الاثنين، 21 ديسمبر 2009

نظرة لمن لا ينظر

أثناء دراستى عن ذوى الإحتياجات الخاصة بما فيهم الإعاقة العقلية بمختلف أنواعها.كان مطلوب مننا دراسة عملية عن كيفية إستخدام طريقة "برايل" الخاصة بالمكفوفين.وحددت لنا الأستاذة المسئولة عن تعليمنا ميعاد مع شخص متخصص فى مركز رعاية المكفوفين. وكعادتى ذهبت فى الموعد المحدد تماماً وقبل حتى أن تكتمل المجموعة التى ستقابل معى هذا الشخص بدأت أشعر بالضيق نتيجة عدم إحترام المواعيد. وطلبت من السكرتيرة المسئولة أن تتصل بهذا الشخص المسئول عن تعليمنا. وبالفعل أتصلت به سريعاً وآتت لتخبرنى وكانت المفاجأة التى لم أستطيع أن أرد عليها بعدها.
قالت لى: هو بيعتذر جداً عن التأخير لأن الشخص اللى بيساعده فى إرتداء ملابسه إتأخر عليه بدوره وهو الآن فى التاكسى وسيصل تقريباً كمان عشرة دقائق.
فهذا يعنى أن من سيقوم بتعليمنا كفيف.
لماذا لم يخبرنا أحداً من قبل!!.
ولكن حمداً لله أننى عرفت هذا قبل وصوله. لن أخفى عليكم قلقى وحيرتى وقتها فى كيفية التعامل معه وخاصة أننى تقريباً اللى واخدة موضوع التعليم بجد وهذا يعنى أسئلتى الدائمة لمن يعلمنى فيما لا أفهمه (المجموعة تتكون من ست بنات تقريبا) دول اللى إهتموا وحضروا والباقى رغم كثرتهم لم يحضروا يمكن لأن تعليمنا ده مش هييجى تطبيقه عملياً فى الإمتحان أو لأن الجو بارد جداً.. لا أعلم حقاً أسبابهم ولكن هذا كان العدد على أى حال.
لن أطيل عليكم بانفعالاتى الداخلية وقتها وسأختصر كل هذا فى لحظة قدومه. وإذ به شاب لم يكمل العشرين من العمر.وهو طالب فى كلية الآداب قسم اللغة العربية.
طبعاً لكم أن تتخيلوا شاب يدخل القاعة ويشعر بوجود أنفاس لا تتحدث فمن كانت تتحدث بجوار صديقتها سكتت تماماً وظللن يراقبونه ويشاهدون أفعاله وهل هى كما درسناها نظرياً أم لا.
وأخيراً أتت السكرتيرة المسئولة عن تنظيم المكان وجلسنا حوله على شكل حرفLوالسكرتيرة وأستاذتنا فى جانب الغرفة. وعرفنا بنفسه وطلب منا أن نعرفه بأنفسنا فتطوعت إحدى الموجودات بأن تقول له أسمائنا جميعاً
فنبهتها أنه من الأفضل أن تعرف كل واحدة نفسها. وبداخلى أقول غاضبة" أمال لو مكنتوش دارسين كنتوا اتعاملتوا معاه ازاى فهو من حقه على الأقل أن يعلم عدد من حوله وأماكنهم".
بدأ الكلام عن كيفية إستخدامه لطريقة برايل.
فقال:تستخدم القراءة عن طريق الصوابع فمن خلال ملمس الحرف نستطيع قراءته. أما الكتابة عن طريق- وطلب من السكرتيرة أن تأتى بالأدوات لنا جميعا. فكانت عبارة عن( لوح خشب , ورقة سميكة , ومسطرة خاصة بهم, وكرة خشبية فيها سن حديد مدبب).
تسائلت بداخلى ما كل هذه الأدوات!!. ولم أستطع طبعاً أن أبدى تعجبى هذا وكنت أحاول جاهدة أن أمنع نفسى من أى تعليق حتى لا أتفوه بأى كلمة قد تؤذيه دون أن أقصد.
وضع الورقة على اللوح الخشبى المخصص وثبتها بطريقة بارعة عن طريق مشبك معدنى يوجد فى أعلى اللوح الخشبى. أنا عن نفسى لم أتمكن من وضعها صحيحة إلا بعد عدة محاولات.
والمسطرة المستخدمة عبارة عن مسطرتين عريضين طرفهم شابك مع بعض
المسطرة الأولى بها مربعات فارغة والمسطرة الثانية بها ثقوب بارزة وبوضعهم على بعض يكون الشكل عبارة عن مسطرة واحدة بها مربعات صغيرة وبداخل كل مربع صغير عدد من الثقوب البارزة وتوضع الورقة بينهم.
والقلم عبارة عن كرة خشبية مدببة بسِن من حديد.
قام بوضع القلم داخل المربع وضغط على أحد الثقوب فطبعت على الورقة نقطة مخرومة وفعلها أكثر من مرة مكوناً حرفاً واحداً .
وقال: هكذا مثلاً حرف الـ (ت).
أشار بوجهه ناحيتى قائلاً: شايفة أنا عملت إيه؟.
أجبته: بنعم- رغم أنى لم أرى بالفعل ..فالنقط صغيرة والمسافة بينى وبينه ليست بالصغيرة حتى أرى من على هذا البُعد ولكن بداخلى لا أريد أن أظهر ذلك.
فاجأنى بتصرفه وكأنه شعر من نبرة صوتى بأننى لم أشاهد بالفعل ما عمله.
ووجدته قام واقفاً واتجه ناحيتى وقرب الورقة منى قائلاً: كده واضحة أكتر مش كده؟.
ساعتها بجد أحمررت خجلاً وأجبت :بأيوة.
وبداخلى كيف علم ؟ هو أنا واضحة أوى كده لكل اللى بيتتعاملوا معايا حتى لو مش شايفينى!. وأيضاً إيه الذوق و الأخلاق دى ده لو كان مدرس خصوصى ماكانش أهتم أوى كده.
وأخذ يشرح بكل بساطة وحينما أنتهى
قال: أشعر إنك مستصعبة الموضوع رغم أنها حاجة سهلة جداً.
إيذاء أسلوبه الإجتماعى معى أستطعت أن أتعامل معه بحرية أخيراً بعد ما كنت أبدى فقط بعض الملاحظات والتعليقات البسيطة حتى يشعر بوجود بشر يتعامل معهم بدل الصمت الرهيب أو الهمهمات من جانب زميلاتى أو حتى لعبهم فى الموبايل على إعتبار أنه مش شايفهم - بجد إتضايقت منهن كلهن يومها- وسألته عن كيفية تقبله الأمر هكذا.
- منذ متى وأنت تستخدم هذه الطريقة؟.
- منذ الصغر من المرحلة الإبتدائية إلى المرحلة الثانوية وأنا أستخدم هذه الطريقة؟.
- طيب ودلؤتى فى الكلية بتعمل إيه؟.
- أنتظر الكتاب ينزل وأجعل واحد يقرأه لى ويذاكر معى أو يقوم أحد المتطوعين بكتابة الكتاب على الكمبيوتر ثم يحوله إلى برنامج برايل ويطبعه فيكون الكتاب سهل بالنسبة لى.. المشكلة الأكبر إن الكتب بتنزل قبل الإمتحان بشهر واحد وطبعاً ده وقت قليل جداً.
- ليه ما تقولش للدكاترة على الأقل ينزلوا الكتاب بدرى؟.
- دى مش شكلة الدكتور عشان يهتم بيها!.
