الثلاثاء، 12 فبراير، 2013

سنة جاية بابتسامة










مدونتى الغالية قد مرت خمسة أعوام من عمرى معكِ لم أشعر بهم

 فقد كنتى لى أداة دعم قوية وحققت معكِ نجاحات ليست هينة .

النجاح ليس صعباً حينما يصدر من شخص سليم ولكن التحدى أن يأتى النجاح

 من شخص كسير وهذا ما فعلتيه معى فقد كنتى عكازى طوال السنين الماضية

 ومازلتِ تدفعين بى بقوة للمضى فى طريقى دون الالتفات لأى إخفاق

هذا العام كان مليئاً بالأحداث السلبية والإيجابية ولكن كعادتك معى تكونين

 مسئولة عن الأحداث الإيجابية.


فقد التقيت ولأول مرة بنخبة من المدونين

 فى حفل توقيع كتاب "أبجدية إبداع عفوى"

 وعلى رأسهم العزيزة "لبنى أحمد نور" وكم كانت سعادتى لرؤيتها

 فهى بالنسبة لى صانعة الأحلام.

ثم التقيت بنخبة متميزة أيضاً فى حفل توقيع كتابى "خبايا نسائية"

 وكم كان لهذا اليوم عظيم الأثر فى نفسى.

ليا حق أشكرك يا مدونتى واحتفل بيكِ كل سنة.

يكفى إنك عرفتينى على أسرتى الثانية اللى معاهم مابحسش بوحدة ولا بغربة

 وبكون على سجيتى تماماً.

- أرى أن من مميزات وجودى فى بلوجر طوال هذه الفترة


 أنى بقيت فاهمة أغلبية المدونين اللى اتعاملت معاهم 


على مدار الأعوام الماضية حتى وإن لم أراهم.

- خرجنا من مرحلة اللى يعلق عندى هعلق عنده أو هعلق علشان أرد الزيارة


 أو لمجرد جذب الزائرين لمدونتى.


لمرحلة أكثر نضجاً وهى الصدق التام فى التعامل وبدون رتوش تجميلية .


- تعلمت الآن أن التعليق لا يدل بالضرورة على المتابعة فقد يترك أحدهم تعليقاً 


وهو لم يقرأ حرفاً مما كتبت. 


- أقولها لكم الآن وكالعادة أنا أتابعكم جميعاً حتى وإن لم أترك تعليق.


 وأقرأ تعليقاتكم عندى جميعاً حتى وإن لم أستطيع الرد على كل تعليق


 على حدة ورجاء تقبل معذرتى  فى الغالب بتبقى حالة نفسية. 


- أقوم بعمل جدولة للمواضيع يعنى ممكن أكون مش موجودة


 والمواضيع تنزل عادى من غيرى .. 


علشان لو مُت ولقيتوا المدونة شغالة ماتتخضوش :)


سأبدأ بعرض الهدايا التى حصلت عليها مدونتى العام الماضى

 بمناسبة عيد ميلادها الرابع وكانت من:

 مصطفى سيف الدين وتورتة رائعة الجمال




أم هريرة.. lolocat وكارت رقيق


وأتوجه بشكر خاص لد/ محمود أحمد على مساعدته الكثيرة لى وعلى تصميم cover مميز لصفحة كتابى "خبايا نسائية"


وشكر خاص لكل من ساهم وقام بتصميم لغلاف الكتاب وخاصة  
صديقتى الغالية / ليلى الصباحى.
 لتصميماتها الكثيرة لغلاف كتابى وإفراد موضوع فى مدونتها لعرض التصميمات المختلفة هنا

بالإضافة لعمل برومو للكتاب من هنا

وشكر وتقدير لأستاذ ماجد القاضى لنصحه واقتراحاته لى طوال فترة إعدادى للكتاب.

وشكر خاص جداً للفنان خالد فرج لتصميمه الغلاف النهائى  للكتاب.


وشكر وامتنان لكل من حضر حفل توقيع الكتاب وخاصة من سافروا من بلد لبلد خصيصاً من أجل مشاركتى هذا اليوم.

