الأحد، 13 ديسمبر 2009

العمياء فتحت

(حينما أعلنت عن خطبتها)
- معقول أنتِ إرتبطى بالشخص ده!!!.
-فاجأها رد فعل زميلتها فى العمل وقالت لها: أيوة .. هو إيه المشكلة؟.
- أنتِ مش شايفة إن مفيش تقارب أصلاً فى المستوى بينكم!.
- لأ خالص. بالعكس أنا شيفاه عادى.. زينا يعنى.
- بقى اللى بنضرب بيها المثل فى الأخلاق تتجوز اللى بيضرب بيه المثل فى الصياعة, بقى اللى ما بتكلمش حتى زمايلها الرجال إلا فى أضيق الحدود تتجوز اللى مقطع السمكة وديلها.. يا بنتى ده بتاع بنات.
- ابتسمت قائلة: آآه .. هو كان كده هو حكى لى عن ماضيه بس هو دلؤتى خلاص بقى حاجة تانية.
-أنتِ شايفة كده!!. طب بلاش دى بصى أبوكِ بيشتغل إيه وأبوه بيشتغل إيه؟
- الفقر مش عيب ومحدش بيختار قرايبه.
- مش قصدى فقر قصدى أن مفيش تكافؤ.
- من فضلك ماتقوليش عليه كده.
- خلاص ياستى ماتزعليش ربنا يوفقكم.
***************************
- أنا بتعلم منك الدين ومبسوط بكده بس بالراحة عليا لإنك بتعرفينى حاجات كتير أول مرة أعرفها.
- ماعدتش عايزة أعبد ربنا لوحدى.
- تعرفى إنك خسارة فيا ومش مصدق إن ربنا يكافئنى بيكِ بعد كل البلاوى اللى عملتها فى حياتى.
- المهم تكون إتغيرت بجد.
- عايز أتفق معاكِ على حاجة.. لو حسيتى إنى هبعدك عن ربنا سيبينى وأنا اللى بقولك..
مش هستحمل بجد إنى أشوفك معايا بتبعدى عن ربنا لأنى باخد قوتى منك ومش هقبل أكون زى الشيطان اللى خرج العابد من صومعة عبادته.
- ده أجمل كلام سمعته فى حياتى.. اطمن يا حبيبى من غير ماتقول.
*****************************
بعد الفراق كانت تشعر بألم فظيع يسرى فى جميع جسدها مع إنسحاب فى روحها وشعرت أنها فى نهاية أيامها.
ووصت شخص موثوق فيه أن يبلغه وصيتها:
أى حد فرق بينى وبينك أنا مش مسمحاه بس لو كانت الناس قدرت تفرق بينا فى الدنيا فأنا مش هسامحك لو فرقت بينى وبينك فى الجنة.. عشان خاطرى أعمل كل حاجة حلوة عشان تكون زوجى هناك.
********************************
- يعنى خلاص كرهتيه؟.
- لأ طبعا.
- أمال خليتيه يطلقك ليه؟.
- لأنى زعلانة منه أوى.
**********************************
- كنتِ وافقتى عليه من الأول ليه؟.
- لأنه الوحيد اللى كان عنده الشجاعة الكافية أنه يدخل البيت من بابه ويصارحنى بمشاعره, ولأنه كان شارينى ومافكرش فى أى فرق فى المستوى اللى بينا ولأنه جالى فى الوقت المناسب.
- وسيبتيه ليه؟.
- لأنه عايز الدنيا ورضا الناس وأنا عايزة الجنة ورضا ربنا.
ولأنى أكتشفت أنه كذاب ومش قد كلمته وماينفعش يكون مسئول عنى. مش ده الرجل اللى ممكن أعطيله دفة حياتى ليديرها كما يشاء
ولأنه مش الرجل اللى حلمت بيه.. منكرش إنى حبيته وعشان كده حاولت معاه كتير لكن للأسف الطباع مابتتغيرش وبعدين أنا عايزة أكون زوجة مش داعية.
- أنتِ لسة راحة تعرفى كل ده دلؤتى!!.
- ماكانش كده.. الناس هى اللى غيرته.
- أنتِ اللى مش قادرة تصدقى إن هو كده أصلاً وعمره ما كان اتغير.
- قصدك أنه مثل عليا وأنا صدقته!!.
- طبعا واحدة خام زيك سهل جداً واحد زيه يشكلها على إيديه.
يابنتى أحمدى ربنا أنه نجاكِ منه.
- ماتقوليش عليه كده. ده أكتر واحد كان بيفهمنى ويحس بيا من غير حتى مااتكلم.
- وأهو عرف إزاى يخليكى تسيبيه بإختيارك الحر.
********************************
(مابين لقا وفراق)
- نفسى أشوفك
- إرحل ياحبيبى أهلى مش راضيين.
****************************
- يابنتى ترجعيله إزاى ده ظالم!.
- ...............
- ده ماحفظش سرك و أنتِ على ذمته.
- ................
- مفيش حد أثنى عليه والكل بيحذرنا منه.
- ونسأل عليه الناس ليه إحنا عاشرناه وأكتر حد ممكن يحكم عليه.
- دخوله فى حياتك من الأول كان غلط.. فوقى بقى.
- أنا مش مصدقة أى كلمة عنه هو ما يعملش كده أبداً.
****************************
- الناس هتقول إيه لو رجعنا لبعض بعد كل اللى حصل.
- هتقول إنى لفيت لفتى ورجعتلك تانى.
- بس رجوعك ليا فخر ليك.
- أنا عارف.
- الوضع عندى بقى مختلف.
- إحنا خدنا إيه من كلام الناس.. مش هما اللى فرقوا بينا.. سيبك منهم بقى.
- للأسف ماينفعش.. إحنا مش عايشين لوحدنا.
*********************************
- إستقريت فى مصر زى ما أنتِ عايزة ومسكت فرع الشركة هنا وبقبض مبلغ كويس جداً وقدمت على تكملة رسالة الماجستير اللى كنت بدأتها قبل ما أسافر وأشتريت عربية نفس اللون اللى إختارتيه معايا زمان فى عربيتى القديمة
لسه الشقة حددى المكان اللى يعجبك وأنا أشتريها.
- تقول لنفسها وهى تعلم بإستحالة العودة: ياريت بجد تبقى حد كويس وناجح فى حياتك.
لأن نجاحك فخر ليا حتى لو مش هتكون ليا. يكفى أنى أشعر أنى إختارت صح وإنك بجد كنت تستحق أنى أحمل اسمك فى يوم من الأيام.
****************************
- لسه بتحبينى؟.
- بحبك لدرجة أنى أتمنى لك الموت على أنك ترتبط بغيرى.
- تفاجأ بردها وقال: يعنى مش هتزعلى عليا.
- هحزن طبعاً لدرجة إن أنا اللى هاخد فيك العزاء. بس ده عندى أهون كتير من إنك ترتبط بغيرى.
