السبت، 5 ديسمبر 2009

علامات المحبة

كثيراً ما نحتار فى تعاملات شخص ما معنا وهل هو يحبنا حقاً كما يقول ويدعي أم أن مشاعره تجاهنا لا تتعدى كونها معرفة عادية. ولا أقصد هنا الحب بين الرجل والمرأة فقط ولكن أقصد المعنى الشامل بين بنى البشر أجمع وعلى إختلاف علاقاتهم.مثال: الصديق وصديقه ,الأخ وأخوه ,الجار وجاره وما إلى ذلك من علاقات موجودة فى حياتنا جميعاً.
ولذلك سأعرض بعض الدلالات لهذا. مع إعتقادى بأن الجميع يتفقون معى فى الرأى بأن الحب فعل وليس قول فقط.
* الحبيب لا يفشي سِر حبيبه.هناك أسرار خاصة بينهم حتى لو كانت مجرد حوار عادى ولا يشترط قائله أن هذا سِر ولكن المُحب يريد أن يشعر بالخصوصية وهذا يعنى أنه يأخذ وبجدارة لقب أمين سِر. ومهما حدث بينهم من إختلاف طبيعى أو زعل يضمن أن سِره فى بير ومفيش حد أبداً ممكن يعرفه.
* اللى بيحب بجد هيبحث عن أى مناسبة لكى يأتى بهدية لحبيبه وإن لم يجد مناسبة فسيبحث عن أى شئ يحبه حبيبه ليأتى به إليه لمجرد أن يراه سعيد . ودون أن يطلب منه.
واللى مابيحبش هيهرب من أى مناسبة المفروض يجيب فيها هدية حتى ولو طُلب منه.
*اللى بيحب بيتلذذ فى العطاء ويجد متعة فى التفكير فى كيفية إسعادك ومفاجأتك مفاجآت سارة.
اللى ما بيحبش بيتلذذ فى الأخذ فقط بل واستنزاف من أمامه ويعتمد على مشاعر الطرف الآخر فى تلبية جميع طلباته دون تأفف أو إعتراض.
ولا يعلم بأن العلاقات الأبدية الجميلة دائماً تبادلية( أخذ وعطاء).
إذا ما كان شخصان يتشاركا فى قارب واحد وأحدهما فقط من يجدف أكيد هييجى فى عرض البحر وقوته هتنهار.
* الحب بيقلب الموازين بيجعل أعقل العقلاء فى قمة الجنون. ويؤدى إلى حالة من النشوة والسعادة الداخلية التى تشع بالبهجة على جميع من حوله.إستحالة تجد شخص فى حالة حب وتلاقيه كئيب.
* اللى بيحب بيعطى بكل طاقته ويبذل أقصى ما فى وسعه ليرى بسمة حبيبه.
* لا يتحمل أن يراك مُتألم مهما كانت الأسباب.بل ويبكى لحزنك ويفرح لسعادتك.
* على أتم إستعداد أن يفديك بروحه لمجرد أن لا يرى دمعة واحدة من عينيك.
* لا يستطيع البُعد أو الفراق عنك. فوجودك وحده يثير السرور فى حياته.
* يتحملك مهما يحدث ويجيب لك أعذار دايماً. ويسامحك سريعاً. ويرضى منك بأقل القليل. المهم بالنسبة له أنك تفضل موجود فى حياته.
* الصب تفضحه عيونه.اللى بيحب بيبان فى عينيه.
* يُسلم لك نفسه بلا تفكير فهو يثق فيك ويعلم بأنك لن تضيعه.حتى لو ضيعته أو عملت فيه حاجة وحشة هيقول أكيد مكنش يقصد ومش هيصدق عليك أى حاجة.
* يبقى عايز يشوفك سعيد حتى لو مش هتكون معاه وكفاية أنه يطمن عليك ويعرف دايماً أنك بخير.
* بيحب يسمعك مهما قلت ولا يمل صحبتك أبداً.
* يشعر بسعادتك قبل أن يشعر بألمك.
* يكون موجود دائماً من أجلك ودون أن تطلب منه.فقبل أن تفصح عن إحتياجك لشخص يقف جوارك هتلاقيه.
* لا يقارن بينك و بين أى شخص آخر مهما كان بل يقارن الأشخاص بك.
* لا ينظر إلى شكلك ولا يهتم بما ترتدى أو ما أنت عليه من أى وضع سواء ثقافى أو إجتماعى أو مادى وما إلى ذلك.
* لايوجد عنده سبب محدد لمشاعره. يحبك فقط بلا أسباب.
* لا يستطيع أن يتحكم فى إنفعالات جسده حينما يراك.لمعة عينيه وسعادتها حين رؤيتك, تغيير مزاجه من سئ إلى قمة السعادة لمجرد رؤيتك,إحمرار وجهه من الغضب إذا ما وجدك تهتم بغيره, الإبتسامة المرسومة على وجهه لمجرد وجودك فى المكان, وأحياناً رعشة فى وجهه حين تتحدث معه, دقات قلب سريعة قبل رؤيتك مباشرة. شعوره الداخلى بالإطمئنان لمجرد وجودك فى نفس المكان حتى لو مش هيكون فيه بينكم حوار. وما إلى ذلك.
* لا يسمح أن يقال عليك أى كلمة أو تعليق بايخ حتى لو من أقرب المقربين لك.
* يكون أول المهنئين فى الفرح وأول المعزيين فى الحزن وأول من يشد بالأزر فى الأزمات.
* فى الوقت اللى بتحتاجله فيه بتلاقيه من غير ماتقوله إنك محتاجله . ومش بس بيجيلك فى وقت فراغه لأ ده مستعد يلغى كل حاجة مهمة عنده المهم أنه يطمن عليك لأن مفيش عنده حاجة أهم منك.
* عارف عيوبك ومتأقلم معاها.مش بيفكر يغيرها فيك ولا عايزك تكون نسخة منه أو تبقى ماشى على مزاجه لكنه بيحبك زى ما أنت من يوم ما عرفك.
* يهتم باهتماماتك مهما كانت لا تتفق مع هواه. لمجرد أن يراك ويجلس معك فترة أطول.
* طلباتك على قلبه زى العسل مهما كانت. حتى هزارك البايخ برضه ممكن يعديه ويضحك عليه.
* إستحالة يكون مع حد ضدك حتى لو بهزار أو فى لعبة مثلاً. وإستحالة يعمل منك مجالاً للسخرية والإستهزاء أمام أحد بدافع التهريج. بل تأكد أن لو كنتم فى مجموعة سيحرص على إظهار مميزاتك.
* إستحالة يعمل حاجة ممكن تضايقك أو تزعلك وخصوصاً لو كان عارف .
* لا يخجل من التصريح بمشاعره تجاهك أمام الجميع. بل يأخذها مجالاً للفخر.
* هتلاقيه بيقولك سامحنى من غير ما تقوله إنك زعلان, وهتلاقيه بيقولك سلامتك من غير ماتقوله إنك تعبان , هتلاقيه بيقولك ماتيجى نخرج من غير ماتقوله إنك زهقان, هتلاقيه جايبلك حاجة تأكلها أو تشربها من غير ماتقوله إنك جعان أو عطشان , هتلاقيه بيجيبلك منديل تمسح بيه عرقك من غير ماتقوله إنك حران, هتلاقيه بيغطيك ويقفل الشبابيك من غير ماتقوله إنك بردان.كفاية بس أنه يسمع صوتك أو ينظر فى عينيك عشان يعرف مالك.
* هيؤثِرك على نفسه وهيخاف عليك زى مابيخاف على نفسه وأكتر.
* بيبقى قاصد الكلام اللى بيقولهولك بمعناه الحرفى وليس المجازى.
نصيحة:
ــــــــــــــ
*إذا ما وجدت أحداً يحبك بجد فلا تتنازل عنه مهما كانت الأسباب ولا تفرط فيه ولا بكنوز الدنيا فقلما يجد الشخص فى حياته شخصاً يحبه هكذا بلا مقابل.
* الحب ليس شئ كبير ولكنه أشياء صغيرة فوق بعض تكون أجمل الذكريات فإذا ما صادفك فحافظ عليه جيداً لأن ممكن شئ واحد فقط كبير يقضى عليه ويجعله هباءاً منثورا.
سؤال جانبى:
ـــــــــــــــــــــــ
* هل عندك دلالات أخرى؟.
* كيف تحافظ على أحبائك؟.