محمد متولى (مونتانا): ميرسى بجد على الورد.
الطائر الحزين وأم الأبناء: وجودكم كان مفاجأة سارة جداً لى حفظكم الله.
أحمد غنيم (حتى لا أنسى): شكراً لحضورك.
مِس إيناس (معجزات) و د/ أميمة: سعدت كثيراً برؤيتكما.
غادة محسن: سفرك مخصوص علشانى ده بجد على دماغى.
إيمان عاطف: سعدت بحضورك.
إيمان (سما مصر) وسارة (بقلم سارة): لتصويركم الحفل بحرفية ولحضوركما المميز ممتنة كثيراً لكما.

وكل من هنأنى وكل من أراد الحضور ولكن منعته الظروف.

 ويارب أجاملكم فى الأفراح.
نبذة عن حفل توقيع الكتاب على شبكة رصد الإخبارية من هنا



معرض القاهرة الدولى للكتاب كان مختلفاً هذا العام بالنسبة لى فكتابى هناك.
نظراً لعدم تمكنى من التواجد طلبت من الجميع تصوير ونقل الأحداث بالتفصيل .
وبالفعل اكتشفت بأن لى أجدع صحبات لم يمنعهم الزحام وامتلاء وقتهم
بحفلات توقيعهم من التصوير.
شيرين سامى صاحبة أول صور وصلتنى .
فاطمة على ماضى وتصويرها المتميز.
مروة زهران وتصوير مفصل من أول خطوة داخل المعرض.
رؤى عليوة وصور رائعة مع صُحبة متميزة.
دينا ممدوح وصور كتابى داخل المعرض من زوايا مختلفة.
حقاً ممتنة كثيراً لكن صديقاتى الغاليات.



وبهذه المناسبة يسعدنى استقبال أى نقد بناء للمدونة أو لصاحبتها.

أو اللى عنده سؤال أو عتاب أو حتى رسالة أو أى شئ من هذا القبيل.
أو لو حد حس إنه اتعلم من مدونتى حاجة مفيش مانع إنه يعرفنى.
ولو حد حاسس برضه إنه مدين لى بشكر أو باعتذار فهذه فرصته.
 - قمة فى التواضع أنا عارفة -
فاليوم أجدد عهد صداقتى بكم جميعاً وأرجو أن تكون نفوسكم  صافية تجاهى وأن تعذرونى إذا ما قصرت مع أحدكم أو تسببت فى ضيقكم لأى سبب وأن تعلموا بأنى قوية بكم وغنية بوجودكم فى حياتى.

وكل عام ونحن جميعاً بخير وسعادة .





سؤال اليوم : إيه أكتر حاجة بتفكركم بيا؟







هناك 30 تعليقًا:

هبة فاروق يقول...

مونى كل سنه وانتى طيبهيا قمرايه ومدونتك منوره عالم بلوجر كله
وعقبال الاحتفال الالف يارب
والف مبروك على الكتاب اللى بأذن الله يكسر الدنيا بنجاحه ومبيعاته
كل سنه وانتى جميله ورائعه

افكار مبعثرة يقول...

كل سنة وانت و مدونتك بالف خير يارب و الى الله اقرب و دائما اسعد وفي افضل حال حبيبتي
احبك في الله :)
تحياتي

SHARKawi يقول...

ابدأ بإقتباس ( تعلمت الآن أن التعليق لا يدل بالضرورة على المتابعة ) ودا فعلا اللي احب اني اقولة .
لأني مش عارف المفروض اية يتقال فأنا لم أكن أحد من هؤلاء .
ولكن لا يسعني سوى أن أقدم لكي تحياتي وتمنياتي لكي بدوام النجاح .

تقبلي مروري

Baskouta يقول...

كل وقت وانتي بخير
ودايما متألقة
ربنا يسعد أوقاتك

مسلم مصرى يقول...

كل عام وحضرتك ومدونتك بخير
ومن تقدم غلى تقدم بإذن الله
تحياتى المعطرة

موناليزا يقول...

