الخميس، 5 نوفمبر 2009

بتحبها ولا...

إذا كنت محتار ولا تعلم حقيقة مشاعرك تجاه هذه الفتاة0 فسنعرض عليك هذه الأسئلة التى من خلال إجابتك عليها ستحدد مشاعرك الحقيقية تجاهها هل حب حقيقى أم مجرد إعجاب أم تسلية وتضييع وقت وزيها زى غيرها.
* هل تسامحها؟.... هل تشتاق لرؤيتها؟.... هل تعفو عن هفواتها؟... هل تتجنب مضايقتها؟...هل تشعر بقدومها قبل أن تأتى ودون أن تعلم مسبقاً إذا كانت ستأتى أم لا؟...هل تسعد لرؤيتها؟...هل تغضب لرحيلها؟...هل تشعر بالوقت معها؟...هل تسعد لمحادثتها؟... هل تختلق سبباً للوقوف معها أو التحدث إليها؟...هل تعودت على رؤيتها؟...هل تضحى من أجلها بموعد هام مثلاً؟...هل تحاول معرفة سبب حزنها أو غضبها مثلاً؟... هل تصالحها لمجرد شعورك بأنها غاضبة من تصرف منك غير مقصود؟...هل تتمنى أن تهتم بك؟...هل تتمنى أن تأتى للتحدث معك دون أن تطلب منها ذلك؟... هل تحلم بها؟...هل تستوعب جميع تصرفاتها وتختلق لها الأعذار؟...هل تحترم رغباتها حتى لو كانت ضد رغباتك؟...هل تهتم بها إهتمام خاص؟...هل تتحملها مهما فعلت؟...هل تتمنى أن تكون رفيقها دائماً؟...هل تتمنى أن تقضيا معاً رحلة أو نزهة مثلاً؟...هل تسعد إذا ألقت التحية عليك؟...هل تسأل عنها؟... هل تهتم بمعرفة أحوالها؟...هل تغار عليها؟...هل تتغير حالتك النفسية من الأحسن إلى الأسوأ لمجرد رؤيتها أو الحديث معها؟...هل عيناك تبحث عنها؟...هل غضبك منها يقلل من قيمتها لديك؟...هل تشغل تفكيرك رغماً عنك؟...هل ترتب مواعيدك بحيث تتناسب مع رؤيتها؟...هل تتمنى أن يرن جرس الهاتف فتجدها؟...هل تتمنى أن تفتح إيميلك فتجد رسالة منها؟...هل تستطيع رفض طلب لها؟... هل تتفقد وجودها؟.
إذا كانت معظم الإجابات لصالحها فأنت تحبها.
وإذا كنت تحب بصدق فستعترف بهذا أمام الجميع دون خجل.
وفى هذه الحالة عليك أن تتبع الطريقة المستقيمة لتصل إليها سريعاً. حيث أن أقصر طريق مابين نقطتين هو الخط المستقيم.
لو بتحبها بجد لا تجعلها تعمل أى حاجة غلط . مهما كانت بالنسبة لك بسيطة.
لا تجعلها تفعل شئ من وراء أهلها.
لا تجعلها تنجرف فى مشاعرها لتنهل منها ما شئت.
لا تجعلها تندم فى يوم من الأيام على معرفتها بك.
لا تجعلها تغضب الله بكلماتها لك وخروجها معك وما إلى ذلك.
أخى المُحب أدخل البيت من بابه واجعلها زوجتك.وهذة وصية النبى عليه الصلاة والسلام حينما قال"لا أرى للمتحابين غير النكاح". وإذا لم تستطع الآن لأى ظرف تمر به فعليك بالصيام والدعاء والتقرب من الله. فهو وحده قادر على كل شئ. ولو كان لكم نصيب فى بعض مفيش قوة فى الدنيا ممكن تفرقكم والعكس صحيح. وبما أنها كده يبقى تغضب ربنا ليه؟؟.هذه سُنة كونية لن يحدث شيئاً إلا إذا أراد الله لها أن تكون.
خليك دايماً معاه واتقيه دايماً فى أفعالك.
ولا تنسى أنه من ترك شيئاً لله عوضه الله حرمانه ومن استعجل شيئاً قبل آوانه عُقب بحرمانه.
فالدنيا زائلة ولن يبقى إلا ماقدمته يديك فعليك أن تختار يا إما جنة يا إما نار.
أسأل الله أن يقرب ويجمع بين قلوب الأحبة فى طاعته اللهم آمين.
أقول قولى هذا وأستغفر الله لى ولكم.


***************
سؤال جانبى
* أيهما تفضل زواج الحب أم الزواج التقليدى؟.
* هل العلاقة العاطفية قبل الزواج تؤثر على الزوجين؟.

هناك 50 تعليقًا:

العلم نور يقول...

موضوع وأسئلة أكثر من رائعة ..
وعن نفسي أفضل الزواج عن الحب فهو يعيد التوازن للعلاقة ويسهم في نسي الخلافات الزوجية الماضية والمستقبلية.

(Joudy) يقول...

الموضوع حلو أوى أوى ويارب الشباب يفهم زيقدر ده ويعرف الصح فين والخطأ

بالنسبة للأسئلة اللى بحب ديما مش أفوتها هجاوب وأقول:

أنا أفضل الزواج عن حب ومش بعترض على التقليدى

أنا رأيي إن العلاقة العاطفية بتأثر بالايجاب لو كانت بجد محترمه ومش فى حاجة تغضب ربنا زى إن الخطيبة تحب خطبها ومش لازم يعنى تعبيرات الحب الحارة وأحيانا بيكون بالسلب

دمتى بكل الخير والسعادة

ريمان يقول...

موناليزا


جميل اوى اوى البوست بجد


بالنسبه ليا بصراحه موضوع الجواز التقليدى مش دايما بجد بيكون ناحج


واناش وفت نماذج كتير كده قدامى


اللى بيكون عن حب او على الاقل قبول وتفاهم بين الطرفين بيكون ناجح باذن الله لان بيكون فى تفاهم وموده


بالنسبه لعلاقه الحب ممكن تاثر عليهم بعد الزواج او لاء
اه بتاثر

سواء بالسلب او بالايجاب بس على فكره السبب فى التاثير السلبى هو الراجل مش الست

لانه بيعايرها طبعا انها كلمته قبل الزواج واحبته انما لو راجل مقدر لمشاعر الحب هيحبها اكتر واكتر ومش ممكن يقولها كلمه زى دى

يعنى مش هيكون غبى بمعنى اصح

بس عارفه

مفيش حاجه مضمونه فى الزمن ده

خصوصا الرجاله

الا من رحم ربى

مساءك سكر يا جميل

ستيتة يقول...

مش عارفة يا مونا
انا اتجوزت تقليدي على حب
حاجة لخبطيطة كده
واظن ما تجنب المحبين الحرام فان شاء الله ها يكون الجواز ناجح
وحبهم ها يكبر بعد الجواز
علشان الإحترام كقيمة لم يتم المساس بيها
اللي انا متأكده منه ان اللي يصلح لفرد لا يصلح لآخر
وان بينا جميعا فروق فردية
ولكن تظل الثوابت شامخة
كل ما هو حلال يجب الزيادة منه قدر الطاقة
وكل ما هو حرام يجب ان ننهى نفوسنا عنه قدر الطاقة
وربنا يغفر لنا ويعفو عنا ويعيننا على حسن طاعته
تحياتي

حلم بيعافر يقول...

والله موضوع كويس
الزواج عن حب بيتهيالى احسن وافضل وبتهيالى كمان الحب قبل الزواج بياثر على العلاقة الزوجية
تحياتى

كلمات من نور يقول...

