الخميس، 2 يوليو 2009

جوجو و زمردة (7)


كان "جوجو" يستمع إلى أناشيد الأطفال المفضلة لديه فجاءت له شقيقته"زمردة " سائلة:
- جميل الشريط اللى بتسمعه ده بس أنت لقيت الشريط ده فين؟ احنا مش دورنا عليه فى المحلات ومالقيناهوش. أشتريته منين؟.
- أنا ماشتريتوش ولا حاجة ده بتاع " ريكو" صاحبى.
- إزاى بتاع"ريكو" وهو عندنا بقى له كتير؟.
- و إيه يعنى لقيته عنده فأخذته.
- وقلت له هترجعهوله إمتى؟.
- إيه يا بنتى هو اللى دخل جيب السبع هيخرج تانى ولا إيه! وبعدين أنتِ شاغلة نفسك بالموضوع ده كده ليه؟ ما لكيش دعوة دى حاجة بينى وبين صاحبى.
- وهو يعنى عشان صاحبك تاخد حاجته كده!. تعرف أنت بتفكرنى بـ"نوجا" صاحبتى لما أخذت منى التوكة البيضا اللى بابا كان جايبهالى ولسه لغاية دلؤتى ماجبتهاش. ولما طلبتها منها على إستحياء زعلت وقالت لى أنها رجعتهالى وأن أنا اللى نسيت. رغم أن ده ماحصلش وتوكتى لسه عندها.
- وإيه وجه المقارنة؟
- إزاى بقى "ريكو" أكيد كان مفكر زيى إنك هترجعله الشريط وعشان كده أعطاهولك.
- هو يعنى إشتكالك وبعدين هو قالى أنه زهق من الشريط ده.
- ده مش سبب أنك تاخد حاجة مش بتاعتك ليك على طول.
- على فكرة قبل ما أنسى "ريرى" صاحبتك بتشكيلى منك وزعلانة أوى كمان.
- وهى زعلانة ليه؟.
- بتقول أنها كانت عايزة رقم تليفون "شوشو" صاحبتكم منك وأنتِ مارضيتيش.
- هى ليه مش قادرة تفهم أنه مش بتاعى عشان أعطيهولها. ده أمانة. "شوشو" أعطتنى رقمها وأنا أعطيتها رقمى وزى ما أنا ماحبش أنها تديه لحد من غير إذنى أكيد برضه هى ماتحبش حد ياخد رقمها من غير إذنها.
- أنتِ على طول بتكبرى المواضيع كده ليه؟ . طيب ماهى ممكن تاخده من أى واحدة تانية غيرك.
- أنا عارفة بس المهم أن مش هكون أنا اللى خنت الأمانة.
وبعد فترة صمت.
- أنت عارف إيه الفرق بين الأمانة والسلف والهدية؟.
- لأ مش عارف.
- الأمانة: يعنى حد أستئمنى على حاجة حتى لو كلمة قالهالى ومايحبش حد يعرفها غيرى ومش شرط يقولى ماتقوليش لحد لأن فيه حاجة اسمها أمانة المجلس. وزى ما أنت مستأمنى على فلوسك اللى بتحوشها معايا وأنت واثق أن فى أى وقت هتطلبها هتاخدها.
أما السلف: فده بالظبط زى الشريط اللى أنت أخذته من "ريكو" ولا زم ترجعهوله فى أقرب فرصة وبحالة جيدة كمان. وزى برضه التوكة بتاعتى اللى "نوجا" أخذتها منى وماجابتهاش لغاية دلؤتى وأنا عن نفسى مش مسمحاها إلا لو رجعتهالى تانى وتكون بنفس الحالة اللى أخذتها منى.
الهدية: مش ملزم بردها لأنها مش سلف ولا دين عليك طالما أنت ماطلبتهاش.
- يااه ده الموضوع كبير بجد.
- طبعاً وأكبر مما تتخيل. فيه حاجة أكتر من أن الأمانة ستأتى يوم القيامة معلقة على الصراط وتقول يارب أعطنى حقى. ولن ندخل الجنة إلا إذا أعطينا الأمانات إلى أصحابها.
قفل "جوجو" الكاسيت قائلا:أنا خارج.
- رايح فين؟.
- هروح لـ"ريكو" أرجعله الشريط.
ابتسمت قائلة: ماتنساش تشكره وتعتذر له أنك إتأخرت عليه.
- ابتسم لها قائلاً: أوقات بحس أنك أنتِ الكبيرة.
-تمت-.
*******************
دعوة للمناقشة:
ــــــــــــــــــــــــــــــ
* أذكر موقف مشابه تعرضت له من قبل؟.
* إذا استلف منك شخص ما شئ ما ورجعهولك بايظ هتتصرف معاه إزاى؟.
*لو حد استلف منك حاجة واتأخر عليك بتطلبها منه ولا بتخجل؟.
* لو استلفت حاجة من حد بترجعهاله بعد قد إيه؟.


هناك 45 تعليقًا:

بنجاواتى يقول...

معانى جميلة فعلا

المواقف المشابهة كتير بصراحة
انا شخصيا قبل كده اخدت كتاب من واحد صاحبى ومن يومها ما رجعهتهوش حتى ما بقتش اشوفه تانى

لو حد استلف حاجة ورجعت بايظة مش هعمل اى حاجة ما دام اعتذر بأسلوب مهذب

لو حد استلف حاجة منى احيانا بعرف اطلبها منه واحيانا لا ..على حسب علاقتى بيه

تحياتى

E73 يقول...

* أذكر موقف مشابه تعرضت له من قبل؟.
--------------------
الموقف اللي فاكراه كان واحدة صحبتي وقريبتي في نفس كليتي بس اصغر مني بسنة وطلبت مني في يوم الكتب لأن كتبهم لسة مطلعتش وهي عوزة تشوف حاجة مطلوبة في السكشن(انا بحتفظ بكتبي لأني بحتاجها كل شوية) ادتهملها وقلتلها تبقى ترجعهم لما كتبها تطلع
فضلت منتظرة لآخر السنة وهي مرجعتهمش انا مكنتش مبسوطة بده لكن اتكسفت اطلبهم وعدت سنة كمان ولقتني محتاجة الكتب قوي لأن كان في حاجات مطلوبة مني في السكشن وكانت موجودة فيهم فكلمتها وقلتلها اني محتاجاهم قالتلي انها مش فاكرة هي حطتهم فين وقالتلي هتدور وترد عليا وبعدها كلمتني وقالتلي انها ملقتهمش وبعتتلي كتبها هي مع اخوها علشان اشوف فيها الحاجة اللي انا عوزاها لكن مكنتش كتب كل المواد اللي كنت مديهالها وملقتش الحاجة اللي كنت بدور عليها لأن الاصدارة مختلفة غير انها بتكون كاتبة جوة الكتاب وانا مبعرفش اقرأ كتاب مكتوب فيه (مكنتش بعلم في كتبي علشان اعرف اقراها) بس بصراحة من يومها مرجعتلهاش كتبها مع اني مش هعرف اقرأها وهي متشخبط فيها لكن قلت اخدهم بدل كتبي ولأنها قالتلي انها مش بتهتم تحتفظ بالكتب وبس سامحتها بس مش قادرة انسى لأنها حاجة ضايقتني