********************************
- دايما بشعر إنى أنا ملكه وماينفعش أكون لحد تانى هو الوحيد اللى معاه صك الملكية الخاص بيا.
أول ما قلبى بينده عليه حتى لو فى بلد تانية بلاقىه يتصل لوحده ومن غير ما اطلب منه.
ولما بياخدنى حنينى ليه بلاقى عيونى بتدور عليه بين وجوه الناس. ولسانى مايبطلش يقول اسمه.
هو كمان ملكى ومش من حق أى واحدة تانية تاخده غيرى.
- المهم يكون هو لسه حاسس بكده.
*******************************
- كانت ناقصانى حاجة ومعاه كملتها.. حسسنى بأنوثتى وفجر جوايا حاجات ماكنتش أعرف أنها موجودة أصلاً.
حسسنى أنه شافنى فعلاً عيوبى قبل مميزاتى وده خلاه يعرف يتعامل معايا.
- كان ناقصك بس وجود رجل فى حياتك ولحسن حظه كان هو .
*******************************
-هو عارفنى وأنا عارفاه.. إحنا حافظين بعض
هو عارف إمتى بيضايقنى وإزاى يقدر يصالحنى وبيعرف إزاى يتعامل معايا ويدينى وضعى.
و دى أحلى حاجة فينا مش لسه محتاجين ندرس بعض.
أنا عارفة هو بيعمل ايه دلؤتى وهو كمان عارف أنا بعمل إيه دلؤتى.
*****************************
- لسه زى ما أنت أكتر حاجة بتعرف تعملها إنك تبعد عنى رغم إنك عارف إن دى أكتر حاجة بتوجعنى.
- ما بحبكيش تشوفينى فى لحظة إنفعالى.
- ده مش مبرر.. من حقى أشوفك فى جميع حالاتك.
- بخاف عليكِ منى لأحسن أجرحك أو أضايقك بدون ما أقصد.
- بعدك عنى أكبر جرح.
**************************************
- دى الذكرى اللى حبيت تسيبهالى قبل ما تمشي.. إنك تخلى ابن أخويا الصغير يقول عليا وحشة.
- بيستفزك بس عشان تردى عليه.
- حقيقى البنى آدم ما هو إلا ذكرى.
**********************************
- أقوله إزاى إن مش هينفع نرجع لبعض من غير ما أجرحه.
ماهو مش معقول أجرح واحد كل مشكلته أنه بيحبنى.
******************************
حبك ليا كدب فى كدب قلبك ما بيعرفش يحب.
لو كنت صحيح حبيبى كان عز عليك فراقى.لكن أنت عمرك ما حبتنى.
*******************************
بعد ما كانت سيرته ووجوده فى حياتى وكلامه معايا مصدراً لسعادتى.
أصبح كل هذا الآن مصدراً لندمى وبتذكرى بتضييع عمرى معاه.
*******************************
كلامه معايا بقى يضايقنى رغم أن أسلوبه زى ماهو ماتغيرش.
بقيت مبسوطة فى بُعده أكتر.
********************************
أيوه بشتاقله ساعات بس ماعدتش أحب أقضى حياتى معاه.
********************************
كانت روحى معاه وبرجوعه ليا تانى رجعها ليا.
ده يكفينى أنا مكنتش محتاجة غير أنى أسترد نفسى.
بس ياترى أشكره أنه رجعهالى ولا أعاقبه أنه أخدها منى أصلاً!.
***************************
- ماعدتش حاسة بكلامه.
الحب إحساس وأنا مش مصدقة إحساسه بيا. ولا كلامه ليا.
واضح إن أعراض إنسحابه من جوايا بدأت.
****************************
- أنتِ عارفة عيوبه يبقى كنتِ عايزة ترجعيله ليه؟.
- فكرته إتغير للأحسن أتاريه رجع لأصله.
******************************
فقدت قدرتها على الإحساس بوجوده ولم تعد تشعر بالفرحة حينما تعلم بمجيئه.
*********************
نظرت له وشعرت فجاة بغضب وسرعة فى دقات قلبها وتحولت نظراتها لإشمئزاز غير مفهوم. وكأنه ليس الشخص الذى كانت ستدخل فى صراع مع أهلها ومع العالم بأجمع من أجله.
ولم تستطع أن تطيل النظر إليه وكأنه أزال القناع الذى كان يرتديه وهو معها لترى مسخ مشوه يثير الإشمئزاز والرغبة فى القئ!!. رأته كما لو كان بلطجى أو سوابق أو كما يوضع صورته ليبجث عنها الشرطة تحت بند هارب من العدالة.
- بقى أنا كنت مرتبطة بيك أنت فى يوم من الأيام!!!!.
غالى حبك ياقلبى والغالى مش نصيبهم.. تقول لقلبها.
- إزاى ماكنتش شايفة قبل كده اللى الناس كلها كانت شايفاه.
رجعت لأصلك اللى ماكنتش أعرفه. ماهو قليل الأصل مهما يعلى أصله لازم يرد عليه.
وتذكرت ما غنته لها أخته يوم الزفاف بينهم وبين بعض"هى كانت فين عينيكِ يا يمامة.. لما دورتى بإيديكِ على الندامة".
- أنا إزاى شيلت اسمك فى يوم من الأيام وكنت فخورة بيه!!.
أنت أحقر أصلاً من أنى أعرفك مش أنى أدخلك حياتى.
وبعد نظرة إشمئزاز وإحتقار طويلة قالت:إطلع بره.
غير مصدق ما تقوله وماتفعله ..عقد حاجبيه واحمر وجهه من الغضب قائلاً": أنتِ بتطردينى من بيتك؟؟.
- لأ وقبل أن يغير نظرته للفرحة أستدركت مسرعة: من حياتى كلها.
وفى هذه الأثناء سمعت صوت مذياع يأتى من عربية معدية فى الشارع بصوت عالى.
"ده خاين واللى باعك إوعى تدمع عليه.. إحمد ربك ياقلبى إنك مابقتش ليه".
وكأنها تتر النهاية للمشهد الأخير.
- تمت-.
على الهامش:
* مش معقول الناس كلها تجتمع على رأى واحد فى شخص معين ويكون خطأ.
* ما أقسى أن يفتح الأعمى ليرى الحقيقة الموجعة ولكن من الجميل أن يشكر الله على نعمة البصر.
* مهما كانت الحقيقة قاسية يجب أن نعرفها لنعلم كيف نتعايش معها فهذا أفضل من الحياة فى الوهم.
سؤال جانبى:
- إمتى حسيت إنك بتشوف حد لأول مرة رغم عشرتك له؟ .====================
أدعوكم لزيارة هذا الموضوع مــــــــــن القلــــــــب !!! فهو حقاً من القلب.

هناك 56 تعليقًا:

mohra يقول...