حب قبل أم بعد الزواج؟

زواج عن حب أم تقليدي؟

في الزمن العجيب اللي احنا عايشينه والله أنا شايفه إننا لازم نرجع لديننا و نشوف رسول الله صلى الله عليه وسلم كيف تزوج من خديجة ونشوف ازاي الرسول أمر صحابته فيما يخص الخطبة والزواج

حنلاقي إن رسول الله صلى الله عليه وسلم والسيدة خديجة تزوجا عبر مشاعر رقيقة نمت في قلب السيدة خديجة ثم جائت واسطة الخير بينهما وكانت زيجة من أجمل زيجات الأرض

صلى الله على محمد صلى الله عليه وسلم ورضى الله عن أمهاتنا ...زوجات رسول الله.........

romansy يقول...

اسئله كتير قوى قوى
بس الاجابه بتكون
فى حديث النبى عليه الصلاه والسلام

فاظفر بذات الدين تربت يداك
لو لقينا الانسانه اللى تكون امى واختى وحبيبتى
مش هسيبها ابدا واهم حاجه اخلاقها

الجواز التقليدى بيكون مفيد احيانا
بس انا مش بفضله الا بقى لما يكون الانسان مش بيحب ولا فى دماغه اى حد

عاشق الجنة من الإخوان صلى على النبى يقول...

بجد مقال رائع ومدونة أروع
وبصراحة وللأسف انا طلعت بحبها قوي قوي
ههههههه
بجد جزاكم الله خيراً
في انتظار زيارتك عشان تنوري مدونتي
صلي علي النبي

عاشق الجنة من الإخوان صلى على النبى يقول...

أفضل الزواج التقليدي
لأن الحب قبل الزواج معناها باختصار علاقة حرام
صلي علي النبي

الزنارى يقول...

عرضت على نفسى كل هذة الاسئلة
و فى النهاية تعجبت فأنا لا أعرف عمن كنت أسأل .
ههههههههه.
أشكرك على الموضوع

موناليزا يقول...

الشجرة الأم
ــــــــــــ
أختى الحبيبة:اهلا اهلا بالقمر
ربنا يكرمك أشكرك جدا لرايك
وجهة نظرك تُحترم
نورتينى حبيبتى واسعدنى تواجدك


*********************************


جودى
ـــــــ
أختى الحبيبة:اهلا اهلا بالقمر
ربنا يكرمك يارب أشكرك جدا لرايك
:) يسعدنى دائماً مشاركتك
رأى عقلانى أحييكِ عليه
نورتينى جودى الجميلة واسعدنى تواجدك


********************************


ريمان
ــــــ
أختى الحبيبة:اهلا اهلا بالقمر
أشكرك جدا لرأيك ياجميلة
عندك حق مافيش حاجة بقت مضمونة
أسأل الله لنا جميعا صلاح الاحوال
مسائك ورد معطر محمل بكل الخيرات:)
نورتينى ريمو حبيبتى واسعدنى تواجدك


**********************************


ستيتة حسب الله الحمش
ــــــــــــــــــــ
أختى الحبيبة:اهلا اهلا بنبض الحكمة
انا قرأت مدونتك من الأول وتقريبا عارفة الحكاية من أولها:)
وعجبتينى جدا على فكرة:)
أوجزتى وأفدتى
تسلملى مشاركتك دايما
نورتينى حبيبتى واسعدنى تواجدك



********************************


حلم بيعافر
ـــــــــــ
أختى الحبيبة:اهلا اهلا بالقمر
أشكرك
وجهة نظرك تحترم
نورتينى حبيبتى واسعدنى تواجدك


********************************


كلمات من نور
ـــــــــــــ
أختى الحبيبة:اهلا اهلا بالغالية
طب ياريت بجد نرجع للدين فى كل حاجة
نورتينى ياجميلة واسعدنى تواجدك


********************************


رومانسى
ــــــــ
أهلا بيك يافندم
الله يفتح عليك
عاجبنى ردك جدا
ان شاء الله ربنا يرزقك بالزوجة الصالحة
أشكرك جدا لمشاركتك


*******************************


عاشق الجنة من الاخوان صلى على النبى
ــــــــــــــــــــــــــــــــ
اهلا بيك يافندم
الله يكرمك فماتوفيقى الا بالله
وليه بس للأسف اتكل على الله واتبع النصايح المرفقة مع الموضوع فى الاخر:)
انا فعلا بزور مدونتك ولكن للاسف لا اترك تعليق
أشكرك جدا لمشاركتك
صلى الله على محمد صلى الله عليه وسلم


********************************


احمد
ــــــ
أهلا بيك استاذ احمد
:)
الشكر لله انا اللى بشكرك على مشاركتك
نورت مدونتى

ليس فقيرا من يحب يقول...

السلام عليكم

ازيك يا روح قلبى انتى

يارب تكونى بخير دايما موضوعاتك بتكون جميله وكمان بتخلى الواحد يشغل مخه احسن من الصدا اللى ملاه هههههههههه
ربنا يسعد قلبك ويكرمك يارب

بالنسبه للاسئله

صعب شويه تفضلى طريقه عن التانيه
لان فى الاخر مفيش حاجه ثابته او مؤكده
فى ناس اتجوزوا جواز تقليدى وجه معاه الحب والسكن والموده والرحمه وبقت حياتهم
من اروع ما يكون وفى ناس اتجوزت جواز تقليدى وحصل العكس تماما
وهكذا فى الجواز عن حب هتلاقى ده وهتلاقى ده بس اعتقد ان لو الجواز عن حب ممكن يخلى كل طرف يتقبل التانى بعيوبه وزى ما بيقول حبيبك يمضغلك الظلط فلما هتبقى حابه اللى قدامك هتتحمليه يمكن لو مبنكمش الحب ده متقدريش تتحملى اخف عيب منه فى الاخر هيا شخصيات ونصيب كمان

وبعدين الجواز عن حب هيأثر على العلاقه الزوجيه اكيد ممكن يرفعها السما ويتحول بيت الزوجيه لجنه ربنا على الارض لو الزوج ذكى ومتفاهم عنده ثقه فى نفسه وفى نصه التانى

وممكن خليها فى الارض لو الزوج عكس كده

وبعدين ايه الرغى الكتير ده
امشى بقى يا رانيا

ههههههههههههههههههههه

ربنا يسعدك يا حبيبتى

Butterfly يقول...

موضوع جامد جدا اسمحيلى أعمله share
بالنسبه للسؤالين
أنا أفضل زواج الحب أكتر

ايوه هتأثر بحيث ان العلاقه هتبقى أحسن

أمل حمدي يقول...

موضوعاتك رائعة

تسلمي يارب


دمتي بود

singamaraja يقول...

Reading and visiting your blog

Unknown يقول...

نصــــائح غالية
إجابة السؤال الاول
الزواج التقليدى طبعاً
(وعن تجربة لكم مهول من
المحيطين بى)
إجابة السؤال الثانى:
أكيد بيؤثر:أما سلباً او ايجاباً!

المعتصم يقول...

السلام عليكم ورحمة الله وبركاته
الموضوع ده كبير
يالهوى حب!!!!!!
يبقى انا اروح اصلى الظهر وابقى ادخل اعلق بالليل
انا قلت بس ادخل اثبت حضور
ســــــــــــــــلام

د. ياسر عمر عبد الفتاح يقول...