هبة فاروق
أفكار مبعثرة
شرقاوى
بسكوتة
مسلم مصرى

أشكركم كثيراً بتهنئتكم الرقيقة ولتعليقاتكم
هذه التدوينة كتبتها على مراحل وتم نشرها عن طريق الخطأ ولم أنتبه لهذا إلا فى اليوم التالى .. فلا تتعجبوا من وجود تعليقاتكم هنا وبتاريخ قديم..
فهذه جدولة المواضيع التى تحدثت عنها فى التدوينة :)

أرجو أن تقيموا المدونة وتبدوا رأيكم فيها بصراحة مطلقة

ولو فى نصيحة ماتبخلوش عليا بيها

ممتنة أنا لكم كثيراً

وف انتظاركم دائما

تاكاشى يقول...

كل سنه وانتى من نجاح الى نجاح
كل سنه ومدونتك او مرايتك بتوريكي احلى مافيكي

محمد البرقي يقول...

مبروك ع الكتاب و على ال5 سنوات و من نجاح الى نجاح دائما, و بعد الشر عليكي لو روحك الطاهرة اشتغلت على المدونة برضه ...ربنا يوفقك للخير :)

Aya Mohamed يقول...

كل سنة ومدونتك منورة بلوجر
وانتى سعيدة وبألف خير يارب
والهدايا على الفيس بقى <3



Mahmoud Ahmed يقول...

كل سنه و انتي طيبه يا افندم :)
و بعد الشر عليكي ، طواه تاعمر ليكي يارب
و ان شاء الله سنه تكون مميزه زي سابقاتها
و ان شاء الله السنه دي كمان نباركلك فيها على الكتاب الثاني
بس اعملي حسابي يا افندم في صفحه بقي في الكتاب :) :) :) اقول كلمتين من نفسي هههههههههههه
و مفيش داعي ابدا للشكر ، احنا اخوات و انا تحت امرك في اي حاجه ، حضرتك تؤمري بس :)

ظلالي البيضاء يقول...

بعيداً قليلاً عن مدونتك التي كانت كالبستان المليء بالأزاهير التي تتشكل بكل الأشكال وتتلون بكل الألوان الجميلة .. وتفوح منها روائح العطور والرياحين المنعشة ..
أقول :

بالأمس أخذت أتابع قراءة كتابك المقتبس أصلاً عن مدونتك ..
فشعرت بشعورٍ مختلفٍ عن شعوري به يوم بدأتُ بقراءته ..
وكان انطباعي الفوري أن هذا الكتاب بكلماته وتعابيره كلوحة الموناليزا ..
إن نظرتَ إليها وأنت حزين تشعر بحزن صاحبتها ..
وإن نظرتَ إليها وأنت سعيد شعرتَ بسعادتها ..

حقيقةً هذا ما وجدته في كتابك فقد اختلفت انطباعاتي ومشاعري كلياً بينما كنت أقرأ بالأمس عنها منذ بضعة أيام . فعرفت أن لاسمك في كتابك نصيب ..

حقيقةً الكتاب بمجمله كان لوحةً رائعةً ربما لم يرسمها ليوناردو دافنشي .. لكن من رسمها لم يكن أقل روعةً وفناً وإحساساً منه ..

كل التحية والأمنيات الطيبة بالتوفيق والتميز والسعادة ..

ملاحظة :"أخذت أبحث عني هنا فلم أجدني .. مع كل سطر أمنّي نفسي بأني سأجد اسمي بين كل هؤلاء الرائعين .. حتى وصلتُ للسطر الأخير فعرفتُ أن اسمي بقي مختبئاً في الوجه الآخر للتدوينة تماماً كالجندي المجهول .. ههههه "

دمت بألف خير أختي منى .. مع التحية الطيبة ..

الطائر الحزين يقول...

وفقكم الله ومن نجاح الى نجاح بإذن الله

الطائر الحزين يقول...

بارك الله فيك
من نجاح الى نجاح ان شاء الله

شيماء علي يقول...