بس بصراحة جزاك الله خير بجد بعد موضوعك ده انا هبعتلها كتبها لأني أصلا كدة كدة مش هستفيد منها غير اني كل ما هبص فيها هفتكر الموقف ده
***************************
* إذا استلف منك شخص ما شئ ما ورجعهولك بايظ هتتصرف معاه إزاى؟.
--------------------
بتضايق طبعا بس بصراحة بتكسف اتكلم وبسامح بس بفضل متضايقة من الحاجة دي وخاصة لما تكون حاجة عزيزة عليا
***************************
*لو حد استلف منك حاجة واتأخر عليك بتطلبها منه ولا بتخجل؟.
--------------------
بصراحة بتكسف وبستعوض ربنا فيها
***************************
* لو استلفت حاجة من حد بترجعهاله بعد قد إيه؟.
--------------------
عارفة انا مؤمنة بالمبدأ اللي بيقول السلف تلف والرد خسارة فمش بحب استلف من حد حاجة اصلا ولو حصل واستلفت برجعها في الميعاد اللي هو حددهولي حتى لو مكنتش لسة اخدت اللي انا عوزاه من الحاجة دي وبعرفها اني ملحقتش بس رجعتها لأنها محددة الوقت ده
__________________________________
_________________________
________________
_______
موضوع جميل قوي بحييكي عليه بجد
جزاك الله خير
وان شاء الله اتابع الست حلقات اللي فاتوني

GiGi world يقول...

سلام ياقمر
شكلى كده اول تعليق
هو فى حد صاحي غيرك انا وانت مااعتقدش
ازيك يامونى
حلو قوى موضوعك
انا عامه مش بحب السلف وبتبقى حاجه خانقانى قوى اذا عملتها
الاهم بقى انى بتجن لما حد ياخد منى حاجه ويرجعها مكسوره اذا كانت اكسسوار او اي شئ تانى
بجد ببقى همتوها وببقى متغاظه اصل انا بحب قوى الاشياء
بحب تملك الاشياء
لدرجه ان حتى موبايلى لازم اغطيه وانا نايمه ويبقى جنبى وك لحاجتى كده ماحبش حد ياخد حاجه منى
بقولك كده علشان ماتقوليليش هاتى الموبايل سلف ولاحاجه
خدى بالك
الا حاجتى دى اتحطت فى ايدى وقلبى ازاى حد ياخدها يبوظها
كفايه
اتكلمت كتير سهر بقى
وحشتينى
بحبك

هكذا علمنى سيدنا محمد( صلى الله عليه وسلم) يقول...

السلام عليكم ورحمة الله وبركاته
حياكم الله وبياكم اخوانى واخواتى وثبت على طريق الحق خطاى وخطاكم وطبتم جميعا وكاب سعيكم وممشاكم وتبوأتم من الجنة منزلا.
-أستأذنك اختى الكريمة بمناسبة ذكر حضرتك للامانة إنى أعتذر عن المشاركة فى المناقشة عشان أذكر قصة بعد إذنك :
روي ان رجلا وابنه دخل على امير المؤمنين عمر بن الخطاب رضي الله عنه وكان الابن شديد الشبه بأبيه

فقال عمر للرجل : مارأيت مثلك ومثل ابنك الا كالغراب والغراب

"وهذا اسلوب عربي قديم للتعبير عن شدة الشبه حيث يصعب التفريق بين الغراب والغراب"

فقال الرجل لعمر : يامير المؤمنين ماذا لو علمت ان ابني هذا جاء بعد موت امه ودفنها .

(وكان عمر متكئا فعدل من جلسته وكان يحب غرائب الاخبار )

فقال عمر للرجل : هات ماعندك من قصة هذا الغلام .

فقال الرجل : يأمير المؤمنين عندما كانت ام هذا الغلام حاملا به عزمت على السفر فقالت لي كيف تتركني وانا حامل

فوضعت يدي على بطنها وقلت "اللهم اني استودعك ابني هذا" ثم رفعت يدي وحزمت متاعي ومضيت الى سفري

ومكثت ماشالله لي ان امكث , فلما عدت من سفري ووقفت على باب داري اذا بأبناء عمومتي يحيطون بي ويعزوني

في امرأتي , فقلت لهم : فماذا فعل غلامها ؟

قالوا: ماتت وهي حاملا به .

ثم اخذوني في دار اكبرهم ووضعوا لي عشاء , وبينما نحن كذلك اذا بدخان عظيم يخرج من المقابر .

فقلت لهم : ماهذا !!!

قالو : هذا الدخان يخرج من قبر زوجتك منذ ان دفناها .

فقلت اني لأعلم انها صوامه قوامه كريمة الاخلاق ولا يخزيها الله ابدا .

قوموا معي نحفر القبر ونرى مالخبر ؟؟؟

فلما فتحنا القبر يأمير المؤمنين وجدت امرأتي جالسه وأبني هذا حي جالس بين قدميها وسمعنا مناديا ينادي من السماء

ويقول ( يامن استودعت الله خذ امانتك ) انتهت القصه

ملاحظه:

قال العلماء عن هذه القصة ( لو استودع هذا الرجل زوجته كما استودع ابنه لوجدها كما تركها ولكن ليمضي قدر الله

لم يجري الله على لسانه استيداع الام كما استودع الغلام)
مصدر القصة : صالح المغامسى ( شيخ سعودى )
سبحانك اللهم وبحمدك أشهد أن لا إله إلا أنت استغفرك واتوب إليك

أم أحمد المصرية يقول...

و بعدين بقي في جوجو و زمرده الاشقياء دول اللي كلامهم دايما في الجون
عندك حق حبيبتي في كل اللي قلتيه
ده حد المثل المصري للاسف بيقول
السلف تلف و الرد خسارة ... استغفر الله العظيم

انا لما حد بيستلف مني حاجةو يرجعها ايظة تغاظ جدا بس مش بعرف اقوله حاجة

اما لو مطنش يرجعها مممكن اطلبها خصوصا لو قريب مني مش بتكسف منه
و صدقيني يا موناليزة برجع اللي ستلفه بأسرع ما يمكن و انا اصلا مش بحب استلف كتير لكن يعني انا و جارتي اللي هي بردوا صديقتي ممكن نتزنق في ادوات مطبخ و نسلف بعض هو ده اقصي سلف عندي

akeed يقول...

