الخميس، 24 ديسمبر 2009

المرأة.. ما لها



حينما طالبت المرأة بحقوقها وبمساواتها بالرجل كانت قد وصلت لمرحلة من عدم القدرة على تحمل الظلم الواقع عليها من قِبل الرجل سواء كان الأب أو الأخ أو الزوج أو أى رجل آخر له الكلمة العليا فى تولى شئون حياتها وضارب برأيها عرض الحائط ولِم لا والنظرة الوحيدة لها كانت على اعتبار أنها جارية يجب عليها السمع والطاعة دون نقاش مع الخدمة لمن حولها على أكمل وجه أوأنها محملة بالعار وعليها الزواج سريعاً وإنجاب الولد أو الموت أو تحمل الإهانة و ما إلى ذلك من عُقد كثيرة كان يمارسها الرجل معها.
وحينما آتت الفرصة لم تتوانى لحظة فى إثبات ذاتها وبأنها كائن حى له كل الحق فى إختيار حياته.
لها الحق فى أن تتعلم وتستطيع القراءة والكتابة.
لها الحق فى إختيار شريك حياتها.
لها الحق فى الميراث.
لها الحق فى أن تحيا حياة كريمة خالية من الذل والعبودية.

ولكنها ما زالت رغم حصولها على ما كانت تبغى بل ومنافستها للرجل فى أحيان كثيرة تتسائل:
لماذا الرجل أنانى فى تعامله معها؟.. لماذا يقسو عليها؟. .. لماذا يخونها ؟.. لماذا لا يحترمها؟.
لماذا لا يتعامل معها كعقل متكلم وليس مجرد كائن يثير غرائزة؟.. لماذا عندما يتزوج ينصح غيره بعدم الزواج رغم أن فى الزواج راحته؟ ..لماذا عندما تمر عليه امرأة مهما كان عمرها يغازلها متجاهلاً ما قد يتركه هذا التصرف فى نفسها من أثر سئ؟.. وغيرها من الأسئلة الكثيرة الذى يكون أشهرهم : هل يقبل اللى بيعمله مع بنات الناس يتعمل مع محارمه؟.



فالمرأة بالنسبة له:
هى أمه التى ولدته.
شقيقته التى شاركته طفولته.
صديقته التى يشكو لها حاله.
حبيبته التى يرجو رضاها.
زوجته التى تعيش معه على الحلوة والمُرة.
ابنته التى تعتبر جزء منه يمشى أمامه.
ومع ذلك فهو:
لا يتذكر والدته.
لا يسأل عن شقيقته.
لا يهتم بشكوى صديقته.
يجرح حبيبته.
لا يهتم بزوجته.
يقسو على ابنته.

ليس جميع الرجال هكذا ولكن يوجد فئة لا بأس بها سيجدون تطابق تام مع ما نقوله.

فالرجل أنانى فى تحقيق أهدافه. لا يضحى بسهولة من أجل امرأة. أما المرأة فعلى أتم إستعداد أن تلغى طموحاتها وأحلامها بسهولة من أجله هو الرجل.

ومع ذلك هو لا يقدر ذلك وإنما يظهر عداواته من خلال النكات البايخة عليها وفلتات لسانه ونظراته وأخيراً التحرش.



وكأن الرجل يعاقب المرأة على خروجها للدراسة أو لمجال العمل أو لأى سبب آخر. بهذه الأفعال المشينة من جانبه.

أتذكر رد فعل شاب كان يجلس فى الحافلة وهناك فتاة تقف فى وسط الرجال فقال له أحد الواقفين: مش تقوم وتقعدها

فرد عليه: هما مش عايزين مساواة خلاص يشربوا.
و موقف شيخ جليل يهين فتاة لم تتعدى15 سنة بأن يعيب على خلقتها قائلا: أمال لو كنتِ جميلة !!.
و شاب فى الجامعة يضرب فتاة بالقلم وآخر كان يريد أن يمسك في زميلته لولا تدخل الأصدقاء.
وآخرين يروا فتاة تغتصب فى عرض الطريق ولا يتحرك لهم ساكن .
وآخرين تستنجد بهم فتاة من معاكسة شاب يجلس بجوارها فى المواصلات فيلوموها هى.
وآخرين يشاهدون سيدة تريد ايقاف أى وسيلة مواصلات على الطريق السريع وسواق الأتوبيس يسخر منها ويتركها وينصرف قائلاً: أنا مابركبش معايا العواجيز وأيضاً لا يتحرك للجميع ساكن أو حتى يبدون أى تعليق.
وأخرى يطنش السواق أو الكمسرى أن يعطى لها الباقى وتطلبه منه بصوت عالى فلا يرد والسيارة مكتظة بالرجال وكأن على رؤسهم الطير.
وزوج يجبر زوجته على التنازل عن جميع حقوقها مقابل أن يطلقها. وآخر يترك زوجته مُعلقة فى بيت أهلها بالسنين دون سبب واضح بالنسبة لها.
وآخر يتحدث بالسوء عن زوجة ابن أخيه فى الفضائيات- وحينما تعلم المستشارة صلته بالزوجة ترد عليه: وأنت مالك؟. عجبنى ردها عليه جداً ولو أن العيب على زوجها اللى فضح زوجته أصلاً أمام قرايبه!!..
وغيرها من الأمثلة.
وكأن الرجال اتفقوا فيما بينهم على شئ موحد وهو أن المرأة كائن كلما صغر سنه كلما زادت مفاتنه وكلما كبر سنه كلما خف عقله ولذلك فالأحرى أن تجلس فى البيت بلا خروج أو لا تلوم من يوئذيها أو يتحرشون بها.
وأصبحت المرأة فى حيرة من أمرها لأن الإيذاء قد يأتى لها من أقرب المقربين فمن أقرب لها من زوجها حتى تأمنه على نفسها وعلى حياتها فيكفى أن بينهم عهد الله.
و أتسائل كثيراً أين نخوة الرجال وشهامتهم التى كنا نسمع عنها زمان؟.
أين مبادئ الرجال التى ترفض أن تهين امرأة أو تضربها مهما حدث.
كيف برجل مهذب أن يمد يده على امرأة أضعف منه.
كيف بزوج أن يستحل مهر زوجته بعد زواجه منها هل نسى قول الله تعالى" وكيف تأخذونه وقد أفضى بعضكم لبعض وأخذنا منكم ميثاقاًغليظا" وفى آية أخرى" أتأخذونه بهتانا وإثما مبينا ".
لماذا لا يعتبرون أى امرأة تقابلهم هى إحدى محارمهم. وحتى إن لم يستطيعوا تخيلها هكذا عليهم أن يعلموا أن هذه هى الحقيقة فكلمة "حُرمة" التى تطلق على المرأة تعنى أنهن من محارم الله التى لا يجوز أن تنتهك.



المرأة بالنسبة للرجل لغز محير يريد أن يكتشفه وإذا ما تحقق مراده ذهب لأخرى. وهذا يظهر فى تعامل الزوج مع زوجته مثلاً الذى يعتبرها أصبحت ملك يمينه. فهو يتعامل مع غيرها برقة وذوق منقطع النظير تجعلها تتعجب. فهو خارج المنزل غير داخله.دائماً ينظر لها نظرة دونية وكأنها أقل منه. ويهمش نجاحها فى أى شئ بل لا ينظر إليه.