كل سنة و انتي مبدعة في سماء التدوين و عالم الكتب يا موناليزا
بتمنالك المزيد من النجاح و التألق و مبروك اول كتاب اللي قريت بعض مما نزل فيه و اعجبت بيه .
عقبال الكتاب التاني و سلسلة كتب ان شاء الله
تحياتي

ليلى الصباحى.. lolocat يقول...

منى حبيبة قلبى كل سنة وانت ومدونتك بخير وسعادة

ويارب دايما منورة انت وقلمك الراقى اللى ماترك اى ناحية من نواحى الحياة الاجتماعية وتحدثتى فيها وطرقت ابواب لم يطرقها قبلك مدون

تهتمى بكل مايخص المرأة واوجاعها ومشاكل الاسرة تتناولى الموضوعات باسلوب مبسط ومفيد دائما
فشكرا لك غاليتى بحجم السماء وكل عام وانت بخير
وقد شعرت بالحرج الشديد لما ذكرتيه عنى بارك الله فيك ودايما الاخوات مفيش بينهم اى فضل بل واجب ومحبة وتقدير وانت يامنى تستحقى كل ثناء وتقدير وحب الجميع

كل سنة وانت طيبة حبيبة قلبى
وزعلت جدا لان بصراحة انا ماقرأت البوست ده من قبل وواضح من التاريخ ان له ايام فسامحينى حبيبتى على التقصير الغير مقصود

تحياتى بحجم السماء وعقبال 100 سنة :)

Magid Alkady يقول...

السلام عليكم..
كل سنة وإنت ومدونتك بخير..
صراحة قلّبتي عليا المواجع مع مدونتي.. لأنك ذكرتي معظم فضل المدونات علينا...
لكن للأسف.. أنا ماكنتش مخلص لمدونتي زيك!
ربنا يبارك في جهدك ووقتك وقلمك وينفع بهم دائما.

Sara يقول...

بتضايق أوي من الناس اللي كلامها رقيق يا منى !
لأني ببساطة مش بعرف أرد عليه :(
بحسه بس مش بعرف أرد !

كل سنة و انتي و مدونتك بخير و في ازدهار

و من نجاح لنجاح ان شاء الله

و يارب أكون عرفت أرد لك حاجة من الكلام الرقيق بتاعك و لو كان صغير :)

و آه ، العفو ، الحفلة كانت جمية و تستاهل التوثيق :D


إلى الأمام

بالتوفيق

تحياتي

Bent Men ElZman Da !! يقول...

كل سنة وأنتِ بألف خير يا منى
وكل سنة و أنتِ وخباياكِ منورة بلوجر :)
وكل سنة وأنتِ والمدونة بخير يارب :)

مفيش شكر على واجب أنا اللى يهمنى أنى اعملك حاجة تسعدك بوجود كتابك :)

عارفة أية أكتر حاجة بتفكرنى بيكِ
كلمة خبايا ونسائية والموناليزا :))

ابراهيم رزق يقول...

كل سنة و انتى طيبه

مدونتك مكان هادىء ملىء بالكلمة الطيبه
واحه من الفلسفة و الشجن

اتمنى ان يقل الشجن قليلا فى العام الجديد

الف الف مبروك الكتاب
وعقبال الكتاب رقم 100

طبعا بفتكر الموناليز
تحياتى ليكى

P A S H A يقول...

كل سنة وانتي ومدونتك طيبين وبألف خير وصحة وسعادة ويا رب دايماً منورة البلوجر بحضورك الراقي وموضوعاتك المتميزة الثرية :))

باعترف إني مدين لحضرتك بإعتذار (أو يمكن أكتر) على بعض تعليقاتي - العفوية - اللي ممكن كانت مش مناسبة وباقول لحضرتك أنا آسف :)

- بالنسبة للنقد هو فيه كتير جداً بس مش وقته
هههههههههههههههههههه
D:
لأ بجد أكتر حاجة بتعجبني في المواضيع اللي بتنشريها حضرتك في المدونة "المثابرة" ، يعني بصراحة باحس إنك بتكتبي بضمير وبتبذلي مجهود كبير في موضوعاتك ودي حاجة بجد باشكرك عليها

بالنسبة للحاجة اللي بتفكرني بحضرتك .. إني دايماً اتلخبط بين اسم الأكاونت بتاعك واسم مدونتك .. يعني ساعات بابقى عاوز آجي هنا أقعد أدور في قايمة المدونات عندي على مدونة "موناليزا" وما لاقيهاش !! تيجي حضرتك تشرفيني بتعليق أسأل نفسي : مين أمة الله دي ؟؟
:))
مع خالص أمنياتي بدوام النجاح والتوفيق
دمتي في خير وسعادة

re7ab.sale7 يقول...