احب اقول فى الاول ان الموضوع ده بيزعجنى جداً لأنى عندما اخذ اى شىء من اى احد ارجعه اياه فى اسرع وقت و لا اتأخر حدثت معى بعض المواقف منها صديق لى يوم زواجه استلف منى كرافته كنت احبها جداً و من ذلك الحين لم يرجعها منذ ثلاث سنوات فضايقنى ذلك جداً و ليس لقيمتها المادية ولاكن لأنى احبها .

و عندما يعطينى شخص ما شىء سلفته اياه ووجدته تالفاً فإنى لن اسلفة بعد ذلك ابداً لأنه لم يحافظ عليها الا لو كان شىء خارج عن إرادته فسوف اقدر ظروفه لأن نفس الموقف يمكن ان يحدث معى

ولو اتأخر على فى ردها ممكن اطلبها منه على استحياء ثم بعد ذلك لا اطلبها ولا اتعامل معه بالسلف ابدا لاننى عن نفسى اكره ان استلف اى شىء من اى شخص .

ولو حدث انى استلفت من اى شخص ارجعها فى اقرب وقت قبل الميعاد


تحياتى على الموضوع الرائع

ومازلتُ أتعلم يقول...

واحدة صاحبتى أخدت منى الساعة بتاعتى قبل كده
ورجعتها واقفة... ومكسورة كمان :((


* إذا استلف منك شخص ما شئ ما ورجعهولك بايظ هتتصرف معاه إزاى؟.
-------------------------------
ماقولتش حاجة بصراحة إتصدمت وسكت
بس بعديها بمدة كبيرةأوى
جات سيرة الساعة صدفة
فقلتلها أنا مش بلبسها علشان إتكسرت
من ساعة ماجبتيها

قالتلى وأنا أعمللك إيه حظك كده

(أنا أتفرست بصراحة من الرد)



*لو حد استلف منك حاجة واتأخر عليك بتطلبها منه ولا بتخجل؟.
-------------------------
لا بتكسف بصراحة أووى

بس مرة قبل كده
قلت لواحدة صاحبتى على مجلة استلفتها منى...قلتلها بشياكة كده علشان متزعلش

معلش أنا عايزاها علشان فيه حد طلبها منى تانى ضرورى.




* لو استلفت حاجة من حد بترجعهاله بعد قد إيه؟.
--------------------------
حسب إستخدامها...

يعنى لو كتاب مثلاً ولا شريط
فى ظرف يومين بكون ضاغطة على نفسى ومخلصاه ومرجعاه بسرعة

(مش بحب يبقى حد له عندى حاجة..)

Unknown يقول...

الموضوع ده أنا كنت بعاني منه و أنا صغير اثناء المدرسة و الجامعة كان زملائي يخدوا منى الحاجات و ميرجعوهاش
و أنا كنت بخجل اطالبهم بيها
لكن مع الوقت انا بقيت ناصح شوية

عين فى الجنة يقول...

اكتر حاجة بازعل عليها الكتب

Sweet Violet يقول...

* إذا استلف منك شخص ما شئ ما ورجعهولك بايظ هتتصرف معاه إزاى؟
اكيد باظت منه غصب مش متعمد يبقى مافيش تصرف غير انى اخفف عليه لان اكيد هيكون زعلان انها باظت منه

*لو حد استلف منك حاجة واتأخر عليك بتطلبها منه ولا بتخجل؟
لا الصراحة مش بطلب لان مش بعتبرها سلف اكتر من انها حاجة هو محتاجها و اعطيتها له

* لو استلفت حاجة من حد بترجعهاله بعد قد إيه؟
مش بحب استلف من حد اصلا ^_^

حــــــــــواء يقول...

ازيك ياموناليزا
بوست جميل كالعاده

* أذكر موقف مشابه تعرضت له من قبل؟.
بصراحه انا سده الباب بتاع خد وهات لانه بتيجي خساير منه كتير بين الصحاب
إلا لضروره اوي فانا اللي بعرض اللي عندي

* إذا استلف منك شخص ما شئ ما ورجعهولك بايظ هتتصرف معاه إزاى؟.
هقولك بإسلوب بسيط ومهذب وخالي من الاهزار ايضا
من اتلف شئ عليه اصلاحه
واذا اللي قدامي زعل يزعل براحته
واعرف صحبك وعلم عليه


* لو حد استلف منك حاجة واتأخر عليك بتطلبها منه ولا بتخجل؟.
بطلبها طبعا لانه حقي
انا مثلا فكيت زنقتك في حاجه كنت محتاجلها تيجي انت وتتأخر عليا او تقرفني عقبال مترجعه



* لو استلفت حاجة من حد بترجعهاله بعد قد إيه؟.
لو استلفت حاجه وده نادر ما بيحصل غير بيني وبين اختي
بارجعها هوا
ولو قضيت حاجتي منها برجعها في نفس اليوم لو الوقت يسمح


تحياتي

شموع يقول...

السلام عليكم
الأخت موناليزا
قصة رائعة تعلمنا قيمة المحافظة على الأمانة ولكن عن نفسى أكره الإهمال والإستهتار
دمت بكل الخير وأشكر لك دوام تواصلك

Ramy Wasel يقول...

اكيد كان بسيمع اغنيه
جوووجوو جو

هاههههههههههه

أذكر موقف مشابه تعرضت له من قبل؟.
اكيد بيحص لكل واحج

* إذا استلف منك شخص ما شئ ما ورجعهولك بايظ هتتصرف معاه إزاى؟.

بطلبه منه تانى وتالت
مش بزهق

*لو حد استلف منك حاجة واتأخر عليك بتطلبها منه ولا بتخجل؟.
ده انا اعوره
ليه يعنى
انا كروديا ولا ايه

* لو استلفت حاجة من حد بترجعهاله بعد قد إيه؟

لو كان عمل فيا الفصل ده قبل كده
بعذبه واوريه الويل والعذاب
انما لو كان محترم
برجعها حسب الميعاد

اللى تشوفه يقول...

السلام عليكم

وانا باعيش معاكى ف البوست دا
افتكرت تريقة صحابى
واحيانا حد من اهلى عليا زى زمردة كدا
لانى دايما بخاف اخد الحاجة اللى مش بتاعتى

وفرحت اوى لما زمردة رتبت لى افكارى بالفرق بين السلف والهدية والامانة
اصل ساعات الواحد بيبئا عارف الحاجة بس مش منظمها فى دماغه
انا طولت اوووى من قبل ما نتناقش فى اللى حضرتك طالباه
سامحينى بئا
أذكر موقف مشابه تعرضت له من قبل؟.