لكل مرحلة من مراحل حياة المرأة مذاق خاص بالنسبة لها. فأهداف المرأة منذ ميلادها تتمثل فى محاولتها لاستكشاف العالم من حولها شأنها شأن بقية الأطفال ثم بعد ذلك تريد لفت الإنتباه. وابتداء من مرحلة الطفولة المبكرة تريد تقليد الأم ثم فى بداية مرحلة المراهقة تريد أن تعيش قصة حب وفى بداية العشرينات تهفوا إلى الزواج وبعده الإنجاب وبعده تريد رؤية صغيرها فى الكوشة ثم بعد ذلك تريد أن ترى أحفادها وهم يلعبون حولها وإذا ما تحققت هذه الأهداف التى ترجوها من الحياة تشعر فجأة بأنها لم تحقق شئ لذاتها وإنما كان أهدافها هذه من أجل إسعاد الآخرين.
ومع ذلك ما زال الهجوم مستمراً عليها.



فالمرأة حينما طالبت بالمساواة كانت تريد أن تأخذ الحقوق الذى شرعها الإسلام لها والذى تناسته بعض المجتمعات مع مرور الوقت.
رسالة :
- إعلم أيها الرجل أن المرأة كائن قابل للمناقشة ولديها القدرة العقلية الكافية على إتخاذ قرار سليم ومشاورتك لها لا ينقص من قدرك ولا يعلى من قيمتها لأنها أيضاً إنسان.
- إعلم أن بمجرد كلمة حانية منك لها تستطيع أن تجعلها تقوم بمجهود لا يقوى عليه أقوى الرجال.
و بمجرد نظرة تشجيع وهدية رخيصة الثمن ستجد منها ما لا تتوقعه.
- أعلم أنه كما تدين تدان وكما تفعل مع بنات الناس سيحدث مع محارمك ومهما طال الزمن.
- أعلم أنه سهل أن تحصل على امرأة ولكن صعب أن تحافظ عليها.
وهذه رسالة كلمات من نور : هو فيه أحلى من كلمات رسول الله : اتقوا الله فى النساء.
وهذه رسالة لجين أبو الدهب :
اعرف أنت كريم أم لئيم من معاملاتك مع محارمك من النساء .
.واعلم انك عندم تسئ المعاملة مع النساء فإنك لم تعمل بوصية اكرم الخلق وتجاهلتها فليرحمك الله ..
وهذه رسالة نهر الحب : رفقا بالقوارير .
نصيحة:
- حذار من عداوة المرأة فإن كيدهن عظيم.
وهذه نصيحة إبتسامة ملاك : كن لها أخ وأب وصديق و رفيق و سيد و رئيس و صاحب أسلوب طبيب نفسى وأن تعاملها برفق وتحترمها وتحافظ عليها ومش تبص لأى واحده غيرها
المرأة دى مخلوق جميل ومحتاجه معاملة كويسه بلاش تتهان.
وهذه نصيحة ماما أمولة :إتقى الله فسيأتي لك يوما تقف أمام خالقك فماذا ستقول له.
وهذه نصيحة كلمات من نور:
لماذا تتحدثون عن التعدد أسوة برسول الله وتنسون باقي صفات وتصرفات رسول الله صلى الله عليه وسلم؟
ولماذا من يطالب بالتعدد حينما نقول لهم : جميل تزوج بأرملة أو مطلقه أو فتاة اقتربت من سن اللا زواج
تقولون : بل نريدها شابة في مقتبل العمر ؟.
وهذه نصيحة لولا :اتقى الله فى زوجتك وأمك وأختك وبنتك وخطيبتك وأى امراه تفرض عليك الظروف أن تتعامل معها.
وهذه نصيحة جودى: إجعل زوجتك رفيق لك فى مشوار حياتك و مكمن أسرارك و أنيسة فى سفرك.
سؤال جانبى:
ـــــــــــــــــــ
* لو هتكتبى للرجل رسالة ونصيحة هتقوليله فيها إيه؟(خاص بالنساء).
* لو هتكتب للمرأة رسالة ونصيحة هتقولها فيها إيه؟(خاص بالرجال).
===============
ملحوظة هامة:
ــــــــــــــــــــــــ
نظراً لأن فيه رجال تعتقد بأننى أنظر للموضوع بصورة متجنية على الرجل أردت فقط توضيح بأن ما أتحدث عنه هو الرجل فى العموم وليس الزوج فقط.
فالرجل هو من يغتصب ويتحرش ويعاكس ويتطاول بالسب وأحيانا بالضرب على أى امرأة سواء يعرفها أو مايعرفهاش.
مازال هناك مجتمعات ترفض أن تعطى ميراث للمرأة.
ومازال هناك مجتمعات تطلق الزوجة إذا ما أنجبت الولد.
وما زال هناك مجتمعات توقف تعليم المرأة عند سن معين.
وغيرها من الأمثلة الحية الموجودة بيننا.
(هو أنا الوحيدة اللى بقرأ جرايد هنا ولا إيه؟:))



هناك 49 تعليقًا:

♥نبع الغرام♥♪≈ يقول...

السلام عليكم ورحمة الله وبركاته
ازيك يا حبيبتى
كل سنة وانتى طيبه

ومتشكرة ليكى على التذكرة

وحسبى الله ونعمة الوكيل بكل ظالم يظلم اى انسانه
تعرفى انا برده والله كتير اتظلمت ومفوضه امرى لربى هو قادر على كل شىء
ربنا معاكى وينصرك ويكرمك خير

♥نبع الغرام♥♪≈ يقول...

فعلا حبيبتى معاكى حق بكل كلمة كتبتيها المرأة حقها بقا مهضوم من كل الناس
************
نصيحه للرجل
و عن أبي جعفر عليه‏السلام : «قال إن اللّه‏ عز وجل كتب على الرجال الجهاد وعلى النساء الجهاد، فجهاد الرجل أن يبذل ماله ودمه حتى يقتل في سبيل اللّه‏ وجهاد المرأة أن تصبر على ما ترى من أذى زوجها وغيرته».
**********

النصيحه أن يكون لها أخ وأب صديق رفيق
سيد رئيس صاحب أسلوب طبيب نفسى
وأن يعملها برفق ويكون بيحترمها ويحافظ عليها ومش يبص لأى واحده غيرة
المرأة دى مخلوق جميل ومحتاجه معملة كويسه
بلاش نتهان

تحياتى لحضرتك ولقلمك الرائع يا نصرة الستات ياقمر انتى

دمتى بكل خير
إيناس

العلم نور يقول...

السلام عليكم ورحمة الله وبركاته ..

إن معظم الرجال قد طغوا وتجبروا على القوارير .. ولكن الله عز وجل ينصرنا نصرا عظيما بإذن الواحد القهار .. فالجنة تحت أقدام الأمهات غاليتي ..

بارك الله فيك ونفع الله بك الأمة الإسلامية العربية.

Mahmoud Ahmed يقول...

السلام عليكم و رحمه الله و بركاته
احب بس اقول ان الموضوع ده فيه ظلم للراجل بجد
صدقيني انتوا واخدين حقوا جامد جدا
و صدقيني كمان لو قلتلك ان التعبير الصح للجمله الى قلتها دلوقتي هي

انكوا بتعرفوا تاخدوا حقوا صح؟

دلوقتي ان مش شايف اصلا ان فيه فرق بين الراجل و البنت

مع اننا لازم نعترف اصلا انه يجب ان يكون فيه فرق بين الرجل و المرأه


يقول سبحانه و تعالى في سورة النساء : " و لهن مثل الذي عليهن بالمعروف و للرجال عليهن درجة "

يعني كل حاجه للرجل لازم تاخدها المرأه و لكن يوجد درجه للرجل على المرأه

الدرجه ده مش موجوده دلوقتي خالص

يعني اتمني لو تذكري لنا مثال واحد على هذه الدرجه ؟؟ ^_^

عشان تعرفوا بس اننا غلابه و الله

هههههههه

تعالي اانا بقي اقولك على امثله مثلا:

الراجل ، اللبس الخاص به هو البنطلون

و مع ذلك تجدي بنات تلبس البنطلون

بينما لا يمكن للرجال لبس الجيبات

(( يعني حتي اللبس خاتوه مننا كمان ))

.....