- طبعاً المرافق بيكون مذاكر معاك مش كده؟.
- ابتسم قائلاً: لأ طبعاً.. المرافق بيكون موظف فى الكلية وبييجى بعد بداية الإمتحان بربع ساعة ولسه على ما يقرأ الإمتحان- ده لو عرف يقرأه لأنى لغة عربية فالكلمات بتكون بالتشكيل - وبالمقابل مش بيعرف يكتب الإجابة بتاعتى بالدقة الكافية.
- معقول موظف فى الكلية وميعرفش يكتب؟.
- اللى أكتر من كده أنه ممكن فى مادة الإنجليزى مثلاً ما يكونش بيعرف يكتب الحروف.
- ليه ماتقدومش شكوى؟.
- ابتسم قائلاً: قدمنا وكانت النتيجة صدور قرار بعدم دخول المكفوفين أقسام اللغات بما فيهم اللغة العربية وأصبح وجودنا فى أقسام محددة فقط ده غير أننا لا ندخل الكليات العملية لأن فى ثانوى الإختيار الوحيد لنا هو دخول أدبى.
وختمت حوارى معه وشكرته كثيراً لأنه سمح لى بالتحدث معه ولأنه كان مضيافاً حقاً. وهو أيضاً شعرت بسعادته نتيجة إهتمامى بما يقول وليس بمراقبتى لما يفعل ووجدته يقف ويحنى رأسه لى قائلاً: تشرفت بمعرفتك.
بجد أنا بقى لى كتير ماقابلتش ولد ذوق كده وخصوصاً حينما يقوم بدور المدرس ويقف فى نهاية اللقاء ليحيى الجميع رغم ظروفه ورغم هرجلة البنات وشعورى أن فيه حرب هتحصل نتيجة تخبطهم فى الكراسى وعدم وضعها فى أماكنها الصحيحة.
مش هتكلم عن مدى الألم النفسى التى شعرت به وماتتبعه من آلام أخرى بعد هذه المقابلة ولكن سأقول:
ياااااااااااااااااااه.
قد إيه إحنا فى نعم كتير ومش حاسين بيها.
لو عايزة أكتب أى حاجة فى ثوانى أكتبها وبدون أى مشقة ولو عايزة أقرأ أو أذاكر مابحتاجش لحد.
والطلبة مابيفكروش يذاكروا أصلاً!!!.
لو عايزة أخرج بختار ملابسى بنفسى وأرتديها دون مساعدة أحد. قد إيه دى نعمة كبيرة.
ومن هنا أردت أن أوجه ندائى لوزير التعليم العالى وللسادة المسئولين عموماً أن يلقوا نظرة على من لا ينظرون.
وأطالبهم بألا يزودوا من إحساسهم بالعجز عن طريق تعيين موظفين أكفاء لمرافقتهم أثناء الإمتحانات وأن يكون لهم إسطوانة تعليمية بدل الكتب أو على أقل تقدير الكتب المقررة عليهم يستلموها بدرى وغيرها من الأشياء التى تساعدهم.
ويكفينا فخراً أنهم يريدون الإنتاج وعدم الإستسلام لعجزهم.
وأوجه الآن كلامى إليكم:
كم من المرات شعرنا بعظيم نعمة البصر.
كم من المرات تذهب لقضاء حاجتك دون مساعدة الآخرين كلياً أو جزئياً.
كم من المرات إحتارت فى إختيار لون معين لشئ ما.
كم من المرات وقفت أمام المرآة لتنظر إلى ما ترتديه وهل هو لايق عليك شكلاً وموضوعاً مع وجود أحد تثق فى رأيه.
كم من المرات قطع التيار الكهربائى فتخبطت فى الكراسى إلى أن وجدت شمعة أو شغلت كشاف رغم أن دى الشقة اللى قضيت فيها عمرك والمفروض إنك عارف تفاصيلها.
كم من المرات كنت تبحث عن شراب فتجد فردة لون والأخرى بلون مختلف فتبحث جاهداً إلى أن تجدها فى زحمة الشرابات المتراصة بداخل الدولاب بلا نظام.
و كم من المرات إستخدمت بصرك فى معصية الله.وتمعنت وتفحصت النظر فى شئ أنت تعلم جيدا بمدى غضب الله عند ذلك.
وكم من المرات قرأت فى كتاب الله.
وكم من المرات إختلست النظر إلى شئ من عورات الآخرين حتى لو كان خبر فى جريدة.
وكم من المرات تذكرت بأن الله يراك .
وكم من المرات نظرت فى أعين محدثك بكل حب وترحاب. وكم من المرات التى لم تهتم فيها بالنظر إليه وكم ترك هذا أثراً سلبياً فى نفسه.
وكم من المرات ذاكرت دروسك دون أن ينبهك أحد.
وكم من المرات التى دخلت فيها على حشد من الناس واستطاعت أن تعرف عددهم بمفردك وشكل كل شخص وعمره التقريبى أيضاً دون مساعدة أحد.
وكم من المرات التى استمتعت فيها بجمال الطبيعة ومارست عبادة التفكر.
وكم من المرات التى شوهت الطبيعة بأفعالك كقطف الزهور وإلقاء المهملات على الأرض.
وكم من المرات التى قضيت فيها وقت فراغك بممارسة هوايتك المفضلة من قراءة وكتابة ورسم أو حتى مشاهدة برامج معينة فى التلفاز وما إلى ذلك.
كم من المرات نظفت الكرسى اللى هتجلس عليه لأنك وجدت إن عليه تراب.
كم من المرات كنت ماشى فى الشارع ووجدت بلاعة مفتوحة فانتبهت لذلك ولم تسقط.
كم من المرات التى حفظت فيها شكل سواق معين لكى لا تركب معه مرة أخرى.
وكم من المرات إستطاعت أن تؤدى عملك على أكمل وجه دون مساعدة الآخرين.
و كم و كم و كم....
يا ترى عينك هتشهد عليك يوم القيامة بإيه.
اللهم أنى أصبحت بك فى نعمة وعافية وستر فاتتم نعمتك عليا وعافيتك وسترك فى الدنيا والآخرة.
اللهم متعنا بصحتنا وقوتنا أبداً ما أحييتنا واجعله الوارث منا.
يااارب ماتحوجنيش لحد أبداً.
يارب لا نحصى ثناءاً عليك أنت كما أثنيت على نفسك جل جلالك وعظم سلطانك. ولا حول ولا قوة إلا بك.
إحمدوا ربنا يا جماعة إنكم بتقضوا شئونكم الخاصة بمفردكم ودون مساعدة أحد فوالله إنها لنعمة غالية لا يشعر بها إلا من فقدها. ولا تستخدموا نعمة الله فى معصيته بل حافظوا عليها بالشكر والطاعة.
وصدق رسول الله صلى الله عليه وسلم حينما قال" ( يقول الله تعالى : إذا ابتليت عبدي بحبيبتيه فصبر عوضته منهما الجنة ). رواه البخاري في كتاب المرضى ، باب فضل من ذهب بصره ( 10/100 ).
=====================
تنويه
ـــــــــ
شكر خاص لـ د/ إبراهيم على هذا الفيديو أدعوكم جميعاً لمشاهدته من هنا
------------------------
سؤال جانبى:
- متى شعرت صدقاً بنعمة البصر مع ذكر الموقف؟.