قصه تتكرر كثيرا للاسف
لا ادرى حقا ما الذى يحدث للبطله ...لعله الاحتياج؟؟؟
لا اعرف ..لم اتعلق باحد هكذا من قبل

Mahmoud Ahmed يقول...

السلام عليكم
ازيك عامله ايه؟
برضه لثاني مره مش هعلق على الموضوع ده
انتي تخصص اوعاج جامده قوي ^_^

آخر العنقود يقول...

لالالالالا
اييييييييه الجمال ده بجد
سيناريو رائع وحوارات واقعية وموجودة
رغم كل الاحاسيس الحلوة الموجودة وقتها
لكن درجة اليقين اللى وصلتها فى النهاية كافية بانها تحاول تداوي نفسها بيهارغم انه صعب لان البنت فى حبها بتكون معطاءة وخصوصا اول مرة وبتتمنى وقتها انه يكون اول واخر حب فى حياتها
بوست مليااااااان كلام يامنمن بجد
وانا لو فتحت فى الكلام هتندمي :)))

اعتراااااااااف
انى كل مابدخل هنا بستمتع وبتعلم
دمتى متألقة غاليتي

مسدس صغير يقول...

كلامك مؤثر جدا
فعلا لازم الواحد يتحرى صح قبل ميقدم على خطوة مهمة فى حياته زى الجواز
وبجد انا مش من مؤيدين حكاية اخده كده وهوه هيبقى كويس وانه وعدنى انه هيبطل شرب سجاير ووعدنى انه هيصلى ووعدنى انه هيبطل يخرج مع بنات او يعرفهم او او او
لالالالالالالا
لازم يكون بطل بالفعل واحس فيه بالصدق واسال اللى حواليه ويتكلمو بصدق عشان اقرر صح

اما بقى للسؤال
حصلت معايا انى عاشرت حد 12 سنة وكان بيتهيألى انى عارف كل حاجة عنه
وفجاة اتضح ليه انى معرفش اى حاجة عنه
احييكى على الطرح المثمر

روح طفلة يقول...

السلام عليكم ورحمه الله وبركاته
موضوعك حلو اوى يا موناليزا واسلوبك سلس ويدخل للقلب
وللاسف الواحد لما بيحب انسان بيحب الصورة الى هو رسمها فى مخيلته ومش بيحب يشوف كل الحقيقه الى موجوده ادامه
تحياتنى لك

موناليزا يقول...

مهرة
ـــــ
أختى الحبيبة:اهلا اهلا بالقمر بعد طول غياب
فعلا ممكن يكون الاحتياج
أشكرك جدا لتعليقك
نورتينى ياجميلة واسعدنى تواجدك



******************************



المدونة الاسلامية سبايدر مان
ـــــــــــــــــــــــــ
وعليكم السلام ورحمة الله وبركاته
أهلا بيك يا دكتور
أنا الحمدلله بخير اشكرك جدا لسؤالك
تعليقك وضعنى فى حيرة أنشره ولا مانشروش
وفى الاخر ومنعا للزعل قررت أنشره
:) عموما زرونا تجدوا مايسركم
ويكفينا تواجدكم ومتابعتكم
يسعدنا دوام التواصل



*******************************


أخر العنقود
ــــــــــــــ
أختى الحبيبة:اهلا اهلا بالقمر
:) بجد يا نونا
أشكرك جدا لرايك يا حبيبتى رفعتى من روحى المعنوية:)
عندك حق
لا لا مش هندم والله جربى أنتِ بس وافتحى فى الكلام زى مايعجبك
:) إعترافك أسعدنى جداااااااااا
ووضع تاجا لما أكتب
تسلميلى يارب
وماحرمنى الله من تواجدك


*******************************


مسدس صغير
ــــــــــ
أهلا بيك يافندم
أشكرك جدا لرايك
عندك حق الزواج ده مشروع العمر وماينفعش فيه يتبنى على مجرد وعود
ياااه 12 سنة!! ربنا يكون فى عونك بجد
أشكرك جدا لمشاركتك
يسعدنا دوام التواصل


**********************************


روح طفلة
ـــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر بعد طول غياب
:) أشكرك جدا لرأيك ياجميلة
عندك حق فمراية الحب عامية زى مابيقولوا
نورتينى حبيبتى واسعدنى تواجدك

الشعب لابد له من حكومه تشكمه يقول...

البوست تحففففففففففه لدرجة انى مش عارفه اعلق على ايه ولا ايه,بس الحوارات تحفه جدااا والكلام يلمس اوىىىىى..

اتخدعت انا فى بعض الناس بس للاسف بعد سنين اكتشفت انهم ولا حاجه ومكنش لازم ادلخهم فى حياتى اصلا..بس تعملى ايه فى الغباء,او حسن النيه.

P A S H A يقول...

:(

كلمات من نور يقول...

مشكلة الحب يا حبيبة قلبي إنه زي ما بيقولوا عنه مرايته خشب أو مرايته عميا وبيكون كل اللي حوالينا شايفين حاجه واحنا شايفين حاجه تانيه ونتحدى عالم بأكمله من أجله وبعد العشرة بتلاقي إن مراية الحب فعلا عمياء ...نيجي للسؤال ما أنا اتعودت عالأسئلة بتاعتك الأرض أرض (:

إمتى حسيت إنك بتشوف حد لأول مرة رغم عشرتك له؟

كان عندي صديقه مريضه مرض مزمن وكنت باروح لغاية البيت عندها أزورها و ابعت لها صديقة لنا بتعالج بالموجات الكهرومغناطيسية أو ما يسمونه الريكي ..وهي سيدة على خلق وتدين مجرد ما تضع ايديها عليكي وتقرأ آيات من الذكر الحكيم تلاقي الامك اتحسنت وهي تتوجع يا عيني عليها ..كنت حكيت عنها في مدونتي لحظة نور...ليه مش رحتي المدونة دي وقريتي بوستي الشبشباوي؟؟

المهم الصديقة المريضة دي في مرة قرأت مشكلة على المجموعة وعملت من البحر طحينة زي ما بيقولوا و قالت للناس إنها مشكلتي أنا ...مش حتصدقي اد ايه قلبي وجعني علشان أنا مبعرفش أكره حد ولا أزعل من حد بس اللي زعلني إنها كانت حتخسرني أخوات لي في الله لولا يقيني بالله إنهن بريئات ...صدقيني كانت أيام صعبه قوي علشان الخيانة لما بتيجي من ناس أكلتي منهم عيش وملح بتكون موجعه كضربة سكين..بس الحمدلله إن ربنا بيقف مع الواحد وبيربط على قلبه فيحتسب الأجر ويسامح.........وحشتيني يا موناليزتي ..تعالى بكرة نتقابل p:
طبعا إنتي عارفه فين..

موناليزا يقول...

