الابن يشبه الأب فى فعل شئ ما.

فمن يقود السيارات باحتراف ووالده مثلاً سائق أو ميكانيكى يطلق عليه هذا المثل.
ومن تجيد الطهى ببراعة وأمها ربة منزل من الدرجة الأولى يطلق عليها هذا المثل.

ولكن لا يجب أن نقولها هكذا للابن لمجرد أن الأب يحترف شيئاً ما ونتعامل على أن الطبيعى أن يكون ابنه مثله وبنفس درجة الاحتراف لإن هذه الأشياء لا تخضع لقانون الوراثة ولكن تخضع لقانون التعلم.
فإذا لم تعلم ربة المنزل ابنتها فنون وقواعد الطهى الأساسية لن تصبح الابنة شبيهة لأمها فى هذا بل وقد تحرق الطعام.
وإذا لم يعلم الأب ابنه قيادة السيارات فلن يحترفها بمفرده لمجرد رغبته بل ولن يستطيع تحريكها ولو لمتر واحد.
وإذا لم يعلم الوز ابنه فن العوم لغرق فى شبر ماء.

علموا أولادكم كل شئ تتقنونه.
علموا أولادكم ولا تبخلوا عليهم بعلمكم.
علموا أولادكم ولو بالإجبار.
فستسألون عنهم.

سؤال جانبى:
ــــــــــــــــــــــــ
ما اكتر شئ كنت ترغب أن يعلمه لك والدك ولم يحدث؟.

ما أول شئ ستحرص على تعليمه لأبنائك؟.

الأربعاء، 23 مايو، 2012

جوجو و زمردة (23)


فوجئت "زمردة "بشقيقها "جوجو " يمسك فى يده سيجارة.
نظرت إليه فى هلع قائلة: يا خبر إيه ده!!.
رد عليها بلا مبالاة قائلاً: إيه!! سيجارة.
: ما انا عارفة أنها سيجارة جيبتها منين؟
: هجيبها منين يعنى من علبة بابا.
: وجايبها ليه؟.
: عايز أجرب وقلت أجيبها عندك عشان نجربها سوا.
: بس أنا اسمع أن السجاير وحشة.
: بدل وحشة بابا بيشربها ليه؟
: مش عارفة يمكن تكون للكبار فقط..
: طيب ما احنا كبار ..أنتى مفكرانا هنفضل صغيرين.
: بس أنا مش هشرب.
: ماتبقيش جبانة.. بصى أنا هولعها وهشرب الأول.
: وأخذ منها نفس وكتم الكحة بداخله: شوفتى عادى يعنى ماحصلش حاجة.
: أخذتها منه وأخذت منها نفس وظلت تسعل كثيراً وأعطتها له قائلة: لأ يا أخويا مش هشرب تانى.
: براحتك.. أنا هاخدها أكملها فى غرفتى وخليكى كده.
وتركها وانصرف.
- تمت-.
===================
دعوة للمناقشة:
ـــــــــــــــــــــــ
*ماذا تفعل لو وجدت أطفالك يدخنون؟.


الأحد، 20 مايو، 2012

ادعوا لى بالخير


من رحمة ربنا بنا أنه سمح لنا ندعيه ونطلب منه كل اللى نفسنا فيه فى أى وقت وفى أى مكان ووعدنا بالإجابة.
لكن للأسف يوجد ناس تسئ استخدام هذه النعمة كأن يدعو أحدهم على ولده أو نفسه أو ماله أو كأن يتمنى أحدهم أن يصبح مثل فلان ويظل يدعو الله كثيراً"يارب أكون زى فلان" ومايعرفش مثلاً أن فلان ده ممكن يكون مريض بمرض خطير أو يكون غشاش أو يكون حرامى لأن مايراه هو ظاهر الشخص وليس باطنه.
أو مثلاً زوجة تدعى على حماتها أن ربنا ياخد أغلى حاجة عندها علشان تتهد وماتعرفش إن أغلى حاجة عندها ممكن تكون زوجها أو ابنها على اعتبار أنه حفيدها.
أو زوجة تدعى على زوجها أنه يحصل له مصيبة وماتعرفش أنها أول واحد هتتأذى لو هو حصل له أى حاجة.
أو من تتشاجر مع زوجها وتدعو الله بألا تنجب منه وبعد ما الخناقة تهدى وهو يصالحها وتجد أن الحمل اتأخر تندم .
أو حد يدعى أنه نفسه يحصله كذا وبعدين يموت.. وشوفتها بجد واحد ظل يدعى أنه يخلف ويحمل ابنه وبعد كده يموت من كتر ما كان يائس وسبحان الله الزوجة تحمل ويكون هو فى قمة السعادة وتنجب الولد ومن فرحته يذهب للأهل والمعارف لكى يروا ابنه وبعدها بأسابيع قليلة يموت.
وهكذا فالدعاء فى لحظات الغضب والجهل كفيل بأن يغير حياتنا رأسنا على عقب.