هناك 43 تعليقًا:

طوبه فضه وطوبه دهب يقول...

تسلم ايدك موضوع اكثر من رائع كعادتك وحشتينى مووووووووووووووووت ياجميله ربنا يبارك فيكى ويجعله فى ميزان حسناتك

محبة الرحمن يقول...

لا حول ولا قوة الا بالله

والحمد لله على نعماءه الكثيرة


تدوينه رائعه تقبلى تحياتى

(Joudy) يقول...

بجد تسلم ايد ربنا يبارك فيكى أقولك حاجة مش فاكرة كنت قرأتها أو سمعتها إن كانت واحدة ديما تقعد فى مطعم وفى واحدة قصادة بتبص لها بشكل غريب ومبتسمة اضايقت وعلى هذا مدة طويلة لحد لما فى يوم غابت سألت عنها وسألت عن تصرفاتها رد عليها الجرسون وقالها انها مكفوفة تعرفى عملت ايه أول البنت دى لما رجعت راحت لها وسألتها عن غيابها وكمان طلبت ان تكون صاحبتها وعن لسانها قالت إنها ونعم الصديق لأنها شيفاها من جوا مش من بره شايفة روحها

* * * *

أما بالنسبة لسؤالك شعرت بيه وأنا فى الكلية لما لقيت واحد مكفوف مستنى مرافقه وواقف جنب الحيط لوحده وعلى الناحية التانية شلة من زمايلة بيضحكوا وبيهزروا بجد الحمد لله على نعمه التى لا تعد ولا تحصى وربنا يصبرهم يارب

ذكرى رحيل قلم يقول...

السلام عليكم
الحمد لله الذي عافانا مما ابتلا به غيرنا وفضلا علي من خلق تفضيلا
الحمد لله علي نعمة البصر
مش عارفة ليه ديما بتلمسي حاجة عندي
يعني من يومين او تقدري تقولي يوم الخميس الماضي عيني وجعتني جدا وفضلت احمد ربنا علي نعمة البصر واقول الحمدلله والله يكون في عون ضعاف البصر

ورحت للدكتور وكتب لي علي نوعين من القطرة

وقالي حساسية من الجو
بس مش كنت قادرة افتح وكانت عيني ع طول تدمع
الحمد لله
علي كل شيء وهبه لنا

دمتي حبيبة

SHAPE YOUR LIFE (ABOALI) يقول...

نظرة لمن ولما
اقولتى هذا
وفى فمك همهمة
ام كانت صرخة بلغت العلا
هيهات هيهات لمن علم ووعى
وفتح القلب فاصاب كل الهنا
نعمة هنا و نعمة هناك
مرة هنا ومرة تسعى من هناك
سبحان من وضع وخلق وقال
انها لا تعمى الابصار
ولكنها تعمى القلوب التى فى الصدور
فمن ذا الذى يقرض الله قرضا حسنا
باءن ينظر لنفسه ويعفها عن الهوى
كن طبيبا" لنفسك وعش يوما" ذاخرا
املىء قلبك يقينا" وكن مؤمنا
فى معية الله انت والله هنا
يريك من خلقه من يرشدا
من رد بصر يعقوب و ل يوسف قد راءى
من متعتك الى الان بكل الرؤى
تمهل قليلا كن فى كونه متدبرا
تعش سعيدا ولن تكن لنعمائه مهملا



احد الصالحين كان يلقى لقطة طعام
وكان يستعجب انها تاخذه وتجرى على الرغم انه يلقيه لها وليس من عادة القطط ان تفعل هذا الفعل

فاخذ يلقى اليها الطعام ثم يراقبها اين تذهب بهذا الطعام
فاءذا بها تلقيه امام جحر
وتذهب

فاءذا بثعبان اعمى يخرج من الجحر
فيلتقط الطعام ويدخل ثانيا" الى جحره


من جعل القطة تفعل هذا

من جعلكم تتعرضون لمثل هذا الموقف

الحياه مدرسة نتعلم فيها لعلنا فى نهاية الطريق ننجح


اشكرك على موضوع مميز

salwa يقول...

السلام عليكم اخت موناليزا
نعم اعمى البصر مفتح البصيرة
و الحمد لله رب العالمين
تسلم يدك و وفقك الله
سلام

mohamed ghalia يقول...

الحمد لله على كل نعمة انعم بهاعلينا

لــــ زهــــــراء ــــولا يقول...

تسلم الانامل اللى كتبت الموضوع اللى اكتر من رائع
ربنا يحفظط وينور لكى طريقك

فى انتظار كل ما هو جديد منكى

موناليزا يقول...

طوبة فضة وطوبة ذهب
ــــــــــــــــــــ
أختى الحبيبة:اهلا اهلا بالقمر بعد طول غياب
ربنا يعزك يارب
اشكرك جدا لرايك
ماتحرمش منك ابدا ياحبيبتى ولا من ذوقك
نورتينى يا جميلة واسعدنى تواجدك


**********************************


محبة الرحمن
ــــــــــ
أختى الحبيبة:اهلا بيكِ فى زيارتك الاولى
أشكرك جدا لرايك ولتعليقك
نورتى مدونتى وارجو دوام التواصل


********************************


جودى
ــــــ
أختى الحبيبة:اهلا اهلا بالقمر
ربنا يعزك يارب أشكرك جدا لرايك
يااااه
القصص من دى كتير انا قرأت قصة مشابهة بس كانت على العكس
إن فيه رجل قاعد مع زوجته فى مطعم ورأى شاب ينظر تجاهها ويبتسم وظل هكذا طول القاعدة فما كان من الزوج الا ان أطرحه ضربا دون اى مقدمات وفين وفين لما عرف انه كفيف:(
أشكرك جدا لمشاركتك
وفعلا الف حمد وشكر ليك يارب
نورتينى جودى الجميلة واسعدنى تواجدك


*********************************


ذكرى رحيل قلم
ـــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
تستاهلى الحمد
:) القلوب عند بعضها
ألف سلاة عليكِ يا حبيبتى
و حقا إن تعدوا نعمة الله لا تحصوها
نورتينى ياجميلة ودمنا أحباء فى الله


*********************************


أبو على
ـــــــــ
أهلا اهلا بصاحب التعليقات المميزة
أحييك جدا على كلماتك اللى بجد ماببقاش عارفة ارد عليها
الشكر لله يافندم
والحمدلله ععد خلقه ورضا نفسه وزنة عرشه ومداد كلماته
أشكرك جدا لتعليقك
يسعدنا دوام التواصل


**********************************


سلوى
ــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
أشكرك جدا لتعليقك
والحمدلله عدد ما كان وماسيكون
نورتينى سلوى الجميلة واسعدنى تواجدك


*******************************


محمد غالية
ـــــــــــ
أهلا بيك استاذ محمد
تستاهل الحمد
أشكرك جدا لتعليقك
يسعدنا دوام التواصل


********************************


لولا وزهراء
ــــــــــــ
أختى الحبيبة:اهلا اهلا بالقمر
ربنا يعزك يارب اشكرك جدا لرايك
:) تواصلكم وزيارتكم تسعدنى دائما
نورتينى حبيبتى وفى انتظاركم دائما

rovy يقول...

الحمد لله على نعمة البصر
اللهم ادم نعمك علينا و احفظها من الزوال يارب
اللهم متعنا بأسماعنا و أبصارنا ما احييتنا و اجعلها الوارث منا ..
اللهم امين ..
شعرت بنعمة البصر حينما بدأ ابى الحبيب رحمة الله عليه بفقدانها و شعرت بألامه و تغير حاله .. كثيرا ما كنت أتخيل شعوره فى هذا الظلام الكئيب فأختنق و أبكى وادعوا الله ان يرد اليه بصره و لكن هو كان و الحمد لله قوى الأيمان و بدأ يعتاد على الأمر و يحاول ان يتعايش .. ان يظل قويا صامدا كما عودنا دائما ..رحمه الله بواسع الرحمه و المغفره يارب ..
مودتى و تحياتى لكى

العلم نور يقول...

النعم التي لدينا لا تعد ولا تحصى ولكن هل من معتبر أو حامد أو شاكر ..

إن من يحس بهؤلاء مع الأسف هم من القلة القليلة التي تتفكر في نعم الله عز وجل.

بارك الله فيك على هذا الموضوع الهام وبالذات في عالمنا العربي الذي ينظر إلى هذه الفئة على أنها عالة على المجتمع وليست فعالة.