هناك 49 تعليقًا:

مرايتى يقول...

أجزت ووفيتى المعنى كامل موناليزا
هذا هو الحب الحقيقى
بس للاسف لانه بقى نادر الوجود وممكن يكون معناه بقى سطحى أكتر بقينا حاسين الكلام ده أحلام مش عارفه؟
وممكن المقايس إختلفت بس أنا معاكى إن كل دى دلائل على حب حقيقى دون تظاهر وبدون مقابل فكما قلتى الحب أفعال وليس اقوال فقط لمده وتنتهى تداعب القلب لفتره ثم تتوقف وينتهى معها الاحساس بمرور الوقت بل الافعال تستمر حتى بعد عشرات السنين تحافظ على هذا الحب الذى تملك القلب والعقل
ماشاء الله ذكرتى كافة الدلالات تقريبا
بس للاسف احيانا بيضيع غصب عنك ومبتقدريش تحافظى عليه بس بتحافظى على ذكرياته الى اكتر بتكون سبب فى المك

مجداوية يقول...

السلام عليكم
يااااااااااااه دا أنا فاتني كتير أوي وكلها موضوعات رائعة كعادتك يا موناليزا لكن أنا قريتها كلها وأسفت إني لم أشارك فيها فهل سامحتيني على تقصيري

علامات المحبة التي طرحتيها خليط بين علامات الحب الخاص بين الزوجين وعلامات المحبة بين البشر

فللزوجين يتلخص في كلمتين ,, المودة والرحمة

وللناس تتلخص في جملة أن تحب لأخيك ما تحبه لنفسك
والصدق والاخلاص لا يحتاج كلام ولا علامات بل أفعال فقد تصدق العلامات وتكذب الأفعال وقد تصدق الأفعال وتكذب العلامات فالأهم هو النتيجة فهناك من لا يحسن التعبير ولكنه يدلل على عظيم محبته بالفعل

كما قال أبو فراس الحمداني
نعم أنا مشتاق وعندي لوعة ولكن مثلي لا يذاع له سر

خلاصة الرغي إنه مش شرط وجود العلامات أن تكون دليلا على حب صادق أو عدم ظهروها دليلا على عدم وجوده

وكل سنة وانتي طيبة وبخير وسعادة

عمرو جويلى يقول...