الشعب لابد له من حكومة تشكمه
ـــــــــــــــــــــــــــ
أختى الحبيبة:اهلا اهلا بالقمر
:) أشكرك جدا لرايك ولمشاركتك
مش قادرة أسميه غباء بس ممكن نسمية قدرة فائقة من جانبهم على التلون والخداع
نورتينى شيمة الجميلة واسعدنى تواجدك


********************************


باشا
ـــــ
أهلا بيك يافندم فى زيارتك الاولى
:)
نورت مدونتى وارجو دوام التواصل


******************************


كلمات من نور
ـــــــــــــ
أختى الحبيبة:اهلا اهلا بالغالية
فعلا ماكدبوش لما قالوا عنها انها عامية:)

أقولك على حاجة أنا بقيت حتى لو معنديش نية أضع أسئلة عشانك بجد بقيت بحطها أصلك بتحسيسينى انى هلاقى حد مهتم بجد وهيجاوب عليها:)
تسلميلى ياحبيبتى

مين قال رحت طبعا:) ومتابعة كل التدوينات من الاول خالص كمان
بس انا اللى ملقتش حاجة أعلق بيها
أصل ماجربتش الموضوع ده سواء كنت المستقبل أو المرسل :)

فعلا كلما كان الجرح من القريب كلما صعب الشفاء
ربنا يربط على قلبنا جميعا ويرزقنا قدرة العفو عند المفدرة

وانتى كمان ياحبيبتى وحشتينى جدا
إن شاء الله بكرة نتقابل:)
نورتينى غاليتى واسعدنى تواجدك

Dr. Ibrahim يقول...

الصراحة انا فتحت المدونة وتابعت من أول مشهد وهى بتعاند وشافت بس بقلبها ككثير من الفتيات التى لا تحكم سوى القلب فقط دون العقل ...
ثم غفوت وصحوت على المشهد الأخير وصوت المقطع "ده خاين واللى باعك إوعى تدمع عليه.. إحمد ربك ياقلبى إنك مابقتش ليه". ليفوتنى جزء كبير من الحلقة
اشوفها بكره بقى فى الإعادة:))
يالا السلام عليكم

أحمد بسام يقول...

أختى الكريمة :
صدقوا لما قالوا الحب اعمى
جزيت خيرا

اقصوصه يقول...

اممم

حواء غالبا عاطفيه

لهالسبب مقاييسها لوزن الامور

ممكن تكون مقاييس غير سليمه

بس طبعا مش دجايما

انما في بعض الاحيان :)

مكرووونة يقول...

انا عيطت لأنى حسيت ان دى انا
تفتكرى لما نتجوز حسيبه

بضحك على نفسى زيها
لأنى للاسف ملتزمة و معرفش اولاد تانيه
دا جه قدامى فى وقت محتجاه
انا عملت مدونة اسمها ماكان من الاول ودا اللى كان قصدى عليه بالضبط
يا ريتنى عرفت ولاد صداقة فى شلة مش صحوبية كان زمانى بقى عندى ثقة فى نفسى اكتر قدامه و اعرف احكم عليه بقلب جامد

اقولك على حاجة
انا مستعدة اتجوزه و يطلقنى بعد سنتين و لاحاجة مش مهم..
اصلى حلمت بيه كتير اوى .. دا حلم حياتى اصلا
المشكلة ان هو عنده غيرى و انا معنديش غيره

ارجوكى تردى عليا
انا لسه جديده فى البلوجات دى ومش حعرف اتابع
لو تسمحى تكتبيلى فى المدونة عندى

جزاك الله خيرا

الطائر الحزين يقول...

التكافؤ مهم للغاية

لازم يبقى فى اللى ادامك ميزة تميزة عن غيرة على الاقل بالنسبة لك حتى تستطيع تتغافل عن عيوبة وهذه الميزة يختلف تقديرها من شخص لاخر من حيث الاهمية

فاتيما يقول...

يا لهووووى عليكى ى ى ى ى
يا مون مون
يا بنتى إيه كم الصدق دا ؟!!!
انا كأنى واقفة قصاد مراية روحى
بس زى ما قالت مهرة
الإحتياج لحنان رجل
عرف يرسم صح
عشان يقتنص فرصة وقعت ف طريقه صدفة و عرف يستغلها كويس
لما راحت منه اتجنن
عشان يرجعها
و كويس إنها فتحت ف آخر لحظة
و بعد طول غياب
المؤلم فعلا زى ما قولتى فى جملتك العبقرية و احييكى عليها بشدة
إن الواحد يفتح على مشهد مؤلم جداااا
و الحقيقة تبقى أبشع لدرجة تخليه يتمنى لو كان فضل كفيف احسن
بحبك يا مون مون و ربنا أعلم

البيروني يقول...

أولا جزاكم الله خيرا علي الموضوع الحيوي ده اللي بيتكرر يوميا بشكل فظيع و كان تجسيد رائع لمشكلة الزواج في هذا العصر,
المشكلة الأولي اختلال معايير الزوج و الزوجة ليصبح الزواج مثل قطعة الأرض ,ثانيا جهل الجميع بحقيقة الزواج

mohamed ghalia يقول...

مش شرط يبقى اجماع الناس على الصح
ومش شرط برده اجماعهم على الخطأ
مممكن كتير فعلا تحس انك فاهم حد اوى وفجأة تصدم أوى واكيد الصدمة بيتكون كبيرة لما يبقى شريك حياتك
كنت على وشك انى اقع فى مشكلة انى احس انى مش فاهم حد معايا طول عمرى بس الحمد لله الموضوع لحق اتلم وتفاهمنا مرة تانية
مجرد ظروف كانت ضغطاه مش اكتر

z!zOoOo يقول...

السلام عليكم

ازيك يا موناليزا

يارب تكوني بخير

بجد موضوع هايل بس انا كنت متوقع مسار تاني للموضوع

لكنه برضه موضوع جميل

بس بجد تسلسل الموضوع حلو قوي

وفيه أجزاء من الحوار عجبتني جدا

بس تصدقي اني كنت لسه بتكلم في حاجه مشابهه قوي في نفس الموضوع


المشكله إني مش كتير بلاقي إني ماعرفش حد او بشوفه لأول مره رغم عشرتي ليه

انا ساعات كتير بلاقي إن ناس كتير رغم عشرتها الطويله ليا

لسه ماعرفتنيش كويس

ربنا يباركلك كل موضوعاتك جميله

ربنا يجعلها في ميزان حسناتك

ليا عوده اني إن شاء الله

وهسـتأذنك إن في موضوع هنزله وممكن احط فيه لينك الموضوع ده

ده لو ما كانش يضايقك

ربنا يكرمك ويزيدك وينفع بيكي الناس

تحياتي

لــــ زهــــــراء ــــولا يقول...