والله موضوع جميل بجد
فعلاً بستغرب جداً لما اتنين بيبقوا حابين بيدأوا حياة جديدة مع بعض
ونفسهم ربنا يوفقهم فيها
ويبدأوها بمعاصي وخيانات للأهل لما يعملوا حاجة من ورتهم

لا أرى للمتحابين إلا النكاح

جزاكِ الله خيراً

(المهاجر الى الله) يقول...

السلام عليكم ورحمة الله وبركاته:
اوباااااااا ، يا ما شاء الله ، محادثات ونظرات وتاملات وكمان فيها رنات وايميلات ورسايل والذى منه ، دا ايه الحلاوة دى ،شوفى انا حصل معايا كده
كنت باحس بالاحاسيس دى كلها واكتر منها لما كنت فى سادسة ابتدائى ، مع واحده اسمها سمر وتانى لقيت نفس الاحاسيس بتروح لواحده تانيه اسمها اميرة ، وفى اليوم التالت لقتنى باروح بمشاعرى للاولى وفى الرابح لقيت احاسيسى بتروح لواحده شوفتها لمرة واحده فى الشارع وكانت فى الاعدادى
وهكذا وهكذا الخ الخ .
مفيش اسهل من ان الانسان يشعر بكل المشاعر دى مرة واحد لاكتر من واحدة ، وكذلك البنت ، يعنى كان حب وللا مكنش حب
يعنى اللى حصل فى الابتدائى لو كنت سمحت بيه فى الجامعة كان هيبقى حب
(قبل الزواج)؟؟
طبعا ميه فى الميه مكنش حب بالمعنى اللى المفروض يكون للحب ، بس الاول لازم نعرف ايه هوه الحب ، وعشان نعرف الحب لازم احكى الحكاية دى
( لما خلق الله سبحانه وتعالى ادم ، واسكنه الجنة ، وبرغم كل ما فيها من نعيم وترف ولذة من كل شىء ، الا ان ادم استوحش الجنة ( وياريته ما استوحشها)فخلق الله له حواء وهو نائم _وهذا اول الحب _ فلما استيقظ ادم وجد حواء بجواره فسألها من انتى ، فقالت حواء فيادرته الملائة ونادت عليه لما رات حواء بجواره قائلة
يا ادم من هذه ، فقال امراءة .
فقالوا وما امراءة ، فقال مؤنث امرىء
فقالوا ما اسمها ، فقال حواء
فقالوا وما حواء ، فقال لانها خلقت من شىء حى
فقالو يادم اتحبها ، فقال نعم
ثم نادت الملائكة حواء وقالوا لها يا حواء من هذا ، فقالت ادم ، فقالوا لها وما ادم ، فقالت لانه خلق من اديم الارض ، فقالوا يا حواء هل تحبيه فقالت لا.)
كذبت حواء فى مشاعرها برغم انها تحب ادم باربع وعشرين ضعف ما كان ادم يحبها الا انه عوج المراءة الذى هو اجمل ما فيها . واول الحب هو الرفق ، فقد خلق الله حواء من ضلع ادم وهو نائم فلا يشعر بالم فيكرهها ، فعلمنا الله سبحانه وتعالى الرفق فى المعاملة ، واذا ما علمنا انه لم تكن هنا شهوه جنسية لدى ادم وحواء ولم يكن قد اجراها الله فى اجسادهن ، فقد الونس والالفة والكلمة الطيبة هى افعال الحب
الحب نفسه عباره عن طاقه محدودة تجددها مرتبط بعوامل الحفاظ عليها ، اما اهدارها فى اوزع مشاعرى واحاسيسى يمين وشمال
واخوض تجارب واقابل بنات ورنات وتفير وسهر الليالى ، يبقى يوم ما هاجى اتجوز مش هلاقى فى رصيد المشاعر حاجة اديها لمراتى ، لازم نفهم كويس ان الحب امانه اودعها ربنا فينا حتى نمنحها لمن يستحق ، مش البنت تسرح على حل شعرها ولما حد ييجى ينصحها تقول بحبه ياباب ، والواد عايشلى دور قيس وعنتر وعمالين يسحبوا من الرصيد ومش واخدين بالهم ان بيقل يوم ورا يوم ، لحد مايوصل للصفر.
طبعا العلاقة اللى قبل الزواج بتاثر بالسلب بعد الجواز ، ومفيش حب قبل الزواج .
بمعنى انا ممكن اصلى من غير وضوء ، هل الصلاة صحيحة ، لاءطبعا ، اهو الحب قبل الجواز زى الصلاة من وضوء هيه هيه حركات الصلاة وافعالها واحاسيسها ومشاعرها لكنها باطلة غير مقبولة .
اهدرت مجهود بدنى وذهنى وهاعيد من تانى بس لما اتوضاء ، وصلت الفكرة.
وعشان كده لازم انهارده نسمع ونشوف حالات طلاق بعد تانى يوم وسادس يوم وبد شهرين اتنين ، مع انهم طول سنين قبل الجواز عايشين احلى قصة حب ، وهيه الحقيقة احلى قصة غش وتدليس وكذب وخداع ومكر وخيانة وفى الاخر الطرفين يتجملوا ويلبسوا اكتر من قناع وكل واحد يبقى شايف التانى فى ابهى صورة فى ملبسة وكلامه وتعامله ، وبعد الجواز كل الاقنعة دى بتنزل شوية شوية وتبدا الخلافات بسرعة وتنشب الحرب ... والطلاق هو الحل .
الشباب مش بيفكر مطلقا انه يتجوز واحده حس مجرد احساس انها عندها استعداد تخرج معاه او تكلمه وتعيش معاه قصة
اه ممكن يتسلى بيها شوية لكن يتجوزها لاء ،

(المهاجر الى الله) يقول...