=ايه دا!!!
تصدقى فكرتينى بشرايط كنت واخداها من المحفظة بتاعتى
ياخبر ابيض!!
دا الانسان دا حاجة وحشة يعنى عمالة افتكر اللى ليا عند الناس وناسية نفسى
عامة جزاك الله خيرا..هوديهم لها ف اقرب فرصة باذن الله_طلعت جوجو
نكمل بئا
* إذا استلف منك شخص ما شئ ما ورجعهولك بايظ هتتصرف معاه إزاى؟.
=حصلت معايا فى اول شريط سمعته ل ا. عمرو خالد
ولغاية دلوقتى متغاظة
بس اعمل ايه
قدر الله وماشاء فعل
وع فكرة مش لاقياه على اى موقع

*لو حد استلف منك حاجة واتأخر عليك بتطلبها منه ولا بتخجل؟.

حسب اهمية الحاجة دى
بس فى الاغلب بسيبها لله
* لو استلفت حاجة من حد بترجعهاله بعد قد إيه؟.
ما خلاص بئا ربنا امر بالستر

بس والله بحاول اردها بسرعة

جزاك الله خيرا وتقبلى مرورى
==========================

النسر المهاجر يقول...

امة الله فى مواقف كتير لإتعرضتلها حتى من أطرف المواقف إنى مسلف واحد حاجه وإحنا أطفال ولسه مجدتش وده حصل حقيقى ههههههههههههههههه

لو سلفت واحد حاجه وجات بايظة عمرى معدت مسلفه حاجه تانية خالص إلا إذا كان العطل لسبب خارج عن إرادته فى الحالة دى أسلفه تانى عادى


لو حد إستلف حاجه وأخرها أكيد هطلبها منه لانها حاجتى ومن حقى إنى أخدها تانى

لو إستلفت حاجه برجعها فى الميعاد إللى إتفقت عليه إنى هرجعها ولو مفيش ميعاد فى أقرب وقت بعد إنتهاء إستعمالى ليها ولو باظت أكيد هجيبله غيرها

salwa يقول...

السلام عليكم اخت موناليزا
الامانة عرضها الله سبحانه و تعالى على الجبال و ابت
و قبلها الانسان,و يطالب بها يوم الحساب
اللهم اجعتنا ممن يؤدوا الامانات لاصحابها.........تسلم يدك
سلام

موناليزا يقول...

بنجاواتى
ـــــــــــــ
اهلا بيك يافندم
اشكرك جدا لرايك
لو كان الكتاب هدية فخلاص خليه معاك لكن للاسف لو كنت استلفته هيفضل فى رقبتك الى يوم الدين حاول تجد طريقة توصل بيها لصاحبك
اشكرك جدا لمشاركتك



*********************************



اى73
ـــــــ
اختى الحبيبة:سبحان الله حصلى نفس الموقف بس هى رجعتلى الكتاب هو اه بعدها بسنة بس الحمدلله انه رجع وبرضه معلمة عليه وانا زيك مش بحب اكتب فى كتبى
فلكِ ان تتخيلى كتابك معاكِ ومش عارفة تستفيدى منه:(
بيضايقنى برضه الاهمال جدا وخاصة لما تكون حاجتى يعنى واحدة تهمل فى حاجتها هى حرة لكن تهمل فى حاجة غيرها بتبقى بايخة جدا

ربنا يكرمك واشكرك جدا لرايك ولمشاركتك
ومتابعتك لباقى السلسلة يسعدنى جدا وللتسهيل عليكِ هتلاقيهم اول بوست فى اول كل شهر ابتداء من يناير 2009
نورتينى انوسة الجميلة وفى انتظارك دائما



*********************************




جيجى وورلد
ــــــــــــــ
اختى الحبيبة:اهلا اهلا بالقمر
وكأنك اول تعليق :)
اشكرك جدا لرايك
ايه ده! تصدقى انا كمان كده:)
وكله كوم وموبايلى كوم تانى:)
نورتينى حبيبتى وسعيدة جدا بمشاركتك



***********************************


هكذا علمنى سيدنا محمد صلى الله عليه وسلم
ــــــــــــــــــــــــــــ
وعليكم السلام ورحمة الله وبركاته
اهلا بيك يافندم
:) جميلة هى بداية تعليقك
اتفضل يافندم كلنا آذان صاغية
الله أكبر
لا اله الا الله
أول مرة اسمع القصة دى بس بجد جميييلة جدا
اللهم يا جامع الناس فى يوم لا ريب فيه رد عليا ضالتى
ربنا يعزك ويبارك فيك واشكرك جدا لمشاركتك



***********************************




ام احمد المصرية
ـــــــــــــ
اختى الحبيبة:تعرفى احلى حاجة بجد ان الواحد يضع نفسه مكان من يتعامل معهم ويشوف هيتصرف وقتها ازاى
نورتينى حبيبتى واشكرك جدا لمشاركتك



*********************************




أكيد
ـــــــــ
اهلا بيك يافندم
اسمحلى اسألك ليه ماطلبتهاش منه لغاية دلؤتى؟
مش يمكن فكرها هدية الزواج!

اشكرك جدا لمشاركتك




**********************************




ومازلت أتعلم
ـــــــــــــــ
اختى الحبيبة:معلش ياجميلة فداكِ
هو بصراحة رد يغيظ

تعرضت لموقف مشابه على فكرة:)

نورتينى ياجميلة واشكرك جدا لمشاركتك



**********************************



انترنتاوى
ـــــــــــ
اهلا بيك يافندم
ماهى الدنيا لازم تعلمنا
اشكرك جدا لتعليقك


**********************************


راجى
ـــــــ
اهلا بيك استاذ راجى
الحال من بعضه وعشان كده صعب جدا انى اسلف حد كتاب:)
اشكرك جدا لمشاركتك



*********************************


سويت فيوليت
ـــــــــــــ
اختى الحبيبة: والله انتِ طيبة وذوق
قليل اوى اللى بيجيب اعذار للناس
نورتينى حبيبتى واشكرك جدا لمشاركتك



**********************************



حواء
ــــــــ
اختى الحبيبة:انا الحمدلله بخير ازيك انتِ يا جميلة وايه اخبار فاطمة؟
ربنا يعزك يارب فماتوفيقى الا بالله

فينا من بعض كتير فى الموضوع ده على فكرة:)
نورتينى حبيبتى واشكرك جدا لمشاركتك


*********************************


شموع
ــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك ولمشاركتك


*********************************



رامى واصل
ــــــــــ
اهلا بيك استاذ رامى
هو فيه أغنيه كده أصلا؟:)
:) ردود قوية جدا
اشكرك جدا لمشاركتك



*********************************


اللى تشوفه
ــــــــــ
وعليكم السلام ورحمة الله وبركاته
اختى الحبيبة: عادى ياجميلة بتحصل كتير:)
طولتى ايه بس! بصى وانتِ هنا خدى راحتك على الاخر :)

:) فرحتينى بجد انك هترجعيهم لها

فعلا حاجة تضايق عموما فداكِ
نورتينى ياجميلة واسعدتينى بمشاركتك



*********************************



المهاجر
ـــــــــ
اهلا بيك يافندم
تفتكر الطفل ده هيتحاسب على حاجتك دى يوم القيامة؟
سؤال يشغلنى حقاً
اشكرك جدا لمشاركتك



***********************************


سلوى
ـــــــ
وعليكم السلام ورحمة الله وبركاته
اختى الحبيبة:آه لو يعلم الجميع كذلك
نورتينى سلوى الجميلة واشكرك جدا لمشاركتك

ذكرى رحيل قلم يقول...