أحياناً كثيرة أجد عدم قبول الدعوة رحمة من ربنا لأن كل واحد بيبقى شايف الموضوع من جهة واحدة بس ومايعرفش فين الخير بجد.

ولذلك أدعوا دائماً بالخير والسعادة وإن ربنا يعمل لنا الخير حيثما كان ثم يرضينا به ومالوش لازمة نتدخل فى أقدار الله فالدعاء يمنع القدر.
واستغلوا لحظات الضعف والظلم فى الدعاء بالخير لكم لأن ربنا وعد بالإجابة.



مش هوصيكم ادعوا لى بالخير.

الأربعاء، 16 مايو، 2012

فعل فاضح


أتعجب من قلة الحياء عند البعض وخاصة عند البنات اللى المفروض إن الصفة دى موجودة جواهم بالفطرة وعدم وجود هذه الصفة تجعل نفسها وجسمها هاينين عليها لدجة تخليها تفرط فيهم بسهولة.
وهذا يتضح بشدة على أى كورنيش فنجد الأمثلة كثيرة ومتعددة.. والكارثة الكبرى إراتدائهن لقطعة قماش على روؤسهن والتى تسمى مجازاً حجاب بالإضافة للبنطلونات التى تظهر أكثر مما تستر وبجانب هذا يوجد شاب يتعامل معها باستباحة وكأنه يتعامل مع زوجته فى غرفة النوم.. علناً وعلى الملأ دون حياء أو احترام لمن حولهم أو خوف من خالقهم رغم أن هذا الشاب لا يقبل ولا يسمح أن يرى أختته فى هذا الموقف.

تعليقى: الزنا أنواع وهذه التصرفات تعتبر زنا.

ومن ضمن المشاهد المُخجلة أن تجد شاب جامعى يخرج من الدرس الخصوصى ليجلس فى سيارته وينتظر لأن يرى فتاة تعجبه فيذهب ويتحدث معها ثم يأخذها معه السيارة ليمارسا الزنا بصورة علنية دون حياء أو خوف من خالقهم.

تعليقى: أنا عايزة اعرف فين بوليس الآداب.

يوجد مشاهد أخرى أخف وطأة ولكنها أيضاً فاضحة.
مثال: أن يتعامل الرجل مع زوجته فى الشارع وكأنه فى غرفة النوم بحجة أنها زوجته وأنه مابيعملش حاجة حرام!!.

تعليقى: هى كلمة عيب راحت فين؟؟.

* الزواج العرفى والعلاقات الآثمة كل هذا يعتبر زنا.

تعليقى: شوفتوا الغشاء الصينى اشتغل عندنا إزاى!.

*مشهد ظاهرياً لا يوجد فيه زنا الجوارح ولكنه يسئ لسُمعة الفتاة.
مثال: زميلها فاتح محل تحت بيت والده فهى لما هو يوحشها تروح له تقعد معاه هناك.. وممكن جداً أهلها يبقوا عارفين!!.

مثال2: بتزور خطيبها فى بيت أهله لوحدها.

تعليقى:موافقة الأهل لفعل ما لا تدل بالضرورة على إنها حلال أو على تقبل المجتمع لها.


أسأل الله أن يرزق جميع المُسلمين العفة والحياء.

