السبت، 9 فبراير، 2013

أحب فى نفسى





من المفيد للإنسان أن تكون نظرته تجاه نفسه إيجابية.. فنفسك هى الوحيدة التى ستستمر معك حتى يأتيك الأجل.. هى من تشاركك نجاحاتك وإخفاقاتك..هى من تلقى بك فى جهنم إذا لم تجيد ترويضها وهى من تخلد ذكراك فى الدنيا إذا ما أجادت معاملتها.

ولذا أردت أن أهدى هذه التدوينة لنفسى لأدعمها فيما تفعله.

- أحب فى نفسى حبها لله.. وبحبها لما بختم القرآن.. وبحبها لما أعمل حاجة ابتغاء مرضاة الله..
- أحب فى نفسى حبها للخير ومساعدة الغير ومحاولتها لإسعادهم ولو حتى بالكلمة الطيبة.


- أحب فى نفسى إنى مابحبش أقلد حد وبعتز باستقلال شخصيتى..

حتى لو كنت ناوية اعمل حاجة ولقيت غيرى عملها قبلى ممكن جداً 


ماعملهاش.

- أحب فى نفسى إنى معنديش فضول ومابتدخلش فى اللى ماليش 

فيه ولا أعير انتباهاً لموضوع لم يشركنى أحد فيه.

- أحب فى نفسى سرعة الآداء علشان أرتاح بعدين.

- أحب فى نفسى إرادتى القوية و عدم استسلامى لأى موقف 

انهزامى ممكن  اتعرض ليه ..بفضل أحارب لآخر نفس.

- أحب فى نفسى إنى مابخذلش حد وثق فيا مهما كان حجم الخلاف

 بينى وبينه.

- أحب فى نفسى قدرتى على التعبير عن مشاعرى الطيبة لمن 

حولى .





-أحب استغطى وأنا نايمة وأحب شكلى عموماً وأنا متغطية بحجابى.

- أحب فى نفسى إنى ما بحبش أتمارض.. ومادخلش السرير ولا أعبر عن ألمى غير وأنا فى حالة يرثى لها.

- أحب فى نفسى إنى لما بقع بقوم لوحدى .. مابستموتش فيها واستنى حد يقومنى .

- أحب فى نفسى  أنى ما بحبش أفرض نفسى على حد..

- أحب فى نفسى إنى مابحبش أأجل عمل اليوم إلى الغد إلا للضرورة القصوى.. أحب أسدد ديونى على طول وأحب حسم المواقف لإنى مش ضامنة عمرى.

- أحب فى نفسى قدرتها على التخمين .





- أحب أنى متفائلة وعندى حسن ظن بالله حتى لو كان الغيوم يلوح فى الأفق.
- أحب فى نفسى قدرتها على التحدى.
وقدرتها على تحمل المسئولية.. وعلى حُسن القيادة والتخطيط وإدارة الأمور.
و انها مابتندمش على حاجة رفضتها حتى لو غيرها خدها وفرح بيها.








- أحب استخدامى لعقلى وتنحية قلبى جانباً فى مواقف كثيرة.





- أحب حبى للنجاح والعمل جاهدة للحصول عليه حتى لو فى طبخة أكلة جديدة.
- أحب إخلاصى لفعل الأشياء.. يعنى أعمل الحاجة بمزاج.







- أحب انضباطى فى المواعيد.. وانى قد كلمتى.
- أحب أعيش اللحظة.
- أحب الترتيب والنظام فى كل حاجة.. مابحبش الكراكيب.
- أحب طبيعتى العملية فى التعامل مع الناس.. استأذن قبل ما أزور حد وافرض على اللى ييجى إنه يستأذن ويبقى معرفنى قبلها.. وهكذا فى جميع المواقف.
- أحب أضايف الناس وأحب أكون دايماً المضيفة.
- أحب وضوحى فى التعامل.. مش مضطرة أنافق حد أو أقوله كلام كويس وأنا مش حساه.
- أحب معرفة حقوقى وحدودى علشان مافرطش فى حقى ولا أتجاوز حدودى مع حد.

أحب أقعد مع نفسى ولا أمل من صحبتها




وأنت بتحب فى نفسك إيه؟

هناك 8 تعليقات:

ليلى الصباحى.. lolocat يقول...