Dr. Ibrahim يقول...

والله موضوع تمام جدا
وطريقة السرد بارعة
فنعمة البصر نعمة ككثير من النعم لابد وان نشكر الله عليها ونحمده عليها ونحافظ عليها..
ولمن فقد بصره فهو يملك بصيرة أحسن من المبصر..
يمكن ان تشاهدى حضرتك هذا الفيديو لابو خاطر على مدونتى الطبية
بعنوان
Forgive me
من هنا

حفظ الله ابصارنا وبصيرتنا

موناليزا يقول...

روفى
ـــــ
أختى الحبيبة:اهلا اهلا بالغالية
تستاهلى الحمد ياحبيبتى
ربنا يديم علينا نعمه اللهم امين
أول ما بتتكلمى عن والدك رحمه الله مبعرفش اقول حاجة بجد غير
ربنا يرحمه ويغفر له ويجازيه عنك خير الجزاء
نورتينى روفى الجميلة واسعدنى تواجدك



**********************************


الشجرة الام
ـــــــــــ
أختى الحبيبة:اهلا اهلا بالقمر
سبحان الله فعلا فالنظر لهم وحده آيه من آيات الله
اللهم لا تعاملنا بما نحن اهلا له وعاملنا بما أنت أهلا له
نورتينى ياجميلة واسعدنى تواجدك


***********************************


د/ ابراهيم
ـــــــــــ
أهلا بيك يادكتور
:) ربنا يكرمك واشكرك جدا لرايك
وفعلا هناك مبصرون ولا ينظرون والعكس صحيح
بجد أشكرك جدا على هذا الفيديو الرائع
سأضيفه للموضوع
والحمدلله على جميع نعمه

يسعدنا وجودكم دائما
مع التحية

لجين أبو الدهب يقول...

سبحان الله ياموناليزا
بوستك ده ألمنى جدا والله
ده احنا المكفوفين والله
كم من لديه بصر ويفقد البصيرة وكم من لديه البصيرة وفقد البصر

الحمد لله رب العالمين

والله احنا اجهل ما يكون بنعم الله علينا

وبالنسبة للسؤال انا فعلا حسيت بنعمة البصر لما كانت بتدينى معلمة للدراسات كفيفة فى اعدادى وصعوبة ياعينى انها تسيطر على الفصل وتشرح وتعمل اللى عليها انا ان شاء الله هابقى احكى عنها برده فى بوست مفصل

بجد نفسيتى والله ياموناليزا مش بسببك طبعا ياحبيبتى
بس بجد اد ايه احنا مش حاسيين بنعم ربنا

جزاكِ الله خيرا على بوستاتك اللى بتسيب اثر فى نفسى كثيرا

دمتِ بخير..

Amr Ibrahim يقول...

الحمد لله
شكراَ على التذكرة و تحياتي على الأسلوب الرائع

غير معرف يقول...

السلام عليكم
أحييك بشدة على طرحك هذا

The illusionist يقول...

انسه موناليزا
بجد الموضوع ده انا بفخر انى قريته
الموضوع ده مع احترامى لاى مدون
احلى موضوع قريته فى حياتى على المدونات
انا اول مره احس بموضوع زى ده
انتى فعلا ذكرتى حاجات الواحد عمره ما فكر فيها
موضوع اكتر من رائع
والله العظيم جميل قوى
وكنت هقراه تانى بس خفت ردى يضيع

بجد فعلا
ولا مره فكرت فى اللى قولتيه
بس فكرت لما حصلى الموقف ده يا موناليزا
حسيت فعلا بقيمه اللى ربنا اداهلوى


وانا فى ورشتى فى الكليه عشان بنلحم الحديد
استخدمت جهاز اللحام اللى بيخرج نور جامد قوى
روحت البيت عينى وجعتنى حبه
نمت وصحيت
عينى مش بتفتح ولما بتفتح
بتحرقنى جدا جدا
وبشوف لون ابيض بس
يومها بليل
طلعت لابن عمى فى الدور اللى فوقينا
وانا بحسس على السلالم
سحبنى على الصيدليه
اه سحبنى فعلا وانا ساعتها لاول مره فى حياتى
بفكر فى شعور الكفيف
انا كنت مسحوب
وبتكعبل فى الشارع
ولولا انى عارف تضاريس الشارع شويه
كنت انكفيت على وشى من اول مره
وبيعدلى الكورسى
وقالى على فكره انت لابس الجاكت بالمشقلب
ومكنتش عارف اعمل لنفسى اكل فى الببيت
ولا عارف اذاكر
ولا بروح الكليه
كانت اول مره فى حياتى احس بنعمه البصر
لاول مره فى حياتى بحس بنعم الله
اللى بتعدى عليا وانا شبه ناكرها لانى مش بشكره عليا فعلا
شكرا على موضوعك
معلش مش بزورك كتير
بس اعذرينى دراستى صعبه حبه
والف شكر ليكى يا موناليزا على موضوعك المحترم اللى قريته من اول لاخر حرف

Asmaa mahaba يقول...

الحمد لله فعلا اللهم ما اصبح بى من نعمه او باحد من خلقك فمنك وحدك لا شريك لك
حسيت بيها لما وجدت راجل عجوز فى الشارع مش عارف يعدى مستنى مسانده الاخرين لانه كفيف

salma mohamed يقول...

نعم ربنا علينا فعلا لا تعد ولا تحصى وبحس بيها اوي لما اشوف اهل البلاء,
او حتى يحصل اي خلل في نعمي حتى ولو ليوم واحد بحس ازاي فعلا احنا منعميين وكتير بنستخدم نعم ربنا في معصيته,
ربنا يغفر لنا ويرحمنا,
اما بقى المعامله في البلد فهي بايظه بايظه للكل مش بس لاهل البلاء,
واما بطل القصه هنا فربنا عوضه بخلق وطموح ونور بصيره مش موجودين في ألف شاب بصير العين.

Mahmoud Ahmed يقول...

الحمد لله تعالي على نعمه البصر
و لازم نشكر ربنا عليها فعلا

قال تعالى في سورة النحل : ( و الله أخرجكم من بطون أمهاتكم لا تعلمون شيئاً و جعل لكم السمع و الأبصار و الأفئدة لعلكم تشكرون )

هل فعلا حد بيشكر بنا على النعم ده كلها؟؟؟ الى احنا مش حاسيين بيها

شوفي الحديث ده
لعل الناس تتعظ و تعتبر فقط

قد جاء في الحديث عن النبي صلى الله عليه وسلم أنه قال : ( خرج من عندي جبريل آنفا فقال : يا محمد ، إن لله عبداً عبد الله خمسمائة سنة ، على رأس جبل ، والبحر محيط به ، وأخرج له عيناً عذبة بعرض الأصبع ، تفيض بماء عذب ، وشجرة رمان تخرج كل ليلة رمانة ، فيتغذى بها ، فإذا أمسى نزل وأصاب من الوضوء ، ثم قام لصلاته ، فسأل ربه أن يقبضه ساجداً ، وأن لا يجعل للأرض ولا لشيء يفسده عليه سبيلاً حتى يبعث ساجدا ، ففعل فنحن نمر به إذا هبطنا وإذا عرجنا وأنه يبعث يوم القيامة فيوقف بين يدي الله فيقول : أدخلوه الجنة برحمتي ، فيقول : بل بعملي يا رب ، فيقول للملائكة : قايسوا عبدي بنعمتي عليه وبعمله ، فتوزن ، فتوجد نعمة البصر قد أحاطت بعبادة خمسمائة سنة ، وتبقى نعمة الجسد فضلا عليه ، فيقول : ادخلوه النار ، فينادي : يا رب برحمتك ، فيقول : ردوه ، فيوقف بين يديه ، فيقول : من خلقك ولم تك شيئا ؟ ، فيقول : أنت يا رب ، فيقول : أكان ذلك من قبلك أم برحمتي ؟ ، فيقول : برحمتك ، فيقول : أدخلوه الجنة برحمتي ) رواه الحاكم في " المستدرك " والحكيم الترمذي في " النوادر "

موقف مؤثر فعلا

تسمحيلي بنقل الموضوع ؟؟

واحد من البلد دى يقول...

