الجمعة، 19 مارس 2010

عن التدوين أتحدث

من خلال وجودى فى عالم التدوين لمدة عامان أستطعت أن أرصد بعض النقاط التى من وجهة نظرى كمدونة لا تروقنى من قبل المدونات وأصحابها.
وقبل أن أبدأ أريد أن أنوه إلى أن هذا ليس تقليل من قيمة ما يكتبه أحدهم ولا إساءة لشخص أحد بعينه.
ولكن هذا الرصد من باب أن نرى عيوبنا ونحاول تفاديها لأننا مرآة لبعضنا البعض وعلى كل منا أن يوجه الآخر إلى أى شئ وجده لا يروقه
أولاً / بالنسبة للمدونات:
*أن تكون مليئة بالأكواد والزخرفة أو القالب نفسه يكون تقيل مما يصعب تحميلها بسهولة فى كثير من الأحيان.
(كانت مدونتى هكذا ولم أكن أعلم إلا أن نبهنى بعض الأخوة الأفاضل(KHALED , أحمد شريف ,norahaty ).
- ومازال يسعدنى إستقبال أى نقد للمدونة- .
*أن تكون مرفق بها مادة صوتية.
* وجود مربع التعليقات فى نفس صفحة الموضوع.
* وجود تحديد الكلمة حين إرسال التعليق.
* وجود صور سواء فى الموضوعات أو فى البانر الجانبى خادشة للحياء.
* تغيير قالب المدونة من وقت لآخر فى فترة زمنية قصيرة.
* طول الموضوع المعروض بطريقة مبالغ فيها.
* قد تجد الموضوع عبارة عن كلمات أغنية أو شِعر منقول دون أن تجد كلمة (منقول).
* أن يكون الموضوع عبارة عن مقال طويل منقول ولذلك أقترح بوضع لينك المقال مباشرة.
* تعدد الألوان بين الكلمات مثال:"القطة نامت" القطة تكتب بلون أحمر ونامت تكتب بلون أخضر وهكذا فى بقية الموضوع كل كلمة بلون وبالمقابل وجود لون واحد فى الموضوع وخاصة حين يكون طويل أو عبارة عن حوار.
* تصغير الخط حين كتابة الموضوع أو تكبيره بطريقة مبالغ فيها(خير الأمور الوسط).
ثانيا / بالنسبة لأصحاب المدونات:
* إختيار اسم تدوينى لا يوضح إذا كان صاحبه ذكر أو أنثى وحينما تدخل المدونة لا تعرف مع من تتعامل من حيث النوع والديانة والجنسية.
*وجود خلط بين اسم المدونة واسم صاحبها.
يعنى مثلاً اسم المدونة يكون هو نفسه اسم صاحبها وبالتالى مش هتعرف الاسم اللى المفروض تستخدمه وانت بتتعامل معاه هيكون إيه.
طول اسمه التدوينى المختار وكأنه عنوان فى جريدة سواء كان باللغة العربية أو الإنجليزية(أقصد بالاسم التدوينى الذى يظهر فى التعليقات).
*تغيير الصورة الرمزية كثيراً أو استخدام صورة مشهور بيها شخص تانى.
*اشتراك مجموعة من المدونين فى مدونة واحدة ويكون الاسم موحد للجميع فلا تعلم أيهما من علق عندك.
وعلى الجانب الآخر نجد مدون واحد يمتلك أكثر من مدونة أحدهما مشتركة والأخرى تحت الإنشاء والثالثة مهجورة من فترة .
* حجز التعليقات والمنافسة على أول تعليق.
* التعليق بحروف إنجليزى والكلام عربى.
* عدم الرد على المعلقين عنده سواء باعتذار أو ترحيب.
* عدم تقبل الإختلاف والنقد لما يكتب وتصبح حرب حامية الأطراف.
* غلق التعليقات.
* غلق المدونة دون أى إنذار سابق.
* غلق المدونة وفتحها أكثر من مرة.
*تعليق أحد الرجال على مدونات بنات بكلمات مرفوضة مثال:( ياقمر , وحشتينى, عزيزتى....) وبالمقابل بنات يكون هذا كلامهم عند مدونات الرجال.
* نزوح عدد كثير من المدونين إلى الفيس بوك وعدم الاهتمام بمدوناتهم.
* زعل بعض المدونين من أحدهم إذا ما كتب موضوع ولم يعلق عنده.
ولذلك سأكتب بعض الأسباب التى تجعلنى لا أعلق مع ملاحظة أنى أتابع جميع زوارى على الريدر.
* حينما أجد أن تعليقى لا يضيف شيئاً .
* حينما أجد الصمت هو من تبعنى أثناء القراءة وبعدها.
* حينما يكون الموضوع لا يستهوينى .
* حينما تكون المدونة متخصصة فى عرض المواضيع السياسية والمواضيع الخاصة بالإخوان المسلمين. ماعنديش معلومات كفاية تجعلنى أضيف شئ سواء بالقبول أو بالرفض.
* حينما يكون الموضوع عبارة عن إساءة للدين من ملحد أو مسلم على الورق فالتجاهل أفضل مواجهة . ولا أحبذ نشر هذه المدونات والمواقع المسيئة حتى لا نروج لها.
* حينما لا أفهم ما فائدة هذا الموضوع المطروح.لا ألوم الكاتب وألوم قصورى فى الإدراك.
*حينما يكون الموضوع عبارة عن نقل أحداث تاريخية مثلاً أستمتع بالقراءة ولا أجد ما أقوله.
* حينما يكون الموضوع عبارة عن ايميل منقول قرأته من قبل.
* حينما يكون الموضوع عبارة عن سرد مفصل ليوميات صاحب المدونة ويكون هدفه الوحيد الفضفضة بطريقة يومية.
(من حقك تكتب فى مدونتك ما تريد ومن حقى أقرأ ما أستفيد منه).
* حينما أجد لفظ بذئ حتى لو كان بيتقال بهزار.
*حينما أجد صورة الموضوع خادشة للحياء.
* حينما تكون المدونة عبارة عن قصائد رومانسية.( لايستهوينى الشِعر وخاصة الرومانسى).
* وجود موضوع أخذ أكبر من حجمه عند مدونات عديدة ويستمر لأيام وربما لأسابيع.
* وجود موضوع عبارة عن خواطر لا أفهمها. أو عبارة عن رسالة خاصة لأحدهم.
* وجود موضوع عبارة عن كلمات أغنية منقولة.
* أن يكون الموضوع عبارة عن عرض صور أو فيديو. ما بلاقيش حاجة أعلق بيها على الصور رغم إستمتاعى بالمشاهدة والفيديو فى الغالب ما بيشتغلش عندى.
* وجود أخطاء إملائية لا تغتفر وعدم قدرة صاحب المدونة على الكتابة بشكل صحيح وبالتالى لا أفهم ما المكتوب.
*فيه أسباب خارجة عن إرادتى مثال:
* وجود مربع التعليقات فى نفس صفحة الموضوع أحياناً لا يحمل معى.
* أحياناً لا أجد لينك الإرسال.
* دخول مدونة تحميلها بطئ وأجدها تتقل الجهاز.
* وجود مادة صوتية مرفقة يجعلنى أغلق الصفحة سريعاً لأنى ممكن أكون مشغلة حاجة أو مش عايزة أسمع صوت.
* أحيانا أقرأ الموضوع على الريدر وحينما أدخل المدونة لترك تعليق أجدها صفحة فارغة أمامى عدا وجود البانر الجانبى.
* هناك مدونات بتهنج الجهاز وبتعمل لنفسها كوبى على صفحات كتير.
*أحيانا أكتب تعليق وأنشره وبلوجر مايرضاش ينشره ومعرفش أن ده حصل غير لما أروح أشوف الرد على التعليق ومالاقيهوش وبيجيلى احباط ومبعرفش اكتبه تانى لانى بكتب التعليق اللى بلاقى نفسى بقوله وأنا بقرأ الموضوع.
* ممكن النت يكون فاصل أو الريدر سقط مواضيع ماشوفتهاش.
طبعاً لو فيه إضافة أو نقد آخر يسعدنى إستقباله وإضافته.
وسؤالى اليوم هو
أين المدونين؟؟
أراهم يختفوا وينسحبوا الواحد تلو الآخر .
هل تم خنق قلمكم ونحن لا ندرى أم قررتم ترك مساحة للفارغين داخلياً.
ولذلك أقول لكل صاحب قلم هادف ومحترم لقد حاباك الله بنعمة وهى قدرتك على الكتابة وإستفادة غيرك مما تكتب وستسأل عن ذلك..فاحذر.