اكتر حاجة بتفكرني بك هي خبايا نسائية
صحيح احنا نعرف بعض من قريب سنتين تقريبا بس حاسة اني اعرفك من زمان
كل سنة وانت وبنتك بخير اللي هي مدونتك طبعا ويارب دايما بكل سعادة وفرحة واشوفك قريب ف حفلة توقيع المنصورة ان شاء الله
بحبك وهبعتلك هدية بنفسجية ان شاء الله

جنّي يقول...

السلام عليكم

كل سنة وانتي طيبة ..
حاجات كتير اختلطت بخمس سنوات تدوين بفتكرك دايما وستظلين الاخت الطيبة ..

Lobna Ahmed يقول...

كل سنة وانتي طيبة يا منى
أعتقد إني قلتلك ده كتير، بس انتي حقيقي من الناس اللي بحب وجودهم في الحياة، بكل نقائك وحبك للناس وللخير اللي فيهم
بيفكرني بيكي أحمد :)

مصطفى سيف الدين يقول...

كل سنة و احنا طيبين :)
كل سنة و انتي طيبة و مدونتك رمز و نبراس للتدوين المحترم
عيد ميلادها السنادي واضح ان له طعم تاني طعم الفرح باصدار كتابك
للاسف مفيش حاجة بتفكرني بيكَِ :P
لا بهزر طبعا اللي بيفكرني بيكِ هو اي بوست نسائي على بلوجر افتكر خباياكِ النسائيةو اقول موناليزا عبرت عن البوست ده كله في سطر واحد

تحياتي

رؤى عليوة يقول...

كل سنة وانت طيبة يا منى
والنهردة عيدين مدونتك والحب وهما الاتنين بمعنى واحد

عارفه انا بتابع مدونتك من زمان رغم انى مكنتش بعلق
يمكن لان اول ما دخلت النت فضلت سنين طويله معروفه بأمة الرحمن وامة الله هى بنفس المعنى
وعشان بحب اوى اى حد بيكتب بطابع المثقف المتدين حتى لو مجرد اسم اختارتيه

اما عن كتابك فسأبدأ فيه ان شاء الله وهقولك رأيى فى بوست مخصوص زى ما بحب اعمل مع اصدقائى لكن يمكن الفترة دى عندى حجات كتير مانعانى انى ابدأ قراءة
ادعيلى


دمت بخير حبيبتى
وبوكيه ورد وشكولاته على صفحتك بقى

موناليزا يقول...

تاكاشى
ــــــــــ
أهلا بيك يافندم فى زيارتك الأولى
وأنت طيب :)
عجبنى أوى تشبيهك لمدونتى بأنها مرايتى
هى فعلاً كذلك :)

أشكرك لتهنئتك
ويسعدنا دوام التواصل

---------------------

محمد البرقى
ـــــــــــ
أهلا بيك أستاذ محمد فى زيارتك الأولى
الله يبارك فيك :)
ولان فى ناس بتخاف من الأرواح فكان لزاماً التنويه :)

أشكرك جداً لتهنئك ولتعليقك
ويسعدنا دوام التواصل

---------------------

آية محمد
ـــــــــــ
أهلا بيكِ آية
وكل سنة وأنتى من زور مدونتى الدائمين :)
ميرسى على الهدايا .. وخصوصا التورتة ^_^
تسلميلى دايما


---------------------

محمود أحمد
ــــــــــــ
أهلا بيك يا دكتور
وأنت طيب :)
ربنا يخليك ويكرمك دايما
بس الموت مش شر على فكرة أنا بعتبره مرحلة حتمية سنصل لها يوما ولذا أحاول الاستعداد له (أصلى مابحبش المفاجآت) ^_^