السلام عليكم
الموضوع ده بعاني منه من ايام الجامعة كنت بشوف الخوة بخدوا الحاجة من بعض عنوة ويلقبها بلقب مصلحت يعني اخدته منه غصب عنه ونفس الوقت برضاه يعني هايعمل معاه زي كده
الحمد لله انا مش بحب اخد حاجة من حد واذا اضطررت الحاجة بتكون عنده علي طول اما لما بسلف بصراحة لما بتغيب اكتر من الحدود بطلبها لاني الحاجة بتتنسي وكمان انا عارفة اناللي واخد الحاجة مش بيستعملها
حد بيجوبك بصراحة زيي كدة اشك
بس انا بكلمك وبشرحلك الحياة اللي مرت عليا
مش هنتكلم بقي اخبارك ايه
دمنا بحب وواخلاص ومحبة

elsha3er يقول...

السلام عليكم


انا جيت اسلم واقول اسف على التأخير غصب عنى والله تعبان اوى


تحيتى


احمد الشاعر

جنّي يقول...

السلام عليكم

جميلة جدا القيم الاخلاقية التي التي تقدمينها خلال جوجو وزمردة ..

اما المواقف فانا أتضايق جدا لمن يأخذ شئ مني ولا يرده في الميعاد او يرده بحالة سيئة وخاصة الكتب او السيديهات .. وفي نفس الوقت احب ان اعامل الناس بما احب ان يعاملوني به ..

أم فريده يقول...

تصورى انا بعمل كدة انا وصحباتى لما بناخد حاجة من بعض مش بنرجعها بس احنا اتعودنا على كدة
ولو هى عايزاة تانى بتقول قبل ما ناخد الحاجة
وتقول انها عايزاها وهاتيها تانى
فبنرجعها

لكن غير كدة بنتبادل الحاجات عادى

لكن رجعهولى بايظ دى صعبة اوى
وعشان كدة لما تكون حاجة غالية عليا مش بديها لحد حتى لو هيزعل

ولو حد منى حاحة بطلبها عادى عشان انا مش بسلف حد غريب لازم يكون حد واثقة منه

تسلمى يا رب ويكرم ربنا على الموضوعات الجميلة دى

yoyo يقول...

صباحك سكر

تسلم ايدك و الله يا اختى
الموضوع دا بيتكرر كتير جدا
موضوع السلف دا موضوع محرج جدا
انا من الناس اللى مش بتحب انها تفرط فى حاجاتها مهما كانت بسيطة
لان كل حاجة لها ارتباط و موقف خاصة بيها معايا
بس المشكلة لما تتحطى فى موقف صعب انك ترفضيه
و تضطرى توافقى
ومش تترد حاجاتك و الله بيكون الموقف اصعب لانتى قادرة تطلبى الحاجة بتاعتك
وفى نفس الوقت جواكى زعل عليها
الموقف يتلخص فى ان الشخص مطالب برد الشىء مهما طال الوقت لانها امانه فى رقابته ليوم الدين

موضوع ارقام التليفونات فى ناس كتير بالفعل بتزعل منه
بس داالللى المفروض يكون اننا مش بتصرف فى شئ احنا مش نملكه

لو حصل و استلفت شىء اكيد بحاول ارجعه باسرع ما يكون
وان حدث و اتاخرت بعتذر لصاحب الشىء

اختى موضوع جميل يستحق التقدير
دمتى اختى بالف خير و سعادة
تحياتى
يويو

وحي القلم يقول...

السلام عليكم

برافو يا زمردة هم دول الاخوات ولا بلاش

---

* أذكر موقف مشابه تعرضت له من قبل؟.
مفيش مواقف مشابهه

* إذا استلف منك شخص ما شئ ما ورجعهولك بايظ هتتصرف معاه إزاى؟.

مش هازعل أوي لاني مش بسلف غير أعز صحابي

*لو حد استلف منك حاجة واتأخر عليك بتطلبها منه ولا بتخجل؟.

بخجل

* لو استلفت حاجة من حد بترجعهاله بعد قد إيه؟.

أول ما اخلصها

تقبلي مروري

ريمان يقول...

والله يا موناليزا انا لو حد استلف منى حاجه واتاخر فى ردها بكسف افكره انه اتاخر عليا

اما بالنسبه للموقف حصلى موقف سخيف قبل كده

مره واحده صاحبتى استلفت منى بنطلون قماش اسود بيتلبس تحت الاسدال ده بالنسبه للنقبات عشان لو طلعوا على رصيف او حاجه الرجلين مش تبان

المهم هى اصلا جسمها مش زى جسمى هى اتخن بس هى صممت تستلفه

انا اعطيتهولها واتحرجت

تصورى رجعتلى البنطلون شكله عامل ازاى؟

مقسوم نصين

والله بجد مقسوم نصين

بجد اضايقت جداااااااا ومش عاتبتها كمان اتحرجت

كان موقف بايخ بجد

rovy يقول...

حبيبتى موناليزا بجد انتى جميله قوى و كل اللى بتكتبيه جميل و هادف جدا ربنا يكرمك يارب و يجعله فى ميزان حسناتك ..

الحقيقه ممكن تحصل ان حد يستلف منى حاجه و يبوظها و ده بيضايقنى جدا خصوصا لو حاجه غاليه عندى او كمان حسيت بعدم اهتمامه و اعتذاره و يمكن كمان لأنى لو حد اأتمننى على حاجه بأحافظ عليها اكثر ما بأحافظ على حاجتى و الله بجد ده طبعى
و الحمد لله ..
لو حد استلف منى حاجه و نسى يرجعها بيكون حسب اهميتها عندى بصراحة ساعات بأتكسف اطلبها و ساعات بحاول افكره من غير ما احرجه الا لو حاجه بأعتز بها جدا فبأكون مضطره انى اطلبها و بأستغرب لما بلاقى انى انا اللى مكسوفه و اللى ناسى يرجع حاجتى واخذ الامور عادى جداا..
الناس انواع و ياريت كل الناس زمرده حبيبتى او حتى جوجو لأنه استمع القول فأتبع احسنه ..
ربنا يهدينا جميعا للخير و الحق

دمتى بكل الود

ارق تحياتى

موناليزا يقول...