السلام عليكم

موضوعك مؤثر جدا

وعلى فكرة انا اتعاملت مع كتيييير مع الاخوة المكفوفين واستطعت ان اتبين اشياء كثيرة فيهم لم اتبينها فى ذوى البصر..
اولا..هم لديهم حساسية مفرطة لتعامل الآخرين معهم بطريقة تؤذى شعورهم لكونهم مكفوفين..
ثانيا..أؤكد لكى انه لا يوجد كفيف على وجه الارض ليس له قدرات خاصة يعجز عنها المبصر..واليكى المثال..

منذ زمن قرابة الثمانى سنوات كان عملى يحتم على ان اجلس على مقهى بجوار بيتى ساعات طويلة(لن ادخل فى تفاصيل عنى)و فى احدى المرات سمعت (القهوجى)يقول لبعض الجالسين..
-اهو الشيخ أشرف جاى..شوفوا بقى مين حيلاعبه
واذا بالشيخ أشرف شاب تعدى العشرين بسنة أو اثنين يحمل فى يده عصا معدنية من النحاس يطرق بها الأرض فتحدث صوتا كالجرس..والعجيب فى الأمر والذى أدهشنى حقاأنه كان يسير بسرعة كبيرة وسط كل المارة وعندما كان يأتى أمام سيارة متروكة على جانب الطريق مثلا(مركونة)كان يبطئ من سيره حتى يلمسها بعصاه ويحدد مكانها ليتفاداها..لا تملى أختنا فالقادم أعجب..عندما أتى أشرف إلى المقهى جلس على كرسيه وكان شغوفا بلعبة(الدومينو)(التى أجيدها جدا)فاستهوانى أن أشاهده وهو يلعب..وعندما جلست بجانبه..إذا به يتوقف عن اللعب ويسأل؟؟
-من بجوارى
قال له (القهوجى)
-ده الأستاذ(وهذا لقب أعرف به هناك)
قال -موجها الحديث لى وكأنه يعرفنى من زمن.
-تعرف تلعب دومينو
أجاب (القهوجى)الذى كان لا يزال واقفا
-الأستاذ لعيب يا أشرف..أنت قده
إبتسم إبتسامة عذبة وقال
-لأ..أنا مش عايز ألاعبه..أنا عايزه يعلمنى
وضحك الجميع..
الغريب فى الأمر أن الأخ أشرف كان بارعا جدا فى هذه اللعبة وكان لا يستطيع اى شخص أن يحتال عليه أبدا..فعندما يقول له شخص ما مثلا..
-اللعبة انتهت يا شيخ أشرف
يرد سريعا
-لسه يا حبيبى..اللعبة من 210وانت 209
والعجيب انا كان يحفظ ما يربحه المنافس فى كل دور حتى نهاية اللعبة..
وقد أصبح يأنس لى جدا وأنا أحببته فى الله وطالما لعبنا سويا ولكم أدهشتنى مهارته فى اللعب..
الطريف أنه كان يتمتع بروح ساخرة جدا..
ومن مواقفه..
كان الوقت ليلا وكنا نلعب سويا وفجأةانقطع التيار الكهربائى فقلنا له جميعا..
-النور قطع يا شيخ أشرف
فرد بمنتهى السخريةقائلا
-وانا مالى ماهوقاطع عندى على طول ..كنت قلتلكم بطلوا لعب...

وأخيرا..
جعلنا الله واياكى من المتذكرين المتفكرين فى خلقه ..الشاكرين لنعمائه..


أعتذر لإطالتى
دمتى بكل خير

رفقة عمر يقول...

ازيك موناليزا
اسالتك عجبتنى قوى وتقكرت فيها كثيرا
الحمدلله على نعم الله
ونساله سبحانه وتعالى ان نستخدمها فى طاعته سبحانه

بخصوص الترافك
دة السايت ادخلى
وخدى الكود وانسخيه واعملى كوبى فى السيدار بار فى اكواد الجافا
http://feedjit.com/joinjs/
الشكل اللى فى الاول على الشمال دة اللى انا باستخدمه
لو حاجه وقفت معاكى قوليلى

P A S H A يقول...

الحمد لله الحمد لله الحمد لله

ربنا يا رب يجازيكي خير عن البوست الهايل ده ويجعله في ميزان حسناتك .

تقبلي تحياتي وإحترامي وتقديري

سلام

ستيتة يقول...

بتناشدي مين؟
وزير ايه؟
هو الأموات بيصحو يردوا على حد يا مونا؟

لهم الله
هو اللي خلق وابتلى وقادر يعافي ويراضي
الحمد لله الذي عافانا مما ابتلى به قوم اخرون

تحياتي يا جميلة

موناليزا يقول...

لجين ابو الدهب
ـــــــــــــ
أختى الحبيبة:اهلا اهلا بالقمر
حاسة بيكى جدا انا عن نفسى بعد المقابلة دى جالى هبوط مفاجئ والدنيا كانت بتلف بيا ومافوقتش غير فين وفين:(
بجد ربنا يصبرهم ويعينهم ويقويهم ويمتعنا بصحتنا اللهم امين

هنستنى موضوعك لعل الجميع يشعر بنعم الله علينا
ربنا يكرك ياحبيبتى واشكرك جدا لمشاركتك
نورتينى لوجى الجميلة واسعدنى تواجدك


*********************************


أنا وفكرى
ــــــــــ
أهلا بيك يافندم فى زيارتك الاولى
تستاهل الحمد
ربنا يكرمك اشكرك جدا لرأيك
والشكر لله على جميع نعمه علينا
نورت مدونتى وارجو دوام التواصل


*******************************


أحمد شريف
ــــــــــ
وعليكم السلام ورحمة الله وبركاته
أهلا بيك استاذ أحمد
ربنا يكرمك اشكرك جدا لرايك
يسعدنا دوام التواصل


********************************


زا اليوسيونيست
ـــــــــــــــــ
أهلا بيك يافندم بعد طول غياب
ربنا يعزك يارب فما توفيقى الا بالله
شهادتكم هذه تاج على راسى وأعتز بيها جدا
أنا اللى بشكرك جدا على تعليقك ومشاركتك
وربنا يحفظ بصرنا جميعا يارب اللهم امين ونستخدمه دايما فى طاعة الله
يسعدنا دوام التواصل وفى انتظاركم دائما


**********************************


سومة. مجنونة فى بلد عاقل
ـــــــــــــــــــــــ
أختى الحبيبة:اهلا اهلا بالقمر
تستاهلى الحمد
وما اكتر هذه المواقف
اللهم انا اصبحنا بك فى نعمة وعافية وستر فاتمم نعمتك علينا وعافيتك وسترك فى الدنيا والاخرة
نورتينى سومة الجميلة واسعدنى تواجدك



********************************


سلمى محمد
ــــــــــ
أختى الحبيبة:اهلا اهلا بالقمر
ربنا يحفظ لنا نعمه علينا اللهم امين
أشكرك جدا لتعليقك
نورتينى سلومتى الجميلة واسعدنى تواجدك


*********************************


المدونة الاسلامية سبايدر مان
ـــــــــــــــــــــــــــ
أهلا بيك يادكتور
فعلا والله احنا عايشين اصلا فى الدنيا دى برحمة ربنا مش بعملنا
اللهم لا تعاملنا بما نحن اهلا له وعاملنا بما انت اهلا له
أشكرك جدا لذكر الحديث
وطبعا يافندم الموضوع تحت أمرك
يسعدنا دوام التواصل وفى انتظاركم دائما