موناليزا
السلام عليكم
الحب عطاء بلا حدود مجرد
من أى مصلحة أو منفعة
وأحسنتِ الإختيار بموضوعاتك
القيمة والتى تناقش
قضايا هامة
خالص تقديرى

ليس فقيرا من يحب يقول...

السلام عليكم

موناليزا يا روح قلبى انتى مسبتيش ولا

حاجه وبجد محدش يتمنى من الدنيا اكتر من

انسان يحبه بالشكل ده يقر عينه ويريح

قلبه سواء صديق او حبيب او قريب

ربنا يسعد قلبك ويريح بالك اللهم امين


تحافظ على حبايبك بانك تحس بيهم

وتشاركهم فى حياتهم ومتبخلش عليهم ابدا

قولا او فعلا

بصراحه بوست اكتر من رائع وشوقنى جدا

انى اعيش الحاله دى والاقى حد يبقى

معايا زى ما حكيتى كده

انى احبك فى الله

MOHAMMED ELBANNA يقول...

أمه الله
ماشاء الله عليكي انتى مخلتيش حاجه حد يقولها .
فعلا هي دي مظاهر اللي بيحب بجد .
ومن اكثر الكتب التي تكلمت عن علامات المحب بالتفصيل هو كتاب
( طوق الحمامه ) لأبن حزم الاندلسي وهو كتاب فعلاً متميز .
تقبلي تحياتي على موضوعك الطيب
محمد البنا
طريق النجاح

Ahmed يقول...

انتي جمعتي حاجات كتيره اوي ومهمه
اوي
لو حبيت ازود, هزود حاجه صغيره بس

التواصل

الحب لازم يتغذى بالتواصل الدائم لان عدم التواصل بيفقد الحب او بينساه

♥نبع الغرام♥♪≈ يقول...

السلام عليكى ورحمة الله

اختى وصفتى الحب وصفا دقيقا لااعتقد انك نسيتى اى حرف لوصف الحب
هذه حالة من يحب او من بقلبه حب للناس

ولكنك نسيتى انا افلاطون حاول ايجاد المدينه الفاضله ولم يجدها انهارت قائمة احلامه
نتمنى من الله ان نجد او يجدنا هذا الحب كى نكتفى به مع ليقيمات من الخبز والهواء كى نعيش

تحياتى اليك

ريمان يقول...

موناليزا



البوست ده جميل اوى اوى اوى اوى

اوووووووووووى


وطبعا مش عندى دالالات اخرى خالص لانك بجد ذكرتى كل العلامات والادله

الله يفتح عليكى

انا من بعد اذنك هنسخ موضوعك واحتفظ بيه عندى فى ملف وورد

ممكن؟

Tamer Nabil Moussa يقول...

بوست اكثر من رائع

تسلمى علية

جزاك الله خير

مع خالص تحياتى

(Joudy) يقول...

حقيقى كفيتى ووفتى بالفعل دى علامات المحبة بينتيها كلها حتى لو أغفلت شئ هيكون بسيط للغاية

بالنسبة للحفاظ على الأحبه هيكون بإنك تعاملهم بالمثل على قدر حبهم ليك وحبك ليهم وإنك تخلص وتكون صادق فى مشاعرك معاهم

دمتى بكل الخير والسعادة

كلمات من نور يقول...

* هل عندك دلالات أخرى؟.

بعد دلالاتك دي يا قمر مافيش دلالات انتي ما شاء الله دايما موضوعاتك شاملةبس غاوية أسئلة (:
* كيف تحافظ على أحبائك؟

أنا بعامل الناس كلها لله وفي الله وبالله والحمدلله لم أخسر إلا من كان يدعي المحبة ..و أكيد حزنت عليهم بس استعوضت و احتسبت أجري عند الله و برضه تركت باب عودتهم مواربا علشان أنا مش باعرف أكره ولا أغضب .

ربي يكرمك بصحبة صالحة دائما و أبدا..

أحبك في الله

KHALED يقول...

لو فى حد بالمواصفات إللى ذكرتيها يبقى المفروض يتعملة تمثال ..

الدنيا بقت أصعب بكتير من إننا نكون كدة حتى ولو ربع ما ذكرتية
لو صادفتى حد بالمواصفات دى دلينى علية و يبقى ليكى الحلاوة .. !!!!!

عاشقة القمر يقول...

معلش انا عندي ضعف نظرها ممكن تكبري الخط والله مش قدرة قراء

موناليزا يقول...