الأربعاء، 9 مايو، 2012

زعلان علشان عنده أهل


قبل خروجه تقول له الأم: ماتتأخرش وماتنساش تجيب عيش للعشا وللفطار بكرة.
يرد باقتضاب: حاضر.. سلام.
وبعد أربع ساعات تتصل الأم بابنها لتطمئن عليه ولتستفسر عن أسباب غيابه كل هذا الوقت والذى يقضيه كل ليلة مع أصدقائه فإذا بالموبايل مُغلق..هتموت من القلق والخوف على ابنها وفى نفس الوقت إخوته الصغار جاعوا وفى انتظار الخبز الذى سيأتى به أخوهم الكبير لكى يتعشوا.
وبعد مرور ساعتين جاء أخيراً وطبعاً كان الوقت بعد منتصف الليل وإخوته ناموا جوعى.. نظرت له الأم ملياً وحينما تأكدت بأن جسده سليم ولم يتعرض لأى أذى صاحت فيه بحدة قائلة : كنت فين ده كله؟؟.
- ما أنا قايلك قبل ما انزل.. كنت مع أصحابى.
- وقافل موبايلك ليه؟؟.
- ماقفلتوش ..هو فصل شحن.
- أنا مش ميت مرة قلت تبقى شاحن موبايلك قبل ما تخرج.. وبعدين مفكرتش أنى هموت من القلق عليك!.
- كنت اعمل إيه يعنى؟.. وبعدين أصحابى بيتريقوا عليا لما كل شوية تتصلى.
- أبسط حاجة تكلمنى من موبايل أى حد من أصحابك.. أو تبقى عاطينى رقم أى حد من اللى أنت قاعد معاهم عشان لما موبايلك يفصل اعرف اكلمك.. وبعدين فين العيش؟.
- لقيت المحلات قافلة.
- ماهو طبيعى تقفل يا إما تلاقيها خلصت.
- طيب بدل عارفة.
- عارفة إيه!! إنك هتجيلى بعد نص الليل.. بدل عارف إنك هتتأخر ماقلتش إنك مش هتجيب العيش ليه بدل ما اخواتك ناموا جعانين.
- هو كل حاجة أنا.
-أنا اللى غلطانة اللى فكرتك كبير وقد المسئولية.
- يوووه أنا داخل أنام.

كثيراً من الشباب ممكن يغضبوا أهلهم بسبب معاملت
هم المستهترة لهم ومايعرفوش إن أصحابهم وسهراتهم دى مش هتدوم ولا هتستمر طول العمر.
ولهذا أوجه كلمة لهذا الابن ومن هم على شاكلته:
- أصحابك اللى بيسخروا من اتصال أهلك المستمر بيك يعانون من إهمال أهاليهم ولذلك يتعجبوا من اهتمام أهلك بك وبداخلهم يتمنون لو يهتم بهم أهلهم ويتتبعون أخبارهم .
- ضعف شخصيتك هى من جعلتهم يستطيعوا التأثير عليك بسخريتهم المزيفة حتى تتجاهل أهلك.
- لما أهلك يطلبوا منك حاجة تشتريها وأنت جاى من بره ده بيدل على أنهم بيعتمدوا عليك كأنك رجل قد المسئولية والمفروض ده يسعدك بدل تذمرك وتجاهلك لطلبا
تهم.
- اتصالك بيهم وأنت بره هيخليهم يدعوا لك وكفاية يكونوا مطمنين عليك.
- حذار أن تتعامل معهم على أنهم مصدراً للأخذ فقط.. مش معقول تكون طول الوقت بتاخد منهم مصروف وواكل نايم شارب لابس وفى الآخر تعاملهم كده!!.
- حذار أن يشعر أهلك بأنك لا تحبهم من خلال تجاهلك لهم أو الخجل من أن تتلقى اتصالاتهم وانت مع اصحابك.

سؤال جانبى:
ـــــــــــــــــــــــــــ
*أذكر موقف مشابه ونصيحة.

السبت، 5 مايو، 2012

الحجاب اليهودى


أول مرة شوفت فيها واحدة لابسة إسبانش فكرتها كانت بتنضف بيتها أو كانت بتغسل أو بتطبخ ونست وهى خارجة تلبس الإيشارب.. ده غير أنى كنت بشوفها فى أفلام ومسلسلات زمان كانوا بيلبسوها قطاع الطرق.. وبعدين اتضح أنها فى الآخر موضة ربطة جديدة للطرحة ..ومش كده وبس لأ دى بقت تدل على أن البنت اللى لابساها شيك وأستايل..وبعد البحث والتنقيب أتضح أن هذه الموضة ماهى إلا الحجاب المميز لليهود!!.
أيوة ماتستغربوش ماهى كل الديانات فيها الحجاب أمر طبيعى ومش محتاج خلاف أو فتاوى.