هناك 40 تعليقًا:

mohamed ghalia يقول...

(من حقك تكتب فى مدونتك ما تريد ومن حقى أقرأ ما أستفيد منه).
أنا كمان بعانى من النوعية دى من المواضيع وبختلف مع ناس كتير بيقولوا انى المدونة زى صفحة خاصة تكتب فيه الى تحبه
وانا بقول انك تكتب عن شخصك الى يفيدنى لكن مجرد كلام يبقى مش هستفيد يبقى أكيد مفيش داعى اقراه
انا متفق معاكى فى كل الى حضرتك قولتيه
ربنا يسعدك دايما

The illusionist يقول...

اولا انا زعلان منك
عشان انتى خدتى فكره موضوعى اللى كنت هكتبها البوست الجاى
وحاليا انا عاطل بعد موضوعك ده
عاااااااااااااااااااااااااااااااا
بس معلش
لو تسمحى
بوستك ده
هيتم اقتباس منه بعض الاسباب
لانى كنت حكتب عنها فعلا
بس انتى كتبتيها قبلى
فده هيعتبر اقتباس
فاتمننى انك توافقى الاول

The illusionist يقول...

كل النقط روعه
كل النقط فى الجون على راى شلبى مدحت
بجد
انا فرحان ان حد بيفكر كده
انتى بجد مواضيعك اللى بعلق عليها او مش بعلق
بتتميز دايما بالرقى والفكر العالى
شكرا على الكلام ده
بس انتى عارفه ان طريقتى ساخره
فبوستى هيكون على طريقه
بيدونوا ايه بلا نيله
هههههههههههههههههههههههههههه
كده يعنى
ربنا يسهل بقى

الزهرة البرية (Joudy) يقول...

نقدك بناء يا مونى وأيضا توضيحك لأسباب عدم تعليقك ده جميل

أما بقى حكاية إن المدونة بتاخد وقت فى التحميل فده بيرجع إلى إنه ناشر أكتر من رسالة فى الصفحة وبيحتاج إنه يقللها

وبالنسبة لاختفاء ناس فده بيرجع لأسباب لا يعلمها إلا الله

بصراحة مش عارفة أقول كلام ايه تانى بس إنتى عندك حق فى كلامك

دمتى بكل الخير والحب والسعادة

Mafrousa يقول...

يا سلام يا جميل على الدراسة الفظيعة ديه
ده انا لو عملت الدراسة ديه كنت اتفرست يا بنتى و الله
المهم
بصي يا ستى
انا معاكي فى كثير من النقاط اللى انتى كتبتيها
بس اقولك حاجة بقا عن تجربة اختك مفروسة المفروسة دائما على طول و على عرض
و اكيد مفروسة بتفرس ساعات
انا يعنى مثلا
المدونات اللى بلاقيها عاملة موسيقى بس مش بتضايقنى بس لو كانت موسيقى خفيفة ناعمة
اما بقا الاغاني
فبكتم الصوت
و بالنسبة للموضاعات المطولة
الصراحة ما ليش خلق اقراها لآخرها
فده بيخليني اقرأ سطر و اسيب سطر
هههههههههه خلقى ضيق اوي

نيجي على التعليقات
انا مثلا ساعات بزور ناس و اشوف كاتبين ايه
بس ساعات مش بيبقى ليا نفس اعلق
تعليقي زي ما قلتى مش حيضيف
و ياسلام بقا لو الموضوع يفرس فالتعليق حيكون يفرس اكتر
و ساعات بقرأ التعليقات الاول اشوف اتجاهات الزوار فى التعليقات ايه؟
ساعات المعلقين بيكونوا اصحاب الطبل و الزمر و شعللها شعللها و لعها ولعها
و ساعتها مش بحب اعلق
لأنى بتفرس من التعليقات اصلا
و ساعات يا ليساندرا بزعل من المواضيع نفسها
اللى بحسها نقد لحاجة مش فى محلها
او اثارة الناس و خلاص
و انا مش بحب النوع ده من المواضيع
و ساعات بقا الاسلوب لو فيه شتيمه او تجريح
مش برضى اعلق