مدونتى اسمها مرايتى
ـــــــــــــــــــ
أختى الحبيبة:اهلا اهلا بالقمر
أعتقد انه ما زال موجود هو أه قليل بس الحمدلله لسه موجود:)
وفعلا الحب مستمر
اسمحيلى اللى يبقى معاه حب حقيقى ومايحافظش عليه يبقى بجد مايستاهلوش
ربنا يكرمك ياحبيبتى واشكرك جدا لتعليقك
نورتينى ياجميلة واسعدنى تواجدك


**********************************


مجداوية
ــــــــــ
وعليكم السلام ورحمة الله وبركاته
أختى الحبيبة:أهلا اهلا بصوت الحق بعد طول غياب
طبعا ياحبيبتى مسمحاكِ ده سؤال برضه:)
يكفينى قراءتك الحالية وتواجدك حتى وإن كان قليلا
أنتِ حبيبتى بجد ياموجا:)
فعلا ده حقيقى ده خليط بين المحبة بكافة أنواعها
ازاى طيب والصب تفضحه عيونه
ممكن الواحد يدارى كراهيته لكن استحالة يقدر يدارى محبته

مو ممكن بس انا مؤمنة بأنه فى استطاعة الانسان ان يخدع بعض الناس بعض الوقت ولكن من الصعب خداع كل الناس كل الوقت
رغى ايه بس!!! ده انا ماصدقت إنك نورتينى لإنك بجد وحشااانى جدا جدا
تسلميلى يارب دايما
وكل سنة وانتِ دايما جميلة ومحبة للاخرين ورمزا لصوت الحق


********************************


اللؤلؤة
ــــــــــ
وعليكم السلام ورحمة الله وبركاته
اهلا بيك يافندم
أشكرك جدا لرايك ولمشاركتك
فى انتظاركم دائما
مع التحية



*****************************


ليس فقيرا من يحب
ـــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
فعلا عندك حق
ربنا يعزك يارب ماتحرمش منك أبدا

الله ينور عليكِ عندك حق فعلا
ربنا يرزقك يارب بالزوج الصالح اللى يحبك بجد ويتقى ربنا فيكِ
أحبك الذى أحببتنى فيه
وأنا كمان بحبك جدااا:)
نورتينى ياجميلة واسعدنى تواجدك

موناليزا يقول...

أحمد ابو العلا
ــــــــــــــــ
اهلا بيك استاذ احمد
انا معاك ان التواصل مهم لان البُعد بينسى
بس لو كان حب حقيقى طبيعى هيبقى فيه وصال وطبيعى برضه يبقى فيه اسباب مقنعة للبعاد
أشكرك جدا لرايك ولمشاركتك
مع التحية


******************************


محمد البنا
ــــــــــــ
اهلا بيك استاذ محمد
الله يكرمك ده من ذوقك
سأبحث عن هذا الكتاب على النت لعلنى أجده:)
أشكرك جدا لرايك ولمشاركتك
مع التحية


**********************************


احزان ايناس
ــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
الحمدلله فماتوفيقى الا به:)
الفرق بينى وبين افلاطون اننى لمأيأس بعد:)
يعنى أنتِ مش مؤمنة بمقولة إن دخل الفقر من الباب هرب الحب من الشباك:)
ربنا يسعدك ياحبيبتى ويرزقك بكل ما تحلمى به
نورتينى انوسة الجميلة واسعدنى تواجدك


********************************


ريمان
ـــــــ
أختى الحبيبة:اهلا اهلا بالقمر
ربنا يعزك يارب اشكرك جدا لرايك
ممكن طبعا ياحبيبة قلبى ده شئ يسعدنى:)
نورتينى ريمو الجميلة واسعدنى تواجدك

موناليزا يقول...

تامر نبيل
ــــــــــ
أهلا بيك استاذ تامر
ربنا يكرمك
اشكرك جدا لرايك
فى انتظاركم دائما
مع التحية


********************************



جودى
ــــــــ
اختى الحبيبة:اهلا اهلا بالقمر
أشكرك جدا لرايك والحمدلله فماتوفيقى الا به
أشكرك جدا لمشاركتك واتفق معاكِ أيضا
نورتينى جودى الجميلة واسعدنى تواجدك


******************************

كلمات من نور
ـــــــــــــــ
اختى الحبيبة:اهلا اهلا بالغالية
:) ربنا يكرمك ده من ذوقك فماتوفيقى الا بالله
بصراحة أه غاوية أسئلة عقدة قديمة بعيد عنك كان نفسى أوى أكون صحفية أو مذيعة ولان ده محصلش بطلع النزعة اللى جوايا فى اللى بحبهم:) معلش بقى استحملونى:)
كده بجد ضمنتِ الاستمرارية فالحب فى الله ثمرة لا يتذوقها الا من جربها حقا
دمنا أحباء فى الله غاليتى:)
نورتينى ياجميلة واسعدنى تواجدك


********************************


خالد
ــــــ
اهلا بيك استاذ خالد بعد طول غياب
كان فيه والله واترمى بكل بساطة واتداس عليه كمان:(
وجود الحبيب أكيد بيهون كل مصاعب مهما كانت
:) كنت اعرف واحدة كانت كده زمان بس دلؤتى خلاص بقى الله يرحمها
أشكرك جدا لتعليقك
مع التحية

*******************************

عاشقة القمر
ـــــــــــــ
اختى الحبيبة:اهلا اهلا بالقمر
واضح ان فيه مشكلة عندك لانى لما كبرت الخط درجة واحدة بس الكلام بقى فوق بعضه
فى انتظارك دايما ياقمر

Dr. Ibrahim يقول...

الحب هو حالة تحس ولا توصف والحب ليس له ضوابط فهو لغز مبهم مازال يحير العلماء والشعراء على وجه سواء ..