محظه المترو مثلا

تجدي دائما عربات مخصصه للنساء فقط ، بينما لا تجدي عربات مخصصه للرجال فقط

.....

في الطابور حتي ( في البنوك مثلا )
تلاقي صف طويل عريض من الرجاله و قافين بقالهم مليون ساعه
و فجأه تلاقي واحده لسه داخله و تقف في صف جديد و تخلص و تروح قبل كل الناس الى واقفين من قبلها

.....

ده حتي الطلاق

دلوقتي اصبح فيه (( خلع ))

و الله و الله

احنا الى هنطلب حقوقنا بعد كده


......

هو ممكن الموضوع فقط يكون في طريقه التعامل مع المرأه

بمعني التعامل مع المراه على انها انسانه

و فعلا فيه ناس مبتتعاملش بهذا المنطق ابدا

انما مساواه

لالا و الف لآلآلآ

^_^

لأنكم واخدين حقكم كاملا

Mahmoud Ahmed يقول...

نسيت اكتب الرساله بس للمرأه

(( رفقا بنا يا نساء ))

فقط

^_^

..........

و ان شاء الله كلنا هنصوم
و كلنا لازم ننوي من دلوقتي
و كل سنه وا نتم بخير وسعاده

salma mohamed يقول...

المشكله والحل تكمن في مدى البعد والقرب من الله,ومدى الثبات على مبادئ الدين واخلاقه سواء رجل كان او امراه,
فالرجل ان اختار ذات الدين تربت يداه,فالمرأة الصالحة خير متاع الدنيا,
والمرأة ان اختارت ذا الدين نالت كل الخير فان احبها اكرمها وان بغضها لم يظلمها.

مجداوية يقول...

السلام عليكم

من وجهة نظري المسئول ألأول عن كل هذا هي المرأة
نعم
فالأم التي ربت أشباه الرجال إمرأة والأم التي أنجبت هذا الرجل الظالم وشجعته على التفرقة بينه وبين أخته إمرأة
والحماة التي تجبر ابنها على ظلم زوجته
إمرأة
والحماة التي ترغمه على طلاقها لكي يتزوج بأخرى تنجب له الولد
إمرأة

والسيدة التي تبادلت الأدوار مع الرجل وتسعى بكل قوتها لتهميشه
إمرأة

فالمرأة هي أساس كل هذا
وفي المقابل كل صلاح في المجتمع أساساه المرأة

الأم مدرسة فإذا أعددتها أعددت شعبا طيب الأعراق

الستات اتجننت والله وكنت أنوي كتابة سلسلة تدوينات على جنان المرأة في عصرنا الحالي بس الموضوع عايز مخمخة

الخلاصة
ظلم الرجل للمرأة نتيجة لسوء تربية المرأة له

وسينصلح حال المرأة بصلاح حالها

فالمرأة الصالحة خير متاع الدنيا

ربنا يصلح أحوال النساء فبهن وبسببهن قد يفسد العالم كله وقد ينصلح كله

أمل حمدي يقول...

ماشاء الله

موضوع متكامل

بارك الله فيك يارب

ونصيحتي لأي رجل يحمل هذه الصفات البشعة أن يتقي الله وسيأتي له يوما يقف أمام خالقه فماذا هو قائل له

أسأل الله لاهداية لكل المسلمين


جزاكي الله كل الخير

Mona Shereif يقول...

مش هقول غير حسبى الله ونعم الوكيل
وبجد فوضت الامر لله

ربنا ييسرلك امورك وينصرك على اللى ظلمك

ده رسولنا قال قوارير

ادعيلى

كلمات من نور يقول...

* لو هتكتبى للرجل رسالة ونصيحة هتقوليله فيها إيه؟(خاص بالنساء).

هو فيه أحلى من كلمات رسول الله : اتقوا الله النساء؟
هو فيه أحلى من : لماذا تتحدثون عن التعدد أسوة برسول الله وتنسون باقي صفات وتصرفات رسول الله صلى الله عليه وسلم؟ولماذا من يطالب بالتعدد حينما نقول لهم : جميل تزوج بأرملة أو مطلقه أو فتاة اقتربت من سن اللا زواج : تقولون : بل نريدها شابة في مقتبل العمر ؟

نكتة على هامش المدونة

منذ عدة سنوات وأثناء أجتياح القوات للبوسنة تحدث رجل وسط مجموعة من النساء والرجال مدافعا عن نساء البوسنة و أن على زوجته والنساء الرضى بأن يتزوجوا مرة أخرى لستر هؤلاء النسوة فما كان من إحدى النساء إلا أن قالت : كلامك زين يا أستاذ بس برضه في ستات كتير من الصومال محتاجين أزواج............دمتي سالمة يا موناليزتي

موناليزا يقول...

إبتسامة ملاك
ــــــــــــ
وعليكم السلام ورحمة اله وبركاته
أختى الحبيبة:اهلا اهلا بالقمر
أنا الحمدلله بخير ماتحرمش من سؤالك ياحبيبتى
وانتِ طيبة وبالصحة والسعادة يارب
الشكر لله ياقمر فماتوفيقنا الا به
ربنا يعزك يارب ويتقبل دعائك ويعوض صبرك خير اللهم امين

أشكرك جدا على تعليقك ومشاركتك وسأضيفها للموضوع حالا
تسلميلى يارب من كل شر وماتحرمش من تواجدك الذى يسعدنى حقا
نورتينى انوسة الجميلة وفى انتظارك دائما


********************************


الشجرة الام
ــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
:( دى حقيقة للاسف
:) طالما سينصرنا الله فلتفرحن يا بنات حواء
ربنا يكرمك يارب واشكرك جدا على دعائك لى وهذا الاطراء الجميل
نورتينى ياجميلة واسعدنى تواجدك


*********************************


المدونة الاسلامية سبايدر مان
ــــــــــــــــــــــــــــ
وعليكم السلام ورحمة الله وبركاته
أهلا بيك يادكتور
:) مشاركة رجالية متميزة
بس زى ما فيه ستات بتعرف تاخد حقها كويس فيه ستات كمان غلابة اوى ومكسورين الجناح زى ما بيقولوا ولو عملت إحصائية هتلاقى المرأة المظلومة عددها اكتر بكتير من المرأة المفترية

:) بقى بعد الموضوع ده ومش لاقى الدرجة اللى واخدها الرجل!!