نيجي على الرد على التعليقات
انا الاول كنت برد على تعليق تعليق و كنت بضايق لما اروح اعلق عند حد و مش الاقى رد على التعليق
الى ان وضحتلى احدى المدونات اللى مش بترد على ولا تعليق واحد عندها
انها فى المقابل بتقوم بزيارة المعلق فى مدونته و ترك تعليق عنده

انا بقا حبيت اعمل زيها
لاقيت انى فى زيارتي ديه ممكن الاقى الموضوع مش على هوايا
الاقى نفسي بكتب فى التعليق....انا جيت ارد الزيارة
لاقيتها حاجة تفرس كمان

نيجي بقا على الصور و الحاجات اللى بتبقى فى المدونات
انا بقا بيفرسنى موووووووووووت انى ادخل مدونة
و لاقى صور لستات منقبات فيها و كلام متعصب للدين

و اخيرا يا ليسندرا
اللى بيفرسنى اكتر و اكتر
ان التعليق يبقى طويل زي اللى انا كاتباه ده
ههههههههههههه
ما تتفرسيش منى

نور الدين (محمد الجيزاوى) يقول...

انا تركت تعليقاً لكن يبدو أن السيد بلوجر رفض مشاركتى عندك
لنحاول مرة اخرى
...
الاخت الكريمة موناليزا بحق وكما اردد دائما أنت قلم مميز هادف وشخص نبيل
استفدت من كل ما قدمتيه من نقد لسلبيات المدونات
واعجبنى جدا اسبابك لعدم التعليق واغلبها نفس اسبابى ولذلك فأنا قليل بل نادراً ما اترك تعليقات
وإن كنت اتابع الجميع
..
شخصيا أقيع فى ثلاث سلبيات مما ذكرت ِ
أنى اغلق التعليقات كثيرا وذلك صدقينى لأسباب نفسية غالبا فأجد ضيقاً بصدرى يمنعنى من تلقى التعليقات وارسال الردود أو لأنى احيانا اجد من يعلق لا يريد إلا اثبات الحضور
- كما انى بالفعل ممن يغلقون مدوناتهم كثيرا ودون انذار سابق ولكن لأسباب نفسية ايضاً اشعرأحياناً ان كل ما اكتبه بلا جدوى وانه لا فائدة من حرث البحر ..
واحياناً اغلقها لأسباب شخصية
- السلبية الثالثة نسيتها فى الحقيقة
....
دائما تقدمين كل مفيد ونافع لله درك
...
نورالدين محمود

Kiara يقول...

والله عند حق بامونى
بس في حاجات بتكون غصب عن الواحد

تحليل دقيق احيكي عليه

موناليزا يقول...

محمد غالية
ــــــــــــ
أهلا بيك أستاذ محمد
أشكرك جدا لمشاركتك
وأما عن تخصيص بعض اصحاب المدونات للفضفضة لا نلومهم على ما يكتبوا ولكن نلومهم على الغضب والزعل وربما الخصام ممن لا يعلقون عندهم
نورتنى وأسعدنى تواجدك



**********************************


زا اليوسينت
ـــــــــــــ
أهلا بيك يافندم
خضتنى بجد ..أصلى مابحبش حد يزعل منى:)

يافندم الموضوع تحت أمرك وهننتظر ما يخطه قلمك عن هذا الموضوع

ربنا يكرمك وأشكرك جدا لرأيك فيما اكتب
ونحن فى انتظار موضوعك
أشكرك جدا لمشاركتك
نورتنى واسعدنى تواجدك



*********************************


الزهرة البرية
ـــــــــــــ
أهلا اهلا بالقمر
أشكرك جدا لرأيك
سعيدة بمشاركتك وبرجوعك لينا تانى:)
نورتينى جودى الجميلة



*********************************


واحدة مفروسة
ـــــــــــــ
أهلا اهلا بالقمر بعد طول غياب
عجبنى تعليقك ومشاركتك
وكنت هتفرس انك متلخبطة فى اسمى بس بما انك بدلتى "موناليزا" بليساندرا" فعادى فى بيتها يعنى:)

طولى براحتك أنا سعيدة بمشاركتك وطرح وجهة نظرك
نورتينى ياجميلة واسعدنى تواجدك



********************************


نورالدين
ـــــــــ
أهلا بيك أستاذ نور
بلوجر غلطان طبعا فتعليقكم من التعليقات المميزة والتى تعتبر فخر لأى مدونة

ربنا يكرمك يارب فماتوفيقى الا بالله
(اللهم لاتؤاخذنى بما يقولون واغفرلى مالايعلمون واجعلنى خيراً مما يظنون)

وفعلا غلقكم للتعليقات يضايقنى لأنى ببقى عايزة أعلق مثلاً وفى نفس الوقت مضطرة أحترم رغبتك:)
وغلقكم للمدونة لا يضايقنى فقط ولكنه يغضبنى حقاً فأمثال مدونتكم لا تغلق مهما كانت الأسباب
(وهذا حقى كقارئة متابعة)
:)
أشكرك جدا لمشاركتك
نورتنى وأسعدنى تواجدك



*********************************


كيارا
ــــــــ
أهلا اهلا بالقمر
أشكرك جدا لرأيك ولتعليقك
نورتينى نيمو الجميلة واسعدنى تواجدك

Mafrousa يقول...

هههههههههههههههههه
اولا فرستك
و ثانيا فرستينى جدااااااااااااااااااااا
اكتبى عندك فى النقاط التحليلية للبوست
انهو اتنين يشتركوا فى مدونة واحدة
ويجننوا الزوار و يفرسوهم
ههههههههههههههههههههههه
انا مش فاهمة
ده بخل؟؟؟؟ ولا ترشيد استهلاك؟؟؟؟
ولا مكسب؟؟؟؟
هو اكيد مش بخل و لا ترشيد استهلاك
هو اكيد مكسب
بتأجرو المدونة ديه بكام علشان اعمل زيكم
ههههههههههه

Mafrousa يقول...

الغي يا بنتى التعليق اللى فا
انا اللى طلعت مهيسة
الريدر عندى مدخل اسمين على مدونتك
بعتذر عن الفرسة الغير مقصودة

همس الاحباب يقول...