*********************************


واحد من البلد دى
ـــــــــــــــــ
وعليكم السلام ورحمة الله وبركاته
أهلا بيك يا أستاذ :)
سبحان الله فعلا
واكتر حاجة تستغربها ان تعاملاتهم مع الناس بتكون اظرف بمراحل من التعامل مع المبصرين
ربنا يكرمك يارب ويحفظ لنا نعمه اللهم امين
أشكرك جدا لمشاركتك
ويسعدنا دوام التواصل


********************************



رفقة عمر
ــــــــــ
أختى الحبيبة:اهلا اهلا بالقمر
أنا الحمد لله بخير ماتحرمش من سؤالك
الحمدلله دائما وابدا
---
ميرسى جدا ياجميلة كلك ذوق
نورتينى غاليتى واسعدنى تواجدك


*********************************


باشا
ــــــــ
أهلا بيك يافندم
تستاهل الحمد:)
ربنا يكرمك يارب ويتقبل دعائك
أشكرك جدا لرايك ولتعليقك
يسعدنا دوام التواصل


*********************************


ستيتة حسب الله الحمش
ــــــــــــــــــ
أختى الحبيبة:اهلا اهلا بنبض الحكمة
:( ليه تحبطينى وتواجهينى بالحقيقة المرة
أصل انا لسه عندى أمل :)

والحمدلله دائما وابدا
نورتينى غاليتى واسعدنى تواجدك

البيروني يقول...

كثيرة هي الاحيان التي نجعل الظاهر هي معيار حكمنا على الشئ كله , ومع اننا قد نبدو كاملي المظهر و سالمي البدن الا ان بنا من الداخل اعاقات و حاجات خاصة كثيرة
جزاكم الله خيرا , و ارجو ان يوفق الله كل من به حاجة خاصة في حياته .

Mona Shereif يقول...

جميل البوست بجد واستمتعت بيه جدا جدا
ربنا يكرمك يا موناليزا يارب

بالنسبة للسؤال
انا لابسه نضارة .. نظرى ضعيف حبتين.. فاتعودت دايما اكون لابساها
بقول لو مكانتش النضارة دى موجوده كنت هعمل ايه.. ساعات كتير كنت بتضايق منها.. بس الحمد لله يعنى انا كده احسن ولا المكفوف خالص
تعرفى انا من غير النضارة مبسمعش هههههههههههههههه
الحمد لله رب العالمين بجد على نعمه التى لا تعد ولا تحصى

Mona Shereif يقول...

الفيديو جميل اوى يا موناليزا
جزاك الله خيرا
الحد لله رب العالمين

كلمات من نور يقول...

متى تحديدا حمدت الله على نعمة البصر؟
طبعا الحمدلله دايما على نعمه وعلى نعمة البصر وربي يجعلنا ذوي بصيرة ...من كام سنة يا موناليزتي كنت باروح ملجأ أيتام وكنت كل ما أروح أرجع موجوعة القلب على حالهم والمهازل اللي بتحصل هناك ..وهناك رأيته : طفل عمره لا يبلغ عدد أصابع اليد الواحدة ضرير ويتيم الأم ..رمته زوجة أبيه من على السلم فوقع على رأسه على مركز الإبصار ففقد البصر و ألقوا به في هذه الدار ..كنت قد اشتريت للبنات والبنين العاب صغيرة و طعام وحينما قمت بتوزيع الألعاب و أنا أتحدث إليهم تقدم وقال : لا أريد نظارة شمس...فتعجب قلبي و تألم ..طفل في الخامسة او الرابعة أعمى ولكنه يرفض نظارة شمسية كمن يواجه الدنيا بهذا العمى ...ثم اقترب مني وكان معنا عدة سيدات وقال : معاكم في العربية شريط عمرو دياب الجديد؟؟؟؟؟ ردت واحدة من السيدات أنا معايا يا أحمد تيجي تسمعه معايا؟؟؟؟؟؟ سعد الطفل كثيرا بها وبالأغنية وبعدها اقتربت منه وقلت له : إيه رأيك يا أحمد في حاجة أحلى من عمرو دياب ؟ قالي: إيه؟ قلتله عندي شيخ بيجي للأولاد يحفظهم القرآن إيه رأيك أخليه يجيلكم يعلمكم الصلاة و يحفظكم القرآن؟ قالي: ماشي ومضى بعيدا ليجلس وسط فريق من الاولاد المبصرين ..حينما ذهبنا به إلى أحسن طبيب عيون في الإسكندرية قال لنا : لو عندك لمبة في البيت واتحرقت تقدري تصلحيها؟ أي أنا حالته لا شفاء لها ..على فكرة كانوا جابوه في برنامج وعملوا دعاية عنه و إنهم حيعملوا له عملية ووقتها قلت ياه الحمدلله الدكتور طلع غلطان بس بعد سنة لقيت صديقتي ..مدرسة في مدرسة للعميان ..ولن أحكي عن ما تراه من مهازل هناك ..قالت لي أن أحمد لازال ضريراو يذهب إلى هذه المدرسة طوال الشتاء ثم يعود إلى الجمعية في الصيف ..كبر أحمد الآن وصار مراهقا صغيرا و أتمنى من الله أن يكون اكتسب مهارات هذا الشاب الذي تحدثتي معه و أن يعيش مبتسما رغم الظلام من حوله...الحمد لله على نعمة الإسلام وكفى بها من نعمة


ملحوظة : أثناء قرائتي لمقالك ابتسمت حينما قرأت كلماتك : أوجه الأسئلة ....داه إنتي مصممه من يومك تسألي ..وسبحان ربي دايما أسئلتك موجهة ...عجبني قوي كلام أبو علي و أتمنى ينزله في مدونته قريبا إن شاء الله.

الفقيرة إلى الله أم البنات يقول...

مونى
مش عارفه اجاوب
من شدة إنفعالى بما كتب وبما سألت
ولكن يقينا شعرت بأهمية بصرى عندما تعرضت حبيبه إلى قلبى بابتلاء فى إحدى عينيها وهى تدرس فهى تدعو إلى الله يعنى تدرس دروس علم
وقتها سألت الله ان ياعفيها فى عينها الأخرى حتى لا يحرمها نعمت النظر الى كتابه الكريم
وقتها شعرت باهميه الدعاء اللهم اجعله الوارث منا
وقتها شعرت انى فى نعمه اسأل الله ان يديمها على وعلى بناتى وزوجى وجميع المسلمين
اقود سيارتى وانظف بيتى واهتم ببناتى ونفسى وزوجى وايضا اساعد من استطيع مساعدته بسهوله

فكرت اذا فقدت بصرى ماذا سأصنع
اللهم ادم نعمك علينا وعافى حبيبتى فى الله وثبت بصرها و ارفع بلاؤك عنها

ليس فقيرا من يحب يقول...

الله يا موناليزا طريقه سردك للموضوع جميله جدا وخصوصا من منتصف البوست كده
الجمد لله حمدا كثيرا طيبا مباركا ملىء السماوات وملىء الارض وملىء ما شاء ربى
من شيىء بعد
امتى حسيت صدقا بنعمه البصر
تصدقى نعم ربنا لا تعد ولا تحصى واحنا نادرا لما نفكر نشكره على النعمه
كفايه ان الواحد بيقدر يقرى فى المصحف
وكفايه اننا مش بنتحوج لحد يعملنا ابسط حاجه
الحمد لله الف حمد والف شكر ليك يارب

ربنا يسعدك يارب يا مونى

فى حفظ الله

موناليزا يقول...