وبغض النظر عن أن فيه بهرجة زيادة عن اللزوم لكن واضح أن اللى لابساه مش مُحجبة زى ماهى مُعتقدة هى فقط أرادت أن تغطى رأسها فى وقت المفروض تخرج فيه لكن شعرها لا يصلح للخروج حالياً.

انطباعى الخاص أنه إستحالة يكون حجاب ويستر اللى لابساه.. هتلاقوا اللى لابساه يا إما رقبتها باينة يا إما مأزمة نفسها ولابسة بودى برقبة ومشبكاه بدبابيس وأصلاً أصلاً البودى مايعتبرش حجاب ولا بيستر الجسم.

شوفوا كده الصورتين دول وأنتوا تحكموا بنفسكم مين فيهم مستورة أكتر.




طبعاً ماينفعش واحدة لابسة عباية أو لبس فضفاض وتلبسه هتبقى بايخة أوى ومش لايقة.. لازم إيه بقى بنطلون وبلوزة قصيرة هتلاقي شكلها كده أشيك.. وأنا لو مكانها هقعد فى البيت كده لأن ماينفعش مسلمة تكون فخورة بحجابها وبتعتز بيه تخرج بهذا الشكل المهين للحجاب.

رسالة لمن ترتديه:
ــــــــــــــــــــــــــــــ
كونى واضحة مع نفسك يا إما مُحجبة الحجاب الإسلامى المتعارف عليه من مواصفات واضحة ومحددة.
يا إما تخلعيه خالص وربنا يهديكى وتتحجبى..
واعرفى إنك واجهة لدينك فبلاش تفتنى حد فى دينه.




سؤال جانبى:
ـــــــــــــــــــــــــ
ما رأيك الخاص فى الإسبانش؟.

الأربعاء، 2 مايو، 2012

منوعات إسلامية (5)



من نور كتاب الله:
ــــــــــــــــــــــــــــــ

"يَا أَيُّهَا النَّاسُ اتَّقُوا رَبَّكُمْ إِنَّ زَلْزَلَةَ السَّاعَةِ
شَيْءٌ عَظِيمٌ" (1) الحج.


من هدى رسول الله صلى الله عليه وسلم:
ـــــــــــــــــــــــــــــــــــــــــــــــــــــــــ
عن أبى قتادة رضى الله عنه أن رسول الله صلى الله عليه وس
لم سُئل عن صوم يوم الإثنين فقال: "ذلك يوم ولدت فيه ويوم بُعثت أو أنزل علىَّ فيه". مسلم1162.

حكم ومواعظ:
ـــــــــــــــــــــــ
قال الحسن البصرى: لا تكن ممن يجمع علم العلماء وحكم الحكماء ويجرى فى الحق مجرى السفهاء"الزهد ص.91".

وعنه قال" ما أكثرعبد ذكر الموت إلا رأى ذلك فى عمله ولا طال أمل عبد قط إلا آساء العمل" الزهد ص.21"

وكان يقول: من عرف ربه أحبه وآثر ما عنده ومن عرف الدنيا وغرورها زهد فيها.

من صحيح الأحاديث القصار:
ــــــــــــــــــــــــــــــــــــــــــ
-" ينزل ربنا تبارك وتعالى كل ليلة إلى السماء حين يبقى ثلث الليل الأخير يفول من يدعونى فاستجيب له من يسألنى فأعطيه من يستغفرنى فأغفر له" متفق عليه من حديث أبى هريرة".

-"لم يكن النبى صلى الله عليه وسلم على شئ من النوافل أشد منه تعاهداً على ركعتى الفجر" متفق عليه من حديث عائشة.

-"إذا دعى أحدكم إلى الوليمة فليأتها"متفق عليه من حديث ابن عمر.

-"نهى النبى صلى الله عليه وسلم أن يبيع بعضكم على بيع بعض ولا يخطب الرجل على خطبة أخيه حتى يترك الخاطب قبله أو يأذن له الخاطب" متفق عليه من حديث ابن عمر.