ذكرى رحيل قلم
ــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
قصدك بيأخذوا الحاجة بسيف الحياء
ماتحرمش من تواجدك ولا من مشاركتك ياحبيبة قلبى
انا الحمدلله بخير بس عايزاكِ تطمنينى عليكِ
نورتينى ياجميلة واسعدتينى بتواجدك



***********************************



الشاعر
ــــــــــ
وعليكم السلام ورحمة الله وبركاته
اهلا بيك استاذ احمد بعد طول غياب
شافاك الله وعافاك
والف سلامة عليك
اشكرك جدا لزيارتك



*********************************




جنى
ــــــ
وعليكم السلام ورحمة الله وبركاته
اهلا بيك استاذ سعيد
:) ربنا يكرمك يارب أسعدتنى حقاً برأيك

أخلاق يافندم والله
اشكرك جدا لمشاركتك



********************************



حبيبة سى السيد
ـــــــــــــــ
اختى الحبيبة:اهو اللى بينكم ده يعتبر هدية لانها بتبقى عارفة وهى بتديلك الحاجة مثلا انك مش هترجعيها وهى نفسها بتبقى موافقة
ربنا يكرمك ياحبيبتى واشكرك جدا لمشاركتك



**********************************



يويو
ــــ
اختى الحبيبة:صباحك فل ياقمر:)
تسلميلى يارب من كل شر
متفقة معاكِ جدا فى كل ماقلتى
سعيدة جدا برأيك وتواجدك
نورتينى يويو الجميلة واشكرك جدا لمشاركتك




**********************************




مصعب صلاح
ـــــــــــــ
وعليكم السلام ورحمة الله وبركاته
اهلا بيك استاذ مصعب
:) مبسوطة جدا برأيك
اشكرك جدا لمشاركتك



********************************




ريمان
ـــــــ
اختى الحبيبة: غريب بجد الموقف لعدة اسباب
اولا: لان الطبيبعى ان المرأة تلبس بنطلون تحت ماترتدى سواء منتقبة أو لأ ضمان لسترها فى جميع الحالات (رحم الله المتسرولات)
ثانيا: حاجة زى دى ليه ماتشتريهاش وخصوصا ان مقاسكم مختلف وانه لاغنى عنه
ثالثا: كان شكلها ايه بجد وهى بترجعهولك بالطريقة دى؟
مش بقولك ليا حق استغرب:)
عموما فداكِ ياقمر
نورتينىريمو الجميلة واشكرك جدا لمشاركتك



***********************************




روفى
ـــــــ
اختى الحبيبة:اهلا اهلا بالغالية
:) أخجلتم تواضعنا
(اللهم لاتؤاخذنى بمايقولون واغفر لى مالايعلمون واجعلنى خيرا ممايظنون)
ربنا يعزك يارب فماتوفيقى الا بالله

طبعنا واحد على فكرة لدرجة انهم بيسمونى"أمانات":)

فعلا والله عندك حق انتِ ممكن تتحرجى وانتِ بتطلبى حاجتك وتلاقى اللى قدامك ممكن يزعل ويستغرب انك اصلا بتطلبيها!

والله أنتِ عسل:) وزمردة كمان بتحبك جدا:) وجوجو ربنا يهديه دايماً:)

تسعدينى دايما بتواجدك
يارب ماتحرم منك ابدا
نورتينى غاليتى ودمتِ فى رعاية الله

الفراغ يقول...

بوست جميل ويصحى قلوب كتيره بتخطأفى حق الناس وتنسىحتى تعتذر
بالنسبه لسؤلاتك
اللى بياخد حاجه منى وبيعدى وقت كتير ...بنسى خالص اطلبها
بس بعد كدا بفتكر مع اول انسان يعملها معايا وبقعد اطلبها تانى كتير
وبرضه نفس الحكايه مع اللى باخد منه حاجه وخصوصا الكتب...بنسى ارجعها بس بفتكر وانا بقلب فى كتبى كل فتره وباخدها ارجعهالوه علطول
وطبعا الامانه موجوده مابحطش خط قلم فى اى حاجه بخدها من حد لانى احترم خصوصيات الاخرين جدا

EMMY BABY يقول...

بجد والله جميل اوى الموضوع ومعمول بطريقة حلوة

أذكر موقف مشابه تعرضت له من قبل؟
كتير بيطلبوا منى نمرة حد ولما برفض بيزعلوا
برضه كتير ممكن يستلفوا منى حاجة ومش بيرجعوها وعادى يعنى الموضوع بالنسبالهم


إذا استلف منك شخص ما شئ ما ورجعهولك بايظ هتتصرف معاه إزاى؟.
بصراحة هكون متضايقة وهبينله انى اتضايقت بس مش هعلقله حبل المشنقة لانها اكيد ظروف خارجة عن ارادته مش بمزاجه

لو حد استلف منك حاجة واتأخر عليك بتطلبها منه ولا بتخجل؟.
لو حاجة مش مهمة عندى مش بطلبها ولو حاجة مهمة عندى ممكن افكره بيها كدة فى وسط الكلام بطريق غير مباشر

لو استلفت حاجة من حد بترجعهاله بعد قد إيه؟
انا عامة يعنى مبستلفشى من حد حاجة غير ممكن كتب غبرجعه ياما اول ما بخلصه ياما فى الميعاد اللى كنت محددة انى هخلص فيه حتى لو مخلصتش

تحياتى

ايمى

Butterfly يقول...

* أذكر موقف مشابه تعرضت له من قبل؟.
كتير على فكره بس مش متذكره موقف كامل دلوقتى :)

* إذا استلف منك شخص ما شئ ما ورجعهولك بايظ هتتصرف معاه إزاى؟.
يا هزعق يا هتضايق فة نفسى :)

*لو حد استلف منك حاجة واتأخر عليك بتطلبها منه ولا بتخجل؟.
لأ يطلبها وممكن أرعق فى المره التانيه كمان.

* لو استلفت حاجة من حد بترجعهاله بعد قد إيه؟.
على طول عشان مش بستحملها عندى أصلا
حتى فى حد كان ادانى حاجه وقالى خليها عندى مستحملش وادتهالوا تانى
قولتله مبحبش يبقى عليا حاجه لحد :)

موناليزا يقول...

الفراغ
ـــــــــ
اختى الحبيبة:اشكرك جدا لرايك
والله انتِ ذوق ده فيه ناس ممكن ترجع الكتب متقطعة كمان مش بس مكتوب فيها
نورتينى حبيبتى واشكرك جدا لمشاركتك




********************************




ايمى بيبى
ــــــــــ
اختى الحبيبة:اهلا اهلا بالقمر
ربنا يكرمك واشكرك جدا لرأيك
حساكِ طيبة ومؤدبة أوى:)
نورتينى ايمى الجميلة واشكرك جدا لمشاركتك


******************************





بيترفلاى
ــــــــ
اختى الحبيبة: اهلا اهلا بالقمر
وبعد ما بتزعقى طيب بتاخدى حقك ولا ايه:)
نورتينى حبيبتى واشكرك جدا لمشاركتك

على خطى الحبيب يقول...