ما كل هذا الالم الذى تضمنته هذه السطور القليله
اسلوبك رائع رغم انها تشبه الى حد كبير قصة صديقه من اقرب الصديقات الى قلبى لكن هى لم تتزوجه لانه بان على حقيقته قبل حتى الخطوبه
اجمل ما فى القصه انها اتعلمت الدرس مش مهم الوقت اللى ضاع منها لكن المهم انها فعلا اتعلمت الدرس بجد

اجابة سؤالك
انى عاشر ناس اكتر من عشرين سنه وفجاه ظهرت حقيقتهم فى لحظه وتبين لى ان بعض النفوس ضعيفه جدا جدا
ربنا يكفينا واياكى شر النفوس الضعيفه
تقبلى ارق امنياتى لكى بالسعاده والخير

زهراء

لــــ زهــــــراء ــــولا يقول...

موناليزاااااااااااا
اسلوب رائع وشيك اوى
انتى عارفه ان مراية الحب عاميه واللى بيعيش قصة حب بجد مش بيشوف اى عيوب فى حبيبه حتى لو كل الناس حذرته لكن نقول فى الاول وفى الاخر نصيب

لــــولا

salma mohamed يقول...

حقيقي وجعتيني جداااااااا بكلامك يا موني,
وربنا يهون على البطلة وكل اللي زيها,
ويهدي كل اللي داخل في بداية قصة زيها ويتعلم التجربه قبل ان تحرقه حرارتها في النهاية,
لكن للاسف كتير بنكون زي الاطفال مش بنخاف من النار الا لما نتسلع منها.

المسلم الصغير يقول...

السلام عليكم ورحمة الله وبركاته...
ازيك عاملة أيه؟!
بصي بقى هي قصة حلوة قوي وانتي مقدماه بشكل جميل
لكن اللي بيمشي مع قلبه هيتعب كتير واللي هيمشي مع عقلة هيتعب برده فيجب ان نختار بلأثنين وبردة محدش يعرف بصيبه فين
ربنا يوفقك
دومتي بخير

مجداوية يقول...

السلام عليكم

سبحان الله !! أعتقد أن تدوينتي الجديدة ترد على تدوينتك !! لكن ما كتبتيه سموه قصة الأمس لأنها تتكرر كل يوم أما لماذا؟ السبب الأساسي من رأيي هو عدم تقدير النفس جيدا فاختياراتنا تعكس نظرتنا لأنفسنا فعندما نقدر أنفسنا جيدا لا نرضى لها بأقل من قيمتها وهي ليست الأنانية أو الغرور ولكن فقط تحقيق كلام الله في قرآنه الذي فرق بين الناس ورفعهم درجات وفرق بين الحرة والأمة في الزواج ولكن بتذويبنا نحن لهذه الفروقات أضعنا حقنا في السعادة ثم عدنا لنشتكي غدر الآخرين ونذالتهم وتدنيهم !!!
السبب أنا وأنت وغيرنا
فلو قدرنا نفسنا حق قدرها ما حدث ما حدث فالله لا يظلم أحد ولكنا نحن الظالمين

SHAPE YOUR LIFE (ABOALI) يقول...

الحياة حينما تكون بعيدة عن المبادىء
تكون وجهات نظر
فهناك من يقول انى لو فرت كذا وكذا سيجدث كذا
وهناك من يقول هيهات هيهات

والاعمار هنا هى مقياس الخسارة
فهناك دقائق وساعات وايام وسنون نخسرها فى حالة الانهزام
وهناك امل وبسمة وحنين وشوق فى حالة النصر

ولكن اليس العمر غاليا ومعدود
الزواج ليس تجربة او بطيخة تكن احمرا او ابيضا
انما هو حالة بناء مستمر للارتقاء الى بناء ارقى

ولكن نحن نحن انسان نصيب ونخطىء
فلعل فى الخطأ تكون الاستفادة وفى النجاح يكون الارتقاء


يعرف المرء عن الشدائد وعند الغضب

حوووووووووار طويل
ولكنه حوار من الحياه
لذا جاء من القلب ودخل الى عمق الحياه

اشكرك

موناليزا يقول...

د/ ابراهيم
ـــــــــــــ
أهلا بيك يا دكتور
:)فعلا فاتك أحداث كتيرة
ونحن فى نتظار مشاهدتكم الكاملة
يسعدنا دوام التواصل
مع التحية


********************************


أحمد بسام
ـــــــــــ
أهلا بيك أستاذ أحمد
فعلا
ربنا يكرمك واشكرك جدا لتعليقك
يسعدنا دوام التواصل


*********************************


اقصوصة
ــــــــ
أختى الحبيبة:اهلا اهلا بالقمر
ده حقيقى للأسف
نورتينى ياجميلة واسعدنى تواجدك


*******************************


مكرونة
ـــــــ
أختى الحبيبة:اهلا بيكِ فى زيارتك الاولى
:( وجعتينى بجد
بس بما انك متوقعة النهاية ناوية تبدأى معاه ليه
حاضر ياحبيبتى أنا جايالك حالا
نورتى مدونتى ويسعدنى دوام التواصل


********************************


الطائر الحزين
ـــــــــــ
أهلا بيك يافندم
عندك حق جدا
أشكرك جدا لتعليقك
يسعدنا دوام التواصل
مع التحية


*******************************


فاتيما
ــــــــ
أختى الحبيبة:اهلا اهلا بطماطم الجميلة
:) إحرجونى بذوقكم بقى وارفعوا من روحى المعنوية كمان:)

:) أى خدمة
عاجبنى تعليقك جدا جدا
تسلميلى يارب
وانا كمان والله بحبك كتييير جدا خالص يعنى
بوسة وحضن لأجمل أم يوسف:)
نورتينى غاليتى ويسعدنى تواجدك دائما

موناليزا يقول...

البيرونى
ـــــــ
أهلا بيك يافندم
ربنا يكرمك اشكرك جدا لرأيك
عندك حق فعلا
يسعدنا دوام التواصل
مع التحية


**********************************


محمد غالية
ــــــــــــ
أهلا بيك استاذ محمد
يمكن ولو ان ده بيبقى قليل اوى وخصوصا فى اراء الاشخاص ببعضهم ببعض
فعلا عندك حق
:) طب الحمدلله فما اجمل رجوع الاحبة
أشكرك جدا لتعليقك ولمشاركتك ويسعدنا دجوام التواصل
مع التحية


*********************************


زيزو
ـــــــ
وعليكم السلام ورحمة الله وبركاته
أهلا بيك يافندم
أنا الحمدلله بخير اشكرك جدا لسؤالك
:) نحن دائما خارج التوقعات
أشكرك جدا جدا لرايك
ربنا يكرمك يارب
لك ما تشاء فاستعانتك بما اكتب شئ يسعدنى جدا
فى انتظاركم دائما ويسعدنا دوام التواصل
مع التحية


********************************


لولا وزهراء
ــــــــــ
أختى الحبيبة:اهلا بيكِ فى زيارتك الاولى
أشكرك جدا لرايك
طب الحمدلله انه بان ليها من الاول خالص
ربنا يكرمك ويتقبل دعائك
نورتينى زهراء الجميلة واسعدنى تواجدك


*********************************


لولا وزهراء
ــــــــــ
أختى الحبيبة:اهلا بيكِ فى زيارتك الاولى
أشكرك جدا لرايك
عندك حق جدا
نورتى مدونتى لولا الجميلة وارجو دوام التواصل

موناليزا يقول...