سيدنا محمد علية الصلاةوالسلام سال السيدة فاطمة الزهراء .. ماهو علاج المرأة ؟ فقالت الا ترى الرجال والا يراها الرجال .
طيب الناس دى كانت بتتجوز ازاى ، كان فيه بقه بينهم قصص حب وعشق وغرام وممكن خالد بن الوليد كان يقابل مثلا يعنى هند بنت عتبة ويا خدها يانكجها ويتمشى بيها شوية على كورنيش البادية ! وللا كان يبعتلها ميزدات ورنات وايميلات ، مكنش يبقى اعظم قائد عسكرى فى تاريخ البشرية بعد الرسول .
كانت ممكن السيدة اسماء تكتب رسايل حب للزبير بن العوام وتبقى قاعده مع ابوها ابو بكر على الغدا وفجاءة تجيلها رنة على الوبايل من الزبير ويسالها ابوها مين اللى بيرن ده تقولة دى حفصة بنت عمر عايزانى افوت عليها بعد الغدا عشان نروح نلعب تنس فى النادى ، كان ممكن الحجات دى تحصل فى الوقت ده. مكنش الاسلام قامله قومه ومكنوش دول يبقوا فرسان النهار رهبان الليل ، احنا بنتكلم فى ايه اصلا، الغرب وصل القمر واحنا لسه بنقول قبل وللا بع انهو احسن .
طيب هاحسمها ، لما كان حد من السلف الصالح عايز يتزوج ( يعنى عقد النية على الزواج خلاص ) مش لعب عيال يعنى ، كان يسال اولا عمن لديه فتاه يريد ان يزوجها فيعرض عليه الثقات من اهل بلدته فلان وفلان وفلان ويذكرون له مكارمهم ومحاسنهم ومساوئهم على السواء، ثم بعد ان يستقر على احدهم كان يختبىء لها حتى يرى منها ما يعجبه فان راى تقدم للخطبة وان لم يعجبة امتنع وبحث عن غيرها ، وفى هذا لطف شديد يصب فى مصلحة المرأة ويحافظ على كرامتها وكرامة وليها ولكن الاختباء للفتيات والتجسس عليهن بهذ الشكل حررررام ، الا فى هذه الحالة فقط فهو مباح طالما انه قد عقد النية خالصة لله على الزواج .
الزواج التقليدى ول اجمل منه والحب انا ياتى بعد الزواج وليس قبله .مفيش احسن من
سال احدهم رجلا وقال له لمن تزوج ابنتك ، قال ازوجها لمؤمن ان احبها اكرمها وان كرهها لم يهنها.
ارايتى يا اختى المناط الاول هو الدين والخلق ، فن اتى الحب سيكرمها بدينه وخلقة وان اتى الكره سيمنعه دينه وخلقة من ان يهنها فتعيش معه على اسوا الظروف حياه هانئة .
ذهبت امراة الى عمر بن الخطاب وقالت له اريدك ان تطلقنى ولم يكن قد مر على زواجها الا اياما معدوده، فقال لها مم
فقالت لا احبه ، فقال لها ويحك يا امرأة وهل ياتى الحب الا بالعشير .
الحب مش ورده حمرا ولا مجرد كلمة حلوة ولا ابتسامه حانية ، الحب اسمى من كده بكتيييييير جدا .
اما ان البنت ترخص نفسها باسم الحب تبقى كدابه والشيطان ضاحك عليها وانا دلوقتى شايفة بيطلعلها لسانه.
والواد ابو جل فى شعره ده ، يبقى يقابلنى لو فلح بقى ده اللى ممكن يفتح القدس فى يوم، ده اخر يفتح علبة كبريت
عمال يسرح ببنات الناس ويشغلهم بكلام فاضى ويلعب بيهم شوية ويدور على غيرهم
مسالة الزواج لابد وان تكون لها حسابات اخرى ، وهى فى النهاية مسالة نصيب ، يبقى منفكرش فيها قبل اونها، يعنى انا مثلا مش متزوج ومش بافكر فى كده خالص ولا الموضوع شاغل بالى اصلا . وكتير من الشباب كده وكتير من البنات كده لانهن منشغلات اكثر بربهن .
معذرة على الاطالة ، اروح اصلى بقة

Unknown يقول...

موضوع حساس وقد يختلف به الكثير ويتفق اخرين

من وجهة نظري
افضل الجواز التقليدي
وبالتأكيد هناك تأثير للحب قبل الزواج قد يكون ايجابي ولكن غالب الاحيان سلبي
والناظر لقضايا الطلاق عن قرب في المحاكم الشرعية يجد انه غالبية المطلقين هم على معرفة من قبل
تحيتي لك

Heba Faruq يقول...

تدوينة رائعة كعادة تدويناتك الموسوعية التي لا تترك تفصيلة من التفاصيل إلا وتشملها

ربنا يوفقك لكل خير

غير معرف يقول...

السلام عليكم
صدقيني تحرجيني بالرومانصية دي
الاسئلة كمان صعبة جدا
ممكن استعين بصديق؟
مع تحياتي

موناليزا يقول...

ليس فقيرا من يحب
ــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
انا الحمدلله بخير ماتحرمش من سؤالك ياجميلة
ربنا يكرمك يارب ده من ذوقك:)
ده حقيقى مفيش قاعدة ثابتة بس انا عاوزة اجابة شخصية:)
لا يا رانيا خليكى شوية:) وماتسمعيش كلامها انا مبسوطة جدا بزيارتك
نورتينى حبيبتى وفى انتظارك دايما


**********************************


بيترفلاى
ــــــــ
أختى الحبيبة:اهلا اهلا بالقمر
اشكرك جدا لرايك
اتفضلى ياحبيبتى بس هتشيريه فين؟
أشكرك جدا لمشاركتك
نورتينى حبيبتى واسعدنى تواجدك


*********************************


ماما امولة
ــــــــــــ
أختى الحبيبة:اهلا اهلا بالقمر بعد طول غياب
اشكرك جدا لرايك وماتحرمش منك ابدا
نورتينى ياجميلة واسعدنى تواجدك


********************************


singamaraja
ــــــــــــــــ
you are wellcome


*******************************



نوراهاتى
ــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
أشكرك جدا لمشاركتك
نورتينى حبيبتى واسعدنى تواجدك


********************************



المعتصم
ــــــــ
وعليكم السلام ورحمة الله وبركاته
اهلا بيك يافندم
صلاة مقبولة بإذن الله
ونحن فى انتظاركم دائما



********************************



د.ياسر عبدالفتاح
ـــــــــــــــــ
أهلا بيك يادكتور
ربنا يكرمك اشكرك جدا لرايك
عندك حق فعلا
أشكرك جدا لمشاركتك


*********************************


المهاجر الى الله
ــــــــــــــ
وعليكم السلام ورحمة الله وبركاته
اهلا بيك يافندم
اخى الكريم نحن نتحدث لشباب فى2009 والواقع بيقول ان فيه حاجات اكتر من اللى انا كتباها بكتير ومع ذلك فانا لم أدخِل حيز الاسئلة لمجال التنفيذ ولكنها مجرد امانى وامال داخلية يشعر بها الشاب تجاه فتاة معينة

عجبنى رأيك جدا فى ان المفروض ماناخدش من الرصيد الا لشريك الحياة فقط

مع احترامى لرأيك ولكن توجد اسباب كثيرة للطلاق وقد يكون الزواج تم بطريقة تقليدية

مع احترامى الشديد لرأيك ايضا مش كل الشباب بيفكروا كده لان اى شاب حب واحدة بجد بيبقى الطبيعى انه عاوز يتزوجها وده انا وضحته فى اول الموضوع اذا كان بيحبها بجد ولا عايز يتسلى بيها

نرجع تانى ونقول يااخى الفاضل نحن الان فى مجتمع مختلط سواء فى العمل او فى الدراسة او فى المواصلات
يعنى حتى لو الشاب او الشابة محترمين وملتزمين جدا طبيعى ان يقع عينيهم بالصدفة على شخص ما ومش شرط ابدا يقيموا علاقة عاطفية معاً ممكن جدا يكون مجرد احساس داخلى لا يصرح به للطرف الاخر

رغم انى فاهمة تشبيهاتك عن الصحابة وماترمى اليه ولكن معذرة فانا لا اسمح بمثل تلك التشبيهات فهم فى مكانة اعلى وأجل من هذا

متفقة معاك فى ان الحب له معنى سامى جدا
ولكنى معترضة على الجزئية الاخيرة لان الزواج اصلا عبادة ومقربة الى الله

صلاة مقبولة باذن الله:)
واشكرك جدا لمشاركتك



*******************************


مستر حازم
ـــــــــــ
أهلا بيك استاذ حازم
وجهة نظرك تحترم
أشكرك جدا لمشاركتك


*********************************


هبة فاروق
ــــــــــــ
أختى الحبيبة:اهلا اهلا بالقمر
رربنا يكرمك ياجميلة اشكرك جدا لرايك فماتوفيقى الا بالله
نورتينى حبيبتى واسعدنى تواجدك



**********************************


سونيت
ــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ههههههه عسل يادكتورة
نورتينى حبيبتى واسعدنى تواجدك

د/عرفه يقول...

قلبتى عليا الذكريات

يلا الحمد الله


فعلا الواحد لازم يحافظ على قلبه شوية طالما هو مش جاهز

لان القلب ميستحملش انه يتجرح كتير قبل الجواز


بالنسبة للحب فعلا هو اجمل من انه حتى يتوصف


كلامك جميل
وربنا يحفظ شباب المسلمين ويرزقهم بالشريك الصالح

المعتصم يقول...