بالنسبة للبس المرأة للبنطلون فده لأنه بالنسبة لها عملى أكتر (مع تحفظى طبعا على نوعية البنطلون)
وعلى فكرة الرجال بينافسوا المرأة دلؤتى فى لبس الباديهات والبانتاكورات وممكن يعملوا تاتو كمان

نيجى بقى على عربية المترو المخصصة للسيدات هما عملوها ليه اصلا الا من التحرشات اللى كانت بتحصل من جانب الرجل للمرأة

فى طابور البنك ده بس عشان حظها ان مفيش ستات كتير بيقفوا فى الطابور لكن لو فيه هيبقى فيه طابور هى ملتزمة بيه رغم ان المفروض ان الرجل هو اللى يتولى شئون المرأة المالية ومايسيبهاش تتبهدل كده

بالنسبة للخلع بقى دى بجد فضيحة للرجل لان المرأة مش هتوصل للمرحلة دى غير لما يكون خلاص فاض بيها بجد ومستعدة تتنازل عن كل حاجة عشان بس تبعد عنه

حقوق ايه بس يادكتور اللى هتطلبوها:) ماهو لكل فعل من جانبكم رد فعل من جانبنا فنحن فقط ندافع

:) الله ينور عليك ماهو ده اللى احنا عايزينه اسلوب معاملة يليق بكوننا بنى آدمين

وعن رسالتك هذه سأبلغها لهن فى البوست القادم بإذن الله
ربنا يتقبل منا ومنكم صالح الاعمال وماتنساش تدعيلى وانت صايم
وبجد بجد بشكرك جدا على مشاركتك وتعليقك الثرى
يسعدنا دوام التواصل وفى انتظاركم دائما


*******************************


سلمى محمد
ــــــــــ
أختى الحبيبة:اهلا اهلا بالقمر
صح جدا
نورتينى سلومتى الجميلة واسعدنى تواجدك


*******************************


مجداوية
ـــــــــ
وعليكم السلام ورحمة الله وبركاته
أهلا اهلا بصوت الحق
طب أقول إيه انا بقى البوست الجاى:)
معكِ كل الحق غاليتى وسأناقش كل هذا البوست الجاى بإذن الله
تسلميلى يارب وماتحرمش من تواجدك
نورتينى ياجميلة واسعدنى تعليقك


********************************


ماما امولة
ــــــــــــ
أختى الحبيبة:اهلا اهلا بالقمر بعد طول غياب
ربنا يعزك يارب اشكرك جدا لرايك
ولمشاركتك
تسلميلى حبيبتى وماتحرمش من تواجدك


*********************************


ساعات ساعات
ــــــــــــــ
أختى الحبيبة:اهلا اهلا بالقمر
وهذا أجمل القول
ربنا ييسرلك جميع امورك ياحبيبتى ويفرح قلبك اللهم امين
نورتينى ياجميلة واسعدنى تواجدك وتعليقك


*********************************


كلمات من نور
ـــــــــــــ
اختى الحبيبة:اهلا اهلا بالغالية
ما اجمل رسالتك
سأضيفها حالا للموضوع
تسلميلى ياجميلة وماتحرمش من تواجدك ابدا

حاول تفتكرنى يقول...

لم تناضل المرأة لفرض حقوقها ، بل أن الاسلام هو من كرم المرأة بعد أن كانت تستعبد وتورث من الآباء إلى الأبناء وتؤحذ أخدان ، وقد شمل مقالك الراقي على كثر من الأدلة الشرعية

فمن لا يؤمن بما شرعه الله منا ينكر عليها حقوقها ، واذا هي فرطت فى حق الله ، صدقيني لا تستحق هذه الحقوق ووقتها سيكون من الخطأ الحديث عن النماذج المسئية لها على وجه العموم

نعم لكل حالة من الحالات معطياتها المختلفة

فالمساواة مطلوبة وعادلة على وجه العموم

فالمرأة المحترمة تجبر الجميع على احترامها ، وكذلك الرجل ، والعكس دائما صحيح ، الصراع المفتعل ما هو إلا محاولات للسيطرة المتبادلة بينهم

مع أن الامر ابسط من كل هذا
ان نتعامل بما شرعه الله ، فكل طرف له حقوق وعليه واجبات


احييك

د/عرفه يقول...

إممممممممممممممم

مش عارف

حاسس انك متجنية اوى

اتمنى انك متعمميش تجربتك الشخصية على الرجالة كلهم
التعميم وحش جدا

وزى ما فيه رجالة كده
فيه حريم برضه كده


بلاش التعصب لبنى جنسك


نصيحة لكل النساء
ولكم فى امهات المؤمنين قدوة حسنة
مثال للالتزام والطاعة والحنان وتقديم المشورة والدفع بالزوج للامام دايما والوقوف جنبه فى كل الاحوال

حمـــــــــــــــــــــة يقول...

السلام عليكم ورحمة الله وبركاته
العلاقة بين الرجل والمرأة متوترة بينهما منذ الأزل
و الإختلاف في كل شيءا يعمق الهوة أحيانا
جسديا و نفسيا ...كلاهما و ميزته الخاصة
يبقى فهم الآخر و الوعي خير سبيل للعيش جنبا الى جنب في سلام
المرأة لم تأخذ حريتها....فهي مكرمة
أما ما يعتقد بمنطق العصر " حرية المرأة " فهي كلمة خير أريد بها شرا
إذ إنحصر الموضوع في اللباس ، و تمكينها من أولويات كالعمل أدت الى إنحراف شديد و عمقت الكره لدى الكثير و رد فعل عنيفا
و الخطير تبنت فئة الشباب لأفكار عنف ضد الإنثى بصفة عامة
هذا بدرجات متفاوتة حسب المكان
نعم المرأة لها الحق في التعليم و كل نواحي الحياة مثلها مثل الذكر.....و دليل عدد الإيناث المتفوقات (عددا و عدة)في التعليم خير دليل
يبقى الوعي الحقيقي و الفهم الصحيح خير مخرجا

Mahmoud Ahmed يقول...

تعليقا بقي على تعلقيك ^_^

.....

اولا مفيش ستات مكسوره الجناح
كل النساء بتعرف تاخد حقها بس بطريقتها
يعني ممكن تظهر على انها ضعيفه جدا
بس هي واخده حقها ثالث و مثلث
ممكن تظهر على انها غلبانه
بس هي واخده حقها 100%

.....

بالنسبه للبنطلون
مفيش حاجه اسمها عملي او لأ
هو لبس رجالي في الاول و الاخر

انما حكايه التنافس بين بعض الرجال على لبس ملابس النساء

فانتي قلتي كلمه غلط سوري يعني

قلتي رجال ؟؟

لأنهم بالطريقه ده مش (( رجال )) ^_^

.....

بالنسبه للمترو
طب ما هما بيركبوا عربيات الرجال لحد دلوقتي
يعني بمعني افضل
اصبح لهم زياده اكثر في حق الركوب
ليهم عربيات مخصصه و الى مش لاقيه مكان تركب اي عربيه عايزها
انما الراجل له عربيات محدده فقط
ولو مش لاقي
يعني غليان يقعد و يستني المترو الجاي ؟؟!!

.....

بالنسبه للبنك
مفيش حاجه اسمها حظها
تصدقي ان انا بقيت بستخدم الموضوع ده
لما اكون رايح البنك او السفاره مثلا
باخد والدتي معايا
نص ساعه و بكون مخلص الى عايزه
انما لو روحت لوحدي
بقعه من الاعه 9 لحد الساعه 12
شوفتي الفرق ؟؟

......

ما زلت بقول ان هيجي اليوم الى الرجاله هي الى هتطلب بحقها
وهتطلب من النساء انهم يعاملوهم برفق

عشان كده كانت رسالتي

(( رفقا بنا يا نساء ))

:(

ستيتة يقول...