واحنا كمان بنحبك يامنى :)

رغم ان الانسان احيانا يعجز عن وصف ذاته لكنك احسنت النصيحة والتذكير ان هكذا يجب ان يكون المسلم دائما

احسنت اختى الحبيبة وبارك فيك

تحياتى بحجم السماء

asmaa fathy يقول...

تصدقي بمين ان انا حبيتك من حبك لنفسك

هههههههههههههه

برافووووووووووووووو عليكي انكى متصالحة اووي كده مع نفسك

في انتظار باقى بوستاتك

تحيـــــــــــــاتي

Asmaa Fathy

أبو مروان يقول...

فكرة حلوة ... انا هبقي أعملها ..بس لما أعرف أنا بحب ايه في نفسي يستاهل ان يتقال ...أو اقدر أقوله ...

ربنا يخليلك نفسك ...

افكار مبعثرة يقول...

انا حبيتك زيادة من حبك لنفسك :))) و اكتشفت حاجات كتير مشتركة بينا :))
انا بحب ف نفسي اني مبحبش الحال المايل يا ابيض يا اسود
مبحبش اخون ثقة حد فيا
لو عملت حاجة بتقنها
بحب التفوق و اكون متقدمة في اي حاجة بعملها
برده مش بحب الكراكيب:)
بحب اقعد مع نفسي اوي برده :))
راضية باللي ربنا يكتبه و عارفة ان كل ما يكتبه لي خير
مبحبش الانهزامية
مش بتدخل في اللي ميخصنيش الا اذا حد اشركني

اد ايه البوست ده حلو :)
جزاكي الله كل خير

منجي بـــــــــــــاكير يقول...

هناك دائرة جدُّ رهيفة و حسّاسة و قيّمة ، هي دائرة الإدراك و اليقين التي تحيل حتما إلى الدائرة الأرفع و هي الإحسان ،،
إدراك كنه النفس و التبحّر في مكامنها بعلم و عقل و تفكّر يخلص آليّا إلى تقوية الإيمان ، ثم اليقين الذي هو من مراتب العارفين الذّاكرين ( الذاكرين لنعم الله ، و المحصين لأسمائه جلّ و علا )


تقديري و إعجابي

/ الزّمن الجميل:دعوة لإيقاظ روح الزمن الجميل و إعمال العقل لبناء الحاضر و المستقبل، تدعوك لتصفّح ورقاتها و ترك بصماتك ، شكرا لجميل التفاعل
http://zaman-jamil.blogspot.com/

موناليزا يقول...

ليلى الصباحى
ــــــــــــــ
أهلا بيكِ يا لولو
أنا بحبكم أكتر على فكرة :)

ولمً العجز وهى ذاته يعنى أقرب حد ليه ..
ماقلتليش طيب إيه اكتر حاجة بتحبيها فى نفسك ؟

نورتينى وأسعدنى وجودك


----------------------

أسماء فتحى
ـــــــــــــ
أهلا بيكِ أسماء
الله يكرمك :) حبيتك العافية ^_^

الحمدلله :) شعور حلو فعلاً

وأنا فى انتظارك دائما :)

----------------------

أبو مروان
ــــــــــــ
أهلا بيك أستاذ أحمد
اقعد مع نفسك شوية وأنت هتلاقى فيها حاجات كتير أكيد حلوة

أشكرك لتعليقك :)

يسعدنا دوام التواصل

----------------------

أفكار مبعثرة
ــــــــــــــ
أهلاً بيكِ
ربنا يحبك :)
ده شئ يسعدنى أكيد ^_^
وقد ايه تعليقك جميل :)

فى انتظارك دائما

--------------------

منجى باكير
ـــــــــــ
أهلا بيك أستاذ منجى
تعليق قوى .أشكرك عليه

يسعدنا دوام التواصل

جنّي يقول...

السلام عليكم

كثير مما ذكرتيه اتمنى ان اجده في نفسي .. ولكني أكره فيها تفريطها في حق الله ..
كفى يانفس ماكانا..كفاك هوى و عصيانا
كفاك ففي الحشى صوت..من الاشفاق نادانا

موناليزا يقول...

جنى
ـــــ
وعليكم السلام ورحمة الله وبركاته
أهلا بيك أستاذ سعيد بعد طول غياب

انظر للجانب المشرق في نفسك وهو سيضئ لك أى طريق تكرهه فيها