طبعا متفق معك فى كثير من تلك الدراسة الرائعة
وانا اول واحد بعمل اخطاء كثيرة بصراحة من اللى ذكرتيه
ولكن احيانا تحدث اشياء خارجة عن الارادة
تحياتى وتقديرى

موناليزا يقول...

واحدة مفروسة
ــــــــــــــ
أهلا بعودتك ياقمر
كاتبة عنهم يا حبيبتى:)
*
اشتراك مجموعة من المدونين فى مدونة واحدة ويكون الاسم موحد للجميع فلا تعلم أيهما من علق عندك.

مش قصدك كده برضه ولا ايه؟

ألغيه ازاى بس وفيه رصد منك وتحليل وجهة نظرك واذا كان على الاسم فانا مش زعلانة لانك اختارتى اسم من احب الشخصيات لقلبى:)

ولا يهمك ياحبيبتى علقى زى ما يعجبك
نورتينى ياجميلة وفى انتظارك دائما



********************************



همس الاحباب
ـــــــــــ
أهلا بيك أستاذ خالد
أشكرك جدا لتعليقك وتوضيح اسبابك
نورتنى واسعدنى تواجدك

Baskouta يقول...

Hello
It is my first time here
I do agree with you ...you shed the light on so important points which sometimes annoy me...I so much appreciate the effort you exerted in listing such weak points & I really hope that all dear bloggers will try to avoid them in their future posts.
Wish you all the very best
Baskouta

ستيتة يقول...

مونا العزيزة

تدوينة حلوة فعلا وفيها فوائد كتير
ولكن لي بعض التحفظات فأرجو ان يتسع صدرك لها

ولكن هذا الرصد من باب أن نرى عيوبنا ونحاول تفاديها
-------------------------
الرصد ده مين اللي عمله؟
شخص عزيز منا
ولكنه مجرد رصد شخصي لأشياء ممكن تضايقك وممكن متضايقش غيرك

على سبيل المثال
تغيير قالب المدونة
ده ممكن يضايقك
وممكن صاحب المدونة يكون شخص يهوى التغيير
ده بيته
وهو مش بيعمل شيء غلط
ولا حتى ضد التدوين
فلو دخلت عنده يوميا ولقيت موضوع يعجبني
حتى لو القالب مش عاجبني ها اقول دي حرية شخصية
لأنها فعلا محض حرية شخصية وسمات فردية

كمان وضع الموسيقى
يمكن انتي شايفاه حرام
صاحب المدونة مش شايفه حرام


قصة الفونط واللون عادة بتيجي من حد مش عارف يتعامل بسلاسة مع البلوج ومش فاهم قوي يعمل فيه ايه

حاجات كتير ممكن تزعجك
ممكن تزعجني
ممكن تريح طرف تالت




وحينما تدخل المدونة لا تعرف مع من تتعامل من حيث النوع والديانة والجنسية
---------------------------
طب عايزة النوع وفهمناها
لكن عاوزة الديانة والجنسية تعملي بيهم ايه :)
ده كده بقى سجل مدني مش مجرد تبادل آراء
مؤكد يهمني اعرف بكلم ذكر أم أنثى
لكن لو حب صاحب المدونة اني معرفش دينه او جنسيته صراحة ده لا يضرني اطلاقا طالما بعرف الشخص بكلمة يكتبها وليس بأفكار مسبقة



التعليق بحروف إنجليزى والكلام عربى
-----------------------------
ناس كتير جدا جايبين الأجهزة معاهم من بره او هم شخصيا بره ومش مترجم الكيبورد وانا نفسي في السعودية كان معايا جهاز ألماني شارياه من زمان من مصر دخت علشان اعرف اكتب عليه مناهج الطلبة اللي بيدرسوا طبعا علوم عربي
وانا كنت هنا بدرس انجليزي

مش دايما القصة دي حبا في حروف العم سام


طبعا فيه نقاط كتير قيمة جدا جدا وعامة إلى حد ما
زي وجود مربع التعليق مع كلمة تأكيدية في نفس الصفحة
بس انا اكتر من مدون مكنوش عارفين يعملوا صفحة مستقلة للتعليقات ازاي
لحد ما يتطوع معاهم حد ويوريهم

انا الحاجة الوحيدة اللي بتضايقني
الوحيدة بمعنى الكلمة اللي بجد صعوبة شديدة في اكمال اي تدوينة معاها

ان تكون المدونة سوداء
ساعتها بيجي لي تتح في عيوني ومش بقدر اقرأ
وساعات اتحايل على صاحبها ودايما دايما يطلع حد ذوق ويغير اللون :)

تحياتي

ريمان يقول...

السلام عليكم

ازيك يا جميل

انا عجبنى اوى النقاط اللى انتى وضحتيها وبجد نفسى كل المدونين ياخدوا بالهم من النقط دى

انا متفقه معاكى لحد هنا بس من اول ما كتبتى الاسباب اللى مش بتخلكى تعلقى عند بعض الناس انا هنا توقفت شويه ومش متفقه معاكى بس طبعا دى حريتك الشخصيه وانا مش من حقى اتدخل فيها

انا اه لو حد منزل صوره مش حلوه فى البوست مستحيل اعلق عنده وبرضه لو صاحب المدونه ملحد مش هتابعه طبعا وشم هسمحله يدخل عندى بس لو كاتب اى موضوع او منقول او عن السياسه انا احب اشارك برايى وبالنشبه لى مفيش حاجه اسمها مش عارفه اعلق اقول ايه

انا الوقتى عرفت ليه مش بتعلقى عندى فى مدونتى انا كنت بستغرب بجد بس الوقتى عرفت لانك عندى بتعلقى على مواضيع معينه

انتى مش بتحبى الخواطر الرومانسيه على فكره والله مش كل اللى بيكتبوا رومانسى بيكونوا عايشين قصص حب وكده لا ابدا فى كتير اوى بيكتبوا كنوع من التنفيس وبيكتب من خياله او بيحلم بحاجه وبيعيشها فى اشعاره مش شرط تكون خواطر شخصيه
لكن برضه كل واحد وحسب راحته

تحياتى لكى

موناليزا يقول...