السلام عليكم ورحمة الله وبركاته
عدنا بعد الفاصل
ههههههههه
نجاوب بقى على الاسئلة الصعبة دى واما نشوف ايه النتيجه
*اكيد مهما حصا منها هسامحها
*دايما اشتاق لرؤيتها حتى لو كانت لسه سايبانى من وقت صغير جدا
*هفواتها بالنسبه ليا مجردلع لازم اعفو عنه وعمرى مابشوفه انه حاجه وحشه
*مش ممكن افكر انى اضايقها مهما حصل ولو حصل ده بيبقى من غير قصد وبصلح الامور باسرع مماتتصور
*اشعر بمرورها بالشارع من غير مااعرف معادها ولما كنت ببقى موجود فى البنك كنت بحس انها دخلت وانا فى الدور التانى مش عارف ازاى بس كنت بلاقى قلبى دق بسرعه مرة واحده كده وفرحت
*اول ماكنت بشوفها كنت بنسى كل حاجه ممكن تكون مزعلانى فى الدنيا كلها وبحس بسعاده غريبه مش عارف مصدرها
*مكنتش ببقى عاوزها امشى وكنت بمتنى انها تفضل معايا العمر كله ونقعد نتكلم مع بعض
*الكلام معاها مكنش بيخلص ودايما كنت بلاقى اعذار انى اقف اكلمها واناكف فيها
*اكيد طبعا اتعودت على رؤيتها وحتى بعد كده لما مكنتش بشوفها كانت صورتها قدام عنيا باستمرار
*مش اضحى من اجلها بموعد هام انا كنت مستعد اضحى بكل حاجه
*مكنتش بحاول اعرف سبب حزنها وضيقها لانى كنت بعرف السبب من غير مااحاول اول مااشوفها اعرف انها متضايقه واول مااسألها كانت بتجاوب على طول عشان عارفه انها لو ماجاوبتش انا هزعل قد ايه(كده وكده يعنى بس بعمل مقموص)
*حتى لو كانت بتمثل الغضب منى كان لازم اصالحها ومش بسيبها الا وهى بتضحك
*كانت اسعد لحظات حياتى لما احس انها مهتمه بيا
*اكيد طبعا كنت بتمنى انها تكلمنى من غير مااطلب منها وكانت ساعات بتعمل ده وكنت ببقى مبسوط جدا وطاير من الفرحه
*كنت بحلم بيها باستمرار
*على الرغم من انى كنت ساعات بزعل من بعض تصرفاتها الا انى كنت دايما بختلق لها الاعذار عشان ماازعلش لانى مش بقدر ازعل منها مهما حصل يبقى اكيد فيه عذر وسبب هو اللى خلاها تعمل الحاجه دى
*لو كانت رغباتها ضد رغباتى كنت بقعد اناقشها واما انها تقنعنى او انى اقنعها احنا كنا متفقين على كده ولو فشلنا واتمسك كل واحد برأيه يبقى مافيش غير المنطقه الوسطى بين الرأيين ونشوف حل وسط يرضى جميع الاطراف ونكون مبسوطين بيه احنا الاتنين
*متهيألى بعد اللى قلته دا كله لازم يبقى اهتمامى بيها اهتمام خاص
*مهما حصل منها كان بيبقى على قلبى زى العسل حتى فى عز زعلها ونرفزتها صحيح انا ساعات بعمل نفسى زعلان ومقموص بس من جوايا كنت بفوت لها ومش بزعل منها
*كنت بتمنى اننا نعيش انا وهى فى مكان مانعرفش فيه حد ابدا عشان مانكلمش حد غير بعض بس
*كنت بتمنى اننا مش نقضى مع بعض رحله او نزهه لا انا كنت بتمنى اننا نقضى مع بعض العمر كله لاخر لحظة فيه
*كنت بفرح جدا لما بتسلم عليا هى الاول وتسبقنى فى السلام وتقعد تغيظ فيا وتقولى انا سلمت عليك الاول زى الاطفال الصغيرين
*دايما بسأل عنها واعرف اخبارها يمكن قبل ما اى حد تانى يعرفها حتى هى نفسها
*اكيد طبعا بهتم بمعرفة احوالها دى مش عاوزة كلام
*كنت بغير عليها جدا بس كنت بلزم حدودى فى الغيرة عشان مااضايقهاش وكمان عشان غيرتى ماتبقاش غيره قاتله للمشاعر اللى بينا
*ازاى حالتى النفسيه ممكن تتغير من الاحسن للاسوء لما اكلمها؟؟؟
العكس هو الصحيح
لو عندى كل مشاكل الدنيا اول ماكنت اتكلم معاها كنت بنسى كل المشاكل دى واحس ان الحياة حلوة على الرغم من كل مشاكلها
*فى كل مكان اروح فيه دايما ابقى مستنى اقابلها وادور عليها يمكن تكون معديه من هنا ولا حاجه
*بالعكس عمر مازعلت منها وحتى لو حصل موقف واغضبنى منها ده عمره ماقلل من شأنها عندى ابدا بالعكس بعد كده لما كانت بتيجى وتصالحنى كانت بتزيد وتعلى فى نظرى زياده اكتر واكتر
*ماكنش فيه حاجه فى تفكيرى غيرها
*انا ممكن كنت الغى مواعيدى عشان اشوفها ومش مهم اى حاجه تانى فى الدنيا
*اكيد طبعا كنتبتمنى انه تليفونى مايرنش الا من نمرتها وانى افتح الميل بتاعى الاقى رساله منها حتى ولو فاضيه
*اى طلب كانت بتطلبه كان بيبقى امر واجب التنفيذ وعليا السمع والطاعه
على الرغم من انها ساعات كانت بتطلب حاجات ممكن تضايقنى الا انها بعد كده كانت تيجى وتعتذر وانا برضو انفذ طلبها
*دايما كنت بتفقد وجودها ولو مش موجوده يبقى لازم اعرف ايه السبب فى كده
*اكيد طبعا زواج الحب افضل من الزواج التقليدى بس ده بيتوقف على هل الاتنين دول بيحبوا بعض بجد ولا لأ ظ وممكن يضحوا علشان خاطر بعض بجد ولا لأ؟
*العلاقة العاطفيه قبل الزواج تؤثر على الزوجين طبعا لانه بيكون فيه بينهم الفه وتفاهم وده بيسهل لهم حاجات كتير ممكن تعمل مشاكل بعد الزواج لو ماكنتش العلاقه دى موجوده

رغيت كتير وصدعتك انا عارف
بس اعمل ايه بقى ماصدقت حد يقلب عليا المواجع
هههههههههههههه
تقبلى مرورى وتحياتى
والسلام عليكم ورحمة الله وبركاته

Asmaa mahaba يقول...

والنبى يا اختى افضل الى ربك يرزق بيه بس هو فين:)
طيب فرضا البنت هى اللى طلعت بتحب تعمل ايه تروح تخطبه من اهله
اقولك انا الافضل نشيل الماضيع دى من راسنا خالص :( بدل ما نتجنن اكتر

mohamed ghalia يقول...

* أيهما تفضل زواج الحب أم الزواج التقليدى؟.
* هل العلاقة العاطفية قبل الزواج تؤثر على الزوجين؟.
بجد البوست كله تحفة
شايف انه قدر يعنى ممكن حد يقتنع بالتقليدى ويلاقى نفسه واقع فى الحب والعكس
العلاقة بالشروط الى اتكلمتى عنها فى طريق الإستقامة أكيد حاجة كويسه جدا لبعد كده
دمتِ فى سعادة

موناليزا يقول...