السلام عليكم ورحمة الله.....

الموضوع جميل أكيد ويستحق للمناقشة, بهنييكى عليــه

نيجى بقى للمناقشة:
1/ بالنسبة للموقف فانا اذكر موقف زى دة حصل لكن مع أخى الكبير(رحمه الله), كان فى اخ جارنا وكدة واخد من أخويا "مكواه اللحام" لو تسمعى عنها يعنى وعطاها له بعد كام يوم من استخدامها وكانت تقريبا بايظة.
2/ وبالنسبة للتصرف فانا قلتله على اللى حصل "للمكواه" لانه كان عامل مش واخد باله , او بيستعبط يعنى :) .
3/ فى حاله التأخير الواحد بيبقى محرج يطلبها بصراحة, لكن فى ناس كدة "بتنام على الحاجة" ومتاخدهاش منهم غير بعد الحاح, ربنا يهدى.
4/ لو انا اللى استلفت بجد ومن غير م ازين الكلام والله"الحاجة طول ما هى معايا بتشوكنى لحد م ارجعها لصاحبها", يعنى مش من النوع اللى بيصبر على الحاجة و بينام عليها,لآ, اول م بخلص الغرض برجعها فى الحـــــــال.

يـــــاه,انتى خليتينى اتكلم كتير اوى!!! :) :)
مش بقولك موضوع جميل ويستحق المناقشة.

تقبلـــى مرورى...
مع خالص تحيــــاتى.....

المعتصم يقول...

بسم الله الرحمن الرحيم
السلام عليكم ورحمة الله وبركاته
اختنا الكريمه موناليزا
تحياتى
ايه ده بقى ؟؟؟؟؟؟؟؟؟؟؟
انا كتبت تعليق اول امبارح
ودخلت امبارح مالقيتوش
وعلشان كده استغربت وسألت
(ولو انى مش فاكر السؤال اللى انتِ مش فاهماه ده كان ايه بالظبط)
لااااااااااااا
بقولك ايه
احنا صعايده صحيح انما ماينضحكش علينا
انا عاوز التعليق بتاعى هه والا هجيب الرجاله بالسلاح ونيجى نحتل بلوجر
هههههههههههههههههههههه
*************
باختصار
كل الاسئلة دى ممكن تحصل مع اشخاص مختلفين
وبالتالى ماينفعش انى اعمم الاجابه
لانها هتختلف من شخص لاخر على حسب معزته وقربه وشخصيته
اما الموقف :
مرة واحد جالى وقالى انه مسافر مشوار 3 ايام ضرورى جدا ومش معاه فلوس يسيبها لمراته علشان ابنه تعبان ولسه كاشق له عند الدكتور وعاوز مبلغ كده
طبعا انا عرق الشهامه نقح عليا واديته اكتر من المبلغ اللى كان عاوزة
وبعد اسبوع شوفته ورايح اسأله عن ابنه العيان
اول ماشافنى ارتبك وساب الناس اللى كان واقف معاهم ومشى ولما ندهت له عمل انه مش سامعنى
بعدها سألت الناس اللى كان معاهم قالولى لا ابنه اتحرق ولاهو سافر اصلا ولا اى حاجه من ده حصلت
بس
انا اعمل ايه بقى ؟؟؟؟
روحت رايح له الشغل بتاعه
وبص لقينى فوق دماغه
-ياإما تجيب الفلوس بالذوق ياإماهعملك زيطه هااااه قلت ايه
والحمد لله جاب الفلوس وانا اتعلمت الدرس
تقبلى تحياتى ودمتِ بكل خير وود
والسلام عليكم ورحمة الله وبركاته

على عبدالله يقول...

السلام عليكم

حصلت كتير مواقف زى دى !
بس كانت فلوس
مش باستلف لا باسلف وبعدين بشوف الويل !
عشان كدا لما بسلف حد باستعوض ربنا !!
مش عاوزة سلفة ؟!
:)
الكتب بالذات ما بحبش اسلفها لاى حد ..
لانها مش بترجع زى ما كانت !

جميلة سلسلة جوجو و زمردة

تحياتى

موناليزا يقول...

على خطى الحبيب
ـــــــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك اشكرك جدا لرايك فماتوفيقى الا بالله

وكان رد فعله ايه لما واجهته بأنها بايظة؟

فيه ناس كتير للاسف بتاخد وتنسى وكمان ممكن تزعل لو انت طلبت بحاجتك!

ده كتير!!
يافندم خد راحتك واتكلم زى مايعجبك فنحن يسعدنا مناقشتكم
اشكرك جدا لمشاركتك



********************************




المعتصم
ـــــــــــ
وعليكم السلام ورحمة الله وبركاته
اهلا بيك يافندم
بداية انا فى قمة خجلى واعتذارى منكم نظراً لانى لم أفهم تعليقكم جيداً وبالتالى توقعت انه ليس للنشر
حقيقى انا اسفة جدا
***
اكيد عارف بشهامتك وعشان كده عمل معاك الحركة دى:)
بس عجبنى تصرفك وانك ماسيبتش حقك
اشكرك جدا لمشاركتك ويسعدنا زيارتك دائما




**********************************




على عبدالله
ـــــــــــ
وعليكم السلام ورحمة الله وبركاته
اهلا بيك استاذ على
لا يافندم الف شكر:)
اشكرك جدا لرايك ولمشاركتك

غير معرف يقول...

موناليزا الحبيبة
المواقف كثيرة ولم يحضرنى موقف بعينه
اما لو حد استلف حاجة ورجعها خسرانة
طبعا بتحصيل معايا كثير فى الشرايط وكثير يكون عتاب خفيف وكثير لااكرر
اعطاء شىء لهذا الشخص
اما لو حد استلف حاجة كثير بطلبها
وان كانت غير ذات اهمية لااهتم بطلبها
بالنسبة لى انا لو اخذت حاجة واكثرها بتكون شرايط اوسيديهات للعلم لااحنفظ
بها كثيرا ولو حاجة اصابها ضرر
اشترى غيرها فورا
تحياتى على العرض الطيب
واسالكى الدعاء بالشفاء

بنت الصالحين يقول...

: )

أول مرة أقرأ لجوجو وزمردة

انتِ عارفة بسبب النت ياقمر وبعدي عن المدونات

بس ماشاء الله قيّم رائعة وأسلوبك أروع

رحيق الحياة يقول...