عاوزاني أكتب رسالة للرجل
لأ
أنا هاأكتب للمجتمع كله
لأن ساعات الست هي اللي بتودي الستات في داهية وترجعهم عشر خطوات للوراء
لما بتحاول ترضي راجل وتكرر كلامه كالبغبغاء
بلا فهم انها وكسة ونكسة لكل بنات جنسها

عزيزي المجتمع العربي
كل ضعف تعاني انت منه لأنك ربيت إمرأة ضعيفة فربت هي رجل أضعف
عزيزي المجتمع العربي إعطي للمرأة حقوقها الربانية وارحم القوارير فهن بالحنان والحب والرعاية والإحترام يتحولن لزهور صحيحة صحية تربي لك ابناء سليمي العقل والبنية

عاوزة حقي وها اخده ها اخده
بس بلاش ابص لأمريكا ومنظمتها إنها هي اللي بتديني حقوقي

عزيزي المجتمع العربي
من العار ان كل قانون كان به بعض العدل في موازين الحياة
الي مررته غصب عن عين الرجال ست متربية على ايد انجليز او امريكان
عيب عليك يا مجتمع

اسكتي اسكتي لحسن انا لو فتحت محدش ها يعرف يسكتني
بوست اكثر من رائع يا مونا
شامل جامع والله

المجاهد الصغير يقول...

السلام عليكم
مثل ما فيه رجال قاسيه القلب توجد نساء مثلهم وبسبب تدنى الاخلاق لكلا الطرفين يحدث تدهور الاخلاق والقيم
ما الذى يدفع الشاب الى المعكسه مثلا لا اقول ان الشاب مظلوم وغصب عنه ولكن توجد دوافع تدفعه لهذا السلوك مش معقول تكون البنات كلها لبسه الذى الشرعى وهو يعاكس ولاعلام الهابط والاغانى المخله والموضه الفاسده غير كل ده البطاله وتأخر سن الزواج فكلاهما خطاء.
ولكى نربى ابنائنا لابد ان نستند للقران الكريم وسيره الرسول العطره فى ظل هذا المجتمع الايدلوجى الذى يتأثر بثقافات الغير بدون تفكير

موضوع جميل جدا
وفقكِ الله لما يحبه ويرضاه
دمتى فى رعايه الله

salwa يقول...

السلام عليكم اخت موناليزا
لا اقول الجميع ولكن الغالبية من الرجال
يطبقون الدنيا وفق مصالحهم الذاتية فقط,العيب ليس في الدين بل في التطبيق
دائما مبدعة في مقالاتك
سلام

همس الاحباب يقول...

الموضوع رائع وكعادتك اختى العزيزة مبدعة فى عرضك لموضوعات هامة جدا
ولكن مع احترامى لوجهة نظرك فليس كل الرجال كذلك ولا كل النساء
والمشكلة فى الاساس سببها المراة
لان المراة نصف المجتمع وتلد النصف الاخر
اذن فالمراة مجتمع باكلمه
اول من يفرق فى المعاملة بين الولد والبنت هى الام
اول من يتهاون فى حقوق البنت هى الام
اول من يخطىء فى التعامل وتربية الولد الام
فالام مدرسة وجامعة
رسالة موجهة للمراة
بصلاحك ينصلح باقى المجتمع
تحياتى

لجين أبو الدهب يقول...

والله البوست ده نفسى رجال كتير تقرأه ..

لو اوجه نصيحة للرجل

اعرف انت كريم ام لئيم من معاملاتك مع محارمك من النساء ..

واعلم انك عندم تسئ المعاملة مع النساء فإنك لم تعمل بوصيم اكرم الخلق وتجاهلتها فليرحمك الله ..

جزاكِ الله خير ياموناليزا ياحبيبتى ..
دمتِ بخير ..

ماء تشرين يقول...

اعتقد انو الرساله عنوان سمعتوا قريب عودو رجالا كى نعود نساء بجد نفسي الرجاله يعرفو انو الرجوله اكبر من المعنى الضيق الهما عايشين فيه عارف ياموناليزا انا نفسي كل الستات ميشتغلوش نفسي بجد يبقه شغلهم الحقيقى جنب اسرتهم العمل الاجتماعى الفكره دى في بالى من زمان يمكن ترك مجال العمل لرجال يوقف البطاله وفكره العمل الاجتماعى للمرأه تنهض الامه عمل اجتماعى بجد مش تسالى عارفه ياموناليزا الستات في امريكا واوربا وكل دول العالم بيرجعو دلوقتى للبيت انا اعتقد انو الرجال فقد رجولته بسبب المجتمع اليداله حجم مش حجمه والست فقد كثير من انوثتها بسبب العمل موضوع جميل ومييز وبعتذر عن الاطاله

موناليزا يقول...

حاول تفتكرنى
ــــــــــــــ
أهلا بيك يافندم
أشكرك جدا على تعليقك وفعلا يجب أن يلتزم كلا من المرأة والرجل بدوره
يسعدنا دوام التواصل


********************************


د/ عرفة
ـــــــــــ
أهلا بيك يادكتور
بغض النظر على انى مش فاهمة ايه دخل تجربتى الشخصية فى الموضوع لان الموضوع بيتكلم عن الرجل فى العموم
ولكنى انتظر منكم توضيح مثال على انى متجنية على الرجل فيما ذكرته
أشكرك جدا لمشاركتك
ويسعدنا دوام التواصل


**********************************


هاما
ـــــــ
وعليكم السلام ورحمة الله وبركاته
أهلا بيك يافندم
أشكرك جدا على تعليقكم المتميز
يسعدنا دوام التواصل


***********************************


المدونة الاسلامية سبايدر مان
ــــــــــــــــــــــــــــ
أهلا بعودتك يادكتور

مش كلهن على فكرة:)
والامثلة عندى كتيييييييييير

بالنسبة للبنطلون
فيه اراء كتير فى الموضوع ده:)
وأحييك على رايك فى أشباه الرجال

بالنسبة للمترو
عندك حق:)
بس برضه الرجال عليهم الاستحمال

بالنسبة للبنك
أى خدمة:)
عشان تعرفوا بس أهمية المرأة فى حياتكم

أحترم رسالتك جدا وسننشرها بإذن الله فى البوست القادم فانتظرونا
يسعدنا دوام التواصل وفى انتظاركم دائما
ونشكركم جدا على متابعتكم


*******************************


ستيتة حسب الله الحمش
ــــــــــــــــــ
أختى الحبيبة:اهلا اهلا بنبض الحكمة
الله عليكِ يا سوتيتة
قولى كمان
ياستى افتحى فى الكلام براحتك ولا يهمك
ماتحرمش من تواجدك ابدا ياحبيبتى
تسلميلى يارب واشكرك جدا لرايك
نورتينى


********************************


المجاهد الصغير
ــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك واشكرك جدا لرايك
نورتينى ياجميلة واسعدنى تواجدك


********************************


سلوى
ــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك واشكرك جدا لرايك
ومتفقة مع تعليقك
نورتينى سلوى الجميلة واسعدنى تواجدك


*********************************


همس الاحباب
ــــــــــــ
أهلا بيك استاذ خالد
ربنا يكرمك يارب اشكرك جدا لرايك فماتوفيقى الا بالله
متفقة مع تعليقك جدا
ورسالتك سأوصلها لها بإذن الله فى موضوعى القادم
يسعدنا دوام التواصل


********************************


لجين ابو الدهب
ــــــــــــــ
أختى الحبيبة:اهلا اهلا بالقمر
ربنا يعزك يارب واشكرك جدا لرايك ولمشاركتك وسأضيفها حالا للموضوع
تسلميلى لوجى ياجميلة وتسعدينى دائما بتواجدك


*******************************


ماء تشرين
ــــــــــ
أختى الحبيبة:اهلا اهلا بالقمر
إطالة ايه بس ده انتِ اتكلمتى فى نقطة مهمة جدا
هناقشها تفصيليا باذن الله فى الموضوع القادم
نورتينى ياجميلة واسعدنى تواجدك

من غير عنـــوان يقول...

