الأربعاء، 6 فبراير، 2013

ناس و ناس



فى حياتنا ناس حلوة كتير
- ناس تزعل منك فتقولك ولما تصالحها ترضى ويرجع الود بينكم تانى.
- ناس تعملها أى حاجة بسيطة وتلاقيها تفرح وماتبقاش عارفة تشكرك ازاى.
- ناس يشعروا بوجعك من غير ما تتكلم وتلاقيهم فجأة حواليك ويخففوا عنك.
- ناس لو حبيت تتجنن مع نفسك تلاقيهم يشجعوك انكم تتجننوا سوا.
- ناس لو شافوك محبط يشجعوك ويحفزوك ويدعولك كمان ومن غير ماتطلب منهم.
- ناس بتفكر فيك زى ما بتفكر فى نفسها.
- ناس يفتكروك بدعوة حلوة.
- ناس يراسلوك بس علشان يطمنوا عليك.
- ناس مايستحملوش زعلك حتى وإن لم تظهره.
- ناس يتفهموا ظروفك مهما كانت ضد رغباتهم.
- ناس يفاجئوك بهدية بتحبها من غير مناسبة.
- ناس لا تبخل عليك بعلمها وبوقتها مهما كانت مشغولة.
- ناس تكتب عنك بس علشان بتحبك.
- ناس بيحبوك لله من غير أى سبب تانى.
- ناس بتخرج أحلى حاجة فيك.
- ناس بالنسبة لك صُحبة صالحة بتشدك معاها لطريق الله.
- ناس بتنصحك بحنية لو غلطت.
- ناس لو أكرمتها ملكتها.
- ناس لو شافوك بتنحدر بمبادئك أو بأخلاقك يفكروك بنفسك فتنتبه.
- ناس لو شافوك محتاج مساعدة وهما مايقدروش يساعدوك يعرفوك على ناس معارفهم ممكن تقدر تساعدك وتفضل متابعة معاك وكأنك من دمها.
- ناس مش عايزين منك أى حاجة غير بس تكون بخير.
- ناس وجودهم فى حياتنا نعمة بجد تستحق أن تشكر الله عليها.



وناس تانية يعلموك قيمة الناس الأولانيين

- ناس يجرحوك بلا اكتراث ودون سبب واضح بالنسبة لك .
- ناس توجعك ولو صرخت يسخروا منك.
- ناس تعطى لنفسها حقوق عليك من غير وجه حق.
- ناس يستهزأوا بمشاعرك حتى لو كانت ليهم.
- ناس تزعلك بكل بساطة وتستخسر تصالحك.
- ناس مهما تغلط استحالة تعتذر.
- ناس تجيد الهرب وتزعم الشجاعة!.
- ناس لسانها بيقول حاجة وأفعالها بتقول حاجات تانية خالص.
- ناس كذابة وبيدعوا كراهية من يكذب.
- ناس مخادعة يتقربوا منك فقط ليحصلوا على مبتاغهم.
- ناس أنانية أهم حاجة عندها نفسها وبس مش مهم هما بيهينوا مين .. المهم ان محدش يقرب منهم.
- ناس فظة غليظة فى التعامل.
- ناس بتخرج أسوأ حاجة فيك.
- ناس غشاشة يدعوا مودتك وهم أبعد ما يكونون عن ذلك فتصرفاتهم تفضحهم دائماً.
- ناس تقسم بشرفها على فعل شئ ولا تفعله.
- ناس مراوغة من الدرجة الأولى.
- ناس بتاخد من الدين مايناسب أهوائها فقط.
- ناس بالنسبة لك كحامل الكير.
- ناس لو أكرمتها تمردت.
- ناس بتبعدك عن ربنا بكل ما أوتيت من قوة وكأنها مرسال الشيطان على الأرض.
- ناس بتتباهى بحقارتها.
- ناس وعدت وأخلفت.
- ناس حبيتهم وكرهوك.
- ناس أخلصت لهم وباعوك.
- ناس احترمتهم وأهانوك.
- ناس شخصيتها سادية تتلذذ بتعذيبك.
- ناس تستغل ضعفك لصالحها.
- ناس يضغطوا على وجعك مهما أظهرت آلامك.
- ناس بدلاً من أن تحميك كما عاهدتك قتلتك بسكين بارد.

مشكلة الناس الأولى إنهم مش شايفين نفسهم هما حلوين قد إيه.
ومشكلة الناس التانية إنهم مش شايفين نفسهم هما وحشين قد إيه.

رزقنا الله الأولى وحمانا من الثانية


هناك 8 تعليقات:

Aya Mohamed يقول...

المشكلة كمان يا منى
ان الناس التانيين معتقدين ان الناس اللى فى الاول طبعهم كدا
فاهمين الحكاية بالعكس
مفيش حد بيشوف نفسه وحش
ربنا يهدينا جميعا يارب

أبو مروان يقول...