ولكن غالباً الحب هو مجموعة من المشاعر المتناثرة والتصرفات الحسنة الطيبة ذات الطابع الجميل مع بعض الانفعالات الوجدانية التي تهيم بصاحبها وتبحر فيه وسط اعماق محيطات محبوبه

وفى كتابه "أناشيد الإثم والبراءة" يقول دكتور مصطفى محمود فى مقال"الحب ماهو؟" حيث أنتهى إلى أن الحب تناسب نفوس وطبائع قبل تناسب أجسام وأعمار وثقافات ودور الخير والخلق الأسمى فى أسر القلوب والنفوس..وعلى الرغم من ذلك فالحب من أسرار رحمة الله ولا ينتهى فى الحب كلام"


وكثيرا ما يسمو الحب بالإنسان ليصبح جديرا بمن يحب فيرقى في سلوكه وأخلاقه ويتأنق في لغته وحتى في لباسه ليس تظاهرا وتصنعا ولكن بغية الوصول إلى درجة الكمال لأنه يرى الحبيب كاملا، ويريد أن يكون كذلك

وأحيانا ينحدر الحب بالإنسان إلى الدرك الأسفل، لأنه يخطئ الاختيار ويظن من يحبه ملاكا طاهرا فإذا هو شيطان رجيم
وعلى رأى المثل " الحب أعمى " ولهذا نجد أن للقلب منطقا مخالفا لمنطق العقل فهو لا يبدأ بمقدمات صحيحة وينتقل منها إلى النتائج بل يبدأ بالنتائج سلفا، ثم يحاول بعد ذلك إيجاد مقدمات تنسجم مع هذه النتائج ولذلك سمي هذا المنطق بمنطق العاطفة، وبالمنطق المقلوب..

ولكن الحب له مظاهر كثيرة كما تفضلتى
منها الوفاء له
الثقة المتبادلة بين الطرفين
والتغاضى عن التوافه التى قد تؤدى بالعلاقة إلى خطر

ويجب أن نستمع بفهم ووعى لنصيحتك الغالية فى أخر المقال

ولنحافظ على أحبائنا يجب أن نقوم بعمل ما دل على الحب حتى وإن كانت معظمها يكون تلقائيا دون وعى منا

دمتم بود

ستيتة يقول...

الله عليكي يا مونا
لما حد يكتب شيء عارفه وفاهمه وحاسه بيبقى له طعم تاني خالص
مش مجرد طعم العقل والحكمة
لأ طعم الإحساس والصدق
بيرشق في القلب مباشرة
معنديش اضافة لجمال علامات المحبة
ربنا يجعلنا احباء في الله
ويرزقنا صحبة الصالحين في الدنيا
ويرزقنا صحبة النبي الكريم صلى الله عليه وسلم في الآخرة
ويظلنا في ظله يوم لا ظل الا ظله

تحياتي

المعتصم يقول...

الــلــــــه

المعتصم يقول...

مش عارف ايه هو ده او اسميه ايه
بفتح الايميل بتاعى بالصدفه ولقيت رساله اسمها الفرق بين الحب والرومانسيه
***

عندما تهديها ورده .. .. فهذه رومانسية
عندما تكون انت الورده.. .. هذا حــــب

عندما تدمع عيناك لدمعها .. .. فهذه رومانسية
عندما تمسح دمعها .. .. هذا حــــب

عندما تفعل كل شىء تحبه هي .. .. فهذه رومانسية
عندما تحب كل شىء تفعله لها .. .. هذا حــــب

عندما ترويها اذا ظمأت.. .. فهذه رومانسية
عندما تظمأ لترويها.. .. هذا حــــب

عندما تطبع على عينيها قبله .. .. فهذه رومانسية
عندما تقبّلها عيناك دائما .. ..هذا حــــب

عندما تترك كل شىء تحبه لها .. .. فهذه رومانسية
عندما تترك كل شىء تحبه من اجلها.. .. هذا حــــب

عندما تفكر بأنه ليس لديك سواها .. .. فهذه رومانسية
عندما تفكر بأنه ليس لسواك ما لديك .. .. هذا حــــب

عندما تفعل المستحيل من اجل سعادتها .. .. فهذه رومانسية
عندما تسعد بالمستحيل من اجلها .. .. هذا حــــب

عندما تنظر لعينيها .. .. فهذه رومانسية
عندما تنظر بعينيها .. .. هذا حــــب

عندما لا يتبقى في الكون الا ورده واحده فتقطفها لها .. .. فهذه رومانسية
عندما تزرع لها الورد .. .. هذا حــــب

عندما يذكرها لسانك في كل وقت .. ..فهذه رومانسية
عندما يشعر بها قلبك في صمت .. .. هذا حــــب

عندما تضمّها اذا احاط بها الخطر .. .. فهذه رومانسية
عندما تضم الخطر حتى لا يحيط بها .. .. هذا حــــب

عندما تحملها على يديك لتسير بها.. .. فهذه رومانسية
عندما تعلّمها السير وحدها .. .. هذا حــــب

عندما تعيش كي تحبها.. .. فهذه رومانسية
عندما تحبها كي تعيش .. .. هذا حــــب
****
يارب تعجبك

الشعب لابد له من حكومه تشكمه يقول...

هو انتى سيبتى حاجه نقولها:))

ياااارب نلاقى اشخاص كتيييييييير من دول فى حياتنا:)

SHAPE YOUR LIFE (ABOALI) يقول...