اتخيل أن المرأه والرجل وجهان لعمله واحده وهي الإنسان... والخالق جل علاه أعطى لكل مميزات وخصائص.. لا يصح أن نعكسها... بل يجب أن نحض الأسوياء على تعظيمها... وتطبيقها... ومن يتحمل أن يقف أمامه سبحانه ويقول لقد يدلت سنتك وفطرتك لأنني لم أرض بما خلقتني عليه... أكيدأنه لاأحد يستطيع ذلك.. وعليه.. فليرضى كل بما خُلق عليه... وليتق الله في الآخر...فبتقوى الله نرزق...وأما الظالم فله رب يحاسبه...

أمنياتي

أم أحمد المصرية يقول...

حبيبتي موناليزا
وحشتيني قلت اجي اسلم لما رجعت
ايه اخبارك و ازي جوجو و زمردة :)

اما موضوع التدوينة فهو القضية الازلية لو رجع الرجل و المرأة لتعاليم الاسلام لحلت كل المشاكل

د/عرفه يقول...

بعتذر لو كان كلامى ضايقك

وبعتذر لو كان توقعى غلط

تخيلت ان مفيش واحدة ممكن تظلم الرجل إلا لو كانت تحمل له ذكريات سيئة


وده جزء من كلامك
لماذا الرجل أنانى فى تعامله معها؟.. لماذا يقسو عليها؟. .. لماذا يخونها ؟.. لماذا لا يحترمها؟.
لماذا لا يتعامل معها كعقل متكلم وليس مجرد كائن يثير غرائزة؟.. لماذا عندما يتزوج ينصح غيره بعدم الزواج رغم أن فى الزواج راحته؟ ..لماذا عندما تمر عليه امرأة مهما كان عمرها يغازلها متجاهلاً ما قد يتركه هذا التصرف فى نفسها من أثر سئ؟.. وغيرها من الأسئلة الكثيرة الذى يكون أشهرهم : هل يقبل اللى بيعمله مع بنات الناس يتعمل مع محارمه؟


ده جزء بس من المقال
شايف ان فيه تجنى جامد جدا على الرجل

موناليزا يقول...

من غير عنوان
ــــــــــــــ
أهلا بيك يافندم
أشكرك جدا على تعليقك المميز
يسعدنا دوام التواصل


*********************************


أم أحمد المصرية
ـــــــــــــــ
أختى الحبيبة:اهلا اهلا بالقمر بعد طول غياب
تسلميلى ياقلبى
:) بيسلموا عليكى كتير
بتفرحينى بجد لما بتسألينى عليهم

عندك حق
نورتينى ياجميلة واسعدنى تواجدك


********************************


د/عرفة
ــــــــ
أهلا بعودتك يادكتور
إعتذارك مقبول يا فندم:)
فعلا توقع حضرتك غلط لسبب بسيط جعلنى ابتسم حقا
وهو ذكرك لجزئية معينة فى الموضوع واستشهادك بها
لأن هذ الجزئية تحديداً كتبتها منذ10 أعوام أو أكثر يعنى قبل أى تجربة شخصية:)
وهذا يعنى أننى لا أتحامل على الرجل بمنظور شخصى ولكنه بمنظور عام لما أسمعه وأشاهده على مدار حياتى
هستأذنك بس تراجع بعض الأمثلة التى ذكرتها فى الموضوع وهتعلم جيداً بأننى لم أتجنى على الرجل أنا فقط أعرض بعض النماذج السيئة الموجودة
أشكرك جدا لاهتمامك ولمتابعتك
مع خالص تقديرى واحترامى
وفى انتظاركم دائما

Unknown يقول...

ما الى حظ اكتب تعليق عندك :(
اول مرة كتبت كتير كتيييير والله وقطعت الكهربا :S
وتاني مرة قاعد بكتب لهو فصل النت :(

باختصار لو احنا طبقنا دينا صح راح نتفادى كل هادي المشكلات , لأنه دينا نظم كل شي , واعطى كل ذي حق حقه

موفقه يارب

ريمان يقول...

انا لو هكتب نصايح والله هكتب بوست كامل وهزعلهم منى زى ما ز علتهم كتييييييييير قبل كده


ما انا بقى هفتاح ملف اشباه الرجال


انا وانتى كل فتره كده بنزل مواضيع نار شكلهم هيخترقوا مدونتنا قريب

ههههههههههههه نخلى بالنا بقى ربنا يستر

بصى يا موناليزا

انا بجد بحييكى من كل قلبى

موضوعك متكامل جدا

اعتقد انك مش نسيتى اى حاجه

انا نفسى اثور فى وجه المجتمع فى وجه كل راجل


بقولك ايه

انتى لسه هقتولى فين الرجاله وفين الشهامه والمروءه

تعالى نقرا الفاتحه ع الرجوله

الا من رحم ربى

الله يرحمها بقى

تحياتى ليكى يا قمر

ريمان يقول...

من بعد اذنك هنشر رابط موضوعك عندى على الاميل

لــــ زهــــــراء ــــولا يقول...

ربنا ينصرح ويعزك ويفرح قلبك ويكرمك ويبدل لحظات الالم فى حياتك الى لحظت سعاده يا ارق موناليزا

الرجل بطبعه انانى هى يحب ان يمتلك المراه الى امامها يمتلك مشاعرها واحاسيسها وقلبها وعقلها وكل ما فيها

رغم ان المراه اخدت حقها فى المجتمع لكن فى الحياه الشخصيه لم تاخذه

لى عوده مره اخرى للرد على موضوعك الاكتر من رائع

زهراء

لــــ زهــــــراء ــــولا يقول...

موناليزا اللذيذه
ايه الموضوع الجامد ده
بصى يا قمرايه زى ما فيه رجل ظالم فيه ست ظالمه
زى ما فيه رجل حنون فيه امراه حنونه يعنى كل حاجه هتلاقى منها فى الرجل وفى الست
بس زى ما تقول كده ان الست الحنا فيها اكتر من الرجل والحب كمان والرومانسيه بس مش معنى كده ان مافيش حنان وحب ورومانسيه بين الرجال
هى الحكايه انها نسبه قليله

نصيحه لكل رجل اتقى الله فى زوجتك وامك واختك وبنتك وخطيبتك واى اى امراه تفرض عليك الظروف ان تتعامل معها


ربنا ينصرك ويفرح قلبك ويسعد كل اوقاتك


لــــــــــــــولا

مدحت محمد يقول...

هو صراع هيظل قائم بين الراجل والمرأة
لحد يوم القيامة

بس بصراحة احنا فى عصر.......
المرأة اخدت حقها فيه
فى عصور قبل كدة كانت الست دورها انها تجيب عيال وتربيهم
ومش اكتر من كدة

ومحدش كان يتوقع ان الست تبقى وزير
او نائبة فى مجلس شعب
او مديرة شركة
اعتقد ان اهداف الولد والبنت بقت واحدة ومتساوية جدا

بالعكس انا عندى فى الشركة اكتر التعيينات بنات

مش هقول البنات بقت تزاحم البنات
لا البنات طغت على الولاد

حابب اقول ان مش كل الولاد واحد

ومش كل البنات برضه واحد

ومينفعش ندى حكم عام
لاننا كدة هنظلم

ومينفعش من حالة استثنائية حصلت
نقول ده اللى بيحصل وده اللى سايد

لان معنى كلامك كدة
اننا نستنى بكرة المسيخ الدجال

للمرأة حقوق

ايوة انا مؤمن بكدة

وللراجل برضه حقوق

ومينفعش حق يطغى على حق

مش معنى انى اخد حقى انى اجرح حد او ااذى حد

او اخد رد فعل غلط لفعل ممكن غيرى شايفه عادى او مكانش يقصده

وبرضه ده سواء من اى طرف من الطرفين

على العموم نصيحة للمرأة

وللراجل برضه

الامانة تقتضى احيانا التسامح لا الخيانة

وزى مالمرأة هتقدر الرجل

المفروض كمان الراجل يقدر المرأة

اعتذر عن االاطالة

موناليزا يقول...