سلمى محمد
ـــــــــ
أختى الحبيبة:اهلا اهلا بالقمر
سلامتك ياسلومتى بس هى الحقيقة دايما بتوجع:)
ده حقيقى
نورتينى ياجميلة واسعدنى تواجدك


*********************************


المسلم الصغير
ــــــــــــــ
وعليكم السلام ورحمة الله وبركاته
أهلا بيك يافندم
أنا الحمدلله بخير أشكرك لسؤالك
أشكرك جدا لرايك ولتعليقك
يسعدنا دوام التواصل
مع التحية


*********************************


مجداوية
ــــــــ
وعليكم السلام ورحمة الله وبركاته
أختى الحبيبة:اهلا اهلا بصوت الحق
عندك حق جدا
نورتينى موجا الجميلة واسعدنى تواجدك


***********************************


ابو على
ـــــــــ
أهلا اهلا بصاحب التعليقات المميزة
كالعادة تعليقكم أبلغ من اى رد ممكن أقوله
أشكرك جدا لتعليقك
يسعدنا دوام التواصل
مع التحية

مرايتى يقول...

هو قلبها الى مشاها فى الطريق
واقتناعها انها ممكن تغيره برضه كان مسيطر عليها لاننا كلنا جوانا ده اننا ممكن طالما حبينا ممكن نغير فى الطرف التانى حاجات او ممكن انه يتقبل التغير لانه هو كمان حبه
بس للاسف ما بقاش ده دلوقتى وحتى لو اتغير فى الاول الطبع غلاب او يمكن الظروف ؟
بس بجد حوار رائع مهو طبعا من موناليزا المتالقه دائما
ربنا يفتحها عليكى

rovy يقول...

كنت بدأت اقلق فى اول البوست من ان البطله تسامح و ترجع تانى تتألم مع شخص عذبها و اكيد شخص بأخلاقه مش حيقدر لها انها سامحته و حيرجع يعذبها تانى .. الحمد لله ان البطله فتحت .. ربنا ينور بصيرتنا جميعا يااارب ..
ناس كثير فى حياتنا فجأه بنحس اننا بنشوفهم لأول مره مع كل الاسف ..

حفظكى الرحمن من كل شر

تحياتى لكى دوما

طهر فؤادك يقول...

السلام عليكم ورحمة الله وبركاتة ,,,

ربنا يكرمك يارب والمسلمين ... بوست جميل جدا كماعودتينا .. وفعلا بيفتح عقل البنات للتفكير والتدبر قبل ماياخدوا اى قرار .. فربنا يكرمك يارب والمسلمين على القصة والموضوع ويجعلة فى ميزان حسناتك اللهم امين والمسلمين ...

- اما عن الناس الى بينكشفوا من العشرة فهقوللك حاجة بسيطة الواحد يعامل ربنا ومش يعامل البشر بمعنى اننا نراعى ربنا فى كل معاملاتنا اما التقصير من البشر فدة وارد جدااا ومتوقع فحسابنا وحسابهم عند ربنا ان شاء الله دة وجة نظرى ووجهة نظر كل واحد منكوا برضوا بحترمها جداااااا

كلام فارغ اوى يقول...

قصه ملهاش حل بجد
وفعلا كتير اوى مننا مر بموقف من ده
وانا مريت به
بس الحمدلله فوقت في الوقت المناسب
الحمدلله
ف

موناليزا يقول...

مدونتى اسمها مرايتى
ـــــــــــــــــ
أختى الحبيبة:اهلا اهلا بالقمر
فعلا الطبع غلاب
:) اشكرك جدا لرايك وماتحرمش منك ابدا ياحبيبتى
نورتينى ياجميلة واسعدنى تواجدك


**********************************


روفى
ـــــــ
أختى الحبيبة:اهلا اهلا بالغالية
فعلا كان ممكن جدا ترجعله لولا تدخل عقلها فى اللحظة المناسبة
يارب ياحبيبتى ينورلنا بصيرتنا جميعا اللهم امين
نورتينى روفى الجميلة واسعدنى تواجدك


*********************************


طهر فؤادك
ــــــــــــ
وعليكم السلام ورحمة الله وبركاته
اهلا بيك يافندم
ربنا يعزك يارب والحمدلله فعلا فماتوفيقى الا بالله

متفقة مع كلامك جدا فى اننا بنتعامل مع الله وليس مع البشر ولكن اذا تعاملت مع شخص وانت تعرف انه سئ افضل من ان تتعامل مع شخص تظن انه كويس ثم يتضح لك بعد ذلك بأنه سئ
وطبعا كلنا نحترم وجهة نظرك جدا
أشكرك جدا لتعليقك
ويسعدنا دولم التواصل
مع التحية


********************************


كلام فارغ اوى
ــــــــــــــ
أختى الحبيبة:اهلا بيكِ فى زيارتك الاولى
بجد بجد مفاجأة جميلة:)

أشكرك جدا لرايك
والحمدلله ياحبيبتى انك فوقتى فى الوقت المناسب
نورتى مدونتى وفى انتظارك دائما

ســـــــهــــــــــر يقول...

الاول العنوان جابنى على وشى لما قولتى ( العاميه فتحت ) و افتكرت ان شعر العامية فتح معاكى و هتتحفينا بقصيدة
و لولعى بالعامية جيت بسرعه ففؤجئت بالعاميه ( اللى ما كانتش بتشوف ) و كثير ما كانت واحده مننا ف يوم م الايام

فيه قول بيقول ( ان تصل متاخرا خير من الا تصل ابدا )
يبقى كويس انها اخيرا شافت

اما عن سؤالك اللى ف الاخر فمين فينا ينكر انه احيانا اتخدع ف اشخاص و شافهم على غير حقيقتهم و بعدين ظهروا
بس عارفه الاسوء ايه ؟ اما تكونى شايفه و تتجاهلى اللى شايفاها و تتمنى ييجى خير

الوردة البيضا يقول...

السلام عليكم
موناليزا العزيزة، القصة جامدة جدا، وفعلا بتتكرر كتير لأن فيه بنات كتير طيبة وصادقة وبتفتكر اللي ادامها كمان كده
بس بيعدي الزمن ولازم الحقيقة تبان ونقتنع بيها.
تحياتي لك وتمنياتي بالتوفيق

ريمان يقول...