اه منك يا حب
اه منك يا لذيذ
اه منك يا طعم
اه منك يا حب


الحب كلمة حرفين اتنين عندما يقرء المحب يبتسم ويسعد وغير المحب يتتطاوى عليها

اذا عكستى موضوع الحروف

حب بح

يعنى باللغة العامية بح يعنى مافيش

مافيش شيىء فى الدنيا من غير حب
الحب درة من درر الجنة
ان اشتهيت مذاقها ارتفعتى فى العنان
بدون الحرفان وترجمتهما الى فعل
سننعيش كما نعيش اليوم فى جبلايا القرود كلانا ينظر الاخر بتعجب وينتظر ان يظهر جزء من جسده لنضحك عليه او لتحدث لنا الاثارة او نرمى له بالفول السودانى والموز و نبدء فى وصلة هرتلة الكلمات


بوست معبر جدا وعميق فى المعنى
وباعتبارى من احد المحبين للحياه عموما
وكل من تتضمه الحياه
كنت مبتسم وسعيد وانا اقرء

حتى لو كنا فى الحياه نتضارب فى بعضنا البعض فبالحب يتحول الملح لسكر


اشكرك

Mahmoud Ahmed يقول...

السلام عليكم
انا بس جيت اسلم عليكي
و اعذريني على عدم تعليقي على هذا الموضوع نهائيا
لأنك دايما بتيجي على الجرح
:(

طهر فؤادك يقول...

السلام عليكم ورحمة الله وبركاتة

بارك الله فيكى موضوع جميل جدااا

والحب فعلا عطاء وتضحية والحب فى الله دة اعظم واسمى حب وهو من الذى سيظلهم الرحمن يوم لاظل الا ظلة ...

وجزاكى الله خيرا على الموضوع الرائع دة

salwa يقول...

السلام عليكم
اختصر و اقول ما اجملهم الاحباء بالله
يوم يظلهم الله بظله
تسلم يدك
سلام

همس الاحباب يقول...

الحب نهر من العطاء لا ينضب ابدا
كلما شربنا منه كلما زاد وترعرع
تسلم الايادى
كعادتك دائما مبدعة وموضوعاتك متميزة جدا جدا
تحياتى وتقديرى

الفراغ يقول...

الله على الكلام والاحاسيس
فكرتينى بالذى كان...
وكان فعل ماضى من زمان
ووجدت القلب يقول:
قول للزمان ارجع يا زمان
وهاتلى قلب لا داب ولا حب ولا انجرح ولا ضاق حرمان

موناليزا يقول...

د/ابراهيم
ــــــــــــ
اهلا بيك يادكتور
أشكرك جدا جدا على تعليقك الجميل والبليغ والمفيد أيضاً
وعلى مشاركتك وابداء رأيك
فى انتظاركم دائما
مع التحية


**********************************


ستيتة حسب الله الحمش
ـــــــــــــــــــــــ
أختى الحبيبة:اهلا اهلا بنبض الحكمة
:) ياكسوفى :) ياكسوفى
(على رأى سهير البابلى فى مسرحية ريا وسكينة)

ربنا يعزك يارب ودمنا أحباء فى الله
نورتينى غاليتى واسعدنى تواجدك


*********************************


المعتصم
ـــــــــــ
أهلا بيك أستاذ مصطفى
:) وما أجمله من تعليق
==
:) الله
إيه الجمال ده بجد
:)
عجبتنى جدا جدا جدا
كلام مختصر وبليغ ويؤدى المعنى جدا
أشكرك جدا جدا لتعليقك ولمشاركتك التى ننتظرها دائما
مع التحية


*********************************


الشعب لابد له من حكومة تشكمه
ــــــــــــــــــــــــــــ
أختى الحبيبة:اهلا اهلا بالقمر
:) مش عارفة.. بس اكيد يعنى سيبت حاجات:)
يارب ياحبيبتى يارب:)
نورتينى شيمو الجميلة واسعدنى تواجدك

موناليزا يقول...

ابو على
ــــــــ
اهلا اهلا بصاحب التعليقات المميزة
أسعدنى ابتسامتك حين قراءة موضوعى
واشكرك جدا جدا على تعليقك البليغ وتشبيهك الرائع
يسعدنا دوام التواصل
مع التحية


*********************************


المدونة الاسلامية سبايدر مان
ـــــــــــــــــــــــــــــــ
وعليكم السلام ورحمة الله وبركاته
اهلا بيك يافندم
:) كلك ذوق يافندم إن شاالله تسلم يارب من كل شر
كده يبقى انا اللى بعتذر لان موضوعى ضغط على جرحك دون قصد
يكفينا تواجدكم وفى انتظاركم دائما
مع التحية


***********************************


طهر فؤادك
ــــــــــــ
وعليكم السلام ورحمة الله وبركاته
اهلا بيك يافندم
ربنا يعزك اشكرك جدا لرايك
ربنا يكرمك واشكرك جدا لمشاركتك
مع التحية

موناليزا يقول...