مستر/ حازم
ــــــــــ
أهلا بيك استاذ حازم
ماتضايقش يافندم بتحصل كتير:)
عندك حق جدا
بس مين يطبق تعاليم الاسلام
ربنا يكرمك واشكرك جدا على تعليقك
يسعدنا دوام التواصل


********************************


ريمان
ــــــــ
أختى الحبيبة:اهلا اهلا بالقمر
اكتبى ولا يهمك
اللى هيزعل بس هو اللى هيحس ان الكلام عليه وده المطلوب فلهم نوجه هذا الكلام:)
هههههههه ربك هو الحامى
ربنا يعزك يارب فماتوفيقى الا بالله
مادام معكِ قلمك اكتبى ماتريدين لعلنا نرفع الظلم عن أنثى لا تمتلك هذا القلم
تعرفى يا ريمو رغم ان الرجولة الحقة بقت قليلة اوى بس لسه عندى امل انها فى يوم هتطغى على كل ردئ

طبعا ياحبيبتى الموضوع تحت أمرك ده شئ يسعدنى
نورتينى ريمو الجميلة واسعدنى تواجدك


***********************************


لولا وزهراء
ــــــــــــ
أختى الحبيبة:اهلا اهلا بالقمر
ربنا يعزك يارب ويتقبل دعائك اللهم امين
و هو ده المقصود فين حقوقها فى حياتها الشخصية.
نورتينى زهراء الجميلة
وفى انتظارك دائما


*********************************


لولا وزهراء
ــــــــــــ
أختى الحبيبة:اهلا اهلا بالقمر
أشكرك جدا لرايك
عندك حق فيه وفيه
بس كلامنا المرة دى موجه كله للرجل
ربنا يعزك يارب اشكرك جدا لدعائك وستتم اضافة نصيحتك للموضوع حالا
نورتينى لولا الجميلة واسعدنى تواجدك


********************************


مدحت محمد
ــــــــــ
أهلا بيك استاذ مدحت
ده حقيقة
انا معاك انها اخدت حقها فى مجال العمل وبزيادة كمان لكن انا قصدى معاملات الرجل معها فى العموم وسواء يعرفها او ميعرفهاش
مع احترامى لكلامك يافندم
هو التحرش مثلا اللى بيحصل سواء فى موسم الاعياد او فى غيره ده برضه حالة استثناية؟؟؟؟
ياريت حضرتك تدينى مثال واحد للحالة الاستثنائية اللى تقصدها
إذا كانوا حتى الرجال اللى تعدوا سن60 ممكن يعاكسوا ويتحرشوا
ومش فاهمة ازاى حد ياخد حقه من غير مايجرح التانى
يعنى لو واحدة اتعاكست مثلا قبل ماتاخد اى رد فعل مع اللى عاكسها تقوله انا اسفة انى هرد عليك؟؟؟

أشكرك جدا لمشاركتك
يسعدنا دوام التواصل

(Joudy) يقول...

جميل يا مونى تسلم ايديكى الموضوع بجد مهم ومحتاج واقفة

أنا نصيحة لكل رجل أن يجعل زوجته رفيق له فى مشوار حياته مكمن أسراره أنيسه فى سفره

ربنا ينصرك على من ظلمك يارب

دمتى بكل الخير والسعادة

غير معرف يقول...

السلام عليكم
أريد أن أقول أن كل له ما له وعليه ما عليه

ما من أحد كامل ، ولا تجعلي التجربة الشخصية تعمم وجهة نظرك عن الفصيل أو النوع

دمتِ بود

رامز عباس يقول...

أول مرة أجى هنا وان شاء الله تكون الاخيرة


بضحك طبعا


ريمان نشرت الرابط على الاميل فعلا وانا هنشره عالفاييس بوك


موضوع لازم ينطرح طول الوقت اوضاع المرأة صعبة


جدا لدرجة ان عدد من المدونات المطلقات اطلقوا اذاعة مع محاسن صابر لمعالجة تلك الازمات


تقبلى مرورى

موناليزا يقول...

جودى
ــــــ
أختى الحبيبة:اهلا اهلا بالقمر
ربنا يعزك ياجميلة اشكرك جدا لرايك ولدعائك
ونصيحة غالية ستتم إضافتها حالا للموضوع
نورتينى جودى الجميلة واسعدنى تواجدك



********************************


أحمد شريف
ـــــــــ
وعليكم السلام ورحمة الله وبركاته
أهلا بيك أستاذ أحمد
أشكرك جدا لتعليقك
ولكن تأكد أن هذا الموضوع ليس له علاقة بأى تجربة شخصية ولو كان هكذا لقلتها على الملأ ولكن هذا الكلام من الواقع الذى نحياه جميعا
تمعن فى الأمثلة المذكورة وأنت تتأكد من هذا
يسعدنا دوام التواصل



********************************


رامز عباس
ـــــــــــ
أهلا بيك استاذ رامز فى زيارتك الاولى
:) يافندم سيادتك تنورنا فى اى وقت
أشكرك جدا فنشر الموضوع شئ يسعدنى
:) عجبنى ذكرك للراديو لانى إحدى المشاركات فيه فانتظرونا قريبا
نورت مدونتى ويسعدنا دوام التواصل

شمس النهار يقول...

ازيك
عامله ايه
ياربت تكوني بخير

انا هسلم بس والتعليق علي البوست بعدين لاقيته جامده وعايز قعده
وحشتني بوستاتك القيمه

وعايزه اخد لفه علي الناس كلها

سلام

Heba Faruq يقول...

موضوع اكثر من رائع

لكن غريبة انك تقولين في البداية ان المرأة الآن حصلت على حقوقها! المرأة الآن يا عزيزتي مازالت بعيدة عن ذلك خاصة حقها في التعليم لا تنظري الى المدن الكبرى والاحياء الراقيةولكن لننظر الى الاحياء الفقيرة والقرى والنجوع في انحاء البلاد لن اسأل عن نسبة تعليم الفتيات فيها بل سأسأل عن نسبة الزواج المبكر جدا لفتيات صغيرات جدا في السن لا يعرفن شيئا عن الحياة تنتهك طفولتهن
وعن حقها في الميراث فحدث ولا حرج مازالت حتى الآن تحرم منه من قبل اخوانها الرجال وهذا حتى في المدن الكبرى وقد رأيت بنفسي امثلة لذلك

للأسف المرأة محرومة من ابسط حقوقهاأن تعامل كانسان له كرامة وانا بصراحة عاجزة تماما عن فهم لماذا يتصرف الرجال بهذه الطريقة الانتقامية معها رغم ان المرأة كما قلتي كلمة واحدة طيبة تملكها وتجعلها ملاك تحرس وتخدم الاخرين

احييك بشدة على البوست المتميز
واعذريني للاطالة
مع خالص تحياتي

Butterfly يقول...

موضوع جميل جدا
وكتير من المواقف دى خطرت على بالى وعلقت عليها قبل كده ..!
ربنا يهدى ...

سامر محمد عرموش يقول...