فاكرتيني بالذي مضى

عارفه, أنا عمري ما إستلفت حاجه و الله عشان أنا الكبيره في إخواتي و البنت الوحيده فإلي بطلبه بلاقيه بس المشكله في إلي يستلفوا من عندي, يعني مثلا لما بنات عمي يجوا عندي, إلي تاخد حاجه و التانيه حاجه إلخ إلخ... العيب فين بقى... إني لما أعوز أرجع الحاجه بخجل إني أقولها...

يمكن المره الوحيده إلي عملت فيها حاجه مش عجباني لحد دلوقتي إني في مره روحت بلدي بعدين رجعت إيطاليا فنسيت ساعة غاليه عليا جدا جابهالي بابا الله يرحمه, فعملت إيه؟ قلت أتصل ببنت عمي تاخدها و تلبسها لحد مرجع عشان مش عايزاها تبوظ و أهو تلبسها بنت عمي... لما رجعت تونس و في مره شفتها لبساها, و إحنا بنتكلم قالتي ميرسي يا رغده على الساعه, و الله بتنفعني أوي, و أنا زي الهبله لا شكر على واجب يا حبيبتي.. بس كنت متغاظه أوي عشان مقولتش إني حديهلها على طول, كمان هي هديه من عند بابا, في اخر يوم و أنا بوضب الشنطه شفت الساعه محطوطه على جنب و بتناديلي, خدتها و لا حد شاف و لحد دري... هي بصراحه ساعتي و بحبها... و الأطرف من ده إن لحد النهارده مش واخده بالها إنها مش موجوده و قالتلي يلا ضاعت ماكنتش من قلبك لما إديتيهالي...

لما بفتكر بتغاض أوييييييييي

طب العيب فيا و إلا في مين؟؟؟

تسلم إيدك و كلامك جميل جدا

أختك في الله رغده

موناليزا يقول...

ام مالك
ـــــــــــ
اختى الحبيبة:الف سلامة عليكِ
وربنا يخفف عنك يارب ويجعله فى ميزان حسناتك
نورتينى حبيبتى واشكرك جدا لمشاركتك




********************************




عاشقة الفردوس
ــــــــــــــــــ
اختى الحبيبة:سعيدة جدا برأيك
نورتينى حبيبتى وفى انتظارك دائما





*********************************





رحيق الحياة
ـــــــــــــ
اختى الحبيبة:حاسة بيكِ جداً وخصوصا لما تبقى حاجتك اللى بتحبيها وتلاقيها مع حد مش حاسس بقيمتها
نورتينى رغدة الجميلة واشكرك جدا لمشاركتك

هدى التوابتي يقول...

السلام عليكم..أختي العزيزة..عايزة تعرفي دم المصريين رخيص أوي كده ليه..عشان المصريين رخصوه ...
نرجع لموضوع التدوينة بتاعك..بجد آخر حاجة بينتبهلها الناس الآن ..الأمانة...وبجد جزاكي الله خيرا على الموضوع الرائع بتاعك

TIMMY !! يقول...

السلام عليكم

هي فعلا مشكلة كبيبرة لما حد ياخد مننا حاجة و ما يرجعهاش ,

الموضوع ده حصل معايا كتير في الفلوس ,

لم احد يستلف مني فلوس و يطول قوي ,

و أنا ما أقدرش أقول له رجعها , المفروض إنه يحس على دمه و يرجعها لوحده ,

الواحد بيستعوض ربنا فيها ,
و بيحاول إنه يتجنت إنه يسلف حاجاته سواء فلوس أو كتب لحد ,

الازهرى يقول...

دم المصرى اصبح رخيص
ببساطة لانه اتنازل عن حقة فى كل حاجة موجودة حواليه
حتى اللى تخصه جدا
وبالتالى اصبح بامكان اى انسان انه يحصل منه على تنازل عن دمه
وبقى من غير تمن

****************
اما بالنسبة لو انسان اخد منى شىء واتلفه فده حصل عدة مرات وبكل بساطة باقول الحمد لله
لكن وده بيحزنى بابدأ اعامله بحذر اكبر من الاول

تحياتى دوما

♥نبع الغرام♥♪≈ يقول...

السلام عليكم

حبيبتى اخبارك ايه
معلهش اتاخرت عليكى لسه راجعه من السفر امبارح


وقلت اجاى اطمن على الحبايب
طمنينى عليكى

انوسه

موناليزا يقول...

دودى
ــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
نورتينى دودى الجميلة وفى انتظارك دائما








********************************






تيمى
ــــــــ
وعليكم السلام ورحمة الله وبركاته
اهلا بيك يافندم
عندك حق
اشكرك جدا لمشاركتك









******************************






الازهرى
ــــــــــ
اهلا بيك يافندم بعد طول غياب
للاسف انا مش مقتنعة بأى اجابة ممكن تتقال

====
فعلا هى حاجة تضايق
اشكرك جدا لمشاركتك




*********************************





عاشقة الاحزان
ــــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير ازيك انتِ ياقمر
حمدا الله على السلامة ياحبيبتى
وانا اقول النور على بلوجر زاد اتارى انوسة الجميلة وصلت:)
كلك ذوق ياحبيبتى
ويارب تكونى استمتعتِ هناك
سعيدة جدا بتعليقك

نسيبه يقول...

السلام عليكم ورحمة الله وبركاته
بوست جميل ما شاء الله فعلا والمواقف المشابهة كتير فعلا وأد إيه بأتدايق لما حد يستلف حاجه وما يرجعهاش أو يبوظها والحقيقة بأكون علي إستحياء شديد وأنا بأطلبها وده حصل مع واحدة جارتنا هو للأسف من خلال كذا مرة لما يأخذو حاجه ما يرجعوهاش إلا لما نطلبها فاءستلفت مني كذا شريط دعوي عليه دروس عزيزة علي أوي لشيخ أحسبه علي خير وخطب مهمه والمشكله إنها مش في المكتبات العاديه لأنها بتتسجل يوم الدرس وتتباع بعدها أمام المسجد المهم أخدتهم ووصيتها جامد إنها تحافظ عليهم وإنهم غاللين عندي وكل حاجه وكانت النتيجه أولا ما جابتهومش إلا لما طلبتهم كذا مرة ثانيا في كذا شريط ضاعو وتقريبا واحد باظ علي ما أذكر وهي قعدت تعتذر وتعرض علي المال بس هأجيب بيه إيه حاولت ألتمس لها العذر بس قلت في نفسي أني لا أعطيها شيء بعد ذلك بس خلاص الشرايط راحت ربنا يعوضني

موناليزا يقول...

نسيبة
ــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
ربنا يكرمك واشكرك جدا لرايك
فعلا مواقف كثيرة بايخة ممكن نتعرض لها بسبب السلف
نورتينى غاليتى وشكرك جدا لمشاركتك