بسكوتة
ــــــــ
أهلا بيكِ فى زيارتك الأولى
أشكرك جدا لاتفاقك معى ولتعليقك الجميل
نورتِ مدونتى وفى انتظارك دائما



**********************************



ستيتة حسب الله الحمش
ـــــــــــــــــــ
أهلا اهلا بنبض الحكمة
سعيدة بتعليقك وسأرد على جميع النقاط

فعلاً الرصد من وجهى نظرى الشخصية وأكيد مش كل الناس هتتفق معى :)


بالنسبة لتغيير قالب المدونة مش بيضايقنى على قد ما بيلخبطنى لأنى ببقى متعودة على قالب معين مثلاً عند أحدهم فلما أروح له على فترات متقاربة وأجده فى كل مرة بيغير القالب ببدأ أشك إذا كنت دخلت له قبل كده ولا لأ وخصوصاً لو كنت لسه عارفة مدونته جديد
وتغيير القالب طبعا ياحبيبتى مش حرام ولا ضد التدوين( زى ماتقولى كدة على مااخد على المكان وبعدين يبقى يغيره براحته:))


مش وضع الموسيقى بس اللى أقصده أى مادة صوتية سواء محاضرة اسلامية أو نشيد أو أغنية أو موسيقى...)
لأنها بتقل الجهاز أو ببقى مشغلة حاجة عندى أو عايزة أقرأ بتركيز وما إلى ذلك
يعنى ملهاش دعوة بالحلال والحرام:)


أما عن حجم الخط فماقدرش طبعا أقول حاجة للناس المبتدئة بس فيه ناس قديمة فى عالم التدوين وبيكتبوا بخط صغير يكاد لا يرى:)
وناس تانية عايزين يبينوا ان الموضوع مهم فيكبروا الخط أوى والحروف تبقى على بعضها:)


أما عن الديانة والجنسية
مهمة جداً طبعا:)
أقولك ليه يا ستى
لأن أنتِ عارفة أن أختك تلقائية واللى بييجى فى دماغى وأنا بقرأ الموضوع هو اللى بكتبه
وكنت بعانى مثلا لو قلت كلمة دارجة عندنا فى مصر وألاقى صاحب المدونة مش فاهمها وفى الاخر اعرف انه مغربى مثلا:)
والديانة طبعا مهمة لأنى ممكن أستشهد بآية قرآنية أو موقف نبوى وألاقى رد مش ظريف وما إلى ذلك


الحروف انجليزى والكلام عربى هو انا معاكِ ان فيه ظروف ممكن تكون خارجة عن الإرادة لكن لما حد يكتب موضوع فى مدونته بالعربى ويعلق عندك بانجليزى معرب ليكِ حق تستغربى:)

وانا كمان الموضوع ده بيضايقنى ونسيت اكتبه:)
ان الخلفية تكون سودا فعلا مش مريحة للعين خالص

بجد سعيدة جدا بمشاركتك وبفتح مساحة للنقاش
نورتينى غاليتى وفى انتظارك دائماً




***********************************


ريمان
ـــــــ
وعليكم السلام ورحمة الله وبركاته
أهلا اهلا بالقمر
أنا الحمدلله بخير ماتحرمش من سؤالك
أشكرك جدا لاتفاقك معى فى بعض النقاط
وأحييكِ على قدرتك على التعليق فى أى موضوع

ريمو أوعى تكونى زعلتى منى بجد:(
لأنى مش بعلق على بعض ما تكتبى
والموضوع مالوش علاقة بحالة الكاتب وإذا كان الكلام ده بجد ولا لأ
بس له علاقة بيا
يعنى العيب فيا أنا:)
بس بجد ماتزعليش منى لأن فيه ناس برضه لما عرفوا أنى ما بعلقش على الخواطر الرومانسية خدوا منى موقف:(

أشكرك جدا لتعليقك واوعى تكونى زعلتى
أنتِ عارفة غلاوتك عندى وانى مقدرش على زعلك
نورتينى ريمو الجميلة وفى انتظارك دائماً

رفقة عمر يقول...

ازيك موناليزا
اخبارك ايه يارب تكونى بخير
انتى سبحان الله كتير بتكتبى فى امور انا بافكر فيها
بس انت ماشاء الله صياغتك اللغويه افضل منى
معلش انا كنت ضعيفه فى اللغه العربيه جداا
حتى معذبه معلمتى اللى بتحفظنى القران فى نطق الحروف وفى الحركات تخيلى بيقت كويسه فى التجويد الحمدلله ولسه الحركات مش عارفه اظبطها
الله المستعان
بخصوص غلقى للتعليقات
اولا انا مش فاضيه ااقرا مدونات ولا اعلق عند حد
وللاسف التدوين فيه مجاملات يعنى لو علقتى عندى اعلق عندك فحبيت اوفر عن الناس مجهود انهم يعلقوا مجامله
لو حسيت ان فيه موضوع محتاج لنقاش هافتح التعليق
لكن لو موضوع بيتكلم عن خواطر شخصيه او عن امر دعوى ساظل غلقه التعليقات
وكدة انا ارتحت جداا
حسيت انى بقيت اكتب براحتى دون انتظار تعليقات من احد

إمرأه من ثلج يقول...

حبيبتى جيجى
البوست دة تناول نقاط هامة أوى ياريت كلنا ناخد بالنا منها

زة ان المدونة بتبقى تقيلة عند الفتح

وان مش شرط نعلق على الواضيع كلها الان ممكن موضوع ميكنش عجابنى
او الصمت بيبقى افضل

تحياتى وودى

(المهاجر الى الله) يقول...

السلام عليكم ورحمة الله وبركاته :
كيف حالك اختى الفاضلة امة الله ، اروا من الله تعالى ان تكونى بافضل حال واتم صحة وخير مآل .
الله عليكى ، قد ايه انتى حيادية وموضوعية ، وانا فعلا الان ايقنت بان هناك ما يسمى تراسل الافكار ، كنت من حوالى كام يوم باتكلم من نانا زايد صاحبة مدونة اخر العنقود عن ظاهرة هروب المدونين الى الفيسبوك ، وان المدونات بدأت تفقد بريقها وحيويتها ، نظرا الى ان معظم المدونين ذهبوا الى الفيس بوك ، واخذنا نحلل تلك الظاهرة ونضع كل الاحتمالات ، وكنت قد نويت ان اكتب مقالا عن هذه الظاهرة مناشدا المدونين ان يعودوا الى ما كانوا عليه ، فعلا انا بقيت اشعر بالدفء والراحة فى مجتمع التدوين سواء فى بلوجر او مكتوب او غير ذلك ، بردو المدونات لها بريق خاص ميقدرش الفيسبوك ولا التويتر ولا المايسبيس انه يعوضه .، وانا نفسى اتعديت من الظاهرة دى ويمكن عشان كدة حاسس بشىء من الضيق .