د/عرفة
ــــــــ
أهلا بيك يادكتور
اشكرك جدا لرايك ولمشاركتك
ربنا يتقبل دعائك ويرزقك بالزوجة الصالحة اللهم امين
دمت طيبا ولمدونتى زائرا



*********************************



المعتصم
ــــــــ
وعليكم السلام ورحمة الله وبركاته
اهلا بعودتك مرة أخرى :)
مممم مش عارفة ازعل من اجابتك ولا افرح بيها
ازعل لانك لسه فاكر كل حاجة بالتفاصيل دى وده معناه انه معندكش بديل ليها رغم معرفتك انه خلاص
ولا افرح على الحب الكبير اللى قليل اوى تلاقيه موجود
بس انا كده مضطرة أسألك سؤال تانى خالص
هل أنت من جواك ناوى تنسى وتحب بجد من جديد؟
هل يوم ماترتبط ناوى تحب زوجتك كده ولا خلاص الموضوع بقى مرتبط بيها هى وبس وخلاص على كده؟
فى انتظار الاجابة
واشكرك جدا على مشاركتك ودوام التواصل



********************************



سومة مجنونة فى بلد عاقل
ــــــــــــــــــــــ
أختى الحبيبة:اهلا اهلا بالقمر
ايه الصورة دى يا سومة:) بقى بذمتك دى منظر صورة تضعيها فى بروفيلك وبتسألينى بعدها على عريس هههههه
طب لو كان موجود بينا دلؤتى يقول ايه بس!!:)

سؤال وجيه لو البنت هى اللى بتحبه ممممم والله بنات اليومين دول هيعترفوله وزى ماتيجى
والجيل اللى قبل مننا كان بيبعت واحدة تتوسط بينهم وكأن العروسة مش عارفة
لكن أنا عن نفسى لو هو محسش لوحده هنساه!! ولان النسيان مش سهل ابدا مش هدخل نفسى فى حكاية كده خالص وخلينا على البر أحسن:)
نورتينى حبيبتى واسعدنى تواجدك



*********************************



محمد غالية
ـــــــــــ
أهلا بيك استاذ محمد
كعادة كلامك يتسم بالعقل والواقعية
أشكرك جدا لمشاركتك

rovy يقول...

ازيك يا مونى ..
بوست رائع حبيبتى بجد .. ربنا يبارك لنا فيكى ..
اما بالنسبة للاسئله فأنا افضل وجود الحب طبعا بين العروسين لأنه بيكون هو اساس بناء حياتهم و صدقينى بجد وجوده بيخليهم يتحملوا مع بعض كثير جداا
بس ده مش معناه ان يكون فيه علاقه مداريه بين شاب و فتاه بأسم الحب
اللى بيحب بجد مش ممكن يقبل يضع محبوبته فى اى وضع لا يرضاه لاخته .. و لو ان انانية و ازدواجية الرجل الشرقى احيانا بيسمح لنفسه بما لا يسمح به لاخته لكن المهم فى النهاية انه لا يتعدى حدود الله .. و ان يتقوا الله و يدخل الشاب كما قلتى من الباب
بس برضه عاوزه اقولك ان فيه نوعيه من البشر لا يصلح معها سوا الجواز التقليدى سبحان الله هى كده اتبرمجت على كده يمكن لان عواطفها محدوده او يمكن شاب من كثر ما عدد فى علاقاته فقد الاحساس السامى للحب و اصبح جاف المشاعر .. بجد مش عارفه بس عرفت ناس كده فعلا ما عرفتش تتجوز الا جواز تقليدى بس لما تسأليهم ما بيقولوش ناجح بيردوا الرد التقليدى الغلس جداا و يقولوا اهى ماشيه .. !!
رغيت كثير و الفجر قرب و حاسه انى تعبانه مش عارفه اركز اكثر من كده
الخلاصه الحب المحترم الذى نتقى فيه الله سبحانه و تعالى يكسب اكيييد ..

تحياتى و مودتى لكى غاليتى

تأثير الفراشة يقول...

ما شاء الله ، بجد مقال رائع و جميل ، ربنا يجزيكى كل خير و يحفظ كل البنات و الشباب يا رب العالمين

وفقك الله لكل خير

مدونون من اجل الاقصي يقول...

السلام عليكم
بوست جميييييييل جدا
واعي وراقي
وتعرفي مش مهم الجواز بعد حب ولا تقليدي
المشكلة بتكون فالاشخاص
الي بيكون فاهم وواعي وبيخاف ربنا وبيعرف يتعامل مع الناس وبيختار على اساس صح
بيعيش مبسوط ويكمل
والي مش فارقة ةمعاه وفاكرها لعبة وبس
بتروح عليه

سما / سمسم

(المهاجر الى الله) يقول...

السلام عليكم ورحمة الله وبركاته:
الاخت الفاضلة موناليزا ، كل عام وانتى بخير.
الحقيقة يا اختى انا كنت ناوى من بعد شهر رمضان الكريم الماضى ، اعاده الله علينا بالخير ان شاء الله ، ان اكتب عن موضوع الحب والزواج والعلاقات بين الشباب والبنات من خلال الاستهداء بقصة زواج سيدنا موسى عليه السلام لما فيها من العبر والدروس لكل شاب وفتاه مقبلين على المرحلة دى من حياتهم ، لكن لاسباب مرضية امتنعت عن الكتابه الا انى عاقد النية باذن الله .

ما قصدته يا اختى الكريمة هى ان كل تلك المشاعر والاحاسيس موجوده عند كل انسان والا انتفت انسانيته ، ولو ان هذا الانسان ذكرا كان او انثى لم يقم بالتحكم الجيد على هذه المشاعر والاحاسيس واستخدمها بافراط وتفريط لحقه الندم فيما بعد.
هذا فضلا عن اغضاب الله سبحانه وتعالى لانكى تعلمى تماما كيف يكون حال الفتاه عندما تخلو بنفسها لتفكر فى شاب وخصوصا اذا كانت متزوجة او كيف يكون حال الشاب عندما يخلو بنفسه ليفكر فى فتاه ، من قصة ادم وحوا اردت انى اقول ان حبه لها اتوجد بمجرد امتلاكه ليها وبمجرد ما اصبحت واقع ملموس لا يقبل الشك .
مش مجرد خيالات تجول فى الراس ايام وايام تضيع الوقت وتشغل الذهن وتشوش على التفكير ،
والخطرات والامانى والامال تورث فى القلب المعصية مالم يتم بمواجهتها والتحكم فيها ، فان لم يفلح فانها تتعدى الى ان تورثه طول الامل ومن كانت صفته طول الامل فالله تعالى يرحمنا ويرحمه بفضله ،
تشبيهاتى اللى استخدمت فيها اسماء بعض الصحابه ، مفيهاش اى مشكلة ولا جريمة اخلاقية او دينية ولا مخالفة لشرع او نص ، وانما قصدت ان اوضح بلمحه سريعه وخاطفة كيف ان هؤلاء وصلوا الى اعلى عليين وامتطوا بكل ثقة وقوة صهوة جواد العلا ، وكيف الحال بنا اليوم ، فما الفرق .الم يكونوا بشرا امثالنا ، الم تكن حياتنا افضل من حياتهم ، لدينانعم من الله لم تكن لديهم وسائل مواصلات متطورة ووسائل اتصالات متطورة توفر الوقت والمجهود
ولدينا التقنيات الطبية والهندسية التى لم تكن موجوده لديهم ، بل كان الفقر والجوع وقلة الرزق ومع هذا حكموا العالم باسره فيما بعد
لانهم استطاعوا ان يتحكموا بانفسهم اولا .
اذا ترك الشاب لنفسه العنان لهذه الخطرات وقع فى المعصية لا محالة هذه هى النتيجة الحتمية التى لا تقبل الجدل الا من عصم ربى ، وكذلك الحال بالنسبة للفتاه التى من الواضح انها لا ترغب فى تقدى بامهات المؤمنين .
لا زلت اصر انه ولا اجمل ولا افضل من الزواج التقليدى متى تحققت الكفاءة الدينية فيه .
اما مفهوما عن ان الزواج عباده فده مفهوم قاصر لان عدم الزواج قد يكون عباده ايضا ، فالزواج ربما كان جائزا فى حالات وربما كان واجبا فى الات اخرى وربما كان حراما فى حالات اخرى . ثم اننى لم اقل انى لا ارغب بالزواج (بالعكس ايدى على كتفى وشوفيلى عروسة ) وانما قلت لا افكر فيه ولا يشغل حيزا من تفكيرى ، يعنى مش ماسك وردة وعمال اقطع منها واقول (هاتجوز مش هاتجوز) ، وكده يعنى ، لا انا سايب المسألة دى لربنا اذا تزوجت فخير واذا لم يحدث فخير
يعنى مفيش مشكلة، مفيش قلق وتوتر ونكد وهم وسهر الليالى والكلام ده اللى وسائل الاعلام اتلفوا الشباب والبنات بيه وفهموهم ان ده هوه الحب .
كمان لا زلت اصر على ان علاقات ما قبل الزواج تؤثر بالسلب على الزواج بعد ذلك واللى مش عاجبه كلامى يروح يقول كده لربنا لانه هوه اللى توعد الخارجين عن طاعته بالشكل ده بحياه غير مستقره والايات على كده كتير ، وكمان ممكن يبص حواليه فى مجتمعه اللى عايش فيه ويشوف نسبة الطلاق ويسال المطلقين والمطلقات هل كانت تربطكم علاقة قبل الزواج وللا لاء وهيعرف السبب ايه بالظبط .
اما اسباب الطلاق الاخرى فدى بتبقى خاصة بالاخلاق والشخصية وطريقة التفكير اللى كان لازم كل طرف يتعرف عليها فى الطرف الاخر قبل الزواج عن قرب بالضوابط الشرعية من غير الخلوة بدون محرم، وبعدين مادمت انا واخد من بيت معروف بالفضل والتدين وحسن الخلق يبقى ان شاء الله ربنا يتمم بخير .
انا مش ضد المشاعر دى ابدا ان ضد استخدامها بشكل يسىء ليها ، لانى زى ما قولت المشاعر دى عبارة عن رصيد هيخلص لو متمش الحفاظ عليه وتجديده باستمرار .

مدحت محمد يقول...

العلاقة العاطفية

والله مجربتش


بس

الزواج التقليدى افضل على العموم

بس يكون عارفين بعض كويس

موناليزا يقول...

روفى
ـــــــ
أختى الحبيبة:اهلا اهلا بروفى الغالية
انا الحمدلله بخير ماتحرمش منك أبدا ياحبيبتى
متفقة معاكِ جدا
الف سلامة عليكِ ياقمر
نورتينى ياجميلة واسعدنى تواجدك



********************************



تأثير الفراشة
ـــــــــــــــ
أختى الحبيبة:اهلا اهلا بالقمر
ربنا يكرمك يارب اشكرك جدا لرايك
نورتينى حبيبتى واسعدنى تواجدك



*******************************


مدونون من اجل الاقصى
ـــــــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
اشكرك جدا لرايك ولتعليقك
نورتينى سمسمة الجميلة واسعدنى تواجدك



**********************************


المهاجر الى الله
ـــــــــــــــ
وعليكم السلام ورحمة الله وبركاته
اهلا بعودتك استاذ طارق
وانت بخير يافندم وبالصحة والسلامة
ونحن فى انتظار ماستكتبه وبالتوفيق يارب ان شاء الله

أخى الفاضل مفيش اختلاف بينا ابدا فيما تقوله ولكنى هنا أناقش من بالفعل يفكر فى فتاة معينة
( كما نرى الان شاب يطلب من والده ان يخطب له فلانة بعينها دون غيرها)

أما عن تشبيهاتك بالصحابة فانا مازلت مقتنعة بوجهة نظرى

ورأيك فى الزواج التقليدى أحترمه وأؤيده جدا

ازاى بس يافندم مفهوم الزواج عبادة يبقى قاصر اذا كان هدف غالبية البنات والولاد دلؤتى هو الزواج(وشوف بنفسك جميع من حولك ومن اول ثانوى وانت طالع ولغاية سن الاربعين كمان)
الزواج عفة للجميع بالاضافة الى كم الثواب الهائل الذى يناله كلا من الزوجين
وللمزيد عن رأيى فى هذا أدعوك لزيارة هذا الرابط
http://monaliza110.blogspot.com/2009/08/blog-post.html

أشوفلك عروسة؟:) لو بتتكلم بجد فعروستك عندى وتفكيركم متشابه تماما:)

أسعدنى تواصلك واشكرك جدا لمتابعتك



*********************************


مدحت محمد
ــــــــــ
أهلا بيك استاذ مدحت بعد طول غياب
أشكرك جدا لمشاركتك
دمت طيبا ولمدونتى زائرا

الفراغ يقول...

اسئله هامه جدا
والاهم ان يقتنعوا بها
تسلم ايدك
وعن نفسى افضل الزواج التقليدى عن اعجاب واحترام
والحب الحمد لله جه مع العشره

اه الحب قبل الزواج بياثر سلبيا بعد كدا
لان الشكل بعد الزواج بيختلف
وهنا يبدأ العد التنازلى لتراجع حرارة الحب

رحــــيـل يقول...

طريقه عرضك للموضوع بجد رااائع

ربنا يهدى الرجاله يارب والبنات كمان

ويجمع بين اى اتنين بيحبو بعض بجد

انا بفضل الزواج عن حب بس مش حب وبس فى تفاهم واحترام وتوافق وثقه
وفى الاول والاخر قسمه ونصيب

مرايتى يقول...

معاكى حق فى كل الى قلتيه بس الى يسمع

بس شفت تجربه بين اتنين ارتبطوا وطبعا بطريقه مافيهاش مخالفات يعنى لفتره على اساس انها ما توافقش باى حد يتقدم لها
وربنا كرمهم واتخطبوا انا بقيت بشوف تصرفاتهم قلت لهم خلصتوا كل الى عندكوا
فعلا بقى حياتهم خناقات ومش عارفين يعيشوا الفتره الى همه فيها
استعجلوا الامور واتغير ترتيب وقتها
انا معاكى لو فعلا بيحبها يتقدم وياخد خطوه والى ليه نصيب فى حاجه حيشوفها

وفى ناس ارتاحت فى الجواز التقليدى على فكره وكتير جدا وحبوا بعض جدا بعد الجواز
والى بيفكر فى الحب قبل الجواز اكيد لو حط قدامه ربنا ان شاء الله ربنا حيكرمه ويعفه بالحلال

بوست رائع كالعاده

Dr. Ibrahim يقول...

ولكن الشباب يفهم أن الحب ماهو إلا كما هو موجود الآن فى الشوارع والجامعات وبعد ذلك يا ترى هل يتقدم الشاب للزواج 80% لا يتقدمون ببساطة الواحد منهم يقولك هو انتا عايزنى اتجوز واحدة مشيت معاها بنفس اللفظ كده من أكتر من واحد
يبقى الفتيات يعدوا فى البيوت معززين مكرمين والزوج المحترم اللى يدخل البيت من الباب ويطلب ايدها من ولى الأمر

الحاجة التانية والله بقى مسألة جواز تقليدى أو جواز عن حب
هو فى الأخر جواز وربنا اللى بيوفق وكما قال د مصطفى محمود فى كتاب أناشيد الإثم والبراءة"الحب ماهو إلا تناسب نفوس وطبائع "

وربنا يكتب لينا الخير جميعاً

MOHAMMED ELBANNA يقول...

موناليزا
موضوع جميل أمة الله
وانا من رأيي ان الزواج التقليدي انجح من زواج الحب وهذا حسب احدى الاحصائيات الاجتماعية .
ولكن طبعاً الزواج عن حب يزلل الكثير من العقبات .
والزواج التقليدي ايضاً يأتى معه الحب مع المعاشرة بين الزوجين .
محمد البنا
طريق النجاح

موناليزا يقول...

الفراغ
ـــــــــ
أختى الحبيية:اهلا اهلا بالقمر بعد طول غياب
اشكرك جدا لرايك ولمشاركتك
نورتينى غاليتى واسعدنى تواجدك



********************************


رحيل
ـــــــ
أختى الحبيبة:اهلا اهلا بالقمر بعد طول غياب
اشكرك جدا لرايك ولمشاركتك
نورتينى ياجميلة واسعدنى تواجدك



*********************************


سمسمة
ـــــــ
أختى الحبيبة:اهلا اهلا بالقمر
صح كل شئ قسمة ونصيب
أشكرك جدا لرايك ولمشاركتك
نورتينى سمسمة الجميلة واسعدنى تواجدك



*********************************



د/ابراهيم
ـــــــــــ
أهلا بيك يادكتور
الله ينور عليك(ياريت البنات تسمع)
ربنا يوفقك دايما لما يحب ويرضى
أشكرك جدا لرايك ولمشاركتك



*********************************



محمد البنا
ـــــــــــــ
أهلا بيك استاذ محمد
أشكرك جدا لرايك ولمشاركتك
دمت طيبا ولمدونتى زائرا

أبو كريم يقول...

يا أمة الله أثلج قلبك الله
وسدد خطاك الله

بجد وبدون مجاملات انتى سبقتينى فى الموضوع ده وبجد أحسن مما كنت انا هعالجه

النهارده واحد زميلى فى الشغل جايلى مخصوص يقولى شوف الى بيحصل فى أداب وبيفرجنى على بنت وولد فى الجامعه يعنى بيعملوا حاجات مش ظريفه وفاكريين ان محدش شايفهم


دمى الصراحه اتحرق وقلت ياربى البنت دى الى صورها ده لو دى اخته كان هينشر الفديو كده ولو الولد ده بيحب البنت دى وعلقها بيه ازاى يسمح ان يعرضها ويعرض نفسه لكده


اما بالنسبه للأسئله
أفضل الزواج التقليدى الحديث بمعنى ان رأيت فتاة واعجبتنى اتقدم لخطبتها وفترة الخطوبه كافيه للتعرف عليها

العلاقه العاطفيه قبل الزواج أحسن علاج لحاجز الرهبه ولكن الذى نراه الأن ليس بالعلاقه العاطفيه ولكن بالعلاقه الشهوانيه


اللهم أعف شبابنا وبناتنا


الله عليكى الله

كلمة صدق يقول...

السلام عليكم كلامك موضوعك جميل وشيق واللة ياأختى العزيزة حسب كلامك يبقى كل مرة بتطلع بحبها بس للأسف شكلهم هما مابيحبونيش ياللة عوضى على اللة واظن الجواز على حب بيبقى فى كثيلر من الحالات فاشل وبالذات لو كان فترة طويلة قبل الزواج لانهم قد اخرجو كل عواطفهم قبل الزواج وبعدهابينصدمم بالواقع وربنا يوفقنا

ومازلتُ أتعلم يقول...

موناليزا
وحشتينى جدا
ووحشتنى مواضيعك الرائعة
ربنا يجازيكى خير عنها ديمااا

Mona Shereif يقول...

السلام عليكم ورحمة الله وبركاته
ازيك يا جميل
عامل ايه
واحشنى خالص خالص
نيجى بقى لموضوعك الجميل اللى زيك
انا بقى افضل الجواز التقليدى
بحس انه فيه عقل اكتر
اما العلاقة اكيد بتأثر وللاسف بالسلب
وبرضه لكل قاعدة شواذ
تسلمى يارب

موناليزا يقول...

ابو كريم
ــــــــــ
أهلا بيك استاذ بهاء
:) يارب.. ربنا يسمع منك

ربنا يعزك يافندم ده من ذوقك
ونحن فى انتظار ماسيخطه قلمكم
لعل التوعية تصل للجميع
أشكرك جدا لرايك ولمشاركتك



********************************



كلمة صدق
ـــــــــ
وعليكم السلام ورحمة الله وبركاته
اهلا بيك يافندم فى زيارتك الاولى
لو كنت دخلت البيت من بابه كنت اكيد هتعرف حقيقة مشاعرها تجاهك:)
أشكرك جدا لرايك ولمشاركتك
نورت مدونتى وارجو دوام التواصل




*******************************



ومازلت أتعلم
ـــــــــــــ
أختى الحبيبة:اهلا اهلا بالقمر بعد طول غياب
فينك من زمان.. يارب دايما تكونى بخير
انتى كمان وحشتييينى جدا
ربنا يعزك ياحبيبتى ماتحرمش منك ابدا
نورتينى واسعدنى تواجدك



*********************************



ساعات ساعات
ـــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
انا الحمدلله بخير ماتحرمش من سؤالك ياحبيبتى
عندك حق.. اشكرك جدا لمشاركتك
نورتينى ياجميلة ووحشتيييينى واسعدنى تواجدك

♥نبع الغرام♥♪≈ يقول...

اخبارك ايه اسفه متاخرة عليكى

بجد بستفاد قوو ووووى من مقالات
بس انا عن نفسى افضل الزواج المبنى على حب
احيك على كل كلمة خطتطها يدك
تقبلى مودتى واحترامى
ايناس

موناليزا يقول...

احزان ايناس
ــــــــــــ
أختى الحبيبة:اهلا اهلا بالقمر
انا الحمدلله بخير ماتحرمش من وجودك ابدا
ياحبيبتى انتى تنورينى فى اى وقت مكانك محفوظ دايما
اشكرك جدا لرايك ولمشاركتك
نورتينى انوسة الجميلة واسعدنى تواجدك

Hasan يقول...

السلام عليكم ورحمة الله وبركاته
جيت أعمل كليك يمين ظهر رسالة بتقول
إنى لازم أسأل حضرتك الأول
طيب ممكن بقى أخد نسخة عشان الكل يستفيد

الإجابة على الإسئلة
من وجهة نظرى زواج الحب لأن بحس الزواج التقليدى مفهوش روح
بس على فكرة أنا مجوزتش لسه بس فى حالة حب وأتمنه أن يتمها الله بكل خير

موناليزا يقول...

حسن غيتا
ــــــــ
وعليكم السلام ورحمة الله وبركاته
أهلا بيك استاذ حسن
:) طبعا يا فندم الموضوع تحت أمرك
ربنا يتمملك بخير
وأشكرك جدا لمشاركتك
يسعدنا دوام التواصل