انا مش عارفه اقول ايه


بس فعلا الانسان بيكون اعمى وبيعاند نفسه وبيعاند الواقع ومش بيلقى بال لكلام الناس عنه ومعاشرته للشخص ده ومش بيسمع نصايح حد

والاخر يتفاجىء انهم هما الصح وهو اللى كان اعمى وبيكابر

:(

امتى حسيت إنك بتشوف حد لأول مرة رغم عشرتك له؟ .

مممممممم

من سنتين

ومن اقرب الناس ليا

موناليزا يقول...

سهر
ــــــــ
أختى الحبيبة:اهلا اهلا بالقمر بعد طول غياب
:) تعرفى أنى ماليش فى الشعر خالص
فعلا الحمدلله انها اخيرا شافت:)
عندك حق فلو كنا نعلم وتجاهلنا فلا نلوم أحدا بعد ذلك
نورتينى سهر الجميلة واسعدنى تواجدك



*******************************


الوردة البيضا
ـــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
أشكرك جدا لتعليقك الجميل
نورتينى وردتى الجميلة واسعدنى تواجدك


*********************************


ريمان
ــــــ
أختى الحبيبة:اهلا اهلا بالقمر
:( للاسف ده حقيقى
أصل الشعور بالفشل لايطاق ولذلك نحاول جاهدين أن نمنع الواقع وهذا طبعا محال
أشكرك جدا لمشاركتك
نورتينى ريمو الجميلة واسعدنى تواجدك

حاجات جوايا يقول...

ياااااااااربى عالتسلسل
انا كنت حاسة انى شايفة وسامعة مش بقرا بس
الاسلوب بجد رائع رائع رائع ما شاء الله عليكى يا مونا
اما عن الحكاية .. للاسف بتكرر كتير جدا ومحدش بيتعلم من اخطاء غيره ..واللى بيساعد على تكرارها الحب الاعمى اللى بيدى لكل حاجة حجم وقيمة اكبر بكتير جدا من حجمها وقيمتها الاصليين

أحلى ما فى القصة نهايتها
لان شريك الحياة لو لم يكن صالح هيفسد الدنيا والاخرة مش الدنيا بس

والاخرة خير وابقى

والحمد لله ان ربنا قدرها عالقرار الصح
أصلها بنت حلال وطيبة وبتتق الله .. ومن يتق الله يجعل له مخرجا
الحمد لله

وحشتينى جدا يا قمر

محمد فوزي يقول...

المشكله يا موناليزا مركبه
عشان مع الحب عمرك ما هتصدق كلام الناس ولو صدقته وعطيت ضهرك لمشاعرك من غير ما تخوض التجربه للنهايه وتعرف نتيجتها بنفسك عمرك ما هتحترم نفسك لأنك ببساطه هتحس إنك إنسان بدون إراده

وعشان كمان جوه كل واحد فينا إيمان بإمكانية أن يتغير كل إنسان في لمح البصر من شخص لشخص تاني

وعشان كمان أوقات كتير بنبقى عندنا قدره على تحمل حاجات كتير لكن الناس هي اللي بتصورلنا إنها حاجات لا تحتمل وعليه إحنا بنتصرف وبنبني تصرفاتنا على قناعات الناس مش قناعاتنا

عشان كل ده هي مش لازم تندم , ولا اللي قلبه عمران بالخير لازم يخاف لأنه على الأقل ممكن يكون سبب هداية إنسان أو تكون قصة فشله دي بدايه لخير كتير ممكن ربنا يعوضه بيه

يارب أكون عرفت أوضح المعاني اللي عاوز اقولها

ذكرى رحيل قلم يقول...

السلام عليكم

كثيرا ما ينخدع الانسان في شخصا ما اذا فكر بقلبع فقط والغي عقله في امور حياته

الحمد الله انها فتحت قبل اولاد وارتبطها به طول العمر

بس ايه سبب هذة القصة الغريبة الطويلة قوي
واقع من حولك

ام افكار وخواطر
دمتي

ماء تشرين يقول...

مشكله القلب انو ديما بيختار غلط لانه البيتحكم فيه بس المشاعر وهو ده ياموناليزا الجدل الموجود دايما بين اختيار العقل احسن ولا اختيار القلب انا راى لا ده ولاده بس لازم يكونو الاتنين لانه الزواج مش حب بس وبرضو مش شئ مجرد من المشاعر يبقه لازم يبقه عندنا توازن نفسي اعتقد انه بطلت قصتك عايشه بينا وحقيقيه جدا والقصص الشبهه كتير بجد بوست ممميز

تقبلى مرورى

shaimaa samir يقول...

واقعية
لدرجةة الابهار


استشعرت مشاعرها فى كل لحظة
رغم بساطة الحرف

جميلةموناليزا

salwa يقول...

السلام عليكم اخت موناليزا
الحياة قناع منهم قناه=عه اصيل لا يبدله
و منهم بالف لون و نوع
تسلم يدك
دائما ادراجاتك مميزة
سلام

موناليزا يقول...

حاجات جوايا
ــــــــــــ
أختى الحبيبة:اهلا اهلا بالقمر بعد طول غياب
ميرسى جدا لرأيك ياسالى
عندك حق فعلا
:)
تعليقك وتوجدك اسعدونى جدااااااا
ماتتأخريش عليا تانى كتير كده:)
نورتينى ووحشتيييييييينى جدا جدا


********************************


محمد فوزى
ـــــــــــ
أهلا بيك استاذ محمد
معانى كتير جميلة لختها فى تعليقكم أشكرك جدا عليه
يسعدنا دوام التواصل
مع التحية


**********************************


ذكرى رحيل قلم
ــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
الخديعة ممكن تؤثر على العقل احيانا ايضا وليس القلب فقط
سؤال غريب يا دودو:)
لا أجد سببا لما أكتب فقط أكتب
هى فعلا طويلة شوية بس هى المفروض تكون33 فقرة حسب قانون الرواية مش فاكرة عند مين بس انا اكتفيت بـ25 ويمكن ازودهم كل شوية لما يوصلوا للرقم المطلوب .. مين عارف:)
نورتينى ياجميلة واسعدنى تواجدك


*********************************


ماء تشرين
ــــــــــ
أختى الحبيبة:اهلا اهلا بالقمر
عندك حق الزواج مش حب وبس
وأكيد بطلة القصة موجودة فى الواقع فاغرب الافلام مأخوذة من قصص واقعية
يسعدنى مرورك دائما
نورتينى ياجميلة


*********************************


شيماء سمير
ــــــــــ
أختى الحبيبة:اهلا اهلا بالقمر بعد طول غياب
:) أشكرك جدا لرايك الذى اسعدنى حقا
نورتينى شيماء الجميلة وفى انتظارك دائما


*********************************


سلوى
ـــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
أشكرك جدا لتعليقك ولتواجدك الدائم
نورتينى سلوى الجميلة وفى انتظارك دائما

بسمه عبدالباسط يقول...