الاخت العزيزة امة الله الموناليزا
قرأة كل المقالة وحاولت ان اتخيل واصور كل الذي قلتيه وجدت شخصا لا مثيل له حتى في الخيال شخص تعدى حتى صفات الحيوانات اكرمكم الله يبدوا لي ان هناك قسوة زائدة واجحاف كبير في وصف الرجال انا اقول ان الموضوع نسبي جدا وان هناك الطالح والصالح في كل من الجنسين
هناك رجال متغطرسين وهناك نساء ايضا
هناك رجال حمقى وهناك نساء ايضا قد تزيد نسبة الرجال على النساء وقد تقل
تم لا ننسى قول الله تعالى الطيبون للطيبات والخبيثون للخبيثات وهذا امر واضح وجلي وملموس سبحان الله الرجل الطيب الملتزم يرزقه الله بالامرأةالطيبة الصالحة التي تساعده على التزامة والعكس صحيح
لذلك ارجوا عدم التعميم
انا شخصيا اجريت دراسة سريعة بعد قراة موضوعك على افراد عائلتي مثلا
من اعمام وعمات وهم ثمانية واولادهم وبناتهم المتزوجين وهم اكثر من عشرين زوج وزوجة وعن الاخوال والخالات وهم احد عشر وابنائهم وبناتهم وهم اكثر من اربعين زوج وزوجة وبحتت عن ما تقوليه عن حرية التعلم او اختيار الزوج او الميراث او او او لم اجد الا نسبة قليلة جدا جدالا تتعدى الواحد بالمئةاو الاثنين
ثم في الجيران الذين عشت معهم (لا اعتقد ان النساء تخفي شيء عن بعضهن) لا يوجد الا القليل النادر مما تقوليه
انا بصراحة لا اعرف قد يكون هناك مجتمعات اخرى في مناطق اخرى انتي تقصدينها بهذا الموضوع وهذا جائز
اشكرك على سعت صدرك
تقبلي نقدي واحترامي

موناليزا يقول...

شمس النهار
ــــــــــ
أختى الحبيبة:اهلا اهلا بالقمر بعد ول غياب
انا الحمد لله بخير ماتحرمش من سؤالك
القلوب عند بعضها لانك كمان وحشتينى جدا
تنورينى ياشموسة فى اى وقت وانا فى انتظارك دائما



*******************************


هبة فاروق
ـــــــــــ
أختى الحبيبة:اهلا اهلا بالقمر
ربنا يكرمك اشكرك جدا لرايك
بالمقارنة بالاول طبعا حصلت على بعض الحقوق المهدرة
وطبعا متفقة معاكِ ان فيه ناس كتير لسه مش مقتنعة اصلا بحقوقها دى
نورتينى هبة الجميلة واسعدنى تعليقك وتواجدك


*********************************


بيترفلاى
ــــــــ
أختى الحبيبة:اهلا اهلا بالقمر
أشكرك جدا لرايك
نورتينى يافراشتى واسعدنى تواجدك


**********************************




سامر محمد عرموش
ــــــــــــــ
أهلا بيك استاذ سامر
ماشاء الله ربنا يزيد ويبارك
بس واضح ان حضرتك فهمت الموضوع غلط لانى اتحدث عن الرجل فى العموم وليس عن فئة الزوج فقط
وعموما سأكتب ملحوظة فى البوست نفسه لكى اوضح مقصدى اكتر
أشكرك جدا لمشاركتك
يسعدنا دوام التواصل

طهر فؤادك يقول...

السلام عليكم ورحمة لله وبركاتة
ربنا يكرمك يارب على الموضوع الجميل دة وربنا يثبتك يارب على طاعة الله وحسن عبادتة اللهم امين والمسلمين .... ولازم الصبر سواء من المرأة او الرجل ... فالصبر والاحتساب من المرأة على زوجها وربنا يكتب دة كلة ان شاء الله فى ميزان حسناتها ... وايضاا للرجل علية الصبر على زوجتة وان يتذكر لها الخلق الطيب الحسن دايما عندما يرى منها مايكرة وهو دة الى وصانا بية سيد الخلق اجمعين سيدنا محمد صلى الله علية وسلم ...

- والتربية الصالحة الاسلامية دى اهم حاجة علشان بعد كدة بأذن الله ننتظر جيل سواء رجل او امرأة سعيد مستقر فى حياتة ان شاء الله

رفقة عمر يقول...

موناليزا
بجد وفيت للموضوع حقه
ماشاء الله عليكى ربنا يبارك فيكى يارب ويزيدك من فضله
اللهم اميين

غير معرف يقول...

المرأة لها كل شئ
لأنها ست البيت

عن العلاقة بين الرجل و المرأة
هما جسد واحد يمثل فيه الرجل الرأس التي تفكر و تدور هنا و هناك
لكن المرأة هي الرقبة التي تحرك هذا الرأس
لهذا كلاهما يكمل الآخر

غير معرف يقول...

يا رب ينصرك و يكرمك

Unknown يقول...

السلام عليكم ورحمة الله وبركاتة
والله موضوع جميل وطويل
اقول للرجل رفقا بالقوارير
وللمرأة
واذكره بقول النبى صلى الله عليه وسلم
خيركم خيركم لاهله
قال رسول الله صلى الله عليه وسلم
اذا صلت المرأة خمسها واطاعت زوجها وصانت فرجها دخلت الجنة
على الرجل ان يتقى الله عزوجل فى زوجتة
عامل تعامل

موناليزا يقول...

طهر فؤادك
ــــــــــــ
وعليكم السلام ورحمة الله وبركاته
أهلا بيك يافندم
ربنا يعزك يارب اشكرك جداعلى دعائك لى وعلى تعليقك
يسعدنا دوام التواصل


*********************************


رفقة عمر
ــــــــــ
أختى الحبيبة:اهلا اهلا بالقمر
ربنا يعزك يارب فماتوفيقى الا بالله
نورتينى ياجميلة واسعدنى تواجدك


*********************************


سونيت
ــــــ
أختى الحبيبة:اهلا اهلا بالقمر
أحييكِ جدا على تعليقك
ربنا يكرمك واشكرك جدا على دعائك ربنا يتقبل اللهم امين
نورتينى ياجميلة واسعدنى تواجدك


**********************************


نهر الحب
ــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر بعد طول غياب
أشكرك جدا لرايك وأعتذر على الاطالة:)
إضافة متميزة جدا سنضيفها للبوست حالا
نورتينى انوسة الجميلة واسعدنى تواجدك

Danaa Ahmed يقول...

السلام على الجميع،

اسمي السيدة دانة أحمد. أنا امرأة سعيدة اليوم، وقلت لنفسي إن أي مُقرض ينقذ عائلتي من وضعنا السيئ، سأحيله إلى أي شخص يبحث عن قرض. لقد أعطوا السعادة لي ولعائلتي. كنت بحاجة إلى قرض لبدء حياتي من جديد لأنني أم عازبة ولديها 3 أطفال. لقد التقيت بشركة القروض الصادقة والخائفة من الله والتي ساعدتني في الحصول على قرض. إذا كنت بحاجة إلى قرض وسوف تقوم بسداد القرض، يرجى الاتصال بفايزة للتمويل وإخبارهم أن السيدة دانة أحمد هي التي تحيلك إليهم. اتبع جميع التعليمات وسوف تحصل على القرض الخاص بك. اتصل بهم على بريدهم الإلكتروني: (contact@faizaafzalfinance.com) أو WhatsApp: +91 (923) 356-1861. للمزيد من المعلومات.