تحياتى ليكى على كل موضوعاتك الجميلة وتدوينات اللى دوما وابدا هادفة وفى الصميم .

موناليزا يقول...

رفقة عمر
ـــــــــــ
أهلا اهلا بالقمر
أنا الحمدلله بخير ماتحرمش من سؤالك
سبحان الله الأفكار عند بعضها:)
أنا بقى رغم حبى للغة العربية بس برضه حاسة أنى مش متمكنة فيها أوى:)
تعرفى الموضوع محتاج تدريب وسبحان الله انا نطقى ماتظبطش غير لما بدأت أعرف التجويد لدرجة أنى حتى لو بقول أغنية للأطفال ولقيت فيها حرف ال"ذ" مثلاً لازم أقوله بطرف لسانى:)

وجهة نظرك نحترم جدا
ربنا يوفقك دايما لما فيه الخير والرشاد
نورتينى ياجميلة واسعدنى تواجدك


*********************************


امرأة من ثلج
ــــــــــــــ
أهلا اهلا بالقمر
هو "جيجى" ده الدلع الجديد لـ"موناليزا":)
أشكرك جدا لرأيك ولمشاركتك
نورتينى ياجميلة واسعدنى تواجدك



*********************************


كلمات من نور
ــــــــــــــ
أهلا اهلا بالغالية
فعلا الشعور بافتقاد ناس كتير محزن حقاً
سؤالك وجيه غاليتى:)
بس سؤالى ليهم هو ايه الميزة اللى شايفينها فى الفيس بوك؟؟؟
وبعدين احنا هنفضل نسأل بعض ونجاوب كمان وهما مش سامعينا أصلاً:)
دعاءى بأن يرد الله إلينا كل صاحب قلم محترم وهادف قريباً
نورتينى غاليتى وتسعدينى حقاً بتواجدك



*********************************



إبتسامة ملاك
ـــــــــــ
أهلا اهلا بالقمر
مفيش حد كامل وكلنا مليانين عيوب بس بنحاول نصلح من انفسنا قدر المستطاع
بس كده انتِ ماقلتيش ايه اكتر حاجة بتضايقك فى اى مدونة بتدخليها؟
وامتى ماتعلقيش عند حد؟
فى انتظار اجابتك:)
نورتينى انوسة الجميلة واسعدنى تواجدك



**********************************


الطالبة عفو الله
ــــــــــــــــ
أهلا اهلا بالقمر
أشكرك جدا لاتفاقك معى
وطلبك من عينيا يا حبيبتى ابعتيلى ايميلك وانا ابعت لك الكود لانه مابينفعش يتكتب فى التعليق
نورتينى زوزو الجميلة واسعدنى تواجدك



*********************************


جنى
ــــــ
وعليكم السلام ورحمة الله وبركاته
أهلا بيك أستاذ سعيد
أشكرك جدا لاتفاقك مع بعض ما ذكرته وأحييك على ذكر ما تختلف معى فيه
أما عن الشاشة السوداء رغم احترامى للأسباب المطروحة بس بجد مرهقة للعين

وفعلا يافندم فقد احترمت عدم غلقك للمدونة رغم غيابك لما فيها من مواضيع قيمة ممكن يستفيد بها أى قارئ
ولذلك نرجو من اى مدون يغيب لاى سبب نحترم اسبابك مهما كانت ونرفض غلق المدونة

يافندم حضرتك تطول براحتك وياريت بجد لو فيه اى سلبيات مش موجودة فى الموضوع وتريد إضافتها فيسعد مدونتى استقبالها
أشكرك جدا لمشاركتك
نورتنى واسعدنى تواجدك



*********************************



حصان المرجيحة
ـــــــــــ
أهلا بيك يافندم
أشكرك جدا لتعليقك
نورتنى واسعدنى تواجدك



*********************************


ماجد القاضى
ــــــــــــــ
وعليكم السلام ورحمة الله وبركاته
أهلا بيك أستاذ ماجد
ربنا يكرمك يارب فماتوفيقى الا بالله
أشكرك جدا لمشاركتك
نورت مدونتى وفى انتظارك دائما


********************************


أبو صهيب
ــــــــــ
أهلا بيك يافندم
أشكرك جدا لاتفاقك معى
نورتنى واسعدنى تواجدك



********************************



المهاجر الى الله
ـــــــــــــــ
وعليكم السلام ورحمة الله وبركاته
أهلا بيك أستاذ طارق
أنا الحمدلله بخير أشكرك جدا لسؤالك
ونحن فى انتظار ما سيخطه قلمك فى هذا الشأن
وبما أن حضرتك اتعديت من هذه الظاهرة فممكن تقولنا ايه الميزة اللى موجودة فى الفيس بوك؟ والتى تجعل لبعض يذهب اليه؟

ربنا يكرمك يارب أشكرك جدا لرايك فيما اكتب فما توفيقى الا بالله
نورتنى واسعدنى تواجدك

طوبه فضه وطوبه دهب يقول...

عايزه اقولك ان حقا قلمك يستحق ان يحترم وموضوعاتك تنول اعجابى دائما ولكن ما يمنعنى كثيرا عن التعليق ليس اى شىء سوى ضيق الوقت واتممنى ان تسامحينى عليه واحييكى بشده على ما كتبتى فى ذلك الموضوع جعله الله فى ميزان حسناتك واضم صوتى لصوتك فى السؤال اين ذهب اصحاب المدونات ولماذا تخلى كل عن قلمه؟؟؟؟؟؟ ربنا يكرمك ويسعد قلبك اختى الكريمه

الطائر الحزين يقول...

رصد رائع
كلنا أدرى بحالة

مشخبطاتي يقول...

السلام عليكم..

أتفق معكم في أمور الفنيات مثل إستخدام الألوان وماشابهها..وأيضاً مراعاة الآداب العامة مثل أسلوب الحوار بين المدونين والمدونات .. :)


وتحياتي.

مشخبطاتي يقول...

لكن طبعاً كل واحد يقول مايريد بشرط ألا يجرح غيره وهذا مفهوم الحرية عندي..أن حريتي تقف عند حرية الآخرين ..