كأن نفس المشهد مع اختلاف الاشخاص والاماكن يتكرر بنفس الندالة والحقارة اللى فى الشخص ده
ونفس رغبته فى الانتقام وانه يرجعها علشان ينتقم لنفسه

يااااااااااااااااه

واحد من البلد دى يقول...

السلام عليكم


يا مفتحين العيون و عنيكوا بصايركم

يا هل ترى عــارفين..لفين مصــايركم

ممكن عيونكوا تكون مفتوحة ع الآخــر

وللإسف بتكون....مقفولة ضمـــايركم

اختنا العزيزة..
مرحبا بالعمى ان كان معه نورا بالبصيرة..ويجب على الانسان ان يكون صاحب موقف وليس مثل الكرة تتناقله الاقدام ولا يذكر الناس الا من احرز الهدف..

دمتى بخير

يا عالم يا هوووووووووووو يقول...

جميلة جدا .... جزاكي الله خيرا...
فعلا للأسف في ناس كتيييير سواء رجالة أو ستات بيقعوا في الموضوع ده رغم نصايح الأباء والأقارب والمعارف ..... لكن الإنسان ما بيفوقش إلا بعد فوات الأوان لما يحدث الزواج.
ليا أقراب حصل معاهم الموضوع ده وللأسف يا إما عايشين في نكد ومشاكل من زمان ويا إما حصل إنفصال

Ahmad يقول...

مدونة رائعة وجميلة ...
تقبلي تحياتي

(green eyes) يقول...

يااااااااااااه قصة بتتكرر كتيييييير
هو فعلا على راي المثل نظارة الحب عمياء
فعلا صعب ان الناس تجتمع على حاجه ومناخدش بيها في الاعتبار

Hanan Elshafey يقول...

السلام عليكم
اولا كل عام وانتي بخير
ثانيا القصه رائعه
ثالثا بالنسبه للسؤال برده مش عارف ه اجاوب ازاي بس هو حد عاشرته طول عمري
علمني مكدبش وكدب عليا علمني مخونش وخانني علمني كل حاجه حلوه وعمل عكسها يومها عرفت اني معرفتش حد

ليس فقيرا من يحب يقول...

السلام عليكم

موناليزا يا حبيبتىقريت البوست مرتين وحسه بالصراع اللى البطله كانت عيشاه
وحسه كانى باسمع الحوار ده
بس ارجع واقول عمر ما حد بيختار نصيبه
حتى لو نصيبه ده هيعذبه ويؤلم قلبه

السؤال مش عارفه اجاوب عليه الحقيقه

ربنا يسعد قلبك

ياريت تسامحينى على التقصير

والقاء لله فى وفاه والده اختنا عفراء

ربنا يرحمها وجميع موتى المسلمين

Cute Kitty **sookra يقول...

يانهار ابيض
انتى بتحكى خيال ولا واقع
لانى متخيله كل الحوارات دى والاشخاص كمان
المهم صعب اننا ننخدع فى شخص كل الناس شايفاه وحش واحنا بس شايفينه كويس وبنحاول اننا نخليهم يغيروا رايهم فيه
وفى الاخر نطلع احنا غلط
تسلم ايديكى

(Joudy) يقول...

أنا فى دهشة كبيرة من الحوار اللى قرأته أد ايه بيعمينا الحب عن حاجات كل الناس شيفاها . . . حاجة صعبة انك تكتشف صورة انسان كنت فاكره ملاك يتقلب بسرعة لشيطان

أما بالنسبة لسؤالك
فالحكاية بدأت وأنا عندى 17 سنة بقيت أشوف وجوه جديدة وبصراحه أقنعة صعبة للغاية بعد عشرة مش قصيرة

دمتى بكل الخير والسعادة

موناليزا يقول...

بسمة عبد الباسط
ـــــــــــــــــ
أختى الحبيبة:اهلا اهلا بالقمر بعد طول غياب
سبحان الله فعلا
نورتينى بوسبوسة الجميلة واسعدنى تواجدك

**********************************


واحد من البلد دى
ـــــــــــــــــــ
وعليكم السلام ورحمة الله وبركاته
أهلا بيك يافندم
"لا يذكر الناس إلا من أحرز هدف"
قد ايه جملة جميلة وعجبتنى جدا
أشكرك جدا لتعليقك
يسعدنا دوام التواصل


*********************************


يا عالم ياهوووو
ــــــــــــــــــ
أهلا بيك يافندم بعد طول غياب
ربنا يكرمك أشكرك جدا لرايك
ماهو مراية الحب عامية كما يقال
أشكرك جدا لتعليقك
يسعدنا دوام التواصل


***********************************


أحمد
ــــــ
أهلا بيك استاذ احمد فى زيارتك الاولى
أشكرك جدا لرايك
نورت مدونتى وارجو دوام التواصل


*******************************


جرين آيز
ــــــــــ
أختى الحبيبة:اهلا اهلا بالقمر
عندك حق
فالانسان لن يعيش ليمر بكل تجارب الاخرين ولكن يكفى ان يأخذ بخلاصة التجربة منهم
نورتينى ياجميلة واسعدنى تواجدك


********************************



حنان الشافعى
ـــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
وأنتِ بخير وصحة وسعادة
أشكرك جدا لرايك ولمشاركتك
نورتينى حنونة الجميلة واسعدنى تواجدك


*******************************



ليس فقيرا من يحب
ــــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
عندك حق محدش بيختار نصيبه
ولا يهمك ياجميلة:)
ربنا يعزك يارب
وسعيكم مشكور
نورتينى غاليتى واسعدنى تواجدك


*******************************


سكرة
ــــــ
أختى الحبيبة:اهلا اهلا بالقمر
:) تعليقك اسعدنى جدا
نورتينى ياسوكا وفى انتظارك دائما



**********************************


جودى
ـــــــ
أختى الحبيبة:اهلا اهلا بالقمر
عندك حق بتبقى صدمة محترمة يعنى مش اى كلام:)
اشكرك جدا لمشاركتك
نورتينى جودى الجميلة واسعدنى تواجدك

رفقة عمر يقول...

ابكانى هذا الموضوع كثيرا
كانك تحكين عنى
احيانا استغرب ليه فيه ناس بتاذى كل ذنبهم انهم اعطوهم الامان انهم وثقوا فيهم
واسوا شئ ان يظهر الوجه الحقيقى الذى لو كان ظهر من البدايه ما كنا شاركناهم حياتنا فى الاساس
ربنا يصلح لنا الاحوال جميعا اللهم اميين

موناليزا يقول...

رفقة عمر
ــــــــــــ
أختى الحبيبة:اهلا اهلا بالقمر
:(
ماتزعليش ياحبيبتى مازلنا فى الدنيا فلنتوقع منها أى شئ
نورتينى ياجميلة واسعدنى تواجدك