اللهم اجلعنا من الآولين واكرمنا بهم
ولا تجعلنا من الاخرين ولا عفانا منهم ...

حمـــــــــــــــــــــة يقول...

الإختلاف بين البشر لا يفسد للود قضية
أما إذا غاب الإحترام و الإصرار على الخطأ هذا هو بداية الخلاف
الحق بائن و الباطل بائن و لا أحد يستطيع إلباس الحق بالباطل مهما حاول

مسلم مصرى يقول...

( ونفس وما سواها * فألهمها فجورها وتقواها )
( قد أفلح من زكاها وقد خاب من دساها )
لقد كثر الاخير وقل الأول
أسأل الله أن ينجينا من شر كل ذى شر
تحياتى المعطرة

ظلالي البيضاء يقول...

الناس الموصوفين أولاً يقيني أنهم يحبونك بكل ما للكلمة من معنى ..
والناس الموصوفين آخراً يقيني أنهم يبغضوك أو يحسدوك بكل ما للكلمة من معنى ..
نسأل الله تعالى أن نكون من الناس الأولانيين .. وأن يجنبنا الناس التانيين .. ههههه
إنتِ مين فيهم بقا الأولانيين وللا التانيين .. "عادل إمام" هههه
دمت بألف خير أختي منى ..
مع التحية الطيبة ..

asmaa fathy يقول...

ناس وناس

الناس الاولين قليلين جداااا

لان الجانب المادي والانانية بقوا مسيطرين بشكل كبير علي الناس في ظل الطاحونة اللى الناس شغالين فيها

بقى كل واحده كبيرة يوم مايفكر يفكر في اللي وراهم هيلبي احتياجتهم منين وازاي وعلي حساب ايه من مبادئه وقيمه

عارفه الشنطة المقطوعه اللي طول ما انتى ماشيه تقع منها حجاتك الانسان بقى كده بالظبط شنطة مقطوعه طول مهو ماشي تقع منه قيمه ومبادئه واحلامه واحد وراء التاني

لحد مايفوق في النهاية يلاقى شنطته فاضيه مفيش غير الجلد وروحه فااااااااااااضية بقى هيكل عظمى وبس

تحياتي لكِ ولناسك الاولين

Asmaa Fathy

aya abd elkarim يقول...

تعرفى أكبر غلط بقى ان الناس التانيين بيشوفوا بيصفوا الأولين بالهبل على أعتبار ان الحاجه الحلوه دلوقتى هى اللى بتصيب بالهبل و الوحش ده بيبقى ناصح...!!!
اللهم قنا شر هذا الزمان

موناليزا يقول...

آية محمد
ـــــــــــــ
أهلا بيكِ يا آية
فعلا محدش بيشوف عيوب نفسه
تعرفى أجمل حاجة لو الواحد يشوف نفسه بعيون الآخرين

نورتينى وأسعدنى مشاركتك

-----------------------

أبو مروان
ـــــــــــ
أهلا بيك أستاذ أحمد
اللهم اجعلنا من الآولين واكرمنا بهم
ولا تجعلنا من الاخرين و عفانا منهم

آميين

يسعدنا دوام التواصل

------------------

حمة
ـــــــ
أهلا بيك يافندم
صح جداً
أتفق معاك

أشكرك لمشاركتك ويسعدنا دوام التواصل

--------------------

مسلم مصرى
ــــــــــــ
أهلا بيكِ يافندم
فعلاً فقد استشر فينا الآخير بكثرة
نسأل الله المعافاة

أشكرك لمشاركتك ويسعدنا دوام التواصل


------------------

ظلالى البيضاء
ـــــــــــــ
أهلا بيك أستاذ محمد
فعلاً.. فعلامات الحب أوالبغض تكون واضحة وظاهرة للعيان
أما عن الحسد فأول مرة انتبه لذلك :)

من يتعامل معى عن قرب يستطيع الحكم :)

أشكرك لمشاركتك
ويسعدنا دوام التواصل

-----------------------

أسماء فتحى
ـــــــــــ
أهلا بيكِ أسماء
تبقى مآساة بجد لو حد عرف انه من الفئة الثانية ولم يعدل فى ذاته
فالدنيا فانية مهما كان بها من أوجاع وانتكاسات ولن يبقى إلا الذكرى الطيبة

أشكرك لمشاركتك وفى انتظارك دائما

--------------------

آية عبد الكريم
ـــــــــــــــ
أهلا بيكِ يا آية
ده حقيقى للأسف
هبل وعبط وتمثيل ومنافقين وكل حاجة وحشة كمان ممكن ينعتوهم بيها
بدل مايحاولوا يحسنوا من نفسهم

أشكرك لمشاركتك وفى انتظارك دائماً