البيرونى
ــــــــــ
أهلا بيك يافندم
صدقت اخى الكريم فكم من معافى البدن وهو معاق البصيرة وحسن التصرف مع الاخرين
ربنا يكرمك ويديم علينا نعمه اللهم امين
يسعدنا دوام التواصل


*********************************


ساعات ساعات
ـــــــــــــ
أختى الحبيبة:اهلا اهلا بالقمر
ربنا يعزك يارب اشكرك جدا لرايك
:) عسل يا منمن.. ربنا يسعدك يارب
فعلا الفيديو مؤثر جدا ونشكر دكتور ابراهيم عليه
نورتينى ياجميلة واسعدنى تواجدك


********************************


كلمات من نور
ــــــــــــــ
أختى الحبيبة:اهلا اهلا بالغالية
:( ياااه قد ايه موقف موجع
أتخيل زوجة ابيه بعد مرور اعوام وهى ترجوه ان يسامحها على مافعلته به
ربنا ينور له بصيرته ويبعد عنه ولاد الحرام
:) مش بقولك طبع فيا
وفعلا تعليقات ابو على دايما تستحق ان يخصص لها بوست مخصص
نورتينى ياجميلة وتسعدينى دايما بتواجدك
وبحبك جدااااااا


*********************************


الفقيرة الى الله ام البنات
ـــــــــــــــــــــــــ
أختى الحبيبة:اهلا اهلا بالقمر
ربنا يتقبل دعائك يارب ويحفظ لنا نعمه علينا اللهم امين
وحقا ان تعدوا نعمة الله لا تحصوها
نورتينى غاليتى واسعدنى تواجدك


**********************************



ليس فقيرا من يحب
ــــــــــــــــ
أختى الحبيبة:اهلا اهلا بالقمر
ربنا يعزك يارب اشكرك جدا لرايك
تستاهلى الحمد ياحبيبتى
وربنا يديم علينا نعمه ويحفظها من الزوال اللهم امين
نورتينى ياجميلة واسعدنى تواجدك

saadny_architect يقول...

للمرة الأولى التى أدخل فيها لهذه المدونة
ومع قراءة التدوينة الأولى أحسست بعمق فى عرض الفكرة لم أستشعره فى غيرها من المدونات
فالتدوينة لا تسرد موقف أو تحكى عن خبر ولكنها تدوينة محللة مستنتجة ملفته للإنتباه ومستثيرة للفكر
كلمات جعلتنا نتذكر شكر النعمة وتلفت إنتباهنا إلى تعدد زوايا الحمد والشكر من خلال تحليل لإبتلاء الآخر
---------
الحمد لله الذى عافانا مما إبتلى به غيرنا وفضلنا على كثير ممن خلق تفضيلا
---------
لقد إنتبهنا فى تدوينتك إلى إتجاهين لشكر نعمة البصر
الأول شكر النعمة بتذكر فوائد العين وتعديد تلك الفوائد
والثانى شكر النعمة بعدم صرفها إلى ما يغضب الله
--------
و أخيرا للإجابة عن السؤال الجانبى فإننى تذكرت أنه لولا نعمة البصر ما قرأت تلك التدوينة وما أستطعت التعليق عليها
-------
الحمد الله
------
تحياتى و دمتم بخير

ghorBty يقول...

السلام عليكم

ما شاء الله كالعاده موضوع مؤثر ذو قيمه

الحمد لله علي كل حال

اما بالنسبه للسؤال

مفيش موقف معين غير مثلا لما النور بيقطع باليل واحس ساعتها ان حياتي وقفت لا عارفه اتحرك ولا اعمل شئ بفتكر الناس اللي الظلام عندهم شئ مستمر ومع ذلك عايشين والامل جواهم

وكمان كتير بتأثر فيا نشيد يا امي ما شكل السماء لمشاري العفاسي

فعلا النعم فينا كتير واحنا غافلين عنها ويارب دائما نفتكر نشكر ونحافظ عليها ونستخدمها في رضى الله ..

r يقول...

الله عليكى يا موناليزا
تسلم ايديكى حقيقى

فعلا الواحد محتاج دايما لتذكره وعبره بناس زى الشاب المجتهد دا ربنا فعلا يكرمه ن شاء الله

العيب مش بس فى الحكومه وعدم التزامها بحقوق الناس اللى فى اشضد الحاجه العيب كمان فينا
يعنى علشان هو مش بيشوف لحكمه ربى يبقى نلعب بالموبايلات ونهمس حاجه تكسف الصراحه

الواحد لما بيشوف الناس دى بتاخد فرصها ازاى فى الخارج بيزعل اوى على حالنا قبل حالهم يعنى العيب فى الصاحى والمصاب للاسف فى مصر


انا نفسى فعلا اتعلم لغه الصم وطريقه برايل واساعد باى شئ لواحد او وحده
محتاجه-- ربنا يسهل ان شاءالله

سلمتى صاحبه انفع مدونه بستفيد منه انسانيا
ربنا يوفقك

حمـــــــــــــــــــــة يقول...

الحمد لله على نعمه التي لا تحصى و لا تعد
ربي هب لنا من لدنك رحمة إنك أنت الوهاب
أختي الكريمة
عشت معك التجربة و جالت بي الإفكار نفسها قبل الوصول الى الأسئلة....
عن نفسي أعترف بالتقصير
في أكثر من مجال أسأل الله أن يغفر لي و لجميع المؤمنين
أصحاب الإحتياجات الخاصة في حاجة أكيدة الى الرعاية الأسرية أولا و المجتمع على حد سواء..........في ظل الواقع المعاش تتعدد الصعوبات أمامهم ...لعلي ألخصها في التعليم و سوق العمل
و ما لم تفرض نسبة تشغيل عدد منهم على أصحاب المؤسسات لإمتصاص أكثر ما يمكن..... تبقى شريحة مهمشة تتألم في صمت
-------------
كنت شاهدا مؤخرا على حادثة تتمثل في شكوى رجل فقد بصره ....حيث يتنقل لقضاء شؤونه مستعملا عصا بيضاء ....صادف تكسرت عصاه أثناء مرور سيارة بقربه...لم يحترمه سائقها و تسبب له في الأذى.................كان يبكي بحرقة....و الحمد لله تظافرت جهود أهل الخير لتعويضه العصا البيضاء
تساءلت فيما بعد عن طريقة عيشه و عن الكثير من الأشياء الخاصة بمن في حاجة الى الرعاية..............
أحييك على صدقك في النقل الصريح
و أستودعك الله الذي لا تضيع ودائعه

المسلم الصغير يقول...

السلام عليكم ورحمة الله وبركاته...
بجد موضوع جميييييييييييييييييييييل
يا ريت الناس تحس بيهم وتعاملهم كويس
عندك حق في كل ما قولتيه
جزاكي الله خير فيما تقوليه
دومتي بخير

موناليزا يقول...