كتاب تانى.. دايما رافع من روحى المعنوية :) مش لما الناس تهضم الأولانى الأول :)

صفحة واحدة بس !! وقتها هعمل معاك حوار ونكتب صفحتين :)

دايما بتحرجنى بذوقك :)

خالص احترامى
يسعدنا دوام التواصل

--------------------

ظلالى البيضاء
ـــــــــــــــ
أهلا بيك أستاذ محمد

إيه المقدمة الحلوة دى :)

عجبنى تعليقك على الكتاب أوى
ولكنى فى انتظار تكملته بالتفصيل :)

إذا لم أنوه عنك هنا فستجده حتماً فى إهداء الكتاب فى أول سطر تحديداً :)

أشكرك جداً لتعليقاتك الراقية دائما ولتشجيعك المستمر

خالص تقديرى

------------------------

الطائر الحزين
ــــــــــــــ
أهلا بيك أستاذ إيهاب
ربنا يكرمك يارب
وأشكرك جدا لوجودك

خالص تقديرى

-------------------

شيماء على
ـــــــــــ
أهلاً بيكِ شيماء فى زيارتك الأولى
أسعدنى تهنئتك الرقيقة وكلماتك المدعمة
لكِ منى كل الشكر والود

فى انتظارك دائما

----------------------

ليلى الصباحى
ـــــــــــــــ
أهلاً بيكِ يا لولو
كل سنة وانتى اختى وصاحبتى اللى بتستحملنى فى طلباتى اللى مابتخلصش :)

ربنا يعزك ويكرمك فماتوفيقى الا بالله

لا تعتذرى غاليتى فالريدر لم ينزل هذه التدوينة :(

أسعدك الله كما تسعدينى بذوقك وأخلاقك الراقية

خالص ودى

-----------------------

ماجد القاضى
ــــــــــــ
وعليكم السلام ورحمة الله وبركاته
أهلا بيك أستاذ ماجد بعد طول غياب

إذن فلتعود لها سريعاً فمدونتك تستحق الإخلاص بحق :)

ربنا يعزك ويكرمك دايما
أشكرك جداً على كل شئ

خالص تقديرى

--------------------

سارة
ـــــــــ
أهلا بيكِ سارة
مين الناس اللى كلامها رقيق دى؟ :)


أنتى جميلة يا سارة
وتضيفى بهجة على أى مكان تتواجدى فيه

تسلميلى دايما
خالص ودى

--------------------

بنت من الزمن ده
ــــــــــــــــــ
أهلا بيكِ دينا
و كل سنة وأنتى مُحبة للآخرين :)
:)
سعيدة انك قلتى ايه اكتر حاجة بتفكرك بيا :)

خالص ودى

------------------------

موناليزا يقول...

ابراهيم رزق
ــــــــــــــ
أهلا بيك أستاذ ابراهيم
وأنت طيب يافندم :)

"واحه من الفلسفة و الشجن"
حلو التشبيه ده :)

أنا كمان والله نفسى الشجن يقل ^_^

الله يبارك فيك وودت لو اتصورت معاه وترسلى الصورة حتى أنشرها على صفحة الكتاب.. حضرتك اسمك جواه على فكرة :)

خالص تقديرى

--------------------

باشا
ــــــــ
أهلا بيك أستاذ شريف
الله يكرمك :) وأنت طيب يارب ودايما من زوارى المميزين :)

بما انى بحب التعليقات العفوية إذن لا داع للاعتذار :)

ههههههه لو فيه نقد بجد فدى فرصتك .. أنت عارف الفرص مش بتتكرر كتير فأنا لو مكانك استغل الموقف وأقول بقى كل حاجة :)

المثابرة طبع أشكر الله عليه :)

وعن اختلاف اسمى عن المدونة أول مرة آخد بالى فعلا :)