سلوى
ـــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
وما اجمله من اختصار
ربنا يعزك ياحبيبتى
نورتينى سلوى الجميلة واسعدنى تواجدك



********************************


همس الاحباب
ــــــــــــ
اهلا بيك استاذ خالد
الله على تعليقك الجميل ووصفك لمفهوم الحب الذى لا ينضب
ربنا يكرمك يارب واشكرك جدا جدا لرايك ولمشاركتك
فى انتظاركم دائما
مع التحية


********************************


الفراغ
ـــــــ
اختى الحبيبة:اهلا اهلا بالقمر
ولكن تبقى الذكريات الجميلة:)
ربنا يسعدك دايما ياحبيبتى
نورتينى ياجميلة واسعدنى تواجدك

حلم بيعافر يقول...

الحب احلى حاجة فى الدنيا
وبيسمو بكل حاجة فينا
بوست هايل كعادتك دايما

mohamed ghalia يقول...

تحفة بجد يا امة الله
بجد باجى هنا اتعلم الحب الحقيقى

موناليزا يقول...

حلم بيعافر
ــــــــــــ
اهلا بيك يافندم
فعلا فبالحب فقط نحيا ونعيش
ربنا يكرمك أشكرك جدا لرايك
يسعدنا دوام التواصل
مع التحية

********************************



محمد غالية
ـــــــــــــ
اهلا بيك استاذ محمد
:) ربنا يعزك يارب فماتوفيقى الا بالله
أشكرك جدا لرايك
فى انتظاركم دائما
مع التحية

Ghada , Rofayda يقول...

هتلاقيه بيقولك سامحنى من غير ما تقوله إنك زعلان, وهتلاقيه بيقولك سلامتك من غير ماتقوله إنك تعبان , هتلاقيه بيقولك ماتيجى نخرج من غير ماتقوله إنك زهقان, هتلاقيه جايبلك حاجة تأكلها أو تشربها من غير ماتقوله إنك جعان أو عطشان , هتلاقيه بيجيبلك منديل تمسح بيه عرقك من غير ماتقوله إنك حران, هتلاقيه بيغطيك ويقفل الشبابيك من غير ماتقوله إنك بردان.كفاية بس أنه يسمع صوتك أو ينظر فى عينيك عشان يعرف مال


بجد من اجمل وابدع ما قرأت
دمتِ مبدعة

سامر محمد عرموش يقول...

الاخت الكريمة موناليزا
اسعد الله صباحك بكل خير
اولا شكرا على الزيارة الطيبة لمدونتي المتواضعة
اما بخصوص الحب اعتقد ان كل النقاط التي ذكرتيها نتفق عليها جميعا ولكن هل نعتقد انها موجودة فعلا هذه الايام في هذا العصر التي يطغى عليها المصالح ولا شيء غير المصالح
انا من رأي صعب جدا ان نجمع كل هذه النقاط ليس لاننا لا نعرف الحب ولكن للظروف التي تحيط بنا والى حالنا المتردي
ونسأل الله التوفيق

تحياتي

مهرة سالم يقول...

السلام عليكم ..
أحببت هذا الجمله...
تفسير رائع..
الحب ليس شئ كبير ولكنه أشياء صغيرة فوق بعض تكون أجمل الذكريات فإذا ما صادفك فحافظ عليه جيداً لأن ممكن شئ واحد فقط كبير يقضى عليه ويجعله هباءاً منثورا...
....
الحفاظ على الأحباء ليس أمر عسير بل يسير لأنك تحبهم ستكون حولهم وتسعدهم
...
دمتِ بخير

غير معرف يقول...

انتي بجد رهيبة
مواضيعك اللي بالشكل ده تتحط في كتب تبقى حاجة لطيفة أوي
انا بتكلم بجد كتيبات صغيرة كده ياااااااه.. فكري فكري
هه؟هه؟هه؟

أما باه ازاي احافظ على الاحباء.. بإن يكون عندي دم وابادلهم ان شالله بالشيء القليل عشان ما اخسرهمش
وياري فيه ناس فيها كل ده.. يبقى هما دول اللي نقف معاهم في ظل عرش الرحمن يوم لا ظل الا ظله

منمن.. جامدة بجد ^_^

مها ميهوووو

موناليزا يقول...

غادة وروفيدة
ـــــــــــــــ
اختى الحبيبة:اهلا اهلا بالقمر بعد طول غياب
وحشتينى جدا ولعل المانع كان خير
:) رأيك وتعليقك أسعدنى جدا
والحمدلله فماتوفيقى الا به
نورتينى ياجميلة واسعدنى تواجدك


**********************************


سامر محمد عرموش
ـــــــــــــــــــ
اهلا بيك استاذ سامر
ربنا يسعدك دايما
الشكر لله يافندم فمدونتك مواضيعها جديدة ومتميزة وأنا أهوى هذه المواضيع جدا فبالتوفيق دائما
مع احترامى لرأيك ولكنى اختلف معك فى هذا
فبالحب نستطيع مواجهة أقصى المشاكل مهما كانت
أشكرك جدا لتعليقك
فى انتظاركم دائما
مع التحية


********************************


نهار
ــــــ
وعليكم السلام ورحمة الله وبركاته
اختى الحبيبة:اهلا اهلا بالقمر بعد طول غياب
أشكرك جدا لرايك ولمشاركتك
نورتينى ياجميلة واسعدنى تواجدك


*******************************


أحسن تستاهل
ــــــــــــ
أختى الحبيبة:اهلا اهلا بالقمر بعد طول غياب
:)الله يكرمك.. كتاب مرة واحدة
:) خلاص ياستى عشان خاطرك افكر

:) سعيدة جدا برأيك وبتعليقك
نورتينى مهاميهو الجميلة وكنتى واحشاانى جدا

rovy يقول...