سادنى ارتشيتيكت
ـــــــــــــــــ
أهلا بيك يافندم فى زيارتك الاولى
ربنا يكرمك يارب اشكرك جدا لرايك فماتوفيقى الا بالله
تستاهل الحمد
وربنا يديم علينا نعمه ويحفظها من الزوال
اجابتك أخجلت تواضعى حقا فهذا يعتبر أجمل إطراء حصلت عليه:)
نورت مدونتى ويسعدنى دوام التواصل



********************************


غربتى
ــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر بعد طول غياب
ربنا يعزك يارب فما توفيقى الا بالله
أشكرك جدا لمشاركتك
وربنا يديم علينا نعمه ويحفظها من الزوال اللهم امين
نورتينى ياجميلة واسعدنى تواجدك


*********************************


بسنت
ـــــــ
أختى الحبيبة:اهلا اهلا بالقمر
ربنا يكرمك ياجميلة اشكرك جدا لرايك
فعلا فيه تصرفات مخجلة حقا من المبصرين
كلامك فكرنى بواحدة كانت مصابة فى حادثة جعلتها تستخدم الكرسى المتحرك لفرة طويلة وكانت تتعالج فى الخارج وقالت كلمة مؤثرة جدا لما نزلت مصر قالت :انا ماحسيتش بعجزى غير وانا هنا:(
ربنا ييسرلك امورك ياحبيبتى ويرزقك علم ينفع الناس جميعا
شهادتك هذه تاج على راسى أعتز به:)
نورتينى بسنت الجميلة واسعدنى تواجدك


********************************


هاما
ــــ
أهلا بيك يافندم بعد طول غياب
أشكرك جدا لمشاركتك ولرايك
يسعدنا دوام التواصل ونترككم فى امان الله


*********************************


المسلم الصغير
ـــــــــــــ
وعليكم السلام ورحمة الله وبركاته
أشكرك جدا لرايك فماتوفيقى الا بالله
ربنا يكرمك يارب
يسعدنا دوام التواصل

لــــ زهــــــراء ــــولا يقول...

هو انا ممكن اجاوب تاني؟
انا شعرت بنعمة البصر لما انكسرت نظارتي وكان ورايا اشياء لازم اعملها بالرغم من انها اشياء بسيطة الا اني شعرت بعظم وجود نعمة البصر وانا اؤديها

- شعرت بنعمة البصر لما فقدت امي حاسة البصر في عينيها اليسرى لحظتها تمنيت ان ترى بعيني واتهزيت قوي لما كنت بصلي بيها جماعة وكانت على ايدي اليمين يعني ناحية العين اللي مش بتشوف بيها ونسيت اني اعلي صوتي عشان تعرف انا بركع او قومت من الركوع بعد ما خلصت صلاة هزتني كلماتها وهي بتقولي ابقي علي صوتك شوية عشان انا مبقتش اشوف ... شكراً على القصة الجميلة دي انتي ما شاء الله بارعة في سردها

موناليزا يقول...

لولا وزهراء
ــــــــــــــ
أختى الحبيبة:اهلا اهلا بالقمر
طبعا ياحبيبتى تقدرى تشاركى فى اى موضوع فى الوقت اللى تحبيه
إجابتك وجعتنى بجد
ربنا يرزقها الصبر ويبعد عنها اى مكروه
نورتينى ياجميلة واسعدنى تواجدك

رشيد أمديون يقول...

السلام عليكم

طبعاأنا سبق رأيت كيف يكتب المكفوفين ورأيت كتبهم، لأن كان صديق له أخ يدرس بهذه الطريقة..
إن المكفوف إنسان ذكي جدا، واعتماده على حاسة السمع أكثر لهذا تجديه دقيق ومركزا على كل التفاصيل الصوتيه..
تجربتك مع هذا الطالب كانت رائعة لأنك استفدت منها جدا، لكن فعلا ما تفضلتِ بقوله، وهو أننا لا نقدر نعمة الله إلا بعد زوالها.

جزاكِ الله خيرا.

Wish I were a Butterfly ... يقول...

كتبتي الموضوع بإحساس أوي فأكيــدوصل كل الناس بنفس القوة اللي حسيتيه بيها

جميل بجد الموضوع أوي

حسيت اللي قلتيه أوي، و عارفة موضوع الكتب ومشكلتهم قبل الامتحانات. أكيد فيه عمل خير كتيـــــر أوي، بس الجزء دة فعلا من الحاجات اللي انا متخصصة فيها بقالي فترة كتير الحمدلله... طباعة الكتب والملازم قبل الامتحانات بأيام على الكمبيوتر عشان تتعمل برايل بسرعة. بيبقى الوقت محدود أوي وعدد المتطوعين قليلين للأسف

ساعات كتير بتلاقي المكفوفات عايزين حد يقرا معاهم الكتاب.. عايزين يسمعوه لأن القراءة أكيد مهما اتعودوا عليها من صغرهم..مازالت مجهود كبير أوي عليهم وساعات الورق بيبقى ملخبط وساعتها بتكون كارثة

بعيدا عن كل اللي قلتيه بخصوص الكتب والمذاكرة... أكتر مرة حسيت بيهم أوي كان يوم رحنا فيه رحلة "بناء على طلبهم" لدريم بارك!!! كان همي الأول هو إزاي أصلا هشرح لهم اللعب اللي أدامهم وهم مش سامعين غير صوتها وصوت اللي حواليها. إزاي ممكن أصلا أتخيل إني أركب حاجةسريعة"مهما اتوصفتلي" و أنا مش عارفة سرعتها دي إزاي ولا إيه اللي هيحصل فيها. الحمــدلله هم كانوا في قمة الاستمتاع بفضل الله ويارب يتقبل مننا بس، بس فعلا ساعتها كنت مش قادرة أتخيل

ومش قادرة أتخيل مدى الشر اللي في البني آدمين... إنك مهما رحتي، الناس الوحشة موجودة في كل مكان :(. متخيلة إن كان كل شوية نلاقي حد من الشباب أو الرجالة بيحاول يدخل في وسط المكفوفات عشان هو عارف كويس إنهم مش هيشوفوه؟؟ للأسف حصلت أكتر من مرة،ووقتها زعلت أوي إن المجتمع مش مديهم حقهم في أي حاجة كدة ولو حتى الإحساس و الاحترام لناس جميـــلة أوي،ومعظمهم بجد شخصيات عظيمة بمعنى الكلمة وبتعلم منهم كتيـــر أوي

حسيت أوي بنعمة البصـر لما سألتني بنت مكفوفة عن شكلي بعدماقعدنا كتير مع بعض :$ ولقيتني مش عارفة أوصف أقول إيه. هي تعرف يعني إيه عيون ولا تعرف الألوان؟؟ وحسيتها وأنا ماشية معاهم في الرحلة بقول لهم كل شوية إن أدامنا سلم 4 خطوات، و سلم عريض، و رصيف... بجد الحمدلله على نعم كتيـــر أوي إحنا ناسيينها

موناليزا يقول...

أبو حسام الدين
ـــــــــــــــــــ
وعليكم السلام ورحمة الله وبركاته
أهلا بيك أستاذ رشيد
فعلاً يافندم قد استفدت منها جدا وأتذكر أنها أثرت عليا وقتها جداً.. فقد أصابنى هبوط حاد فى الدورة الدموية بعد اللقاء وكأننى أول مرة أعلم بوجود المكفوفين بيننا..
والحمدلله على النعم التى أنعم الله بها علينا والتى لا تعد ولا تحصى

أشكرك جدا لتعليقك
ويسعدنا دوام التواصل


******************************

ويش آى وير بيترفلاى
ــــــــــــــــــــ
أهلا بيكِ حبيبتى بعد طول غياب
ياااه فعلا والله فيه ناس كتير شريرة بس برضه بالمقابل فيه ناس طيبة
ما هى الدنيا كده فيها وفيها
زى ما فيه ناس بتساعدهم وتكتب الكتب بتاعتهم وتذاكر لهم مهما كان المجهود المبذول
فيه ناس متخصصة فى الأذية ودول بجد اللى ربنا طمس على قلوبهم

أنا حاسة بيكِ أوى لأن إذا كنت أنا من موقف واحد مع واحد فيهم حسيت بكده طيب أنتى بقى لما تخرجى معاهم

بتفكرينى برضه لما كنت بتعامل مع طالبات فى مدرسة الصم وضعاف السمع..دول احتكيت بيهم فترة طويلة وكنت بستغرب لما ألاقيهم وقت آذان العصر بيروحوا يصلوا وكمان كانت مهمتهم تعليمى لغة الإشارة

إحنا فى نعم كتيرة أوى ربنا يديمها علينا

سعيدة بتعليقك
وفى انتظارك دايما