أصل الحكاية أنى لو هختار لنفسى لقب هيكون أمة الله واسمى طبيعى موناليزا
إذن فلأصير أمة الله موناليزا
مجاش فى دماغى بقى ان الريدر هينزل اسم أمة الله
والتعليق هيكون باسم موناليزا :)
بس المفروض بعد طول العِشرة بقى تكون ربطهم ببعض :)

يسعدنى تعليقاتكم دائما
خالص شكرى وتقديرى

--------------------------

رحاب صالح
ــــــــــــ
أهلاِ بيكِ يا رحاب
:) بقى بصمة خلاص يعنى ^_^ فى انتظار رأيك فيه جداً عل فكرة :)

وسنتين دول شوية برضه :)

وكل سنة واحنا أصحاب وحبايب
وبإذن الله هيكون فى حفل توقيع قريب فى المنصورة وهستناكِ أكيد :)

وأنا كمان بحبك جدا
وفى انتظار الهدية .. بما انها بنفسجية خليها كادبورى :)

خالص ودى

------------------------

جنى
ــــــ
وعليكم السلام ورحمة الله وبركاته
أهلا بيك أستاذ سعيد
وأنت طيب يافندم
فعلا 5 سنوات ليسوا بالقليل :)

مازلت أشكرك على تعليقك ليا على الفيس على جروب المدونين فلا تعلم كم كنت أحتاج الدعم وقتها

خالص تقديرى

----------------------

لبنى أحمد
ــــــــــ
أهلا أهلا لبنى الجميلة
كل سنة وأنتى طيبة ومحققة أحلام الجميع :)

يحضرنى مشهد منى زكى فى مسرحية كده أوكيه
"ده كتير والله ^_^"

أحمد :)
ذكر اسمه يجعلنى ابتسم دائماً

تسلميلى دايما
خالص حبى

----------------------


مصطفى سيف الدين
ـــــــــــــــــــ
أهلا بيك يادكتور
وكل سنة واحنا مستمرين فى التدوين بلا كلل أو ملل :)

الله يكرمك يارب رأيك ده على دماغى بجد ويارب نفضل عند حسن الظن دائما

فعلاً له طعم مختلف :) مازلت أذكر أول يوم عملت فيها المدونة ماجاش فى دماغى أبدا ان عيد ميلادها الخامس هيكون فى بسببها كتاب باسمى :)

:)
تعليقاتك دايما تحفزنى وتشجعنى على الاستمرار

خالص شكرى وتقديرى

-----------------------

رؤى عليوة
ــــــــــــــ
أهلا بيكِ يا رؤى
وكل سنة وانتى متميزة :)

تعليقك مفاجئة ليا بحق
وأسعدنى

كنتى متبعانى من زمان وكتبنا هى اللى تعرفنا عل بعض :)

وأنا فى انتظار رأيك المفصل :) وخدى وقتك ^_^

وصلنى أرق بوكيه ورد بجد
تسلميلى يارب

خالص ودى

شيرين سامي يقول...

كل سنة و إنتي طيبه يا منى و عقبال 100 سنة تدوين :)
معلش متأخره كالعاده بس مينفعش معلقش في مناسبة زي دي خصوصاً إنك من أول الناس اللي تابعتني و شجعتني :)

أكتر حاجه بتفكرني بيكي هي الأسئله :)
إنتِ ملكة الأسئله بلا منازع

يا رب دايماً في خير و سعاده

موناليزا يقول...

شيرين سامى
ـــــــــــــ
أهلاً بيكِ يا شيرين
وأنتى طيبة يا حبيبتى وكل سنة وأنتى من متابعينى الدائمين

أنتى تنورى فى أى وقت :)

"ملكة الأسئلة " لقب جديد :)

أسعدنى وجودك وحقاً قلمك يستحق المتابعة الدائمة
استمرى وتمنياتى بالتوفيق الدائم

خالص ودى

ghoneem يقول...

دمتي بخير .. لسة شايف الاهداء وسعدت به كثيرا

مدونتك هي الأحلي دمتي بخير

أنا من تشرفت برؤيتك والتعرف علي قلمك .. دمتي بود ودامت حياتك بكل خير

تحياتي

بالتوفيق..................