الخميس، 18 فبراير، 2016

عتاب الأحبة





العتاب مش أي حد بيقدره ولا يستاهله ومش أي حد برضه ممكن يعاتب بطريقة حلوة من غير ما تحسس الطرف الآخر انها بتتخانق معاه مش بتعاتبه
خلونا نعطي شوية أمثلة لعقد مقارنة :
1- أنت جبان، وحش ، حيوان أو أي شتيمة تانية تبدأ بيها الحوار
2- يعني لو ماكنتش أسأل أنت ما تسألش خلاص كده بانت
3- أنت بتبعد ليه أنا عمري ما أذيتك
تخيل أن كل جملة من دول بداية رسالة أو بداية اتصال مع نبرة عالية
 تشي بخناقة مرتقبة
حط نفسك كده مكان حد بيتوصله واحدة من الجمل دي
 من شخص متعشم فيه بزيادة 
تعالوا نشوف رد الفعل
1- وارد جدا تترد عليه الشتيمة بأسوأ منها وعلى حسب مزاج الشخص المستقبل وقتها أو يرد بقلة صبر: ليه؟ ويطيب خاطرك بكلمتين أو على حسب علاقتكم هتوصلكوا لفين في الآخر
2- وارد جدا يتقاله"براحتك، عنك ما سألت، بركة انها جت منك أو أي رد آخر يدل على عدم قبول صيغة العتاب المطروح
3- وارد يكود الرد" أنا حر، ماعدتش قابلك أو على حسب وقتها برضه مود الشخص المستقبل وعلاقته بالمرسل
الجمل دي سلبية فعلا وكفيلة بإشعال الرماد أو بإنهاء أي علاقة أو حتى لو العلاقة استمرت هتكون ع المحك ومش هتنسى ان حد كلمك بطريقة مش حلوة

طيب لو الحوار اتبدل لـ
1- أنت معاك حق لو ماكلمتنيش ما أنا فعلا مقصر معاك
2- بقى لي كتير ما سألتش عليك.. أعذرني .
3- واحشني وعايز اطمن عليك
تخيل حد بادئ معاك حوار بواحدة من الجمل دي
أنت حتى وقتها لو شايل منه مش هتعرف ترد غير برد كويس ومش بعيد تعتذر له كمان انك فعلا بعيد من غير ماتقصد.

المهم الطريقة والأسلوب في العتاب
- نقوا ألفاظكم.
- محدش ملزم يسأل على حد فلو ده حصل يبقى واجب نشكره
ولو ماحصلش مش هنعلق له المشنقة.
- محدش عارف ظروف حد.
- خليك خفيف في علاقاتك.
- افتكرت حد إسأل أنت عليه.
- ماتخنقش الناس محدش ناقصك.




ليست هناك تعليقات: