السبت، 21 نوفمبر 2009

الرجل فى عيون أنثى

لى رؤية خاصة فى مظهر الرجل تجعلنى أتعرف عليه قبل حتى أن أتعامل معه. ويوجد عندى مُسلمات لا أقبل وجودها على الأقل فى شريك حياتى.- على إعتبار أن رأيى عنده هيكون مهم-.
على سبيل المثال:
أرفض أن يكون شعر رأسه طويل.
الرجل بالنسبة لى حليق شعر الرأس دائماً مش شرط يكون أصلع ولكن أيضاً لا أقبل فكرة اهتمامه الزائد بطول شعره وعمل حمامات كريم وفرد من آن لآخر وما إلى ذلك من أشياء أعتبرها خاصة بالنساء فقط.
فى حالة وجود لحية ياريت تكون مهندمة ولا يتركها غير مستوية " من كان له لحية فليكرمها" .
لأنه ببساطة مُسلم يعنى قدوة للآخرين.
ولو له شنب يبقى يساويه من آن لآخر ولا يتركه ليأكل معه ولا يتباهى به أو يحلف به.
أما عن الأظافر :
لا أقبل فكرة أن يربى الرجل أظافره أو يترك صابع أو إتنين أظافرهم طويلة .
بالنسبة لى منظر مقزز جداً بالإضافة إلى عدم نظافة منطقة الأظافر بصفة عامة"النظافة من الإيمان".
بالنسبة للملابس:
لا أقبل أن يرتدى بنطلون ساقط أو بودى أو تيشيرت كت أو فانلة بحمالات أو يخرج بشبشب أو سليبر(صندل وعليه شراب) .موضه مش موضه ده رجل يعنى الحذاء هو الشئ الوحيد المسموح به فى الخروج ويكون نظيف طبعاً.
لا يجوز فى اى حال من الأحوال إرتداء الإكسسوارات من خواتم أو سلاسل أو أنسيالات سواء ذهب أو فضة.
مش عشان حرام وبس لأ ده كمان لأنها تشبُه بالنساء.
يعنى إيه رجل ويلبس حظاظة أو يعمل تاتو!!.
هو يادوب دبلة فضة فى حالة إرتباطه بخطوبة أو زواج وهذا من باب العلم بالشئ مش أكتر.
أفعاله وتصرفاته:
يعنى إيه رجل ويضحك فى الشارع مثلاً بصوت عالى.
ترك إيه للبنات اللى الإنطباعات عنهم بتكون سيئة.
.يعنى إيه رجل ويرقص لو ذهب فى أى فرح مثلا أو حفلة.
الرجل يعنى رزين وعاقل ولا يعبر عن فرحته أبداً بهز جسده وخاصة أمام الناس.
يعنى إيه رجل ويتدخل فى أمور النساء وكلامهن .
يعنى إيه رجل ويخاف من الظلام والحشرات.
على فكرة مش عيب إنك تخاف العيب أنك تبين خوفك ده.
يعنى إيه رجل ويرجع فى كلمته.
بدل مش قد الكلمة محدش جبرك تقولها.
يعنى إيه رجل ويأكل لبان بطريقة مستفزة فى الشارع.
يعنى إيه رجل ويعاكس بنات.
التافهين بس هما اللى بيعملوا كده.
يعنى إيه رجل ويدلع فى كلامه.
يعنى إيه رجل ويلعب بلاى ستيشين أو فى الموبايل أمام حشد من الناس.
الرجل المفروض يكون إهتمامته أنضج من كده.
يعنى إيه رجل يقابل رجل تانى فى الشارع ويسلم عليه بالقبلات والأحضان.
على فكرة قانون الإتيكيت الدولى يحرم هذا الفعل ويعتبره من الشذوذ.
فين سلام الرجالة اللى بنعلمهم للأطفال وهما صغيرين من مصافحة قوية. وعلى فكرة المصافحة دى من الإسلام وليس الأحضان والقبلات.
بالنسبه لأفكاره:
*أتعجب من هوس الرجل بالكرة وتضييع وقته وإهدار أعصابه وقد يخسر من حوله أيضاً لمجرد مبارة بين فريقين لا يلعب مع أحدهما وبالتالى المكسب أو الخسارة لن يعود عليه بشئ.
*أتعجب من نظرة الرجل للمرأة الملتزمة أو المنتقبة على أنها شئ مُهمل. ولا يتخيل أنها مرِحة وذات عقل راجح وترتدى ملابس على الموضة وتضع أغلى العطور وتستخدم الماكياج وما إلى ذلك من أشياء أنثوية تقوم بها مع محارمها. إن إلتزام المرأة لا ينقص من أنوثتها شئ بل بالعكس فهو يحافظ عليها أكثر.
المرأة إذا كانت بطبعها أنيقة ونظيفة لن يكون إلتزامها حائل وإذا كانت عكس ذلك فلن يفيدها تبرجها.
*أتعجب من نظرة الرجل للمرأة المُطلقة على أنها درجة تانية أو أصبحت بلا حياء.
رغم وجود مُطلقات مازال وجههن يحمر خجلاً إذا ما سمعن فقط كلمة إطراء وبالمقابل توجد فتيات لم يتزوجن بعد ومع ذلك خلعن برقع الحياء من زمن. فالأمر أيها الرجل لا يلتصق بالحالة الإجتماعية للفتاة ولكن فقط بتربيتها.
والمُطلقة ليست وصمة عار فهى لم تفعل جُرم أخلاقى.أنها فقط لم توفق فى علاقة تمت بطريقة حلال.
وهذا لم ينقص كرامتها أو يمس أنوثتها.
*أتعجب من تفكير الرجل تجاة المرأة بما فيهن البنات الصغيرات بأنها ست بيت شاطرة. وكأن نوعها الأنثوى يعطيها القدرة على القيام بمهام المنزل. وهذا ليس حقيقى بالمرة فهناك نساء كثيرات لا يفضلن هذا العمل ويفشلن فى أدائه. وبالمقابل هذا العمل يحتاج إلى تدريب وممارسة شأنه شأن أى عمل آخر ولا تعرفه المرأة بالفطرة.
ولذلك جهلها فى هذا لا ينقصها أنوثة.
* أتعجب من تحدث الزوج عن زوجته بالسوء أو يسئ معاملتها. رغم أنها أكتر واحدة تتحمله وتلبى طلباته.
* أتعجب من رفض الرجل لأشياء قد يفعلها زوج ابنته معها وهو نفسه يقوم بهذه الأفعال مع أمها.اللى ماتقبلوش على بنتك ماتعملوش مع بنات الناس.
ملحوظة: الرجل اللى بتكلم عنه المفروض أن عمره من 16 لما فوق.
يمكن يكون كلامى بالنسبة للبعض بديهى بس أكيد أن فيه ناس كتير هيكونوا مستغربين ولهم أوجه هذا الكلام.



يسعدنى إضافة نظرة بعض النساء من إخواتنا المدونات:
الرجل بالنسبة لى هو الشخص المحترم فى المظهر والكلام والذى يظهر عليه مظهر الوقار والذكاء والتفهم.
أكثر ما يعجبنى فيه هو الشهامة والنخوة.
وأكثر ما أكرهه فيه عندما يضع يده فى أنفه وهو يفكر.
الرجولة تعنى الوقار والعقل والشجاعة والشهامة والمروءة والكرم والأمان والإحتواء والنخوة.
ما يقلل نظرتى له: أسلوب كلام الحشاشين والميوعة فى الكلام وعدم النظافة الشخصية وطريقة الأكل الهمجية والبخل والطمع والجشع واحتقار الاخرين.
يكون انطباعى الأولي من خلال لبسه وطريقة كلامه ثم تفكيره
مفهوم الرجولة هو التصرف الصح فى الوقت الصح
أكره فيه أكله للبان.
يكون انطباعى الأولي من خلال الراحة النفسية وان يكون مهندم فى اللبس وغير مبالغ
مفهوم الرجولة: الشخص العالى الفكر, الحنون , القلب القوى فى الشدة , الإخلاص , السند والاهتمام.
أكثر مايقلل نظرتى له: الكذب
روفى:
مفهوم الرجولة يعنى الأمان والاحتواء.
كلمات من نور
أحدد أول إنطباع من خلال إحترام المواعيد
والرجولة تتمثل عندى فى الاقتداء بخلق الرسول عليه الصلاة والسلام.
أكثر ما يقلل نظرتى له: الصوت العالى وكثرة الجدل والكلام.
رفقة عمر
يلفت نظرى حذاء الرجل إذا كان نظيفاً ولامعاً أم لا
مفهوم الرجولة:تتمثل فى الرجل الكريم, الشهم, الذى يعتمد عليه, الصبور, الشجاع و الإيجابى , الصدوق , الوفى دائماً بعهده, الشخصية الإجتماعية الناجحة فى علاقاتها.
أكره فيه: التكلم فى الماديات وأن يكون محدث نعمة ويتكلم عن مالديه من ماديات
منى
الرجل يعنى الأمان
جرين آيز
الرجولة تظهر فى الواقف والأفعال
الرجل عندى لازم يعرف فى الاتيكيت والذوق العام ويعرف يتعامل مع الجميع ويكون محترم بحيث يجبر الجميع على احترامه ويكون قد كلامه مش بيتكلم وخلاص ولدية القدرة على أن يتحمل المسئولية ويكون ذكى واخلاق.
أكثر ما يعجبنى: الجرأة وتحمل المسئولية.
وأكثر ما أكرهه: البخل والعصبية وسوء النية.
الإنطباع الأول للرجل في نظري يكمن في هدوءه وطيب كلامه
ماأكرهه في الرجل وبشدة: * صوته العالي (دا بيدل على ضعف شخصيته وعدم تحكمه في الموقف ليس اكثر من ذلك) وهذا من مظاهر الضعف في الرجل امامي.
*أرى كثيرا في الشارع رجالاً يبصقون على الارض (هل لأنه رجل يفعل ذلك ,؟؟) شئ مقزز.
*حينما أذهب في المواصلات وأركب باص أجد نساء يقفنّ في الباص والشباب بقمة الاستهتار ويجلسنّ ولايهمهنّ الوضع.
الرجل موقف و كرامةو شهامة .
الرجل حكيم في تصرفاته وافعاله .
أحب جدا الرجل الذي حينما يرى شيئا يعجبه أجده يبتسم ولا اجده يقهقه .

بالنسبة لانطباعي الاول بيكون ارتياح نفسي لما بيكون بشوش مش مكشر ولا شايف نفسه ومظهره جميل ولائق
الرجولة بالشهامة وبالشخصية القوية و الاحتواء والأمان والمعاملة الطيبة والحنية .
واكثر ما اكرهه : الغرور والتباهي والتصرفات الغير لائقة والمقززة من معاكسات وقلة ادب والفاظ سيئة و يكون لسانه طويل وبيقول كلام بذيء وكمان الاستهتار بمشاعر المراة والخيانة ..
************
أسئلة للنساء:
* كيف تكونين إنطباع عن الرجل من خلال اول مقابلة؟.
* ما مفهوم الرجولة بالنسبة لكِ؟.
* ما أكثر فعل يقوم به الرجل يقلل من نظرتك له؟.
أسئلة للرجال:
* كيف تحكم على المرأة من خلال أول مقابلة؟.
* ما مفهوم الأنوثة بالنسبة لك؟.
* أكثر شئ يجذب انتباهك فى المرأة؟.
* أكثر فعل يقلل من أنوثة المرأة بالنسة لك؟.
.لو هتختار صورة رمزية تعبر بها عن إجابتك على هذه الأسئلة فماذا ستكون؟.
مثال: نباتات(شجر, نخل, نوع معين من الأزهار مع لونه)أو كائنات حية(طيور,حيوانات,حشرات) أو جماد( آلة موسيقية, أداة كتابية,أجهزة...). وما إلى ذلك.
وبرجاء تعاون الأخوة الرجال حيث أن الموضوع القادم سيكون محمل بآرائهم المطروحة
.

هناك 67 تعليقًا:

عين فى الجنة يقول...

موضوع ظريف و جذاب

العلم نور يقول...

الرجل بالنسبة لي هو الشخص المحترم في المظهر والكلام والذي يظهر عليه مظهر الوقار والذكاء والتفهم.

وأكثر ما يعجبني فيه هو الشهامة والنخوة.

وأكثر ما أكرهه فيه عندما يضع يده في أنفه وهو يفكر.

ريمان يقول...

*أتعجب من هوس الرجل بالكرة وتضييع وقته وإهدار أعصابه

*أتعجب من نظرة الرجل للمرأة الملتزمة أو المنتقبة على أنها شئ مُهمل.


*أتعجب من نظرة الرجل للمرأة المُطلقة على أنها درجة تانية أو أصبحت بلا حياء.


ـــــــــــــــــــــــ


انا عجبنى اوى اوى التلات نقط دول يا موناليزا وبجد ومتفقه معاكى جدا لانى بجد بكره التلات حاجات دول فى الرجاله

ريمان يقول...

بالنسبه لمفهوم الرجوله بالنسبه لى فهو زى بالظبط الى انتى ذكرتيه فى البوست


وموضوع ان المراه ممكن تكون انطباع عن الرجل من اول مره ده شىء صعب شويه لان ساعات المظهر بيخدع

بس انا عن نفسى الحمد لله ليا نظره كده فى الراجل اللى قدامى بقدر افهمه شويه يعنى


بس برضه المظهر بيخدع والله

د. ياسر عمر عبد الفتاح يقول...

طبعاً الرجولة والذكورة لها صفات أشرتي غلى الكثير منها

لكن لم يعجبني مثلاً استدلالك بحديث غير صحيح
الحديث الصحيح من كانت له شعرة فليكرمها
مش لحية زي ما حضرتك ذكرتي

والأصل في اللحية الإطلاق على فكرة
زي ما ورد في الأحاديث المتعددة

أطلقوا وفروا أرخوا

وإذا اعتبرنا اللحية شعرة
أي من ضمن الشعر فيجب إكرامها
والإكرام هنا بتمشيطها والإعتناء بها وإصلاح مظهرها
ومن العلماء من أجاز قصها فيما بعد القبضة لفعل عبد الله بن عمر

على العموم الموضوع كله قيم للغاية
وأسف على الرغي الكثير ,, لأن ده بقى مرض فيا :)

جزاكِ الله خيراً

همس الاحباب يقول...

متفق مع وجهة نظرك جدا جدا
بالنسبة لصفات الرجل لان الفرق بين الرجولة والذكورة فى الاخلاقيات والافعال
والمظهر العام يعطى انطباع لدى الاخرين عن شخصية الرجل
الحكم على المراة من اول مقابلة غالبا هيكون من التزامها واخلاقياتها ونوعية تفكيرها وتعبيرها عن نفسها فى حدود الادب والاخلاق
الانوثة تتمثل فى الخجل والالتزام خارج منزلها الاهتمام بانوثتها داخل منزلها
اكثر شىء يجذبنى اخلاقهاو التزامها

salma mohamed يقول...

موضوع هادف كعادتك يا موني,
أنا متفقه معاكِ في كل الحاجات تقريبا
لكن نقطة اللحيه كلامي فيها زي ما الدكتور ياسر قال بالظبط في كل كلمه,
والحديث الشريف الصحيح بيقول:
"أَحْفُوا الشَّوَارِبَ وَأَعْفُوا اللِّحَى".

أما انطباعي عن الرجل من اول نظره فالحمد لله نظرتي في اغلب الاحيان بتكون صائبه للاشخاص من اول مره مش بس الرجال,
لكن عموما المظهر العام واسلوب الكلام واول موقف مع الشخص غالبا بيبين اصله ومعدنه,
والرجوله تعني الكثير لي
تعني الوقار والعقل وتعني الشجاعه والشهامه والمروءه والكرم والامان والاحتواء والنخوة و...

أما ما يقلل من شأنه في نظري فالكثير الكثير زي مظهر اغلب الشباب دلوقتي واسلوب كلام الحشاشين والميوعه وعدم النظافه الشخصيه وطريقة الاكل الهمجيه اللي شوفتها في ناس مفروض مراكز عاليه وفي اماكن راقيه وقرفتني في عيشتي,
والبخل والطمع والجشع واحتقار الاخرين و..........
لو اعدت اقول من هنا للصبح مش هخلص,
معلش وجعت دماغك (:

MOHAMMED ELBANNA يقول...

موناليزا
والله كلامك جميل وياريت كتيييييييير من شبابنا يقراءة .
فعلاً الرجولة الان ضاعت بين مفرط ومتشدد.
تقبلي تحياتي على طرحك لمثل هذه القضايا الهامة .
محمد البنا
طريق النجاح

Mahmoud Ahmed يقول...

السلام عليكم
اولا هو موضوع حلو يكفي انه بيبين رايك في الرجال بصفه عامه ، و في رجل تتمنيه بصفه خاصه

يمكن كله متفق معاكي فيه و خصوصا و انا رجل ولكني فعلا بعترض على تصرفات الشباب ( افضل من كلمه الرجال هنا ) الى بيعلموها

بس طبعا فيه شويه اعتراضات على كلامك
لأنه اكيد كل واحد له راي و اختلاف
و اختلاف الراي لا يفسد في الود قضيه
بس عجبني الكلام برضه ^_^

ماء تشرين يقول...

كيف تكونين انطباع عن الرجل في اول مقابله ؟
اعتقد من لبسه وطريقه كلامه بعد كده بحكم على التفكير

مفهوم الرجوله؟

اممممممممم يالهوى ايه السؤال الصعب ده اصل الرجوله انقرضت اعتقد هو التصرف الصحيح في الوقت الصح ياعنى بخاف اوى لو لقيت راجل بيبكى

أكثر فعل يقلل من رجوله الراجل ؟
يكل مستيكه يبقه مستفز جدا

عايزه بس اقول انو في رجاله بجد كويسين وبيحقوقوا معنى الرجوله وشيك واستيل وملتزمين ياعنى فى ناس بيحققو معنى لرجوله الصح بس للاسف الاغلبيه بقت تافه و سطحيه

موضوع مميز كالعاده

موناليزا يقول...

راجى
ـــــــــ
أهلا بيك أستاذ راجى
أشكرك جدا لرأيك
وكنا نرجو إجابة الأسئلة المرفقة



***********************************


الشجرة الام
ـــــــــــــــ
اختى الحبيبة:اهلا اهلا بالقمر
أشكرك جدا لمشاركتك وستتم إضاغتها للموضوع
نورتينى حبيبتى واسعدنى تواجدك



*********************************


ريمان
ـــــــــ
أختى الحبيبة:اهلا اهلا بالقمر
أشكرك جدا لمشاركتك ولاتفاقك معى فى بعض النقاط
نورتينى ريمو الجميلة واسعدنى تواجدك



*********************************


د. ياسر عدالفتاح
ــــــــــــــــــــ
أهلا بيك يادكتور
يافندم هذا الموضوع أعرضه من وجهة نظر شخصية بحتة وليس بالضرورى أن يكون رأيى صواب
وعن استدلالى "من كان له لحية فليكرمها" لم أقول أنه حديث ولكنها مقولة سمعتها وأردت أن اضعها لاقتناعى بها
ومع ذلك يافندم كنا نرجو الاجابة على الأسئلة المطروحة
وما زلنا فى الانتظار


**********************************



همس الاحباب
ـــــــــــ
أهلا بيك استاذ خالد
أشكرك جدا لمشاركتك
وسيتم عرضها بإذن الله فى الموضوع القادم



********************************


سلمى محمد
ــــــــــ
أختى الحبيبة:اهلا اهلا بالقمر
أشكرك جدا لمشاركتك وستتم إضافتها للموضوع
نورتينى سلمى الجميلة واسعدنى تواجدك



***********************************



محمد البنا
ــــــــــــ
أهلا بيك استاذ محمد
أشكرك جدا لرأيك
ونرجو مشاركتك فى إجابة الاسئلة الخاصة بالرجال حيث أن هذا سيكون الموضوع القادم بإذن الله


***********************************


المدونة الاسلامية(سبايدر مان)
ــــــــــــــــــــــــــــــ
وعليكم السلام ورحمة الله وبركاته
أهلا بيك يافندم فى زيارتك الاولى
أشكرك جدا لرأيك وكنا نرجو أن توضح لنا إعتراضك من باب العلم بالشئ
وأيضاً مازلنا فى أنتظار إجابتكم على الأسئلة المطروحة فى نهاية الموضوع
نورت مدونتى وارجو دوام التواصل



***********************************


ماء تشرين
ـــــــــ
أختى الحبيبة:اهلا اهلا بالقمر
أشكرك جدا لمشاركتك وسيتم إضافتها للموضوع
نورتينى حبيبتى واسعدنى تواجدك

top-fn يقول...

السلاآآمـ عليكمـ ورحمة الله وبركاته

جميل التوبك صراحة وجميل ان هذا الرأى اتي من امراه

واتمني ان يكون دافع للشباب وسبب فى تغير افكارهم لاعتقاد البعض انه اذا لم يواكب هذه التصرفات والموضه كما يقال

فهو شخص من طراز قديمـ غير مرغوب فيه الآن

خالص تحياتي ,,

♥نبع الغرام♥♪≈ يقول...

السلام عليكى اختى امة الله اولا هذا رأيك وهذا فكرك نتاج اكيد معظم الخبرات والتجارب ولكن إشمحى لى بدون اى ضيق أن اقول راى

صحيح احيانا يقوم تاشباب ببعض السلوكيات الغريبه فى البس او الكلام وليس المعنى انه ليس رجل ولكن انظرى الى البيئه او الام او الصحبه التى تسببت فى هذا السلوك فلا تنسى اختى انكى كتبتى لنا محطه هامة واجب نبنى عليها احتمالات كثيره

هذا وممكن التعديل يعنى الشاب الا بيبالغ فى كذا او كذا إن قابل قدوه حسنه ممكن يتغير للأفضل لانه بالفطره رجل فعندما كل الاخوات الفضيلات مثلك ينظرون هذه النظره السبيه لبعض العلامات السيئه بهم اذن من سيأخذ بيدهم
وهكذا البنات واجب على الشاب عدم النظر اليها بأى نظره غير بعد الدراسه والمحاوله
تحياتى اليك وواجب ان تعلمى ان رغم استفذاذ بعض السلوكيات الا ان هذا لايخلى الرجل من رجولته فى تعلمى ربما وضع فى موقف اثبت فيه انه افضل ممكن يدعون الرجوله مظهريا والاحترام

♥نبع الغرام♥♪≈ يقول...

كيف تكونين إنطباع عن الرجل من خلال اول مقابلة؟
اولا بصراحه المهم عندى الراحه النفسيه يعنى يكون مهندم فى البس وغير مبالغ لكن الاهم بعد الحديث معه ربما تغلب الشخصيه على الهندام فلا ارى غيرها وربما كان مهمل الهندام ولكن يجذبنى بتفكيره فليس فى الحياه مقياس عام ولا ثابت وهكذا خاصة فيما يخص النفس البشريه

********

* ما مفهوم الرجولة بالنسبة لكِ؟

الرجوله هى الشخص العالى الفكر الحنون القلب القوى فى الشده الحمكه والاخلاص
هى السند والاهتمام ولكن لاننسى انه بشر مثلنا وتتخله نقاط الضعف مثلنا

*******
ما أكثر فعل يقوم به الرجل يقلل من نظرتك له؟

الكدب فهى بداية كل شر هى اول طريق الخيانه

موناليزا يقول...

عمرو
ــــــــــ
وعليكم السلام ورحمة الله وبركاته
أهلا بيك استاذ عمرو
وكنا نرجو إجابتك على الأسئلة المطروحة



***********************************





أحزان ايناس
ـــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
متفقة معاكِ جدا فالرجل الحقيقى يظهر فى المواقف ولكن هذه مجرد إنطباعات مبدأية منى قبل التعامل:)
أشكرك جدا لمشاركتك وقد تمت إضافته للموضوع
نورتينى انوسة الجميلة وفى انتظارك دائما

rovy يقول...

بوست رائع يا مونى و لكن اخشى ان لا تجدى كل تلك الصفات مجتمعه فى احداا الا من رحم ربى .. يعنى انا حاسه ان فيه رجال ممكن لما يقرؤا البوست يقولوا ايه الدكتاتوريه دى :)
اما عن الرجل بالنسبه لى فهو الامان و الاحتواء اشعر ان هذا اهم شىء لى فى رجلى ان يستطيع ان يمنحنى الامان و ان يحتوينى فى كل الاحوال ..

دمتى غاليتى بكل الخير

مودتى لكى دوما

Unknown يقول...

طبعاً كالعادة موضوعاتك هادفة مميزة تؤدي رسالة هامه ..
لن اجيب على تلك الاسئلة بالتفصيل ولكن سأتحدث بالمجمل المفيد ..

صراحة ان ما يدلل لي على طبيعة المرأه بالبداية هو تعاملها وأسلوبها وأدبها, ومظهرها لانني لن اعرف ثقافتها منذ اول لقاء ..
من خلال هذه الامور احكم عليها ,
وأن ما يثير انتباهي واتألم عليه , هو عندما ترين فتاة ذات جمال يتمناها اي رجل , ولكن للأسف تجدينها متبرجه بشكل كبير ’ فأتألم صراحة عليها

اشكر لكِ طرحك
فهو رائع كما اعتدنا
ارق نسمة

كلمات من نور يقول...

أسئلة للنساء:
* كيف تكونين إنطباع عن الرجل من خلال اول مقابلة؟.
* ما مفهوم الرجولة بالنسبة لكِ؟.
* ما أكثر فعل يقوم به الرجل يقلل من نظرتك له؟.
.لو هتختار صورة رمزية تعبر بها عن إجابتك على هذه الأسئلة فماذا ستكون؟.
----------------
كل دي أسئلة؟ ماشي ماشي يا موناليزتي

ج1:أول انطباع عندي هو احترام الموعد فدي أول علامة للرجل عندي ..
ج2:الرجولة بالنسبة لي حاجات كتير وتتمثل جميعها في صفات وخلق رسول الله صلى الله عليه وسلم ومن يقتدي بهديه وخلقه وتدينه هو الرجل المثالي في هذا الزمان
ج3:الصوت العالي وكثرة الجدل والكلام فأنا بحس باإن الكلام الكتير والصوت العالي يضعف حجة أي إنسان.

صورة رمزية أحطها هي صورة في موقع البطاقة مكتوب فيهاو إنك لعلى خلق عظيم و حديث السيدة عائشة أن رسول الله كان خلقه القرآن ...ربي يبارك فيكي يارب

Mahmoud Ahmed يقول...

السلام عليكم
لا هي الحقيقه مش اول زياره
لأن مدونتك عندي من فتره
و لكن هو فعلا اول رد لي هنا
.....
تقريبا اجابات الاسئله عندي واحده
الدين ثم الدين ثم الدين
اهم حاجه عندي هي التدين فقط
اي شئ آخر مش مشكله و قابل للتغير

د/عرفه يقول...

لا
فكرة الموضوع نفسها عجبانى جدا
بس كنا عايزين أراء أكتر للناس

عموما متفق معاك إلى حد ما فى المعظم

يعنى معترض على شوية
أولا لعب البلايستيشن اظن ان ده ولا عيب ولا حرام
وخصوصا لو كان مع ولاده بتكون وسيلة تقرب وتعارف وكده
ولو كان مع اصحابه بيكون وسيلة للتجمع وزيادة الالفة بينهم احسن ما يتجمعوا على شيشة او اى معصية تانية

بالنسبة للأحضان بين الرجال انا مليش دعوة بالاتيكيت الدولى انا ليا دعوة بالشرع فقد روى عن الرسول انه كان بياخذ بعض الصحابة بالاحضان عند مقابلتهم وخصوصا القادمين من السفر


بالنسبة للمرأة
أفضل الحكم عليها أثناء سلوكها العادى مع الناس ومع المجتمع حتى يكون الحكم افضل دون تصنع
اول شىء يلفت نظرى طريقة الملابس طريقة المشية وأكيد طريقة نظراتها فى الشارع لمن حولها
أكتر شىء يقلل أنوثة المرأة الصوت العالى والبجاحة وفرض كلامها ورأيها على زوجها

وأحيكى مرة اخرى على الفكرة

mahasen saber يقول...

يا جمال مواضيعك يا مونا

طمنينى عليكى فى الموضوع الاهم
اتفقنا عايزه اتطمن ان شاء الله

رفقة عمر يقول...

اتفق معاكى فى كل كلمه قولتيها
بس بصراحه يلفت نظرى شوز الرجل لما تكون نظيفه
طبعا اكره جدا الرجل اللى بيتكلم فى الماديات او اللى محدث النعمه الذى يتكلم على مالديه من امكانيات
احب الرجل الكريم الشهم الذى يعتمد عليه الصبور الجسور الشجاع الايجابى
الصداق الوافى دائما بعهده والشخصيه الاجتماعيه الناجحه فى علاقتها الاجتماعيه والناجح فى عمله
هى صفات كتير انا عارفه
بس اعمل ايه عايشه فى الاحلام
مش عارفه اصحى من احلامى

mohamed ghalia يقول...

هو ده فعلا الرجل ال اتكلمتى عنه
صعب الحكم من المظاهر لأول مرة
بس أكيد زى مذكرتى برده هيكون اللبس والأسلوب فى الكلام
ربنا يسعدك دايما
كل سنة وحضرتك بخير

فارس عبدالفتاح يقول...

ليس من المفروض أن احكم على إنسان من أول مقابلة ولكن هناك أناس تعرفهم من أول لحظة وليست من مجرد مقابلة لان الناس صناديق مغلقة مفاتيحها التجارب

مفهوم الأنوثة لدي هو أن تتحاشى الأنثى التدخل في أمور الرجال أو مخالطتهم وان تكون محافظة شكلاً وموضوعاً وان تكون قليلة الخروج من بيتها

الشيء الذي يلفت نظري للمرأة هو بعدها عن مواقع الزلل وتجنبها مخالطة الرجال وزيها المحتشم الفضفاض وكلامها الدال القليل والتي تبدي رأيها دون أن تفرضه والتي تتحمل العوز وتشكر عند الزيادة من تصل رحمها وتكرم جارها وتحفظ أهل زوجها

أكثر فعل يقلل من أنوثة وعفة المرأة لدي هو مخالطة الرجال بدون عزر وزيها السافر ووضعها المكياج

والله مش عارف يعني إيه صورة رمزية اعبر بها عن إجابتي على هذه الأسئلة .. بصراحة مش فاهم

وأخير إذا كان عندك عروسة بالمواصفات دي يا ريت تدليني عليها الله يكرمك وأنا والله لا امزح أو أهرج في هذا الكلام

jonoon 3aqel يقول...

السلام عليكم

أنا معاكي ف معظم اللي قلتيه..و شايف انه له معنى كبير و جميل..
ما عدى موضوع الشيبشب او الصندل؟!! مممم مادخلتش مزاجي :)
===
الاسئلة:
* كيف تحكم على المرأة من خلال أول مقابلة؟

اولا..الملابس..70% من حكمي "الاولي" يكون على لبسها اذا محتشم او لأ..
بعدها تكون طريقة الكلام...انها تتكلم بأدب..و ف نفس الوقت في حزم ف طريقة كلمها...ف النهاية انا راجل غريب عنها مش واحده من صحباتها..
===============================

* ما مفهوم الأنوثة بالنسبة لك؟

صراحة..كلمة أنوثة مرتبطة عندي "بالنعومة" و " الحياء"..

================================
* أكثر شئ يجذب انتباهك فى المرأة؟

لما يكون عقلها بيوزن بلد..
ف الآونة الأخيرة..بدأت أنتبه للشخصيات النسوية ..سواء في مجال قيادي او تعليمي او غيره..
و انبسط بجد لما اشوفها محتشمة..
بتأكد ساعتها أن الحجاب ابدا ماكنش عائق..
>>> مش عارف اجاوب ب أيه ع السؤال ده..


================================
* أكثر فعل يقلل من أنوثة المرأة بالنسة لك؟

انها تتعامل مع الرجال و كأنهم صديقات..فتضحك..و تخوض في مواضيع شرق و غرب خالص خالص..

=================================
.لو هتختار صورة رمزية تعبر بها عن إجابتك على هذه الأسئلة فماذا ستكون؟

ممم لا استطيع التحديد..لأنه لكل سؤال هتكون صورة :)


جزاك الله خيرا اختي

تحياتي

طهر فؤادك يقول...

السلام عليكم ورحمة الله وبركاتة

موضوع جميل جدا ويشد فعلا واحلى اوصاف بقى هقوللك دلوقتى ياستى للرجل ... ةهى اوصاف سيد الخلق : -

اوصاف النبى: كَانَ رَبْعَةً مِنْ الْقَوْمِ لَيْسَ بِالطَّوِيلِ وَلَا بِالْقَصِيرِ أَزْهَرَ اللَّوْنِ لَيْسَ بِأَبْيَضَ أَمْهَقَ وَلَا آدَمَ لَيْسَ بِجَعْدٍ قَطَطٍ وَلَا سَبْطٍ رَجِلٍ أُنْزِلَ عَلَيْهِ وَهُوَ ابْنُ أَرْبَعِينَ فَلَبِثَ بِمَكَّةَ عَشْرَ سِنِينَ يُنْزَلُ عَلَيْهِ وَبِالْمَدِينَةِ عَشْرَ سِنِينَ وَقُبِضَ وَلَيْسَ فِي رَأْسِهِ وَلِحْيَتِهِ عِشْرُونَ شَعَرَةً بَيْضَاءَ.

هكذا علمنى سيدنا محمد( صلى الله عليه وسلم) يقول...

السلام عليكم ورحمة الله وبركاته
حياكى الله وبياكى أختى الكريمة وجعل الجنة مثواى ومثواكى
أدعوا الله أن تكونى فى خير حال وفضل وكرم من الله

منى يقول...

وحشااااانى اوى اوىىىىىىىى
كل سنه وانتى طيبه وبالف خير

كالعاده متفقه معاكى فى كل كلمه

اعتقد ان الرجل الحقيقى فى رائى فهو الذى اشعر بالامان والاكتفاء فى وجوده
كل التحيه والحب لموناليزا العزيزه

salwa يقول...

السلام عليكم اخت موناليزا
اولا عيد اضحى مبارك لكي و لكل الامة الاسلامية
مقال مهم لو طبقناه انشانا اسرة سعيدة
وهي نواة الوطن
تسلم يدك
سلام

(green eyes) يقول...

انا انطباعي الاولي مش دايما بيكون صائب
بس على العموم انا الرجولة بالنسبالي مش بتبان بالكلام يعني لازم يكون فيه مواقف تبينلي اذا كان الشخص اللي قودامي راجل ولا عيل سيس لامؤاخذة :)
الراجل عندي لازم يكون بيعرف الاتيكيت والذوق ويعرف يعامل ازاي اي شخص اودامه ويكون محترم بيجبر اللي قودامه انه يحترمة ويكون عارف هو بيقول ايه مش اي كلام يتقال وخلاص. وطبعا يكون بيتحمل المسئوليه اللي 70% مبقتش موجوده ويكون ذكي واخلا

اكثر حاجه بتعجبني :الجرأه وتحمل المسئولية

اكثر حاجه بكرهها : البخل و العصبيه وسوء النيه

تقبلي مروري

MOHAMMED ELBANNA يقول...

أمة الله
تحت امرك يا ستي
استعنا بالله
ــــــــــــــــــ
-كيف تحكم على المرأة من خلال اول مقابلة ؟
من خلال طريقة ملابسها وطريقة تعاملها مع من حولها .
-مفهوم الانوثة ؟
الرقة والتعامل بذوق واحساس عالي وراقي
-اكثر شيئ يجذب انتباهك في المرأة ؟
حيائها ورقه تعاملها
-اكثر صفة تقلل من انوثة المرأة ؟
تقمصها شخصية الرجال ، وعدم حيائها والتحرر في الكلام وفي الملابس والفعل .
ــــــــــــــــ
محمد البنا
طريق النجاح

واحد من البلد دى يقول...

السلام عليكم

والله يا أخت أنا كنت لسه باتكلم مع زوجتى بالأمس فى الموضوع ده..(مظهر الرجولة)..وكان رأيى فيه أنه لا يجب على الرجل أبدا أن يظن أنه يجب أن (يشرب المخدرات) أو( يدخن )أو(يشخر)بين الكلمة والأخرى أو(يسب الدين)أو (يحلف بالطلاق)أو(يترنح فى المشى)-ليثبت لمن حوله أنه (مسطوووول).....لا يجب عليه أن يفعل كل ذلك فى الخارج بينما هو فى الداخل أو على المستوى العائلى(شخصية مهمشة)إذا نطق لا يعيره أحد إهتماما وإذا صمت لا يطلب منه الكلام..بينما الرجوله تتلخص فى كلمة واحدة .......وهى...
(الرجووووووووولة)

دمتى بكل خير وحمدا لله أن وجدتك بصحة تدوينية جيدة

الربان يقول...

تحياتي

اشكرك علي الموضوع...

في رأيي ان " الرجولة " كلمة شامله جامعة لمعاني نبيلة كثيرة...

وان نصف شخصا ما بأنه" رجل " يعني في المقابل انه يتميز بصفات الرجولة.

ليس من ضمن صفات الرجولة التشبة بالنساء...
ليس من الرجولة النكوص عن عهد قطعه
علي نفسه...فالرجل في رأيي مسؤول عن كلمته و عهده...و الامثال الشعبية تعبر عن ذلك مثل " كلام رجاله"..." الراجل بيتربط من لسان" اي من كلمته.

و مما لا شك فيه ان المظهر هو اول ما يدل علي شخصية الانسان...و لا يعني هذا
قيمة ما يرتديه الانسان بل مدي تناسق
ما يرتديه...و نظافة ما يرتديه...و مناسبة ما يرتديه لسنه...

بالنسبة لي اري ان نظافة الحذاء شيء اساسي و مهم....

اري ان الشكل الطبيعي للشعر يعني بدون
تلوين او تسريحات مجنونة كما نشاهد البعض...

الحقيقية الموضوع مهم و محفز للتفكير و الكتابة...

تحياتي و تقديري لحضرتك و كل عام و انت بالف خير.

الربان يقول...

عفوا نقطة مهمة كان لابد ان اعرج اليها الا و هي نظرة الشاب الي المطلقة

و يجب ان نعلم جميعا ان كل شيء قسمة و نصيب...و ان هذه المرأة قد تكون افضل بكثير من اخريات غير مطلقات...قد تكون
طلقت لتمسكها بتعاليم دينها...
او لان زوجها لا يمكنه ان يكون أبا لقصور ما او خلل ما في الحيوان المنوي او خلافه و هي ترغب ان تكون ام...

اخير نتذكر ان هذه المرأة هي اخت او ابنة عم او خال...و ان ما حدث قد لا يكون لها اي ذنب فيه.

تحياتي و تقديري

sakayar يقول...

من الجميل أن نقرأ رأي الأنثى في الرجل
جميلة التدوينة
ربما أول مرة أو ثاني مرة تعليق لي في المدونة رغم متابعتي لها على الريدر
عادةً ما أصل إلى نهاية البوست عند حضرتك وأتركها وأنا مبتسم خصوصاً مع تدوينات جوجو وزمردة وطريقة الحوار الممتعة
جزاك الله خيراً على آرائك الشيقة دائماً
وأدام سعادتك
دمت على الخير دائماً
تقبلي مروري

سمية قهوة يقول...

موضوع لذيذ و جميل
اتفق معكي في ل الحاجات اللي قولتيها ماعدا حكاية الشبشب فيها ايه لما الراجل يكون نازل يصلي و يلبس الشبشب او نازل يجيب حاجة سريعة من السوبر ماركت فيلبس الشبشب مش شايفاها حاجة تقلل من رجولته

موناليزا يقول...

روفى
ـــــــ
أختى الحبيبة:اهلا اهلا بالغالية
:)مازلت واثقة بوجودهم حتى وإن بان الأمر فى ظاهره صعب
ربنا يسعدك ياحبيبتى ويباركلك فى حياتك اللهم امين
قد تمت إضافة رأيك للموضوع
بس كنت عايزة اعرف ايه اللى بيقلل من نظرته ليه؟
نورتينى روفى الجميلة واسعدنى تواجدك ومشاركتك



*******************************


مستر/ حازم
ـــــــــــ
اهلا بيك استاذ حازم
اشكرك جدا لرايك فماتوفيقى الا بالله
أشكرك جدا لمشاركتك وستزين الموضوع القادم بإذن الله


********************************


كلمات من نور
ــــــــــــــ
أهلا اهلا بالغالية
:) زورونا تجدوا ما يسركم
أشكرك جدا لمشاركتك وقد تمت إضافتك للموضوع
نورتينى حبيبتى واسعدنى تواجدك



*******************************


المدونة الاسلامية- سبايدر مان
ــــــــــــــــــــــــــــ
وعليكم السلام ورحمة الله وبركاته
اهلا بيك مجددا يافندم
يسعدنا تواجدكم دائما
أشكرك جدا لمشاركتك وسيتم إضافتها للموضوع القادم بإذن الله



******************************


د/ عرفة
ــــــــ
أهلا بيك يادكتور
ليت الجميع بشارك فعلا لتعم الفائدة على الجميع من خلال سماع الآراء المختلفة

بالنسبة للعب البلاى استيشن احترم وجهة نظرك جدا وخصوصا انها أفضل من أشياء أخرى كثيرة ولكنى اعترض عليها اذا تمت امام حشد من الناس او فى اجتماع مهم مثلا او الغاء موعد عشان الجيم مخلصش وما الى ذلك
أما بالنسبة لحرمتها فهى تعتبر من اللهو وتضييع الوقت
وأذكرك بهذا الحديث" ( ليس من اللهو إلا ثلاث: تأديب الرجل فرسه, وملاعبته أهله, ورميه بقوسه ونبله ) أخرجه أبو داود وغيره

بالنسبة للاحضان
الاسلام أصلا هو أساس الاتيكيت فالاحضان والقبلات بين الرجال مكروهة وزى ماحضرتك قلت العناق فى حالة الاتيان من السفر فقط

: عَنْ أَنَسِ بْنِ مَالِكٍ رضي الله عنه قَالَ : ( قَالَ رَجُلٌ : يَا رَسُولَ اللَّهِ ، الرَّجُلُ مِنَّا يَلْقَى أَخَاهُ أَوْ صَدِيقَهُ أَيَنْحَنِي لَهُ ؟
قَالَ : لا .
قَالَ : أَفَيَلْتَزِمُهُ وَيُقَبِّلُهُ ؟
قَالَ : لا .
قَالَ : أَفَيَأْخُذُ بِيَدِهِ وَيُصَافِحُهُ ؟
قَالَ : نَعَمْ ) والحديث حسنه الألباني في صحيح سنن الترمذي .
وعن أنس رضي الله عنه قال : ( كان أصحاب النبي صلى الله عليه وسلم إذا تلاقوا تصافحوا ، وإذا قدموا من سفر تعانقوا ) رواه الطبراني. .

أشكرك جدا لمشاركتك وسيتم عرضها بإذن الله فى الموضوع القادم



********************************


محاسن صابر
ـــــــــــ
أختى الحبيبة:اهلا اهلا بالغالية
أشكرك جدا لرايك
ماتحرمش من سؤالك أبداً ياحبيبتى
مازلت فى انتظار فرج الله ونصره دعواتك
نورتينى سونا الجميلة واسعدنى تواجدك




*********************************



رفقة عمر
ـــــــــــ
أختى الحبيبة:اهلا اهلا بالقمر
مش احلام ياحبيبتى انها واقع حتى وان تأخر حدوته
قد تمت إضافة مشاركتك للموضوع
نورتينى حبيبتى واسعدنى تواجدك



******************************



محمد غالية
ــــــــــــ
أهلا بيك استاذ محمد
وحضرتك طيب وبخير
ربنا يسعدك ويرزقك بكل الخير
أشكرك جدا لرايك وفى انتظار مشاركتك فى الاجابة على الاسئلة المطروحة



********************************


فارس عبد الفتاح
ـــــــــــــــــ
أهلا بيك استاذ فارس
عندك حق
أشكرك جدا لمشاركتك وبإذن الله سيتم إضافتها فى الموضوع القادم
والصورة الرمزية وضحت مقصدى باستفاضة فى اخر الموضوع أرجو قراءته
اما عن العروسة
فالحمدلله ما اعرفهن كثيرات يتمتعن بهذه المواصفات ولكن للاسف يفضلن الزواج فى المنصورة حيث يقنطن


********************************

موناليزا يقول...

جنون عاقل
ــــــــــــ
أهلا بيك يافندم
:) أحترم وجهة نظرك مع الاحتفاظ بوجهة نظرى
أشكرك جدا لمشاركتك ويستم إضافتها لموضوعى القادم بإذن الله



**********************************


طهر فؤادك
ـــــــــــ
وعليكم السلام ورحمة الله وبركاته
اهلا بيك يافندم
أشكرك جدا لاضافة وصف سيد الخلق
وكنا نريد مشاركتكم فى اجابة الاسئلة المطروحة



******************************


هكذا علمنى سيدنا محمد صلى الله عليه وسلم
ـــــــــــــــــــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك ويتقبل دعائك ويرزقك بالمثل اللهم امين
ندعوكم للمشاركة واجابة الاسئلة المطروحة



*******************************


منى
ـــــ
أختى الحبيبة:اهلا اهلا بالقمر
ايه النور ده:)
وانتِ كمان ياحبيبتى وحشاااااااانى اوى فينك من زمان
كل سنة وانتى طيبة وبكل الخير
تمت إضافة مشاركتك
نورتينى منمونة القمر واسعدنى تواجدك



**********************************


سلوى
ـــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
عيد اضحى سعيد علينا جميعا يارب
اشكرك جدا لرايك
نورتينى سلوى الجميلة واسعدنى تواجدك



********************************


جرين آيز
ـــــــــ
أختى الحبيبة:اهلا اهلا بالقمر بعد طول غياب
اشكرك جدا لمشاركتك وقد تمت اضافتها للموضوع
نورتينى حبيبتى واسعدنى تواجدك



**********************************


محمد البنا
ــــــــــــ
اهلا بيك استاذ محمد
مشكوور جدا لتلبيتك طلبى
وستتم إضافته للموضوع القادم بإذن الله
أشكرك جدا لتواجدك



********************************


واحد من البد دى
ــــــــــــــــــ
وعليكم السلام ورحمة الله وبركاته
اهلا بيك يافندم بعد طول غياب
كنا نرجو مشاركتك فى الاجابة المطروحة
شكر الله لك


*********************************


الربان
ـــــــــ
أهلا بيك يافندم
كل عام وحضرتك بخير وبصحة
أشكرك جدا لرايك واتفاقك معى فى بعض الامور
أحييك لنظرتك للمرأة المطلقة ونرجو ان تكون نظرة الجميع لهن كذلك
وكنا نرجو مشاركتك فى الاسئلة المطروحة
أشكرك جدا لتواجدك



*********************************


سكاير
ــــــــ
اهلا بيك يافندم
اشكرك جدا لرايك ويسعدنى متابعتك حتى وان لم تترك تعليق
وارجو ان تكون كتاباتى عند حسن ظنك
دائما
وكنا نرجو مشاركتك فى الاجابة على الاسئلة المطروحة
أشكرك جدا لتواجدك




*******************************



سمية قهوة آه يانى
ـــــــــــــــــــ
اختى الحبيبة:اهلا اهلا بالقمر بعد طول غياب
اشكرك جدا لرايك
هى عموما وجهات نظر:)
انا شايفة الحركة دى عدم اكتراث بالمكان اللى هيذهب اليه حتى لو كان هيزور جاره اللى فى الشقة اللى قصاده
نورتينى حبيبتى واسعدنى تواجدك

sakayar يقول...

عدت مرة أخرى لأن الوقت بالأمس لم يسعفني للاجابة على الأسئلة فآثرت التواصل حتى يقدر الله لي الاجابة على هذا الأسئلة - اللي خارج المقرر
:)
--------------------------------
كيف تحكم على المرأة من خلال أول مقابلة؟
المرأة لوغاريتم صعب حله لا أظن أنه يكفي العمر كله لتكوين رأي أو حكم عليها ... لكن هناك بعض الأفعال التي تعطيك انطباعات أولية عنها
فمثلاً الصوت ... طريقة التحدث أمام الرجل إذا كانت فيها جرأة أو تحمل معنى الحياء في وقارها وهدوءها
--------------------------------
* ما مفهوم الأنوثة بالنسبة لك؟
الأنوثة : نعمة أنعم الله بها على بني آدم في شريك له يعمر الأرض ويعينه في طريقه لربه و على أموره الحياتية

الأنوثة : أشياء كثيرة أولها الوقار والحياء
الأنوثة : احتواء وحنين ودفئ
الأنوثة : الرحمة
الأنوثة : أمومة وطفولية وذكاء لماح
الأنوثة : عاطفة و غيرة
الأنوثة : ذوق رفيع في التعامل والملبس والتفكير و عقلية متفتحة
-------------------------------
* أكثر شئ يجذب انتباهك فى المرأة؟
إذا كان السؤال أثناء التعامل فاجابتي : طريقة التفكير
إذا كان السؤال بمجرد النظر : فاجابتي المظهر والحياء
--------------------------
* أكثر فعل يقلل من أنوثة المرأة بالنسة لك؟
جرأتها على الرجال في التعامل أو ضحكاتها
---------------------------------
يارب أكون جاوبت صح
:)
تقبلي مروري
جزاكم الله خير على مدونتكم الشيقة

احمد يقول...

عفوا سيدتي ولكن كان لكي أن تقولي في كلمة واحدة

أن يكون مسلم قلبا وقالبا

والشريعة الاسلاممية الحمد لله وضحت كل شيء سواء في المعاملات او التصرفات او غيره

بلا افراط ولا تفريض

وشكرا جزيلا لكي والله يوفقك للخير ويوفقنا جميعا

موناليزا يقول...

سكاير
ـــــــــ
أهلا بعودتك مجددا يافندم
أشكرك جدا على مشاركتك رغم عدم اجابتك على السؤال الاخير الخاص بالصورة الرمزية:)
ستتم إضافة مشاركتك بإذن الله فى الموضوع القادم
فى انتظاركم دائما





***********************************



ادم
ـــــــ
أهلا بيك استاذ ادم فى زيارتك الاولى
مع احترامى الشديد لما تقوله واقتناعى به ولكن ما عبرت به عن وجهة نظرى يشترط أيضا بالتربية والنشأة الإجتماعية وليس بالدين فقط
ربنا يكرمك واشكرك جدا لتعليقك
نورت مدونتى وارجو دوام التواصل

Dr. Ibrahim يقول...

لو كانت أراء النساء فى الرجال كرأى حضرتك ورأى المدونات المحترمات بمثل هذا الرأى لكنا رأينا شباباً محترم وليس شباب كوول كل همه أن يصبح كول ليرضى انثاه ...
تقبلوا وافر الاحترام

بنت الصالحين يقول...

الإنطباع الأول للرجل في نظري يكمن في هدوءه وطيب كلامه

ماأكرهه في الرجل وبشدة

* صوته العالي (دا بيدل على ضعف شخصيته وعدم تحكمه في الموقف ليس اكثر من ذلك) وهذا من مظاهر الضعف في الرجل امامي

*أرى كثيرا في الشارع رجالاً يبصقون على الارض (هل لأنه رجل يفعل ذلك ,؟؟) شئ مقزز

*حينما أذهب في المواصلات وأركب باص أجد نساء يقفنّ في الباص والشباب بقمة الاستهتار ويجلسنّ ولايهمهنّ الوضع


الرجل موقف

الرجل كرامة
الرجل شهامة
الرجل حكيم في تصرفاته وافعاله

أحب جدا الرجل الذي حينما يرى شيئا يعجبه أجده يبتسم ولا اجده يقهقه


أطلت عليكِ مووون : )

موناليزا يقول...

د/ابراهيم
ـــــــــــــ
اهلا بيك يادكتور
أشكرك جدا لرأيك وكنا نرجو مشاركتك فى الاجابة على الاسئلة المطروحة




***********************************



عاشقة الفردوس
ــــــــــــــــ
أختى الحبيبة:اهلا اهلا بالقمر
إطالة إيه بس!! ده أنتِ جاوبتى زى ما كنت عاوزة بالظبط:)
وقد تمت إضافة مشاركتك فى الموضوع
نورتينى ياجميلة واسعدنى تواجدك

Dr. Ibrahim يقول...

الاجابة على الاسئلة ولا تزعلوا خالص:)
بس هما سؤالين اللى انا هقدر اجاوب عليهم:)
اولا الحكم على المرأة من أول مقابلة لا يمكن إطلاقاً ودا رأيى فقد تكون فى اول مقابلة شىء(مثلا عندها وقار وواقفة على الشجرة ومستنية اللى يقطفها) وعند معاملتها فى ثانى مقابلة تكون شىء أخر لا أتمناه (هبلة مثلاً).


أكثر شىء يجذب انتباهى
الهدوء والوقار والطيبة .

اما بالنسبة للكمبيوتر
وديه فى مركز صيانة محترم فى المنصورة مثلا عندك شركة تايجر
ولو هو فعلا فى مركز صيانة محترم
يبقى اصبرى بقى ليه
لان الهارد ليه ميديا وليه بورد
والميديا لو موجودة خلاص متخافيش المعلومات موجودة اما البوردة لو طارت مش مشكلة بس استنى بقى ليه
لانه مثلا بتاع الصيانة بيستنى لما حد الميديا بتاعته باظت ومستغنى عن البوردة يقوم جايبلك البوردة بس المشكلة ان الهاردات انواع وكل نوع وليه بوردة معينة
فغالباً اصبرى وربنا يعوض على البوردة بتاعت الهارد

موناليزا يقول...

د/ابراهيم
ــــــــــــ
أهلا بعودتك مجددا يادكتور
أشكرك جدا لتلبية طلبنا فى الإجابة وسيتم نشرها بإذن اللى فى الموضوع القادم
====
بجد ياكتور يعنى فيه أمل:)
ربنا يخليك
هو فعلا الميديا كويسة وهو بيحاول فيه مع اى بوردة تجيله وربنا كبير
أشكرك جدا بجد لانك أديتنى أمل حتى لو ضعيف
خالص دعواتى لك بكل الخير

Dr. Ibrahim يقول...

ولا أمل ضعيف ولا حاجة :)
احسن اللى انا قلته لحضرتك دا تقريبا بتاع الصيانة قالك زيه قبل ما انا اقوله فانا مجبتش حاجة جديدة:)
وانا إن شاء الله هسأل باش مهندس صديق وهو معيد فى كلية اتصالات على امكانية ارجاع المعلومات من الهارد فى حالة عدم وجود بوردة مناسبة لاقدر الله
بعد العيد إن شاء الله
وكل سنة وحضرتك طيبة

Mafrousa يقول...

حبيبة قلبي
كل سنة و انتى طيبةو انا جريت بين سطور البوست بتاعك
و الصراحة يعنى هو موضوع مهم للرجالة و الستات

تحياتي

غير معرف يقول...

بالنسبة لانطباعي الاول بيكون ارتياح نفسي لما بيكون بشوش مش مكشر ولا شايف نفسه ومظهره جميل ولائق

الرجولة بالشهامة وبالشخصية القوية و الاحتواء والامان والمعاملة الطيبة والحنية

واكثر ما اكرهه : الغرور والتباهي والتصرفات الغير لائقة والمقززة من معاكسات وقلة ادب والفاظ سيئة مووتي يكون لسانه طويل وبيقول كلام بذيء وكمان الاستهتار بمشاعر المراة والخيانة ..

غير معرف يقول...

وحشاااااااني موت ياحبيبتي

اخبارك ايه يارب تكوني بالف خير

بووست هايل بجد

الرجل الي بتتكلمي عنه نادر وجوده في الزمن دا :]

كل سنة وانتي طيبة

وعيد سعيد عليكي يارب

دمتي بحفظ الرحمن

موناليزا يقول...

د/ ابراهيم
ــــــــــــ
ازاى بس يافندم تأكيد حضرتك لكلامه بيدينى أمل
ومتشكرة ليك بجد على نيتك فى سؤال صديقك بعد العيد ان شاء الله
جزاكم الله عنى خير الجزاء





**********************************



واحدة مفروسة
ـــــــــــــ
أختى الحبيبة:اهلا اهلا بالقمر
فينك ياجميلة من زمان وحشاانى
أشكرك جدا لرايك
ويارب يكون عيد سعيد علينا جميعا نورتينى حبيبتى واسعدنى تواجدك

موناليزا يقول...

نوارة
ــــــــ
أختى الحبيبة:اهلا اهلا بالقمر
انا الحمدلله بخير ماتحرمش من سؤالك
:)
ويبقى الأمل مادامت الحياة:)
كل سنة وانتى بالف خير وعيد سعيد علينا جميعا

اشكرك جدا لمشاركتك وسيتم إضافتها للموضوع
نورتينى ياجميلة واسعدنى تواجدك

من غير عنـــوان يقول...

بناءا على طلبك

أولا شكرا للدعوه
ثانيا الأراء مفيده

ثالثا زي ما قال أبويا

الراجل عشان يكون راجل لازم يكون راجل...

يعني تعريف الراجل= راجل

من غير شعر ... بشعر..
أو تي شيرت... ولا لأ

المهم
* حُسن التصرف
*الشعور بالأمان عنده
*الحنيه والمسئوليه
*معرفة قيادة السفينه التي بها من هم في مسئوليته
* حاجات كتير...

أمنياتي

موناليزا يقول...

من غير عنوان
ـــــــــــــ
اهلا بيك يافندم
أشكرك جدا لتلبيتك الدعوة واجابة الاسئلة
ولكن اخى الفاضل نريد رأيكم فى المرأة وليس فى الرجل
ويبقى التواصل

أبو كريم يقول...

يا أمة الله ثبتك الله وهداك وسدد بالحق خطاكى

ليس كل ذكر رجل لان الذكوره والأنوثه خلق اما الرجوله فهى صفه مكتسبه

فالرجل هو من يحسن أستخدام قوامته الذكوريه فى المواقف لكى يدلل على قوامته بمعنى الرجل ( شجاع - كريم - شهم إلخ)

ولا أعتقد أن من يتشبه بالغرب فى ملبسهم أو بحركاتهم يمت للرجوله بصله


تقبلى مرورى

موناليزا يقول...

ابو كريم
ــــــــــــ
اهلا بيك استاذ بهاء
أفتقدنا دعائكم الجميل الذى تبدأ به التعليق:)
عندك حق فالرجولة صفة مكتسبة حقا
ففية ستات مثلا بمية راجل
اشكرك جدا لتعليقك
يسعدنى مرورك دائما

موناليزا يقول...

اولا : انا بعتذر لاخواتى المدونين اللى تركوا تعليق ومالقيوش رد
انا نفسى مستغربة لانى فاكرة انى رديت على كل التعليقات
عموما انا بشكر الدكتور عرفة لانه نبهنى لكده
وواضح ان بلوجر بيستعبط معايا

موناليزا يقول...

روفى
ـــــــ
اختى الحبيبة:اهلا اهلا بالغالية
عارفة انهم قليلين بس كفاية انهم موجودين:)
ربنا يسعدك ياحبيبتى واشكرك جدا لمشاركتك
وكنا عايزين نعرف ايه اكتر صفة بتكرهيها فى الرجل؟
نورتينى ياجميلة واسعدنى تواجدك

موناليزا يقول...

كلمات من نور
ـــــــــــــــ
اختى الحبيبة:اهلا اهلا بالغالية
أى خدمة:)
زورونا تجدوا مايسركم:)
أشكرك جدا لمشاركتك وتمت إضافتها للموضوع
نورتينى ياجميلة وتسعدينى دايما بتواجدك

موناليزا يقول...

المدونة الاسلامية سبايدر مان
ــــــــــــــــــــــــــ
اهلا بعودتك مجددا يافندم
يسعدنا دوام التواصل
وتمت إضافة مشاركتك
أشكرك جدا لمشاركتك

موناليزا يقول...

مستر حازم
ــــــــــ
اهلا بيك استاذ حازم
أشكرك جدا لرأيك لمشاركتك
وقد تمت إضافتكم للموضوع
ويبقى التواصل

موناليزا يقول...

د/ عرفة
ـــــــــ
اهلا بيك يادكتور
انا كمان برضه كنت عايزة اراء كتير:)

مع احترامى لما تقول واقتناعى بان لعب البلاى ستيشن اهون بكتير واخف ضررا من أشياء أخرى
لكن عيب بجد لما رجل يلعب كده قدام حشد من الناس فى اجتماع مثلا او فى محاضرة او ندوة ويأخر ناس على موعدهم لان الجيم لسه مخلصش مثلا وما الى ذلك
اما بقى حكم الشرع فانا مقتنعة بالحديث الشريف" ليس من اللهو إلا ثلاث: تأديب الرجل فرسه, وملاعبته أهله, ورميه بقوسه ونبله ) أخرجه أبو داود وغيره

بالنسبة للاحضان انت قلتها بنفسك لما تقابل حد جاى من السفر غير كده فمنهى عنه
وكما ورد فى الحديث". ... قال رجل يارسول الله , الرجل منا يلقى اخاه أو صديقه أينحني له؟ فقال لا قال أيقبله قال لا قال أيعانقه قال لا بل يصافحه"
وذكر أن العناق لا يتم الا فى حالة السفر

وعلى فكرة هما بياخدوا اصل الاتيكيت من الشريعة الاسلامية
أشكرك جدا لمشاركتك وقد تمت إضافتها للموضوع
وأشكرك جدا لتنبيهى على عدم ارسال ردى على بعض التعليقات

موناليزا يقول...

محاسن صابر
ــــــــــ
اختى الحبيبة:اهلا اهلا بالقمر
أشكرك جدا لرأيك
الحمدلله ياحبيبتى مازلت فى انتظار فرج الله ونصره أسألك الدعاء
نورتينى سونا الجميلة واسعدنى تواجدك


*********************************


سمية قهوة اه يانى
ــــــــــــــــ
اختى الحبيبة:اهلا اهلا بالقمر بعد طول غياب
أشكرك جدا لرايك
وهى عموما وجهات نظر وانا احترم وجهة نظرك
بس الحركة دى مش قبلاها بجد حتى لو هيزور جاره اللى فى الشقة اللى قدامه بحس بعدم اكتراث للمكان او للناس اللى هيقابلهم
نورتينى ياجميلة واسعدنى تواجدك

موناليزا يقول...

الربان
ــــــــ
اهلا بيك يافندم
أشكرك جدا لرايك وكنا نريد رأيكم فى المرأة
وأشكرك على ماقلته بخصوص المرأة المطلقة لانه حقيقة ولكن يغفلها الغالبية
نورتنى ويبقى التواصل



********************************


واحد من البلد دى
ــــــــــــــــــ
وعليكم السلام ورحمة الله وبركاته
اهلا بيك يافندم بعد طول غياب
اشكرك جدا لتعليقك وكنا نريد رأيكم فى المرأة
مع التحية

موناليزا يقول...

رفقة عمر
ـــــــــــ
اختى الحبيبة:اهلا اهلا بالقمر
:)
اشكرك جدا لمشاركتك وقد تمت اضافتها للموضوع
نورتينى حبيبتى واسعدنى تواجدك


******************************


محمد غالية
ـــــــــــ
اهلا بيك استاذ محمد
اشكرك جدا لتعليقك وكنا نريد رأيكم فى المرأة

****************************


فارس عبد الفتاح
ـــــــــــــــ
اهلا بيك استاذ فارس فى زيارتك الاولى
اشكرك جدا لمشاركتك وقد تمت اضافتها فى الموضوع الجديد
العرايس كتير بنفس المواصفات ولكن للاسف يفضلن الزواج فى المنصورة حيث يقنطن
نورت مدونتى وارجو دوام التواصل

Ramy Wasel يقول...

ممكن تلخيص كل هذه الشروط فى جمله واحده
انه يكون راجل
وبس
لان الرجوله تعريفها كل هذه الشروط

أسئلة للرجال:
* كيف تحكم على المرأة من خلال أول مقابلة؟.
من الظلم الحكم على المرأه او الرجل من اول مقابله

* ما مفهوم الأنوثة بالنسبة لك؟.
انا شرحته وانت تفضاتى بالتعليق عليه

* أكثر شئ يجذب انتباهك فى المرأة؟.
الحياء

* أكثر فعل يقلل من أنوثة المرأة
بالنسة لك؟.
التصرف كالرجال


موضوع اكثر من رائع

موناليزا يقول...

رامى واصل
ــــــــــــ
أهلا بيك أستاذ رامى
معاك حق.. بس فيه ناس تعتقد بأن الرجل يكتفى بنوعه المكتوب فى البطاقة الشخصية
:) يبقى اكيد انا موضحتش قصدى بالسؤال
قصدت يعنى انطباعك الأولي مش الحكم بالمعنى الحرفى للكلمة:)

أشكرك جدا لمشاركتك ولتعليقك
نورتنى