وحشتينى جدا ..
كل سنه و انتى طيبه حبيبتى و ستمحينى لأنى مريت ببعض الظروف منعتنى من تواجدى معكم بالعيد و الايام الماضية ايضا ..
بوست رائع و مليان حب من قلب كبير زى قلبك ..
الحب هبة من الرحمن لنا ان وجد يجب علينا ان نرعاه و نحافظ عليه فالحب ايضا يحتاج لمن يرعاه و يغذيه حتى يكبر و لمن يحافظ عليه و يسرع فى علاجه اذا مرض حتى لا يموت و لمن يحتضنه و يحتويه كى لا يتوه او يضل يوما ,,
احبك فى الله غاليتى
مودتى لكى دوما

sakayar يقول...

من يوم ما نزل البوست وأنا فعلاً عاوز أكتب تعليق بس مش لاقي أي إضافة ممكن أكتبها لإن حضرتك وفيتي بكل الجوانب تقريباً
لكن هجاوب على آخر سؤال وهو كيف تحافظ على أحبائك
الحب كالنبتة لابد أن ترعاها وترويها مرة تلو الأخرى فإن أنت تركتها ذبلت وماتت
وفيه الطريقة التانية الجميلة اللي نصحنا بيها الرسول عليه الصلاة والسلام
ازهد فيما عند الناس يحبك الناس
:)
أظن العطاء بلا مصلحة يزيد من المحبة أيضاً
تحياتي على مجهود حضرتك الجميل في المدونة
دمتي بكل الخير والسعادة

Heba Faruq يقول...

للاسف الحب الحقيقي صار عملة نادرة في وقتنا الحالي مثله مثل باقي المشاعر الجميلة

بوست اكثر من رائع

دمتي بكل خير

موناليزا يقول...

روفى
ــــــ
اختى الحبيبة:اهلا اهلا بالغالية
وحشتيينى جدا جدا
طبعا مسمحاكِ وعذراكِ كمان
ربنا يكون فى عونك ياحبيبتى ويقويكِ دايما

ماتحرمش من تعليقك ولا من رأيك اللى دايما بيرفع من روحى المعنوية:)
أحبك الذى أحببتنى فيه
ودمنا أحباء فى الله
نورتينى ياجميلة واسعدنى تواجدك


******************************


سكاير
ــــــــ
اهلا بيك يافندم
ربنا يعزك ويكرمك يارب على مجاملتكم الرقيقة
ما اجملها من طرق حقا
أشكرك جدا لرايك فى المدونة فماتوفيقى الا بالله
يسعدنا دوام التواصل
مع التحية


**********************************


هبة فاروق
ــــــــــــ
أختى الحبيبة:اهلا اهلا بالقمر
حتى وإن قل فيكفى أنه مازال موجود:)
نورتينى هبة الجميلة واسعدنى تواجدك

العلم نور يقول...

جميل جدا ما خطته يدك .. والأجمل هو الحب الكبير الذي يملأك .. سعدت دائما إن شاء الله .. آمين.

ومن أجمل الكتب التي قرأتها في الحب هو كتاب طوق الحمامة في الألفة والمحبة لإبن حزم الأندلسي ..

موناليزا يقول...

الشجرة الأم
ـــــــــــــ
اختى الحبيبة:اهلا اهلا بالقمر
:) ربنا يسعدك ياحبيبتى كما اسعدتينى بتعليقك الرقيق
سأبحث عنه لأقرأه أيضا:)
نورتينى ياجميلة واسعدنى تواجدك

Unknown يقول...

حكيتى ووفـــيتى
يامونى ولا شــــىء
يقال بعد أقوالك

واحد من البلد دى يقول...

السلام عليكم

أرى بفراستى المتواضعة أن لكل حدث حديث..

وبالنسبة للسؤالين؟؟

سأجيب عن الثانى بانه لا يبذل المرء جهدا ليحافظ على من يحب إنه فقط....مغناطيس العاطفة...يجذب كل طرف إلى الأخر دون أدنى عناء من الطرفين

دمتى طيبة

موناليزا يقول...

نوراهاتى
ـــــــــــ
اختى الحبيبة:اهلا اهلا بالقمر
:) ده من ذوقك ياجميلة
نورتينى حبيبتى واسعدنى تواجدك



*******************************


واحد من البلد دى
ـــــــــــــــــــ
وعليكم السلام ورحمة الله وبركاته
اهلا بيك يافندم
أشكرك جدا لرايك ولمشاركتك
يسعدنا دوام التواصل
مع التحية

ذكرى رحيل قلم يقول...

السلام عليكم

الحب احساس يأسر قلوب الناس ويجعلها تفعل كل جميل

عندك حق يمكن الانسان بيتمني اكتر من كده كمان

بس للحياه واقع

و اجمل ما في هذا الواقع هو الحب
ادام الله عليكي كل احبائك
دمتي بكل حب

موناليزا يقول...

ذكرى رحيل قلم
ـــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر بعد طول غياب
أشكرك جدا لمشاركتك
نورتينى حبيبتى واسعدنى تواجدك
ملحوظة: انتِ قافلة التعليقات عندك ليه؟