فالمساحة المتاحة لنا لندون فيها فرصة جيدة جداً لإبراز الأفكار ومناقشة مافيها..

وآسف على التعليق مرتين..وتحياتي كمان مرة.

إمرأه من ثلج يقول...

بجد أنا أسفة أختلطت عليا الأسماء

غلطة مطبعية

مع تحياتى

يا موناليزااااااااااااااااا

محمود المصرى يقول...

اعتقد انك اذا جيت عندى هتسيب تعليق وانا هتشرف بتعليقك حتى لو شتيمه اخوك محمود المصرى
www.mahmodalmasre.blogspot.com

ذكرى رحيل قلم يقول...

السلام عليكم


شكرا موناليزا لاقترحاتك وموضوعك الهادف ان شاء الله الكل يستفيد من النقاط المنشورة

علي فكرة مش شرط اكتب تعليق عنك وارجع وانتظر الرد عادي الرد لو مهم في ناس وانا منهم بنروح ونرد في مدونة صاحب التعليق
اما من لا يرد في تعليقاته اله اعلم بظروف الغير وليس استهوان بصاحب التعليق

لذا انت تردين علي اكثر من شخص في تعليق واحد وهذا اذا دل سيدل علي عدم الفراغ

فقط لا غير


دمتي بحب وود

ahmed_k يقول...

صدقتي يا أختي في كل ما ذكرتي
وفي الأغلب انا ايضا المدونات الثقيله أغلقها وربما لا اعود لها مرة اخرى
وبالنسبه لمن يضعون اغاني او موسيقى فذلك بيؤدي بي إلى التشتيت الذهني بحيث لا أستطيع القراءه إلا بعد البحث عن مكان الأغنيه وغلقها
والحمد لله دورت بين ثنايا نقدك لعلي اجد أحدهم ينطبق على مدونتي فلم اجد من وجهة نظري انا , ولكن غيري قد يرى لدي مالا اراه فلو وجدتي ما يزعجك لدي فلا تبخلي علي بالنصيحه
فالدين النصيحه

تقبلي اخلص تقديراتي

طهر فؤادك يقول...

السلام عليكم ورحمة الله وبركاتة

جزاكى الله خيرا والمسلمين

مش قولتللك احنا بنتعلم منك كتير بارك الله فيكى فعلا بوست تحليلى جميل للافكار والاسباب ووجهات النظر فربنا يجزيكى خير علية ...

- واكيد كل واحد لية وجهة نظر اهم حاجة كما علمنا ديننا الجميل السمح عدم التجريح والمساس بالاخرين ..

بارك الله فيكى وربنا يتقبل منك ومنا والمسلمين صالح الاعمال

حمـــــــــــــــــــــة يقول...

لفتة مهمة و تحليل منطقي
و لكن ظروف كل شخص تختلف عن الآخر تكون عائقاأحيانا كثيرة
و لو أني عن نفسي أعتبر نفسي مقصرا
قراءة و تعليق...........زد على ذلك ما تعرضت له "تهم" و حتى "الشتم" صدمني و جعلني أسأل نفسي:
لماذا كل هذا؟
رغم أني لم أتعرض لأي جهة بعينها
هنا التفسير الوحيد هو عدم توفر الوعي الحقيقي.... وفاقد الشيء لا يعطيه
و هذا ما يفسر التغيير الفجئ أو حتى التواري من طرف البعض
ثانيا التعامل مع "المدونات"
شخصيا أحاول البعد عن الإطراء المجاني
أنظر الى الفكرة فقط و عليه أحدد ردودي موافقا أو معارضا بإقتضاب
أما عن الإفصاح عن الإسم الحقيقي و الجنس فهذا من حق الجميع و يجب توفره
علما أحيانا يكتب المرء للخروج من الحالة المقرفة التى هو عليها أو فيها
.................
تمنياتي لك المزيد من التألق و شكرا

موناليزا يقول...

طوبة فضة وطوبة دهب
ــــــــــــــــــــ
أهلا اهلا بالقمر
ربنا يكرمك يارب فماتوفيقى الا بالله
ياحبيبتى عذرك معاكِ
وسعيدة بضم صوتك لصوتى فى السؤال عن المدونين
نورتينى ياجميلة واسعدنى تواجدك



*********************************


الطائر الحزين
ــــــــــــــــ
أهلا بيك يافندم
اشكرك جدا لرايك ولتعليقك
نورتنى واسعدنى تواجدك



********************************


مشخبطاتى
ـــــــــــ
وعليكم السلام ورحمة الله وبركاته
أهلا بيك يافندم
أشكرك جدا لاتفاقك معى فى بعض ما ذكرت
وعندك حق طبعا فى مفهوم الحرية
أشكرك جدا لتعليقك
نورتنى واسعدنى تواجدك



********************************


امرأة من ثلج
ــــــــــــــ
أهلا بيكِ
ولا يهمك ياحبيبتى:)
فكرته دلع جديد لاسمى:)
نورتينى ياجميلة وفى انتظارك دائما



***********************************


محمود المصرى
ــــــــــــ
أهلا بيك أستاذ محمود فى زيارتك الاولى
بإذن الله هزور مدونتك قريبا
ولا تقلق فليس من شيمى أن أشتم:)
نورت مدونتى وفى انتظارك دائما


*********************************


ذكرى رحيل قلم
ــــــــــــــ
وعليكم السلام ورحمة الله وبركاته
أهلا اهلا بالقمر
هى وجهة نظر غاليتى
ولكنى اتكلم بصفة شخصية فانا اعتبرها هكذا
اما عن ردودى على التعليقات فى تعليق واحد فهذا ليس تقليل ابدا من شأن المعلقين ولكن لانى لا افضل ان تكون نصف عدد التعليقات عبارة عن ردودى
أشكرك جدا لرايك ولمشاركتك
نورتينى ياجميلة واسعدنى تواجدك



********************************

أحمد-ك
ــــــــ
أهلا بيك أستاذ أحمد
أشكرك جدا لمشاركتك ولاتفاقك معى
واطمن اخى الكريم فمن انشد فيه الخير اقول له دائما عما لا يروقنى فى مدونته
ومدونتك بالنسبة لى مريحة جدا وغير مرهقة بالمرة
نورتنى واسعدنى تواجدك



********************************



طهر فؤادك
ــــــــــــ
وعليكم السلام ورحمة الله وبركاته
أهلا بيك يافندم
ربنا يعزك ويبارك فيك ما توفيقى الا بالله
(اللهم لاتؤاخذنى بمايقولون واغفرلى مالايعلمون واجعلنى خيرا مما يظنون)
أشكرك جدا لرأيك ولتعليقك
وفعلا أهم شئ ألا نجرح الآخرين
نورتنى واسعدنى تواجدك


*******************************


هاما
ـــــ
أهلا بيك يافندم
أشكرك جدا لرأيك و لتعليقك
نورتنى واسعدنى تواجدك

salwa يقول...

السلام عليكم اخت موناليزا
مدونتك من المدونات التي احرص دائما على زيارتهالان مواضيعك دائما مفيدة
لكي اطيب التمنيات و كل الشكر
التدوين صفة المدون
اكتفي بهذا
سلام

عـــفـــراء يقول...

السلام عليكم ورحمة الله وبركاته
ازيك يامنى يارب تكونى بكل خير وكل سنة وانتى طيبة ووالدتك وكل ام بخير
وحشتونى ووحشنى التدوين جدا يارب يساعدنى وارجع ان شاء الله
موضوعك حلو اوى وجايز يكون انت عندك حق فى كل كلمه قولتيها تعقيبا على قفل المدونه لان احيان النفس البشرية بتحكم لالانسان وبتاهلة لاشياء مش مريحه وبالتالى بتنعكس على كل شيئ امامه
بمعنى ان احيانا بتيجى فترة على الواحد بيكون متفى تماما من كل اللى حواليه فبيكون محتاج راحة نفسية او وقفة لاعادة النفس اصل مش معقول ماحدش هيقفل ويرجع تانى الا اذا اكيد به شيئ
وربنا يهون علينا جميعا
وكل سنه وانتم بالف خير
وماتنسيش تتدعيلي يامنى
خالص تقديرى ........

Alaasalim2 يقول...

السلام عليكم


بجد فعلاً التدوينه دي مهمه جداً وموضوعيه جداً جداً .

فعلاً ربنا وفقك في إختيار أهم النقاط اللي مش بس لا تروق ليكي لكن أظن إنها بتضايق جميع من يتابعون المدونات سواء من المدونين أو من غير المدونين

وطبعاً عرض هذه النقاط بهذا الشكل المجمع والمرتب مفيد لأصحاب المدونات اللي ممكن مش واخدين بالهم من بعض هذه النقاط

akeed يقول...

السلام عليكم
جزاكِ الله خيراً اختى فى الله فعلاً انكِ قد تعرضتى لنقاط هامة جداً فى المدونات يعانى منها الكثير و بكل بساطه ممكن كل مدون يسأل نفسة ما هو الهدف من مدونتة هل ليكون مشهوراً بين المدونين و تكثُر التعليقات فى مواضيعة أم هدفة ان تكون صدقة جارية له ينفع الناس بها و يذكر اخوانة و اخواتة بطاعة الله و ان تكون لهاضوابط شرعية مثل عدم وجود اغانى بها طبعاً غير الاناشيد الاسلامية و ايضاً الصور الخادشة فليسأل كل منا ذلك السؤال و يجاوب علية .

و لو تحبى تضعى هذا الاقتراح فى أخر الموضوع سوف يكون خيراً إن شاء الله

و فقك ِ الله لما فيه الخير لما يحبه و يرضاه

موناليزا يقول...

سلوى
ـــــ
وعليكم السلام ورحمة الله وبركاته
أهلا اهلا بالقمر
ربنا يكرمك يارب أشكرك جدا لرايك فما توفيقى الا بالله
نورتينى سلوى الجميلة واسعدنى تواجدك



**********************************



عفراء
ــــــــ
وعليكم اسلام ورحمة الله وبركاته
أهلا اهلا بالقمر بعد طول غياب
أنا الحمدلله بخير ماتحرمش من سؤالك
وأنتِ طيبة ياحبيبتى وبالصحة والسلامة
وأنتِ كمان وحشتينا وافتقدنا وجودك بينا وان شاء الله يكون رجوع دائم

أنا معاكِ اننا بشر وفيه ظروف كتير بتكون خاجة عن الارادة بس الناس اللى اتعلقول بقلمنا من حقهم علينا مانسيبهمش كده

ربنا يهيئلك كل الخير ويوفقك لما يحبه ويرضاه ويسعدك ياحبيبتى ويرضى عنك ويفرحنا بيكِ قريب اللهم امين

نورتينى غاليتى واسعدنى حقاً تواجدك



********************************



علاء سالم
ـــــــــــ
وعليكم السلام ورحمة الله وبركاته
أهلا بيك أستاذ علاء
ربنا يكرمك أشكرك جدا لرأيك
وأرجو ان تعم الافادة على الجميع
نورتنى واسعدنى تواجدك



*********************************



أكيد
ـــــــ
وعليكم السلام ورحمة الله وبركاته
أهلا بيك يافندم
ربنا يكرمك واشكرك جدا لرايك ولمشاركتك
وهذا فعلا نوهت عنه بهذه المقولة(من حقك تكتب فى مدونتك ما تريد ومن حقى أقرأ ما أستفيد منه).

نورتنى واسعدنى تواجدك

Dr. Ibrahim يقول...

(من حقك تكتب فى مدونتك ما تريد ومن حقى أقرأ ما أستفيد منه).

دى نقطة مهمة جدا

فدعوة لأن نفيد لا أن نكتب مالايفيد
عسى أن يكون فى ميزان حسناتنا

موناليزا يقول...

د/ ابراهيم
ــــــــــــ
أهلا بيك يادكتور
صح جدا
أشكرك جدا لتعليقك
يسعدنى دوام التواصل

نسيبه يقول...

السلام عليكي ورحمة الله وبركاته
طبعاما قلتيه هو آداب عامه ولكي كل الحق فيها وأنا أضيف أحيانا لاأعلق لنفس الأسباب تقريبا ولكن أهمها أني لاأجد ما أقوله
ربنا يرضي عنك ويعزك بطاعته دائما
بحبك في الله

موناليزا يقول...

نسيبة
ـــــــ
وعليكم السلام ورحمة الله وبركاته
أهلا اهلا بالقمر
سبب قوى فعلاً:)
ربنا يكرمك ياحبيبتى
وماتحرمش منك ابدا
نورتينى حبيبتى واسعدنى تواجدك